Tag: Ballina

Misioni i OSBE-së në Kosovë ka shprehur shqetësim të madh për ndikimin në njerëz mbyllja e fundit e zyrave të shërbimeve në Mitrovicën e Veriut, nga të cilat, ky mision thotë se varen komunitetet jo-shumicë.

OSBE-ja ka theksuar se ndërprerjet e këtyre shërbimeve prekin në mënyrë të veçantë të moshuarit, personat me aftësi të kufizuara dhe familjet me mundësi të kufizuara, të cilat OSBE thotë se varen nga këto zyra për shëndetësi, pagesa pensionale, materiale shkollore dhe mbështetje sociale.

“Çdo masë që ndikon në shërbimet publike duhet të sigurojë qasje të pandërprerë për të gjitha komunitetet, ndërsa mosmarrëveshjet adresohen përmes Dialogut të ndërmjetësuar nga BE-ja dhe me konsultim domethënës lokal”, thuhet në reagim e OSBE-së

OSBE thekson se do të vazhdojë ta monitorojë nga afër situatën në kuadër të mandatit të saj për paralajmërim të hershëm dhe mbështetje të komuniteteve gjithëpërfshirëse e të qëndrueshme.

Gati tri dekada pas luftës në Kosovë, James Rubin do të rikthehet për të dëshmuar mbi ngjarjet e asaj kohe, që vendosën kursin e një pjese të historisë.

Ish-ndihmësi i sekretarit amerikan të Shtetit do të dëshmojë para Dhomave të Specializuara në Hagë, në mbrojtje të ish-eprorëve të Ushtrisë Çlirimtare të Kosovës: Hashim Thaçi, Kadri Veseli, Jakup Krasniqi dhe Rexhep Selimi – që të gjithë të akuzuar për krime lufte dhe krime kundër njerëzimit.

“UÇK-ja luajti rol vendimtar në marrëveshjet që u nënshkruan nga krerët e saj dhe në çmilitarizimin e premtuar prej tyre”, tha Rubin në një intervistë dhënë Radios Evropa e Lirë më 11 prill të vitit 2023.

Më shumë se dy vjet më vonë, ai tha se do të kthehet “sërish në fillim”, duke shtuar se ka më shumë për të thënë mbi ngjarjet e asaj kohe.

Mbrojtja e të akuzuarve i tha Radios Evropa e Lirë se lista e atyre që do të dëshmojnë në anën e tyre, nisur nga 15 shtatori, është konfidenciale.

Në media, megjithatë, qarkulluan disa emra – në mesin e tyre: Wesley Clark, William Walker, Bernard Kouchner e të tjerë.

Të njëjtit u përmendën edhe në një listë që zbuloi mbrojtja në vitin 2022.

Gjenerali i pensionuar amerikan, Clark, udhëhoqi fushatën ajrore të NATO-s kundër caqeve ushtarake serbe më 1999.

Duke folur për Radion Evropa e Lirë disa vite më vonë, ai tha se NATO-ja bëri gjënë e duhur kur ndërhyri.

“… veprimi u ndërmor, sepse po shihnim fillimin e një përsëritjeje të pastrimit etnik në Ballkan. Kjo ishte arsyeja që shtyu NATO-n të vepronte. Nuk ishte thjesht një veprim humanitar, por një veprim për të parandaluar një katastrofë humanitare, që po zhvillohej para syve tanë”, tha ish-komandanti suprem i Forcave Aleate të NATO-s.

William Walker, në kohën e luftës, ishte shef i Misionit Verifikues të OSBE-së, që nisi në tetor të vitit 1998, për të mbikëqyrur një armëpushim midis forcave serbe dhe UÇK-së.

Rreth tre muaj më vonë, në janar të vitit 1999, Walker ishte në vendin ku u vranë 44 civilë shqiptarë nga forcat serbe, në fshatin Reçak.

Ai e përshkroi ngjarjen si “krim kundër njerëzimit”, duke nxitur atëkohë një ndryshim të politikës perëndimore kundër Kosovës.

“Ata që e mohojnë masakrën, janë të përfshirë në të”, tha Walker për Radion Evropa e Lirë në dhjetor të vitit 2021.

Si përfaqësues i posaçëm i Kombeve të Bashkuara, Bernard Kouchner, shërbeu në Kosovë nga viti 1999 deri më 2001.

Duke folur për gazetarët disa vite më vonë, ai tha se “nuk ka dëgjuar kurrë për shtëpinë e verdhë”.

E ashtuquajtura “shtëpi e verdhë” përmendet në një raport të vitit 2010 për Këshillin e Evropës, i cili u hartua nga ish-senatori zviceran, Dick Marty.

Në atë dokument, termi “shtëpia e verdhë” përdoret për të përshkruar një vendndodhje në veri të Shqipërisë, ku dyshohet se ish-pjesëtarët e UÇK-së kanë kryer krime të rënda, “përfshirë trafikim të organeve njerëzore”.

Raporti i Martyt i parapriu krijimit të Dhomave të Specializuara – të njohura edhe si Gjykata Speciale – në vitin 2015.

Gjykata është pjesë e sistemit gjyqësor të Kosovës, por ka në përbërje gjyqtarë dhe prokurorë ndërkombëtarë.

Selia e saj u vendos në Hagë për të shmangur kërcënimin e dëshmitarëve.

Gjykimi i katër ish-eprorëve të UÇK-së nisi në vitin 2023.

Thaçi ishte udhëheqës politik i UÇK-së para dhe gjatë luftës së viteve 1998-99, Veseli ishte udhëheqës i shërbimit të inteligjencës së UÇK-së, Krasniqi ishte zëdhënës, ndërsa Selimi në mesin e shtabit të përgjithshëm.

Aktakuza kundër tyre përfshin akuza për burgosje të paligjshme, torturë, vrasje, krime kundër njerëzimit, zhdukje me forcë dhe persekutim të qindra civilëve dhe njerëzve që nuk donin të merrnin pjesë në luftime.

Këto krime dyshohet se ndodhën midis marsit 1998 dhe shtatorit 1999 në vende të ndryshme në Kosovë, por edhe në veri të Shqipërisë.

Sipas Dhomave të Specializuara, Thaçi, Veseli, Krasniqi dhe Selimi mbajnë përgjegjësi penale personale për këto krime, por të gjithë ata kanë mohuar se janë fajtorë.

Avokatët mbrojtës kanë thënë se UÇK-ja nuk do të kishte fituar kurrë mbështetjen e bashkësisë ndërkombëtare, nëse do të ekzistonte një plan kriminal i përmasave që pretendojnë prokurorët.

Sipas tyre, aktakuza është ndërtuar mbi një keqinterpretim selektiv të ngjarjeve.

Akuzat për trafikim organesh nuk janë vërtetuar dhe nuk janë përfshirë në aktakuzën aktuale.

Organizata e Veteranëve të Luftës njoftoi se më 14 shtator do të mbahet një protestë në Hagë, në mbështetje të të akuzuarve./REL/

Shpërthime të fuqishme janë dëgjuar në Rripin e Gazës të shtunën, ku ushtria izraelite ka intensifikuar sulmet për të marrë kontrollin e plotë të qytetit më të madh palestinez. Tel Avivi e cilëson këtë zonë si bastionin e fundit të Hamasit dhe ka urdhëruar largimin e mijëra banorëve.

Në fokus të sulmeve janë vënë ndërtesat shumëkatëshe, me arsyetimin e ushtrisë se ato shfrytëzoheshin nga Hamasi për infrastrukturë vëzhgimi. Shkatërrimi i tyre konsiderohet pjesë e strategjisë për të pastruar terrenin, pavarësisht pranisë së dendur të popullsisë civile në zonat përreth.

Ndërkohë, situata humanitare në terren vazhdon të mbetet kritike. Qindra mijëra palestinezë vazhdojnë të jenë të bllokuar, duke u përballur me uri të skajshme. Sipas agjencive të ndihmës, numri i personave që po largohen nga Gaza është rritur ndjeshëm pas përshkallëzimit të fundit të luftimeve.

Shqipëria do të hapë katër kapituj të tjerë të negociatave për anëtarësim në Bashkimin Evropian.

Kryeministri Edi Rama njoftoi se Presidenca daneze e Bashkimit Evropian e ka ftuar Tiranën zyrtare më 16 shtator, për të konkretizuar këtë hap të rëndësishëm në procesin e integrimeve.

Kryeministri Rama e cilësoi këtë zhvillim si një rekord absolut për shpejtësinë e këtij procesi.

Me formalizimin e katër kapitujve të rinj, numri total i kapitujve të hapur nga Shqipëria në vetëm 11 muajt e fundit arrin në 28, duke përshpejtuar ndjeshëm rrugëtimin e vendit drejt anëtarësimit në Bashkimin Evropian.

Sipas kreut të qeverisë, ky është një tjetër gur kilometrik në rrugën e Shqipërisë drejt anëtarësimit të plotë në Bashkimin Evropian, me objektivin e vendosur për vitin 2030.

Viti i ri shkollor filloi si çdo vit me një shtator në të gjitha shkollat e Kosovës. Por jo të gjithë nxënësit u kthyen në bankat e shkollës. Shkollave të Kosovës i munguan hiq më pak se 629 nxënës. Ata nuk i braktisën vetëm bankat shkollore, por dhe Kosovën.

Sipas të dhënave të Ministrisë së Arsimit Shkencës dhe Teknologjisë 629 nxënës,  kanë  braktisur shkollat dha ja larguar nga Kosova gjatë vitit shkollor 2024/25.

Sipas të dhënave zyrtare, nga ky numër  i nxënësve të larguar 350 janë djem, ndërsa 279 vajza.Fenomeni i largimit të nxënësve nuk është shpërndarë njëtrajtësisht në të gjitha komunat. Komunat me numrin më të madh të fëmijëve që kanë ndërprerë shkollimin janë Gjakova me 89 nxënës, Malisheva me 84, Gjilani me 74, Prizreni me 66 dhe  Suhareka me 61./ATVLIVE/

Gjatë orës së pikut të trafikut, një makinë u ngrit plotësisht në ajër mbi një autostradë të ngarkuar në Nju Jork, duke fluturuar mbi gjashtë korsi trafiku dhe gjithçka u kap në kamera.

Një shofer 70-vjeçar papritmas shpejtoi dhe u hodh nga një kodër në Long Island rreth orës 5 pasdite të mërkurën, më 3 shtator. Banorët u habitën nga pamjet e kamerës së makinës me tym të kapura nga dëshmitari Joseph McGrath.

“Një makinë doli nga askund dhe u hodh mbi autostradë para meje”, tha McGrath për Storyful.

Një dëshmitar tjetër në Sunrise Highway, Brandon Hyacinthe, e përshkroi incidentin tronditës për News12 New York.

“Duket si një meteor që kalon nëpër autostradë. Në fillim nuk e dija që ishte një makinë”, tha Hyancinthe për limuzinën Honda.

Para se të kalonte pranë makinave në të dyja anët e rrugës, shoferi po shkonte drejt jugut në Pine Acres Boulevard.

“Ai pati një krizë shëndetësore, që bëri që të humbiste kontrollin dhe të fluturonte lart në argjinaturë në rrugën e shërbimit, mbi të dyja korsitë, atë perëndimore dhe lindore”, tha për New York Post, Dennison DeNatalie i departamentit të zjarrfikësve të Bay Shore.

Mrekullisht, automjeti fluturues u përplas me një pemë, në anën e trafikut që vinte përballë. Shoferi arriti të ngrihej dhe të dilte nga makina dhe, për fat të mirë, pësoi vetëm lëndime të lehta.

Charles Kupchan, nga Këshilli për Marrëdhënie me Jashtë në Uashington, thotë se vendimi i Shteteve të Bashkuara për të pezulluar Dialogun Strategjik me Kosovën, është një rezultat i drejtpërdrejtë i frustrimit të grumbulluar ndaj veprimeve të kryeministrit në detyrë, Albin Kurti.

Ai shton se ky veprim synon të ushtrojë presion mbi udhëheqësit e Kosovës – veçanërisht mbi Kurtin – që të veprojnë në mënyrë konstruktive, të formojnë një qeveri dhe të riangazhohen në dialogun me Serbinë.

“Kjo është një çështje serioze, sepse rajoni ka nevojë për më shumë angazhim nga SHBA-ja, jo për më pak. Dialogu mes Kosovës dhe Serbisë, për një kohë të gjatë, nuk ka avancuar. Me ndryshimin e administratës në Uashington, kishte shpresë se presidenti [Donald] Trump – ashtu si gjatë mandatit të tij të parë – do të mund të riangazhohej në Dialogun Strategjik me Kosovën, në përpjekje për të ndërmjetësuar normalizimin e marrëdhënieve mes Kosovës dhe Serbisë.

Dhe, tani, kemi një njoftim nga Ambasada [amerikane] në Prishtinë, që në thelb thotë: po tërhiqemi, po e pezullojmë Dialogun Strategjik.

Në shumë aspekte, kjo është një shenjë pakënaqësie ndaj Qeverisë në Kosovë, e cila praktikisht ka qenë në detyrë që nga zgjedhjet në fillim të këtij viti.

Por, po ashtu, është rezultat i një frustrimi të grumbulluar: janë dashur disa muaj për të zgjedhur kryetarin e Kuvendit të Kosovës, tani Kurti fyen Gjykatën Kushtetuese. Para zgjedhjeve, Kurti ka marrë vendime për një gamë të gjerë çështjesh – nisur nga ndalimi i dinarit serb deri tek instalimi i kryetarëve shqiptarë në veri apo mosçuarja përpara e Asociacionit të komunave me shumicë serbe.

Ka një perceptim të gjerë këtu në Uashington dhe në Evropë se Qeveria në Kosovë nuk po ndihmon në përmirësimin e situatës. Ndaj, mendoj se pezullimi i Dialogut Strategjik është një shenjë pakënaqësie dhe frustrimi”, thotë Kupchan për Radion Evropa e Lirë.

Kupchan thekson gjithashtu rëndësinë e kompromisit dhe të negociatave me mirëbesim midis të gjitha partive politike në Kosovë, për të rivendosur stabilitetin dhe për të ecur përpara.

“… kjo tregon se Uashingtoni po i ndjek ngjarjet dhe do të bëjë atë që gjykon se është e nevojshme, për të parandaluar paqëndrueshmërinë përpara se të ndodhë”, thotë Kupchan.

Përparim Kryeziu, zëdhënësi i Qeverisë Kurti në detyrë ka reaguar pas vendimit të Shteteve të Bashkuara të Amerikës për të pezulluar dialogun strategjik ndërmjet Kosovës dhe Serbisë. Në një postim në Facebook, Kryeziu ka theksuar se marrëdhëniet me SHBA-në mbeten të qëndrueshme dhe se Kosova është partneri më serioz i saj për stabilitet dhe paqe në rajon.

Ndër tjera, ai ka thënë se qeveria ka përmbushur mandatin e plotë për herë të parë që nga shpallja e pavarësisë, duke kontribuar në stabilitet institucional dhe zhvillim socio-ekonomik, përkundër sfidave globale si pandemia, kriza energjetike dhe lufta në Ukrainë.

Ai shtoi se veprimet e ekzekutivit kanë qenë gjithmonë të ligjshme dhe kushtetuese, duke synuar eliminimin e vatrave të destabilitetit dhe forcimin e sundimit të ligjit, veçanërisht në veri.

Zëdhënësi kritikoi gjithashtu vonesat e Gjykatës Kushtetuese, që sipas tij, kanë bllokuar reformat e nevojshme, duke theksuar nevojën për përshpejtimin e vendimeve ligjore.

Në fund, Qeveria e Kosovës në dorëheqje shprehu mirënjohjen për mbështetjen e SHBA dhe konfirmoi angazhimin e vazhdueshëm për stabilitetin dhe paqen në rajon.

POSTIMI I PLOTË:

LEXONI EDHE:

SHBA-ja pezullon dialogun strategjik me Kosovën

Shtetet e Bashkuara të Amerikës kanë pezulluar për një kohë të pacaktuar dialogun strategjik me Kosovën. Lajmi u bë i ditur përmes një deklarate nga Ambasada amerikane në Prishtinë, e cila thekson se vendimi vjen si pasojë e veprimeve të Qeverisë në detyrë.

Në deklaratë thuhet se veprimet dhe deklaratat e kryeministrit në detyrë, Albin Kurti, kanë rritur tensionet dhe kanë paraqitur sfida për progresin e arritur ndër vite. Sipas ambasadës amerikane, kjo e ka vështirësuar bashkëpunimin në prioritetet e përbashkëta mes dy vendeve.

Dialogu strategjik ishte planifikuar për të forcuar lidhjet ekonomike dhe diplomatike mes dy shteteve. Ambasada thekson se SHBA-ja shpreson ta rikthejë këtë proces në të ardhmen, kur të krijohen kushtet e përshtatshme për bashkëpunim konstruktiv.