Emisari i Bashkimit Evropian për Dialogun Kosovë-Serbi Miroslav Lajçak, ka paralajmëruar diskutime mes ekipeve të negociatorëve të Kosovës dhe të Serbisë për javët në vazhdim.
Ai, me anë të një postimi në rrjetin social Facebook, ka deklaruar se javën e kaluar në bisedimet që i pati me kryenegociatorët e Kosovës dhe të Serbisë për dialogun arritën njëfarë progresi.
“Përderisa kjo javë nis me pikat e tjera të mandatit tim, java e kaluar ishte tërësisht e fokusuar në atë kryesoren – dialogun për normalizim. E nisa duke pritur kryenegociatorët për një raund tjetër të negociatave të dialogut në Bruksel”.
“Ne diskutuam rrugën përpara për zbatimin e marrëveshjes së 27 shkurtit dhe synuam t’i qartësojmë çështjet që kanë mbetur të hapura. Ndërsa gjetja e bazës së përbashkët mund të jetë sfiduese, ne arritëm njëfarë progresi. Diskutimet tona do të vazhdojnë sërish në javët në vijim”, ka thënë Lajçak.
“Përderisa kjo javë nis me pikat e tjera të mandatit tim, java e kaluar ishte tërësisht e fokusuar në atë kryesoren – dialogun për normalizim. E nisa duke pritur kryenegociatorët për një raund tjetër të negociatave të dialogut në Bruksel”.
“Ne diskutuam rrugën përpara për zbatimin e marrëveshjes së 27 shkurtit dhe synuam t’i qartësojmë çështjet që kanë mbetur të hapura. Ndërsa gjetja e bazës së përbashkët mund të jetë sfiduese, ne arritëm njëfarë progresi. Diskutimet tona do të vazhdojnë sërish në javët në vijim”, ka thënë Lajçak.
Kuvendi i Kosovës bën të ditur se një delegacion i kryesuar deputeti Driton Hyseni është duke qëndruar në ditën e dytë të punimeve të sesionit pranveror të Asamblesë së Parlamentare të NATO-s.
Në njoftimin e lëshuar thuhet se delegacioni i Kosovës se kishin takime me delegacionin e Kanadasë, SHBA-së, Danimarkës, Gjermanisë, Sllovakisë, si dhe me delegacionet e Holandës e Finlandës.
“Temat e diskutimit përfshinin kërkim-mbështetjen e Kosovës në proceset e përfshirjes sa më të madhe të delegacionit te Kuvendit të Republikës se Kosovës në AP të NATO-s, si dhe ne institucionet e organizatat tjera ndërkombëtare”.
“Gjithashtu, në sesionin e Komisionit për Politikë, Driton Hyseni ngriti çështjen e përfshirjes në mënyrë specifike të Kosovës në raportin e Audronius Azubalis ‘E ardhmja e politikës së dyerve të hapura të NATO-s’, ku përfshihen vendet tjera të Ballkanit Perëndimor”.
“Pas diskutimit të kryetarit të delegacionit të Kuvendit të Kosovës, raportuesi e pranoi se do të bëjë përfshirjen e Kosovës në raportin e këtij viti”, thuhet në njoftim.
Sot në Dhomat e Specializuara në Hagë vazhdon gjykimin ndaj krerëve të ish-Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi.
Edhe sot do të flas dëshmitari i pestë i cili filloi dhënien e dëshminë, javën e kaluar, një pjesë e së cilës u dha në seancë private dhe një pjesë në seancë publike.
Ndryshe javën e kaluar, ka dhënë dëshminë edhe dëshmitari i katërt i thirrur nga Zyra e Prokurorit të Specializuar në çështjen gjyqësore Hashim Thaçi dhe të tjerët vazhdoi dhënien e dëshmisë.
Gjatë kësaj kohe Mbrojtja mori në pyetje dëshmitarin. Dëshmitari e dha dëshminë në seanca private.
Po ashtu Trupi Gjykues shprehu shqetësimin se pothuajse të gjitha dëshmitë deri tani në këtë çështje gjyqësore janë dhënë në seanca private ose të mbyllura, dhe u kujtoi palëve se është në interesin publik që ky proces të zhvillohet, për aq sa është e mundur, në mënyrë publike.
Trupi Gjykues udhëzoi palët të mbajnë parasysh parimin e procesit publik dhe lëshoi një urdhër gojor ku kërkoi parashtrime mbi hapat konkretë për të siguruar një shkallë më të lartë publiciteti të procesit gjyqësor.
Seancat në DHSK janë publike përveçse kur Trupi Gjykues vendos të mbajë seancë të mbyllur ose të kalojë në seancë private në përputhje me Rregulloren e Procedurës dhe të Provave.
Sipas rastit, Trupi Gjykues vendos që pjesë të procesit gjyqësor t’i mbajë në seanca private ose të mbyllura dhe arsyeja kryesore është mbrojtja e sigurisë dhe identitetit të dëshmitarëve dhe viktimave.
Mbrojtja, Prokuroria, ose mbrojtësi i viktimave mund të kërkojnë që e gjithë seanca, ose pjesë të saj, të mbahet në seancë private ose të mbyllur. Vendimi i gjykatësve për miratimin ose jo të kërkesës merret pas shqyrtimit të kujdesshëm, ndër të tjera edhe të rrethanave specifike të dëshmisë ose argumenteve të planifikuara për atë ditë.
Gjykatësit kujdesen që të balancojnë nevojën për të mbrojtur dëshmitarët me të drejtat e të akuzuarve.
“Pra, edhe kur dëshmia e dëshmitarit nuk është publike, të akuzuarit dhe mbrojtësit e tyre mund të dëgjojnë se çfarë thotë dëshmitari dhe kanë të drejtë ta marrin në pyetje dëshmitarin”, Michael Doyle, zëdhënës i DHSK-së në inforimin javor.
Në Urdhrin mbi Zhvillimin e Gjykimit, Trupi Gjykues në çështjen Thaçi dhe të tjerët bëri të qartë se “argumentet ligjore dhe paraqitja e provave nga palët dhe pjesëmarrësit do të bëhet në seanca të mbyllura ose private vetëm kur të jetë absolutisht e domosdoshme.
Seancat në gjykimin e Hashim Thaçit, Kadri Veselit, Rexhep Selimit dhe Jakup Krasniqit për këtë javë janë planifikuar të vazhdojnë nga sot deri të mërkurën.
Kryeministri i Kosovës, Albin Kurti, të hënën do të pres në taim dy senatorë amerikane, Chris Murphy dhe Gary Peters.
Kështu ka treguar zyra e kryeministrit teksa ka publikuar agjendën e Kurtit për sot.
Takimi me senatorët do të nis në ora 15:00.
Ky takim me senatorët nuk përbën gjithë agjendën e kreut ë ekzekutivit.
Kurti në ora 10:00 do ta vizitojë Qendrën Korrektuese të Dubravës, me rastin e 24-vjetorit të masakrës në Burgun e Dubravës. Ndërsa, në ora 18:00 kryeministri do të marrë pjesë në hapjen e ”Bibliotekës së Adem Demaçit”.
Tash e tri vjet Kosova nuk ka ligj për investimet strategjike. Ndërkohë që as projektligji për investime të qëndrueshme ende nuk është shqyrtuar në Kuvendin e Kosovës.
Kjo sipas përfaqësuesve të komunitetit të biznesit po u shkakton telashe të mëdha.
“Ky ligj ka disa vite që është dashtë të vazhdohet dhe të ndryshohet dhe fatkeqësisht është shtyrë shumë. Kjo është një nga urgjencat më të mëdha që i duhet Kosovës në mënyrë që të nxisim investime vendore dhe të huaja për të pasur mundësi tërheqjen e këtyre investimeve dhe mundësinë që investimet që janë duke pritë me vite, të cilat fatkeqësisht një pjesë e madhe janë kthyer nga ligji i mëhershëm për investime strategjike të mund të jepet mundësi të kthehen”, tha kryetari i Bordit të Dhomës së Tregtisë dhe Industrisë, Skënder Krasniqi.
Sipas kryetarit të Odës Ekonomike të Kosovës, Lulzim Rafuna, Qeveria është vonuar në procedimin e këtij ligji.
“Është shumë e nevojshme që të procedohet më shpejtë Projektligji i ri për investime të qëndrueshme. Është një ligj i mirë punuar, shumë më i avancuar sesa ligji që është për momentin, sepse ligji që është në fuqi nuk ka qenë edhe shumë lehtësues për sjelljen e investimeve të huaja. Së paku, në ligjin e ri janë të parapara kriteret, kushtet, janë të parapara edhe fusha ku shteti i konsideron si fusha për investime strategjike”, tha Rafuna.
Pakënaqësi lidhur me mos procedimin e ligjit, kanë shprehur edhe deputetët nga Partia Demokratike e Kosovës dhe Aleanca për Ardhmërinë e Kosovës.
“Parimisht qeveria është vonuar shumë, sepse tashmë po bëhet më shumë se një vit që institucionet e shtetit nuk kanë ligj për investime strategjik. Kjo ka ndodhur për shkak të neglizhencës së qeverisë dhe paaftësisë për të hartuar një ligj kompatibil me nevojat dhe rrethanat ekonomike që ka Kosova”, tha deputeti i PDK-së, Ferat Shala.
“Sa i përket investimeve strategjike, Kosova ka ngecur edhe për shkak të mungesës së ligjit, mirëpo edhe për shkak të qeverisë që nuk është bërë joshëse për investitorët, e sidomos për ata strategjik që ndikojnë dukshëm në zhvillimin ekonomik”, tha deputeti i AAK-së, Pal Lekaj.
Ndërkaq nga Lëvizja Vetëvendosje, kanë bërë të ditur se ky ligj do të jetë në rend të ditës në seancën e parë që do të mbahet në Kuvend, ku edhe presin kontribut nga deputetët. /atvlive.tv
I mbijetuari i masakrës në Burgun e Dubravës, deputeti i Lëvizjes Vetëvendosje Enver Dugolli, i ka bërë kërkesë publike Gjykatës Speciale që të fillojnë hetimet për këtë masakër.
Ai vlerëson se ka dhënë mjaftueshëm argumente që Specialja të nis hetimin e kësaj masakre. Por, pavarësisht kësaj ai ende nuk ka marrë një përgjigje nga Zyra e Prokurorit të Specializuar.
“Jo nuk kam marrë ende asnjë përgjigje, por të them të drejtën dhe nuk pres përgjigje të shpejt, por pres përgjigje meritore, pozitive që të fillojnë hetimet për masakrën e Dubravës për shkak se në letrën e parë apo kallëzim penal edhe pse se ka pas emrin kallëzim penal, por materia e letrës është kallëzim penal.Është dokumentuar me shkresat që i kam përcjell edhe gjendja faktike numri i dëshmitarëve më pastaj krejt ajo që ka ndodhur në masakrën e Dubravës… Besoj që argumentet që i kam sjellë në atë letër por edhe në letrën që e kam nisur drejt Hagës janë materiale të padiskutueshme dhe të argumentueshme që gjykata Speciales, gjegjësisht Prokurori i Dhomave të Specializuara ka autoritet dhe autorizime, por edhe juridiksion lëndor e mos të flasim për juridiksion territorial e personal edhe kohor për shkak se të tria as që diskutohen, mirëpo për juridiksionin lëndor kam nis…edhe disa argumente që janë në favor të kërkesës sime”, tha Dugolli.
Sipas tij, nëse kjo nuk ndodh, nga Gjykata Speciale duhet të deklarohen se janë të njëanshëm.
“Masakra e Dubravës është një ndër masakrat që askush deri më tani nuk është dënuar kanë nisur disa procese, por kanë mbetur në gjysmë, pra mos ndëshkueshmëria është prezente që përmendet në raportin e Dick Martyt, janë krime të organizuara dhe të ekzekutuara…pra ekzistojnë të mjaftueshme që kjo gjykatë, gjegjësisht Prokuroria e Dhomave të Specializuara të fillojë hetimet ose në të kundërtën le të dalin dhe lë të thotë se kjo gjykatë është një etnike gjë, të cilën e ka mohuar kryetarja e Dhomave të Specializuara”, tha Dugolli.
Ndërkohë, avokati i akredituar nga Specialja, Artan Qerkini tha se gjithmonë ka pasur dyshime nëse kjo gjykatë do t’i gjykojë drejt krimet e pretenduara në Kosovës.
“Gjithsesi se është një test dhe ky veprim është i duhuri ngase gjithmonë ka pas dilema se Gjykata Speciale a do t’i trajtojë të gjitha krimet e pretenduara në Kosovës, apo vetëm krimet e pretenduara të kryera nga UÇK-ja. Kështu që, tani është një test për Gjykatën Speciale, sepse kallëzimi penal është me shkrim dhe natyrisht që deputeti Dugolli do të duhej të merrte një përgjigje me shkrim që edhe përgjegjësitë për masakrën e Dubravës të procedohen penalisht para Dhomave të Specializuara dhe të shohim se si do ta arsyetojë prokurori nëse eventualisht e hedh atë kallëzim penal apo ta shohim edhe ndoshta do ta pranoj”, tha Qerkini.
Megjithatë, sipas Bekim Blakajt nga Fondi për të Drejtën Humanitare ekziston mundësia që ZPS mos ta merr parasysh kallëzimin penal të Dugollit, meqenëse neni i 6 i ligjit të Dhomave të Specializuara në Hagë, ja mundëson këtë gjë.
“Deputeti Dugolli e ka vënë në test Prokurorinë Speciale të Dhomave të Specializuara të Kosovës megjithatë ligji për këto Dhoma të Specializuara në nenin 6 e parasheh saktë se cili është juridiksioni lëndor i këtyre gjykatave dhe aty thuhet qartë se juridiksioni lëndor janë krimet e pretenduar që kanë qenë subjekt në raportin e Këshillit të Evropës të hartuar nga Dick Marty…Ky neni 6 është i qartë dhe aty ne e dimë që subjekt i hetimeve të Task-Forcës speciale hetuese kanë qenë krimet e pretenduara nga UÇK nga pala shqiptare dhe nuk përmenden krimet masive të kryera nga forcat serb…Do ta shohim se si do të jetë përgjigja, mirëpo mendoj se ky nen do t’ia jap një hapësirë Prokurorisë Speciale që mos ta marrë parasysh kallëzim penal të bërë nga deputeti Dugolli”, tha Blakaj.
Para 24 viteve, në masakrën e Burgut të Dubravës u vranë 160 të burgosur shqiptar, ndërkohë më shumë se 300 të tjerë, të burgosur nga regjimi i Sllobodan Millosheviqit janë plagosur. /atvlive.tv
Mosnjohja nga pesë shtetet e Bashkimit Evropian, vazhdon të jetë peng për anëtarësimin e Kosovës në këtë institucion.
Parakusht sipas diplomatëve ndërkombëtar është themelimi i Asociacionit të Komunave me Shumicë Serbe.
Ndërkohë në Komitetin për Punë të Jashtme të Senatit amerikan, që u mbajt tre ditë më parë, Escobar potencoi se themelimi i asociacionit ka rëndësi sa i përket raporteve të Kosovës me pesë vendet mos-njohëse.
“Një nga gjërat që këto pesë vende kanë kërkuar është implementimi i plotë i marrëveshjes bilaterale. Për disa arritja e një marrëveshje finale luan rol krucial për synimet e tyre politike. Për t’i hapë rrugë këtij presioni ne duhet të shohim implementim. Dhe nga ana e Kosovës, njerëzit presin që Kosova të implementojë Asociacionin”, tha Escobar.
Megjithatë, analisti Tomor Avdiaj, vlerëson se themelimi i asociacionit, nuk do shënonte hapin kyq që do qonte drejt një njohjeje të shpejtë nga pesë vendet mos-njohëse.
“Kërkesa e atyre është për zbatimin e këtij plani, por nuk mendoj që pas themelimit të asociacionit do të ketë njohje të shpejtë nga këto vende, pasi ato vende presin një raport tjetër. Ato presin që Serbia të jetë dakorduar për shumë gjëra, duke përfshirë këtu edhe një llojë njohje De-Jure”, tha Avdiaj.
Ndërkaq, pesë vendet e Bashkimit Evropian të cilat nuk e njohin ende Kosovë janë Qipro, Greqia, Rumania, Sllovakia dhe Spanja.
Ndërkaq, gjatë mbledhjes së komitetit për Politikë të Jashtme të Senatit Amerikan Escobar dhe Chollet theksuan se nuk përkrahin asnjë formë të Republika Srpskës në Kosovë. /atvlive.tv
Kosova do të jetë nikoqire e organizimit ushtrimit më të madh ushtarak të SHBA-së që nga lufta e dytë botërore.
Në mesin e 25 vendeve të botës, 1300 ushtarë nga Kosova do të jenë bashkë me mbi 22 mijë ushtarë nga shtetet pjesëmarrëse në ushtrimin ndërkombëtar “Defender 2023”.
Ky sipas komandantes supreme të Ushtrisë së Kosovës, është simbol i vendosmërisë kolektive për ta ruajtur paqen dhe stabilitetin në botë.
“Së bashku ne jemi më të fortë kundrejt forcave që kërkojnë të na ndajnë, duke dëshmuar se uniteti e bashkëpunimi ynë janë çelës për një të ardhme më të sigurte e paqësore. Objektivi kryesor është që ta shfaqë aftësinë ushtarake dhe luftërave të ShBA-ve dhe forcave aleate kundër agresorëve të mundshëm. Ky ushtrim është historik në shumë aspekte, veçanërisht për ushtrinë më të re në kontinentin evropian, për forcën tonë të sigurisë”, tha Osmani.
siguria e kontinentit evropian, sipas kryeministrit Kurti është interes jetik i Kosovës, si shtet që beson në atë që e do – të drejtat e njeriut, sundimi i ligjit, paqe dhe demokracinë.
“Defender 2023 po zhvillohet në një realitet të tensionuar 15 muaj pas invazionit rus në Ukrainë, dhe se që si i tillë ka të bëjë drejtpërdrejtë jo vetëm me të ardhmen e Evropës, por edhe mbarë botës, prandaj përgatitja për tu përballë me kërcënime të paparashikueshme është e domosdoshme”, tha Kurti.
Ministri i Mbrojtjes, Armend Mehaj vlerëson se Forca e Sigurisë së Kosovës është e gatshme për të përmbushur cdo detyrë.
“Ngritjen e kapaciteteve tona do t’i bëjmë gjithmonë sipas standardeve të NATO-s. Sepse rruga dhe rrugëtimi ynë është i qartë. Destinacioni ynë është një dhe i vetmi: anëtarësimi në NATO. Prandaj, ne do të jemi përmbushës të çdo detyre, çdo obligimi që kërkohet që ne të bëhemi pjesë e familjes euro-atlantike”, tha Mehaj.
Ambasadori i Amerikës në Kosovë, Jeff Hovenier, përgëzoi Forcën e Sigurisë së Kosovës, për arritjet gjatë këtyre viteve.
“Këtu në pjesën e stërvitjes në Ballkan, na vjen shumë mirë që po e shohim Forcën e Sigurisë së Kosovës si një prej kontribuesve më të mëdhenjtë të këtij ushtrimi me pjesëmarrjen e 1 mijë e 300 vetave. Me siguri më është thënë që kjo është ndërmarrja më e madhe dhe më ambicioze që FSK-ja ka ndërmarrë deri tani. Në më pak se katër vjet prej krijimit të FSK-së, kemi qenë të mahnitur dhe të lumtur me përparimin e FSK-së dhe me mirënjohjet e shumta gjatë historisë së saj profesionale”, tha Hovenier.
Në këtë ushtrim ushtarak të SHBA-së, Kosova merr pjesë për herë të dytë, derisa ushtarëtë e FSK-së janë në mesin e ushtrive të shteteve të ndryshme që do të marrin pjesë në këtë stërvitje që do të mbahen në Babaj të Bokës së Gjakovës. /atvlive.tv
I dërguari i posaçëm i Shteteve të Bashkuara të Amerikës për Ballkanin Perëndimor, Gabriel Escobar, vlerësoi se marrëveshja për normalizimin e marrëdhënieve ndërmjet Beogradit dhe Prishtinës është një “arritje e madhe” dhe se ajo paraqet një “hap historik përpara” në zhvillimin e marrëdhënieve ndërmjet Serbisë dhe Kosovës.
Në një intervistë për agjencinë Mina, Escobar tha se “nuk sheh arsye” pse marrëveshja për çështjet e mbetura të mos mund të arrihet deri në fund të verës.
Siç tha ai, në Serbi ka disa elemente që duhet të plotësohen sa i përket njohjes së targave të veturave, letërnjoftimeve dhe disa gjërave të tjera.
“Në Serbi janë disa elemente që duhet të plotësohen sa i përket njohjes së targave të veturave, kartave të identitetit dhe disa gjërave të tjera. Edhe nga Kosova pritet të formojë Asociacionin e komunave me shumicë serbe. Në fakt, nuk është pritshmëri. Është obligim”, tha Escobar.
Ai tha se Shtetet e Bashkuara duan që këto procese të zhvillohen sa më shpejt që të jetë e mundur.
“Nuk shoh asnjë arsye pse të mos mund të përfundojë deri në fund të verës”.
Ai përkujtoi se marrëveshja mes dy palëve është ligjërisht e detyrueshme dhe se tani shtrohet pyetja se si të zbatohet plotësisht.
Escobar tha se është optimist se qëllimi do të arrihet dhe beson se kryeministri i Kosovës, Albin Kurti dhe presidenti i Serbisë, Aleksandar Vuçiq “mund të tregojnë guximin e nevojshëm politik për të ndërmarrë hapat e duhur”.
Më 27 shkurt, Kosova dhe Serbia arritën Marrëveshjen për normalizimin e marrëdhënieve në Bruksel, ndërsa më 18 mars, në Ohër, u pajtuan për aneksin për zbatimin e saj. /REL
Deputetja e LDK-së, Hykmete Bajrami e ka akuzuar Ministrinë e Financave që buxhetin e planifikuar me Ligj për këtë vit e ka 3.2 miliardë euro, por sot e kësaj dite i mbanë të bllokuara 37.5 milionë euro, mjete këto vetanake të komunave.
Bajrami ka shkruar në Facebook se si pasojë, janë qindra projekte kapitale që komunat as nuk mund t’i iniciojnë, sepse ministri i financave, Hekuran Murati, nuk lejon Thesarin ta bëj alokimin e mjeteve financiare.
“Kush i ka fajet”, ka shkruar ajo.
Ministri i Financave, Hekuran Murati, ditë më parë ka thënë se Ministria që udhëheq nuk është duke bllokuar të hyrat vetanake komunale.
Ai në seancën e Kuvendit, e sqaroi edhe gjithë procesin teksa tha se po manipulohet me Ligjin për Buxhetin.
“Po manipulohet se çfarë ka ligji i buxheti, MF-ja nuk ka problem me interpretime të buxhetit aty shkruan shumë mirë se të hyrat vetanake komunale nga viti 2022 barten në vitin 2023, opozita LDK-ja në këtë rast po kushtëzon barti edhe të hyrat e viteve paraprake kështu duke shkelur ligjin pasi kjo nuk parashihet në ligj. Këta pikërisht për këtë e kanë bërë një amendament kur ka qenë votimi në lexim të dytë i ligjit të buxhetit dhe patën thënë që e kanë rregulluar këtë çështje tash po del që s’është ashtu. Unë kërkoj që LDK-ja nëse kërkon të zbatohet duhet të ketë amendament të ligjit, Ministria e Financave nuk është duke e blloku procesin”, tha ai.
