Tag: Ballina

Partitë opozitare e quajnë të paaftë dhe jo kompetente Qeverinë e Kosovës. Sipas tyre, ekzekutivi ka dështuar plotësisht në shumë aspekte e së fundi mosanëtarësimi në KiE dëshmon edhe një herë se sa e pa aftë është Qeveria aktuale, raporton Ekonomia Online.

Deputetja e Partisë Demokratike të Kosovës, Ariana Musliu-Shoshi për Ekonomia Online ka thënë se dështimi i anëtarësimit të Kosovës në Këshill të Evropës është dështim i kësaj Qeverie pasi sipas saj, nuk ka asnjë koordinim me aleatët.

Ajo ka thënë se në momentet e fundit kemi parë “lojëra” nga Qeveria duke thënë se po e dërgojmë një draft- statut tjetër.

“Kjo ka qenë pak a shumë e pritshme duke marrë parasysh faktin që si shtet nga kjo Qeveri nuk ka asnjë koordinim me aleatët tanë dhe nuk kemi asnjë mundësi praktike që të marrim votë. Nëse ne nuk kemi një koordinim me vendet mike e kemi parë si rrjedhojë kushtin i cili I është vendosur Kosovës. Nuk ka qenë i papritshëm ka qenë një ndër çështjet që është diskutuar në shumë takime prandaj është kërkuar veprim konkret nga kjo Qeveri që të marrë hapa konkret pra drejt dërgimit të Draftit të statutit të Asociacionit pra në Gjykatën Kushtetuese. Një hap i tillë ka munguar nga kjo Qeveri, përkundrazi në momentet e fundit kemi parë edhe lojëra që janë luajtur duke thënë që në një draft- statut tjetër po e bëjmë po e dërgojmë. Ajo ka qenë më shumë për konsum të brendshëm po fatkeqësisht ka pasur një kundër veprim edhe tek aleatët tanë të cilët sa i kanë acaruar me një veprim të tillë nëse mund të them dhe si rrjedhojë nuk kemi pasur asnjë mbështetje që ne të jemi në agjendë në këtë mbledhje dhe aq më pak të kemi vote. Prandaj vlerësoj që qasja e Qeverisë ndaj aleatëve tanë duhet të ndryshojë duhet që ne të  lobojmë dhe të kemi bashkëpunim të tillë që masat t’i heken tanimë për Republikën tonë. Duhet që të punojmë shumë, të lobojmë që të jemi në agjendën e ardhshme të Komitetit të Ministrave dhe të jemi në koordinim të plotë me kërkesat e aleatëve tanë sepse është e vetmja mënyrë se si ne mund të arrijmë që të jemi në agjendë e mbi të gjitha dhe të kemi votën për”, ka thënë ajo.

Musliu-Shoshi tutje ka thënë se pa i marrë hapat që janë kërkuar dhe pa e dërguar draft- statutin e Acociacionit në Gjykatën Kushtetuese, ne kemi problem që të kemi një inciativë nga shtetet anëtare që të mbahet mbledhje urgjente. Ajo mendon se janë forcat politike të cilat vendosin se si do të ecet në këtë proces.

“Në Këshillin e Evropës është Komiteti i Minstrave ai i cili vendos. Komiteti i Ministrave e dimë që mbahet një herë në vit pra mbledhja e rradhës e Komitetit të Minsitrave është në maj të vitit 2025, deri atëherë proceduralisht mundet vetëm nëse thirret ndonjë mbledhje e jashtëzakonshme apo urgjente e një gjë e tillë duhet të merret si inaciativë nga ndonjë shtet anëtar, tu marr parasysh faktin që asnjëherë nga shtetet anëtare të KiE nuk ka shprehur përkrahje për Kosovën. Pa marrë hapa të prekshëm që janë kërkuar, pa e dërguar draft statutin e Acoacionit në Gjykatën Kushtetuese, ne kemi edhe problem që të kemi një inciativë nga shtetet anëtare që të mbahet mbledhje urgjente dhe kjo rrjedhimisht kjo na lë. Me vet faktin që diskutimi i radhës hapat konkret kur mund të merren dhe zhvillimet tjera të brendshme brenda për brenda Republikës sonë dhe politikës na dërgojnë në faktin që mbledhja e rradhës pra Komiteti i Ministrave të vitit 2025 do të jetë koha kur potencialisht edhe ne mund të jemi në agjendë, pra krejt kjo varet nga politikat e brendshme sepse e dimë që deri në maj të vitit 2025 edhe ne do të kemi zgjedhje brenda për Brenda. Pastaj janë forcat politike të cilat do të vendosin se si do të ecet në këtë proces”, ka thënë Musliu-Shoshi për Ekonomia Online.

Nga ana tjetër deputetja e Lidhjes Demokratike të Kosovës, Rrezarta Krasniqi është shprehur se kanë qenë shumë optimistë se do të anëtarësohemi në Këshillin e Evropës. Sipas saj presidentja, kryeministri dhe kryeparlamentari e kanë dërgu një letër te Dora Bajakonis, ku janë zotuar se do ta implementojnë Asociacionin mirëpo, sipas saj edhe kjo dështoi.

“Kemi pritur që të anëtarësohemi mirëpo ju e patë që është bërë kusht Asociacioni, për në KiE dhe atë nuk e kanë tregur krerët e shtetit sepse s’ka pasur aspak transparencë sa i përket proceseve integruese. Ndërsa ne e kemi parë që presidentja, kryeministri dhe kryeparlamentari e kanë dërgu një letër te Dora Bajakonis, ku janë zotu se do ta implementojnë Asociacionin sa i përket Marrëveshjes së Ohrit, mirëpo u pa që edhe kjo dështoi të gjitha proceset integruese të këtij vendi. Njeriu kryesor që ka dështu është pikërisht, Albin Kurti sepse ju e dini se nuk ka votuar atëherë demarkacionin në vitin 2016 kur është shtyer procesi i liberalizimit të vizave. Nuk e ka votuar Marrëveshjen e Stabiliizm Asociimit e shumë e shumë Marrëveshje tjera. Pastaj e humbi edhe mundësinë e artë që kishim të kalojmë në Këshillin e Evropës. Nuk besoj që do të jetë pikë në rend dite edhe një herë në këtë vit Kosova në KiE, sepse une e di që mbahen ato takime një herë në vit. Nëse këta vetëm e kanë Marrëveshjen që do ta implementojnë Acoacionin për këto ditët në vijim, mirëpo nuk besoj aspak”, ka thënë ajo për Ekonomia Online.

Përgatiti: Arton Hamiti

As afati shtesë prej njëjavësh nuk ishte i mjaftueshëm që qytetarët e komunitetit serb të katër komunave veriore t’i nënshtrohen procesit për regjistrimin e popullsisë.

Procesi u bojkotua nga komuniteti shumicë edhe në komunën e Zveçanit, për çka kryetari Ilir Peci nuk është aspak i kënaqur.

“Sa ka qenë afati i rregullt, ka pasur një numër shumë të vogël të qytetarëve serbë, mund të them që nëse krahasohet me 10 mijë banorë sa llogaritet t’i ketë Zveçani, janë regjistruar vetëm 6 prej tyre. Javën e fundit ua kemi mundësuar regjistrimin edhe këtu në objektin e komunës. Numri është rritur, por jo me një përqindje të madhe, nuk është numër aspak i kënaqur”, tha Peci.

Procesit të regjistrimit të popullsisë nuk i janë përgjigjur qytetarët e komunitetit serb në Zubin Potok.

“Mund të them që përgjigja e qytetarëve karshi këtij procesi ka qenë shumë e vogël, s’po them që ka qenë zero, mirëpo ka individë, mos të themi që ka pasur dhjetëra ose qindra që janë ardhë me këtë afat shtesë”, tha kryetari i Zubin-Potokut, Izmir Zeqiri.

Dy kryetarët shqiptarë thonë se fajin për bojkotimin e procesit nga pjesa dërrmuese e qytetarëve e ka shteti serb.

“Sigurisht, këtu ka ndërhy politika serbe dhe besoj që përfundimisht kjo është arsyeja. Janë largu edhe anketuesit serbë, kanë qenë 13 prej tyre”, tha kryetari i Zveçanit, Ilir Peci.

“Si duket akoma po është një ndikim i fortë i mekanizmave të Serbisë të themi te një pjesë e qytetarëve. Natyrisht thirrjes për bojkot po i përgjigjet një pjesë e madhe e qytetarëve”, kryetari i Zubin-Potokut, Izmir Zeqiri.

Më 5 prill, kur filloi regjistrimi, Lista Serbe kishte thënë se serbët nuk do të merrnin pjesë në procesin e regjistrimit të popullsisë.

Serbët nuk morën pjesë as në regjistrimin e popullsisë në Kosovë, në vitin 2011.

Përgatiti: Krenare Mulliqi

Për dallim nga paraqitja e parë në gjykatë më 14 korrik 2022, Dardan Krivaqa në seancën fillestare të rigjykimit nuk mbrohej nga jeleku anti-plumb.
Madje, nga refuzimi total në paraqitjen e parë të tij para gjykatësit, para dy vjetëve, për t’u deklaruar, tani Krivaqa tha se ndihet i pafajshëm ndaj akuzave për dhunim dhe vrasje.

I pafajshëm për akuzën e dhunimit dhe ndihmë në vrasje u deklarua edhe Arbër Sejdiu.

Ndërkaq, duke e vlerësuar aktakuzën hipotetike, avokati mbrojtës i Kirvaqës tha se prokurorisë vërtet i mungojnë provat.

Madje, avokati kërkoi ekzaminim special psikiatrik për të akuzuarin e parë Kirvaqën, që do të mbulojë periudhën që nga mosha 11-vjeçare e deri në ditën e vrasjes së Marigona Osmanit, me arsyetim se edhe ai ishte viktimë e dhunës seksuale dhe tentoi të vetëvritej.

Në nisje të procesit të rigjykimit u vendos që dëshmitarët të mos thirren në gjykatë, por vetëm të lexohen dëshmitë e tyre, ndërkaq pritet të ftohen ekspertë të rinj të mjekësisë ligjore.

Ndryshe, Gjykata Themelore e Ferizajt, më 4 gusht 2023, e ka dënuar me burgim të përjetshëm Dardan Krivaqën për vrasjen e Marigona Osmanit, ndërsa ishte liruar nga akuza për dhunim. Arbër Sejdiu ishte dënuar me 15 vjet burgim për ndihmë në vrasje. Edhe Sejdiu ishte liruar nga vepra penale e ndihmës në dhunim.

Por, Gjykata e Apelit me aprovimin e ankesës së Prokurorisë Themelore në Ferizaj dhe mbrojtjes së dy të akuzuarve, e ka kthyer çështjen në rigjykim.

Përgatiti: Benita Zeneli

Në seancë erdhi, por kryeministrit Albin Kurti nuk iu desh të qëndrojë gjatë në sallë. Fare pak deputetë iu përgjigjën ftesës së AAK-së për të marrë pjesë në seancën në të cilën do të diskutohej rreth tre vjetëve të qeverisjes Kurti.

Pas dakordimit të grupeve parlamentare u vendos që seanca të shtyhet.

“Vërtetë nuk do të ishte mirë që kjo seancë të ndodhte me 40 deputetë të pranishëm. Është papërgjegjësi me pritë shumë gjatë, kështu që pritëm boll”, tha kryetari i Kuvendit të Kosovës, Glauk Konjufca.

Megjithatë, një ballafaqim i kryeministrit Kurti me opozitën, sipas shefit të grupit parlamentar të AAK-së Besnik Tahiri, do të ndodhë.

“Ka vetëm vonim, se shpëtim nuk ka prej ballafaqimit të kryeministrit me opozitën me gjitha këto tema. Debati do të ndodhë nuk ka qysh ikë, është i protokolluar në kryesi dhe kurdo që të jetë ai debat do të jetë ballafaqimi i të vërtetës dhe i një super-mashtrimi që ka ndodhur tash e tri vjet e gjysmë”, tha Tahiri.

Ndërkaq, PDK-ja tha se do ta përkrahë rezolutën e AAK-së në të cilën kërkohet dorëheqja e kryeministrit. Por, sipas shefit të grupit parlamentar të PDK-së, Abelard Tahiri, shpërndarja e Kuvendit duhet të ndodhë jo më larg se 30 maj.

“E humbasim mundësinë që qytetarët t’iu drejtohen kutive të votimit më datën 30 qershor apo 7 korrik, pra kjo është dita e fundit dhe ne nuk do t’i ndalim përpjekjet. Nuk jemi të interesuar të kemi shou të asaj dite kur do të përplasemi me fjalime për çështje të ndryshme politike, që tri vjet e gjysmë ne e kemi pasur ballafaqimin me këtë Qeveri dhe përtej shout mediatik që mund të prodhojë një seancë, përtej një cirku që mund të krijojë mendoj që më e rëndësishme është me i prodhu numrin e votave të mjaftueshme që janë 80 deputetë”, tha Tahiri.

Qeveria aktuale ishte betuar në mars të 2021-tës dhe tashmë ka hyrë në vitin e fundit të mandatit. Ndërsa, thirrja e kësaj seance u bë derisa po zhvillohen bisedime për mbajtje të zgjedhjeve të parakohshme parlamentare.

“Është paksa e paimagjinueshme të pritet shpërndarja e Kuvendit ku për debat të tri vjet qeverisje ka aq pak deputetë në sallë e lëre më të mendohet për një situatë, e cila do të nënkuptonte përfundimin e punës së legjislaturës së tetë, përderisa nuk janë kryer të gjitha pikat, ka shumë pak pika të patrajtuara, por gjithashtu jemi në dinamikën dhe ritmin e mirë të përmbushjes së agjendës legjislative”, tha deputetja e LV-së, Mimoza Kusari-Lila.

Pas vendimit për shtyrje të seancës datë e re për mbajtjen e saj nuk u caktua, por të hënën do të mbahet takim i kryesisë së Kuvendit, me ç’rast caktohet seanca e ardhshme dhe pikat e rendit.

Bashkimi Evropian (BE) nuk toleron sjellje që e rrezikojnë sovranitetin dhe tërësinë territoriale të Bosnjë e Hercegovinës (BeH), pas propozimit të Qeverisë së Republikës Sërpska (RS) për t’u ndarë nga BeH, tha të premten zëdhënësi i bllokut, Peter Stano.

Të enjten, Qeveria e RS-së tha se në 30 ditët e ardhshme ajo do të krijojë një marrëveshje që do t’i dërgohet entitetit tjetër të Bosnjës, Federatës së Bosnjës e Hercegovinës, për “ndarje paqësore”.

“Për fat të keq, nuk është hera e parë që dëgjojmë deklarata të tilla. BE-ja është e qartë dhe kjo është përsëritur disa herë. BE-ja dhe të gjitha vendet anëtare e mbështesin sovranitetin dhe tërësinë territoriale të Bosnjë e Hercegovinës“, tha Stano.

Ai e përsëriti se sovraniteti, integriteti territorial dhe rendi kushtetues i Bosnje e Hercegovinës duhet të ruhet, duke paralajmëruar “pasoja serioze“ për shkelësit e saj.

Liderët e BE-së vendosën në mars për hapjen e negociatave të anëtarësimit me Bosnje e Hercegovinën. Ajo e mori statusin e vendit kandidat për anëtarësim në BE në dhjetor të vitit 2022.

Më herët të premten, Ambasada e Shteteve të Bashkuara në Sarajevë tha se propozimi i Qeverisë së RS-së për t’u ndarë nga Bosnja e Hercegovina, është i rrezikshëm dhe i papërgjegjshëm dhe se një gjë e tillë “nuk do të nënkuptonte pavarësi, por fund për Republikën Sërpska”.

Qeveria e RS-së e bëri propozimin për “ndarje” gjatë një mbledhjeje të mbajtur në prag të seancës së Asamblesë së Përgjithshme të Kombeve të Bashkuara (OKB) të enjten, ku u miratua rezoluta që e shpall 11 Korrikun Ditë Ndërkombëtare të Përkujtimit të Viktimave të Gjenocidit në Srebrenicë.

Disa vende anëtare të BE-së nuk votuan për miratimin e rezolutës. Hungaria votoi kundër, ndërsa Greqia, Sllovakia dhe Qiproja abstenuan.

Stano tha se votimi në OKB është çështje individuale e secilit vend anëtar, por shtoi se BE-ja si bllok është e qartë se gjenocidi në Srebrenicë nuk mund të mohohet.

“Ne, si BE, nuk jemi si anëtar i OKB-së. Sa i përket BE-së, ne kemi qëndrimin e qartë dhe e kemi përsëritur rregullisht çdo përvjetor. Gjenocidi në Srebrenicë nuk mund të mohohet, e as të relativizohet“, shtoi ai.

Gjykata Ndërkombëtare e Drejtësisë në Hagë e karakterizoi krimin në Srebrenicë si gjenocid në vitin 2007.

Forcat serbe në këtë rajon lindor të Bosnje e Hercegovinës vranë mbi 8.000 burra dhe djem boshnjakë në korrik të vitit 1995.

Për gjenocidin e kryer, deri më tash, u dënuan më shumë se 50 persona me rreth 700 vjet burg.

Në mesin e tyre janë edhe presidenti i kohës së luftës i Republikës Sërpska, Radovan Karaxhiq, dhe komandanti i përgjithshëm i ushtrisë së atëhershme serbe, Ratko Mlladiq.

Objekti i Ambasadës së Kosovës në Shetet e Bashkuara të Amerikës, tashmë është pronë e Kosovës.

Kështu ka bërë të ditur sot kryeministri i vendit, Albin Kurti.

“Me një arkitekturë moderne, karshi Katedrales Kombëtare të Uashingtonit të stilit neo-gotik anglez, ndërtesën e ambasadës sonë tani e gjeni në rrugën e Massachusetts, apo siç njihet ndryshe “Rruga e Ambasadave”, shkroi Kurti.

Tutje, sipas tij, përurimi i saj në objektin e ri “është simbolikë e thellë, dëshmi e fortë dhe festë për aleancën tonë”.

Ambasada e Shteteve të Bashkuara në Sarajevë ka thënë të premten se propozimi i Qeverisë së Republikës Sërpska (RS) për t’u ndarë nga Bosnja e Hercegovina është i rrezikshëm dhe i papërgjegjshëm dhe se një gjë e tillë “nuk do të nënkuptonte pavarësi, por fund për Republikën Sërpska”.

Të enjten, Qeveria e RS-së tha se në 30 ditët e ardhshme ajo do të krijojë një marrëveshje që do t’i dërgohet entitetit tjetër të Bosnjës, Federatës së Bosnjës e Hercegovinës, për “ndarje paqësore”.

Qeveria e RS-ë e bëri këtë propozim gjatë një mbledhjeve të cilën e mbajti në prag të seancës së Asamblesë së Përgjithshme të Kombeve të Bashkuara (OKB), ku u miratu rezoluta që e shpall 11 korrikun Ditë Ndërkombëtare të Përkujtimit të Viktimave të Gjenocidit në Srebrenicë.

Ambasada amerikane tha se ky propozim është në shpërputhje me Marrëveshjen e Dejtonit dhe se “e vë në rrezik sovranitetin dhe integritetin territorial dhe karakterin shumetnik të Bosnjës”.

“Këto janë interesa thelbësore të SHBA-së. Shtetet e Bashkuara do t’i mbrojnë dhe ruajnë ato, mes tjerash, duke i mbajtur përgjegjës ata të cilët i rrezikojnë ato”, thuhet në komunikatë.

Ajo e akuzoi Millorad Dodikun, presidentin të Republikës Sërpska dhe Qeverinë e RS-së, se u përpoqën ta arsyetojnë këtë vendim bazuar në “gënjeshtra dhe dezinformata, me qëllim për ta frikësuar popullin në Republikën Sërpska, që t’i mbështesin ata në këtë rrugë të rrezikshme”.

“Faktet janë të thjeshta dhe të drejtpërdrejta. Nuk ka konspiracion ndërkombëtar për ta ndarë RS-në dhe Dodik nuk mund ta gjejë asnjë deklaratë ku një zyrtar amerikan bën thirrje për shuarjen e RS-së”, thuhet tutje në komunikatë.

Ajo e bëri të qartë se, sipas Marrëveshjes së Dejtonit për Paqe dhe Kushtetutës së Bosnjës, Bosnja e Hercegovina (BeH) është trashëgimtare e Republikës së Bosnjë e Hercegovinës.

“Kushtetua e BeH nuk u jap të drejtë entiteteve apo njësive nënshtetërore për ndarje apo “shkëputje”. RS-ja mund të ekzistojnë vetëm brenda BeH.”

Veprimet e Dodikut, sipas Ambasadës, e rrezikojnë të ardhmen brenda institucioneve euroatlantike që populli i Bosnjës, përfshirë RS-së, e duan.

Kryeministri i RS-së, Radovan Vishkoviq, tha pas mbledhjes se “kjo nuk është shkëputje, ndarja paqësore nuk është shkëputje. Ne do të ofrojmë atë, nëse na konsideroni komb gjenocidal, që nuk jemi, atëherë nuk kemi pse të jetojmë së bashku”.

Dodik mori pjesë në mbledhje gjithashtu.

Nedim Ademoviq, ekspert i së drejtës kushtetuese, tha për Radion Evropa e Lirë se asnjë entitet i vetëm, asnjë komb i vetëm nuk mund të kryejë shpërbërjen paqësore në Bosnje e Hercegovinë.

Sot përfundon regjistrimi i popullsisë edhe për komunat në Kosovë të cilat kishin kërkuar shtyrjen e afatit për një javë në mënyrë që të përmbyllin suksesshëm këtë proces.

Afati i regjistrimit të popullsisë ishte nga 5 prilli deri më 17 maj, ndërsa me kërkesë në disa komuna është shtyrë edhe për një javë, deri më 24 maj.

Shtyrja e afatit ishte bërë pasi mund të kishte individë, ekonomi familjare që nuk ishin regjistruar, si në Dragash, Prishtinë, Prizren, Drenas, Fushë Kosovë, Skenderaj, Obiliq, Ferizaj, Shtërpcë, Kaçanik dhe Gjakovë.

Edhe në katër komunat e Veriut, në objektet e komunave zyrat kanë qenë të hapura nga ora 09:00-18:00.

Në periudhën sa është shtyrë regjistrimi, intervistat janë zhvilluar nga stafi i Agjencisë së Statistikave të Kosovës (ASK).

Ndryshe, nga këtu regjistrimi i Diasporës do të vazhdojë të bëhet përmes Platformës online eDiapsora (https://ediaspora.rks-gov.net/) deri më 31 gusht 2024.

Pas javës së parë të regjistrimit sipas të dhënave nga Agjencia e Statistikave të Kosovës (ASK), ishin regjistruar mbi 1 milion e 420 mijë banorë.

Referuar po kësaj periudhe kohore për diasporën ishte kaluar numri mbi 400 mijë që janë regjistruar në formën online.

Sipas zyrtarëve të ASK-së kualiteti i të dhënave në këtë regjistrim do të jetë shumë më i mirë se në vitin 2011.

Drejtues të Agjencisë së Statistikave të Kosovës dhe njohës të ekonomisë thonë se vendi ka nevojë për evidencë të mirëfilltë të qytetarëve dhe nga ky regjistrim presin të ketë përmirësim në aspektin ekonomik në vend, hartim të politikave më efektive në investime e po ashtu edhe realizim të të drejtave të qytetareve.

Kryeministri i vendit, Albin Kurti, ka përgëzuar miratimin e Rezolutës së OKB-së, për Gjenocidin në Srebrenicë.

Në llogarinë e tij në X, Kurti ka shkruar se gjenocidi në Srebrenicë shënon masakrën më brutale të Evropës që nga Lufta e Dytë Botërore.

E plotë:

“Për paqe në Ballkan, duhet vërtetuar përgjegjësia e Serbisë dhe nevojiten përpjekje të mëtejshme për të sjellë autorët para drejtësisë”, shkroi Kurti.

Në Asamblenë e Përgjithshme të Kombeve të Bashkuara sot me 84 vota pro ka kaluar Rezoluta për Srebrenicën.

Në këtë votim morën pjesë 193 shtete prej tyre, 19 ishin kundër dhe 68 abstenuan, gjatë votimit vendet nuk patën të drejtën e vetos.

Me këtë rezolutë 11 korriku do të caktohet si si “Dita Ndërkombëtare e Reflektimit dhe Përkujtimit të Gjenocidit të vitit 1995 në Srebrenicë”.

Ambasadori amerikan në Prishtinë, Jeff Hovenier, tha se shteti i tij beson se për Kosovën është urgjente që të lëvizë përpara me dërgimin në Gjykatën Kushtetuese të një draft-statuti për Asociacionin e komunave me shumicë serbe.

Gjatë një interviste për transmetuesin publik të Kosovës, Hovenier tha se Kosova ka shumë miq që duan ta shohin shtetin pjesë të organizatës të Këshillit të Evropës dhe të shfaqë përkushtimin për të drejtat e pakicave dhe të drejtave të njeriut.

“Një nga mënyrat më të dukshme për të bërë këtë e që e kemi rekomanduar të gjithë, është ndërmarrja e këtij hapi të rëndësishëm të dërgimit të këtij drafti të BE-së të Asociacionit të komunave me shumicë serbe në Gjykatën Kushtetuese. Na duket se kjo është një gjë e rëndësishme për Kosovën, pa iu referuar Këshillit të Evropës, sepse do të ndihmojë për të siguruar mbrojtje të duhur për komunitetin etnik serb në Kosovë, por gjithashtu zhbllokon dhe hap këtë rrugëtimin në të cilin duam ta shohim Kosovën”, tha Hovenier.

Kosova dështoi të futej në agjendën e takimit të Komitetit të Ministrave në Këshillin e Evropës të mbajtur në mes të majit në Strasburg, pasi shtetit iu vendos kusht që të lëvizte përpara me themelimin e Asociacionit të komunave me shumicë serbe.

Një ditë para takimit në Strasburg, kryediplomatja e Kosovës, Donika Gërvalla, përmes një letre njoftoi Këshillin e Evropës se Kosova synon që të hartojë një draft-statut për Asociacionin dhe ta dërgojë në Kushtetuese deri në fund të majit, në këmbim të pranimit të shtetit në këtë organizatë për të drejtat e njeriut.

Por, në letrën e Gërvallës thuhej se draft-statuti do të frymëzohej nga një draft i prezantuar kohë më parë nga organizata gjermane Friedrich-Ebert-Stiftung, e jo draft-statuti që iu paraqit Kosovës dhe Serbisë nga BE-ja tetorin e vitit të kaluar.

Hovenier tha se me sa e kupton ai, kjo ofertë e Gërvallës më nuk është e vlefshme, ndërkaq sa i përket se çfarë draft-statuti duhet Kosova të dërgojë në Kushtetuese, ambasadori amerikan tha:

“Lidhur me pyetjen se cili draft dhe si dërgohet më tej, kjo është çështje e rëndësishme dhe padyshim që është një zgjedhje sovrane e Qeverisë së Kosovës se çfarë statuti zgjedh të hartojë dhe si e çfarë do të kërkojë të miratojë apo dërgojë në Gjykatën Kushtetuese. Por, do të them se drafti i ofruar nga Bashkimi Evropian – ky draft statut për Asociacionin e komunave me shumicë serbe – ofron një sërë përparësish unike dhe të rëndësishme”.

Vitin e kaluar, Bashkimi Evropian, si ndërmjetës i dialogut mes Kosovës dhe Serbisë, i prezantoi palëve një draft-statut për Asociacionin, i cili u pranua në parim.

Po vitin e kaluar, Kosova dhe Serbia arritën një marrëveshje për normalizimin e raporteve, që parasheh edhe sigurimin e një niveli të vetëmenaxhimit të komunitetit serb dhe zbatimin e të gjitha marrëveshjeve të arritura në dialog.

Në kuadër të dialogut që ndërmjetësohet nga BE-ja, Kosova dhe Serbia kanë arritur dy marrëveshje për Asociacionin: më 2013 dhe 2015.

Por, Gjykata Kushtetuese tha më 2015 se Marrëveshja mbi parimet për themelimin e Asociacionin nuk ishte në harmoni të plotë me aktin më të lartë juridik të shtetit. Harmonizimi, sipas Kushtetueses, mund të bëhet përmes akteve nënligjore.

Megjithatë, Kosova deri më tani nuk ka ndërmarrë hapa drejt themelimit të tij.

Qeveria e Kosovës është shprehur kundër një asociacioni njëetnik. /rel/