ATV

Tag: Ballina

  • Kurti: E tashmja dhe e ardhmja e Kosovës s’mund të mbahen peng nga Serbia

    Kurti: E tashmja dhe e ardhmja e Kosovës s’mund të mbahen peng nga Serbia

    Kryeministri i Kosovës, Albin Kurti, ka marrë pjesë në Konferencën Vjetore të Partisë Laburiste në Britani të Madhe. Ai ka thënë se e ardhmja dhe e tashmja e Kosovës nuk mund të mbahen peng nga Serbia.

    Kurti ka folur edhe për sulmin terrorist të 24 shtatorit duke thënë se “Serbia, si një aleate e Rusisë, tentoi që të kopjojë skenarin e Donbasit me qëllim të pushtimit të veriut”.

    “Duke folur për sulmin terrorist dhe paramilitar të 24 shtatorit, kryeministri Kurti u shpreh se Serbia, si një aleate e Rusisë, tentoi që të kopjojë skenarin e Donbasit me qëllim të pushtimit të veriut. Rritja e pranisë ushtarake serbe në kufirin me Republikën e Kosovës u përshkrua si e paprecedentë nga Këshilli i Sigurisë Kombëtare të Shtëpisë së Bardhë, kurse pamjet e sekuestruara nga dronët që ishin në posedim të grupit terrorist zbuluan se trupat paramilitare ishin trajnuar në bazat zyrtare të ushtrisë serbe, duke dëshmuar kështu në mënyrë të pakundërshtueshme përfshirjen e drejtpërdrejtë të shtetit të Serbisë në planifikim të sulmit që u krye dy javë më parë në Banjskë, me 24 shtator”.

    Megjithatë, Kurti theksoi se “e tashmja dhe e ardhmja e Kosovës, sikurse as paqja dhe siguria e Evropës nuk mund të mbahen peng nga Serbia, dhe se perspektiva për paqe, drejtësi, dhe prosperitet në një kohë me plotë sfida varet nga ajo çka zgjedhim të bëjmë dhe si zgjedhim të veprojmë së bashku”.

    Gjatë këtij fjalimi, Kurti ndër të tjera ka thënë se ndikimi i Partisë Laburiste në fatin e Kosovës ka qenë i rëndësishëm dhe i madh.

    Ai ka thënë se dy prej momenteve më të rëndësishme në historinë e vonshme të Kosovës janë vitet 1999 dhe 2008, “çlirimi përkatësisht, pavarësia, gjatë të cilave, Partia Laburiste ishte në pushtet në Mbretërinë e Bashkuar”.

    “Në vitin 1999, nën udhëheqjen e Tony Blair, Mbretëria e Bashkuar ishte pjesë e intervenimit ushtarak të NATO-s, për të ndaluar vazhdimin e fushatës gjenocidale nga forcat serbe… pastaj në shkurt të vitin 2008, menjëherë pas shpalljes së pavarësisë, Mbretëria e Bashkuar, me Gordon Brown si kryeministër, ishte një nga vendet e para që njohën shtetësinë e Kosovës”, ka thënë Kurti.

  • Aftësitë e inteligjencës izraelite vihen në dyshim, pas sulmit nga Hamasi

    Aftësitë e inteligjencës izraelite vihen në dyshim, pas sulmit nga Hamasi

    Për palestinezët në Gaza, Izraeli nuk ua ndan tyre sytë kurrë. Dronët vëzhgues gumëzhijnë nga qielli vazhdimisht. Kufiri tejet i sigurt është i mbushur me kamera të sigurisë dhe me ushtarë në tokë. Agjencitë e inteligjencës i përpunojnë burimet dhe i përdorin aftësitë kibernetike për të nxjerrë shumë informacione.

    Por, duket se sytë e Izraelit ishin mbyllur para sulmit të papritur befasues të grupit militant, Hamas, i cili i theu pengesat në kufirin izraelit dhe i dërgoi qindra militantë brenda Izraelit për ta kryer një sulm të madh gjatë të cilit u vranë qindra njerëz dhe e shtynë rajonin drejt konfliktit.

    Agjencitë e inteligjencës së Izraelit e kanë fituar një aureolë të pathyeshmërisë në dekadat e fundit, për shkak të një sërë arritjesh. Izraeli i ka parandaluar komplotet në Bregun Perëndimor, i ka përndjekur gjoja agjentët e Hamasit në Dubai dhe është akuzuar se ka vrarë shkencëtarë bërthamorë të Iranit në zemër të Iranit. Madje edhe kur përpjekjet e tyre kanë ngecur, agjencitë si Mossad, Shin Bet dhe inteligjenca ushtarake e kanë ruajtur misterin e vet.

    Por, sulmi i së shtunës, i cili e zuri Izraelin të papërgatitur në një festë të madhe hebraike, e vë në dyshim këtë reputacion dhe ngre pikëpyetje për gatishmërinë e vendit përballë një armiku më të dobët, por të vendosur.

    Rreth 24 më vonë, militantët e Hamasit po i vazhdojnë betejat me forcat izraelite brenda tokës Izraelite, ndërsa qindra izraelitë janë rrëmbyer nga Hamasi dhe po mbahen në Rripin e Gazës.

    “Ky është një dështim i madh”, tha Yaakov Amidror, ish-këshilltar për siguri kombëtare i kryeministrit Benjamin Netanyahu.

    “Ky sulm, në fakt, dëshmon se aftësitë [e inteligjencës] në Gaza nuk ishin të mira”.

    Amidror nuk deshi ta shpjegojë këtë dështim, duke thënë se mësimet duhet të mësohen kur të qetësohen gjërat.

    Admirali Daniel Hagari, zëdhënësi i Ushtrisë së Izraelit, e pranoi se ushtria është e detyruar të shpjegohet para popullit, por tha se tani nuk është koha.

    “Së pari, ne luftojmë, e pastaj hetojmë”, tha ai.

    Disa thonë se është tepër herët të fajësohet vetëm inteligjenca. Ata e theksojnë një valë të dhunës së vogël në Bregun Perëndimor e cila i ka zhvendosur disa burime ushtarake atje dhe kaosin politik që e ka kapluar Izraelin, për shkak të vendimeve të Qeverisë së ekstremit të djathtë të Benjamin Netanyahut për ta ndryshuar gjyqësorin. Plani kontrovers i Netanyahut e ka kërcënuar unitetin e ushtrisë së fuqishme të Izraelit.

    Megjithatë, mungesa e papritur e informacioneve paraprake rreth planit të Hamasit për të sulmuar me shumë gjasë do të shihet si fajtori kryesor për ngjarjet që çuan drejt sulmit më vdekjeprurës kundër Izraelit në dekadat e fundit.

    Izraeli i tërhoqi trupat dhe ardhësit nga Rripi i Gazës në vitin 2005, duke mos pasur më informacione nga afër të ndodhive në këtë territor. Por, madje edhe pasi Hamasi e mori Gazën nën kontroll më 2007, Izraeli kishte përparësinë, duke përdorur inteligjencën teknologjike dhe njerëzore.

    Izraeli pretendonte se i dinte vendndodhjet e sakta të liderëve të Hamasit dhe sikur e dëshmoi këtë kur i vrau liderët militantë, nganjëherë derisa ata po flinin në dhomat e tyre. Izraeli ka ditur ku t’i sulmojë tunelet nëntokësore të përdorura nga Hamasi për lëvizjen armëve dhe luftëtarëve, duke shkatërruar rrugëkalime të fshehta me kilometra të gjata.

    Me gjithë këto aftësi, Hamasi ia doli ta mbante të fshehtë planin. Sulmi i furishëm, për të cilin me gjasë janë dashur muaj të tërë planifikimi dhe stërvitje të përpikta dhe ku janë përfshirë shumë grupe militante, duket se nuk është vërejtur fare nga radari i inteligjencës izraelite.

    Amir Avivi, një gjeneral i pensionuar izraelit, tha se duke mos pasur qasje brenda Gazës, shërbimet e sigurisë së Izraelit janë varur shumë nga mjetet teknologjike për të siguruar informacione të inteligjencës.

    “Pala tjetër mësoi se si të merret me mbizotërimin tonë teknologjik dhe ata nuk e përdorën më teknologjinë e cila mund të jetë e diktueshme”, tha Avivi.

    “Ata janë kthyer në Epokën e Gurit”, tha ai, duke shpjeguar se militantët nuk i kanë përdorur telefonat apo kompjuterët dhe se punën e ndjeshme e kanë kryer në dhoma të cilat janë ruajtur në veçanti nga spiunimi teknologjik, ose janë futur thellë nën tokë.

    Por, Avivi thotë se dështimi është më i madh se thjesht mbledhja e informacioneve të inteligjencës dhe se shërbimet e sigurisë së Izraelit dështuan ta nxjerrin një përfundim të saktë me informacionet e inteligjencës që po i merrnin, duke e keqkuptuar qëllimin e Hamasit.

    Shërbimet e sigurisë së Izraelit e kanë parë Hamasin në vitet e fundit si një grup të interesuar në qeverisje, i cili do kërkonte ta zhvillonte ekonominë e Gazës dhe ta përmirësonte standardin e jetesës për popullsinë prej 2.3 milionë të Gazës.

    Avivi dhe të tjerët thonë se e vërteta është se Hamasi, i cili bën thirrje për shkatërrimin e Izraelit, ende e sheh këtë si qëllim kryesor të vetin.

    Në vitet e fundit, Izraeli i ka lejuar deri në 18.000 punëtorë palestinezë nga Gaza të punojnë në Izrael, ku ata mund të fitojnë pagë rreth 10 herë më të lartë se në enklavën e varfër bregdetare. Shërbimet e sigurisë e kanë parë ketë si një mënyrë për ta ruajtur qetësinë.

    “Në praktikë, qindra nëse jo mijëra burra të Hamasit e përgatitën këtë sulm befasues për disa muaj, pa lejuar që ai të zbulohej”, shkroi komandanti i mbrojtjes Amos Harel për të përditshme Haartez.

    “Rezultati është katastrofë”, shtoi ai.

    Aleatët, të cilët i shkëmbejnë informacionet e inteligjencës me Izraelin, thanë se agjencitë e inteligjencës e kishin keqinterpretuar realitetin.

    Një zyrtar i inteligjencës egjiptiane tha se Egjipti, i cili shpesh shërben si ndërmjetësues mes Izraelit dhe Hamasit, kishte folur vazhdimisht me Izraelit për “diçka të madhe”, pa shpjeguar më shumë.

    Ai tha se zyrtarët izraelitë ishin përqendruar në Bregun Perëndimor dhe nuk i kishin kushtuar rëndësi kërcënimit nga Gaza.

    Qeveria e Netanyahut përbëhet nga përkrahësit e ardhësve hebrenj në Bregun Perëndimor, të cilët kanë kërkuar reagime të ashpra nga forcat e sigurisë ndaj një vale në rritje të dhunës atje në 18 muajt e fundit.

    “Ne i kemi paralajmëruar ata se një situatë e tillë do të shpërthente, shumë shpejt, dhe se do të ishte diçka e madhe. Por, ata i nënvlerësuan këto paralajmërime”, tha zyrtari, i cili foli në kishte anonime për shkak se nuk ishte i autorizuar të fliste në media për përmbajtje të ndjeshme të inteligjencës.

    Izraeli ka qenë, po ashtu, i zënë dhe i ndarë nga plani i Netanyahut për ndryshimin e gjyqësorit. Netanyahu ishte paralajmëruar vazhdimisht nga shefat e mbrojtjes, si dhe nga disa ish-liderë të agjencive të inteligjencës së Izraelit, se plani i tij ndarës po krijonte ndasi në shërbimet e sigurisë së vendit.

    Martin Indryk, i cili shërbeu si i dërguar special për bisedimet izraelito-palestineze gjatë Administratës së Barack Obamas, tha se ndarjet e brendshme për ndryshimet në gjyqësor ishin faktor i rëndësishëm që ndikuan që Izraeli të zihej i papërgatitur.

    “Kjo i shqetësoi Forcat e Sigurisë së Izraelit dhe bëri që ato ta humbnin përqendrimin”, tha ai. /AP/REL

  • Lumi: Dënimi me gjobë nga UEFA do të ishte gjëja më e vogël për ne, nëse do shfaqnim banerë politik kundër Izraelit

    Lumi: Dënimi me gjobë nga UEFA do të ishte gjëja më e vogël për ne, nëse do shfaqnim banerë politik kundër Izraelit

    Gazetari dhe analisti i sportit, Alban Lumi, në emisionin EKIPI A në ATV, tha se në rast se do të shfaqej ndonjë baner politik kundër Izraelit nga tifozët tanë, dënimi me gjobë nga UEFA do të ishte gjëja me e vogël, pasi që sipas tij, do të pësonim shumë si shoqëri.

    “Në këtë rast, dënimi ndoshta do të jetë gjëja më e vogël që ne do të pësojmë një dënim në gjobë për Federatën tonë, por do të pësojmë shumë si shoqëri, pasi që ne duhet që të qëndrojmë indiferent dhe duhet ta dënojmë çfarëdo dhune që vjen nga çdo kush. Ne e dimë vet, që jemi të asaj moshe që kemi përjetu dhunë këtu nga dikush tjetër, nga ajo Serbi që vazhdimisht proklamon banera të tillë”, tha Lumi.

    Ai besoj se një gjë e tillë nuk do të ndodh në stadiumin “Fadil Vokrri”, për shkak se në njërën anë, Dardanët janë grupi i tifozëve që e kanë përkrahur Kosovën në mënyrën më dinjitoze, dhe në anën tjetër policia dhe shërbimet inteligjente nuk do ta lejojnë një gjë të tillë.

    “Po mënoj që rreziqet më të mëdha në këso raste vijnë prej grupeve të organizume dhe grupi me i organizuar i tifozëve të Kombëtares tonë janë Dardanët. Ata vazhdimisht shprehur përkrahjen e tyre për Kosovën në mënyre dinjitoze dhe asnjëherë nuk kanë marrë qoftë edhe vërejtjen më të vogël nga UEFA apo persona përgjegjëse për këtë punë. Mendoj se në këtë pikë jemi mirë. Gjithashtu edhe policia e Kosovës dhe shërbimet tona inteligjente janë në nivel, së paku nga këndi i ynë sa i kemi parë kanë qenë në nivel të tyre dhe nuk besoj se do të lejonin të ndodh një gjë e tillë në stadiumin “Fadil Vokrri”, por gjithsesi ndeshja është e një rreziku të lartë dhe nuk besoj se do të zhvillohet”, theksoi Lumi. /atvlive.tv

  • Shala: Kosova e përgatitur për të ofruar sigurinë e nevojshme në ndeshjen me Izraelin, tani mbetet që UEFA ta caktojë terminin

    Shala: Kosova e përgatitur për të ofruar sigurinë e nevojshme në ndeshjen me Izraelin, tani mbetet që UEFA ta caktojë terminin

    Eksperti i Sigurisë, Drizan Shala, në një lidhje të drejtpërdrejt në emisionin EKIPI A në ATV, tha se Institucionet e Kosovës janë të përgatitura që të ofrojnë sigurinë e nevojshme për ndeshjen mes Kosovës dhe Izraelit.

    Ai tha se tani mbetet që UEFA ta japë dritën jeshile se kur do të luhet ndeshja, dhe kjo për shkak të situatës në Izrael që tani është në gjendje lufte.

    “Mund të themi me përgjegjësi të plotë se në rast se planifikon UEFA ta zhvillojë ndeshjen e futbollit në bazë të rrethanave dhe kushteve aktuale në Izrael, sepse lojtarët e të kombëtares së Izraelit, pjesa më e madhe jetojnë dhe vepron në Izrael dhe ku dihet se tani edhe hapësira ajrore është e bllokuar si shkaktarë e shpalljes së gjendjes së luftës atje dhe lëvizja e kombëtares do të jetë bukur shumë më e vështirësuar për të lëvizur në drejtim të Evropës dhe respektivisht për të marrë pjesë në ndeshjen me kombëtaren e Kosovës. Kjo mbetet çështje e UEFA-s për të përcaktuar ndoshta një termin më të ri. Por, çka mund të themi më përgjegjësi të plotë, në aspektin operacional dhe në aspektin e institucional të sigurisë të Republikës së Kosovës, Kosova ka kapacitete të mjaftuara, qoftë ato inteligjente, qoftë ato policore, për të garantuar çdo kombëtare lëvizjen, qëndrimet tyre në Kosovë duke të krijue edhe perimetra të caktuara të Sigurisë”, tha Shala.

    Ai përmendi edhe rastin kur kemi patur të bëjmë me një akt terrorist sa i përket kombëtares së Izraelit në ndeshjen e cila është zhvilluar në Shkodër, akt ky i cili është parandaluar me sukses.

    “Kjo po e dëshmon faktin që në këtë aspekt institucionet e Kosovës të Sigurisë dhe Inteligjencës ka një bashkërendim dhe një bashkëpunim edhe mes shërbimeve të caktuara të rajonit, por njëkohësisht edhe me partnerët tanë strategjikë dhe mbi këtë bazë rrjedha e informacioneve të cilat mund t’i vijnë në drejtim të institucionit të Kosovës për të marrë masa preventive në drejtim të kombëtares së Izraelin, mund të themi me përgjegjësi të plotë që çdo kombëtare, respektivisht edhe Izraeli që do të vijë në territorin e Kosovës do të ketë sigurinë maksimale të ofruar nga njësitë relevante të Policisë së Kosovës, por njëkohësisht duke u mbështetur edhe nga Shërbimi apo Agjencioni Kosovar i Inteligjencës për të garantuar një rrjedhje të mirë të kësaj loje nga ndikimi i mundshëm të ndonjë aktiviteti terrorist në drejtim të tyre”, tha Shala. /atvlive.tv

  • BE-ja pret bashkëpunim pa kushte nga Serbia, paralajmëron pasoja

    BE-ja pret bashkëpunim pa kushte nga Serbia, paralajmëron pasoja

    Përgatiti: Fatlum Jashari

    Serbia, sipas Bashkimit Evropian, nuk mund të fshihet prapa mos-njohjes së Kosovës për të penguar kompletimin e hetimit për sulmin terrorist të 24 Shtatorit në Banjskë, në të cilin u vra rreshteri Afrim Bunjaku.

    Duke e njohur si zyrtar hetimin e Policisë së Kosovës, të mbështetur nga EULEX-i, BE-ja u përgjigj për refuzimin e presidentit të Serbisë, Aleksandar Vuçiq, për bashkëpunim me Kosovën, me pretekst mosnjohjen.

    “Ne presim nga Serbia, jo vetëm bashkëpunim të plotë, por gjithashtu bashkëpunim të pakushtëzuar. Nëse ka vullnet, ka rrugë. S’ka nevojë askush të fshihet prapa formaliteteve të njohjes ose jo-njohjes, ka mjaftueshëm mënyra për të ndarë gjetjet, për të bashkëpunuar, për të kontribuuar në hetimin e plotë, sepse ajo që ndodhi më 24 shtator ishte shumë serioze dhe ka nevojë të qartësohet tërësisht. Sepse do të ketë pasoja. Prandaj duhet të hetohet tërësisht”, tha zëdhënësi i BE-së për Politike të Jashtme dhe Siguri, Peter Stano.

    Teksa theksoi se rezultati i hetimit do të përcaktojë hapat e mëtejmë dhe qasjen e BE-së ndaj Serbisë, Kosovës dhe dialogut, zëdhënësi Stano kërkoi që të dyja shtetet të bëjnë gjithë çfarë është e mundur për deeskalim të shpejtë.

    “Mesazhi nga Përfaqësuesi i Lartë, nga shtetet anëtare, por dhe partnerët ndërkombëtare për Kosovën dhe Serbinë, është që të kthehen në dialog. Kjo është rruga e vetme e mundshme për ta zgjidhur problemin e normalizimit të marrëdhënieve ndërmjet Serbisë dhe Kosovës. Kthimi në dialog, është pa mëdyshje mesazhi për të dyja palët, duhet të ktheheni në dialog, ndryshe nuk do të zgjidhni problemet”, tha Stano.

    Vendosja e sanksioneve ndaj Serbisë, procedurë e cila kërkon unanimitet të plotë brenda BE-së, është përjashtuar si mundësi, për shkak të refuzimit të Hungarisë.

    Mundësi mbesin masat politike dhe ekonomike, si nivel më i ulët i ndëshkimit.

    Përkundër raportimeve se ka një pako masash të përgatitur kundër Serbisë, BE-ja ende nuk ka njoftuar ndonjë vendim lidhur me këtë.

    Krerët shtetërorë të Kosovës e kanë bërë të qartë pozicionin se nuk do të kthehen në dialogun e Brukselit, pa ndëshkimin e Serbisë për përgjegjësinë e saj në atë që e vlerësojnë “akt agresioni, nëpërmjet sulmit terrorist-paramilitar” të 24 Shtatorit.

  • Dëshmon ish-gazetari Nebojsa Radoseviq, pretendon se u ndalua nga UÇK-ja

    Dëshmon ish-gazetari Nebojsa Radoseviq, pretendon se u ndalua nga UÇK-ja

    Përgatiti: Nora Luta

    Pa ndonjë përvojë në gazetari Nebojsha Radosheviq, kishte nisur rrugëtimin e tij në këtë fushë nga raportimi për luftën në Kosovë.

    Radosheviq, dikur gazetar i Tanjugut, agjenci e lajmeve në Serbi, është ulur në bankën e dëshmitarit këtë të hënë, për të dëshmuar në procesin gjyqësor që po zhvillohet në Hagë ndaj Thaçit dhe të tjerëve.

    Prokuroria pretendon se ai ishte ndaluar nga disa pjesëtarë të Ushtrisë Çlirimtare të Kosovës, kur gjatë luftës së fundit po udhëtonte me fotoreporterin Vladimir Dobriçiq, që ishte i dyshuar edhe për krime lufte në Kroaci.

    “Janë mbajtur të ndaluar në 4 vende për 41 ditë, përfshirë edhe një vend në Sedllar, ajo që ai beson se është Kleçka. Gjatë kësaj kohe një anëtar i UÇK-së ia ka vendosur një armë në gojë dhe ai ka pasur logon e UÇK-së. Ai është kërcënuar me thikë dhe ai dëgjonte dy policë serbë që bërtisnin, sepse po i rrihnin. Radosevic dhe Dobricic janë dënuar, sepse kanë udhëtuar në territorin e UÇK-së pa leje dhe pa verifikim dhe u dënuan me 60 ditë burgim”, tha prokurori Andrew Boyle.

    Por, në pyetjen e mbrojtjes së Hashim Thaçit, Radosheviq pranoi se automjeti i tyre nuk kishte pasur logo identifikuese të ndonjë mediumi. Avokati Gregory Keohe vuri në pikëpyetje përvojën e Radosheviqit si gazetar, pasi ai e kishte braktisur shkollimin, dhe kishe ardhur në Kosovë në kohën kur ishin shtuar luftimet.

    “Ata ju punësuan si reporteri i vetëm në Prishtinë, në vend që të punësonin dikë që kishte përvojë në gazetari? Pse automjeti ku ishit ju dhe Dobiqiq nuk kishte shenjë identifikuese si medium”, tha Keohe.

    “Thjesht nuk e kishim dhe jo çdo automjet ka një shenjë në të”, tha Radosheviq.

    “Po, pajtohem me ju. Nuk kisha përvojë, por mësova”, tha me tej Radosheviq.

    “A kishte punuar Dobricic për shërbimin informativ serb, siç kishte bërë në Bosnjë e Kroaci, e të dhënat e tij ishin si fotoreporter për Tanjugun për të fshehur identitetin?”, tha Keohe.

    “Jo, nuk është e vërtetë për mua, për atë nuk më intereson”, u përgjigj Radosheviq.

    Dëshmitari e pranoi se një prokuror serb ishte prezent gjatë kohës që Radosheviqit ishte marrë në pyetje në Hagë në vitin 2019, teksa refuzoi të tregonte nëse ishte përpjekur ta fshihte identitetin e tij.

    “Ama kur ju ndaloi UÇK-ja, u përpoqët ta fshihni identitetin e juaj. Ama fakt është se kur shkuat në pikën e kontrollit kur patë ushtarët e UÇK-së, ju i thatë Dobricicit të ikte me vrap”, pyeti Keohe.
    “Nuk është e vërtetë, iu thamë jemi gazetarë. I thashë të kthehej mbrapa”, ishte përgjigja e Radosheviq.

    Por Radosheviq, dëshmitari i 28-të në këtë gjykim, ka thënë se nuk ishte në dijeni se Dobriçiqi ishte i përfshirë në krime lufte.

    Ai punoi si gazetar deri në vitin 2021 për KosovoOnline, e cila, sipas mbrojtjes së Thaçit, financohet nga qeveria e Serbisë.

    Dëshmia e tij do të vazhdojë gjatë kësaj jave, ku do të merret në pyetje nga ekipet e tjera të mbrojtjes.

  • Nga nesër Turqia merr komandën e KFOR-it

    Nga nesër Turqia merr komandën e KFOR-it

    Përgatiti: Driton Sadiku

    Si njëra ndër shtetet me më së shumti forca të diskoluara në Kosovë, Turqia nga nesër do ta marrë edhe udhëheqjen e KFOR-it.

    Özkan Ulutaş, nga e marta do ta zëvendësojë paraardhësin e tij, Angelo Michele Ristuccia, si komandant i KFOR-it.

    Megjithatë, marrja e komandës nga një shtet mik i Kosovës, sipas njohësve të sigurisë, nuk përbën ndonjë favor për vendin, pasi KFOR-i vepron me të njëjtin mision.

    Pasi tha se nacionaliteti nuk përbën dallim, profesori i lëndëve të sigurisë Fatmir Çollakaj vlerëson se rëndësi ka profili i komandantit.

    Pas zhvillimeve të fundit në veri, specifikisht sulmi terrorist në Banjskë, KFOR-i ka rritur praninë e tij në Kosovë.

    Vetëm sot edhe 200 ushtarë nga Britania kanë arritur në Kosovë për ta përforcuar misionin e KFOR-it, ndërkohë që forca ushtarake erdhën edhe nga Rumania.

  • Ambasadori Hovenier: “Asociacioni të bëhet urgjentisht, por me kufizime”

    Ambasadori Hovenier: “Asociacioni të bëhet urgjentisht, por me kufizime”

    Themelimi i Asociacionit të Komunave të banuara me shumicë serbe “duhet të ndodh urgjentisht”, ka thënë ambasadori amerikan në Prishtinë, Jeffrey Hovenier.

    Në një intervistë me prestiogjiozen ndërkombëtare “Bloomberg”, Hovenier ka thënë se formimi i Asociacionit të Komunave me shumicë Serbe është një kërkesë e kahmotshme e ShBA-ve.

    Ai tha se komuniteti serb në Kosovë “ka një numër shqetësimesh dhe Asociacionin e shohin si një mënyrë që ndihmon në adresimin e atyre kërkesave”.

    Megjithatë, Hovenier theksoi se një Asociacion i tillë nuk duhet të përmbajë kompetenca ekzekutive dhe “duhet të ketë kufizime, sepse ne besojmë se pa këto kufizime mund të bëhet diçka problematike ose burim destabiliteti”.

    Në lidhje me sulmet e grupit paramilitar në Banjskë që u udhëhoqën nga terroristi Millan Radoiçiq, dhe marrjen e përgjegjësisë për sulmet terroriste nga ky i fundit, Hovenier u shpreh se “nuk besoj se këto do të jenë fjalët e fundit mbi këtë [çështje]”.

    “Ne jemi në dijeni se ai ka thënë se e ka bërë këtë vetë. Ne nuk besojmë se kjo do të jetë fjala përfundimtare për këtë [çështje]”, tha Hovenier. “Puna duhet të vazhdojë për të përcaktuar përgjegjësin përfundimtar”.

  • BE-ja kërkon bashkëpunim të pakushtëzuar nga Serbia për sulmin terrorist në Banjskë

    BE-ja kërkon bashkëpunim të pakushtëzuar nga Serbia për sulmin terrorist në Banjskë

    Zëdhënësi i Bashkimit Evropian për Politikë të Jashtme, Peter Stano, ka theksuar nevojën për bashkëpunim të plotë dhe të pakushtëzuar nga Serbia lidhur me sulmin terrorist në Banjskë të Zveçanit.

    “Nuk është vetëm se presim bashkëpunim të plotë nga Serbia, por gjithashtu edhe bashkëpunim të pakushtëzuar. Nëse ka vullnet, mund të gjenden edhe mënyrat, por nuk mund të fshiheni prapa formaliteteve si ‘njohja’ ose ‘mosnjohja’”, ka deklaruar ai.

    Zyrtari i BE-së ka thënë se ngjarja e 24 shtatorit është diçka shumë serioze dhe duhet të sqarohet plotësisht, pasi do të ketë pasoja të mëdha.

    “Ka mënyra të shumta se si mund t’i ndani gjetjet tuaja, si mund të bashkëpunoni dhe kontribuoni në hetim të plotë, pasi ajo që ndodhi më 24 shtator, ishte diçka shumë serioze dhe që duhet të qartësohet plotësisht, pasi do të ketë pasoja”, ka thënë tutje ai në një konferencë për media.

    Stano gjithashtu ka thënë se BE-ja nuk do të komentojë fazat individuale të hetimeve ose numrin e personave të ndaluar, por pret bashkëpunim të plotë dhe të pakushtëzuar për të zbardhur ngjarjen.

    “Do të ketë pasoja, kështu që do të duhet të hetohet plotësisht dhe nuk do të komentojë fazat individuale të hetimeve, se sa persona janë ndaluar e sa jo. Pozicioni i BE-së, është i qartë tash e disa herë, ne presim bashkëpunim të plotë e të pakushtëzuar nga Serbia dhe kushdo tjetër, që të përfundojnë hetimet sa më shpejt, që të kemi një pasqyrë të qartë se çka ndodhi, pse ndodhi, kush po merrte pjesë, kush po e orkestronte. Dhe duke u bazuar në këtë, Bashkimi Evropian do të vendosë se cili do të jetë hapi i radhës ndaj Serbisë, Kosovës, dialogut dhe rajonit”, ka deklaruar Stano.

    Më 24 shtator, një grup terrorist sulmoi njësinë patrulluese të Policisë së Kosovës në një rrugë në fshatin Banjskë, duke vrarë rreshterin Afrim Bunjaku.

    Më pas, grupi i terroristëve u strehua në manastirin në Banjskë, prej ku vazhdoi përleshjet me zyrtarët policorë.

  • Kurti: Shumë i shqetësuar për krimet kundër civilëve në Izrael, qëndroj me aleatët tanë

    Kurti: Shumë i shqetësuar për krimet kundër civilëve në Izrael, qëndroj me aleatët tanë

    Kryeministri i Kosovës, Albin Kurti ka reaguar edhe një herë pas ngjarjeve në Izrael, që nisën me sulmin nga Hamasi të shtunën në mëngjes.

    Kurti u shpreh shumë i shqetësuar për krimet kundër civilëve dhe numrin e viktimave, që sipas të dhënave të fundit, ka mbërritur në të paktën 700 izraelitë të vrarë.

    “Shumë i shqetësuar për krimet kundër civilëve dhe numrin në rritje të vdekjeve pas sulmeve të Hamasit në Izrael”, shkroi Kurti.

    “Unë qëndroj me aleatët tanë, duke kërkuar ndalimin e menjëhershëm të këtyre akteve, duke mbështetur të drejtën e Izraelit për vetëmbrojtje kundër terrorizmit dhe duke kërkuar lirimin e menjëhershëm të pengjeve”, shtoi ai.

    Para dy ditësh, Kurti tha se Kosova i dënon të gjitha aktet e dhunës dhe tha se qëndrojnë “në solidaritet të palëkundur me të prekurit”. Për këtë, u falënderua nga ambasadorja e Izraelit në Kosovë, Tammy Ziv.

    “Ju faleminderit shumë, Shkëlqesia Juaj z. Albin Kurti, Kryeministër i Republikës së Kosovës!”, shkroi në shqip Ziv.