Tag: Ballina

Komisioni Qendror i Zgjedhjeve, po vazhdon të numëroj votat për kandidatët nga partitë, për ulësen në Kuvendin e Kosovës.

Deri më tani, siç njofton KQZ-ja në përditësimin e fundit, janë numëruar 92,79% e votave.

Por cilat janë gratë më të votuara nga partitë politike.

Gruaja më e votuar deri tani nga të gjitha partitë është kandidatja e Vetëvendosjes për deputete Albulena Haxhiu me 121 mijë e 280 vota, shkruan Reporteri.net.

Më e votuara në listën e PDK-së është Vlora Çitaku, në listën e LDK-së Vjosa Osmani e cila ishte edhe bartëse e listës, kurse në AAK gruaja më e votuar është Time Kadrijaj.

Pesë gratë më të votuara deri tani në VV:

ALBULENA HAXHIU – 121,280 Vota

DONIKA GËRVALLA- SCHWARZ – 98,968 Vota

MIMOZA KUSARI LILA – 64,923 Vota

SHQIPE MEHMETI SELIMI – 46,968 Vot

SARANDA BOGUJEVCI – 30,177 Vota

Pesë gratë më të votuara deri tani në PDK:

VLORA ÇITAKU – 39,734 Vota

SALA JASHARI – 37,893 Vota

GANIMETE MUSLIU – 29,696 Vota

BESA KABASHI RAMAJ – 21,684 Vot

BLERTA DELIU KODRA – 18,498 Vota

Pesë gratë më të votuara deri tani në LDK:

VJOSA OSMANI SADRIU – 81,493 Vota

DOARSA KICA XHELILI – 58,825 Vota

HYKMETE BAJRAMI – 46,525 Vota

JANINA YMERI – 23,746 Vota

JEHONA LUSHAKU SADRIU – 22,285 Vota

Pesë gratë më të votuara deri tani në AAK:

TIME KADRIJAJ – 16,836 Vota

ALBANA BYTYQI – 9,660 Vota

TEUTA HAXHIU – 8,727 Vota

DIELLZA KUKAJ – 6,517 Vota

ALBULENA KOMANI – 3,070 Vota

Për të parë përditësimet e fundit, klikoni KËTU:

Hekuran Murati, përmes një postimi në Facebook, ka thënë se ekzekutimi i 100 eurove për punëtorët e sektorit privat do të bëhet të hënën e javës së ardhshme.

Murati, ka shkruar edhe se, komisioni për masën e studentëve do ta përfundojë punën sapo të ketë marrë konfirmimet përkatëse nga institucionet e arsimit të lartë, për studentët që kanë aplikuar.

Postimi:

Që në fillim të kësaj jave, komisionet vlerësuese kanë filluar punën për shqyrtimin e aplikimeve për dy masat e mbetura nga Pakoja për Përballje me Inflacion 2.0, konkretisht mbështetjen për punëtorët e sektorit privat, dhe studentët.

Puna e komisionit për masën e sektorit privat është drejt përfundimit, dhe ekzekutimi i pagesave pritet të bëhet në fillim të javës që vjen, pra të hënën.

Kurse komisioni për masën e studentëve do ta përfundojë punën sapo të ketë marrë konfirmimet përkatëse nga institucionet e arsimit të lartë, për studentët që kanë aplikuar. Edhe për këtë do t’ju njoftojmë me kohë sapo listat për pagesa të jenë gati për ekzekutim.

Qeveria për të gjithë!

Një analizë e publikuar nga Oda Ekonomike e Kosovës tregon se pagat mesatare në Kosovë kanë shënuar rritje të vazhdueshme gjatë viteve 2019–2025, por qytetarët vazhdojnë të përballen me rritjen e kostos së jetesës dhe inflacionin.

Pagat në Kosovë kanë shënuar rritje të vazhdueshme në vitet e fundit, por qytetarët vazhdojnë të përballen me kosto gjithnjë e më të lartë të jetesës.

Analiza e publikuar nga Oda Ekonomike e Kosovës tregon se, megjithëse paga mesatare ka arritur në 713 euro në vitin 2025, fuqia reale blerëse mbetet nën presion nga inflacioni dhe shtrenjtimi i produkteve bazë.

Krahasuar me vendet e rajonit, Kosova vazhdon të mbetet me nivelin më të ulët të pagave në Ballkanin Perëndimor.

Sipas të dhënave të bazuara në statistikat zyrtare të Agjencia e Statistikave të Kosovës, paga mesatare bruto në Kosovë është rritur nga 477 euro në vitin 2019 në 713 euro në vitin 2025, duke shënuar një rritje prej afro 49.5 për qind.

Megjithatë, analiza thekson se pjesa më e madhe e kësaj rritjeje është “ngrënë” nga shtrenjtimi i jetesës.

Sipas statistikave të prezantuara në raport, Serbia prin me pagën mesatare prej 1,286 eurosh, pasuar nga Bosnja e Hercegovina me 1,245 euro dhe Mali i Zi me 1,206 euro.

Edhe Shqipëria ka kaluar Kosovën me një pagë mesatare prej 860 eurosh, ndërsa Maqedonia e Veriut ka arritur në 1,111 euro.

Sipas raportit, mbi dy të tretat e rritjes së pagave janë absorbuar nga inflacioni, çka nënkupton se fuqia reale blerëse e qytetarëve është rritur shumë më pak sesa shifrat nominale të pagave.

“Gjatë kësaj periudhe, pagat mesatare kanë shënuar rritje të vazhdueshme në vlerë nominale. Megjithatë, analiza tregon se kjo rritje ka qenë kryesisht reagim ndaj inflacionit dhe rritjes së kostos së jetesës, më shumë sesa rezultat i një përmirësimi të ndjeshëm të mirëqenies ekonomike.

Të dhënat tregojnë se fuqia reale blerëse e qytetarëve është rritur dukshëm më pak se pagat nominale, pasi mbi dy të tretat e rritjes së pagave janë absorbuar nga rritja e çmimeve”, ka treguar OEK.

Të dhënat tregojnë po ashtu dallime të mëdha mes sektorëve.

Sektori publik dhe ndërmarrjet publike vazhdojnë të ofrojnë paga dukshëm më të larta krahasuar me sektorin privat.

Në vitin 2025, paga mesatare bruto në sektorin publik arrin në 840 euro, ndërsa në sektorin privat 666 euro, duke krijuar një diferencë prej 174 eurosh në favor të sektorit publik.

“Krahasimi ndërmjet sektorëve evidenton se sektori publik dhe ndërmarrjet publike vazhdojnë të ofrojnë paga mesatare më të larta sesa sektori privat.

Në aspektin rajonal, Kosova mbetet vendi me nivelin më të ulët të pagave mesatare në Ballkanin Perëndimor Analiza synon të ofrojë një pasqyrë të qartë mbi trendet e pagave, ndikimin e inflacionit dhe sfidat që lidhen me fuqinë blerëse dhe konkurrueshmërinë e tregut të punës në Kosovë”.

Në krahasim me vendet e rajonit, Kosova mbetet me pagat më të ulëta në Ballkanin Perëndimor.

Sipas analizës, Shqipëria ka shënuar rritjen më të madhe të pagave gjatë kësaj periudhe, duke i dyfishuar ato me mbi 102 për qind, ndërsa Kosova ka mbetur ndër vendet me ritmin më të ulët të rritjes.

Raporti vlerëson se rritja e pagave në vitet e fundit lidhet kryesisht me inflacionin global, mungesën e fuqisë punëtore dhe presionin për rritjen e pagave minimale në rajon

Lidhur me rritjen e çmimeve dhe inflacionin, ditë me parë edhe Agjencia e Statistikave ka treguar se qytetarët po vazhdojnë të paguajnë më shtrenjtë.

Të dhënat e fundit të Çmimeve të Konsumit tregojnë se inflacioni vjetor në maj 2026 ka arritur në 6,8 për qind krahasuar me të njëjtën periudhë të vitit të kaluar, duke konfirmuar vazhdimin e valës së shtrenjtimit që po godet pothuajse çdo familje.

Rritja më e madhe e çmimeve është regjistruar te transporti, me plot 14,1 për qind më shumë se një vit më parë.

“Në muajin maj 2026, Indeksi i Harmonizuar i Çmimeve të Konsumit (IHÇK) është rritur me 6,8% krahasuar me muajin maj 2025. Rritja është ndikuar nga grupet kryesore të COICOP-it: transporti (14,1%), strehim, ujë, energji elektrike, gaz dhe lëndë të tjera djegëse (13,2%), pije alkoolike, duhan dhe narkotikë (5,6%), restorante dhe shërbime akomodimi (5,3%), ushqime dhe pije joalkoolike (5,1%), shëndetësi (4,1%), mobilje dhe pajisje shtëpiake dhe mirëmbajtje rutinore (3,6%), kujdesi personal, mbrojtja sociale dhe mallra e shërbime të ndryshme (3,0%), rekreacion, sport dhe kulturë (2,7%), veshje dhe këpucë (2,4%) dhe informacion dhe komunikim (0,2%).”.

Në 35 Qendra Komunale të Numërimit ka përfunduar procesi i numërimit të votave të kandidatëve për deputetë dhe verifikimi i rezultateteve të partive.

Zëdhënësi i KQZ’së, Valmir Elezi, ka deklaruar për Reporteri.net se procesi po vazhdon ende në Prishtinë, Prizren dhe Gjilan.

Në Prishtinë janë edhe 104 vendvotime pa u numëruar, në Prizren 30 dhe në Gjilan edhe 15 vendvotime.

“Deri më tani (e premte, 12 qershor 2026, ora 09:00) procesi i verifikimit dhe numërimit ka përfunduar në 35 Qendra Komunale të Numërimit, ndërkaq, numri i përgjithshëm i vendvotimeve të procesuara dhe që i takojnë të gjitha QKN-ve (38) është 2,349 nga 2,498 vendvotime apo 94.04%”, ka deklaruar Elezi.

Në Qendrën e Numërimit dhe Rezultateve ndërkohë është duke vazhduar procesi i numërimit të fletëvotimeve që i takojnë votimit jashtë Kosovës, përkatësisht votimit në 30 përfaqësi diplomatike, i cili ka filluar pasditen e 11 qershorit.

“Deri më tani janë numëruar 13 nga 47 vendvotimet e përfaqësitë diplomatike”, ka deklaruar Elezi.

Më 6 qershor 2026, votimi u zhvillua në 30 përfaqësi diplomatike, në 18 shtete të ndryshme. Nga 27,724 shtetas të regjistruar, kanë votuar 22,860 apo 82.46%. Këto fletëvotime janë në proces numërimi.

Në QNR është duke vazhduar edhe procesi i vlerësimit të pakove të supozuara me fletëvotime nga votimi jashtë Kosovës, përkatësisht nga votimi përmes postës që deri më tani janë sjellur në Kosovë.

“Deri në përfundim të ditës së enjte (11 qershor 2026) në procesin e vlerësimit janë përfshirë rreth 42 mijë, prej të cilave janë aporvuar 40,414, ndërkaq janë refuzuar 1,447. Arsyeja më e shprehur se përse janë refuzuar këto pako është sepse në 1,320 raste mungon dëftesa e regjistrimit, një dokument me të dhëna unike, që votuesi i regjistruar e pranon nga KQZ”, ka theksuar Elezi.

Ky proces ka filluar më 9 qershor 2026, në orën16:00 dhe ka për qëllim të vërtetojë nëse këto pako janë dërguar votuesit e regjistruar. Në fund të këtij procesi të vlerësimit, KQZ do të publikojë të dhënat për mumrin e pakove me fletëvotime të supozuara, të cilat do të numërohen në Qendrën e Numërimit dhe Rezultateve.

“Gjatë ditës së hënë, më 8 qershor, është përmbyllur procesi i tërheqjes së pakove me fletëvotime që i takojnë votimit jashtë Kosovës, përkatësisht votimit përmes postës. Tërheqja e pakove me fletëvotime ëshë bërë nga kutitë postare të KQZ-së në 22 shtete të ndryshme si dhe nga kutia postare e KQZ-së në Kosovë. Nga 23 kuti postare, janë tërhequr më shumë se 85,700 pako të supozuara me fletëvotime, një pjesë prej të cilave janë sjellur në Kosovë”.

Gjatë periudhës së regjistrimit (6 maj – 17 maj 2026) numri i shtetasve të regjistruar për të votuar përmes postës në zgjedhjet e parakohshme për Kuvendin e Kosovës është 104,480 votues.

Komuna e Skenderajt ka njoftuar opinionin publik lidhur me organizimin e ceremonive mortore për Komandantin e UÇK-së, Sahit Jashari, i cili ka ndërruar jetë.

Sipas njoftimit zyrtar, ceremonia e varrimit do të mbahet nën përkujdesjen e kryetarit të Komunës së Skenderajt, Sami Lushtaku, ndërsa aktivitetet do të organizohen në bashkëpunim me familjen Jashari.

Homazhet pranë arkivolit të të ndjerit do të mbahen më 12 qershor 2026, nga ora 11:30 deri në orën 14:00, në palestrën “Ilaz Kodra” në Skenderaj.

Pas përfundimit të homazheve, në të njëjtin vend do të mbahet mbledhja komemorative, e cila do të nisë në orën 14:00.

Ndërkaq, ceremonia e varrimit të Sahit Jasharit do të zhvillohet në ora 16:00, në varrezat e lagjes Jashari në Prekaz.

Komuna ka bërë të ditur se e pamja për ngushëllime do të mbahet më 13 dhe 14 qershor, nga ora 08:00 deri në 16:00, po ashtu në palestrën “Ilaz Kodra” në Skenderaj.

“Në këto momente të vështira, në emër të qytetarëve të Skenderajt, i shprehim ngushëllimet më të sinqerta familjes Jashari, miqve, bashkëluftëtarëve, dashamirëve dhe të gjithë atyre që e kanë njohur jetën dhe veprën e të ndjerit Sahit Jashari”, thuhet në njoftimin e Komunës së Skenderajt.

Ministria e Industrisë, Ndërmarrësisë, Tregtisë dhe ka bërë të ditura çmimet maksimale të lejuara të derivateve të naftës për ditën e sotme.

Sipas njoftimit të ministrisë, nafta do të shitet me çmim maksimal prej 1.52 euro për litër, benzina 1.39 euro për litër, ndërsa gazi 0.68 euro për litër.

Këto çmime hyjnë në fuqi nga ora 10:00 dhe do të vlejnë deri ditën e nesërme.

Pesë emra të prokurorëve janë konfirmuar për pozitën e Kryeprokurorit të Shtetit, afati për konkursin e të cilit është mbyllur të mërkurën më 10 qershor.

Sipas renditjes alfabetike, në këtë pozitë kanë aplikuar:

Atdhe Dema– Prokuror në Departamentin për Hetimin e Terrorizmit në Prokurorinë Speciale të Republikës së Kosovës,

Naim Abazi– Prokuror në Departamentin për Hetimin e Korrupsionit dhe Krimit Financiar në Prokurorinë Speciale të Republikës së Kosovës,

Rafet Halimi– Prokuror në Departamentin për Hetimin e Korrupsionit dhe Krimit Financiar në Prokurorinë Speciale të Republikës së Kosovës,

Shqipdon Fazliu– Prokuror në Zyrën e Kryeprokurorit të Shtetit,

Zejnullah Gashi– Kryeprokuror i Prokurorisë Themelore në Prishtinë.

Dema, shkurtimit përmes telefonit ka thënë “po kam aplikuar”.

Në anën tjetër, prokurori Abazi ka thënë se me këtë konkurs pret që të plotësohet pozicioni më i rëndësishëm brenda Sistemit Prokurorial.

“Po unë dje kam aplikuar, siç e dini ka qenë afati i fundit për aplikim, kështu që jam pjesë e konkursit që është shpall nga ana e Këshillit Prokurorial. Ju e dini që kjo është pozitë e cila ka qenë ndër vite me ushtrues detyre, dhe tash me këtë konkurs është një ndër konkurset që e plotëson ndoshta edhe pozicionin më të rëndësishëm në sistemin prokurorial. Po besoj që do të jemë pjesë e një gare që do të jetë transparente, meritore dhe të zgjidhet kandidati që i plotëson të gjitha kriterët siç është kërkuar nga ana e Këshillit, Ligjin për Këshillin Prokurorial, Prokurorin e Shteti dhe rregullorët që i ka këshilli në fuqi”, është shprehur Abazi.

Prokurori Halimi ka thënë se është me interes të sistemit të drejtësisë dhe qytetarëve që kjo pozitë të plotësohet me mandat të rregullt.

“Ju konfirmojë se kam aplikuar për pozitën e Kryeprokurorit të Shtetit. Është në interes të sistemit të drejtësisë dhe të qytetarëve që Kryeprokurori i Shtetit të zgjidhet sa më shpejtë përmes një procesi të rregullt dhe transparent”, ka shtuar ai.

Ndërsa, thirrjeve dhe mesazheve të redaksisë nuk i është përgjigjur prokurori Shqipdon Fazliu, mirëpo kandidimin e tij e kanë konfirmuar disa burime brenda sistemit prokurorial.

Kandidimin në këtë garë, e ka konfirmuar edhe kryeprokurori i Prokurorisë Themelore në Prishtinë, Zejnullah Gashi.

“Po është e vërtetë, e konfirmoj kandidimin tim për Kryeprokuror të Shtetit”.

Megjithatë, lista e plotë me të gjithë emrat që kanë kandiduar për këtë pozitë, pritet të bëhet publike ditëve në vazhdim, pasi të bëhet edhe verifikimi i aplikimeve të kandidatëve, për çështjen e plotësimit të kritereve.

Përveç emrave të konfirmuar, si kandidatë të mundshëm janë diskutuar edhe zëvendëskryeprokurori i PSRK-së, Valdet Gashi, prokurori special Admir Shala, prokurori i Gjilanit Arben Ismajli dhe prokurori i Zyrës së Kryeprokurorit të Shtetit, Bahri Hyseni, mirëpo të njëjtit përmes përgjigjeve me shkrim e kanë mohuar.

Kujtojmë se vendimi për shpalljen e konkursit për Kryeprokuror të Shtetit ishte marrë në takimin e Këshillit Prokurorial të Kosovës më 18 maj 2026.

Kujtojmë se në atë mbledhje, anëtari Milot Krasniqi e kishte kundërshtuar shpalljen e konkursit. Ai kishte kritika për atë që e quante “nxitim të shpalljes së konkursit” pa qenë të pranishëm i gjithë Këshilli në takim, duke thënë se Këshilli nuk duhet të bie në diktatin e pushteteve tjera, derisa theksoi se kandidati Blerim Isufaj ishte refuzuar nga atëkohë presidentja Vjosa Osmani, pa një vendim të arsyetuar.

“Publiku e di që ky proces është bllokuar qëllimisht tash e rreth 4 vjet. Pasi u prit kaq kohë, unë nuk e di thjesht arsyen pse sot ngutemi dhe cila është kjo urgjencë me shpalljen e konkursit për Kryeprokuror të Shtetit. Pse të mos presim që të krijohen kushtet ligjore dhe legjitimiteti i plotë për këtë veprim. Pse Këshilli duhet të veprojë kur për këtë proces kanë folë dhe flasin tjerët- ata që kanë më së paku të drejtë, ata që s’kanë as të drejtë kushtetuese, as ligjore e as njerëzore të përfshihen në këtë proces”, kishte thënë ndër të tjera Krasniqi.

Pas shpalljes së konkursit, kryeprokurori i Prokurorisë Speciale të Republikës së Kosovës, Blerim Isufaj kishte paraqitur padi me kërkesë për masë të sigurisë në Gjykatën Administrative, duke kërkuar që konkursi i shpallur nga KPK-ja të pezullohet, por Gjykata e kishte refuzuar kërkesën dhe se tash lënda gjendet në procedurën e ankesës në Gjykatën e Apelit. /BetimipërDrejtësi

Zyra Kombëtare e Auditimit (ZKA) ka gjetur se disa pagesa në vlerë totale prej 225 mijë e 570 euro të Ministrisë së Arsimit nuk janë nënshkruar nga zyrtari i autorizuar.Kjo është një nga gjetjet e ZKA-së në raportin e auditimit për Ministrinë e Arsimit për vitin 2025.

Sipas ZKA-së, bëhet fjalë për tetë pagesa në Agjencinë për Aftësim Profesional dhe Arsimin për të Rritur (AAAPARr) që nuk janë nënshkruar nga personi i autorizuar.

“Mungesa e nënshkrimit nga zyrtari i autorizuar për pagesat që kanë vlerë mbi 1 mijë euro dobëson kontrollet e brendshme në fazën e pranimit të mallrave dhe shërbimeve dhe mund të ndikojë në procesimin e pagesave pa verifikim të plotë.” – thuhet në raportin e ZKA-së.

ZKA vlerëson se kjo ka ndodhur si rezultat i mosfunksionimit të duhur të kontrolleve të brendshme dhe mungesës së verifikimit të plotë të dokumentacionit para procedimit të pagesës.Ministria e Arsimit është pajtuar në lidhje me këtë gjetje të auditorëve.

Kurse, ZKA ka rekomanduar që ministri i Arsimit të sigurojë forcimin e kontrolleve të brendshme, në mënyrë që raporti i pranimit të mallit të nënshkruhet nga personi autorizues, para procedimit të mëtejmë të dokumentacionit për pagesë.

Gjatë kësaj kohe të auditimit, Arbërie Nagavci ka qenë ministre e Arsimit dhe Fikrije Zymberi është drejtoreshë në AAAPARr, kurse nga data 18.02.2026 është Hajrulla Çeku.

Ky raport ka rezultuar me 9 rekomandime, prej tyre një i ri dhe tetë të përsëritura. Kurse, nga rekomandimet e vitit të kaluar, Ministria e Arsimit ka zbatuar 7 prej 15 rekomandimeve të dhëna.

Zyra Kombëtare e Auditimit i ka dhënë Opinion të kualifikuar Ministrisë së Arsimit në Raportin e auditimit për Pasqyrat financiare për vitin 2025. Opinioni i kualifikuar është Opinioni i dytë më i mirë që u jepet institucioneve pas Opinionit të pamodifikuar.

Ky Opinion jepet kur ka keqdeklarime dhe mospajtueshmëri në Pasqyrat financiare.Raportin e plotë të audimit të Ministrisë së Arsimit nga ZKA e gjeni në këtë LINK.

Një raport i Gjykatës Evropiane të Auditorëve ka gjetur se gjendja e hekurudhave të Kosovës në vitin 2025 ishte më e keqe se para fillimit të rehabilitimit para 10 vitesh, ndërsa nuk ka ende afat të qartë për përfundimin e rrjetit hekururdhor të Kosovës.

Përkundër investimeve dhjetëra miliona euro nga grantet e Bashkimit Evropian dhe projekteve të Qeverisë së Kosovës, gjendja aktuale e hekurudhave të Kosovës është më e keqe se para 10 vitesh, kur edhe kishin filluar këto investime.

Kjo gjetje del nga një raport i Gjykatës Evropiane të Auditorëve, i cili ka matur ecurinë e projekteve hekurudhore të financuara nga Bashkimi Evropian në Ballkanin Perëndimor.

Raporti analizon gjithsej 12 projekte në Kosovë, Serbi, Bosnje dhe Hercegovinë dhe Maqedoni të Veriut, të financuara përmes Kornizës së Investimeve për Ballkanin Perëndimor (ëBIF).

Auditorët konstatojnë se projektet janë në përputhje me prioritetet e BE-së për lidhjen e rajonit me rrjetin evropian të transportit, por zbatimi i tyre është karakterizuar me vonesa të mëdha dhe probleme në menaxhim.

Kësisoj, objektivi i vendosur për përfundimin e rrjetit kryesor të transportit hekurudhor deri në vitin 2030 ka pak gjasa të arrihet.

Sipas raportit, Komisioni Evropian ka financuar projekte në Ballkanin Perëndimor pa vlerësuar mjaftueshëm gatishmërinë e tyre për zbatim.

Çka thotë raporti për Kosovën?

Në këtë raport Kosova përmendet në kuadër të rehabilitimit të rrjetit hekurudhor që lidhë Kosovën me shtetet e rajonit dhe më gjerë.

Rehabilitimi i rrjetit hekurudhor brenda Kosovës është 148 kilometra, dhe ishte ndarë në tri faza: Faza e parë fillon nga Hani i Elezit – Fushë Kosovë, faza e dytë Fushë Kosovë – Mitrovicë Jugore dhe faza e tretë është nga Mitrovica e Jugut deri në Leshak, në kufirin me Serbinë.

Kjo linjë pastaj parashihet të lidhet më korridorin e dhjetë hekurudhor që lidhë Kosovën më Ballkanin Perëndimor dhe rrjetin Trans-Evropian të Transportit.

Megjithatë, kur kanë kaluar mbi 10 vjet nga koha e nisjes së këtyre projekteve, gjendja aktuale e hekurudhave të Kosovës është më e keqe se kur në kohën kur kishin filluar këto investime.

Në mostrën e auditimit janë përfshirë dy projekte nga Kosova në këtë korridor: një segment prej 66.8 kilometrash, me grant të BE-së prej 38.5 milionë euro, i miratuar në vitin 2015; dhe një segment tjetër prej 33.4 kilometrash, me grant prej 17.2 milionë euro, i miratuar në vitin 2016.

Në total, projektet e audituara për Kosovën mbulojnë 100.2 kilometra, si pjesë e rrjetit hekurudhor që është përgjegjësi e Kosovës për ta ndërtuar.

Auditorët e BE-së gjetën se asnjë nga këto projekte për të cilat Kosova ishte zotuar se do t’i kryejë, nuk ishte përfunduar sipas standardeve të rrjetit kryesor TEN-T deri në kohën e auditimit.

“Gjetja më kritike për Kosovën është se, në qershor 2025, gjendja e hekurudhës ishte më e keqe sesa para fillimit të projektit”, thuhet në raport.

Për me tepër, raporti konstaton se transporti hekurudhor i Kosovës ishte ndërprerë që nga viti 2020, pasi disa tunele ishin shembur gjatë punimeve. Po ashtu, auditorët theksojnë se nuk kishte datë të parashikueshme për fillimin e punimeve në pjesën veriore të Kosovës. Ndërkohë, sinjalizimi dhe elektrifikimi nuk ishin ende funksionalë në kohën e auditimit, në qershor 2025.

Probleme edhe në rajon

Raporti evidenton probleme serioze edhe në vendet e tjera të rajonit.

Në Bosnje dhe Hercegovinë, Komisioni Evropian në qershor 2022 kishte pezulluar dy projekte të miratuara fillimisht, përfshirë segmente të palidhura të Korridorit Vc, për shkak të situatës politike në Republikën Srpska.

Në Maqedoninë e Veriut, auditorët theksojnë se një seksion hekurudhor prej 23 kilometrash, që duhej të niste në vitin 2024 pranë kufirit me Bullgarinë, ende nuk ishte ndërtuar. Përfundimi i tij ishte planifikuar për vitin 2030. Raporti po ashtu përmend se një grant ishte miratuar për një segment hekurudhor që, në kohën e miratimit, nuk ishte i lidhur plotësisht me vendet fqinje dhe nuk kishte marrëveshje që do të garantonte funksionimin e të gjithë korridorit.

Për Serbinë, raporti thotë se mbështetja për sektorin hekurudhor është kryesisht ende në fazë planifikimi, me synim përmirësimin e linjave sipas standardeve të BE-së. Në tabelën e raportit, Korridori Hekurudhor X në Serbi ka 513, por asnjë kilometër të përfunduar sipas standardeve të rrjetit kryesor TEN-T; ndërsa për Korridorin Xc, trafiku po zhvillohet vetëm në kushte të veçanta gjatë punimeve. /Buletini Ekonomik/

Komiteti për të Drejtat e Njeriut i Odës së Avokatëve të Anglisë dhe Uellsit (BHRC) i cili javë me parë ka publikuar një raport të iniciuar me kërkesë të Institucionit të Avokatit të Popullit të Kosovës është duke i prezantuar sot në Hagë gjetjet e tyre për funksionimin e Dhomave të Specializuara para Korit Diplomatik.

Ngjarja po fasilitohet nga Ambasada e Kosovës në Hagë dhe është hapur nga Ambasadori i Kosovës Dren Doli. Gazeta Express po e përcjell këtë aktivitet.

Por, pavarësisht pranisë së diplomatëve, dhe aktoreve të ndryshëm në këtë ngjarje vetë Gjykata Speciale e cila ndodhet në Hagë ku po mbahet ngjarja nuk e ka dërguar dikë aty, Kjo është bërë e ditur nga Avokati i Popullit të Kosovës Naim Qelaj i cili ka thënë se ata janë ftuar.

“Do të doja që Dhomat e Specializuara të ishin këtu dhe nuk e di pse s’kanë ardhur” u ka thënë të pranishmëve Qelaj.

Ai ka theksuar se raporti është i pavarur dhe në asnjë mënyrë i influencuar Avokati i Popullit.

Qelaj në prill të këtij viti kishte mbajtur një konferencë për media ku kishte numëruar gjetjet e britanikëve sa i përket procesit gjyqsor në Hagës. Ai kishte listuar një varg shqetësimesh të identifikuara nga raporti i britanikëve.

Si gjetje të parë, Qelaj kishte përmendur kufizimin e të drejtave gjatë qëndrimit në paraburgim, ku përfshihet mungesa e mundësive reale për lirim të parakohshëm dhe kufizimi i komunikimeve familjare dhe profesionale.

“Sa i përket paraburgimit dhe kufizimit të të drejtave gjatë qëndrimit në paraburgim, raporti evidenton shqetësime serioze për zgjatjen e paraburgimit, mungesën e mundësive reale për lirim të parakohshëm dhe kufizimin e komunikimeve familjare dhe profesionale me mbrojtjen”, kishte thënë ai.

Gjithashtu raporti kishte ngritur si shqetësim mbikëqyrjen sistematike të komunikimeve. Qelaj tregon se edhe gjatë vizitës që vetë kishte zhvilluar, kishte qenë subjekt i incizimit gjatë gjithë kohës nga kamerat e vendosura.

“Raporti tregon se mbikëqyrja sistematike e komunikimeve me të cilat jam ballafaquar edhe unë, sepse në vizitën e vitit 2025 jam vëzhguar nga dy kamera që kanë incicuzar gjatë gjithë kohës, pra raporti konstaton se kjo përbën ndërhyrje në nenin 8”, kishte shtuar Qelaj.

Qelaj thoshte se Raporti ngrit shqetësime serioze edhe për mungesën e mekanizmave efektiv të mbikëqyrjes demokratike dhe kontrollit institucional.

Raporti, siç tregonte Qelaj, ka përmendur si shqetësim edhe diskrecionin e konsiderueshëm që ka kryetarja e Gjykatës Speciale për të emëruar panele, gjë që mund të ndikojë në perceptimin e paanshmërisë.

“Sa i përket standardit për gjykim të drejtë, raporti konstaton se kryetarja e Speciales ka diskrecion të konsiderueshëm për të formuar panele, gjë që mund të ndikojë në perceptim për paanshmërinë. Më tej raporti evidenton shqetësime për konsultimet ndër-institucionale të paraparë me rregulloret dhe mungesën e gjyqtarëve nga Kosova”, ka thënë ai tutje.

Qelaj kishte përmendur edhe disa deklarime problematike që janë bërë nga ish-kryeprokurori Jack Smith lidhur me burgimin e përjetshëm dhe deklarimet nga kryetarja e Gjykatës se nëse ish-krerët e UÇK’së lirohen ata përbëjnë rrezik. Këto deklarime përbejnë shqetësime serioze për prezumimin e pafajësisë, integritetin e procesit dhe për lirimin e parakohshëm.

“Konstatimi nga kryetarja e Gjykatës se nëse lirohen këta persona paraqesin rrezik dhe duhet të mbahen në paraburgim ngre shqetësime serioze jo vetëm për prezumimin e pafajësisë por edhe për integritetin e procesit dhe lirimin e parakohshëm”, kishte thënë Qelaj.

Ai kishte treguar se deklarimet e Smith dhe kryetare së Speciales janë bërë në një takim të tyre me disa diplomatë, e ku s’ka qenë e ftuar fare mbrojtja.

Qelaj kishte përmendur edhe temën e pranimit të provave nga Serbia, duke thënë se raporti ka konstatuar mungesë të transparencës serioze nga ana e Hagës.

“Lidhur me pranueshmërinë e provave nga Serbia, raporti konstaton mungesë transparence serioze, pasi kërkesat e mbrojtjes për zbulim, qasje për origjinën e materialeve mbeten pa vendim publik. Mungesa e çfarëdo vendimi publik përbën shqetësim për transparencën”, ka thënë ai duke cituar raportin.

Qelaj kishte shtuar se në raport, rekomandohet krijimi i një mekanizmi të pavarur të monitorimit të procesve gjyqësore./Express/