ATV

Tag: Lëvizja Vetëvendosje

  • Deputeti i LV-së: Jemi të gatshëm për zgjedhje, partitë opozitare po bëjnë garë mes veti për vendin e dytë

    Deputeti i LV-së: Jemi të gatshëm për zgjedhje, partitë opozitare po bëjnë garë mes veti për vendin e dytë

    Lëvizja Vetëvendosje është e bindur se në zgjedhjet e ardhshme parlamentare do të shënojnë rezultat më të lart sesa në zgjedhjet e vitit 2021. Në partinë në pushtet, thonë se janë të gatshëm për zgjedhje, qofshin ato të parakohshme gjatë këtij viti, apo të rregullta në fillim të vitit 2025. Sipas tyre, mandati i dytë i qeverisë Kurti, do të jetë i përmbylljes së shumë reformave dhe proceseve të nisura në mandatin e parë.

    Deputeti i LV-së, Adnan Rrustemi, thotë se bazuar në punën e bërë gjatë këtyre tri viteve, vlerësimit të opinionit të qytetarëve përmes sondazheve dhe lehtësirave për votimin e mërgatës në ambasada, do të tejkalojnë 50 për qind në zgjedhjet e ardhshme.

    “Vetëvendosje është e gatshme për zgjedhje, qofshin ato të parakohshme apo të rregullta në kalendarin e rregullt ligjor. Nëse zgjedhjet e parakohshme paraqiten dhe krijohen në rrethana të tilla, ne padyshim jemi të gatshëm… Vetëvendosje shkon në këto zgjedhje e përgatitur dhe gatshme dhe bindur se si rrjedhojë e punës që ka bërë gjatë këtij mandati dhe vlerësimit të opinionit të qytetarëve përmes sondazheve, por edhe si rrjedhojë e lehtësirave që kemi bërë për mërgatën përmes Ligjit për zgjedhje të përgjithshme, konsiderojmë se do të shënojmë rezultat edhe më të lartë sesa kemi shënuar më 14 shkurt 2021. Mandati i dytë duhet të jetë përveç i përmbylljes së shumë reformave dhe proceseve të nisura në mandatin e parë, duhet të jetë një mandat i zhvillimit të një niveli tjetër për të kaluar Kosova në një nivel krejtësisht tjetër të zhvillimit të brendshëm ekonomik dhe sundimit të ligjit”, thotë ai.

    Sipas tij, partitë opozitare po bëjnë garë mes veti për vendin e dytë dhe për të tejkaluar sfidën e pragut elektoral.

    “Ka një garë vërtet në kampin opozitar, ato po shtyhen me njëra-tjetrën dhe krejt ky diskutimi dhe diskursi për zgjedhje në fakt është një lloj përballje e partive opozitare me njëra-tjetrën, natyrisht duke goditur Vetëvendosje në mes. Partitë politike opozitare duke qenë të bindura se s’kanë asnjë gjasë për të fituar zgjedhjet, ata po shtyhen për ranglistën mes tyre. Atyre po iu intereson se cila prej tyre do të jetë e para në mesin e partive opozitare dhe e dyta në skenën politike. Po ashtu kanë edhe vlerësimet e tyre sesi duhet tejkaluar sfidën e pragut elektoral”, thekson Rrustemi.

    Duke folur për dialogun Kosovë-Serbi, Rrustemi, thotë për KosovaPress, se pa nënshkrim të marrëveshjes të Brukselit dhe Ohrit, s’mund të ketë zbatim.

    “Për Qeverinë e Kosovës, zbatimi dhe përmbushja e marrëveshjes së Brukselit në këtë fazë, nënkupton njohjen reciproke de-facto të njëra-tjetrës dhe kjo do të ishte një sinjal i vet Serbisë për kapërcimin e mohimit të shtetit të Kosovës ka ana e saj… Nuk mund të ketë zbatim pa nënshkrim, pasi nënshkrimi nënkupton pranim, nënkupton edhe marrje e përgjegjësisë për të zbatuar. Por përtej kësaj nënshkrimi i një marrëveshje ndërkombëtare mes dy palëve është gjëja më normale dhe është një shenjë e mirëbesimit se palët janë të gatshme dhe interesuara për të zgjidhur problemet dhe normalizuar raportet. Refuzimi i Serbisë për të nënshkruar marrëveshjen është shprehje e qartë se është vazhdim i refuzimit për të njohur realitetin dhe shtetin e Kosovës”, shton deputeti i mazhorancës.

    Krahas kësaj, deputeti i partisë në pushtet e sheh si inkurajuese nisjen e mbledhjes së nënshkrimeve për shkarkimin e kryetarëve të katër komunave veriore.

    “Ka filluar mbledhja e nënshkrimeve për largimin e (kryetarëve në veri), kërkohet 20 për qind të votuesve të regjistruar të atyre komunave, pastaj është faza e dytë që është votimi për largimin e kryetarëve, e që duhet të marrin pjesë 50 për qind plus një të votuesve të tërësishëm të asaj komune për të larguar kryetarët, e më pastaj që të kalohet në fazën e tretë për mbajtjen e zgjedhjeve të parakohshme…Ne inkurajojmë mbledhjen e nënshkrimeve, është veprim qytetarë dhe demokratik. Në secilin komunë qytetarët mund të ndërmarrin iniciativën për të kërkuar largimin e kryetarit të komunës”, thotë Rrustemi.

    Ndërkaq, Rrustemi, deklaron se pranimi i targave RKS nga Serbia, si dhe zbatimi i marrëveshjes për energji, nuk është qasje konstruktive nga Serbia, por pranim i realitetit në teren pas insistimit të Qeverisë së Kosovës.

  • Shabani: Opozitë më e madhe e vetvetes ka qenë LV-ja, se sa opozita

    Shabani: Opozitë më e madhe e vetvetes ka qenë LV-ja, se sa opozita

    Gazetari dhe analisti Zekirja Shabani, në emisionin DIREKT në ATV, tha se është fatkeqësi që Kosova nuk ka një opozitë të fuqishme të aftë për ta mbajtur përgjegjëse Qeverinë e Kosovës.

    Sipas tij, opozitë e vetvetes ka qenë Lëvizja Vetëvendosje.

    “Ne nuk kemi pasur një opozitë të fuqishme as prej PDK-së, as prej LDK-së e as prej AAK-së, të aftë dhe të gatshme për ta mbajtur përgjegjëse Qeverinë e Kosovës. Prandaj, opozitë e vetvetes në njëfarë forme ka qenë Vetëvendosja me ato telashet e brendshme që i ka shpërfaqë kohë pas kohe dhe i ka dirigju vazhdimisht punët e opozitës në Kuvendin e Kosovës”, tha Shabani.

    Ai thotë se deklarimet në Kuvendin e Kosovës më shumë kanë qenë shou se sa deklarime të përfaqësuesve të partive politike në vend.

    “Prandaj e kemi edhe një qeveri arrogante, ndoshta shpesh herë të papërgjegjshme, pikërisht për shkak të mungesës së zërit të opozitës”, u shpreh Shabani.

    Intervistën e plotë të gazetarit Zekirja Shabani, në emisionin DIREKT në ATV e gjeni në videon më poshtë:

  • ​PDK-ja kërkon shpërbërjen e Kuvendit, LVV thotë se kjo s’do të ndodh

    ​PDK-ja kërkon shpërbërjen e Kuvendit, LVV thotë se kjo s’do të ndodh

    Përfaqësues të Lëvizjes Vetëvendosje po akuzojnë opozitën për mos votimin e marrëveshjeve ndërkombëtare në Kuvendin e Kosovës, derisa përfaqësuesit e Partisë Demokratike të Kosovës, thanë se nuk ka kuptim të votohen marrëveshjet sepse vendi është i sanksionuar si pasojë e veprimeve të Qeverisë.

    Mbledhja e kryesisë së Kuvendit të Kosovës sërish ka dështuar në mungesë të koriumit, pasi aty nuk kanë marrë pjesë nënkryetarët e Kuvendit nga PDK dhe LDK, të cilët po bojkotojnë punën e Kuvendit.

    Ndërkohë, u tha se sot ose nesër presin që kryetari i Kuvendit të Kosovës, Glauk Konjufca të caktojë seancë për ditën e enjte.

    Shefja e grupit parlamentar të Lëvizjes Vetëvendosje, Mimoza Kusari-Lila tha se sot ose nesër presin që kryetari i Kuvendit të Kosovës, Glauk Konjufca të caktojë seancë për ditën e enjte, derisa është pyetur se deri kur do të vazhdojnë me mungesë kuorumi dhe moskordinim me opozitën.

    “Besoj që kjo është pyetje për përfaqësuesit e opozitës, ne do të vazhdojmë me atë që na lejon rregullorja dhe Kushtetuta, që të sigurohemi që në veçanti disa ligje që janë tepër me rëndësi të miratohen gjatë kësaj periudhe kohore, edhe tri javë të mbetura që janë të sesionit pranveror. Jemi mobilizuara maksimalisht në mbajtje të korumit dhe votim të suksesshëm në seanca. Sa i përket marrëveshjeve ndërkombëtare, është fakt i ditur se pa qenë 80 deputetë, ato nuk mund të hedhen në votim, prandaj si të tilla mbesin në obligim dhe përgjegjësi të opozitës. Arsyet siç i keni parë nuk kanë qenë të artikuluara në formën që mund të ketë qartësi se kur mund të kryhet kjo. Fillimisht kanë mohuar zgjedhjet, pastaj kanë kërkuar zgjedhjet tjetri grup… ne i konsiderojmë totalisht të pa pranueshme, totalisht të paarsyeshme dhe natyrisht që ndoshta dëmi më i madh që i bëhet vendit“, tha ajo, derisa ka mohuar se mund të shpërbëhet kuvendi.

    “Jo absolutisht, Kuvendi për shpërbërje duhet t’i ketë dy të tretat. Ne nuk shohim që ka telashe në Kuvendit përveç që ato që po i krijon opozita të paqena por puna jonë me pozitën do të vazhdojë. Sesioni pranveror vazhdon punën deri në fund të korrikut dhe pastaj në gusht shkohet në pushim siç është paraparë”, tha ai.

    Shefi i grupit parlamentar të Partisë Demokratike të Kosovës, Abelard Tahiri ka thënë se ky Kuvendi nuk meriton asnjë ditë të vetme të shpenzojë taksat e qytetarëve kur është kaq jofunksional.

    “Duhet të shpërbëhet sa më parë. I kemi dhënë mundësi edhe kryeministrit nga java e kaluar ose ta shpërbëj Kuvendit ose të jap dorëheqje dhe koha është që vendi ynë të shkoj në zgjedhje të parakohshme. Ju e shihni që çdo ditë e më shumë po thellohet kriza, ju e shihni edhe marrëzitë që i bëjnë qeveritarët tanë karshi partnerëve tanë, ju e shini që çdo ditë e më shumë vendi ynë po sanksionohet nga ShBA, BE dhe nga vendet e BE-së veç e veç, çdo ditë kemi lajme që vendet veç e veç siç ishte Gjermania para dy dite po marrin masa ndaj Republikës së Kosovës. Ne nuk të mbijetojmë të izoluar dhe as që e kemi ndërmend që ta ndihmojmë në izolimin e vendit…ne nuk do të votojmë. Tani e tutje nuk do t’i votojmë as marrëveshjet ndërkombëtare, as projektligjet dhe asgjë, me qëllimin e vetëm që sa më shpejt ta qojmë vendin në zgjedhje, që sa më shpejt ta largojmë një qeveri të paaftë, që tashmë ka krijuar një krizë jashtëzakonisht të madhe, një krizë që mundet me ardhë Republika jonë për të pas sanksione nga ShBA dhe BE“, tha ai, duke shtuar se njerëzit që fusin një vend në krizë, nuk janë më kredibil që ta nxjerr vendin nga kriza, prandaj, si në Kuvend, ashtu edhe jashtë do të angazhohen për zgjedhje të reja.

    Ai shtoi se do t’i përdorin të gjitha masat e mundshme, të nevojshme që t’ia pamundësojnë punën Kuvendit, duke mos dhënë detaje nëse kjo i bije edhe në pengimin e mbarëvajtjes së seancave.

    “Ne në ditët në vijim do t’ua bëjmë me dije për secilin hap që do të ndërmarrim. Tani për tani nuk do të votojmë asnjë projektligj, asnjë marrëveshje ndërkombëtare. Çfarë kuptimi ka kur jemi të sanksionuar të votojmë marrëveshje ndërkombëtare, edhe ashtu këto janë të fundit sepse kjo qeveri nuk mund të sjellë më marrëveshje ndërkombëtare, nuk ka asnjë shtet, asnjë organizatë ndërkombëtare që nënshkruan marrëveshje me këtë qeveri të sanksionuar”, tha ai.

    Sipas tij, është detyrë e PDK-së për ta nxjerr vendin nga kjo krizë që ka shkaktuar pozita. /kp

  • Dardan Molliqaj zbulon ofertën që ia bëri Vetëvendosja për të qenë pjesë e saj – Do të habiteni

    Dardan Molliqaj zbulon ofertën që ia bëri Vetëvendosja për të qenë pjesë e saj – Do të habiteni

    Kryetari i PSD-së, Dardan Molliqaj, në emisionin LIBERO në ATV, zbuloi për herë të parë ofertën që i kishte bërë Vetëvendosja vetëm për të qëndruar në parti.

    “Vetëvendosja na ka ofru gjithçka me qenë në Vetëvendosje. Praktikisht mundem me e ba për herë të parë publike, pas problemit, diku 2-3 javë para se me dalë edhe zyrtarisht që po e lëmë Vetëvendosjen, mua me ka ardhur Liburn Aliu edhe më tha, ‘të gjitha pozitat, zgjidhe cilën të duash veç tri jo, kryeministër, kryetar partie edhe sekretar’. Krejt tjerat tha, çfarëdo që kem në institucione, në parti, nënkryetar, e këso tjerat, veç rri në Vetëvendosje”, tregoi Molliqaj.

    Ai tha se për këtë arsye, nuk besoj që dikush duhet të marrë ndonjë pozicion politik vetëm sa për ta pasur. /atvlive.tv

    Emisionin e plotë e gjeni në videon më poshtë:

  • ​LVV-ja e kritikon Lajçakun një ditë para takimit në Bruksel

    ​LVV-ja e kritikon Lajçakun një ditë para takimit në Bruksel

    Lëvizja Vetëvendosje ka ashpërsuar kritikat ndaj përfaqësuesit të Bashkimit Evropian për dialogun Kosovë-Serbi, Miroslav Lajçak. Një ditë para takimit të kryenegociatorëve në Bruksel, partia në pushtet po konsideron Lajçakun si të anshëm në proces të dialogut, sidomos pas deklaratave se “draft-statuti i ish-ekipit menaxhues duhet të jetë pikënisje për Asociacionin”.

    Deputeti i Lëvizjes Vetëvendosje, Armend Muja, thotë për KosovaPress se qëllimi i Lajçak është që të ofrojë një version ekstrem për Asociacionin dhe jo një version real dhe të thotë “ejani takohemi kah ‘mesi’ për të bërë një kompromis”.

    Mirëpo, kjo sipas deputetit Muja është e papranueshme. Ai thekson se ndërmjetësuesi i dialogut, por edhe të tjerët duhet të kuptojnë se Asociacioni nuk mund të kalojë asnjë milimetër jashtë kornizës kushtetuese të Kosovës.

    “Propozimet që i ka pasur Lajçak është që të ofrojë një ekstrem atje dhe një ekstrem këtu dhe ‘hajde të takohemi kah mesi’. Nuk është politika ashtu, as shteti nuk funksionon, besa nuk po funksionojnë as trendët evropianë në atë mënyrë. Qëndrimi jonë prej fillimit ka qenë se Kushtetuta e Kosovës dhe ligjshmëria janë alfa dhe omega. Çfarë ka brenda asaj Kushtetute mund të shikohet se si mund të përmirësohet pjesëmarrja politike e secilit komunitet në Kosovë, por një milimetër jashtë Kushtetutës së Kosovës nuk mund të kalojë. Kjo në Kosovë nuk kalon, këtë duhet ta ketë parasysh edhe zotëri Lajçak dhe të tjerët”, thekson ai.

    Duke folur për takimin e nesërm në Bruksel, të kryenegociatorit të Kosovës, Besnik Bislimi me atë serb, Petar Petkoviq, anëtari i kryesisë së LVV-së, akuzon Serbinë për moszbatim të marrëveshjeve.

    Ai thotë se në Bruksel do të bisedohet për zbatim të sekuencuar të marrëveshjes bazë të 27 shkurtit dhe aneksit të 18 marsit në Ohër.

    “Zotëri Lajcak ka pas kohë pas kohe kah një qëndrim të anshëm. Ideja ka qenë se Serbia ka shkelur në vazhdimësi marrëveshjet, përfshirë edhe marrëveshjen e fundit që ishte në Bruksel. Por ka tendenca gjithmonë ‘hajde t’i gjejmë edhe Kosovës diçka dhe pastaj të themi se të dyja po e shkelin kapak’. Merrini shikoni 39 marrëveshje dhe dakordime dhe shikoni se Serbia e ka një qasje se një herë dakordohet për marrëveshje pastaj duhet pikë për pikë sërish me u dakordu. Janë shumë të papërshtatshëm në marrëdhënie ndërkombëtare”, shton Muja.

    Në anën tjetër, Muja thotë se kandidatët që kanë fituar mandatet në katër komunat veriore nuk do t’i djegin ato.

    Përkitazi me këtë, ai nënvizon se institucionet e Kosovës do të vazhdojnë t’i forcojnë kapacitetet në veri.

    “Shteti i Kosovës do të vazhdojë t’i forcojë kapacitetet në veri dhe t’i ikë tendencave që ne të shkëputemi nga komuniteti atje. Është e rëndësishme që të kemi kujdes si e ushtrojmë autoritetin dhe ajo të jetë sipas kushtetutës. Është me rëndësi që të kemi një qasje të barabartë ndaj secilit qytetarë të Kosovës pa ndonjë ngarkesë dhe me shumë maturi. Pasi këto situata kërkojnë maturi”, deklaron ai.

    Krahas këtyre, Muja bën të ditur se shumë shpejt do të zgjidhet ngërçi në Kuvend, sa i përket të hyrave vetanake të komunave.

    Ai thotë se kanë marrë iniciativën për ndryshimin e Ligjit për buxhetin, më saktësisht amendamentit të propozuar vitin e kaluar nga LDK, meqenëse sipas tij kjo e fundit nuk po e adreson kërkesën për përmirësimin e gabimit të tyre dhe lëshimin e mjeteve vetanake të komunave edhe të viteve paraprake.

    “Nga shefja e grupit dhe unë jemi duke punuar në dy javët e fundit në këtë pikë të barrikadimit. Këta s’po e bëjnë dhe ne po duhet të gjejmë mënyra për hir të kryeqytetit të ecet… Meqenëse ata e bënë vet amendamentin, mirë adresoje kërkesën, pastaj qeveria aty e ka detyrë ta trajtojë dhe ta sjell në Kuvend dhe adresohet. Por meqenëse këta nuk po e bëjnë ne kemi marrë iniciativën në dakordim me Komunën e Prishtinës që të tejkalohet ky ngërç”, përfundon Muja.

    Gjatë kësaj jave në Kosovë dhe Serbi qëndroi përfaqësuesi i BE-së për dialogun, Miroslav Lajçak.

    Ai nënvizoi nevojën për implementimin e marrëveshjes Kosovë-Serbi, derisa përsëriti se Asociacioni duhet të jetë në përputhje me vlerat evropiane.

  • Abazi: Vasfije Krasniqi nuk kishte probleme shëndetësore, ishte e pakënaqur me Vetëvendosjen

    Abazi: Vasfije Krasniqi nuk kishte probleme shëndetësore, ishte e pakënaqur me Vetëvendosjen

    Deputeti Haki Abazi, i cili ka ndarë rrugët me Lëvizjen Vetëvendosje, ku dje u përjashtua nga grupi parlamentar i kësaj partie, në një intervistë në emision DIREKT në ATV, tha se ish-deputetja Vasfije Krasniqi nuk ishte larguar nga pozita e deputetes për shkak se kishte probleme shëndetësore, por sipas tij, ajo nuk ishte e kënaqur me Vetëvendosjen.

    “Zonja Vasfije Krasniqi Godman është e para që është larguar. Për herë të parë po them që aty ka pasur përplasje të mos respektimit të marrëveshjes dhe të diskutimeve që janë bërë si pjesë e diskutimit për t’u përfshirë brenda në listë”, tha Abazi. /atvlive.tv

    Emisionin e plotë e gjeni në videon më poshtë:

  • A është bërë Haki Abazi “pishman” që ndihmoi Kurtin të bëhet kryeministër

    A është bërë Haki Abazi “pishman” që ndihmoi Kurtin të bëhet kryeministër

    Deputeti Haki Abazi, i cili dje u përjashtua nga grupi parlamentar i Lëvizjes Vetëvendosje, në një intervistë në emision DIREKT në ATV, tha se nuk është pishman që e ka ndihmuar Albin Kurtin të vijë në pushtet.

    “Jo aspak. Unë në kohën kur kam marrë vendim për të bashkëpunuar dhe për t’i përkrahur, qëllimi kryesor ka qenë që të vijë në pushtet, që qeverisje një klasë e re politike që është e pa korruptuar, e pa kriminalizuar me kapacitete që të hapë dyert për diasporën, intelektualët dhe të nisemi në një proces tjetër që e këputë tranzicionin e gjatë 20 vjeçar”, tha Abazi.

    Por, sipas tij kjo nuk ka ndodhur.

    “Qartazi, punësimet janë familjare, qartazi, kriteret për kualitetin e qeverisjes nuk janë duke u përmbushur qoftë në aspektin e zhvillimit ekonomik qoftë në marrëdhënie ndërkombëtare. /atvlive.tv

    Emisionin e plotë e gjeni në videon më poshtë:

  • Aplikimi për BE simbolik – procesi mund të zgjasë 30 vjet, ish-kolegët thonë se Kurti po fokusohet veç në dialog

    Aplikimi për BE simbolik – procesi mund të zgjasë 30 vjet, ish-kolegët thonë se Kurti po fokusohet veç në dialog

    Ish-bashkëpartiakët e kryeministrit Albi Kurti, e kanë kritikuar qasjen e Qeverisë së tij sa i përket procesit të integrimit në arenën ndërkombëtare.

    Sipas tyre kjo Qeveri gjatë këtyre viteve më shumë ka pasur çnjohje se sa njohje të reja. Ata kanë shtuar se Qeveria është fokusuar më shumë në çështjen e dialogut me Serbin edhe pse kjo nuk ka qenë fillimisht prioritet.

    Sa i përket aplikimit të Kosovës për statusin e vendi kandidat në Bashkimin Evropian, ata thonë se ky proces lidhte me suksesin që do të ketë procesi i dialogut me Serbinë.

    Ish-anëtari i Vetëvendosjes, Nol Nushi, tani sekretar organizativ në Partinë Socialdemokrate, ka thënë se aplikimi i Kosovës për statusin e vendit kandidat në BE është më shumë si një aplikim simbolik, pasi sipas tij, ky proces do të zgjas deri në 30 vjet që të përfundoj.

    “Unë atë e kam parë më shumë si aplikim simbolik duke e parë situatën edhe luftës në Ukrainë ku u angazhuan në NATO Finlanda dhe ndodhën disa zgjerime kështu të përshpejtuara edhe Kosova e bëri këtë aplikim në këtë linjë, me demek krahu perëndimorë kundër Rusisë. Nuk shohë ndonjë zhvillim të shpejt aty sepse edhe po të pranohen duan 20-30 vite që të përfundoj, në rastin më të mirë. Kështu që nuk besoj që është temë që ka me na brengos së shpejti”, tha ai.

    Ai tha se fati i Kosovës është lidhur me fatin e dialogut me Serbinë. Nushi shton se për dy vjet në këtë qeverisej më shumë ka pasur çnjohje se sa njohje të reja, e krejt kjo ai thekson që ka ndodhur si shkak i qasjes së gabueshme të Qeverisë.

    “Fati i shtetit të Kosovës praktikisht është lidh me fatin e dialogut me Serbin, krejt këta qeveritar sot që qeverisin kanë thënë dikur që neve nuk kemi njohje sepse ka korrupsion, ka keq qeverisje, janë të pa aftë qeveritë. Për dy vitet të Kurtit ka më shumë çnjohje, se njohje nuk ka hiq edhe ne gjithmonë kemi qen pro dialogut dhe pro kompromisit në dialog në mënyrë që problemi i Kosovës të zgjidhte një herë e përgjithmonë ndërkombëtarisht”.

    “Ne e konsiderojmë Kosovën shtet të pa varur dhe sovran, problemi është që shumica e botës, e shteteve nuk po na konsiderojnë të tillë. Qysh ndodh ko ndodhë duke e zgjidh problemin me Serbinë. Këtu nuk po më duket se ka qasje nga qeveria jonë, qasje që donë me zgjidh problemin që ta përfundojmë këtë problem. Më shumë po duket një tentativë e Kurtit edhe e Vuçiqit që të investojnë në këtë problem vazhdimisht, që të mos ndalet sepse po ju shërben për elektorat të brendshëm. Në këtë linjë nuk shoh ndonjë përparim të njohjeve, fatkeqësia ke që edhe mas marrëveshjes Ohrit, shtet si Spanja, Greqi që pritej që do të na njeh deklaruan nga Beogradi që nuk ndryshojnë ndryshim. Perspektiva është e zymtë sepse qasja e qeverisë është problematike”, tha ai.

    Ish-deputeti i VV-së Afrim Kasolli, tha se të gjitha proceset e agjendës integruese të Kosovës krahas plotësimit të kritereve, lidhen edhe me suksesin që do ta ketë dialogu Kosovë- Serbi.

    “Sa i përket në përgjithësi agjendës integruese, krahas plotësimit të kritereve të brendshme në mas shumë të madhe do të varet edhe nga dinamikat e dialogut. Në fund të fundit të gjitha raportet e progresit si për Kosovës e po ashtu edhe për Serbinë që janë bërë deri më tani në mënyrë eksplicite e theksojnë se njëri prej kritereve në agjendën integruese të të dyja vendeve është edhe suksesi në dialog. Krahas plotësimit të kritereve të domosdoshme që janë të parapara edhe ky dimension është një kusht i pa tej kalueshëm për të pasur sukses”, tha ai.

    Kasolli i tha Ekonomia Online se Qeveria e Kosovës deri më tani ka qenë e fokusuar në temën e dialogut me Serbinë, prandaj sipas tij, në politikën e jashtme nuk ka asnjë njohje.

    “Në përgjithësi nuk e ka karakterizuar ndonjë dinamik specifike, madje nuk ka qenë thuajse temë kryesore. Qeveria e Kosovës deri më tani kryesisht ka qenë e fokusuara në temën e dialogut, kjo ka qenë tema qendrore, dominuese në politikën e saj të jashtme nuk kemi asnjë njohje, nuk kemi diçka tjetër pavarësisht faktit që premtimi kryesor i Qeverisë ka qenë që tema e dialogut nuk do të jetë prioritet për të. Por praktikat ka dëshmuar që kjo është shndërruar në prioritet politik të saj”, tha ai. /EO

  • Rrustemi: Dikur ka qenë përjashtim me e gjet një zyrtar të ndershëm, sot është përjashtim me e gjet një zyrtar të pandershëm

    Rrustemi: Dikur ka qenë përjashtim me e gjet një zyrtar të ndershëm, sot është përjashtim me e gjet një zyrtar të pandershëm

    Deputeti i Lëvizjes Vetëvendosje Adnan Rrustemi, në emisionin CONTEXT në ATV, tha se botëkuptimi i Qeverisë së tashme është për mos me e keqpërdor detyrën zyrtare, ndërsa sipas tij, në qeveritë e kaluara ishte e kundërta.

    “Unë e mbroj botëkuptimin që qeverisja e jonë është e pa korruptuar dhe në kuptimin e vlerave dhe sjelljes edhe e pa korruptueshme. Është rregulli i qeverisjes tonë për mos me e keqpërdor detyrën zyrtare e paranë publike, ndërkohë që e kundërta ka qenë, rregulli i qeverisë së kaluar me e shfrytëzua pozitën për përfitime personale e të rrethit tuaj.

    Ai tha se në të shkuarën, ka qenë përjashtim me dalë një zyrtar i ndershëm, por sot sipas tij, rregulli është me qenë të gjithë të ndershëm, ndërsa përjashtim mund të jetë një. /atvlive.tv

  • Kurteshi: Në aspektin ligjor zgjedhjet janë të pranueshme

    Kurteshi: Në aspektin ligjor zgjedhjet janë të pranueshme

    Anëtar i KQZ-së nga Lëvizja Vetëvendosje, Sami Kurteshi, në emisionin A23 në ATV, ka thënë se zgjedhjet e 23 prillit në katër komunat e veriut të vendit, në aspektin ligjor janë të pranueshme, transmeton atvlive.tv.

    “Legjitimiteti është një koncept që përmban disa aspekte, nuk është vetëm një aspekt. Legjitimiteti nuk është vetëm numra, nuk është vetëm statistika, nuk është vetëm demografi, legjitimiteti ka edhe aspektin juridik dhe ashtu siç thash ligjor dhe në aspektin ligjor, nuk ka asnjë pengesë”, tha Kurteshi.

    Sipas tij, as në aspektin politik, rezultati i zgjedhjeve nuk ka ndonjë pengesë.

    “Republika e Kosovës, jo vetëm që e ka përgjegjësi, por e ka detyrim kushtetues që të zhvillojë zgjedhjet për shprehjen e vullnetit dhe ndërtimin e institucioneve demokratike. Në normat ligjore tonat, nuk ka ndonjë kufizim apo kuotë me të cilën legjitimohet në aspektin statistikor zgjedhjet”, tha Kurteshi. /atvlive.tv