Tag: Ballina

Zëvendëskryeministri në detyrë, Besnik Bislimi, ka përfunduar intervistimin në Prokurorinë Speciale lidhur me hetimet për funksionalizimin e fabrikës për përpunimin e mbetjeve shtazore nga Ministria e Bujqësisë. Ai ishte ftuar në cilësinë e dëshmitarit.

Pas intervistimit, Bislimi ka reaguar në Facebook, duke kritikuar mënyrën e trajtimit nga Prokuroria. Ai tha se nuk u bë asnjë pyetje tipike për një dëshmitar dhe se informacionet e kërkuara mund të merreshin lehtësisht pa e ftuar fare në intervistë.

Ai shprehu shqetësim për praninë e mediave në hyrje të Prokurorisë dhe e cilësoi të gjithë procesin si përpjekje për të prodhuar lajm, duke përfshirë zyrtarë qeveritarë në narrativën e “skandaleve” publike.

Hetimet janë nisur disa javë më parë, pas deklaratave publike të ministrit në detyrë të Bujqësisë, Faton Peci, i cili kishte përmendur emrin e Bislimit si të përfshirë në kërkesat për funksionalizimin e fabrikës, pavarësisht kostos që do të kishte projekti. /atvlive.tv

Ministrja në detyrë e Ekonomisë, Artane Rizvanolli, në emisionin CONTEXT në ATV, deklaroi se kërkesat e bizneseve për shtyrjen e liberalizimit të tregut të energjisë janë të pabazuara, pasi ato nuk janë përgatitur as pas tetë vitesh. Ajo theksoi se një shtyrje e mundshme do të rriste tarifat për konsumatorët e rregullt.

Rizvanolli sqaroi se Ligji për liberalizimin e energjisë, i miratuar në vitin 2016, ka parashikuar hyrjen në fuqi të tij që nga viti 2016, por bizneset e mëdha janë furnizuar me tarifa të rregulluara për tetë vjet, pavarësisht ligjit.

“Sa i përket liberalizimit të tregut po du me cek edhe një herë, që ZRRE-ja në mars të këtij viti ka tregu që nga një qershori do ta fillojë zbatimin e ligjit që e parasheh liberalizimin që nga viti 2016, e që është në përputhje me direktivat evropiane dhe kërkesë e Bashkimit Evropian. Sipas këtij ligji veç familjet dhe bizneset e vogla kanë të drejtë me u furnizu me tarifa të rregullume. Përkundër kësaj, për tetë vjet, dy 2016 – 2025, edhe bizneset e mëdha janë furnizu me tarifa të rregullume, përkundër asaj që kemi pasur një ligj në fuqi që ka thënë që këto nuk kanë të drejtë me u furnizu”, tha Rizvanolli.

Sipas ministres, bizneset kanë kërkuar vazhdimisht shtyrje me arsyetimin se nuk janë gati, por asnjëherë nuk janë përgatitur. Një shtyrje tjetër do të rriste tarifat për të gjithë qytetarët dhe bizneset e vogla.

“Secilën herë kur është shty, kërkesa e bizneseve ka qenë e njëjtë, na jepni edhe pak kohë, sepse nuk jemi gati. Tregu nuk është gati, do të përgatitemi. Tash në momentin që po flasim, duhet me pasë të qartë që nëse një shtyrje e tillë kishte ndodhë… Në të kundërtën ishte dashtë që me u rritë tarifat për konsumatorë të tjerë. Për me qartësu pak… sipas ZRRE-së, rritja kish me qenë diku 21 për qind për të gjitha familjet edhe bizneset, nëse këto kompani nuk kishin dalë në treg, siç duhet, siç është dashtë me dalë para shtatë viteve, ta kemi të qartë”, u shpreh Rizvanolli.

Deklaratën e plotë të Artane Rizvanollit në CONTEXT, e gjeni në videon më poshtë:

Ministrja në detyrë e Ekonomisë, Artane Rizvanolli, në emisionin CONTEXT në ATV, foli për ndryshimet në koston e prodhimit të energjisë elektrike nga burime të ndryshme në Kosovë, duke theksuar se prodhimi me gaz është shumë më i kushtueshëm.

Ajo shpjegoi se rehabilitimi i dy termocentraleve ekzistuese me thëngjill, Kosova B dhe Kosova A, do të sjellë një rritje të moderuar të kostove të prodhimit nga KEK-u.

“Së pari, është rehabilitimi i Kosovës B që po ndodh aktualisht, dhe pritet të rrisë koston e prodhimit nga KEK-u për dy euro. Së dyti, është Kosova A, rehabilitimi i të cilës pritet të rrisë koston për 10 euro. Domethënë, nga 29 në 39,” tha Rizvanolli.

Ministrja nënvizoi se projekti i mëparshëm për prodhimin e energjisë me gaz, edhe në rastin më të mirë, do të kushtonte dy herë më shumë sesa prodhimi aktual me thëngjill, ndërsa gjatë periudhave krizash çmimet do të rriteshin deri në 20 herë më shumë.

“Prodhimi me gaz që është propozuar në të kaluarën, në rastin më të mirë të mundshëm, që sot nuk është aspak real, do të ishte dyfishi i këtyre dyjave; në rastin mesatar do të ishte trefishi; ndërsa gjatë krizës do të ishte gati dhjetëfish, dhe ka pasur momente gjatë krizës kur ka qenë njëzetfish më i lartë sesa çmimi i prodhimit prej thëngjillit,” u shpreh Rizvanolli.

Ajo shtoi se thëngjilli është një burim energjie që Kosova e kontrollon vetë, duke siguruar pavarësi nga çmimet dhe linjat ndërkombëtare, gjë që nuk vlen për gazin.

“Kjo t’ua shtojë faktin që thëngjillin e kemi tonin, e kontrollojmë vetë dhe nuk jemi të varur as prej linjave ndërkombëtare, as prej çmimeve në tregjet ndërkombëtare,” tha ministrja.

Deklaratën e plotë të Artane Rizvanollit në CONTEXT e gjeni në videon më poshtë:

Ministrja në detyrë e Ekonomisë, Artane Rizvanolli, në emisionin CONTEXT në ATV, ka mohuar se një anëtar i Bordit të Zyrës së Rregullatorit të Energjisë (ZRRE) është nipi i zëvendëskryeministrit Besnik Bislimi, siç është spekuluar.

Rizvanolli sqaroi se anëtari i bordit, ka kërkuar një demantim dhe ka paralajmëruar padi ndaj mediave që kanë përhapur këtë informacion.

“Nuk është Nipi i Besnik Bislimit. Ka kërku Gëzimi që është anëtar i Bordit prej dhjetorit, ka kërku me demantu, nuk du me komentu nivel të tillë të spekulimit nën petkun e gazetarisë. Meqë përmende Gëzimin që i referohen shpesh si nipi i zëvendëskryeministrit, ai ka kërku një demant dhe ka bo paralajmërim për padi ndaj njërit prej mediumeve ose më shumë që e kanë thënë këtë”, tha Rizvanolli.

Ajo shtoi se sipas Ligjit për familjen në Kosovë, anëtari i bordit i bie të jetë “kushëri i rendit të gjashtë” me Bislimin, duke theksuar se nuk ka lidhje të ngushtë familjare.

“Sipas Ligjit për familjen në Kosovë, i bie kushëri rendit të gjashtë të linjës anësore, në mos gabofsha ishte ai definicioni, po si do që të jetë nuk është nip, ndërsa për këtë tjetrin që po thua me Hekuranin që ka ndonjë lidhje, kjo është hera e parë që po e ndëgjoj, për këtë nuk e pasna ditë çka po flitet, prandaj nuk kam arritë me pyet ministrin, mirëpo besoj që sikur të kish qenë e vërtetë e kisha ditë”, u shpreh Rizvanolli.

Deklaratën e plotë të Artane Rizvanollit në CONTEXT, e gjeni në videon më poshtë:

Presidentja e Kosovës Vjosa Osmani, po e zhvillon një vizitë zyrtare në Hungari.

Ajo në Budapest u prit nga homologu i saj Tamas Sulyok.Shefja e shtetit të Kosovës, atje u prit me nderimet ushtarake.Osmani këtë vizitë e cilësoi në dobi të qytetarëve dhe në funksion të bashkëpunimit të ndërsjellë.

“Faleminderit për pritjen me nderime ushtarake në Budapest, President Sulyok! Një vizitë e rëndësishme për avancimin e marrëdhënieve ndërmjet Kosovës dhe Hungarisë, në dobi të qytetarëve tanë dhe në funksion të bashkëpunimit të ndërsjellë”, deklaroi ajo.

Këshilli Kombëtar i Pagesave, i organizuar nga Banka Qendrore e Kosovës, mbajti takimin e parë për vitin 2025.

Guvernatori Ahmet Ismaili tha se përgatitjet për anëtarësim në Zonën SEPA janë ndër prioritetet kryesore të BQK-së, duke theksuar se kjo do të sjellë mbi 55 milionë euro përfitime vjetore për qytetarët dhe bizneset.

Ai njoftoi se po ndërtohet infrastrukturë moderne për pagesa të menjëhershme dhe qasje në platforma si Apple Pay dhe PayPal.

Ndërsa, ministri në detyrë i Financave, Hekuran Murati, theksoi se digjitalizimi i pagesave jo vetëm që ul kostot për përdoruesit, por ndihmon edhe në luftimin e ekonomisë informale. /atvlive.tv

Për të 33-ën herë ka dështuar tentativa për konstituimin e legjislaturës së re të Kuvendit të Kosovës.
Edhe në seancën e sotme nuk pati kuorum për formimin e komisionit për votim të fshehtë për zgjedhjen e kryeparlamentarit.
Kryesuesi i seancës, Avni Dehari, ftoi subjektet politike të propozojnë anëtarë për komisionin, por PDK, LDK, AAK dhe Lista Serbe sërish refuzuan të marrin pjesë në proces, duke kundërshtuar qasjen e Vetëvendosjes dhe kandidaturën e Albulena Haxhiut.
Seanca u ndërpre pa ndonjë zhvillim të ri, ndërsa tentimi i radhës është caktuar për të enjten, më 19 qershor.
Ndërkohë, Presidentja Vjosa Osmani pritet të kërkojë sqarime ligjore nga Gjykata Kushtetuese për tejkalimin e këtij ngërçi politik.

Tensionet e fundit mes Izraelit dhe Iranit kanë shkaktuar lëkundje të ndjeshme në tregjet ndërkombëtare të naftës, duke ndikuar drejtpërdrejt në rritjen e çmimeve. Sipas Fadil Berjanit, kryetarit të Shoqatës së Naftëtarëve të Kosovës, përshkallëzimi i situatës në Lindjen e Mesme po ngjall frikë për ndërprerje të furnizimit global me naftë.

“Irani është ndër prodhuesit kryesorë të naftës në botë dhe kontrollon ngushticën strategjike të Hormuzit, nëpër të cilën kalon rreth 20% e naftës botërore. Çdo përshkallëzim i mëtejmë i këtij konflikti do të sjellë rritje të mëtejshme të çmimeve të naftës në tregjet globale”, deklaroi Berjani.

Në të njëjtën kohë, ai tha se një marrëveshje paqeje e mundshme, e ndërmjetësuar nga Shtetet e Bashkuara të Amerikës, mund të qetësojë tregjet dhe të stabilizojë çmimet.
Edhe Kosova, e cila varet nga importi i naftës, nuk ka mbetur pa u ndikuar. Çmimet aktuale në tregun vendas janë: Diesel: 1.14 euro – 1.24 euro për litër, Benzinë: 1.15 euro – 1.25 euro për litër.

Dhomat e Specializuara të Kosovës (DhSK) në Hagë, kanë marrë vendim për vazhdimin e paraburgimit edhe për dy muaj tjerë ndaj ish presidentit të Kosovës, Hashim Thaçi.

Vendimi është marrë më 11 qershor 2025 nga kryetari i trupit gjykues, Charles Smith III, raporton “Betimi për Drejtësi”.

Prokuroria kishte pretenduar se Thaçi vazhdon të paraqesë rrezik për arratisje pasi ai është në dijeni për akuzat serioze të konfirmuara ndaj tij. Po ashtu, ata e mbështesin këtë argument me faktin çështja e Prokurorisë ka përfunduar dhe tashmë Thaçi ka njohuri të plotë edhe për provat që janë kundër tij.

Prokuroria kishte pretenduar gjithashtu se së shpejti Thaçi do të ketë informacione të ndjeshme në lidhje me dëshmitarët dhe provat që do t’i paraqesë mbrojtja e viktimave. Veç kësaj, fakti që Thaçi ka aktakuzë për pengim të procedurave, sipas Prokurorisë, e rritë motivin e tij që ai të arratiset.

Ndërsa, mbrojtja e Thaçit e përfaqësuar nga avokati Luka Mishetiq ka thënë se as gjykatësi i procedurës paraprake dhe as trupi gjykues nuk kanë konstatuar ndonjëherë se ka rrezik që Thaçi të arratiset nga drejtësia.

Ndërsa, lidhur me këtë aspekt, trupi gjykues ka thënë se Prokuroria vazhdimisht po përsëritë argumente që janë shqyrtuar dhe refuzuar më parë.

Kurse sa i përket argumentit të ri të Prokurorisë, që Thaçi do të ketë informacion të ndjeshëm për dëshmitarët e mbrojtjes së viktimave, trupi gjykues theksoi se nuk është argument bindës për të mbështetur pretendimet që Thaçi ka rrezik të arratiset.

Sipas trupit gjykues, ky argument mund të ishte më i përshtatshëm të shqyrtohet tek pjesa e pengimit të procedurave.

Si rrjedhojë, trupi gjykues ka thënë se nuk ka informacione të mjaftueshme që Thaçi mund të ikë nga drejtësia në këtë fazë të procedurës.

Tek pika e pengimit të procedurave, Prokuroria kishte thënë se Thaçi paraqet një rrezik të tillë duke u bazuar në klimën e përgjithshme të ndërhyrjes ndaj dëshmitarëve në Kosovë.

Veç kësaj, Prokuroria ka theksuar se përfundimi i çështjes së tyre e rrit rrezikun për pengim pasi që i akuzuari ka njohuri të plotë mbi çështjen dhe dëshmitarët mund t’i ekspozohen rreziqeve.

“ZPS thekson gjithashtu se informacioni i ndjeshëm i është zbuluar mbrojtjes, përfshirë të akuzuarin, duke rritur rrezikun e ekspozimit ndaj publikut dhe duke dëmtuar mbrojtjen e dëshmitarëve në rast lirimi”, thuhet në vendim.

Mbrojtja e kishte kundërshtuar argumentin e mbrojtjes, duke pretenduar se rreziku i pengimit të procedurave duhet të ulet me kalimin e kohës dhe me përfundimin e çështjes së Prokurorisë.

Po ashtu, mbrojtja ka argumentuar se dëshmitarët që pret t’i thërrasë mbrojtësi i viktimave janë ekspertë ndërkombëtarë dhe jo dëshmitarë të ndjeshëm, prandaj nuk ka asnjë rrezik për ndërhyrje.

Trupi gjykues ka thënë se duke u mbështetur edhe në faktin që janë konfirmuar akuzat që Thaçi ka tentuar që të pengojë drejtësinë, lirimi i tij nuk do të ishte në përputhje me mbrojtjen efektive të dëshmitarëve.

Si rrjedhojë, u konkludua që Thaçi përbën rrezik që të pengojë vazhdimin e procedurave të DhSK-së.

Prokuroria kishte parashtruar se Thaçi vazhdon të paraqesë rrezik për kryejnë e krimeve të tjera duke përfshirë ato ndaj dëshmitarëve që kanë dhënë ose mund të japin dëshmi në fazat e mëvonshme në këtë çështje.

Trupi gjykues ka rikujtuar gjetjet e tij të mëparshme, se rreziku që Thaçi mund të kryejë krime të tjera vazhdon të ekzistojë.

“Trupi fjykues thekson faktin se gjykimi në këtë çështje është në vazhdim, se identitetet e dëshmitarëve të ndjeshëm janë zbuluar për z. Thaçi, dhe se çdo rrezik për kryerjen e mëtejshme të krimeve duhet të shmanget”, thuhet në vendim.

Trupi gjykues është i mendimit që asnjë masë alternative duke përfshirë edhe lirimin me kusht, nuk i zbusin mjaftueshëm rreziqet ekzistuese të këtij procesi. Si rrjedhojë, u urdhërua që t’i vazhdohet paraburgimi Thaçit edhe për dy muaj të tjerë.

Ndërkohë, më 15 prill 2025, Prokuroria ka njoftuar se ka përfunduar paraqitjen e provave në këtë rast.

Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.

Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

Aktakuza ndaj Hashim Thaçit, Kadri Veselit, Rexhep Selimitdhe Jakup Krasniqit është konfirmuar më 26 tetor 2020.

Normalizimi i marrëdhënieve me Serbinë është i mundur dhe për t’u arritur kjo, duhet që t’i bëhet trysni Beogradit që të zbatojë Marrëveshjen për rrugën drejt normalizimit të raporteve, të arritur më 2023. Kështu ka deklaruar Kryeministri në detyrë, Albin Kurti, pas një deklarate të bërë një ditë më parë nga presidenti amerikan, Donald Trump, lidhur me raportet mes Prishtinës dhe Beogradit.

Kurti përsëriti qëndrimin se Kosova dhe Serbia veçse e kanë arritur një marrëveshje për normalizim, që tha se po shkelet nga Beogradi, teksa përsëriti kërkesat e Kosovës për këtë proces.

“Për të normalizuar marrëdhëniet midis dy vendeve tona është e domosdoshme që ata pikë së pari t’ua dorëzojnë autoriteteve të shtetit tonë Millan Radoiçiqin, kriminelin i cili na e vrau rreshterin policor, heroin e Kosovës, Afrim Bunjaku. Më pas, të pranojnë ta nënshkruajnë Marrëveshjen bazike me Aneksin e zbatimit. Njëkohësisht, ta tërheqin edhe atë letrën nga dhjetori i vitit 2023, kur ish-kryeministrja serbe, Ana Bërnabiq, ka thënë që nuk e respekton integritetin territorial të Kosovës”, ka thënë Kurti për REL.

Të dielën, Presidenti amerikan Donald Trump, shkroi në rrjetin Truth Social se gjatë mandatit të tij të parë presidencial, Kosova dhe Serbia ishin “duke shkuar drejt një përplasje të ashpër” dhe ishte gati shpërthimi i një lufte, por shtoi se ai e ndaloi atë, duke e akuzuar pasardhësin e tij, ish-presidentin Joe Biden, se e “ka dëmtuar perspektivën afatgjatë me disa vendime shumë të pakuptimta, por unë do ta rregulloj, sërish”.

Gjatë mandatit të parë të Trumpit, më 2020, Kosova dhe Serbia arritën në Shtëpinë e Bardhë një marrëveshje për normalizim ekonomik. Kjo marrëveshje, që përfshiu edhe njohjen e pavarësisë së Kosovës nga Izraeli, nuk është zbatuar plotësisht.