ATV

Tag: Ballina

  • Inagurohet parku industrial në Viti

    Inagurohet parku industrial në Viti

    Përgatiti: Benita Zeneli

    Në hapësirë prej 15.5 hektarësh është inauguruar parku industrial në Budrigë të Vitisë.

    Përmes këtij investimi kapital në vlerë prej 1.7 milion eurove po synohet mbështetja për investime në biznese dhe nxitja e veprimtarisë prodhuese.

    Për investime të ngjashme nga ekzekutivi u premtuan edhe 33 milionë euro gjatë tri vjetëve të ardhshme.

    Investimi u bë në kuadër të Ministrisë së Industrisë.

    Kryetari i Komunës së Vitisë, Sokol Haliti, kërkoi që kjo zonë ekonomike të rritet.

    Në këtë park industrial në Budrigë, do të vendosen 30 biznese.

  • Kategoritë e dala nga lufta insistojnë se janë përjashtuar nga subvencionimi i energjisë

    Kategoritë e dala nga lufta insistojnë se janë përjashtuar nga subvencionimi i energjisë

    Përgatiti: Driton Sadiku

    Pas publikimit të lajmit nga ATV-ja se disa kategori të dala nga lufta janë përjashtuar nga subvencionimi i energjisë, ka reaguar Ministri i Financave Hekuran Murati.

    Por, postimi i ministrit Murati nuk e sqaron situatën për këto kategori.

    Sipas ministrit këto kategori të dala nga lufta duhet të aplikojnë për subvencionim. Por, Ligji për statusin dhe të drejtat e dëshmorëve, invalidëve, veteranëve, pjesëtarëve të Ushtrisë Çlirimtare, viktimave civile dhe familjeve të tyre, specifikon se këto kategori gëzojnë të drejtën për tarifë më të lirë të energjisë.

    Vendimi të cilit i referohej ministri Murati, e që është miratuar në Qeveri më 19 tetor, as nuk ishte i publikuar në ueb-faqen e Qeverisë e as në atë të Ministrisë së Financave.

    Ministri Murati, në reagimin e tij publikoi vetëm një faqe të vendimit, duke përmendur pikën B, ndryshe definimin e termeve të vendimit të ri, sipas të cilit vetëm invalidët e luftës përjashtohen nga aplikimi për subvencion për familje me të hyra mujore prej 150 eurosh për person dhe nuk përmenden kategoritë e tjera.

    ATV-ja madje kishte tentuar të sqarojë pretendimet e organizatave të dala nga lufta, duke kërkuar përgjigje nga Ministria e Financave, por askush nuk dha sqarime. Madje edhe tentimi për të pyetur vetë ministrin nuk ishte i mundur.

    Në mungesë të përgjigjes së ministrit, shqetësimet e kategorive të dala nga lufta u adresuan me email. Por, Ministria e Financave asnjëherë nuk ktheu përgjigje, ndërkaq ATV-ja mori përgjigje vetëm nga zëdhënësi i Qeverisë, përgjigje e cila ishte e përgjithshme dhe nuk sqaronte situatën e kategorive të dala nga lufta.

    Ndërkaq nga Shoqata e Invalidëve të Luftës thirren në ligj me qëndrimin se dispozita ligjore nuk shfuqizohet me vendim.

    Andaj, sipas Qeriqit, ministri Murati po manipulon, pasi subvencionimin e gëzonin pa asnjë kriter dhe, sipas tij, janë përjashtuar si kategori të luftës.

    Sipas ligjit neni 8 parasheh reduktim të tarifës për rrymë për familjet e dëshmorëve dhe të zhdukurve të UÇK-së, neni 9 përfshin invalidët e UÇK-së dhe neni 13 përfshin familjet e viktimave civile të luftës.

  • Pjetër Shalës i refuzohet kërkesa për vizitë tek psikologu

    Pjetër Shalës i refuzohet kërkesa për vizitë tek psikologu

    Kryetarja e trupit gjykues, Mappie Veldt-Foglia, me vendimin e 14 dhjetorit 2023, ka refuzuar kërkesën e Pjetër Shalës për një vizitë psikologjike, me arsyetimin se mbrojtja është dashur t’i drejtohet regjistruesit të paraburgimit përpara se ta përfshijë panelin në këtë çështje.

    Në vendim, thuhet se paneli i trupit gjykues, më 11 dhjetor 2023 mori kërkesë urgjente për vizitë të psikologut për të akuzuarin Pjetër Shala, por kjo kërkesë është refuzuar, raporton “Betimi për Drejtësi”.

    “REFUZON Kërkesën; dhe b. URDHËRON palët dhe mbrojtësin e viktimave që të respektojnë udhëzimet e Panelit siç janë përcaktuar në këtë vendim”, thuhet në dispozitivin e këtij aktvendimi.

    Në arsyetimin e këtij vendimi, thuhet se më 25 tetor 2023, trupi gjykues vendosi se në rast që Shala shpallet fajtor për një ose më shumë nga krimet për të cilat akuzohet, do t’i përcaktojë dënimin përkatës me shpalljen e aktgjykimit.

    Si rrjedhojë, paneli udhëzoi mbrojtjen e Shalës që të paraqesë çfarëdo dëshmie për dënimin, më së voni deri në mbylljen e rastit. Kurse, më 29 nëntor 2023, paneli vendosi që data e mbylljes së këtij afati për mbrojtjen të jetë deri më 15 janar 2024.

    Por, thuhet se më 11 dhjetor 2023, paneli kishte marrë kërkesë urgjente nga mbrojtja e Pjetër Shalës për një vizitë psikologjike, së bashku me njoftimin për kërkesën për thirrje të provave relevante për dënim.

    Gjithnjë sipas vendimit, mbrojtja e Shalës kishte parashtruar se ka kontaktuar me një eksperte psikologjike, me qëllim që të kryejë një vlerësim për të akuzuarin dhe të prodhojë një raport mbi shëndetin e tij mendor, si dhe ndikimin që kanë pasur procedurat e Dhomave të Specializuara të Kosovës tek ai.

    “Mbrojtja për Pjetër Shalën (Mbrojtja) parashtron se ka kontaktuar me një eksperte psikologjike, e regjistruar në Regjistrin Kombëtar të Ekspertëve në Gjykatën Belgjike, znj. Vanessa Milazzo (Znj. Milazzo), me qëllim që të kryejë një vlerësim të të akuzuarit dhe të prodhojë një raport mbi shëndetin e tij mendor, ndikimin e procedurave para Dhomës së Specializuar në jetën e tij , dhe sjelljen e tij pas ngjarjeve të pretenduara në aktakuzën e konfirmuar deri më sot. Mbrojtja synon ta prezantojë raportin si provë me qëllim të dënimit dhe/ose të dëshmojë znj. Milazzo para trupit gjykues”, thuhet në vendim.

    Tutje, thuhet se mbrojtja i kërkoi panelit që të krijohen rrethanat që psikologja ta vizitojë Shalën më 18 dhe 19 dhjetor 2023 dhe t’i jepet asaj të paktën tri orë kohë në vizita.

    “Për këtë qëllim, mbrojtja i kërkon Panelit që të udhëzojë Sekretarin dhe Njësinë e Menaxhimit të Paraburgimit që: (i) të lejojnë znj. Milazzo të vizitojë të akuzuarin më 18 dhe 19 dhjetor 2023; (ii) heq dorë nga kërkesa që vizitat të organizohen 15 ditë përpara; (iii) të lejojë znj. Milazzo të sjellë një fletore dhe mjete shkrimi në vizitë, për të mbajtur shënime nga bisedat e saj me të Akuzuarin; dhe (iv) t’i japë asaj të paktën tre orë gjatë çdo vizite për të kryer vlerësimin e saj. Më 12 dhjetor 2023, për të siguruar një zhvillim të shpejtë të procedurave, Paneli e refuzoi kërkesën përmes emailit, me arsye dhe udhëzime të mëtejshme për t’u ndjekur, dhe udhëzoi Mbrojtja t’i bëjë kërkesat e nevojshme Kryeshefit të Paraburgimit pa vonesë”, thuhet në vendim.

    Aty thuhet se paneli kërkoi informacion shtesë nga mbrojtja, nëse raporti i Milazzos do të përgatitej në anglisht ose në një gjuhë tjetër, kurse mbrojtja e informoi panelin se raporti do të përgatitej në frëngjisht dhe do të përkthehej në anglisht.

    Pas kësaj, vendimi ofron arsyet e panelit për refuzimin e kësaj kërkese, si dhe cakton afatet kohore për paraqitjen e provave nga eksperti i thirrur nga mbrojtja dhe parashtresat eventuale si përgjigje nga ZPS-ja dhe mbrojtja e viktimave.

    Sipas kësaj, paneli ka theksuar se asgjë në kërkesë nuk sugjeron që mbrojtja i është drejtuar shefit të paraburgimit me ndonjë kërkesë përkatëse dhe se një kërkesë e tillë të është refuzuar. Po ashtu, thuhet se paneli nuk ka vendosur ndonjë kufizim në kontaktet dhe komunikimet e të akuzuarit që do të kërkonte ndërhyrjen e panelit për të autorizuar ndonjë vizitë.

    Rrjedhimisht, paneli ka konstatuar se mbrojtja e Shalës është dashur që së pari t’i drejtohet Regjistruesit të Paraburgimit përpara se ta përfshijë panelin dhe nuk gjen ndonjë arsye për të ushtruar mbikëqyrje gjyqësore në këtë situatë.

    “Rrjedhimisht, Paneli konstaton se Mbrojtja është dashur së pari t’i drejtohet Kryeshefit/Regjistruesit të Paraburgimit para se të kontaktojë Panelin dhe nuk gjen ndonjë arsye për të ushtruar mbikëqyrje gjyqësore në këtë situatë. Për këto arsye, Paneli e refuzon kërkesën dhe e udhëzon mbrojtjen që t’i bëjë kërkesat e nevojshme Kryeshefit të Paraburgimit pa vonesë”, thuhet në vendim.

    Kryetarja e trupit gjykues, Veldt-Foglia përmes këtij vendimi ka sqaruar se është vendosur mbi këtë kërkesë të mbrojtjes pa iu dhënë mundësia për t’u dëgjuar ZPS-së dhe mbrojtjes së viktimave.

    “Paneli është i vetëdijshëm për hapat e ndryshëm që duhet të ndërmerren në mënyrë që të prodhohet raporti i ekspertit dhe fakti që data e synuar për mbylljen e çështjes së mbrojtjes është caktuar më 15 janar 2024. Nuk u shkaktua asnjë paragjykim ndaj ZPS-së ose mbrojtësit të viktimave duke e shfuqizuar kërkesën pa i dëgjuar”, thuhet në vendim.

    Ndërsa sa i përket udhëzimeve të mëtejshme mbi paraqitjen e dëshmive të ekspertes, paneli ka konstatuar se mbrojtja nuk ka vepruar me shpejtësi, por në fakt ka treguar mungesë të kujdesit.

    “Mbrojtja duhet të kishte kontaktuar ekspertin sapo Paneli të kishte komunikuar vendimin e tij, më 25 tetor 2023, se dënimi, nëse ka, do të shqiptohej së bashku me aktgjykimin gjyqësor, dhe jo vetëm pasi Paneli të caktonte datën e synuar për mbylljen të çështjes së mbrojtjes. Paneli e udhëzoi mbrojtjen në atë kohë që të paraqesë çfarëdo dëshmie mbi dënimin gjatë prezantimit të rastit të saj dhe më së voni, deri në mbylljen e rastit. Kur Paneli cakton datën e synuar për mbylljen e çështjes së një pale, të gjitha provat që ende duhen dëgjuar duhet të dihen dhe… duhet të përgatitet të mbyllë çështjen e saj. Pasi të përcaktohet, data e synuar mund të ndryshojë vetëm nëse lindin rrethana të paparashikuara”, thuhet në vendimin mbi kërkesën e mbrojtjes së Pjetër Shalës.

    Për këto arsyeje, paneli ka vendosur që të shkurtojë afatet kohore përkatëse për ZPS-në dhe mbrojtjen e viktimave në mënyrë që të sigurohet që provat e mbrojtjes të paraqiten përpara datës së përcaktuar.

    Si rrjedhojë, paneli ka udhëzuar që në rast që mbrojtja vendos të paraqes provat e ekspertes psikologjike në këtë çështje gjyqësore, jo më larg se 4 janari 2024 duhet t’i prezantojë ZPS-së dhe mbrojtjes së viktimave raportin përfundimtar të psikologes së bashku me përkthimin në anglisht.

    Po ashtu, jo më larg se data e lartpërmendur, mbrojtja u obligua që të bëjë kërkesën për të shtuar psikologen dhe raportin e saj në listën e dëshmitarëve dhe të informojë panelin, ZPS-në dhe mbrojtjen e viktimave në rast që synon që ta thërras psikologen për të dëshmuar personalisht apo ka për qëllim të shtojë në listën e provave vetëm raportin e saj.

    Po ashtu, në rast që psikologja Milazzo ftohet për të dëshmuar, mbrojtja duhet të sigurojë që ajo të jetë e disponueshme në datat specifike.

    “Mbrojtja do të sigurojë gjithashtu që znj. Milazzo të jetë e disponueshme për të dëshmuar, nëse ajo do të thirret për të dëshmuar, në një nga datat e mëposhtme: 11, 12, 19 dhe 22 janar 2024”, thuhet në vendim.

    Ndërsa për ZPS-në dhe mbrojtjen e viktimave, gjykatësja Veldt-Foglia udhëzoi që jo më vonë se 9 janari 2024 t’i përgjigjen kërkesës së mbrojtjes për të shtuar Milazzon në listën e dëshmitarëve apo raportin e saj në listën e provave.

    Po ashtu, thuhet se ZPS-ja dhe mbrojtja e viktimave mund t’i bëjnë parashtrimet e tyre edhe më 9 janar 2024, pra gojarisht gjatë seancës dëgjimore të kësaj date.

    Pjetër Shala u arrestua më 16 mars 2021, nga autoritetet belge dhe u transferua në Hagë më 15 prill 2021, në bazë të një kërkese për bashkëpunim në zbatimin e fletëarrestit dhe urdhrit për transferim lëshuar nga Dhomat e Specializuara të Kosovës.

    Në aktakuzën e konfirmuar, Shala ngarkohet me përgjegjësi penale individuale në forma të ndryshme për krime lufte si ndalim arbitrar, trajtim mizor, torturë dhe vrasje të paligjshme, të kryera në kontekstin e konfliktit të armatosur në Kosovë dhe në lidhje me këtë konflikt.

    “Krimet për të cilat akuzohet z. Shala u kryen përafërsisht midis 17 majit 1999 dhe 5 qershorit 1999, kundër personave që u mbajtën të ndaluar në fabrikën e metalit në Kukës (Shqipëri), që pretendohet se përdorej prej Ushtrisë Çlirimtare të Kosovës”, thuhet në komunikatë.

  • Viola von Cramon i numëron shkeljet në zgjedhjet e Serbisë, kërkon hetim ndërkombëtar

    Viola von Cramon i numëron shkeljet në zgjedhjet e Serbisë, kërkon hetim ndërkombëtar

    Eurodeputetja Viola von Cramon ishte pjesë e delegacionit të Parlamentit Europian që vëzhguan zgjedhjet në Serbi.

    Ajo ka listuar disa nga parregullësitë që u kryen në këtë proces, duke thënë se është pritur një respektim më i lartë i standardeve demokratike nga një vend kandidat i BE-së.

    “Unë kam qenë anëtare e Delegacionit të Vëzhgimit të Zgjedhjeve të Parlamentit Europian në Serbi ku së bashku me kolegët e mi kanë vëzhguar zgjedhjet e parakohshme parlamentare nacionale. Zgjedhjet serbe u mbajtën në kushte të pabarabarta dhe u zhvilluan me parregullsi të shpeshta në ditën e zgjedhjeve dhe para saj, si keqpërdorimi i burimeve administrative, blerja e votave dhe cenimi i fshehtësisë së votës”.

    Ajo tha se ishin dëshmitarë që u sollën votues nga etniteti i Republikës Srpska nga Bosnja e Hercegovina.

    “Ne pamë raste të sjelljes së organizuar të votuesve nga Republika Srpska dhe frikësimit të votuesve. Ne prisnim absolutisht standarde më të larta demokratike nga një vend kandidat në BE, i cili negocion anëtarësimin në BE”.

    Von Cramon shkroi se “nevojitet një mbikëqyrje ndërkombëtare dhe një hetim i plotë”.

    “Parlamenti Europian është i gatshëm të ndërmjetësojë mes partisë në pushtet dhe opozitës në Beograd për të siguruar dialogun paqësor dhe demokratik dhe për të ulur tensionet”.

  • BE e shqetësuar – Serbia nuk e zbaton marrëveshjen e Ohrit

    BE e shqetësuar – Serbia nuk e zbaton marrëveshjen e Ohrit

    Shqetësim në BE pas qëndrimit të Beogradit se nuk do të zbatojë pika të Marrëveshjes së Ohrit që u arrit në kuadër të dialogut me Kosovën. Prishtina i kërkon BE-së të “heqë dorë nga politika e zbutjes së Serbisë”.

    Letra e autoriteteve serbe drejtuar Bashkimit Evropian,se Serbia nuk do ta njohë de facto Kosovën, ashtu siç i kërkohet, se nuk e respekton integritetin e saj territorial, sikundër nuk do të pajtohet për anëtarësimin e Kosovës në OKB dhe organizatat përcjellëse të saj ka ngritur shqetësim në BE. Kjo sepse me të bëhet i qartë moszbatimi i Marrëveshjes së Ohrit, e dakorduar në fillim të këtij viti në kuadër të dialogut Kosovë-Serbi.

    Reagimi i BE

    Për Bashkimin Evropian, marrëveshja e Ohrit, ndonëse nuk është nënshkruar nga palët, ajo cilësohet ligjërisht e obligueshme. “Marrëveshja në tërësi mbetet ligjërisht obliguese, dhe se palët ishin pajtuar për këtë në Ohër. Zbatimi i saj do të jetë pjesë integrale e rrugëtimit përkatës evropian”, ka thënë zëdhënësi i BE-së Peter Stano.

    Zyrtarë të Bashkimit Evropian, thanë se “marrëveshja është e detyrueshme në tërësinë e saj për të dyja palët dhe se zbatimi i saj do të jetë pjesë integrale e rrugës së tyre përkatëse evropiane”. Kjo kërkohet nga deklarata e përbashkët nga takimi i fundjavës së shkuar i nivelit të lartë të BE-së me udhëheqësit e Ballkanit Perëndimor, ku u tha se “BE-ja kërkon marrëdhënie të mira fqinjësore ndërmjet Kosovës dhe Serbisë. “U bëjmë ftesë të dyja palëve që në tërësi të zbatojnë Marrëveshjen për rrugën drejt normalizimit të raporteve dhe aneksin e saj, si dhe të gjitha marrëveshjet nga e kaluara, pa asnjë vonesë të re dhe pa parakushte”, thuhet në deklaratën në pjesën që i kushtohet raporteve mes Kosovës dhe Serbisë.

    Brnabiq: Pajtimi me deklaratën nuk përfshin pajtimin për anëtarësimin e Kosovës në OKB

    Kryeministrja e Serbisë Ana Bërnabiq, deklaratën e Samitit të BE-së, e cilësoi “një deklaratë politike që nuk është ligjërisht e detyrueshme”. “Marrëveshja konsiderohet e pranueshme vetëm në kontekstin në të cilin nuk përfshihet njohja de facto apo de jure e Kosovës. Pajtimi me deklaratën nuk përfshin pajtimin për anëtarësimin e Kosovës në Organizatën e Kombeve të Bashkuara, në sistemin e organizatave dhe agjencive të OKB-së, e as të ashtuquajturën tërësi tokësore të Kosovës”, thuhet në një njoftim nga zyra e kryeministres së Serbisë.

    Sipas zëdhënësit të BE, Stano, Marrëveshja dhe aneksi për zbatim “janë bërë ligjërisht obliguese përmes komunikatës me shkrim të përfaqësuesit të lartë të BE-së Josep Borrell, më 18 mars 2023”.

    Por, sipas kryeministres se Serbisë, Ana Bërnabiq, kjo deklaratë “konsiderohet si ligjërisht joobliguese”, dhe se “nuk e ka peshën e marrëveshjes ndërkombëtare, sipas së drejtës ndërkombëtare”. “Kosova është pjesë integrale e Republikës së Serbisë, nën administrim ndërkombëtar, në përputhje me rezolutën 1244 të Këshillit të Sigurimit të OKB-së”, ka thënë Bërnabiq.

    Reagimi nga Prishtina

    Autoritetet e Prishtinës reaguan pas refuzimit të Serbisë që ta zbatojë marrëveshjen e Ohrit, duke i kërkuar komunitetit ndërkombëtar që siç thonë “të heq dorë nga politika e zbutjes së Serbisë”. “Serbia shprehimisht shpreh refuzimin e saj për të zbatuar dispozitat e marrëveshjeve të Brukselit dhe Ohrit. I bëj thirrje komunitetit ndërkombëtar të pranojë se politika e zbutjes ndaj Serbisë ka dështuar. Tani nevojitet një ndryshim thelbësor”, shkroi në platformën X, ministrja e Jashtme e Kosovës, Donika Gërvalla.

    “Serbia me këtë letër edhe një herë u tregua destruktive”

    Por, si e shohin analistët politik refuzimin e Serbisë për zbatimin e marrëveshjes së Ohrit dhe këtë zhvillim të ri në dialogun Kosovë-Serbi të ndërmjetësuar nga Bashkimi Evropian. Gazmir Raci, analist politik i tha DW-së se “Serbia me këtë letër edhe një herë u tregua destruktive duke u tërhequr nga ajo që e ka pranuar në procesin e dialogut”, dhe me këtë, ‘ia përplasi në fytyrë’, BE-së gjithë dokumentet dhe angazhimin gati 15-vjeçar në procesin e dialogut.

    “Në samitin e fundit u tha që të gjitha obligimet e dala nga dialogu do të jenë pjesë edhe e kapitullit 35 për Serbinë në rrugëtimin e saj për në BE. Ai kapitull që nga fillimi ka qenë kryekëput për obligimet që i ka Serbia në raport me normalizimin e raporteve me Kosovën. Kapitulli 35 tashmë po përditësohet edhe me kërkesën e dalë nga plani Franko-Gjerman për njohjen de-facto të Kosovës nga Serbia. Edhe deklarata e Kancelarit Gjerman, Presidentit Macron dhe Kryeministres Italiane Meloni, pas takimit të fundit me Kurtin dhe Vuçiqin, ishte që Serbia tashmë de-facto duhet ta njoh ëKosovën”, tha analisti Raci.

    Edhe një analist tjetër, Blerim Burjani, i tha DW-së se në vazhdimësi BE-ja është përballur me këtë qëndrim rezistues të Serbisë, por, shpresat dhe vullneti i BE-së për normalizim e tejkalon këtë kokëfortësi politike serbe. “Prandaj BE-ja e përsëritë se marrëveshja është obligative për zbatim, pra një obligim i pashmangshëm”.

    Sipas analistit Burjani, Serbia në njërën anë shkon në dialog, ndërsa në anën tjetër refuzon zbatimin e marrëveshjes me Kosovën nëse nuk është në interes të saj. Prandaj, BE-ja sipas tij, “duhet të ndryshoj modalitetin e komunikimit me Serbinë, duhet të jetë politikisht me energjike dhe me insistuese”. “Serbia do politika neutrale ndaj zhvillimeve ndërkombëtare dhe do ta mbaj edhe Rusinë afër edhe ndihmat perëndimore apo relacionet me perëndimin. Politika neutrale është doktrinë e Vuçiqit. Mendojë se dialogu është komplikuar dhe trysnia me lehtë bëhet ndaj Kosovës sesa Serbisë. Qëndrimi i fundit i Serbisë paraqet problem të madh për normalizim të marrëdhënieve, prandaj BE-ja duhet mendoj saktë se çfarë do nga Serbia dhe t’ia bëjë më dije se do të ketë masa ekonomike në rast se nuk reflekton”, thotë Burjani.

    Më 26 tetor të këtij viti, udhëheqësit e Gjermanisë, Kancelari Scholz, Presidenti i Francës Macron, kryeministrja e Italisë Meloni dhe të institucioneve të Bashkimit Evropian, pas takimeve të ndara që zhvilluan në Bruksel me kryeministrin e Kosovës, Albin Kurti dhe presidentin e Serbisë, Aleksandar Vuçiç, Kosovës i kërkuan themelimin e Asociacionit të komunave me shumicë serbe, ndërsa Serbisë, njohjen de fakto të Kosovës. Kjo përfshihet edhe në Marrëveshjen e Ohrit, e cila sipas burimeve diplomatike nga BE-ja, thuhet se Këshilli Evropian do t’i kërkojë Komisionit Evropian, që të ndryshojë kriteret për anëtarësimin e Serbisë në BE, dhe se zbatimi i marrëveshjes së Ohrit të bëhet pjesë integrale e kapitullit të 35 për anëtarësimin e Serbisë në Bashkimi Evropian./DW/

  • Serwer: Fitorja e Vuçiqit në Serbi nuk është shenjë e mirë për Kosovën

    Serwer: Fitorja e Vuçiqit në Serbi nuk është shenjë e mirë për Kosovën

    Presidenti i Serbisë, Aleksandar Vuçiq, ka krijuar një sistem të padrejtë zgjedhor që e favorizon atë, thotë Daniel Serwer, profesor në Universitetin amerikan Johns Hopkins.

    Të dhënat paraprake të zgjedhjeve të 17 dhjetorit tregojnë se Partia Përparimtare Serbe, e udhëhequr deri vonë nga Vuçiq, ka fituar shumicën.

    Lista opozitare “Serbia kundër dhunës” ka kërkuar, ndërkohë, anulimin e zgjedhjeve në Beograd, duke pretenduar se ka pasur parregullsi.

    Duke komentuar fitoren e Vuçiqit në raport me Kosovën, Serwer thotë se rezultati nuk është një shenjë e mirë për marrëdhëniet mes dy vendeve.

    “Nuk shoh asnjë shenjë se Vuçiq është gati për një ndryshim serioz sa u përket marrëdhënieve me Kosovën. Përkundrazi, ai është nisur në drejtim të kundërt. Ai sërish bën thirrje për vendosjen e sovranitetit të Serbisë. Ai e kundërshton rëndësinë e marrëveshjeve të marsit dhe shkurtit [Marrëveshjes së Ohrit dhe Aneksit për zbatimin e saj], të cilat SHBA-ja dhe BE-ja thonë se janë ligjërisht të detyrueshme”, ka thënë Serwer./REL

  • Takimi në Shkup: Dënohet sulmi në Banjskë, thirrje që Kosova të bëhet anëtare e plotë e Kartës së Adriatikut

    Takimi në Shkup: Dënohet sulmi në Banjskë, thirrje që Kosova të bëhet anëtare e plotë e Kartës së Adriatikut

    Ambasadori i Kosovës në Shkup, Florian Qehaja, ka thënë dje se Kosova ka përkushtim të palëkundur ndaj vlerave që promovon nisma rajonale ShBA-Karta e Adriatikut.

    Në fjalimin e tij, Ambasadori Qehaja nënvizoi përkushtimin e palëkundur të Kosovës ndaj vlerave të përbashkëta që promovon kjo nismë e që ndërlidhen me prosperitetin, sigurinë dhe bashkëpunimin në fushën e mbrojtjes.

    Ai nënvizoi progresin e shtetit të Kosovës për të ngritur kapacitetet e mbrojtjes duke përmendur shtimin e buxhetit në 2% të GDP sipas standardeve të NATO-s.

    Qehaja shtoi se FSK është gati për të arritur interoperabilitetin në mbrojtje në vazhdën e një ambienti kompleks të sigurisë.

    “Në fund u miratua një deklaratë e përbashkët ku, në mes të tjerash dënon në termat më të fuqishëm sulmin terrorist në Banjskë përderisa bën thirrje për zgjerimin e nismës me Kosovën si anëtare e plotë”, thuhet në njoftim.

  • ​Gjermania i quan të papranueshme keqpërdorimet e zgjedhjeve në Serbi

    ​Gjermania i quan të papranueshme keqpërdorimet e zgjedhjeve në Serbi

    Gjermania ka reaguar për procesin zgjedhor të së dielës në Serbi.

    Ministria e Jashtme e këtij vendi i quan të papranueshme keqpërdorimin e burimeve publike dhe frikësimin e votuesve, dhe blerjen e votave.

    “Kjo është e papranueshme për një vend me status kandidat në BE”, thuhet në reagimin e MPJ-së gjermane.

    E anulimin e zgjedhjeve në Serbi e kërkoi opozita serbe.

    KosovaPress, të dielën ka raportuar se gjatë procesit zgjedhor në Serbi ka pasur shkelje të ndryshme.

    Ndryshe, Serbia të dielën i mbajti dy palë zgjedhjesh, qendrore dhe lokal. Sipas rezultateve preliminare, fituese ka dalë lista e kryesuar nga presidenti aktual i Serbisë, Aleksandar Vuçiq.

  • Mbahet takimi i dytë i grupit koordinues për anëtarësim të Kosovës në KIE

    Mbahet takimi i dytë i grupit koordinues për anëtarësim të Kosovës në KIE

    Përgatiti: Donisa Fazliu

    Raporti i juristëve eminentë të Këshillit të Evropës nuk parasheh asnjë pengesë për anëtarësimin e Kosovës në këtë organizatë ndërkombëtare. Kështu u tha në takimin e Grupit Koordinues për anëtarësimin e Kosovës në Këshillin e Evropës.

    “Jemi afër përmbylljes së 2/3 të rrugëtimit tonë drejt anëtarësimit në Këshillin e Evropës. Raporti përfundimtar i juristëve eminentë, i cili tashmë është publikuar dhe i cili ka për qëllim që të trajtojë nëse sistemi ligjor i Kosovës është në përputhje me standardet e Këshillit të Evropës e konfirmoj një gjë të tillë. Duke theksuar që përveç së Kosova i plotëson standardet e Këshillit të Evropës, ajo në shumë çështje tejkalon edhe standarde ndërkombëtare. Kjo është fitorja e tretë gjatë këtij procesi të anëtarësimit, fitore e cila tregon që nuk ka asnjë arsye për ta kundërshtuar anëtarësimin e Kosovës në Këshillin e Evropës”, tha zëvendësministri i MPJD-së, Kreshnik Ahmeti.

    Se Kosova qëndron më mirë se shtetet anëtare të KiE-së, e thotë edhe nënkryetarja e Kuvendit të Kosovës, Saranda Bogujevci.

    “Si vend mendoj që kemi dëshmuar mirë, duke filluar nga Kushtetuta dhe ligjet që i kemi në fuqi, qëndrojmë shumë më mirë se edhe plot vende anëtare në Këshillin e Evropës. Edhe gjatë diskutimit që bëhen brenda Asamblesë Parlamentare, shihet se ne qëndrojmë shumë më mirë si vend. Pas aplikimit, natyrisht se kemi qenë të angazhuar vazhdimisht, për të parë se si është disponimi, kështu që nuk ka asnjë dilemë të vetme për rëndësinë, por edhe që e shohin që doemos që Kosova duhet të jetë pjesë e Këshillit të Evropës”, tha nënkryetarja e Kuvendit të Kosovës, Saranda Bogujevci.

    Derisa, Këshilltarja e Jashtme e Ministrisë së Punëve të jashtme dhe Diasporës, tha se, sipas këtij raporti, mosnjohja e Kosovës nga disa shtete, nuk e pengon anëtarësimin në KiE.

    “Raporti nuk parasheh asnjë pengesë për anëtarësimin e Kosovës në Këshill të Evropës. Raporti konfirmon se Kosova ka kontrolle efektive në gjithë territorin dhe popullatën e saj. Sipas raportit, Kosova po vlerësohet si shtet kandidat për anëtarësim dhe jo si vend”, tha Adelina Hasani, këshilltare e jashtme e MPJD-së.

    Në maj të vitit 2022, Kosova aplikoi për anëtarësim në Këshillin e Evropës, ndërsa në korrik të këtij viti u mbajt takimi i parë i grupit koordinues për Anëtarësimin e Kosovës në KiE.

  • Qeveria përjashton kategoritë e luftës nga subvencionimi i energjisë

    Qeveria përjashton kategoritë e luftës nga subvencionimi i energjisë

    Përgatiti: Driton Sadku

    Së paku 10 euro më shtrenjtë do ta paguajnë faturën e energjisë elektrike një pjesë e kategorive të dala nga lufta.

    Subvencionimin e rrymës që e gëzonin tash e sa vite, ua hoqi Qeveria, madje siç thonë pa asnjë paralajmërim.

    “Jemi subvencionu për një pjesë të faturës të energjisë elektrike dhe e kemi kuptu që ka nxjerrë një rregullore që na ka largu edhe pse është e përfshirë në ligj, dhe qeveritë e kaluara e kanë zbatu këtë vit ka marrë vendim edhe na ka lënë anash edhe kështu që nuk na ka njoftu as neve që ta njoftojmë anëtarësinë që të aplikojë si rast social”, tha Xhevdet Qeriqi nga OVL-UÇK.

    Subvencionimi i energjisë për këto kategori nga ana e Qeverisë bëhej në baza vjetore në KEDS.

    Kësisoj invalidët e luftës, familjet e dëshmorëve, viktimat e dhunës civile, nuk do të trajtohen si kategori të veçanta, por vetëm si qytetarë të thjeshtë.

    Qeveria thotë se të gjithë këta ish-përfitues kanë mundur të aplikojnë për të qenë pjesë e masës së re për Subvencionimin e Energjisë Elektrike për Familjet e Cenueshme.

    “Me fillimin e masës së re për Subvencionimin e Energjisë Elektrike për Familjet e Cenueshme është hapur thirrja për të gjitha familjet të cilat kanë të ardhura më pak se 150 euro në muaj për një anëtar, që të aplikojnë për të përfituar nga subvencionimi. Kjo masë e thekson se kategoritë të cilat kanë marrë më herët subvencion duhet të aplikojnë përmes thirrjes që hapet nga Ministria e Financave, Punës dhe Transfereve. Të gjitha familjet që janë përfitues të skemave sociale e pensionale, inkurajohen të aplikojnë. Përderisa familja ka më pak të ardhura mujore sesa pragu prej 150 eurosh/muaj për anëtar, atëherë ju kualifikoheni për subvencionim të energjisë elektrike”, thuhet në njoftimin e Qeverisë së Kosovës.

    Ndërkaq, shoqata e invalidëve thotë se me këtë, automatikisht të gjitha kategoritë e luftës janë përjashtuar nga mundësia e përfitimit nga kjo masë.

    “Pensioni më i vogël i invalidit është 225 euro, automatikisht përjashtohemi, aty ka qenë si kriter të jenë nën 150 euro të ardhurat mujore”, tha kryetari i Shoqatës së Invalidëve të Luftës, Fadil Shurdhaj.

    Të drejtën për tarifë më të lirë të energjisë elektrike ua garanton edhe ligji për statusin dhe të drejtat e dëshmorëve, invalidëve, veteranëve, pjesëtarëve të ushtrisë çlirimtare të Kosovës, viktimave civile dhe familjeve të tyre në nenin 9 të tij.

    Andaj duke marrë parasysh këtë, shoqata e invalidëve thotë se po e shqyrton mundësinë që ta paditë Qeverinë për shkelje të ligjit.