Tag: Ballina

Bordi i Asociacionit të Komunave të Kosovës (AKK) ka shprehur keqardhje dhe shqetësim të thellë lidhur me deklaratat e kryeministrit në detyrë të Kosovës, Albin Kurti.

Kurti gjatë një tubimi të shtunën në Prishtinë, dy ditë para fillimit të fushatës zyrtare për balotazhin e zgjedhjeve lokale të 9 nëntorit, ka thënë se “s’do t’u jap para kryetarëve që s’dinë të punojnë apo që vjedhin”.

“Bordi i Asociacioni i Komunave të Kosovës (AKK) shpreh keqardhje dhe shqetësim të thellë për deklaratat e fundit të z. Albin Kurti, Kryeministrit në detyrë të Republikës së Kosovës, të cilat përmbajnë gjuhë fyese dhe paragjykuese ndaj kryetarëve të Komunave. Deklarata e z. Kurti se ‘nuk do t’u jap para Kryetarëve që nuk dinë të punojnë apo që vjedhin përbën jo vetëm një fyerje të drejtpërdrejtë për kryetarët e komunave dhe ata që janë në proces të zgjedhjes, të zgjedhur me votë të lirë, por edhe një cenim të parimeve themelore të barazisë institucionale dhe të vetëqeverisjes lokale në Republikën e Kosovës. Që nga zgjedhjet lokale të vitit 2021 e deri më sot, asnjë kryetar komune nuk është me aktakuzë për vjedhje. Në anën tjetër, në nivel qendror ka raste të zyrtarëve, përfshirë edhe ministra apo zëvendësministra, ndaj të cilëve janë ngritur aktakuza. Prandaj, përgjithësime të tilla pa bazë faktike dëmtojnë padrejtësisht imazhin e pushtetit lokal dhe besimin e qytetarëve në institucionet komunale”, thuhet në reagimin e AKK-së.

AKK-ja ka rikujtuar se në raundin e parë të zgjedhjeve lokale të këtij viti, qytetarët e Kosovës kanë zgjedhur kryetarë nga të gjitha subjektet politike, pa balotazh.

Ajo ka thënë se ndarja e buxhetit është çështje e rregulluar me ligje e jo çështje dëshire e as mundësi për konsum elektoral.

“Pra kjo është dëshmi e qartë e besimit të drejtpërdrejtë dhe të gjerë që qytetarët kanë ndaj udhëheqësve lokalë. Prandaj, është e arsyeshme të pyetet: a i përfshijnë deklaratat e Kryeministrit edhe këta kryetarë të zgjedhur që në raundin e parë, përfshirë edhe ata nga partia e VV-së? AKK-ja vlerëson se ndarja e buxhetit është çështje e rregulluar me ligje e jo çështje dëshire e as mundësi për konsum elektoral. Shumica e kryetarëve kanë qenë të pakënaqur me mënyrën e ndarjes së investimeve kapitale nga niveli qendror, të cilat bëhen nga ministritë e linjave. Këto investime nuk ndahen sipas formulave ligjore, ashtu siç ndahen grantet qeveritare, por sipas vendimeve politike dhe kritereve selektive, përfshirë ato partiake dhe etnike, duke krijuar pabarazi të dukshme mes komunave dhe duke cenuar parimin e trajtimit të barabartë. I nderuar z. Kurti, fondet publike janë të qytetarëve dhe ndahen për komunat sipas ligjeve në fuqi, jo sipas preferencave politike apo përkatësive etnike. Ato duhet të shpërndahen me kritere të qarta, të barabarta dhe transparente, në përputhje me ligjin dhe me frymën e bashkëpunimit ndërinstitucional”, thuhet në reagim.

AKK-ja apelon për respekt institucional, dialog konstruktiv dhe bashkëpunim ndërmjet niveleve të qeverisjes, në funksion të forcimit të demokracisë lokale dhe përmbushjes së standardeve të Kartës Evropiane për Vetëqeverisje Lokale.

“Pushteti lokal nuk kërkon privilegje, por respektim të ligjit dhe trajtim të barabartë për të gjitha komunat, pavarësisht përkatësive politike apo etnike”, thuhet nga AKK-ja.

Komisioni Qendror i Zgjedhjeve do të zhvillojë sot mbledhjen e radhës, e cila do të fokusohet kryesisht në shpalljen dhe certifikimin e rezultateve të ndryshme zgjedhore.

Sipas njoftimit për media, mbledhja do të nisë me shpalljen e rezultateve përfundimtare të zgjedhjeve për kryetarë komunash në Prishtinë, Mamushë dhe në Junik.

Këto tri komuna nuk ishin përfshirë në shpalljen e rezultateve më 25 tetor, për shkak të ankesave që ishin dorëzuar në Panelin Zgjedhor për Ankesa dhe Parashtresa (PZAP) si edhe në Gjykatën Supreme.

Pas këtij procesi, KQZ-ja do të kalojë në certifikimin e rezultateve për zgjedhjet e kryetarëve të 35 komunave të tjera, rezultatet e të cilave ishin publikuar në mbledhjen e muajit tetor.

Gjithashtu, gjatë kësaj mbledhjeje pritet të shpallen edhe rezultatet përfundimtare të zgjedhjeve për 38 kuvende komunale në vend./

Kryetari i Prishtinës, dhe kandidati për një mandat tjetër nga rradhët e LDK-së, Përparim Rama, i është kthyer edhe njëherë deklaratës skandaloze të Kurtit, i cili la të kuptohet për qytetarët që të mos votojnë kandidatë për kryetar nga partitë e tjera, sepse nuk u lëshon buxhet.

Rama e ka quajtur rrezik institucional qasjen e Kurtit, duke thënë se kjo është logjikë shkatërruese dhe se në këto kushte, Kurti nuk duhet të jetë kryeministër i Kosovës më.

Postimi i plotë në “Facebook”:

Ish-presidenti i Këshillit Europian, Charles Michel ka zhvilluar një intervistë në “Inside Albania Podcast” me Alice Taylor ku foli lidhur me marrëdhënien e Kosovës dhe Serbisë dhe rrugës së tyre drejt BE-së.

Sipas tij anëtarësimi në BE është rruga më e mirë për të normalizuar marrëdhëniet mes dy vendeve si dhe për uljen e tensioneve.

“Unë me sinqeritet ndjej se mjeti më i fortë është anëtarësimi në BE. Dhe nëse duam që Kosova dhe Serbia te jenë të guximshme në nivel të brendshëm, sepse e di që si në Kosovë, ashtu edhe në Serbi, ekziston nevoja për t’i bindur qytetarët se zgjedhjet që po bëhen janë zgjedhjet më te mira për ta, mendoj se mënyra më e mirë për t’i bindur njerëzit për ta.

Mendoj se mënyra më e mirë për t’i bindur njerëzit është qё ata udhëheqës dhe ato shoqëri ta kenë ketë perspektive anëtarësimi. Sepse ky anëtarësimi, sipas meje, është mënyra më e mirë për të zbutur tensionet, për të normalizuar marrëdhëniet dhe për të zhvilluar një agjendë më pozitive të orientuar drejt së ardhmes”, u shpreh Michel.

Një aksion policor është zhvilluar nga policia për një rast që ndërlidhet me falsifikim të dokumenteve, legalizim të përmbajtjes së rreme, mashtrim e armëmbajtje pa leje.

Sipas njoftimit të policisë, një person është arrestuar më 01.11.2025, pasi që i njëjti dyshohet se gjatë periudhës 2021-2024, ka kryer vepra penale duke përfshirë dyshime se janë falsifikuar dokumente, lidhur me pronat e përfshira që kanë qenë nën menagjimin e AKP-së.

Tutje sipas njoftimit të policisë, këto prona i dyshuari në bashkëkryerje me persona tjerë kanë arritur që t’i falsifikojnë dokumentet që në procedura për bartje dhe legalizim i kanë bartur nga prona shtetërore në pronësi private.

E pasi i kanë bartur këto prona në pronësi private, policia ka njoftuar se të njëjtit pastaj i kanë shitur duke mashtruar blerësit dhe nga këto para kanë përfituar shuma të mëdha financiare.

Gjithashtu pas arrestimit, policia ka njoftuar edhe se ka bastisur disa objekte.“Janë bërë kontrolla në një shtëpi, tri banesa dhe dy garazha ku janë konfiskuar dokumente të ndryshme që kanë lidhje me falsifikime si dhe pajisje që janë përdorë për falsifikimin e dokumenteve”- thuhet në njoftimin e policisë në raportin policor të datës 02.11.2025.

Gjatë operacionit policor është konfiskuar një pistoletë me 103 fishek, një telefon celular, një orë dore rolex dhe një zingjir dore rolex.

I dyshuari pas intervistimit me vendim të prokurorit është dërguar në mbajtje.

Oda Ekonomike Amerikane në Kosovë ka shprehur shqetësim lidhur me vendimet e Qeverisë në detyrë për miratimin e Projektligjit për Buxhetin 2026 dhe rritjen e pagës minimale nga 350 në 500 euro. Sipas Odës, vendimet me ndikim afatgjatë fiskal duhet të merren vetëm nga një qeveri me mandat të plotë dhe legjitimitet demokratik.

Oda thekson se, megjithëse përmirësimi i kushteve të punës mbetet i rëndësishëm, çdo vendim duhet të bazohet në analiza të kujdesshme të tregut të punës dhe kapaciteteve të sektorit privat, në mënyrë që të ruhet balanca mes mirëqenies së punonjësve dhe konkurrueshmërisë së bizneseve.

Sipas Odës Amerikane, miratimi i politikave të reja të shpenzimeve publike nga një qeveri në detyrë mund të rrezikojë stabilitetin makroekonomik, të rrisë ngarkesën buxhetore dhe të kufizojë hapësirën për investime kapitale. Institucioni apelon për respektim të plotë të ligjit dhe përmbajtje institucionale, duke siguruar se vendimet e Qeverisë në detyrë nuk cenojnë legjitimitetin demokratik dhe stabilitetin institucional.
Oda Amerikane përfundon duke theksuar se qeverisja e mirë dhe stabiliteti institucional janë parakusht për një ekonomi të fortë dhe të qëndrueshme në Kosovë.

Drejtori i Qendrës Kryesore të Mjekësisë Familjare (QKMF) në Prishtinë, Valdet Hashani, në një intervistë për Ekonomia Online, ka bërë të ditur se që nga 1 tetor kur ka nisur sezoni i vaksinimit për vitin 2025–2026 kundër gripit sezonal e deri më tani janë administruar rreth 8 mijë doza.

Ai ka theksuar se vaksina e këtij viti është katër komponentësh dhe për herë të parë nuk rekomandohet për personat që kanë alergji në antibiotikun gentamicinë.

“Me 1 tetor të këtij viti kemi filluar sezonin e ri të vaksinimit për vitin 2025–2026, vaksinë e cila është katër komponentëshe, është katër valente që nënkupton që në kuadër të saj kemi dy shtame të grupit A të virusit dhe dy të grupit B, që për popullatën si informacion nënkupton që nëpërmjet një vaksine i marrin katër vaksina të llojeve të ndryshme. Është vaksinë e njëjtë sikur e vitit të kaluar por nga kompani tjetër. Përpos kundër indikacioneve që kanë qenë edhe me të tjerat, që do të thotë që personat që kanë alergjinë në vezë, pupla, në mish të bardhë ose proteinë të mishit të pulës, sivjet për herë të parë për këtë vaksinë kanë thënë që nuk është mirë ta marrin ata persona që realisht kanë alergji në gentamicinë”, tha Hashani.

Ai ka bërë të ditur se deri më tani janë administruar afër 8 mijë doza nga 11 mijë sa janë alokuar nga Instituti Kombëtar i Shëndetësisë Publike të Kosovës.

“Realisht numri i vaksinave nga 1 tetori i 2025 diku e arrin afër 8 mijë doza, nga 11 mijë doza sa i kemi të alokuara nga ISHKPK. Mirëpo edhe pse duket numri i madh që ka shkuar, kjo zakonisht kemi një ngritje të lehtë të interesimit, por muaji tetor është zakonisht më sensibilizues edhe më tepër qytetarë tanë vijnë edhe vaksinohen të kategorive të ndryshme. Numri është pak a shumë pak më i lartë se në të njëjtën kohë të vitit të kaluar, e arrin 8 mijë doza. Doza tjera qoftë se mendohet se janë të pakta këto vaksina mund të jepen deri në verën e vitit të ardhshëm dhe në çdo kohë që ne i harxhojmë kemi premtime nga IKSHPK-ja se ne mund të furnizohemi, mirëpo për shkak të ruajtjes së dozave ne kemi marrë vetëm dozat që zakonisht i kemi shpenzuar gjatë vitit”, tha ai.

Sipas Hashanit, interesimi më i madh për vaksinim po vërehet tek të moshuarit, personat me sëmundje kronike dhe gratë shtatzëna, ndërsa këtë vit është rritur ndjeshëm edhe numri i punëtorëve shëndetësorë të vaksinuar.

“Kategoritë e njerëzve ose personave që vaksinoheni më shumë janë kategoritë e personave të moshuar, ata të cilët kanë sëmundje kronike, gratë shtatzëna, kemi edhe rini që janë vaksinuar. Për herë të parë ka filluar edhe sensibilizim te popullata. Edhe numri i punëtorëve shëndetësor sivjet është më i madh, ata të cilët janë vaksinuar në lidhje me vaksinat e gripit sezonal”, tha ai.

Hashani ka theksuar se vaksina është thelbësore për forcimin e imunitetit dhe parandalimin e rasteve të rënda të gripit, sidomos te personat me sëmundje kronike.

“Vaksina është ajo e cila e ngrit imunitetin e organizmit, e sensibilizon atë, mundëson krijim e antitrupave ndaj këtyre viruseve që janë specifik, këto katër viruse që i përmendem edhe e mbron organizmin me qëllim që mos të sëmuremi. Ne e dimë që të sëmurit kronik ose ata të cilët kanë imunitet të komprometuar ose gratë shtatzëna, infektimi me një virus sezonal e dëmton organizmin dhe mund të ketë edhe pasoja fatale për ata që kanë sëmundje kronike po e zëmë. Keni parasysh se gripi sezonal edhe mbytë, është jashtëzakonisht serioz, mirëpo kjo vaksinë e bën që imuniteti i organizmit të rritet, organizmi të mos reagojë me temperatura të mëdha, meqë edhe simptoma kryesore e gripeve sezonale është ngritja e temperaturave të cilat janë mbi 38 ose 39 gradë Celsius, të cilat për pacientët të cilët kanë sëmundje kronike mund të jetë edhe fatale. Përfitimet janë të shumta”, tha ai.

Pas kryeministrit në detyrë Albin Kurti, tash edhe presidentja Vjosa Osmani ka paralajmëruar mundësinë që vendi të shkojë në dy palë zgjedhje – njëra në dhjetor dhe tjetra në mars.

Presidentja Osmani tha se vështirësitë për zgjedhjen e presidentit, për të cilin nevojiten të paktën 80 vota, mund të çojnë në një situatë të tillë.

“Kjo çështje është ngritur nga disa prej pjesëmarrësve për të paralajmëruar një situatë që mund të përballemi si vend. Ta zëmë ka zgjedhje në dhjetor, pastaj merr disa muaj kohë deri t’i kemi institucionet, dhe pastaj sapo ta kemi një qeveri, menjëherë në mungesë kuorumi prej 2/3 menjëherë vendi shkon në zgjedhje të reja për shkak të dështimit të zgjedhjes së presidentit. Një situatë e tillë u përmend, për të paralajmëruar se mund të kemi dy palë zgjedhje në 3-4 muajt në vijim që është situatë e rëndë jo vetëm për KQZ, por edhe si situatë ku qytetarët për periudhë të gjatë të mos i kenë institucionet,” ka thënë Osmani.

Fjalët e saj janë në linjë me ato të Kurtit, i cili më herët kishte theksuar të njëjtën mundësi.

“Nuk kemi marrë ftesë nga presidentja Vjosa Osmani. E dimë se për herën e dytë është në diskrecionin e saj çështja e mandatarit për formimin e qeverisë. Nga ajo që dëgjuam dje, duket se të gjithë po përgatiten për zgjedhje të reja dhe për balotazhin në zgjedhjet lokale,” tha Kurti.

“Mbase është për të ardhur keq — përveç balotazhit, edhe dy herë të tjera zgjedhje. Edhe zgjedhje në dimër edhe zgjedhje në pranverë, sepse kur nuk arritëm t’i bëjmë 61 deputetë për një qeveri të re, atëherë është e pamundur t’i bëjmë 80 deputetë për zgjedhjen e presidentes. Kemi mundur së paku këto zgjedhjet e dhjetorit t’i evitojmë,” shtoi ai.

Nëse paralajmërimet e Kurtit dhe Osmanit dalin të sakta, qytetarët e Kosovës mund të votojnë deri në pesë herë brenda një viti — zgjedhjet qendrore në shkurt, lokale në tetor, balotazhi në nëntor, zgjedhjet parlamentare në dhjetor dhe ato të mundshme në mars.

Mbetet të shihet nëse pas marsit mund të krijohet një koalicion i qëndrueshëm që siguron edhe votat për presidentin, apo nëse vendi do të përballet sërish me zgjedhje të reja.

Qeveria e Shqipërisë ka shpallur të dielën, më 2 nëntor 2025, ditë zie kombëtare në nderim të ish-kryeministrit dhe themeluesit të Partisë Socialiste, Fatos Nano, i cili u nda nga jeta sot në moshën 73-vjeçare, pas një sëmundjeje të rëndë.

Në nder të figurës së tij, homazhet publike dhe shtetërore do të zhvillohen po të dielën në Pallatin e Kongreseve në Tiranë, sipas programit zyrtar:

08:30 – 11:00: Homazhe publike

11:15 – 11:45: Homazhe shtetërore dhe nderime nga personalitetet

12:05: Ceremonia e lamtumirës

Gjatë ditës së zisë, flamujt kombëtarë do të ulen në gjysmë shtize në të gjitha institucionet publike dhe shtetërore, ndërsa RTSH do të transmetojë muzikë funebre gjatë zhvillimit të ceremonisë shtetërore.

Për organizimin e ceremonisë është ngritur një Komision i Posaçëm Shtetëror nën mbikëqyrjen e kryeministrit Edi Rama, me përfaqësues nga institucionet kryesore shtetërore dhe të sigurisë.

Ky komision përbëhet nga:

– Ministri i Mbrojtjes;
– Ministri i Punëve të Brendshme;
– Nënkryetari i Bashkisë Tiranë;
– Sekretari i Përgjithshëm të Këshillit të Ministrave;
– Drejtori i Protokollit të Shtetit;
– Drejtori i Përgjithshëm të Policisë së Shtetit;
– Komandanti i Gardës së Republikës së Shqipërisë;
– Drejtori i Drejtorisë së Shërbimeve Qeveritare;
– Përfaqësues nga kabineti i Kryeministrit;
– Përfaqësues nga zyra e shtypit të Kryeministrit.