Tag: Ballina

Presidenti i Francës, Emmanuel Macron, ka thënë të mërkurën se do të ishte “çmenduri” të shpërfillej kërcënimi që tani përbën Rusia për Evropën dhe theksoi se është i hapur për bisedime për shtrirjen e ombrellës bërthamore të Francës në vendet aleate të Parisit në kontinent.

Ai i bëri këto komente në prag të një takimi emergjent të liderëve të Bashkimit Evropian, që pritet të mbahet sot në Bruksel, për të diskutuar për rritjen e buxhetit ushtarak, që është kërkesë e rëndësishme e administratës amerikane për shkak të shqetësimeve në lidhje me përkushtimin e Uashingtonit ndaj NATO-s dhe çështjeve të sigurisë evropiane.

Macron tha në një fjalim televiziv se “ombrella jonë bërthamore na mbron neve: është e plotë, sovrane dhe plotësisht franceze”.

“Megjithatë, duke iu përgjigjur thirrjes historike të kancelarit të ardhshëm gjerman [Friedrich Merz], kam vendosur ta hap debatin strategjik për mbrojtjen e aleatëve tanë në kontinentin evropian përmes ombrellës sonë [bërthamore]”, shtoi ai.

Macroni tha gjithashtu se Franca do të duhet të shpenzojë më shumë për mbrojtjen dhe u zotua se Parisi do të vazhdojë ta mbështesë Kievin në luftën e tij kundër pushtimit nga Rusia, i cili ka hyrë në vitin e katërt.

“Rusia është bërë kërcënim për Francën dhe Evropën”, tha Macron. “Të shikosh dhe të mos bësh asgjë do të ishte marrëzi”.

Ai tha se shpreson se Shtetet e Bashkuara “do të mbeten përkrah nesh” – por shtoi se Evropa duhet të jetë e përgatitur për të kundërtën.

“E ardhmja e Evropës nuk ka pse të vendoset në Uashington apo Moskë”, tha Macron. “Pafajësia e 30 viteve të fundit… ka marrë fund”.

“Kush mund të besojë se Rusia e sotme do të ndalet në Ukrainë? Rusia është bërë kërcënim për Francën dhe Evropën dhe do të mbetet e tillë për vitet në vijim”, shtoi ai.

“Përtej Ukrainës, kërcënimi rus është i pranishëm dhe ndikon në vendet e Evropës. Na prek edhe neve”, nënvizoi Macron.

Të gjitha kombet kërkojnë t’i mbajnë të fshehta hollësitë e arsenalit të tyre bërthamor, dhe Macron nuk foli në veçanti për hollësitë kur sugjeroi zgjerimin e ombrellës bërthamore të Francës.

Ombrella bërthamore e Francës u zhvillua nga presidenti i atëhershëm, Charles de Gaulle, në fillim të viteve ‘60, i krijuar për të qenë plotësisht i pavarur nga Shtetet e Bashkuara, të cilat në atë kohë ishin në garë për armë bërthamore me Bashkimin Sovjetik.

Qëndrimet e Macronit janë shprehur gjithashtu nga lideri i partisë së ekstremit të djathtë në Francë, i cili tha se “mbrojtja e interesave franceze nuk ndalet në kufijtë [francezë]”.

“Që nga koha e de Gaulleit, ombrella bërthamore franceze, në thelb, mbron disa fqinjë dhe disa partnerë evropianë”, tha këtë javë presidenti i partisë Tubimi Kombëtar, Jordan Bardella.

Sipas Federatës së Shkencëtarëve Amerikanë, Shtetet e Bashkuara (5.044 koka bërthamore) dhe Rusia (5.580) zotërojnë rreth 88 për qind të inventarit të përgjithshëm të armëve bërthamore në botë.

Franca ka rreth 290 koka bërthamore dhe Britania rreth 225, sipas faqes së internetit të federatës. Kina ka rreth 500.

Merz, i cili ka gjasa të jetë kancelari i ardhshëm gjerman pasi partia e tij fitoi zgjedhjet parlamentare muajin e kaluar, ka ngritur pyetje nëse NATO-ja duhet të mbetet në “formën e saj të tanishme” deri në samitin e qershorit, dhe ka sugjeruar që të mbahen bisedime me Parisin dhe Londrën për zgjerimin e mbrojtjes së tyre bërthamore.

Shqetësimet mbi përkushtimin e SHBA-së ndaj Ukrainës dhe Evropës u rritën pasi Shtëpia e Bardhë tha se presidenti Donald Trump ka pezulluar ndihmën ushtarake amerikane për Ukrainën dhe pas komenteve të drejtorit të Agjencisë Qendrore të Inteligjencës (CIA) se ka kufizuar ndarjen e informatave të inteligjencës me Kievin.

Trump, i cili e ka bërë përfundimin e luftës në Ukrainë një nga prioritetet kryesore të mandatit të tij të dytë, ngriti gjithashtu shqetësime mes aleatëve evropianë pasi i telefonoi presidentin rus Vladimir Putin në mes të shkurtit dhe më pas dërgoi zyrtarë të lartë për t’u takuar me homologët e tyre rusë në Arabinë Saudite.

Takimi në Bruksel do të mbahet gjithashtu pas vizitës fatkeqe të presidentit ukrainas Volodymyr Zelensky në Shtëpinë e Bardhë, gjatë të cilës pritej nënshkrimi i një marrëveshjeje për zhvillimin e përbashkët të mineraleve të rralla dhe burimeve të hidrokarbureve të Ukrainës – një hap që Trump e ka cilësuar si thelbësor për arritjen e paqes midis Ukrainës dhe Rusisë.

Në vend të kësaj, një takim para kamerave në Zyrën Ovale u shndërrua në një përplasje të hapur, ku Trumpi i tha Zelenskyt se ai duhet të jetë më mirënjohës për mbështetjen amerikane dhe se nuk është në pozitë për të bërë kërkesa.

Pas komenteve të Macronit, Zelensky shkroi në rrjetet sociale: “Jam mirënjohës ndaj Macronit për vizionin e tij të qartë dhe përpjekjet tona të përbashkëta për të arritur paqen”.

Fokusi i samitit të 6 marsit në Bruksel do të jetë mbi gjetjen e mënyrave se si BE-ja mund të krijojë mjete për të siguruar mbrojtjen e saj dhe atë të Ukrainës, pasi synon ta zvogëlojë varësinë e saj ndaj Shteteve e Bashkuara pas Luftës së Dytë Botërore.

“Përballë situatës në rritje të kërcënimeve, është e qartë për ne që Evropa… duhet tani shumë shpejt të bëjë përpjekje të mëdha, shumë shpejt, për t’i forcuar aftësitë mbrojtëse të vendit tonë dhe të kontinentit evropian”, tha Merz më 3 mars.

Macron, i cili ka kërkuar prej kohësh të luajë rol aktiv diplomatik që nga pushtimi i plotë i Ukrainës nga Rusia, tha se po planifikon një takim me aleatët evropianë javën e ardhshme për të diskutuar mundësinë e dërgimit të forcave paqeruajtëse në Ukrainë në rast të një marrëveshjeje për armëpushim ose një akordi afatgjatë.

“Për të siguruar që Ukraina të mos pushtohet nga Rusia përsëri pas një marrëveshjeje paqeje, ne duhet të përgatitemi për këtë”, tha Macron.

“Javën e ardhshme do të mblidhen në Paris shefat e shtabit të ushtrive të shteteve që dëshirojnë të kryejnë përgjegjësitë e tyre në këtë drejtim”, theksoi ai.

“Ukraina ka të drejtë për paqe dhe siguri, dhe kjo është në interesin tonë, është në interes të sigurisë së kontinentit evropian. Në këtë kuadër, ne po punojmë së bashku me miqtë tanë në Britaninë e Madhe, Gjermani dhe disa shtete të tjera evropiane”, përfundoi ai. /REL

Procesi i numërimit të të gjitha votave për zgjedhjet parlamentare të 9 shkurtit ka përfunduar në Qendrën e Numërimit dhe Rezultateve (QNR), mbrëmjen e së mërkurës, pas një vonese mbi dy orësh.

Shkaku i kësaj vonese ishte një kuti që nuk mund të numërohej për shkak të problemeve në sistem.

Të mërkurën u numëruan votat me kusht dhe ato të personave me nevoja të veçanta, duke e çuar numrin total të fletëvotimeve të numëruara në mbi 15,500.

Sipas zëdhënësit të Komisionit Qendror të Zgjedhjeve (KQZ), Valmir Elezi, rezultatet përfundimtare nuk do të shpallen deri të paktën pas kalimit të afatit 48-orësh për ankesa, i cili ka filluar të mërkurën në orën 21:00.

Ky afat mundëson që të paraqiten ankesat në Panelin Zgjedhor për Ankesa dhe Parashtresa (PZAP) lidhur me administrimin e numërimit.

Gjithashtu, Elezi njoftoi se KQZ-ja do të realizojë rinumërimin e fletëvotimeve për një subjekt politik në komunën e Vushtrrisë, pas kërkesës së Prokurorisë Themelore të Mitrovicës.

Pritet që pas përfundimit të këtij afati dhe shqyrtimit të mundshëm të ankesave, KQZ do të shpallë rezultatet përfundimtare të zgjedhjeve të 9 shkurtit.

Sipas rezultateve ende preliminare të zgjedhjeve të 09.02.2025 Lëvizja Vetëvendosje ka fituar 40.9% apo 345,760 vota, e ndjekur nga PDK me 22.04% apo 186,302 vota, LDK 17.64% apo 149,095 vota, koalicioni AAK-Nisma Socialdemokrate 7.46% apo 63,035 vota.

Këto rezultate nuk përfshijnë votat e diasporës, ato me kusht dhe të personave me nevoja të veçanta.

Kushte të motit të kthjellët dhe me diell mbeten edhe ditën e enjtë. Orëve të mëngjesit, ultësirave mund të ketë kushte për mjegullinë.

Herë herë mund të kalojnë vransira të pakta, kryesisht shtresore të larta. Frynë erë e lehtë jugore e juglindore 2-5m/s, e pjesë lindore të vendit deri në 8 e 10m/s. Temperaturat minimale zbresin deri në -2C e 2C, derisa maksimale vazhdojnë me rritje deri në 18C e 19C.

Më shumë vransira kalojnë mbi vend ditën e premtë dhe të shtunë, por kryesisht të larta, që nuk pengojnë rrezet e diellit. Temperaturat ende të larta deri në 20C e 21C, maksimalet. Nga dita e diel sërish priten të dominojnë më shumë kthjellimet, e temperaturat mbesin të larta 18C deri 20C. Minimalet luhaten ndrëmjet -1C e 4C.

Indeksi i cilësisë së ajrit mund të qëndrojë më gjatë në vlera të dobëta ditëve vijuese, meqenëse kushtet më stabile atmosferike mbajnë më të ngujuar ndotësit ajror pranë sipërfaqe, e sidomos orëve të mbrëmjes, kur mund të kalojnë vlerat e çastit edhe në shumë të dobëta.

Ndërkohë që në pjesë tjera, kryesisht nga Dukagjini, indeksi mbetet më gjatë në vlera të pranueshme. Në vlera të pranueshme indeksi zbret edhe nga rrafshi i Kosovës orëve të pasdites, njofton Mendimi për Motin.

Uji burimor “Rugove” kontrollohet rregullisht në laboratorët e Institutit Kombëtar të Shëndetësisë Publike të Kosovës (IKSHPK) dhe në të “nuk janë gjetur asnjëherë baktere të dëmshme për shëndetin e konsumuesve”, thotë Ergyl Binçe, drejtor i Laboratorëve për Analizat e Ujit dhe Ushqimeve në këtë institucion.

Radio Evropa e Lirë siguroi deklaratën e tij një ditë pasi Agjencia e Ushqimit dhe Veterinarisë e Maqedonisë së Veriut njoftoi se është duke i inspektuar të gjitha dërgesat e ujit burimor nga Kosova, pasi, siç tha, disa analiza të mëhershme zbuluan praninë e bakterit koliform në një mostër uji.

Media të caktuara në këtë vend publikuan vendimin e agjencisë, sipas të cilit bëhet fjalë për mostra të ujit “Rugove”.

Kjo kompani e Kosovës konfirmoi për Radion Evropa e Lirë se produkti i saj është në rregull dhe se shitjet në shtetin fqinj janë duke vazhduar.

Agjencia e Ushqimit dhe Veterinarisë e Kosovës nuk iu përgjigj pyetjeve të Radios Evropa e Lirë në lidhje me shqetësimin që ka ngritur agjencia e saj homologe në Maqedoni të Veriut.

Ngjashëm nuk u përgjigj as Inspektorati Sanitar, i cili funksionon në kuadër të Ministrisë së Shëndetësisë dhe është përgjegjës, ndër të tjera, për vërtetimin e cilësisë së ujit të ambalazhuar në Kosovë.

Çka thotë IKSHPK-ja?

Binçe konfirmon se kompania që prodhon ujin “Rugove” i bën vazhdimisht analizat në IKSHPK – “madje edhe për stoqet që i eksporton jashtë vendit”.

Ai beson se vërejtjet që kanë përmendur autoritetet kompetente të Maqedonisë së Veriut, lidhur me “praninë e bakterit koliform” te uji i ambalazhuar “Rugove”, nuk qëndrojnë.

“Këtë bakter që e përmendin, nuk e kemi gjetur kurrë, jo vetëm tek uji ‘Rugove’, por tek asnjë [nga ujërat e ambalazhuara të kompanive tjera kosovare]”, thotë Binçe.

Ai shton se është e rëndësishme që Agjencia e Ushqimit dhe Veterinarisë e Kosovës të marrë një rol më aktiv, duke shkuar në Maqedoninë e Veriut dhe duke verifikuar në mënyrë të pavarur burimin e problemit.

Ekspertja për ujëra në IKSHPK, Burbuqe Nushi-Latifi, shpreh habi me konstatimin e kolegëve maqedonas.

Sipas saj, ai mund të jetë “gabim njerëzor në laborator ose në diagnostikim”.

“Gjatë përpunimit [të ujit], duart e palara mund ta bartin [bakterin]… vetëm një koloni, dy, tri ose katër. Më pas, ato zhvillohen në ujë, sepse uji është jetik jo vetëm për njerëz, por edhe për baktere”, thotë Nushi – Latifi për Radion Evropa e Lirë.

Sipas të dhënave të Byrosë së Prokurimit Publik të Maqedonisë së Veriut, janë 23 institucione të këtij vendi, të cilat, përmes një kompanie të atjeshme, furnizohen me ujin “Rugove”.

Disa prej këtyre institucioneve – si Ministria e Administratës Publike – konfirmuan për Radion Evropa e Lirë në Shkup se e kanë konsumuar dhe vazhdojnë ta konsumojnë ujin “Rugove”.

Kryeministri në detyrë Albin Kurti tha se Kosova nuk ka pasur asnjëherë ushtri më të armatosur dhe të pajisur se sot, raporton KosovaPress.

Në shënimin e 27-vjetorit të Epopesë së UÇK-së, Kurti tha se rreshtimi i kuadrateve ka traditën nga 6 marsi i vitit 1999.

“Që nga çlirimi i atdheut tonë në qershor 1999 dhe deri më sot e tutje një nga detyrat kyçe për ruajtjen e lirisë së fituar me gjakun e dëshmorëve dhe martireve të popullit tonë ka qenë dhe vazhdon të mbetet fuqizimi i ushtrisë së Kosovë, sot me ngazëllim mund të konstatoj se qysh nga viti 1989 kur Adem Jashari me shok filluan të flasin e të punojnë për në ushtri të Kosovës dhe deri sot kurrë nuk kemi pasur një ushtri më të fortë, më të armatosur, me ta pajisur dhe më të trajnuar se sa sot”, deklaroi ai, transmeton KosovaPress.

Sulmin e gjerë që e kishte ndërmarrë Serbia në Drenicë për të zhdukur Ushtrinë Çlirimtare të Kosovës e koncentroi në Prekaz, në zemrën dhe kokën e UÇK-së duke i bërë asaj një rrethim të hekurt.

Ajo që do të ndodhë në fillimet e marsit të vitit 1998 do të jetë një dëshmi e gjallë për botën e qytetëruar dhe përgjegjësit e saj politik e diplomatik. Në të vërtetë kjo ngjarje kaq e drejtpërdrejtë dhe kaq e fuqishme për nga përmasat e saj të flijimit unikat, të qëndresës e të masakrimit do ta ngrejë çështjen e Kosovës në krye të agjendës botërore. Kështu, në natën e 4 e 5 marsit të vitit 1998, Prekazi rrethohet nga forcat e shumta ushtarake dhe policore. Kjo lë të kuptohet se atje do të ketë rrethim të hekurt, raporton KosovaPress.

Presidentja e Kosovës, Vjosa Osmani, po merr pjesë në ceremoninë e Rreshtimit të Kuadrateve të FSK-së, të mbajtur në Kazermën “Adem Jashari” në Prishtinë.

Nga atje, presidentja ka thënë se marsi në Kosovë nuk është vetëm një muaj në kalendar, por siç u shpreh ajo, një kujtesë e përhershme e sakrificë dhe e heroizmit.

“Marsi në Kosovë nuk është thjeshtë një muaj në kalendar, por një kujtesë e përhershme e sakrificë dhe e heroizmit. Në këtë muaj kujtojmë Epopenë e lavdishme të luftës së UÇK-së, përkulemi me respekt para dëshmorëve të kombit, kujtojmë martirët e rënë në masakra dhe nderojmë heronjtë që dhanë gjithçka për Kosovën e lirë”, ka potencuar ajo.

Osmani ka theksuar se familja Jashari është themeli mbi të cilin u ngrit liria e Kosovës dhe siç u shpreh, një monument i gjallë i sakrificës dhe heroizmit.

“Sot kujtojmë me krenari komandantin legjendar, Adem Jashari, familjen e tij heroike dhe të gjithë luftëtarët që i dolën zot atdheut, duke e paguar lirinë me jetën e tyre.

Prekazi nuk ishte vetëm një fshat, Prekazi ishte një kështjellë e lirisë, ishte një fortifikatë e pamposhtur e kombit tonë dhe i tillë mbetet edhe sot. Familja Jashari është themeli mbi të cilin u ngrit liria e Kosovës, një monument i gjallë i sakrificës dhe heroizmit të pashoq”, ka thënë mes tjerash presidentja Osmani.

Kryeministri Albin Kurti, në mbledhjen solemne të Qeverisë së Kosovës me rastin e shënimit të Epopesë së UÇK-së, ka thënë se kjo epope ka vetëm një adresë lirinë nga pushtuesi serb dhe një horizont bashkimin tonë, raporton Ekonomia Online.

“Sot na ndanjë j 27 mote prej ngjarjes me të lavdishme. Ato tri ditë të marsit i kemi quajtur Epopeja e UÇK… Kjo na ka përcaktuar ritmin e mendimit dhe veprimit politik dhe jo vetëm. Na takon neve ta ruajmë atë ritëm të bërjes së historisë. Çka është përcaktimi i ritmit, atë e gjejmë në fjalët e bacës Rifat ku tha mbi luftën e gjakun të gjejmë gjuhën e përbashkët. Epopeja e UÇK-së ka vetëm një adresë lirin nga pushtuesi serb dhe një horizont bashkimin tonë. Ngjarjet e marsit janë një ngjarje e përkryer, ngjarje që përcakton fushën e veprimit, që nga ajo ditë çdo politik e jona është politik e caktuar”, tha Kurti

Ai ka thënë se ne jemi në udhën e përcaktuar nga Epopeja dhe për katër vite qeverisje kemi ecur në ritmin e saj.

“Çlirimi i një populli përbënë lirinë që fitohet dhe lirin që mbrohet. Ne i kemi shpallur zotimet tona si për qeverinë e kaluar, si për të ardhmen për luftë ndaj korrupsionit. Ne jemi në udhën e përcaktuar nga Epopeja dhe për katër vite qeverisje kemi ecur në ritmin e saj dhe perspektiven e hapur prej saj”, tha ai.

Sot shënohet 27-vjetori i Epopesë së Ushtrisë Çlirimtare të Kosovës.

Presidentja e vendit, Vjosa Osmani, ka shkruar se Epopeja e UÇK-së, është një testament i përjetshëm i qëndresës, transmeton Telegrafi.

“Epopeja e UÇK-së, është një testament i përjetshëm i qëndresës, i sakrificës dhe i pathyeshmërisë së popullit tonë”, ka shkruar presidentja në Facebook.

Në natën e 4 e 5 marsit të vitit 1998, Prekazi ishte rrethuar nga forcat e shumta ushtarake dhe policore.

Pikërisht më 5 mars bëhen 27 vjet të rënies së komandantit legjendar, Adem Jasharit, familjes së tij dhe Jasharëve të tjerë. Mirëpo, çdo përvjetor Adem Jasharin e bënë më të lavdishëm në historinë e kombit tonë.

Me aktin e rënies së komandantit legjendar Adem Jasharit, familjes së tij dhe Jasharëve të tjerë, Kosova mundi frikën me çka i hapi shtigjet e lirisë dhe të ardhmërisë.

Dhe jo rastësisht, në Prekaz, në Lagjen e Jasharëve është ngritur monumenti më i madh i luftës për liri, për pavarësi e demokraci, që këto ditë 5,6,7 mars për çdo vit vëmendja e të gjithë kombit shqiptar kthehet nga Prekazi legjendar, që shekuj e vite i dha Kosovës shumë.

Komisioni Qendror i Zgjedhjeve ka bërë të ditur se edhe sot në Qendrën e Numërimit dhe Rezultateve vazhdon numërimi i fletëvotimeve të dhëna nga personat me nevoja të veçanta, i cili pritet të përfundojë sot dhe më këtë përmbyllet i gjithë procesi i numërimit të votave për zgjedhjet e 9 shkurtit.

KQZ-ja dje ka publikuar të dhënat nga 100% e numërimit të votave të ardhura përmes postës për zgjedhjet nacionale të 9 shkurtit, proces i cili përfundoi dje.

Sipas të dhënave të publikuara dje në faqen zyrtare të KQZ-së, nga numërimi i 187 kutive që ishin gjithsej, Lëvizja Vetëvendosje ka dalë e para me 31,963 vota, apo 51.57%.

E dyta ka dalë Lidhja Demokratike e Kosovës me 18,933 vota, që i përgjigjet 30.55%.

Partia Demokratike e Kosovës ka marrë 5,878 vota, apo 9.48%, ndërkaq, Aleanca për Ardhmërinë e Kosovës ka marrë 2,000 vota, apo 3.23%.

Pra gjithë procesi i numërimit, sipas KQZ-së, pritet të përmbyllet sot gjatë ditës.

Kryetari i Kuvendit të Maqedonisë së Veriut, Afrim Gashi, në emisionin CONTEXT në ATV, foli për incidentin e ndodhur me presidenten e Kosovës, Vjosa Osmani, në aeroportin e Shkupit, duke e cilësuar atë si një incident të panevojshëm dhe më shumë si një çështje e ekzagjeruar mediatikisht.

Sipas Gashit, ky incident u përdor nga disa qarqe për të krijuar përshtypjen se Maqedonia e Veriut nuk është një mikpritëse e mirë për Kosovën, por zhvillimet e mëvonshme kanë dëshmuar të kundërtën.

“Ishte një incident i panevojshëm, më shumë mediatik. Në fillim, atëherë kur u formua qeveria, kishte dëshirë nga instanca të caktuara që të shpërfaqet një tendencë se Maqedonia nuk është një mikpritës i mirë për Kosovën”, tha Gashi.

Ai tha se incidenti nuk kishte asnjë ndikim real në marrëdhëniet mes dy vendeve dhe se qeveria e re në Shkup ka një qëndrim të qartë për forcimin e bashkëpunimit me Kosovën.

“Të gjitha veprimet që pasuan në raportet mes dy shteteve tona e kanë demantuar atë tendencë që të shpërfaqet Maqedonia e Veriut, apo qeveria e re me një koalicion shqiptar brenda, si një qeveri që nuk kujdeset sa duhet për raportet me Kosovën. Në këtë rast, presidentja Vjosa Osmani ishte vetëm viktimë e një tendence të tillë”, u shpreh Gashi.

Gashi tha se incidenti është një çështje teknike mes Ministrive të Punëve të Brendshme dhe nuk ka ndonjë element të rëndësishëm për hetim.

“Mendoj se është çështje mes Ministrive të Punëve të Brendshme. Nuk jam i informuar se ka ndonjë epilog, por mendoj që nuk ka pasur diçka substanciale që duhet të hetohet”, tha ai.

Deklaratën e plotë të Afrim Gashit në CONTEXT, e gjeni në videon më poshtë: