ATV

Tag: Asociacioni

  • Çka duhet të dini për modelin kroat?

    Çka duhet të dini për modelin kroat?

    Modeli kroat sa shkon e diskutohet më shumë, kur është fjala për formimin e Asociacionit të komunave me shumicë serbe. Në pak sekonda, mund të mësoni se çfarë parasheh ky model, pse është zgjedhur dhe si po e komenton BE-ja.

    E gjithë kjo ide, nisi me 9 maj kur kryeministri Albin Kurti, ka pritur në takim ministrin e Punëve të Jashtme dhe Evropiane të Kroacisë, Gordan Grlić Radman, me të cilin ka biseduar edhe për procesin e dialogut me Serbinë.

    Sipas njoftimit të Qeverisë, Kurti e ka njoftuar diplomatin kroat se në takimin e fundit të nivelit të lartë, që u mbajt javën e kaluar në Bruksel, ka paraqitur vizionin e tij për zbatimin e nenit 7 të Marrëveshjes Bazike, bazuar në modelin kroat të trajtimit të pakicave kombëtare serbe.

    “Në lidhje me të, ai tha duke qenë vend anëtare e BE-se dhe e NATO-s, Kosova e sheh Kroacinë si tregim suksesi dhe model që duhet ndjekur për sa i takon të arriturave ekonomike dhe demokratike, por edhe për sa i përket respektimit të të drejtave të minoriteteve”, thuhet në njoftimin e Qeverisë.

    Por çfarë për përmban “Asociacioni kroat”?

    Këshilli i Përbashkët i Komunave Serbe (Zajedničko veće opština – ZVO), përmbledh komunat ku jetojnë serbët në lindje të Kroacisë, është modeli të cilin kryeministri i Kosovës, Albin Kurti, e ka dhënë si propozim në Bruksel për Asociacionin e Komunave me shumicë Serbe.

    Kurti pas përfundimit të takimit me presidentin serb, Aleksandër Vuçiç e ndërmjetësit, Josep Borrell e Miroslav Lajçak tha se ka dhënë këtë variant si “draft-vizioni”.

    Ky model kroat, i cili është krijuar pas përfundimit të konflikteve në Sllavoninë Lindore në Kroaci, është futur në Marrëveshjen e Erdutit me dokumentin me anë të të cilit është konfirmuar ri-integrimi paqësor i rajoneve që kontrolloheshin nga serbët nën autoritetin e Zagrebit.

    Organi është gardian i interesave të komunitetit serb në dy qarqe kroate: Osijek-Baranja dhe Vukovar-Srem, ndërsa përbëhet nga përfaqësues të nëntë komunave.

    Ai është mekanizëm politik, këshillues dhe koordinues, i zgjedhur në mënyrë demokratike që ka kompetenca “vetëmenaxhuese” sa i përket çështjeve të të drejtave civile dhe kombëtare të serbëve, si dhe çështjeve të identitetit, kulturës, pjesëmarrjes dhe integrimit të tyre në shoqërinë kroate.
    Këshilli i Përbashkët i Komunave Serbe mund të jetë shoqatë qytetarësh të cilën, sipas ligjit kroat, mund ta formojë kushdo nga tre persona – ajo formohet në bazë të dokumenteve ndërkombëtare çfarë ka qenë Marrëveshja e Erdutit dhe vendimit të Qeverisë së Kroacisë. Pra, ajo nuk përbën një njësi territoriale.

    Kjo pajisje për serbët në Kroaci ishte themeluar mbi bazën e “traditës shekullore të vetëqeverisjes serbe” në Kroaci, e cila shkon prapa në kohën e kuvendeve para kishtare/publike, përmes akteve ligjore dhe politike që rregullonin pozitën e serbëve në Kroaci gjatë shekujve XVIII dhe XIX.
    Asambleja Themeluese e Këshillit të Përbashkët ishte mbajtur në vitin 1997 në Zagreb me nxitjen e Aleancës së Organizatave Serbe dhe anëtarëve të saj: Shoqatës Kulturore Serbe, Forumit Demokratik Serb, Komunitetit të Serbëve nga Rijeka dhe Istria si dhe Këshilli i Përbashkët i Komunave Serbe.

    Pas miratimit të Aktit Kushtetues për të Drejtat e Pakicave Kombëtare në vitin 2002, kishte ndryshuar edhe struktura organizative e këshillave të pakicave kombëtare etnike. Anëtarët zgjidhen me votim të fshehtë, në zgjedhjet e organizuara nga shteti kroat në të gjitha njësitë e vetëqeverisjes lokale.

    Në nivel komunal, këshilli i serbëve zgjidhet nëse aty jetojnë së paku 200 pjesëtarë të komunitetit serb. Në nivel qarku ky numër arrin në 500. Në rastin kur janë të paktën 100 pjesëtarë, zgjidhet vetëm një përfaqësues i këshillit. Kjo vlenë për njësitë lokale, ku popullsia serbe e kalon pragun prej 1.5 për qind.

    Këshilli i Komunave Serbe përbëhet nga kuvendi – organi më i lartë – në të cilin bëjnë pjesë anëtarët nga radhët e komunitetit serb, pavarësisht nga përkatësia e tyre partiake. Ata zgjidhen në përputhje me statutin e këtij instrumenti. Kuvendi përbëhet nga 28 anëtarë dhe kryesohet nga presidenti i këshillit.

    Çfarë u vendos në takimin e djeshëm?

    Takimi mes kryeministrit të Kosovës, Albin Kurti, dhe presidentit serb, Aleksandër Vuçiç në Bruksel u përmbyll me dy zhvillime pozitive dhe një negativ.

    Si një arritje të madhe përmendi marrëveshjen për zbardhjen e fatit të të zhdukurve me dhunë të luftës së fundit.

    Në bazë të dokumentit, Serbia ka pranuar që të hapë arkivat e saj dhe të mundësojë qasjen edhe dokumentet sekrete lidhur me luftën e zhvilluar në Kosovë për periudhën nga janari i vitit 1998 deri në dhjetor të vitit 2000.

    Draft-statuti i parë për krijimin e Asociacionit të Komunave me shumicë serbe në Kosovë, ishte një tjetër zhvillim që u konsiderua pozitiv nga Borrell duke e konsideruar një hap të mirë drejt përmbylljes së kësaj çështje 10-vjeçare, por jo version përfundimtar.
    Zyrtari i BE-së konfirmoi pakënaqësitë e mëdha të Kurtit për draft-statutin e paraqitur nga ekipi menaxhues, në të cilin Kosova nuk ka asnjë anëtar dhe Serbia ka një deputete në të.

    Pikërisht kjo e fundit bëri të ditur se draft-statuti për Asociacionin është përpiluar për katër muaj që në vitin 2018-të. Si zhvillim negative, Borrell konsideroi zhvillimet e fundit në veri të Kosovës, përfshirë pjesëmarrjen e ulët në zgjedhjet lokale të pjesshme.
    Kryediplomati i BE-së kërkoi që të bëhen më shumë përpjekje që serbët e Kosovës të rikthehen në institucione.

    Nga ana tjetër, presidenti serb ishte më i zëshëm në drejtimin e akuzave ndaj kryeministrit të Kosovës duke pretenduar se nuk dëshiron që të formojë asociacionin. Por Albin Kurti në përfundim të takimit njoftoi opinionin publik se draft-statuti me mbi 60 nene nuk ishte i pranueshëm pasi binte ndesh me kushtetutën e Kosovës.

  • Hyseni: Asociacioni nuk ofron barazi, por privilegje

    Hyseni: Asociacioni nuk ofron barazi, por privilegje

    Nënkryetari i PSD-së, Zgjim Hyseni, në një intervistë për emisionin A23 në ATV, tha se Asociacioni nuk ofron barazi për komunitetet, por ofron privilegje për një komunitet të caktuar.

    “Ndoshta duhet me i pa elementet e përbashkëta të këtyre problemeve, mundem me pasë edhe emërues të përbashkët dhe ky emërues i përbashkët mundet me qenë barazia. Asociacioni është segregim, nuk ofron barazi, ofron të drejta, privilegje, varësisht prej se çfarë identiteti ke”, tha Hyseni.

    Ai akuzoi qeverinë se e ka dhënë Asociacionin dhe nuk ka marrë asgjë në këmbim.

    “Fillimisht na thanë, ne japim diçka nëse na japin njohjen, pastaj u kuptua që njohje nuk ka. Thanë ka me pasë njohje të pesë vendeve mosnjohëse të BE-së. As ato nuk janë. Eventualisht po flitet në qarqe që mundet me qenë njohja prej Greqisë. Nëse ju mund të thoni që duhet me e jepë Asociacionin me e nda Kosovën në baza etnike, edhe me i armiqësua popujt sepse Asociacioni nuk po bëhet për me e rritë bashkëjetesën, por ka me e rritë urrejtjen dhe ka me e rritë nacionalizmin. Krejt këtë me e ba në fund për çka, për një njohje prej Greqisë. Pyetja është çka po marrim”, theksoi Hyseni./atvlive.tv

    Emisionin e plotë e gjeni në videon më poshtë:

  • Hamidi: Kosova dhe Serbia nuk do të merren vesh për statutin, do ta marrin të gatshëm dhe do të detyrohen ta zbatojnë

    Hamidi: Kosova dhe Serbia nuk do të merren vesh për statutin, do ta marrin të gatshëm dhe do të detyrohen ta zbatojnë

    Gazetari dhe analisti Lavdim Hamidi, në emisionin CONTEXT në ATV, tha se është skeptik që Kosova dhe Serbia do të mund të merren vesh për statutin e Asociacionit.
    Ai tha se në fund, palët do ta pranojnë të gatshëm statutin nga ndërmjetësuesit dhe do të detyrohen ta zbatojnë atë.

    “Kanë thënë edhe nga administrata amerikane edhe nga Bashkimi Evropian se për momentin, prioritet i të gjitha prioriteteve është formimi i Asociacionit të Komunave me Shumicë Serbe. Këtu palët kanë ngecë, po shihet. Nuk besoj se kjo javë, ose java e ardhshme do të jetë vendimtare, sepse ende jemi në kuadër të afatit kohor brenda 150 ditësh, mirëpo jam shumë skeptik se palët vet, pa presionin ndërkombëtar do të arrijnë një marrëveshje për me e ba statutin. Ne fund, do ta pranojnë të gatshëm dhe do të detyrohen me e zbatu të njëjtin sepse vazhdimisht kemi treguar edhe në të kaluarën se kemi humbur kohë dhe nuk mundemi me u marrë vesh”, tha Hamidi. /atvlive.tv

    Emisionin e plotë e gjeni në videon më poshtë:

  • Varhelyi për Asociacionin: Drafti i ekipit menaxhues të jetë pikënisje për diskutime

    Varhelyi për Asociacionin: Drafti i ekipit menaxhues të jetë pikënisje për diskutime

    Komisioneri për Fqinjësi dhe Zgjerim i Bashkimit Evropian, Oliver Varhelyi, deklaroi se drafti i ekipit menaxhues është pikënisje për diskutime të mëtejshme rreth Asociacionit të komunave me shumicë serbe. Gjatë fjalës së tij në Parlamentin Evropian ku u diskutua raporti për Kosovën për vitin 2022, Varhelyi tha se dialogu ka pasur përparim gjatë vitit të fundit.

    Duke përmendur marrëveshjet e 27 shkurtit në Bruksel dhe aneksin e zbatimit më 18 mars në Oher, Varhelyi tha se tani është thelbësore që të dyja palët të zbatojnë të gjitha detyrimet e tyre pa vonesë nga kjo marrëveshje.

    “Çelës që Kosova të angazhohet në mënyrë konstruktive dhe siç ka theksuar përfaqësuesi special i BE-së për dialogun Kosovë-Serbi, drafti i ekipit menaxhues është pikënisje për diskutime të mëtejshme rreth asociacionit. Normalizimi është kyç për të dyja palët për të avancuar në rrugën e tyre përkatëse evropiane dhe gjithashtu do të kontribuojë në stabilitetin, zhvillimin dhe prosperitetin e të gjithë rajonit”, deklaroi komisioneri evropian.

    Në lidhje me aplikimin e Kosovës në Bashkimin Evropian, Varhelyi deklaroi se pakoja e ardhshme e zgjerimit do të vlerësojë progresin që ka bërë Kosova.

    “Pakoja e ardhshme e zgjerimit 2023 do të ishte sigurisht një mundësi tjetër për të vlerësuar progresin që ka bërë Kosova, sepse ne jemi të qartë dhe jemi të përkushtuar se reformat e BE-së janë të nevojshme, do të sjellin prosperitet, stabilitet dhe paqe në Kosovë, si dhe në rajonin më gjerë. Kështu që unë besoj në mbështetjen e Parlamentit Evropian për t’iu bërë jehonë këtyre mesazheve dhe për të mbetur e angazhuar me Kosovën dhe në Kosovë, dhe më shumë se kurrë BE-ja duhet t’i përmbushë këto zotime dhe ta bëjë realitet perspektivën e BE-së për Kosovën”, tha ai.

    Varhelyi, duke përmendur tashmë procesin e përfunduar rreth liberalizimit të vizave dhe vendimin që më largu nga 1 janari i vitit të ardhshëm shtetasit kosovarë mund të udhëtojnë lirshëm në zonën Shengen, tha se ky është një sinjal se vendet e Ballkanit Perëndimor e kanë vendin në familjen evropiane.

    Komisioneri evropian përgëzoi Kosovën për përafrimin e politikës së jashtme me atë të BE-së duke dënuar agresionin rus në Ukrainë.

    “Më në fund të gjashtë vendet e Ballkanit Perëndimor kanë qasje pa viza në BE. Ky është një tjetër sinjal pozitiv për të gjithë rajonin dhe një tjetër angazhim se e ardhmja e Ballkanit Perëndimor qëndron brenda Bashkimit Evropian… Qeveria e Kosovës ka marrë qëndrime të qarta duke dënuar agresionin ushtarak të Rusisë kundër Ukrainës dhe duke u rreshtuar me deklaratat dhe sanksionet e BE-së kundër Rusisë dhe Bjellorusisë. Ne e mirëpresim këtë përkushtim të qartë me vlerat dhe qëndrimet e BE-së”, deklaroi Varhelyi.

    Varhelyi tha seKosova vazhdon përpjekjet e saj për të përmbushur reformat në lidhje me BE-në, duke përfshirë fushat kyçe si luftën kundër korrupsionit dhe krimit të organizuar. Ai shtoi se në përpjekjet e luftës kundër korrupsionit, ka nevojë për përmirësimin e zbatimit të kuadrit të përgjithshëm ligjor.

    “Nevojiten përpjekje të vazhdueshme për të arritur hetime më proaktive, vendime gjyqësore përfundimtare, dhe konfiskim përfundimtar të pasurisë. Për sa i përket krimit të organizuar, raporti i komisionit përcakton se është bërë progres i kufizuar në hetimin dhe ndjekjen penale të rasteve të krimit të organizuar. Ne gjithashtu do të donim të shihnim një ritëm më të shpejtë të reformave duke përfshirë kuvendin, që ka një rol kritik për të luajtur në avancimin e agjendës së qeverisë drejt BE-së. Ne mirëpresim përpjekjet e Kosovës për të përmirësuar efikasitetin, integritetin dhe profesionalizmin e gjyqësorit”, vijoi Varhelyi.

    Megjithatë, Varhelyi shtoi se administrimi i përgjithshëm i drejtësisë vazhdon të jetë i ngadaltë, joefikas dhe i cenueshëm ndaj ndikimeve të panevojshme. Ai shtoi se këto përpjekje duhet të respektojnë rekomandimet e Komisionit të Venecias për këtë çështje të cilat ne i kemi mirëpritur.

    Duke u ndalur te ekonomia, komisioneri evropian u shpreh se sfidat më të mëdha janë në sektorin energjetik. Ai përmendi mbështetjen e BE-së prej 75 milionë eurosh si pjesë e pakos për të përballur këtë krizë.

    “Në frontin ekonomik, BE-ja dhe Kosova po përballen me sfida të përbashkëta, energji dhe produkte të tjera, inflacion dhe shqetësime për të ardhmen. Siç theksoi komisioni në raportin e tij, Kosova ka bërë progres në kriteret ekonomike dhe është në një fazë të hershme të zhvillimit të një ekonomie funksionale. Ekonomia tregoi elasticitet gjatë pandemisë, megjithatë sfidat strukturore të gjata si ekonomia joformale e përhapur, prevalenca e lartë e korrupsionit, dhe sundimi i përgjithshëm i dobët i ligjit vazhdojnë të pengojnë sektorin privat. Sektori i energjisë mbetet gjithashtu një shkak për shqetësim, jo vetëm për Kosovën, por për shumë nga partnerët tanë në Ballkanin Perëndimor”, tha ai.

    Varhelyi tha semë shumë fonde do të vihen në dispozicion për të mbështetur Kosovën me rritjen e tranzicionit të saj të gjelbër.

    Ai kërkoi nga Kosova që të shtojë përpjekjet e saj për të përfituar plotësisht nga mundësitë e ofruara në planin e investimeve ekonomike për Ballkanin Perëndimor dhe IPA III.

    Ai tha se mirëpresin tri marrëveshjet e arritura në kuadër të procesit të Berlinit në fund të vitit të kaluar, porse Kosova duhet të angazhohet në mënyrë konstruktive në iniciativat e bashkëpunimit rajonal në mënyrë që të mundësohet përparim i mëtejshëm.

     

  • BE: Roli i Ekipit Menaxhues përfundon vetëm kur të miratohet statuti

    BE: Roli i Ekipit Menaxhues përfundon vetëm kur të miratohet statuti

    Roli i Ekipit Menaxhues për statutin e Asociacionit të komunave me shumicë serbe në Kosovë përfundon vetëm kur ai statut të miratohet, prandaj, sipas Bashkimit Evropian, vendimi i Qeverisë së Kosovës për ta shkarkuar atë është në kundërshtim me marrëveshjen.

    Kështu ka thënë të enjten në një konferencë për shtyp në Bruksel zëdhënësi i Bashkimit Evropian për politikë të jashtme dhe siguri, Peter Stano, duke u përgjigjur në disa pyetje lidhur me rolin e Ekipit Menaxhues.

    Ministri i Administrimit të Pushtetit Lokal në Qeverinë e Kosovës, Elbert Krasniqi, më 3 maj ka liruar nga detyra anëtarët e Ekipit Menaxhues.

    Ekipi në fjalë, i përbërë nga katër serbë nga Kosova, mori pjesë në takimin e fundit të dialogut në nivel të lartë, ku edhe paraqiti draftin e parë të statutit të Asociacionit të komunave me shumicë serbe, propozim i cili menjëherë u hodh poshtë nga kryeministri i Kosovës, Albin Kurti.

    Për më tepër, Kurti tha se koordinatorja e këtij ekipi, Danijella Vujiçiq, “është në konflikt interesi”, sepse ajo ka dhënë betimin si deputete në Kuvendin e Republikës së Serbisë.

    I pyetur se pjesë e cilit delegacion ishte Ekipi Menaxhues në takimin e fundit, Stano tha se ai ekip mori pjesë “si delegacion më vete” dhe se “ishin ftuar të vijnë dhe t’i bashkohen takimit për një pikë të rendit të ditës”.

    “Ata nuk ishin pjesë e asnjërit delegacion, as të Serbisë e as të Kosovës”, deklaroi Stano.

    Zëdhënësi i BE-së tha se përbërja e këtij ekipi “është në përputhje me marrëveshjen e dialogut”.

    “Palët ishin pajtuar rreth përbërjes së Ekipit Menaxhues. Anëtarët e Ekipit Menaxhues janë propozuar nga Serbia dhe zyrtarisht janë emëruar nga Kosova”, sqaroi Stano.

    Sipas BE-së, tha Stano, “marrëveshjet e dialogut qartë thonë se ekipet menaxhuese duhet të ekzistojnë derisa të miratohet statuti i Asociacionit”.

    “Ekipi Menaxhues propozoi dhe paraqiti draftin e parë, që do të thotë se nisën procesin e jo që procesi mori fund. Prandaj, vendimi për ta shkarkuar Ekipin Menaxhues shkel tekstin dhe frymën e marrëveshjes”, theksoi Stano.

    Pati edhe disa pyetje të gazetarëve rreth asaj se deri kur mund të vazhdohet në këtë mënyrë dialogu, me refuzime të njëpasnjëshme të palëve.

    “Jeta është e vështirë, e dialogu është edhe më i vështirë”, u përgjigj zëdhënësi i BE-së duke përsëritur se arritja e marrëveshjes është e domosdoshme që palët të ecin para në procesin e integrimit evropian dhe se, në rast të dështimit, do të ketë pasoja, përfshirë edhe ato financiare.

    Në pyetjen se a mund të thuhet se ekziston marrëveshja në tërësi, pasi presidenti i Serbisë, Aleksandar Vuçiq, ka përsëritur se ai “ia ka bërë të qartë BE-së se nuk do t’i zbatojë të gjitha pikat e marrëveshjes”, Stano ritheksoi se “Marrëveshja ekziston“ dhe se “përfaqësuesi i lartë, Joseph Borrell, e ka bërë të qartë se “Deklarata e lëshuar nga BE-ja, është parë dhe është pranuar edhe nga presidenti i Serbisë, Aleksandar Vuçiq, edhe nga kryeministri i Kosovës, Albin Kurti, dhe nga kjo buron edhe obligimi i palëve për ta zbatuar”.

    Ky zëdhënës i Bashkimit Evropian përmendi edhe Deklaratën për të Zhdukurit si dëshmi të progresit në dialog dhe shprehu bindjen e Bashkimit Evropian se palët do të punojnë për ta zbatuar këtë marrëveshje dhe për të zbuluar fatin e personave të zhdukur gjatë luftës.

    Kosova dhe Serbia kanë arritur marrëveshje për formimin e Asociacionit në vitin 2013, ndërsa për parimet e tij janë dakorduar në vitin 2015.

    Në vitin 2016, Ministria e atëhershme e Administrimit të Vetëqeverisjes Lokale në Kosovë ka emëruar Ekipin Menaxhues për hartimin e draft-statutit.

    Por, marrëveshja për Asociacion nuk është zbatuar kurrë, për shkak të këmbënguljes së Beogradit që ai të ketë kompetenca të gjera. Prishtina i ka refuzuar ato, me arsyetimin se mund ta kërcënojnë funksionalitetin e shtetit./REL/

  • Escobar: Implementimi i marrëveshjes së Ohrit, nis me krijimin e Asociacionit

    Escobar: Implementimi i marrëveshjes së Ohrit, nis me krijimin e Asociacionit

    I dërguari i posaçëm amerikan për Ballkanin Perëndimor, Gabriel Escobar në një takim virtual me gazetarët, ka folur për takimin e djeshëm në Bruksel.

    Escobar ka thënë se implementimi i marrëveshjes së arritur në Ohër, fillon me themelimin e Asociacionit.

    “Para takimit të djeshëm në Bruksel kemi diskutuar për implementimin e marrëveshjes së arritur në Ohër. Implementimi i saj fillon me themelimin e Asociacionit”, tha Escobar.

    Ai shtoi se tani në javët e ardhshme do të ketë takim në nivel të kryenegociatorëve dhe është koha që të lëvizim përpara.

    “Normalizimi është i përqendruar në të drejtat e pakicave, veçanërisht të serbëve. Është pritshmëria dhe kërkesa jonë të ecim përpara me këtë”, tha Escobar.

    Liderët e Kosovës dhe Serbisë gjatë takimit të djeshëm në Bruksel shprehën qëndrime të kundërta për themelimin e Asociacionit të komunave me shumicë serbe në Kosovë, por u pajtuan për Deklaratën e të Zhdukurve nga koha e luftës.

  • Kryeministri Kurti publikon versionin e tij për Asociacionin

    Kryeministri Kurti publikon versionin e tij për Asociacionin

    Kryeministri i Kosovës, Albin Kurti, ka publikuar mbrëmë pas mesnatës vizionin e tij për Asociacionin e komunave me shumicë serbe.

    Pas takimit të 2 majit në Bruksel, Kurti tha se draft-statuti i ekipit menaxhues anëtare e të cilit është një deputete serbe, mbetet i papranueshëm për Kosovën.

    Kurti tha se ky ekip tashmë është dekomisionuar.

    “Një draft-statut i tillë çfarë lexuam është fundamentalisht i papranueshëm me kushtetutën e Kosovës, ligjshmërinë dhe të drejtat në Kosovë. Përkundër kësaj ne jemi të interesuar të gjejmë zgjidhje dhe përkitazi me këtë unë kam prezantuar një draft-vizion se çfarë do të ishte korniza që rregullon të drejtat e pakicave në Kosovë”, tha ai”, tha Kurti në Twitter, ku edhe ka publikuar draft-vizionin e tij që e paraqiti në takimin me Vuçiqin e Borrellin.

     

  • Muja: Vuçiq përmendi Asociacionin e 2013, por tha se Kurti nuk e bënë atë lloj asociacioni

    Muja: Vuçiq përmendi Asociacionin e 2013, por tha se Kurti nuk e bënë atë lloj asociacioni

    Deputeti i LV-së, Armend Muja, përmes një statusi në profilin e tij në facebook, ka reaguar pas deklaratave të presidentit serb pas takimit të sotëm në Bruksel.

    Muja tha se presidenti Vuçiq po i referohet Asociacionit të vitit 2023, por që ky i fundit e di se Kurti nuk e bën atë lloj asociacioni.

    “Vuçiq kur flet për Asociacionin gjithnjë e thekson obligimin e para 10 viteve, pra 2013, ndërkohë që tha që është e qartë që Kurti nuk e bën atë lloj asociacioni. Ajo çka vazhdimisht edhe e kemi deklaruar: I vetmi problem i Kosovës është trashëgimia nga dialogu 2011-2020 dhe se sot jemi në betejën e zhbërjes së këtyre dëmeve”, ka shikruar Muja. /atvlive.tv

  • Kurtit i kërkohët kujdes me Asociacionin

    Kurtit i kërkohët kujdes me Asociacionin

    Statuti i asociacionit të komunave me shumicë serbe, pritet të jetë tema kyçe e takimit të 2 majit, mes kryeministrit të Kosovës Albin Kurti e presidentit Serb Aleksandër Vuqiq.

    Andaj kreut të qeverisë së Kosovës po i kërkohet që të ketë kujdes e të mos bojë gabime.

    Madje sipas opozitës, draft-statuti i asociacionit, fillimisht duhet të marrë vlerësimin e kushtetueses para se të aprovohet nga qeveria.

    “Për neve si LDK, marrëveshja e Ohrit, ka gjëra të cilat kanë qenë të papranueshme, sidomos pika e shtatë ku flet për vetëmenaxhimin, ndërkohë në tërë këtë dokument nuk i referohet fare Gjykatës Kushtetuese…Filtri i vetëm është Gjykata Kushtetuese, nuk ka filtër tjetër, prandaj duhet të dihet kjo, nuk ka mundësi që të implementohet asgjë tjetër që është në kundërshtim me Kushtetutën e Kosovës”, tha deputet i LDK-së, Driton Selmanaj.

    Por nga partia në pushtet, ua heqin dronë opozitës.

    “Kryeministri ka deklaruar prej takimit të Ohrit se është i gatshëm të prezantojë një draft-statut në bazë të tri parimeve të cilat nuk janë assesi në kundërshti as me vendet e Bashkimit Evropian…Në këto parime që assesi nuk ka kompetencë ekzekutive dhe ndërhyrje në sistemin kushtetues, por në bazë të rendin kushtetues të Kosovës ndërtohet një draft, i cili diskutohet”, tha deputetja e LV-së, Mimoza Kusari Lila.

    Sidoqoftë, për njohësit e procesit të dialogut, asociacioni nuk duhet renditur ndër gjërat e para për të cilat duhet diskutuar, pasi ka shumë tema tjera më me interes.

    “Do të diskutohet për Asociacionin, por besoj se do të ketë diskutime më të mëdha për vet implementimin e marrëveshjes sepse ende ka çështje të hapura. Senkuencimi i pikave të marrëveshjes, qëllimi është që të ketë një zbatim të njëkohshëm të saj, në mënyrë që mos të ngutet Kosova në zbatimin e disa pikave dhe të kemi një situatë që Serbia nuk e implementon marrëveshjen, ndërsa Kosova e zbaton atë”, tha njohësi i procesit të dialogut, Seb Bytyqi.

    Takimi i 2 majit mes kryeministrit Kurti e presidentit Serb Aleksandër Vuqiq, vjen pas takimit të 18 marsit në Ohër, kur edhe u dakordun për planin e zbatimit të marrëveshjes së arritur në Bruksel me 27 shkurt. /atvlive.tv

  • Kurti: Isha i gatshëm ta shkruaj vet draft-statutin për Asociacionin, s’më lanë

    Kurti: Isha i gatshëm ta shkruaj vet draft-statutin për Asociacionin, s’më lanë

    Kryeministri i Kosovës, Albin Kurti, tha se ka qenë i gatshëm që vet ta shkruaj draft-statutin e Asociacionit.

    Por sipas tij, një gjë e tillë nuk është pranuar nga palët në takimin e Ohrit.

    “Në takimin e Ohrit kam pranuar që draft-statutin ta shkruaj unë por me ato tri shtyllat parimore që duhet pranuar parimisht. Një gjë e tillë u refuzua dhe mua mu tha nga ndërmjetësit që këtë duhet ta bëjë ekipi menaxhues si pasojë e marrëveshjeve të mëhershme në dialogun e Brukselit para një dekade”.

    “Pra tash i përket ndërmjetësit që ta përcaktojë agjendën e takimit të datës 2 maj, ndërkaq unë do ta takoj në një konferencë ndërmjetësin Lajçak”, tha Kurti.

    “Nuk ka anëtar të grupit punues nga ana jonë. Unë e kam zëvendësin tim i cili në portofolin e tij është përgjegjës për integrimet evropiane”.

    “I përket ekipit menaxhues që të shfaqet por ministri Elbert Krasniqi i ka bërë ftesë për takim atyre por që nuk kanë pranuar”, tha tutje Kurti.

    Shefi i ekzekutivit foli edhe për zgjedhjet në veri, raporton EO.

    “Ne kemi bërë fushatë vazhdimisht. Unë kam pasur takime e fushata është zhvilluar nga kandidatët për kryetar të komunave atje. Mirëpo fushatë më të egër kundër serbëve të Kosovës moti nuk ka pasur e udhëhequr e financuar nga Beogradi dhe ekzekutuar nga elemente kriminale”, tha Kurti.