Tag: Ballina

Përgatiti: Fatlum Jashari

Fatmir Sylejmani nga kryeqyteti ishte nga të parët që iu nënshtrua procesit të detyrueshëm të regjistrimit të popullsisë, që filloi të premten e 5 Prillit.

Përveç rasteve si ky, ku filmimi u bë me pëlqim të qytetarit, procesi do të jetë konfidencial e privat.

Në ditët e para regjistruesit kryesisht do të angazhohen në informim, para se të vijojnë me mbledhjen e të dhënave.

Përkundër raportimeve për pengesa e vonesa në disa komuna, kryeshefi i Agjencisë së Statistikave këmbënguli që gjithçka është gati.

Krahas thirrjes për regjistrim, ai shpjegoi natyrën e pyetësorëve.

“Merren disa të dhëna demografike për individët, pastaj ka fushën për nivelin e edukimit, shkollimit, çështjet sociale, ekonomike. Pastaj, ka disa pyetje për shëndetin, që është shumë e rëndësishme për institucionet. Ndërsa, për ekonomitë familjare merret përbërja, struktura e ekonomisë familjare, hapësira në të cilën jetojnë. Ndërsa, për banesa dhe shtëpi ka disa pyetje, prapë është një pyetësor i veçantë që merren (të dhënat) për vitin e ndërtimit, nëse banesa ose shtëpia ka izolim ka kushte për banim, gjitha këto. Një gamë pyetjesh”, tha kryeshefi ekzekutiv i ASK-së, Avni Kastrati.

Pasi tregoi se gjobat për individët që nuk regjistrohen lëvizin nga 30 deri në 2000 euro, ai sqaroi çështjen e rezidencës.

“Nëse ai që vjen, ta themi prej Gjakovës apo prej Pejës në Prishtinë, ka një adresë tjetër gjatë regjistrimit në Pejë apo në Gjakovë, ai ajo duhet të regjistrohet në atë lokalitet, vendbanim, ku është rezident pjesën më të madhe të vitit. Që i bie, nëse ju jetoni më shumë se gjashtë muaj në Prishtinë më shumë se gjashtë muaj brenda një viti, duhet të regjistroheni në Prishtinë, sepse merrni shërbime në Prishtinë. Tjetër çka është adresa permanente”, tha Kastrati.

Krahas aspekteve obliguese ndërkombëtare, sipas ekspertit të ekonomisë Safet Gërxhaliu, planifikimi dhe shërbimet më të mira publike janë prej përfitimeve kryesore të procesit, që ai e vlerëson nga më të rëndësishmit pasluftës.

“Ne kemi gjithmonë probleme dhe debate të ashpra sa i përket orientimit të buxhetit apo miratimit, apo përgatitjes së pasqyrave financiare për vitin kalendarik paraprak, dhe, në qoftë se do ta kemi një skenim bazuar në këtë regjistrim, me siguri do të ketë ndryshim në qasje, do të ketë përgjegjësi në orientime dhe do të ketë monitorim të projekteve të realizuara që do të jenë në interes të shtetit, në interes të qytetarëve”, tha Gërxhaliu.

Të dhënat që do të kërkohen për dëmet eventuale nga lufta, do të përdoren nga institucionet përkatëse hulumtuese shtetërore.

Regjistrimi do të bëhet çdo ditë, pos të hënave. Procesi, në terren, do të zgjasë deri më 17 Maj, ndërsa indikatorët fillestar pritet të prezantohen në Korrik.

Kryeministri i Kosovës, Albin Kurti bëri thirrje për angazhim të përbashkët në kryerjen e procesit të regjistrimit të popullsisë, në të cilin është përfshirë edhe pyetësori i dëmeve nga lufta 1998-1999 në ekonomitë familjare të popullit tonë.

Në takimin e ftuar nga Ministria e Administrimit të Pushtetit Lokal me kryetarët e komunave, Kurti vlerësoi se është thelbësore bashkimi i forcave me qëllim të përbashkët për institucionalizimin, mbrojtjen dhe ruajtjen e kujtesës kolektive, e cila sipas tij do t’i shërbejë edhe brezave që do të vijnë pas nesh.

Si proces të rëndësishëm dhe jetik regjistrimin e popullsisë, e konsideron edhe ministri i Administrimit dhe Pushtetit Lokal, Elbert Krasniqi.

Ndërkaq, drejtori në Institutin për Krimet e Kryera Gjatë Luftës në Kosovë, Atdhe Hetemi tha se pret që të vendosen hapa konkret që çojnë drejt grumbullimit të të gjitha materialeve ekzistuese nga komunat e Kosovës në arkivat e Institutit për Krimet e Kryera gjatë luftës në Kosovë.

“Në këtë regjistrim të popullsisë është përfshirë pyetësori i dëmeve nga lufta 1998-1999 në ekonomitë familjare të popullit tonë. Qytetarët do të deklarojnë dëmet ekonomike, shumat e pronave të shkatërruar si dhe dëmet në njerëz, familjarë të vrarë, të zhdukur, të plagosur apo të burgosur. Më saktësisht kjo periudhë përkufizohet prej 28 shkurtit 1998 deri më 12 qershor 1999. Kjo na ndërlidhë me pikën e dytë të rendit të ditës së sotme, institutin e Krimeve të kryera gjatë luftës në Kosovë të cilën e kemi funksionalizuar për të dokumentuar me saktësi të gjitha krimet anë e mbanë Kosovës. Është thelbësore që të bashkojmë forcat sepse qëllimin e kemi të përbashkët, për institucionalizimin, mbrojtjen dhe ruajtjen e kujtesës kolektive e cila nuk do të na shërbejë vetëm neve por edhe brezave që do të vijnë pas nesh. Me frymë të bashkëpunimit ju ftoj që të angazhohemi bashkë për të kontribuar në këto dy procese kaq të rëndësishme për republikën tonë, historinë tonë dhe të ardhmen tonë”, tha Kurti.

Ministri Krasniqi tha se informacioni i siguruar nga regjistrimi i popullsisë është thelbësor për qeverisjen efektive, shpërndarjen e burimeve dhe politik bërjen.

Ai konsideroi se ky proces është gurthemel i qeverisjes moderne dhe zhvillimit shoqëror, ngase sipas tij duke regjistruar me saktësi informacionin demografik do të mbrohet siguria publike dhe do të mbrohen të drejtat e njeriut.

“Regjistrimi i popullsisë siguron që çdo individ të llogaritet brenda një shoqërie. Ai u siguron qeverive të dhëna të saktë për madhësinë, përbërjen dhe shpërndarjen e popullsisë së tyre. Ky informacion është thelbësor për qeverisjen efektive, shpërndarjen e burimeve dhe politik bërjen…Ky proces nuk është thjeshtë një procedurë burokratike është gurthemel i qeverisjes moderne dhe zhvillimit shoqëror, duke regjistruar me saktësi informacioni demografik ne do të kuptojmë dhe të shërbejmë më mirë qytetarëve tanë të mbrojnë sigurinë publike, të mbrojnë të drejtat e njeriut si dhe të nxisim zhvillimin gjithëpërfshirës dhe të qëndrueshëm”, theksoi Krasniqi.

Drejtori në Institutin për Krimet e Kryera Gjatë Luftës në Kosovë, Atdhe Hetemi tha se duhet të vendosen hapa konkret që çojnë drejt grumbullimit të të gjitha materialeve ekzistuese nga komunat e Kosovës në arkivat e këtij instituti.

Ai tha se përmes dokumentimit të saktë dhe të hollësishëm të krimeve të luftës dhe pasojave të tyre do të ndërtohet një themel i fortë për një të ardhme me paqe të qëndrueshme.

“Nga ky takim mbes me shpresë që të vendosen hapa konkret që çojnë drejt grumbullimit të të gjitha materialeve ekzistuese nga komunat e Kosovës në arkivat e Institutit për Krimet e Kryera gjatë luftës në Kosovë. Përmes dokumentimit të saktë dhe të hollësishëm të krimeve të luftës dhe pasojave të tyre ne sigurisht që ndërtojmë një themel të fortë për një të ardhme me paqe të qëndrueshme…Sipas informacioneve që kam arritur të mbledhë nga ish pjesëmarrësit e këtyre komisioneve të gjitha materialet e mbledhura atëherë kanë përfunduar në dy adresa: Arkivin Qendror të Komisionit në Prishtinë të udhëhequr nga avokati Bajram Krasniqi si dhe në arkivat e secilës komunë të Kosovës. Megjithatë, ende nuk kemi arritur të identifikojmë vendosjen e saktë të arkivit qendror të komisionit, por kemi shumë interes që këto materiale t’i mbledhim nga arkivat e komunave të Kosovës. Për të arritur qëllimet tona kërkojmë bashkëpunimin e thellë dhe të vazhdueshëm me të gjitha komunat e Kosovës”, tha Hetemi.

Ndërkaq, drejtori i Agjencisë së Statistikave të Kosovës, Avni Kastrati u bëri thirrje komunave të mbështesin dhe kontribuojnë në regjistrimin e popullsisë, duke u ndihmuar regjistruesve nëpër terrene në aspektin logjistik.

Ai potencoi se në tri shtete të Evropës do të kryhet regjistrimi i popullsisë këtë vit, për çka shtoi se ky proces do të jetë sfidues për disa regjistrues të rinj që po marrin pjesë për herë të parë në këtë projekt.

“Gjatë këtyre viteve kemi pasur një bashkëpunim shumë të mirë me komunat, por kërkohet që edhe në këto javët në vijim të jeni aktiv sepse duke sipërfaqësisht që është një kohë optimale, gjashtë javë por shumë shpejtë kalojë ditët, dhe kërkohet nga ju që në aspektin logjistik t’i mbështesni stafin që është në terren. Do të jetë sfiduese për disa regjistrues të cilët kanë një distancë të themi jo aq të madhe por në aspektin logjistik nëse keni mundësi t’i mbështesni. Tri shtete jemi në Evropë që do të kemi regjistrim të popullsisë këtë vit. Do të jetë sfidues për disa regjistrues të rinj dhe të reja sepse janë për herë të parë në një projekt të tillë”, tha Kastrati.

Ndërkaq, regjistrimi i popullsisë ka filluar sot me 5 prill dhe do të zgjasë deri më 17 maj të këtij viti.

Për dallim nga vitet e kaluara, këtë vit intervistat bëhen përmes pyetësorëve elektronik dhe jo vetëm në letër siç ka qenë më herët.

Kryeministri i Kosovës, Albin Kurti, ka kujtuar se si në Rezallë të Skënderajit, 98 burra dhe djem u pushkatuan vetëm për shkak se ishin shqiptarë. Të shtënat kishin zgjatur 30 minuta.

Kurti kujton se pas ekzekutimit mizor e barbarë më 5 prill 1999, forcat e armatosura të Serbisë ua rrëmbyen kufomat.

“29 prej tyre janë gjetur në varrezën masive në Rudnicë të Rashkës, në Serbi. Nga Kizhevaku i Serbisë, më 30 shtator 2021, na u kthyen në Kosovë eshtrat e shtatë prej të vrarëve në këtë masakër. Mes tyre ishin edhe dy ribashkime me eshtrat e zhvarrosura vite më parë nga varreza masive në Rudnicë të Serbisë”, shkroi Kurti në Facebook.

Andaj, shkruan Kurti, “sot e gjithnjë u bëj thirrje partnerëve ndërkombëtarë që nga Serbia, si përgjegjëse për vrasjen dhe zhdukjen e të dashurve tonë, të kërkojnë zbardhjen e plotë të fatit të tyre dhe drejtësi për viktimat dhe familjet”.

“Drejtësia vendore duhet pa vonesë dhe me ngulm të veprojë, që përgjegjësit, urdhërdhënësit dhe ekzekutorët, të gjykohen e të dënohen. E vërteta e krimeve të Serbisë në Kosovë nuk mund të mbulohet nga dheu i varrezave masive. Nuk mund të lejojmë harresën të mbulojë mizoritë që ndodhën në luftë”, shkroi tutje kryeministri Kurti.

“Duke nderuar të kaluarën, me drejtësi për viktimat, angazhohemi për të ardhmen e Republikës sonë. Për Kosovën e pavarur, ku brezat e rinj rriten të lirë e të sigurt. Duke mësuar nga e kaluara, ecim përpara me shpresë dhe vendosmëri. Përkujtimi ynë është dëshmi e përkushtimit për të mos harruar sakrificat për të shtrenjtën e shenjtën liri. I përjetshëm qoftë kujtimi i martirëve të kombit nga Rezalla! Lavdi!”, përfundoi Kurti.

Lista Serbe ka thënë të premten se serbët e Kosovës nuk do të marrin pjesë në regjistrimin e popullsisë në Kosovë, për t’i dërguar “mesazh të qartë” kryeministrit kosovar Albin Kurti.

Regjistrimi i popullsisë, ekonomive familjare dhe banesave në Kosovë do të zhvillohet nga data 5 prill deri më 17 maj.

Lista Serbe – partia më e madhe e serbëve të Kosovës që e gëzon edhe mbështetjen e Beogradit zyrtar – e akuzoi kryeministrin e Kosovës, Albin Kurti, për “shtypjen shumëvjeçare të serbëve” në Kosovë.

“Të nderuar qytetarë…dëshirojmë t’i dërgojmë një mesazh të qartë Albin Kurtit dhe ata që e mbështesin atë se populli serb nuk do të marrë pjesë në regjistrimin e rrejshëm të ardhshëm në organizatën e tij, me të cilën ai dëshiron të konfirmojë suksesin e tij të turpshëm në dëbimin e serbëve”, tha Lista Serbe në Facebook.

Por, sipas Ligjit për regjistrimin e popullsisë, ekonomive familjare dhe banesave, çdo person mund të gjobitet nga 30 deri në 2.000 euro, nëse refuzon t’i japë informacionet e kërkuara nga regjistruesi.

Gjobat janë edhe më të mëdha, deri në 20.000 euro, për biznese.

Lista Serbe tha se pjesëmarrja në “proceset e organizuara nga Kurti do të ishte poshtërimi më i madh për popullin tonë, në kohën kur i njëjti ua mohoi serbëve të drejtën për pensione dhe paga, pengoi funksionimin normal të shëndetësisë dhe përfitimeve sociale, hoqi të drejtën e votës, arrestoi dhe persekutoi Serbët, e pushtoi komunat me forcë, militarizuan veriun e Kosovës…”.

Ajo po i referohej një rregulloreje të Bankës Qendrore të Kosovës, e cila nga 1 shkurti e ndaloi përdorimin e dinarin për pagesa me para të gatshme, pasi e caktoi euron si valutën e vetme zyrtare në vend.

“Krahas kësaj, Kurti dëshiron të sulmojë edhe Serbinë me këtë regjistrim me disa kërkesa për dëmshpërblime të luftës, gjë që e pengon edhe më shumë çdo serb të jetë pjesë e këtij procesi”, tha ajo duke iu referuar deklaratës së Kurtit, i cili tha më 30 mars se autoritetet e Kosovës po përgatiten që Serbia të akuzohet si shtet përgjegjës “për krimet e kryera gjatë luftës në Kosovë, e që janë krime lufte, krime kundër njerëzimit dhe gjenocid”.

Gjatë regjistrimit të fundit të popullsisë në Kosovë, të mbajtur në vitin 2011, procesi nuk ishte zhvilluar në katër komunat me shumicë serbe në veri dhe ishte bojkotuar pjesërisht edhe në komunat e tjera me shumicë serbe në Kosovë.

Bojkoti kishte ndodhur pasi autoritetet nga Beogradi u kishin kërkuar banorëve serbë në Kosovë të marrin pjesë vetëm nëse regjistrimi bëhet nga misioni i OKB-së në Kosovë, UNMIK./REL/

Brukseli është i shqetësuar për mungesën e konsultimeve para vendimit të Bankës Qendrore të Kosovës (BQK) për ndalimin e dinarit dhe pasojat që ka në jetën e përditshme të serbëve të Kosovës. Kështu është shprehur përfaqësuesi i Lartë i Bashkimit Evropian (BE) për Politikë të Jashtme dhe Siguri, Josep Borrell.

“Kjo lidhet veçanërisht me ndikimin e vendimit në shkolla dhe spitale, duke pasur parasysh mungesën e dukshme të alternativave për momentin”, thuhet në përgjigjen me shkrim të Borrellit të publikuar në faqen e Parlamentit Evropian.

Në pyetjet e deputetit francez Dominik Bild se çfarë planifikon të bëjë Komisioni Evropian (KE) lidhur me çështjen e themelimit të Asociacionit, vendimin e BQK-së dhe në lidhje me sistemin arsimor dhe shëndetësor për serbët e Kosovës, Borrell ka thënë se këto është dashur të negociohen bashkë me Asociacionin

“Çështja e vendimit të BQK-së për operacionet me para të gatshme prek çështje që është dashur të negociohen në lidhje me Asociacionin, siç janë statusi dhe financimi i institucioneve të menaxhuara nga Serbia në Kosovë dhe integrimi i tyre në institucionet dhe kornizën ligjore të Kosovës”, ka shkruar tutje ai.

Ai ritheksoi se themelimi i Asociacionit është obligim i Kosovës sipas së drejtës ndërkombëtare dhe buron nga Marrëveshja e Brukselit e vitit 2013, e cila është arritur nga Serbia dhe Kosova në dialog me ndërmjetësimin e BE-së dhe më pas është miratuar nga Kuvendi i Kosovës.

Ndërkaq, as dje në Bruksel të dyja palët nuk kanë arritur një marrëveshje sa i përket përdorimit të dinarit.

Sot mbushen 25 vjet nga masakra në Rezallës së Skenderajt, ku ushtria dhe policia serbe ekzekutoi 98 shqiptarë, banorë të Rezallës dhe fshatrave përreth, nga të cilët 44 ishin munduar t’i zhdukin.

Një pjesë e trupave u gjenden në Rudnicë të Rashkës dhe iu dorëzuan familjarëve. Më 5 prill 1999 serbët rrethuan shtëpitë e këtyre familjeve dhe pushkatuan pothuajse të gjithë burrat dhe djemtë e rinj.

Nga masakra serbe në Rezallë kanë shpëtuar vetëm tre persona. Kjo masakër konsiderohet si një ndër masakrat më të pamëshirshme gjatë luftës në Kosovë.

Përgatiti: Haris Ademi

As në takimin e tretë në Bruksel, të enjten, Kosova dhe Serbia nuk kanë arritur marrëveshje për çështjen e dinarit.

Kryenegociatorët Besnik Bislimi dhe Petar Petkoviq e kanë fajësuar njëri-tjetrin për mungesë të vullnetit për të gjetur zgjidhje. Kurse ndërmjetësuesi nga Bashkimi Evropian, Miroslav Lajcak, tha se janë kapërcyer disa boshllëqe mes propozimeve të të dyja palëve. Ndërsa, do të ketë një takim të katërt, pas rreth dy javësh.

Këtë herë, BE-ja ka dhënë një propozim të vetin, për të cilin Bislimi tha se është pajtuar vetëm Kosova.

“Duke parë pamundësinë e arritjes së një kompromisi, Lajçak ka nxjerrë një propozim të konsoliduar, për të cilën ne besojmë se është konstruktiv dhe në rrugën e duhur për të gjetur zgjidhje, e cila më së shumti i shkon për shtati qytetarëve serbë në Kosovë, por në të njëjtën kohë respekton Rregulloren e BQK-së. Pala serbe nuk ka qenë e gatshme të reflektojë këtë propozim dhe ka kërkuar kohë shtesë”, tha Bislimi.

Kryenegociatori kosovar, madje, e akuzoi atë serb se e luajti rolin e avokatit të Bankës Postare Serbe, duke kërkuar licencimin e saj.

Në anën tjetër, Petkoviq tha se ishte konstruktiv.

“Ne përsëritëm edhe një herë qëndrimin dhe propozimin tonë, i cili është i balancuar dhe nënkupton një zgjidhje kompromisi. Nga ana tjetër, nuk kishte vullnet të mjaftueshëm nga ana e Prishtinës”, tha Petkoviq.

Takimi i ardhshëm në Bruksel, i katërti me radhë për dinarin, sipas Bislimit, do të jetë i fundit për këtë temë, prandaj duhet arritur marrëveshje. Kurse Petkoviq tha se kjo çështje do të zgjidhej, po të ishte themeluar Asociacioni i Komunave me Shumicë Serbe.

Meqë, takimet e deritashme kanë rezultuar pa sukses, Lajcak shkroi në X se planifikon t’i vazhdojë diskutimet për rregulloren e Bankës Qendrore, bazuar në idetë e BE-së për kompromis.

Përgatiti: Fatlum Jashari

Në vizitën e bujshme në katër komunat në veri të vendit, kryeministri Albin Kurti takoi vetëm dy kryetarët nga partia e tij.

Ai nuk tregoi se pse nuk i takoi dy kryetarët tjerë, anëtarë të Partisë Demokratike.

Derisa bashkëpartikëve u shkuan më shpesh, në tre vjet, në organizime e vizita të ndryshme, jo pak herë pushteti qendror la jashtë e nuk ftoi udhëheqësit lokalë.

Pasi tregoi se këtë shqetësim e kanë diskutuar në takime me kryetarët, drejtori Asociacionit të Komunave të Kosovës, Sazan Ibrahimi, e vlerësoi të gabuar praktikën që po ndjek Qeveria.

“Në disa raste, delegacione të ndryshme nga niveli qendror shkojnë në vizita nëpër komuna pa e njoftuar kryetarin e komunës. Dhe, më duhet të theksoj se të gjithë kryetarët e komunave, pa marrë parasysh përkatësinë e tyre partiake, e kanë vullnetin që të takohen me nivelin qendror, sepse është rast dhe mundësi e mirë për t’ia elaboruar në detaje problemet me të cilat kryetarët e komunave po ballafaqohen”, tha Ibrahimi.

Krahas ndarjes së hises për investime, në Iniciativën për Progres përmendën rëndësinë e qartësimit të veprimeve, si kryeministër dhe kryetar partie.

“Një vërejtje nga raporti i progresit, më konkretisht kemi pasur vërejtje si shtet në atë se granti i performancës nuk ndahet në nivelin e duhur, siç e dimë edhe granti i performancës shkon direkt për investime kapitale te komunat. Andaj nuk ka pasur ndarje të barabartë”, tha Qëndrim Ilazi nga Iniciativa për Progres.

Teksa foli për rëndësinë e vullnetit të dyanshëm për takime, njohësi i qeverisjes lokale Qëndrim Arifi theksoi se nga mungesa e bashkëpunimit vuajnë qytetarët.

“Historikisht është bërë ky dallim, madje jo vetëm në vizita, por edhe në shpërndarjen e mjeteve dhe investimeve që është shumë më e rëndësishme sesa një vizitë, them kështu, krejt formale. Për fat të keq këtë avaz e ka vazhduar edhe Qeveria Kurti, posaçërisht kjo vërehet me vizitën e djeshme në komunat veriore”, tha Arifi.

Kryetarë të komunave, anëtarë të partive opozitare në pushtetin qendror, janë ankuar vazhdimisht për shpërfillje dhe ndarje jo të drejtë të buxhetit.

Përgatiti: Nora Luta

Shfaqja e këtyre fotografive, në fjalën përfundimtare nga Prokuroria Speciale në rastin e ish-deputetit të LDK-së, Shkumbin Gashi dhe Sylë Balaj, ka bërë që të rihapet shqyrtimi gjyqësor në këtë rast.

Para se ta japë verdiktin rreth akuzave për manipulim me vota në zgjedhjet parlamentare të vitit 2021, Gjykata Themelore e Prishtinës për të vërtetuar kohën dhe vendin e shkrepjes së tyre ka urdhëruar Agjencinë e Forenzikës për verifikim.

Për të sqaruar edhe disa paqartësi rreth provave, gjykata do ta ftojë për të dëshmuar edhe një zyrtar të Komisionit Qendror të Zgjedhjeve.

Në fotografitë që janë kontestuar nga mbrojtja, Prokuroria Speciale pretendon
se shihet i akuzuari Balaj bashkë me katër të dënuar duke plotësuar vota.

Sipas PSRK-së, ish-deputeti Gashi dhe Balaj abuzuan me të dhënat e 71 bashkatdhetarëve në Austri, duke mbushur fletëvotimet pa pëlqimin e tyre në favor të rezultatit zgjedhor të Gashit.

Përveç tyre, në këtë rast akuzoheshin edhe Kastriot Balaj, Shpetim Shala, Milot e Dardan Blakaj, të cilët e kanë pranuar fajësinë dhe janë dënuar me burgim me kusht.

Ndërsa, procedura ishte veçuar ndaj Kushtrim Gjevukajt, pasi akuzohej për veprën penale “Kanosja”.