Tag: Ballina

James Rubin, ish-ndihmësi i sekretarit amerikan të Shtetit, vazhdon edhe sot dëshminë e tij në Gjykatën Speciale në Hagë.

Dje, ai e nisi dëshminë me përshtypjen fillestare të Shteteve të Bashkuara për Ushtrinë Çlirimtare të Kosovës më 1999, duke thënë ato kishin përshtypje më ndryshe.

Rubin tregoi se si fillimisht e përshkruanim atë si organizatë me aktivitete terroriste, duke shtuar se “ne, natyrisht, me gjithë dëshirën që kishim të ishim në anën e engjëjve, nuk donim të mbështesnim njerëz që zhvillonin aktivitete terroriste”.

“Ky qëndrim ndryshoi, sidomos pasi UÇK-ja u pajtua me Marrëveshjen e Rambujesë”, u shpreh ai.

Rubin gjithashtu theksoi se organet e Organizatës së Kombeve të Bashkuara (OKB) shpesh nuk e përshkruanin mirë situatën në Kosovë.

I pyetur nëse ishte në dijeni për një raport të vitit 1998 të OKB-së, ku flitej për gjoja rrëmbimin e civilëve serbë, shqiptarë dhe romë, dhe të oficerëve të policisë serbe, nga njerëz që besohej se i përkisnin UÇK-së, Rubin tha se hezitoi t’i besonte raportit.

“Kam lexuar një raport të OKB-së për Kosovën, por kam qenë shumë skeptik për atë raport, sepse, organet e OKB-së nuk e kanë përshkruar shumë mirë situatën shumë shpesh”, ka thënë ai.

Në lidhje me autorin e shkrimit për vrasjen e rivalëve të Thaçit…

Rubin u pyet për një artikull të gazetës The New York Times, të datës 25 qershor 1999, ku thuhej se komandantët e lartë të UÇK-së kanë kryer vrasje brenda radhëve të tyre.

Akuzat për vrasje ishin bërë nga pjesëtarë të UÇK-së tek diplomatë amerikanë, të cilët gjoja thanë se kishin parë me sytë e tyre vrasjen e rivalëve të Thaçit.

Rubin tha se nuk i kujtohet ky artikull, por shtoi se ka dyshime për autorin e tij, Chris Hedges.

Ish-diplomati amerikan kishte kritika për Gjykatën Speciale.

Ai e quajti të padrejtë mbajtjen për pesë vjet në paraburgim të të akuzuarve, të cilët, sipas tij, u dorëzuan vullnetarisht.

“Janë dorëzuar vullnetarisht dhe kanë bashkëpunuar me Prokurorinë, s’e kuptoj pse kanë qëndruar kaq gjatë në burg, kjo më shqetëson”, tha Rubin.

Ai gjithashtu dëshmoi se nuk kishte kontroll dhe komandë efektive në UÇK dhe se si SHBA-ja e konsideronte Thaçin si udhëheqës të caktuar nga vetë shqiptarët.

Rubin më pas zbuloi një bisedë telefonike mes Hashim Thaçit dhe presidentit të atëhershëm amerikan, Bill Clinton, në qershor 1999, dhe se si Thaçi ishte zotuar se do t’i respektonte pakicat ndonëse populli i tij ishte keqtrajtuar për vite të tera.

“Unë kam dëgjuar nga Sandy Berger, këshilltari për siguri i presidentit Clinton, sepse unë nuk kam folur drejtpërdrejt me presidentin. Ai i kishte thënë presidentit Clinton se, pavarësisht dhunës që kishin pësuar, nuk do të kundërpërgjigjeshin”, tha Rubin.

Gjithashtu, sipas Rubinit, ishte “e qartë” se Thaçi kishte “eprorë diku nga të cilët duhej të merrte miratimin”.

Përgatiti: Arian Hajdaraj

Para disa minutave, James Rubin, ish-ndihmëssekretar i Departamentit të Shtetit në SHBA, përfundoi dëshminë e tij në Gjykatën Speciale.

Në ditën e dytë, Rubin u mor në pyetje vetëm nga Prokuroria, për afro katër orë.

Prokurorit i kishte mbetur në mendje deklarimi i Rubinit për vendosjen në krah të shqiptarëve, të cilët ishin viktima. Për këtë arsye, sot i parashtroi pyetje
shtesë, të cilave dëshmitari iu përgjigj shpejt.

“Fillimisht e përshkruam UÇK-në si organizatë që zhvillonte aktivitete terroriste. Ky qëndrim më pas ndryshoi me kalimin e kohës, veçanërisht pasi UÇK u pajtua me Marrëveshjen e Rambujesë. Atëherë e konsideruam se ata ishin në anën e engjëjve, sepse nënshkruan marrëveshjen e paqes”, tha Rubin.

Më tej, Prokurorit i interesoi të kuptonte qëndrimin e Rubinit lidhur me vetë Prokurorinë Speciale, pasi ai kishte refuzuar të intervistohej nga ajo.

Në këtë çështje, amerikani dha një qëndrim të qartë dhe të prerë, duke e cilësuar procesin të padrejtë.

“Fakti që të akuzuarit kanë qenë në paraburgim këtu në Hagë për më shumë se pesë vite, dhe fakti që ata janë dorëzuar vullnetarisht, si dhe fakti që janë mbajtur kaq gjatë, më shqetëson. Mendoj që kjo lidhet me politikën dhe me shtetin e së drejtës. Më shqetëson fakti që dikush të mbahet i burgosur për pesë vite para se të fillojë një proces gjyqësor, ndërkohë që këta persona janë dorëzuar vullnetarisht dhe kanë bashkëpunuar me gjykatën”, tha Rubin.

Megjithatë, për dëshminë e tij, James Rubin kishte qenë i përgatitur për një proces të gjatë.

“U përgatita për më shumë se 100 orë për këtë dëshmi. Ndërkohë, u konsultova me juristë. Më thanë se të mbash një burrë shteti në këtë mënyrë është e padrejtë”, tha Rubin.

Në vijim, 65-vjeçari u pyet nga prokurori për një raport ku thuhej se rreth 200 persona ishin ndaluar nga UÇK-ja, disa prej të cilëve edhe ishin vrarë. Por përgjigjja e tij ishte e prerë.

“Raportet e asaj kohe shpeshherë ishin të pavërteta. Qarkullonin shumë lajme të rreme. Por ne nuk kemi pasur dëshmi për këtë”, tha Rubin.

Kah fundi, prokurori e përmendi një fotografi të Rubinit së bashku me Artan Behramin, një të afërm të ish-presidentit.

Në përgjigje, Rubin shtoi edhe një dozë humori.

“Sa i takon zotit Behrami, nuk më kujtohet. Shqiptarët e Kosovës më kërkojnë shpesh që të bëjmë fotografi dhe unë mundohem të jem miqësor. I kërkoj ndjesë atij, por nuk më kujtohet. Meqë ra fjala, postimi më pëlqen, aty ku falënderohet Rubin dhe presidenti i SHBA-së për lirinë”, shtoi Rubin.

Më shumë detaje i gjeni në Edicionin Qendror të lajmeve në ATV, në videon më poshtë:

Përgatiti: Driton Sadiku

Në një vizitë zyrtare në Prishtinë, ministrja e Jashtme e Finlandës njëherit kryesuese e OSBE-së, Elina Valtonen, foli rreth rëndësisë së tejkalimit të krizës institucionale në Kosovë.

Pas takimit me presidenten Vjosa Osmani, Valtonen thotë se pret funksionalizimin e punës në institucione në përputhje me Kushtetutën.

“Shënuam një arritje shumë të rëndësishme 25 vjet angazhim të OSBE-së në Kosovë. Mirëpres zgjedhjen e kryetarit të ri të Kuvendit të Kosovës dhe shpresoj që procesi të veprojë në bazë të Kushtetutës. Shpresojmë fuqimisht që shumë shpejt do të ketë një zgjidhje për ngërçin që lidhet me Kuvendin dhe Qeverinë”, tha Valtonen.

Përveç zhvillimeve politike, Valtonen theksoi edhe rëndësinë e forcimit të marrëdhënieve ndëretnike dhe mbështetjen e dialogut të ndërmjetësuar nga BE-ja mes Kosovës dhe Serbisë.

“Forcimi i marrëdhënieve ndër-komunitare mbetet i rëndësishëm dhe ka qenë prej kohësh një fushë kyçe e angazhimit për misionin e OSBE-së në Kosovë. Me emërimin e një Përfaqësuesi të ri Special të BE-së për Dialogun Beograd-Prishtinë, riafirmimi i angazhimit për dialogun dhe avancimi i zbatimit të marrëveshjeve ekzistuese është thelbësor për të siguruar progres. OSBE-ja mbetet e gatshme të mbështesë këto përpjekje, pasi misioni këtu ka potencial për kontribute të mëtejshme në përputhje me mandatet e tij”, tha Valtonen.

Në konferencë nuk u deklarua por sipas njoftimit të Presidencës, Osmani në takim me Valtonen shprehi gatishmëri për bashkëpunim në procesin e reformave, transparencës institucionale dhe të drejtave të njeriut.

E, Kryesuesja e OSBE-së, gjithashtu u takua me përfaqësuese të shoqërisë civile dhe pjesëtare të akademisë për gratë e reja, një rrjet i mbështetur nga OSBE që promovon paqen dhe përfshirjen.

Më shumë detaje i gjeni në Edicionin Qendror të lajmeve në ATV, në videon më poshtë:

Presidentja e Republikës së Kosovës, Vjosa Osmani, ka pritur në takim lamtumirës ambasadorin e Republikës Federale të Gjermanisë, Jörn Rohde, të cilin e falënderoi për angazhimin e tij të gjatë mandatit në Kosovë.

Osmani ritheksoi se Gjermania mbetet partner strategjik i rëndësishëm i Republikës së Kosovës dhe se partneriteti ndërmjet dy shteteve është në rritje të vazhdueshme. Me këtë rast, u veçua rëndësia e thellimit të marrëdhënieve ekonomike, të cilat janë forcuar edhe falë kontributit të çmuar të mërgatës kosovare në Gjermani, që përmes investimeve dhe angazhimit të tyre përbëjnë një urë të fuqishme lidhëse mes dy vendeve dhe popujve tanë.

Presidentja shprehu mirënjohje për mbështetjen që Gjermania i ka dhënë Kosovës përgjatë viteve, përfshirë edhe mbështetjen për rrugën drejt integrimit euroatlantik. Po ashtu, ajo vlerësoi mbështetjen e vazhdueshme të Gjermanisë në sektorë të ndryshëm përmes projekteve të shumta zhvillimore.

Ajo i uroi ambasadorit Rohde suksese të mëtejshme në angazhimet e tij të ardhshme./ATVLIVE/

Prokuroria Themelore në Ferizaj ka njoftuar se ka kërkuar caktimin e masës së paraburgimit për të dyshuarin B.R. lidhur me vrasjen e I.R. mbrëmë në fshatin Balaj.

“Prokuroria Themelore në Ferizaj, njofton opinionin publik se ka kërkuar nga Gjykata Themelore në Ferizaj, caktimin e masës së paraburgimit në afat prej 30 ditësh ndaj të dyshuarit B.R, nga komuna e Ferizajt, për shkak të dyshimit të veprës penale “Vrasja e rëndë” sipas Kodit Penal të Republikës së Kosovës.”

Sipas Prokurorisë “ekziston dyshimi i bazuar se më 15.09.2025, rreth orës 19:42, në fshatin Balaj- Ferizaj, i pandehuri me dashje e ka privuar nga jeta të dëmtuarin – djalin e axhës se tij, I.R., në atë mënyrë që pas një mosmarrëveshje te mëhershme qe kishin pasur si pasoje e problemeve në lidhje me një konflikt pronësor, me t’u takuar ne rrugën e fshatit me njeri-tjetrin, pas fjalosjes verbale, në atë moment i pandehuri B.R., e nxjerr revolen e tipit ZIG 14 TISAS dhe shtënë katër herë në drejtim të viktimës I.R., duke e goditur në pjesët e sipërme të trupit, me ç’rast viktima nga lëndimet e shkaktuara nga arma e zjarrit ka ndërruar jetë rrugës duke e dërguar për në Qendrën Emergjente të Ferizajt, me të cilën do të kryente veprën penale “Vrasje e rëndë” nga neni 173 paragrafi 1 nën paragrafi 1.8 të KPRK-së”.

“I pandehuri që nga data 15 Shtator 2025, me vendim të Prokurorit të Shtetit gjendet nën masën e ndalimit 48 orësh për veprën penale të lartëcekur.”/ATVLIVE/

Komandanti i KFOR-it, gjeneral-major Enrico Barduani, në informimin e tij të fundit para Komitetit Ushtarak të NATO-s dhe Këshillit të Atlantikut të Veriut, ka theksuar se rruga drejt një sigurie të qëndrueshme në Kosovë nuk është ushtarake, por politike.

Ai theksuar se “situata në Kosovë është e qëndrueshme, por mbetet subjekt i rreziqeve të përshkallëzimit të papritur, për shkak të një sërë çështjesh të pazgjidhura”.

Barduani tha se, pavarësisht sfidave në terren, “KFOR ka qëndruar në rrugën e duhur”, duke ndihmuar në “ruajtjen e stabilitetit dhe zbutjen e situatave që mund të kishin çuar në incidente ose shpërthime të paqëndrueshmërisë” dhe duke kontribuar “në ruajtjen e një kuadri sigurie që mund të ndihmonte përpjekjet e vazhdueshme dhe të rëndësishme diplomatike”.

Duke ripërsëritur mbështetjen e NATO-s dhe KFOR-it për dialogun e lehtësuar nga BE-ja mes Kosovës dhe Serbisë, ai theksoi: “KFOR-i ka demonstruar – edhe një herë – se është i gatshëm dhe i aftë të luajë rolin e tij dhe të përshtasë qëndrimin e tij, sipas nevojës. Që të lëvizim përpara është e rëndësishme që Beogradi dhe Prishtina t’i implementojmë marrëveshjet ekzistuese. Të dyja palët duhet të tregojnë fleksibilitet që të bëjnë kompromiset e nevojshme”.

Barduani ka vlerësuar gjithashtu edhe forcimin e misionit, përfshirë vendosjen e përkohshme të forcave rezervë, si dhe thellimin e bashkëpunimit me bashkësinë ndërkombëtare, organizatat e sigurisë së Kosovës dhe Forcat e Armatosura Serbe.

“KFOR-i vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt për të gjithë njerëzit dhe komunitetet që jetojnë në Kosovë dhe lirinë e lëvizjes, në çdo kohë dhe në mënyrë të paanshme. KFOR-i punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX) në rolet e tyre përkatëse si reagues të sigurisë.”, thuhet në njoftim.

Për veprimtarin politik Adem Demaçi, James Rubin tha se pati një telefonatë të ashpër me Madeleine Albright, ku kishte thënë se ose do bëhej pavarësia ose do të vdisnin të gjithë.

Përpara kësaj, Rubin ka thënë se pas Rambujesë me Madeleine Albright e kishin thirrur Adem Demaçin se mendonin që kishte influencë mbi Thaçin dhe jo anasjelltas, raporton “Betimi për Drejtësi”.

Më pas, dëshmitarit iu prezantua një dokument i cili tregohej se ishte i Albrightit lidhur me bisedat që ajo i ka pasur me Adem Demaçin, ndaj të cilit ishte kërkuar që ’a mbështeste Thaçin.

“Ai (Demaçi) tha se nuk më intereson se sa njerëz vdesin. Ka qenë biseda më e egër që kam dëgjuar ndonjëherë“, e kishte përshkruar Albright bisedën me Adem Demaçin.

Dëshmitari tha se ka qenë i pranishëm kur ka ndodhur kjo bisedë telefonike.

“Më kujtohet shumë mirë por na u duk se ishte një person që kishte autoritet jo fizik apo vertikal, por ideologjik. Hashim Thaçi mendonte se kishte nevojë për një person si Adem Demaçi që ta shtynim pak çështjen e pavarësisë. Ai nuk ka thënë që nuk duam pavarësi, por jo tani në këto momente dhe ai donte të tregonte se çështjen e pavarësisë mund ta diskojmë pak më vonë. Demaçi thoshte o pavarësi o le të vdesim”, tha Rubin.

Rubin tha se sipas tij, kjo ishte shenjë që Thaçi kishte nevojë për Demaçin.

“Sipas meje kjo ishte një shenjë që Thaçi kishte nevojë që Demaçi të thoshte që ta shtyjmë pak më vonë çështjen e pavarësisë. Prandaj, zoti Demaçi ishte eprori i tij nga vendimmarrja në këtë grup. Ai kishte nevojë për mbështetje ideologjike nga themeluesi apo personi kryesor ideologjik”, tha ai.

James Rubin tha se kjo fjalë ‘o pavarësi, o do të vdesim të gjithë”, iu u duk e egër.

“…dhe u përmend fjala ‘i etur për gjak”./ATVLIVE/

Ish-zyrtari i lartë amerikan, James Rubin, u pyet në Gjykatën Speciale nëse ishte në dijeni për një raport të vitit 1998 të Organizatës së Kombeve të Bashkuara (OKB), ku flitej për gjoja rrëmbimin e civilëve serbë, shqiptarë dhe romë, dhe të oficerëve të policisë serbe, nga njerëz që besohej se i përkisnin UÇK-së.

“Kam lexuar një raport të OKB-së për Kosovën, por kam qenë shumë skeptik për atë raport”, është shprehur Rubin.

“Sepse, organet e OKB-së nuk e kanë përshkruar shumë mirë situatën shumë shpesh”, ka thënë ai.

“Pra, kam qenë në dijeni të raportimit prej OKB-së, por jo domosdoshmërisht ka qenë i besueshëm raporti”, ka shtuar Rubin.

Ai ka thënë se raportet e Kryqit të Kuq i konsideronte më të besueshme.

Më herët, Rubin pohoi se mund të jetë në dijeni të raporteve nga Departamenti amerikan i Shtetit, të cilat shkruanin se UÇK-ja ishte përgjegjëse për vrasje, ndalime, rrëmbime edhe të civilve shqiptarë.

Prokurori e pyeti për disa artikuj specifikë në gazetat e asaj kohe për vrasje dhe arrestime të disa individëve.

Megjithëse ai shtoi se nuk i kujtohen raste specifike që janë shkruar në raprote apo në mediat ndërkombëtare pas më shumë se 20 vjetësh.

Akuza për taktizime, tentim-pengimi të mbrojtjes e lojëra në procesin gjyqësor, ka adresuar avokati i Hashim Thaçit, Luka Misetiq, në drejtim të Prokurorisë së Specializuar në Hagë.

Në një parashtresë urgjente të publikuar së fundmi në faqen e Gjykatës Speciale e cila mban datën 13 shtator, Misetiq ka bërë të ditur se Prokuroria e Hagës, ka mbajtur të fshehta dokumentacione të cilat me parimet bazë në drejtësi, e ka pasur obligim t’ia dorëzojë mbrojtjes së Thaçit.

Fjala është për dëshmitarët e parë të Thaçit, James Rubin dhe të tjerë, ku Prokuroria e Hagës, nuk ka dorëzuar disa dokumentacione me rëndësi për mbrojtjen, raporton gazeta Nacionale.

“Vendimet taktike të miratuara nga ZPS-ja në prag të çështjes së Mbrojtjes kanë pasoja. Pajtueshmëria me kuadrin e zbulimit të Dhomës së Specializuar është një aspekt integral i një gjykimi të drejtë. Shkeljet kanë shkaktuar dëm në përgatitjen e Mbrojtjes. Mbrojtja nuk duhet të detyrohet të ridrejtojë burimet drejt rigjykimit të shkeljeve të zbulimit të ZPS-së në këtë fazë të vonë të gjykimit. Lojërat e vazhdueshme të ZPS-së padyshim që do të nxisin kërkesat e Mbrojtjes për shtyrjen e procedurave dhe përjashtimin e provave, dhe do të rrezikojnë paraqitjen në kohë të çështjes së Mbrojtjes. Rregulli 110 autorizon një Trup Gjykues të marrë masa pas mosrespektimit të detyrimeve të zbulimit nga një palë. Si i tillë, Mbrojtja bën kërkesën e tanishme për urdhrat e përcaktuar më poshtë në mënyrë që të sigurohet që kjo të mos ndodhë përsëri”, thuhet në kërkesën e avokatit Misetiq, raporton Nacionale.

Por, cila është historia e këtij zhvillimi?

Prokuroria e Specializuar e Hagës, me Rregulloren për Procedura dhe Prova, e ka obligim t’ia paraqesë mbrojtjes të gjithë dokumentet relevante për dëshmitarët. Për këtë, mbrojtja e Thaçit në korrik kishte dorëzuar listën me 21 emra për dëshmitarë, duke kërkuar që Prokuroria t’ia ofrojë të gjitha informacionet që ka për këta persona, që synonte t’i ftonte mbrojtja e Thaçit.

Mes 4 korrikut e 11 shtatorit 2025, Prokuroria kishte zbuluar rreth 500 artikuj e dëshmi të përcaktuara, por një pjesë e tyre u dorëzuan krejtësisht në fund të afatit, kur avokatët e Thaçit veç kishin përfunduar me përgatitjen e dëshmitarëve të parë.

“Më 12 shtator 2025, Mbrojtja i kërkoi ZPS-së të konfirmonte se të gjitha materialet e zbuluara në përputhje me Rregullën 102(3) që lidhen me 1DW-001 dhe 1DW-003 kishin ardhur në posedim të ZPS-së vetëm që nga 1 shtatori 2025, duke kërkuar që “nëse ndonjë nga materialet ishte në posedim tuaj më herët se ajo datë, ne kërkojmë që ju të zbuloni (1) cilat, nëse ka, nga materialet ishin në posedim tuaj para 4 korrikut 2025; dhe (2) nëse ka ndonjë material që ka ardhur në posedim tuaj midis 4 korrikut 2025 dhe 1 shtatorit 2025”, thuhet në parashtresë.

Pra, Prokuroria e Hagës kishte pasur këto dokumente qysh më herët, dhe nu kia kishte dorëzuar mbrojtjes së Thaçit.

“Përgjigja e ZPS-së zbuloi se ka shkelur detyrimin e saj sipas Rregullës 102(3) për të zbuluar dokumente relevante materiale “pa vonesë”. ZPS-ja fillimisht këmbënguli se 34 nga 36 artikujt që lidheshin me 1DW-001 dhe 1DW-003 ishin “të disponueshme publikisht” dhe dy “riprodhonin informacion të disponueshëm publikisht”. ZPS-ja më pas konfirmoi se 24 nga artikujt e disponueshëm publikisht ishin marrë që nga 1 shtatori 2025, dhe 10 të tjerët ishin marrë midis 19 dhe 26 gushtit 2025. Dy artikujt që riprodhojnë informacion të disponueshëm publikisht janë ekstrakte të raporteve nga artikuj të tjerë që ishin në posedim të ZPS-së para 4 korrikut 2025, por ekstraktet përkatëse u regjistruan më pas më 26 gusht 2025”, thuhet më tutje.

Mbrojtja e Thaçit ka alarmuar se kjo ka qenë taktikë e Prokurorisë që të fitojë avantazh në gjykim.

“ZPS-ja mbajti zbulimin me qëllim fitimin e një avantazhi në gjyq. Për shembull, ZPS-ja e pyeti gjerësisht 1DW-001 në lidhje me angazhimet e tij me Kosovën dhe përfaqësuesit e qeverisë kosovare që nga viti 1999. 12 Këto lidhje dhe puna e 1DW-001 përshkruhen në disa nga dokumentet e zbuluara në Paketën e Zbulimit 1773, duke përfshirë SPOE00393245-00393267, SPOE40010609-40010632, SPOE40010633-40010643, SPOE40010668-40010708, SPOE40010718-40010719. Të gjitha këto, përveç njërit, ishin në posedim të ZPS-së më 19 gusht 2025; Tjetra u mor më 26 gusht 2025. Të gjitha u përdorën si bazë për pyetjen 1DW-001 më 2 shtator 2025. Asnjëra nuk u zbulua deri më 11 shtator 2025”, thuhet në këtë ankesë.

“Nuk mund të ketë bazë që ZPS-ja të arrijë në përfundimin se këto materiale ishin të rëndësishme për marrjen në pyetje të 1DW-001 dhe i nënshtroheshin detyrimeve të saj sipas Rregullës 102(3), megjithatë i mbajti ato të fshehura nga Mbrojtja për disa javë derisa i zbuloi përfundimisht vetëm disa ditë para dëshmisë së 1DW-001 dhe vetëm pasi Mbrojtja zbuloi urdhrin e saj të dëshmitarëve për javën e parë të çështjes së Mbrojtjes. Mbrojtja kishte përfunduar tashmë seancën përgatitore të 1DW-003 ditë më parë dhe tani nuk ka aftësi praktike për t’i përdorur ato”, përfundon ankesa.

Pra, fjala është për prova të rëndësishme lidhur me dëshmitarin James Rubin.