Tag: Ballina

Pas dështimit të 13-të me radhë të seancës konstituive për formimin e institucioneve të reja, deputetja e AAK-së, Time Kadrijaj, tha se si parti janë duke mbledhur nënshkrimet e deputetëve që formën e votimit të fshehtë ta dërgojnë në Gjykatën Kushtetuese.

Ajo tha se tashmë i kanë edhe nënshkrimet e LDK-së.

“Për shkak të shkeljeve ligjore, për shkak të ndryshimit të votimit, ne kemi mbledhur nënshkrimet që t’i adresohemi Gjykatës Kushtetuese për këtë shkelje që po bëhet. Edhe pse e kanë shumicën nuk bënë të luajnë me qytetarët. Ne i kemi siguruar nënshkrimet. Të hënën do të dorëzohet në Kushtetuese. Momentalisht i kemi nënshkrimet edhe të LDK-së. Do të mbledhim nënshkrime edhe të dielën”, tha Kadrijaj.

LEXONI EDHE:

Ndërpritet seanca e 13-të e Kuvendit, vazhdon bllokada

Kosova vazhdon të jetë pa Kuvend funksional, pasi deputetët kanë dështuar sërish – në përpjekjen e tyre të trembëdhjetë – ta konstituojnë Kuvendin e ri.

Dështimi më i fundit ndodhi të premten, pikërisht tre muaj pas mbajtjes së zgjedhjeve parlamentare më 9 shkurt.

Sikurse në seancat e ditëve të kaluara, edhe të premten kryesuesi i seancës konstituive, Avni Dehari, kërkoi sërish formimin e një komisioni për mbikëqyrjen e votimit të fshehtë për kryeparlamentar.

Propozimi nuk i mori votat e mjaftueshme dhe seanca u ndërpre për të vazhduar pas dy ditëve, të dielën në mëngjes.

Dështimet e njëpasnjëshme për ta konstituuar Kuvendin e ri e kanë thelluar ngërçin politik të vendit, duke ngritur shqetësime për paralizë institucionale dhe shihen si test për pjekurinë shtetërore të Kosovës.

Asnjë parti nuk e fitoi shumicën për të qeverisur e vetme. Lëvizja Vetëvendosje doli e para duke i fituar 48 ulëse, 13 më pak se të paktën 61 të nevojshme ta formuar qeverinë e re e vetme.

Deputeti i Lëvizjes Vetëvendosje, Faton Peci, ka deklaruar se edhe sot do të provojnë të themelojnë Komisionin për votim të fshehtë për zgjedhjen e kryeparlamentarit/es, shkruan Gazeta Sinjali.

“Ne çdo ditë vijmë me vullnet pozitiv me shpresën që edhe partitë tjera do të reflektojnë. Ne edhe sot do të provojmë të themelojmë komisionin”, tha ai për media.

I pyetur lidhur me një takim të mundshëm të thirrur nga presidentja Vjosa Osmani, Peci u shpreh se janë të gatshëm për dialog, por se do të shqyrtojnë përmbajtjen e ftesës.

“Përveç ftesës është shumë e rëndësishme edhe përmbajtja e ftesës”, theksoi ai.

Deputeti konfirmoi se Vetëvendosje vazhdon të qëndrojë pas kandidaturës së Albulena Haxhiut për postin e kryeparlamentares: “E kemi të njëjtin emër për kryeparlamentare – Albulena Haxhiun.”

Anëtari i PDK-së, Xhavit Haliti, në emisionin CONTEXT në ATV, propozoi një mënyrë se si mund të zhbllokohet situata aktuale dhe të formohen institucionet, duke thënë se partitë politike duhet të takohen në një tryezë të përbashkët nën moderimin e Presidentes.

Ai tha se presidentja nuk ka kompetenca kushtetuese për të imponuar vendime, por mund të luajë rol si moderatore në një takim gjithëpërfshirës mes partive.

“Nuk e besoj që ka zgjidhje pse po i thirr presidentja, sepse edhe ajo ka hallin e vet në këtë aspekt, por unë mendoj që është rruga më e vakët, do të thoja, më e mundshme që partitë të ulen dhe të hapin debatin në prezencë të Presidentes dhe ajo mund ta moderojë atë mbledhje. Përndryshe, ajo nuk ka asnjë obligim kushtetues dhe nuk ka asnjë kompetencë që t’i detyrojë partitë as të takohen, po as të marrin ndonjë vendim,” tha Haliti.

Sipas tij, kur nuk ka fitues të qartë, partitë duhet të ulen bashkë dhe të gjejnë një zgjidhje të përbashkët në interes të vendit.

“Nuk është që Kosova është në një krizë institucionale të thellë, por është një betejë politike. Nëse s’ka fitues, atëherë duhet me gjetë një zgjidhje së bashku. Zgjedhja së bashku po besoj që do të ishte e mundshme në tryezën që e ka thirr, ose që do ta thirrë. Por presidentja duhet ta ketë parasysh që mund të jetë vetëm moderatore dhe mund t’iu thotë dy-tre fjalë. Më shumë ndikimi i saj… nuk shkon,” deklaroi Haliti.

Deklaratën e plotë të Xhavit Halitit në CONTEXT, e gjeni në videon më poshtë:

Ministri në detyrë i Kulturës, Rinisë dhe Sportit, Hajrulla Çeku, në emisionin CONTEXT në ATV, tha se zgjedhjet nuk janë opsioni i parë për ta zgjidhur krizën, por nëse nuk formohet qeveria, atëherë ato bëhen të domosdoshme.

Ai tha se duhet të lëvizin afatet kushtetuese pas konstituimit të Kuvendit, për të parë nëse është e mundur formimi i qeverisë.

“Çfarë po themi ne, përveç asaj që zgjedhjet, natyrisht nëse mbeten si opsion i fundit, duhet ta bëjmë edhe atë, atë rrugëtim. Mirëpo ne nuk jemi për zgjedhje si opsioni i parë. Ne duhet të sigurohemi që lëvizin afatet kushtetuese dhe këtu afati i parë kushtetues që lëviz pas konstituimit të Kuvendit është që për Qeverinë. Është ai i mandatarit. Është dyjavshi i parë i fituesit të zgjedhjeve, pastaj është e drejta e presidentes për t’ia dhënë sërish të parit ose dikujt tjetër. Pra, në momentin që konstituohet Kuvendi, fillojnë afatet, nëse brenda atyre afateve nuk kemi qeveri, atëherë detyrimisht do të shkojmë në zgjedhje,” tha Çeku.

Sipas tij, nesër është një mundësi e rëndësishme për deputetët që të zhbllokojnë situatën.

“Fillimisht duhet ta bëjmë konstituimin e Kuvendit dhe nesër është edhe një mundësi për partitë tash kushtimisht opozitë, sepse për momentin aty të gjithë janë të barabartë, janë deputetë, njëqind e njëzet, për ta zhblloku këtë situatë dhe për të ecur tutje,” deklaroi Çeku.

Deklaratën e plotë të Hajrulla Çekut në CONTEXT, e gjeni në videon më poshtë:

Presidentja e Kosovës, Vjosa Osmani, pranoi sot letrat kredenciale nga ambasadori i ri i Italisë në Prishtinë, Maurizio Antonini.

Osmani gjatë takimit ka përmendur raportet e mira midis dy vendeve mike dhe mirënjohjen e thellë të popullit të Kosovës për mbështetjen e vazhdueshme të Italisë në shtet-ndërtimin dhe forcimin e pozitës së shtetit tonë në fushën ndërkombëtare.

Në takim u theksua rëndësia e thellimit të mëtejmë të bashkëpunimit reciprok në fusha të ndryshme, si dhe bashkëpunimin në kuadër të organizatave ndërkombëtare.

Po ashtu, u nënvizua rëndësia jetike e ecjes përpara në procesin e integrimit euro-atlantik të Kosovës, raporton KP.

Ministria e Mbrojtjes e Turqisë, ka ka bërë të ditur se ky shtet ka përmbushur me sukses detyrën e Komandës së KFOR-it gjatë periudhës tetor 2023–2024, dhe njofton se do ta marrë sërish këtë detyrë për një periudhë njëvjeçare duke filluar nga tetori i vitit 2025.

“Vendi ynë, i cili e ka kryer me sukses detyrën e Komandës së Forcës Paqeruajtëse në Kosovë (KFOR) gjatë periudhës tetor 2023–2024, do ta marrë përsëri këtë detyrë për një vit duke filluar nga tetori i vitit 2025.”

Turqia, e cila ka përmbushur me sukses detyrën e Komandës së KFOR-it gjatë periudhës tetor 2023–2024, do ta marrë sërish këtë detyrë për një periudhë njëvjeçare duke filluar nga tetori i vitit 2025.

Lidhja Demokratike e Kosovës ka dalur me komunikatë për media pasi sot kanë dorëzuar zyrtarisht kallëzime penale në Prokurorinë Speciale të Republikës së Kosovës ndaj ish-kryeministrit Albin Kurti dhe të gjithë ish-ministrave të Qeverisë së kaluar të cilët janë zgjedhur deputetë.

Në pretendimin e LDK-së thuhet se Kurti me ministrat e tij kanë keqpërdorur pozitën zyrtare.

“Sot, deputetë të Lidhjes Demokratike të Kosovës kanë dorëzuar zyrtarisht kallëzime penale në Prokurorinë Speciale të Republikës së Kosovës ndaj ish-kryeministrit Albin Kurti dhe të gjithë ish-ministrave të Qeverisë së kaluar të cilët janë zgjedhur deputetë, për keqpërdorim të pozitës apo autoritetit zyrtar, në kundërshtim me Ligjin për Qeverinë, i shkruar dhe miratuar nga vet ky pushtet, si dhe Kodin Penal të Republikës së Kosovës.

Pas certifikimit të tyre si deputetë më 27 mars, këta zyrtarë kanë vazhduar të ushtrojnë funksione ekzekutive, duke marrë vendime të një natyre që ndalohet qartësisht nga neni 26 i Ligjit për Qeverinë, i cili kërkon dorëheqje të detyrueshme nga pozita qeveritare në rast të certifikimit si deputet. Duke mos u larguar nga funksionet ekzekutive dhe duke vazhduar të përdorin burimet institucionale të shtetit, të dyshuarit kanë vepruar në kundërshtim me ligjin dhe kanë prodhuar pasoja konkrete institucionale, financiare dhe juridike.

Këto veprime përbëjnë shkelje të rëndë të parimeve të shtetit të së drejtës dhe konsumojnë elementet e veprës penale të nenit 414 të Kodit Penal të Kosovës – keqpërdorim i pozitës apo autoritetit zyrtar.

Deputetët e LDK-së kërkojnë nga Prokuroria që të nisë hetime penale ndaj të gjithë të dyshuarëve, të shqyrtojë të gjitha vendimet e marra nga Qeveria pas datës së certifikimit si dhe të ndërmarrë të gjitha veprimet e nevojshme për të siguruar përgjegjësi penale dhe politike.

Kjo është një thirrje e qartë për përgjegjësi ligjore dhe integritet institucional. Për LDK-në askush, pavarësisht funksionit, nuk mund të vendoset mbi ligjin. Republika e Kosovës duhet të funksionojë mbi themelet e barazisë para ligjit dhe ndarjes së pushteteve” thuhet në njoftimin e LDK-së.

Deputetët e Parlamentit Evropian miratuan sot raportet për Serbinë dhe Kosovën, të hartuara nga Tonino Picula dhe Riho Terras.

Raportet janë përgjigja e Parlamentit ndaj Raporteve të Komisionit Evropian 2023 dhe 2024 për dy vendet kandidate, raporton KosovaPress.

Raporti për Serbinë u mbështet nga 419 eurodeputetë, ndërsa 113 deputetë votuan kundër dhe 88 abstenuan. Ndërkaq, pro rezolutës për Kosovën votuan 353 eurodeputetë, kundër 145 dhe abstenuan 78.

Votimit i ka paraprirë një debat në seancën plenare të PE-së në mbrëmjen e djeshme, gjatë të cilit raportuesit prezantuan gjetjet kryesore, ndërsa komisionarja Evropiane për Zgjerim Marta Kos prezantoi qëndrimin e saj.

Të martën në mbrëmje, Parlamenti Evropian zhvilloi një debat për raportet e fundit për Serbinë dhe Kosovën, të prezantuara nga raportuesit Tonino Picula dhe Riho Terras.

Thirrje për heqjen e sanksioneve ndaj Kosovës

Raportuesi i Parlamentit Evropian për Kosovën, Riho Terras (EPP), deklaroi se vazhdimi i dialogut ndërmjet Prishtinës dhe Beogradit dhe normalizimi i marrëdhënieve janë vendimtare për rrugën e Kosovës drejt Bashkimit Evropian. Ai gjithashtu bëri thirrje për heqjen e sanksioneve të BE-së kundër Kosovës.

“Mbajtja e dialogut është absolutisht thelbësore për ta mbajtur Kosovën në kursin e saj evropian”, tha Terras gjatë prezantimit të raportit të tij.

Ai theksoi rëndësinë e një gjyqësori të pavarur, lirinë e shtypit dhe transparencën e pronësisë së mediave në Kosovë.

“Këto dhe çështje të tjera kanë nevojë për përmirësim,” tha ai, duke shtuar se BE-ja gjithashtu duhet të bëjë pjesën e saj për të mbështetur agjendën e reformave të Kosovës.

“Ne bëjmë thirrje për heqjen e menjëhershme të sanksioneve të BE-së. Ato nuk kanë qenë kurrë të drejta dhe kanë qenë të panevojshme që nga fillimi,” tha Terras, duke theksuar se shumë programe mbështetëse të reformave në Kosovë varen nga financimi i BE-së.

Ai shprehu shpresën se ngërçi institucional në Kosovë do të zgjidhet së shpejti me zgjedhjen e presidentit të ri dhe formimin e qeverisë që do të punojë për ringjalljen e dialogut me Beogradin.

Terras gjithashtu u bëri thirrje vendeve anëtare të BE-së që ende nuk e kanë njohur pavarësinë e Kosovës ta bëjnë këtë.

Komisionarja Kos nënvizoi se normalizimi i marrëdhënieve me Serbinë është një kërkesë kyçe për rrugën evropiane të Kosovës. “Dialogu nuk ka alternativë. Normalizimi i marrëdhënieve me Serbinë është kusht thelbësor për anëtarësimin e Kosovës në BE”, tha ajo në fillim të debatit për raportin e Terras, i cili pasoi prezantimin e raportit të Piculës për Serbinë.

Ajo theksoi nevojën për një vazhdim “të fortë dhe konstruktiv” të dialogut të ndërmjetësuar nga BE-ja ndërmjet Prishtinës dhe Beogradit.

“Kosova dhe i gjithë rajoni i përkasin BE-së dhe ne do të qëndrojmë pranë Kosovës në këtë rrugë”, tha ajo.

Kos përshëndeti zgjedhjet e fundit parlamentare në Kosovë, duke theksuar se ato u mbajtën në mënyrë paqësore dhe me pjesëmarrjen e të gjitha komuniteteve. Ajo tha se vendi është gati të reformojë institucionet e tij dhe duhet të lëvizë shpejt për ta bërë këtë.

“Duhet të nënshkruhet dhe ratifikohet marrëveshja për mekanizmin reformues. Kuvendi duhet ta mbështesë dhe është kusht për marrjen e fondeve të BE-së. Kosova duhet të përshpejtojë reformat ligjore”, tha Kos, duke theksuar se këto reforma do të mundësojnë përparim në rrugën drejt BE-së.

Ajo vlerësoi gjithashtu përafrimin e Kosovës me BE-në për luftën në Ukrainë, duke e quajtur atë një demonstrim të qartë të orientimit strategjik.

Tonino Picula, raportuesi i Parlamentit Evropian për Serbinë, prezantoi raportin e tij të parë mbi vendin, duke theksuar korrupsionin e përhapur sistemik, nepotizmin dhe mungesën e mekanizmave adekuat mbikëqyrës – të simbolizuar, tha ai, nga shembja tragjike e një tende në Novi Sad nëntorin e kaluar që mori 16 jetë.

“Mediat nuk janë kryesisht as të lira dhe as të qasshme për të gjithë, REM (Autoriteti Rregullator për Mediat Elektronike) është jofunksional, gjyqësori zbaton drejtësinë në mënyrë selektive dhe ata që vënë në dukje problemet përballen me sulme publike,” tha Picula, duke përshkruar situatën politike në Serbi.

Ai theksoi se raporti i tij është hartuar në kushte të karakterizuara nga praktika jodiplomatike, akuza të pabaza, manipulime dhe sulme personale.

Edhe komisionarja Evropiane për Zgjerim, Marta Kos, iu drejtua Parlamentit, duke i kërkuar Serbisë që të përshpejtojë përpjekjet e saj dhe të japë rezultate të prekshme në luftimin e korrupsionit dhe forcimin e shtetit të së drejtës.

Ajo theksoi rëndësinë e shoqërisë civile, nevojën për të mbrojtur zërat e pavarur dhe përgjegjësinë kolektive për të luftuar dezinformimin dhe manipulimin që gërryen besimin demokratik.

Zyra e Bashkimit Evropian në Kosovë sot ka bërë hapjen e festës në nder të shënimit të Ditës së Evropës, me c’rast morën përfaqësues diplomatik dhe figura të tjera nga politika kosovare, raporton KosovaPress.

Në një fjalë rasti, shefi i Zyrës së Bashkimit Evropian në Kosovë, Aivo Orav tha se dialogu dhe kompromisi janë shumë të rëndësishme në vendimmarrjen e Bashkimit Evropian.

Ai theksoi se partnerët që duan t’i bashkohen BE-së duhet t’i marrin shumë seriozisht në praktikë këto dy fjalë, dialogun dhe kompromisin.

Orav potencoi se BE-ja ka qenë projekti më i suksesshëm i paqes në botë, për çka shtoi se demokracia është arsyeja që nuk ka luftëra në Bashkimin Evropian.

“9 maji, Dita e Evropës, është dita kur mund të shikojmë pas për të parë çfarë është arritur dhe kur mund të ëndërrojmë për një të ardhme më të mirë…Nëse flasim për atë që kemi parë tashmë, atëherë do të doja të theksoja edhe një herë se Bashkimi Evropian ka qenë projekti më i suksesshëm i paqes në botë, veçanërisht duke pasur parasysh që lufta më e madhe botërore ka filluar nga kontinenti evropian. Dhe cili është arsyeja që nuk ka luftëra në Bashkimin Evropian? Është demokracia. Është e paimagjinueshme që vende me një nivel kaq të lartë të standardeve demokratike do të luftonin njëra-tjetrën. Por demokracia është shumë e brishtë dhe ne e shohim çdo ditë. Duhet të luftojmë për të. Dhe nëse demokracia është në rrezik, atëherë vendet demokratike duhet të ngrihen dhe të luftojnë për ato vlera”, tha Orav.

Shefi i Zyrës së BE-së në Kosovë, Aivo Orav tha se përmes sundimit të ligjit, luftës kundër korrupsionit, lirisë se medias e pavarësia e gjyqësorit mund të shihet kush është pranë BE-së.

“Sundimi i ligjit, qoftë lufta kundër korrupsionit, liria e medias, pavarësia e gjyqësorit apo trajtimi i të gjitha pakicave. Dhe politika e përbashkët e jashtme dhe e sigurisë — në këto ditë të vështira në botë dhe në Evropë — ne e shohim saktësisht kush është me ne dhe kush nuk është aq shumë me ne. Dy fjalë janë shumë të rëndësishme në vendimmarrjen e Bashkimit Evropian: dialogu dhe kompromisi. Kjo e bën vendimmarrjen ndonjëherë shumë kohëkërkuese dhe të vështirë. Por kur merret një vendim, atëherë të gjithë vendimmarrësit janë pjesë e këtij procesi dhe përgjegjës për vendimin. Prandaj shpresojmë shumë që partnerët tanë që duan t’i bashkohen Bashkimit Evropian do t’i marrin këto dy fjalë — dialogun dhe kompromisin — shumë seriozisht në praktikë”, potencoi Orav.

Orav citoi ish-presidentin e Kosovës Ibrahim Rugova ku kishte thënë se “Vizioni im është që vendi ynë të integrohet në Bashkimin Evropian, për të transferuar një pjesë të sovranitetit të tij te Bashkimi Evropian.

Shefi i Zyrës së BE-së tha se kjo është edhe detyrë e tyre dhe se ky është vizioni për të cilin po punon.

“Në përfundim, do të doja të citoja presidentin e ndjerë të Kosovës, Ibrahim Rugova. Vizioni im është që vendi ynë të integrohet në Bashkimin Evropian, për të transferuar një pjesë të sovranitetit të tij te Bashkimi Evropian. Është gjithashtu detyra jonë ta bëjmë këtë nëse duam të vendosim tregti dhe zhvillim të shëndoshë ekonomik. Ky është vizioni mbi të cilin po punoj dhe do të vazhdoj të punoj edhe në të ardhmen”, tha Orav.

Në nder të Ditës së Evropës, Zyra e Bashkimit Evropian ka organizuar edhe Festivalin Evropian të Filmit në Gjilan, me c’rast do të shfaqem disa filma të kinemasë evropiane, nga dje e deri më 8 maj.

Përveç kësaj, do të mbahen edhe aktivitete të tjera nesër dhe më 9 maj, kur zyrtarisht kremtohet Dita e Evropës. /kp