Tag: Ballina

Përgatiti: Fatlum Jashari

Euro dhe dinar – të dyja valutat pranohen për pagesa me para të gatshme në bizneset në Mitrovicë të Veriut, edhe pas përfundimit të periudhës kalimtare për zbatim të lehtësuar të rregullores së Bankës Qendrore të Kosovës.

Në Bankën Postare, statusi ligjor i së cilës në Kosovë mbetet i pazgjidhur dhe të cilën Serbia e bëri pjesë të dialogut në Bruksel, nuk folën për ATV-në.

Megjithatë, gazetarë e aktivistë të shoqërisë civile thanë se nga mëngjesi i së hënës, kjo bankë po punon vetëm me euro.

“Janë dy kategori e postave, Postanska Stedionica dhe Posta. Posta ka pranuar pagesat deri në 11, por pas disa telefonatave edhe ata e kanë ndërpre, që d.m.th. të dyja janë duke pranuar transfer vetëm në euro”, tha Branislav Krstic, gazetar.

Edhe pse nuk ka konfirmim zyrtar, sipas aktivistit Dusan Radakovic, edhe përfituesit nga skemat sociale dhe pensionale të Serbisë, pagesat po i pranojnë në valutën zyrtare të Kosovës.

“Deri tani askush nuk ka informacione zyrtare, vetëm se nga sot Posta ka nisur shpërndarjen të konvertuar në Euro, sepse Serbia bën pagesën në llogaritë bankare me dinarë, sepse janë procedura normale deri sot. Banka bën këmbimin sipas kursit të valutave, që aktualisht 1 euro është rreth 120 dinarë, dhe njerëzit që marrin ndihmë sociale ose pension i marrin ato në Euro. Maksimumi i lejuar i tërheqjes nga banka është 400 euro”, tha Radakovic.

Krahas kritikave në mungesë informacionesh zyrtare nga institucionet e Kosovës, ai shpjegoi gjendjen në terren.

“Në shitore shumica i kanë çmimet në Euro, dhe hap pas hapi, pasi që nuk kanë mjaftueshëm dinarë, njerëzit kanë filluar të funksionojnë më shumë me euro. Problemi është se askush nuk e di cili është ndëshkimi nëse e përdor dinarin”, tha Radakovic.

Pasi tha se qytetarët në veri po vuajnë nga politika e Prishtinës dhe Beogradit, gazetari Krstic tha se para kalimit të plotë eventual në Euro, pret zgjatje të periudhës tranzitore deri në një marrëveshje në Bruksel.

“Qytetarët janë duke pritur vendimet nga Beogradi. Pse nga Beogradi? Sepse nuk është pranueshme të shkohet në NLB ose Raiffeisen, të cilat janë të licencuara nga BQK-ja, shteti i Kosovës, dhe të cilat përdorin vetëm euro, nëse dikush nga Beogradi nuk ma paguan rrogën në atë bankë”, tha Krstic.

Pa treguar shifra rreth llogarive bankare të reja, të hënën, Banka Qendrore njoftoi se gjatë periudhës kalimtare tremujore janë vendosur 38 bankomatë të rinj.

Po ashtu, BQK-ja listoi tetë degë të institucioneve financiare të licencuara, katër prej tyre në veri të vendit – tri në Leposaviq dhe një në Zveçan.

Megjithatë, nuk tregoi lidhur me veprimet që do të ndërmerren për shkeljen e rregullores.

Përgatiti: Pranvera Krasniqi

Dragashi është komuna e vetme deri tani, e cila pak ditë para përfundimit të regjistrimit të popullsisë, ka kërkuar zyrtarisht shtyrjen e këtij procesi edhe për një kohë.

Agjencia e Statistikave pret kërkesa të ngjashme edhe nga komunat e tjera, por ushtruesi i Detyrës së Kryeshefit, Avni Kastrati, thotë se nuk ka arsye të qëndrueshme që procesi të mos mbyllet më 17 maj.

“Dragashi ka thënë se ka sfidë me regjistrimin e komuniteteve, por nuk do të shtyhet pa ndonjë arsye specifike, që do të thotë jemi optimistë se procesi do të përfundojë me kohë…”, tha Kastrati.

Sfidë në gjithë territorin, sipas Kastratit, ishte dorëheqja e anketuesve në fillim të procesit, për çka ASK-ja u detyrua t’i shfrytëzojë edhe regjistruesit rezervistë, që përbënin 22% të stafit.

“E kanë parë gjatë punës që nuk është edhe e lehtë, disa janë tërheqë, por kemi pasë rezerva, i kemi shfrytëzuar që të gjithë…”, tha Kastrati.

Deri të hënën, janë regjistruar mbi 1.4 milion banorë rezidentë në Kosovë.
Ndërkaq, 400 mijë të tjerë janë regjistruar nga diaspora, në platformën online.

Udhëheqësit e Agjencisë së Statistikave besojnë se të dhënat nga regjistrimi i popullsisë do të jenë më të sakta se ato të vitit 2011, për shkak të zhvillimit të teknologjisë.

Përgatiti: Nora Luta

Pasuria e sekuestruar e të dyshuarit kryesor për rastin Banjska, Milan Radojicic, është vënë në dispozicion për shfrytëzim nga shteti.

Departamenti Special i Gjykatës Themelore të Prishtinës dha pëlqimin për dhënien me qira të aseteve të sekuestruara, pas plotfuqishmërisë së urdhrit ndalues përfundimtar.

Aty përfshihet vila te Ujmani në Zubin Potok, banesa “Penthouse” dhe restoranti “Grey” në Mitrovicë të Veriut, përfshirë edhe zyrën si aneks i këtij restoranti.

Sipas KGJK-së, gjykata pas kërkesës së Agjencisë për Menaxhimin e pasurisë së sekuestruar dhe konfiskuar ka dhënë pëlqim që ato të shfrytëzohen në mënyrën më të mirë të mundshme.

Ndërsa, urdhrat ndalues ia ka dërguar edhe Odës së Noterëve dhe Agjencisë Kadastrale, në mënyrë që të mos lejohet ndryshimi i pronësisë deri në përfundim të procesit gjyqësor.

“Gjykata, pas plotfuqishmërisë së urdhrave ndalues, me të cilat janë ndaluar përfundimisht astet e lart-theksuara (vila, banesa dhe restoranti me aneksin e tij) me datë 25.03.2024, këto urdhra ia ka dërguar për ekzekutim Odës së Noterëve të Kosovës, Agjencisë Kadastrale të Kosovës dhe Agjencisë për Menaxhimin e Aseteve të Sekuestruara dhe Konfiskuara. Gjykata me datë 26.04.2024, sipas kërkesës së Agjencisë për Menaxhimin e Aseteve të Sekuestruara dhe Konfiskuara, ka dhënë pëlqimin e lëshimit me qira të këtyre aseteve, pasi që nga kjo agjenci si kompetente për administrimin e këtyre aseteve është vlerësuar se forma më e duhur për administrimin e këtyre aseteve është dhënia me qira e tyre”, thuhet në përgjigjen e Këshillit Gjyqësor të Kosovës.

Në rastin e Banjskës, Gjykata ka bërë edhe konfiskim automatik.

“Gjykata, në këtë rast ka bërë konfiskimin e përhershëm (automatik) dhe sekuestrimin e përkohshëm të aseteve sipas urdhrit ndalues përfundimtar deri në marrjen e vendimit final lidhur me këto asete. Gjykata konfiskim automatik ka bërë të armëve, municioneve (respektivisht armatimit) të përdorur e të kapur në vendin e ngjarjes, e po ashtu edhe të veturave të përdorura në këtë sulm të armatosur-terrorist, si mjete jashtë qarkullimit dhe qenësisht të rrezikshme për siguri”, thuhet më tej në përgjigjen e Këshillit Gjyqësor të Kosovës.

E vila, për të cilën ministri Xhelal Sveçla pati thënë se do të mund të shfrytëzohet si stacion policor, vazhdon të sigurohet nga Policia.

Nga Agjencia përmes një përgjigjeje me shkrim i kanë thënë televizionit se vlerësimi i aseteve është ende në fazën e vlerësimit dhe sekuestrimit, dhe se për këtë ende nuk ka ndonjë vendim për dhënie në shfrytëzim.

Ndërkohë, Prokuroria Speciale është duke vazhduar hetimin lidhur me sulmin terrorist-paramilitar në Banjskë, ndërsa tre të arrestuarit janë në paraburgim.
Vladimir Tolic, Dusan Maksimovic, Milan dhe Blagoje Spasojevic, siç kupton televizioni janë intervistuar nga Prokuroria Speciale në fund të muajit të kaluar, por kanë shfrytëzuar të drejtën për t’u mbrojtur në heshtje.

Përgjegjësinë për udhëheqjen dhe organizimin e sulmit më 24 Shtator, në të cilin mbeti i vrarë rreshteri i Policisë, heroi Afrim Bunjaku, disa ditë pas ngjarjes e mori atëkohë nënkryetari i Listës Serbe, Milan Radojçiq.

Banka Qendror e Kosovës (BQK) ka njoftuar se janë licencuar katër banka për import ose eksport të parasë së gatshme dhe 57 autorizime për transport të parave të gatshme. Sipas BQK-së, nga një zyrë janë licencuar në Leposaviq, Zveçan, Shtërpcë dhe në Gjilan, ndërsa dy në Shtërpcë. BQK po ashtu njofton se janë vendosur 38 bankomatë, janë kryer mbi 350 vizita dhe aktivitete promovuese si dhe janë dhënë 11 milionë euro kredi.

BQK ka njoftuar se nga dhjetori i vitit 2023-s deri në prill të këtij viti janë larguar nga qarkullimi rreth 2.5 milionë copë të monedhës dy-euroshe, e mbi 54 mijë copë të falsifikuara. Sipas njoftimit, BQK-ja i ka futur në përdorim mbi 7.4 milionë copë monedhë 2 euro, 1 euro, 50 cent, 5 cent, 2 cent dhe 1 cent.

“Janë tërhequr nga qarkullimi dhe deponuar në BQK rreth 2.5 milionë copë monedha të denominimeve prej 2 eurosh; Janë detektuar dhe u është parandaluar hyrja në sistemin financiar rreth 54,000 copë monedha të denominimeve prej 2 eurosh, duke i tërhequr nga qarkullimi të dyshuara si të falsifikuara; Është furnizuar ekonomia me afro 7.4 milionë copë monedha euro plotësisht të reja të të gjitha denominimeve pa asnjë tarifë të aplikuar; Është furnizuar ekonomia me afro 5.82 milionë copë kartëmonedha euro plotësisht të reja dhe të përshtatshme për riqarkullim ne shume prej 261.6 milionë euro. Po ashtu janë importuar monedha krejtësisht të reja 5 milionë copë, ose 8 milionë euro; Janë eksportuar 2.4 milionë copë (2.8 milionë euro) të monedhës 2 euro (të tërhequra nga qarkullimi); Numri i kartëmonedhave prej 500 (pesëqind) euro të tërhequra nga qarkullimi dhe deponuara në BQK ka kaluar mbi 266,000 (dyqind e gjashtëdhjetë e gjashtë mijë) copë/njësi në vlerë mbi 133 (njëqind e tridhjetë e tre) milionë euro; Janë licencuar katër (4) banka për import/eksport të parasë së gatshme; dhe 57 autorizime (kryesisht të valutave joeuro) për transport të parave të gatshme në kundërvlerë të tërësishme prej 177.4 milionë euro”, thuhet në njoftimin për media të BQK-së.

BQK ka bërë edhe vlerësimin mbi efektet nga Plani për Zbatim të Lehtësuar të Rregullores për Operacione me Para të Gatshme.

“Nga lista prej 10 pikash të Planit, BQK ka realizuar aktivitete në secilën prej tyre, duke filluar nga funksionalizimi i linjës së telefonit pa pagesë (0800 222 55), lehtësimi i kushteve për hapjen e llogarive bankare, pezullimi i përkohshëm i tarifës së BQK-së dhe aktivitetit të intensifikuar promovues, deri te pikat tjera që kanë kërkuar angazhimin dhe kontributin e institucioneve financiare, për çka shprehim falënderimin. Disa nga efektet e Planit për Zbatim të Lehtësuar të zbatuar gjatë periudhës tre (3) mujore, i cili kontribuoi në rritjen e qasjes në financa të sigurta përmes bankave dhe institucioneve financiare jobankare, gjithëpërfshirjen financiare dhe mbrojtjen e tyre nga aktivitetet financiare të pashëndosha, janë paraqitur në vijim: Janë licencuar tetë (8) degë/zyra të institucioneve financiare; Një zyrë bankare/degë në Leposaviq, Një zyrë e kompanisë së sigurimit (jojetë) në Leposaviq. Gjashtë zyra të institucioneve financiare jobankare dhe mikrofinanciare: Një në Leposaviq, një në Zveçan, dy në Graçanicë, një në Shtërpcë, një në Shillovë, Gjilan.

Po ashtu sipas BQK-së, janë vendosur 38 bankomatë/ATM/pajisje të vetëshërbimit financiar; janë kryer mbi 350 vizita dhe aktivitete promovuese (duke përfshirë Remote Banking); Janë dhënë afër 11 milionë euro kredi.

“Gjatë kësaj periudhe transitore tashmë të përmbyllur, BQK-ja në kuadër të edukimit financiar, ka organizuar kampanja informuese, siç është Manuali për Pyetjet dhe Përgjigjet e Shpeshta mbi Rregulloren, dërgimi i SMS-ve informuese, publikimi i sqarimeve dhe njoftimeve në ëebfaqe dhe në të gjitha rrjetet sociale të BQK-së, në gjuhët zyrtare të Republikës së Kosovës”, thuhet në njoftim.

Më tej në komunikatë thuhet se zgjerimi i qasjes në financa, përfshirja financiare, edukimi financiar dhe mbrojtja e konsumatorit do të jenë aktivitete dhe angazhime të vazhdueshme të BQK-së mbi bazën e praktikave më të mira evropiane, si objektiva të Planit Strategjik të BQK-së, me fokus në zonat pjesë e Planit të Lehtësimit të Zbatimit të Rregullores. Këto veprime ndërmerren krahas angazhimit konstruktiv në lehtësimin e mekanizmit të transferimit të mjeteve në mënyrë sa më efikase te qytetarët e Republikës së Kosovës, përmes llogarive bankare mbi bazën e rregullores në fuqi.

“Sa i përket luftës ndaj parave të falsifikuara dhe kujdesit të duhur, BQK-ja vazhdon t’i inkurajojë qytetarët dhe bizneset të deponojnë monedhat e tyre në bankat komerciale dhe të përdorin sa më tepër kartelat dhe pagesat tjera elektronike, si dhe çdo dyshim për tentim të futjes në qarkullim të parave të falsifikuara nga falsifikatorët ta raportojnë tek autoritetet përgjegjëse. Po ashtu, udhëzohen bizneset që të furnizohen me monedha vetëm përmes bankave komerciale dhe të shmangin kanalet jozyrtare, si dhe të ofrojnë sa më tepër mundësi për pranimin e pagesave elektronike”, thuhet në fund të njoftimit.

Kjo rregullore ka hyrë në fuqi më 1 shkurt, por BQK ka vendos një fazë tranzitore, që mundësonte lehtësim për zbatimin e këtij vendimi.

Emisari i Bashkimit Evropian për dialogun Kosovë-Serbi, Miroslav Lajçak i ka ftuar kryenegociatorët e dy palëve që të vazhdojnë takimet për çështjen e dinarit, në Bruksel.

Kështu bëri të ditur zëdhënësi i BE-së, Peter Stano, në një konferencë për media.

“Ata do të takohen këtë të mërkurë këtu në Bruksel, dhe do të vazhdojnë diskutimet për gjetjen e një zgjidhje të qëndrueshme të përkohshme për njerëzit e prekur nga rregullorja e Bankës Qendrore”, tha ai.

Sipas Stanos, kjo temë po e largon vëmendjen nga progresi i implementimit të aneksit të Ohrit.

“Në secilin takim që ishte për këtë çështje, shpresonim që të ishte i fundit. Pasi këto tema po e largojnë vëmendjen nga ajo që duhet, dhe ajo që duhet është progresi në implementimin e Aneksit të Ohrit”, shtoi Stano.

Ai shpreson në arritjen e një kompromisi të nevojshëm kësaj radhe.

Zëdhënësi i BE-së shton se kjo varet nga gatishmëria e palëve.

“Shpresojmë që palët do të jenë të gatshme të sillen në mënyrë evropiane, dhe të arrijnë kompromisin e nevojshëm. Por sërish, sikur me gjithçka tjetër në dialog, nuk varet shumë nga ajo që ne dëshirojmë, por nga gatishmëria dhe aftësia e dy palëve të arrijnë një kompromis të pranueshëm”, tha Stano.

Kancelari i Gjermanisë, Olaf Scholz, i ka kërkuar Serbisë që ta zbatojë Marrëveshjen në rrugën drejt normalizimit të raporteve me Kosovën, që njihet edhe si Marrëveshja e Ohrit.

Gjatë një telefonate të zhvilluar me presidentin e Serbisë, Aleksandar Vuçiq, sipas njoftimit të Berlinit, Scholz ka theksuar rëndësinë e dialogut për normalizimin e raporteve mes Kosovës dhe Serbisë, që ndërmjetësohet nga Bashkimi Evropian.

“Gjermania ka riafirmuar mbështetjen e tij për këtë proces. Ai [Scholz] ka qartësuar obligimet e Serbisë për zbatimin Marrëveshjes së Ohrit”, u tha në njoftim.

Këtë marrëveshje, së bashku me Aneksin për zbatimin e saj, Kosova dhe Serbia e kanë arritur vitin e kaluar. Marrëveshja nuk është nënshkruar, por ndërmjetësi ka thënë se ajo është ligjërisht e obligueshme për palët.

Blloku evropian ka thënë se palët nuk kanë nisur zbatimin e saj.

Marrëveshja prej 11 nenesh ndër tjerash parasheh edhe një nivel të vetëmenaxhimit për komunitetin serb në Kosovë dhe njohje të ndërsjellë të simboleve shtetërore, ndërsa kërkon nga Prishtina dhe Beogradi që t’i zbatojnë, po ashtu, të gjitha marrëveshjet e mëhershme të arritura gjatë dialogut.

Ndërkaq, Vuçiq përmes një postimi në Instagram, tha se me Scholz ka biseduar për situatën e serbëve që jetojnë në Kosovë dhe për çështjen e Asociacionit të komunave me shumicë serbe.

Udhëheqësi serb tha se ka informuar kancelarin gjerman “në detaje për gjendjen pothuajse të padurueshme për komunitetin serb në Kosovë”, por edhe për “shmangien e vazhdueshme të Prishtinës nga përmbushja e detyrimeve të saj të pranuara dhe nënshkruara, veçmas në lidhje me formimin e Asociacionit”.

Në kuadër të dialogut për normalizimin e raporteve, që ndërmjetësohet nga Bashkimi Evropian, Kosova dhe Serbia kanë arritur dy marrëveshje për themelimin e Asociacionit, më 2013 dhe 2015.

Por, më 2015, Gjykata Kushtetuese e Kosovës gjeti se Marrëveshja mbi parimet për themelimin e Asociacionit nuk ishte në harmoni të plotë me aktin më të lartë juridik të shtetit, duke thënë se duhet të harmonizohet përmes akteve nënligjore.

Megjithatë, qeveri të njëpasnjëshme të Kosovës refuzuan ta zbatojnë marrëveshjen, duke shprehur frikë se asociacioni i tillë njëentik mund të ndikojë në funksionalitetin e duhur të shtetit.

Gjermania, së bashku me shtetet e tjera në BE, por edhe Shtetet e Bashkuara, vazhdimisht i bëjnë thirrje Kosovës që të themelojë Asociacionin e komunave me shumicë serbe.

Kryeministri i Kosovës, Albin Kurti, po ashtu ka thënë se ekzekutivi që ai udhëheqë refuzon që të pranojë që Asociacioni të jetë kusht për pranimin e vendit në organizatën e Këshillit të Evropës.

“Qeveria nuk e pranon kushtëzimin e anëtarësimit në KiE me Asociacion. Për normalizimin e marrëdhënieve me Serbinë, ne bisedojmë në Bruksel, e jo në Strasburg”, tha Kurti më 8 maj.

Vuçiq, gjatë bisedës me Scholz po ashtu i ka kërkuar Gjermanisë mbështetje në rrugën e integrimit evropian.

“E ritheksova se Serbia vazhdimisht avokon për intensifikimin e aktiviteteve diplomatike në kontekstin e të gjitha konflikteve aktuale dhe çështjeve të hapura që rëndojnë Evropën dhe rajonin e Ballkanit Perëndimor, gjë që e ka demonstruar gjithmonë në të gjitha forumet dhe iniciativat”, shkroi Vuçiq në llogarinë e tij në Instagram.

Në procesin e zgjerimit të BE-së aktualisht ndodhen dhjetë shtete, përfshirë gjashtë shtete nga Ballkani Perëndimor. Prej shteteve që janë në këtë proces, nëntë kanë statusin e vendit kandidat, ndërsa vetëm Kosova nuk e ka atë status. Kosova kishte aplikuar për anëtarësim në BE në dhjetor të vitit 2022, por kërkesa e saj nuk është shqyrtuar nga Bashkimi Evropian./REL

Nga dje euroja është valuta e vetme për transaksione në Kosovë. Periudha transitore e Bankës Qendrore të Kosovës ka përfunduar. Nga sot sipas Rregullores, do të ketë masa ndëshkuese për ata që përdorin dinarin. Bankat komerciale që operojnë në Kosovë, ndërkaq janë udhëzuar që të hapin degë të reja në veri.

Kryeministri i Kosovës Albin Kurti ka folur rreth rregullores së BQK-së për përdorim të parasë së gatshme.

“Banka Qendrore e Republikë së Kosovës, e ka sqaruar se qëllimi është ligjshmëria, transparenca dhe jo ndëshkimi dhe dënimi. Janë ata të cilët janë më lartë se para nesh dhe prin në këtë proces të tranzicionit sa më të lëmuar të kalimit si mjet pagese”, tha Kurti një deklaratë për RTK, nga Kamenica ku po viziton këtë komunë.

Kurti përsëriti se rregullorja e BQK-së nuk është kundër dinarit, por është për euron si i vetmi mjet pagese në Kosovë.

Zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi, ka udhëtuar drejt Hungarisë.

Gjatë qëndrimit dy ditor në Budapest, ai do të marrë pjesë në ceremoninë e nënshkrimit të Memorandumit të Bashkëpunimit ndërmjet Institutit të Kosovës për Administratë Publike dhe Universitetit të Shërbimeve Publike të Hungarisë, Ludovika.

Në këtë vizitë, ndër të tjera, zëvendëskryeministri Bislimi pritet të takohet edhe me ministrin e Jashtëm dhe të Tregtisë, Peter Szijjarto si dhe me ministrin për Çështje të BE-së, Janos Boka.

Agjencia e Statistikave të Kosovës (ASK) mbajti konferencën e radhës për media lidhur me ecurinë e punës gjatë Javës së gjashtë në terren për Regjistrimin e Popullsisë, Ekonomive Familjare dhe Banesave në Kosovë, raporton EO.

U.D. i kryeshefit Ekzekutiv të ASK-së, Avni Kastrati ka theksuar se disa komuna kërkojnë shtyerjen e procesit të regjistrimit, ndërsa deri më tani janë regjistruar 1 milionë e 420 mijë e 148 qytetarë.

Kastrati, ka thënë se procesi i regjistrimit po vazhdon edhe në javën e gjashtë.

Ai tha se procesi i votimit ka shkuar mirë, disa komuna kanë kërkuar të shtyhet afati i regjistrimit, mirëpo, Kastrati tha se sipas mënyrës që ka shkuar procesi i regjistrimit deri më tani nuk e shohin të arsyeshme shtyerjen e afatit.

“Një komunë ka kërkuar përmes një shkresë të shtyhet në aspektin statistikor nuk ka arsye me u shty. Në përgjithësi regjistrimet kanë qenë aktiv, ka thirrje masive me u rregjistru ka një lloj frike te qytetarët se nëse nuk regjistrohen. Bëj thirrje regjistruesve të bëjnë edhe një vizitë sidomos te banesat e shprazta mos ka mbet dikush pa u regjistru”, tha ai.

Kastrati tha se në disa komuna janë hapur zyre ku qytetarët munden me shku me u regjistru, këto komuna janë Prishtina dhe Prizreni, por e njëjta mund të ndodh edhe në komuna tjera nëse e shohin të nevojshme. Ndërsa në Prishtinë, qytetarët mund të regjistrohen në ASK, edhe në komunë.

Kurse, sa i përket regjistrimit në komunat veriore, Kastrati tha se ka hezitime, por pritet edhe këto ditë të vazhdojë regjistrimi. Regjistruesve iu bë thirrje të bëjnë edhe një rishikim në shtëpi të pabanuara.

“Regjistrimi po shkon sipas planit. Komunitetet po marrin pjesë, në veri ka hezitim, presim edhe këto ditë të regjistrohen”, tha Kastrati.

Kur kanë mbetur edhe pesë ditë deri në përfundimin e procesit të regjistrimit të popullsisë së Kosovës, mbi 1 milionë e 420 mijë banorë janë regjistruar deri më tani.

Ndonëse pritshmëritë e Agjencisë së Statistikave të Kosovës janë që procesi të përfundojë me kohë, ka kërkesa prej disa komunave që kjo datë të shtyhet.

Kështu ka bërë të ditur ushtruesi i detyrës së kryeshefit ekzekutiv në këtë institucion, Avni Kastrati.

Në një konferencë për media, Kastrati ka njoftuar se deri më tani çdo gjë ka shkuar sipas planifikimeve, pa ndonjë sfidë madhore.

Ndërkaq ka shtuar se sa i përket kërkesave për shtyrje të datës, do të shikojnë nëse e njëjta ka bazë që të aprovohet. Ai tha se meqenëse një pjesë e madhe e regjistrueseve kanë kryer zonat e caktuara, të njëjtit mund t’i dalin në ndihmë komunave tjera në mënyrë që mos të ketë shtyrje të procesit.

“Jemi në javën e fundit të datës së regjistrimit të popullsisë, kanë mbetur edhe pesë ditë deri tek përfundimi. Procesi deri më tani ka kaluar siç është planifikuar në fillim nuk kemi pas sfida madhore në aspektin teknik dhe pritjet janë që gjatë kësaj jave të përfundojë në gjitha komunat e Kosovës. Nuk kemi ndonjë kërkesë zyrtare nga ndonjë komunë që të shtyhet procesi. Por, është një shkresë nga një komunë. Por, pas disa informacioneve janë përgatitur disa shkresa nga disa komuna që kërkojnë të shtyhet procesi, në aspektin e statistikave nuk paraqet sfidë dhe do t’i shqyrtojmë me vëmendje nëse ka bazë ose arsye të mirë. Një pjesë e madhe e kanë kryer regjistrimin dhe mund t’i realizojmë në komuna tjera të njëjtit regjistrues nëse është nevoja. Në përgjithësi sistemi dhe pajisjet kanë punuar mirë, regjistruesit kanë qenë aktiv gjatë gjithë kohës”, tha Kastrati.

Ndërsa ka shtuar se në disa komuna, si Prizren dhe Prishtinë janë hapur disa zyre, për qytetarët që nuk kanë pasur mundësi të regjistrohen, të shkojnë në ato zyre.

“Disa qytetarë që nuk kanë mundur të regjistrohen ka thirrje masive që të regjistrohen, pasi ka frikë që nëse sot nuk regjistrohen nuk do të jenë pjesë e procesit, por ka kohë edhe pesë ditë. Ftoj të gjithë regjistruesit që kanë kryer zonat e tyre të bëjnë edhe një vizitë sidomos tek shtëpitë që kanë qenë të zbrazëta të verifikojnë nëse ka mbet ndonjë individ pa u regjistruar. Nga dita e sotme në disa komuna janë hapur disa zyre që qytetarët mund të shkojnë të regjistrohen, pra, mund të shkojnë qytetarët në ato zyre apo në ASK të regjistrohen është kjo mundësi për ata që udhëtojnë ose kanë rast urgjent”, tha ai.

Kastrati ka thënë se Komuna e Dragashit ka bërë kërkesë që të shtyhet data e përfundimit të procesit së regjistrimit, mirëpo ka thënë se do t’u ndihmojnë me staf në mënyrë që procesi të mos shtyhet.

Ndërkaq, ka thënë se sipas informacioneve, ka edhe komuna tjera që po e kërkojnë të njëjtën, mirëpo Kastrati ka thënë se do të shikojnë nëse ka bazë të fortë për të aprovuar këtë kërkesë.

“Do të shikojmë nëse ka bazë ose arsye të fortë për komunën që ka kërkuar të shtyhet, porse regjistrimi është duke shkuar sipas pritjeve dhe shifrat e fundit deri më tani janë regjistruar mbi 1.4 milionë banorë, pjesëmarrja nga komunitetet janë duke marrë pjesë të gjitha…Dragashi ka bërë kërkesë që të shtyhet procesi. Jemi në diskutim që të mos shtyhet pasi do ta mbështesim me staf, arsyeja ka sfidë me komunitet janë disa vendbanime që kanë refuzuar në fillim”, tha ai.

Sa i përket pjesës veriore, ai ka theksuar se ndonëse kishte hezitim, ka prej tyre që janë regjistruar.

Tutje, ai njoftoi se numri i banorëve të regjistruar nga diaspora ka kaluar numrin mbi 400 mijë.

“Në pjesën veriore ka ende hezitim meqenëse qytetarët kanë shprehur gatishmërinë, disa janë regjistruar, presim këto ditë edhe për tjerët që janë të interesuar. Kualiteti i të dhënave do të jetë shumë më i lartë se vitin 2011, kjo për shkak teknologjisë dhe stafit të ASK…Po ashtu diaspora ka kaluar numrin mbi 400 mijë që janë regjistruar në sistemin online dhe përmes formularit S1”, ka shtuar Kastrati.

Në regjistrimin e popullsisë po ashtu është përfshirë edhe një pyetësor, i cili iu mundëson qytetarëve të deklarohen edhe për dëmet që u ka shkaktuar lufta e fundit në Kosovë.

Ndërsa, gjatë regjistrimit të fundit të popullsisë në Kosovë, të mbajtur në vitin 2011, procesi nuk ishte zhvilluar në katër komunat me shumicë serbe në veri, si dhe ishte bojkotuar pjesërisht edhe në komunat e tjera me shumicë serbe në Kosovë.

Kujtojmë se regjistrimi i popullsisë ka filluar me 5 prill dhe do të zgjasë deri më 17 maj.