ATV

Tag: Albin Kurti

  • Kosova përkujton viktimat e sulmit të 11 shtatorit në SHBA

    Kosova përkujton viktimat e sulmit të 11 shtatorit në SHBA

    Përgatiti: Sara Shehu

    Krerët e institucioneve të Kosovës kanë nderuar viktimat e sulmit terrorist të 11 shtatorit të vitit 2001, në Shtetet e Bashkuara të Amerikës.

    Gjatë homazheve te pllaka përkujtimore “Kosova Kujton”, kryeministri Albin Kurti së bashkë me Ministren e Jashtme, Donika Gërvalla, dhe zëvendësambasadoren e SHBA-së, Alyson Grunder, është thënë se që nga ajo kohë cilësori “terrorizëm” u bë një nga fjalët kyçe të fillimshekullit XXI.

    Në nderim të viktimave edhe liderët e partive opozitare kanë përkujtuar sulmin e 11 shtatorit.

    “Populli i Kosovës, misionet, të zgjedhurit e Kosovës, shqiptarët kudo që jeni, bashkëndjejmë me popullin amerikan, jo vetëm në këtë ditë. Përvjetori i sulmeve terroriste në tokën amerikane, një tokë e lirë e që mbrojti lirinë tonë dhe demokracinë në gjithë botën. Edhe unë bashkë me kolegë ashtu si të gjithë në këtë ditë vazhdojmë të qëndrojmë dhe qëndrojmë përjetë me Amerikën”, tha kryetari i AAK-së, Ramush Haradinaj.

    Veç homazheve, gjatë së hënës në Kosovë janë organizuar edhe disa aktivitete.

    “Prej vitit 2001 ne si shoqatë, jo vetëm si shoqatë, por si pjesëtarë të popullit të Kosovës, pjesëtarë të popullit shqiptar, kemi bërë veprime, respekte, solidarizime me popullin mik, aleat, me mikun tonë strategjik, Shtetet e Bashkuara të Amerikës. Në këtë mënyrë, kemi dashur të dërgojmë mesazhe së pari për popullin amerikan dhe institucioneve që populli i Kosovës, në veçanti populli shqiptar, është falënderues, nuk i harron veprimet e tyre dhe presim shumë përkrahje në të ardhmen. E dimë që keni bërë shumë edhe ekonomikisht, politikisht dhe ushtarakisht, mirëpo ne në emër të shoqërisë civile kërkojmë që të bëni pak më shumë. E di që herë pas here s’kemi qenë në nivelin e detyrës, mirëpo, kërkojmë nga ju dhe nga institucionet e juaja qendrore, sepse e dimë që keni forcë dhe mundësi dhe të loboni pak më shumë dhe të detyroni pesë vendet evropiane ta njohin shtetin e Kosovës ”, tha kryetari i shoqatës “Miqtë e Amerikës”, Agim Rexhepi.

    “Dua t’ju falënderoj për atë që keni bërë të gjithë këtu dhe për vëmendjen e mediave për këtë, të rinjtë, dhe përsëri ju falënderoj shumë, ju nuk e keni harruar kurrë premtimin tuaj, ndaj faleminderit”, tha Edward Anderson, drejtor i Departamentit për Sigurinë dhe Sigurinë Publike në OSBE.

    Në shenjë solidariteti zjarrfikësit në Prishtinë për disa minuta rresht aktivizuan sinjalizuesit.

    “Ne paraprakisht jemi përgatitur për këtë ditë, për 11 shtator. Në nderim të viktimave të rënë, por edhe falënderim për shtetin e Amerikës. Siç dihet një shtet i cili na ka përkrahur në kohët më të vështira, duke përfshirë këtu edhe një falënderim për ish-presidentin, Bill Clinton. Aktivitetet tona kanë qenë sot në orën 08:30 në mëngjes, e kemi bërë pastrimin e platesë dhe të shtatores të ish-presidentit Bill Clinton. Kemi bërë edhe ndërrimin e flamurit, ndërsa në orën 10:55, katër automjete të zjarrfikësve edhe me 20 trupa të zjarrfikësve kemi marrë pjesë në këtë manifestimin për 11 shtator”, tha Abdusamed Shkodra nga Brigada e Zjarrfikësve në, Prishtinë.

    22 vjet më parë, 3 mijë njerëz kanë vdekur nga sulmet terroriste, në Kullat Binjake në Nju Jork, në Pentagon dhe në një fushë në Pensilvani.

  • Kurti në 22-vjetorin e 11 Shtatorit: Terrorizmi u godit globalisht, por mbetet kërcënim i paparashikueshëm

    Kurti në 22-vjetorin e 11 Shtatorit: Terrorizmi u godit globalisht, por mbetet kërcënim i paparashikueshëm

    Kryeministri Albin Kurti ka kujtuar sulmin terrorist të 11 Shtatorit në Shtetet e Bashkuara të Amerkës në 22-vjetorin e kësaj ngjarjeje.

    “Si rrallë herë ndonjë epokë gjatë historisë, mijëvjeçari i tretë i erës sonë mori mbiemër duke fituar epitet qysh në fillim të tij. Cilësori “terrorizëm” u bë një nga fjalët kyçe të fillimshekullit XXI, këtu e 22 vite më parë, kur avionë civilë të marrë peng nga terroristë, u drejtuan mbi Kullat Binjake në Nju Jork, duke i shembur ato gjatë kryerjes së sulmit terrorist që shkaktoi tronditje globale dhe pati ndikimin më të shumëanshëm të kohës sonë”, ka shkruar Kurti në Facebook.

    Sipas Kurtit, terrorizmi është goditur shumë në nivel global, ndonëse mbetet kërcënim i paparashikueshëm për sugiruinë botërore.

    “22 vite pas sulmeve terroriste të 11 shtatorit, Al-Kaida është më e dobët se kurrë më parë, ndërkohë që i është vrarë lideri i dikurshëm Osama bin Laden si dhe i janë kufizuar shumëfish mundësitë dhe hapësirat e veprimit. Terrorizmi në nivel global ka marrë shumë goditje, por ai vazhdon të mbetet një nga kërcënimet më të paparashikueshme për sigurinë botërore, një kërcënim i atillë që nuk duhet të injorohet dhe që duhet konsideruar në çdo përllogaritje të vigjilencës së institucioneve shtetërore të sigurisë”.

    “Demokracia dhe drejtësia, barazia dhe pluralizmi, liritë dhe të drejtat, thajnë çdo kënetë ku mbin terrorizmi”.

  • ​Kurti dhe zëvendësambasadorja amerikane përkujtojnë sulmin e 11 shtatorit

    ​Kurti dhe zëvendësambasadorja amerikane përkujtojnë sulmin e 11 shtatorit

    Kryeministri i Kosovës, Albin Kurti, zëvendëskryeministrja Donika Gërvalla dhe zëvendësambasadorja e Shteteve të Bashkuara të Amerikës në Kosovë, Alyson Grunder kanë bërë homazhe te pllaka përkujtimore “Kosova Kujton” e viktimave të sulmeve të 11 Shtatorit 2001 në Shtetet e Bashkuara të Amerikës, bëhet e ditur në një komunikatë për media.

    Shtetet e Bashkuara, por edhe mbarë bota përkujtojnë sot 22 vjetorin e sulmeve të përgjakshme të 11 shtatorit 2001. Sulmi ndaj kullave binjake ishte kryer me 11 shtator 2001 nga një grup prej 19 vetash rrëmbyes radikalë, 15 prej të cilëve ishin nga Arabia Saudite, dy nga Emiratet e Bashkuara Arabe, një nga Egjipti dhe një nga Libani.

    Fillimisht njëri aeroplan i rrëmbyer ishte përplasur mbi kullën veriore të Qendrës Botërore të Tregtisë në Nju Jork, duke krijuar një çarje të thellë në faqen e ndërtesës dhe duke shkaktuar zjarr kurse 17 minuta më vonë, një aeroplan tjetër pasagjerësh përplaset mbi kullën jugore. Në sulmin e 11 shtatorit 2001 humbën jetën rreth 3 mijë persona.

    Në mesin e viktimave në kullat binjake ishin 2.752 persona prej tyre 343 zjarrfikës dhe 60 policë. Pjesa më e madhe e viktimave ishin civilë të 70 kombësive të ndryshme. Ceremonitë në Nju Jork dhe Uashington do të nisin me një minutë heshtje, në kohën kur ndodhën sulmet. Ekspertët shprehen se 11 shtatori 2001, ndryshoi shumë gjëra në botë. Këto ngjarje u bënë shkak për nisjen e një fushate të gjerë të udhëhequr nga SHBA-të kundër terrorizmit.

  • Lojërat Mesdhetare 2030, Kurti flet për përgatitjet e investimet e Kosovës

    Lojërat Mesdhetare 2030, Kurti flet për përgatitjet e investimet e Kosovës

    Kryeministri Albin Kurti ka thënë se nga Heraklioni i Greqisë për në Prishtinë është kthyer me kujtime të mira, përgjegjësi të reja, e plane të shumta investive.

    “Lojërat Mesdhetare 2030 po i sjellim në Kosovë”.

    “7 vjet përgatitje dhe mbi 250 milionë euro investime publike, për t’u bërë nikoqir i 26 shteteve pjesëmarrëse e 23 disiplinave sportive, mijëra atletëve e dhjetëra mijëra turistëve, në ngjarjen më të madhe të sportit në historinë e vendit. Na priftë e mbara!”, ka thënë Kurti në Facebook.

  • Kurti: Kosova e Ukraina i takojnë BE-së, e përbashkëta jonë është se i kemi fqinjët agresivë

    Kurti: Kosova e Ukraina i takojnë BE-së, e përbashkëta jonë është se i kemi fqinjët agresivë

    Kryeministri i vendit, Albin Kurti, ka thënë se ngjashmëritë e Kosovës dhe Ukrainës janë në atë se të dyja vendet i takojnë Bashkimit Evropian.

    Përveç aspiratës në BE, Kurti tha se Kosova e Ukraina e kanë edhe një të përbashkët – të dyja vendet kanë fqinj verior të cilët janë agresivë dhe nuk duan të ballafaqohen me të kaluarën.

    “Por në të kundërtën duan që të kenë të gjithë apo së paku një pjesë të territorit tonë. Në anën tjetër Moska e Beogradi janë të lidhura në mes vete në mënyrë direkte, dhe këto lidhje janë në sektorin energjik, kulturor e historik por po ashtu edhe në aktivitete ushtarake”, tha Kurti për median polake “TVP World”.

    Tutje, Kurti tha se politikani më prorus në Serbi është Aleksandar Vulini, dhe këto lidhje mes Beogradit e Kremlinit, sipas tij, e bëjnë edhe më tepër të njëjtë situatën e Kosovës dhe Ukrainës.

    “Serbia nuk është Rusi, ne e kemi NATO-n në Kosovë. Serbia do të dështojë. Ne kemi arritur marrëveshje për de-eskalim në veri dhe kemi marrëveshje për normalizimin e marrëdhënieve, e cila në qendër ka njohjën de-facto”, tha ai.

  • Kurti: Greqia, afër njohjes së Kosovës

    Kurti: Greqia, afër njohjes së Kosovës

    Në një intervistë për mediumin polak “TVP World”, Kurti ka theksuar se Kosova po punon në planin diplomatik të saj për të arritur njohjen nga pesë vendet e mbetura të BE-së.

    “Kemi punuar fuqishëm në aspektin diplomatik, që ato t’i bashkohen shumicës së vendeve të BE-së. Greqia është e para kur vie në radhën e vende për t’u afruar drejt njohjes së pavarësisë së Kosovës’, ka theksuar Kurti.

    Ky i fundit ka deklaruar se Kosova ka aplikuar për pranim në Bashkimin Evropian dhjetorin e vitit që lamë pas pavarësisht faktit që nuk e njohin pesë vende të BE-së.

    Kurti ka deklaruar se dëshira e Kosovës për t’u bërë pjesë e Bashkimit Evropian nuk ushqehet vetëm nga interesat vetjake, por se dhe vet Kosova do të donte të kontribonte në BE.

    “E bëjmë për vendin tonë duke plotësuar vlerat, standardet dhe parimet, por në të njëjtën kohë, kemi nevojë për ndihmën e Bashkimit Evropian. Gjithëpërfshirja jonë në BE nuk i shërben vetëm interesit tonë sepse edhe ne duam të kontribuojmë”, ka deklaruar Kurti.

    Ai tha gjithashtu se Kosova, duke pasur parasysh kostot e saj të ulëta të funksionimit për sa i përket marrjes me qira të lokaleve dhe fuqisë punëtore, mund të jetë një destinacion ideal për investitorët e huaj.

  • Kurti për Kushtetutën e Kaçanikut: Kosova Republikë u bë fakt historik më 7 shtator e realitet politik më 17 shkurt

    Kurti për Kushtetutën e Kaçanikut: Kosova Republikë u bë fakt historik më 7 shtator e realitet politik më 17 shkurt

    Kryeministri i vendit, Albin Kurti, ka shkruar ne 33 vjetorin e shpalljes së Kushtetutës së Kaçanikut, duke kujtuar ata që dhanë kontributin në shkrimin e saj.

    Kurti tha se autori i saj, profesor Gazmend Zajmi dhe një grup i përbërë nga juristët më të zotë të Kosovës, u mblodhën fshehur në Prishtinë për të ndarë detyrat mes tyre. Sipas Kurtit, do ta hartonin një kushtetutë demokratike për ta shpallur Kosovën republikë,

    “Ata do ta hartonin një kushtetutë demokratike për ta shpallur Kosovën republikë. Preambulen e Kushtetutës dhe kapitullin Dispozitat e Përgjithshme, e mori përsipër ta hartonte Profesor Kurtesh Saliu. Kapitullin Rendi Ekonomik dhe Social, do ta hartonte Profesor Ejup Statovci. Kapitullin Liritë, të Drejtat dhe Detyrat e Njeriut dhe Qytetarit e mori për detyrë ta hartonte Profesor Ismet Salihu. Kapitullin Kushtetutshmëria dhe Ligjshmëria, do ta hartonte Fatmir Fehmiu. Kapitulli Organet Republikane iu caktua për detyrë Halit Muharremit. Kurse kapitulli Dispozitat Kalimtare dhe të Fundit, do ta hartonte Profesor Riza Smaka. Në një kohë rekorde prej më pak se një muaji, ata e përgatitën Kushtetutën e Republikës së Kosovës, tekstin e së cilës, teknikisht e shkroi Nexhmije Ajazi”, ka shkruar Kurti ne Facebook.

    Kurti foli edhe për rrethant në të cilat u miratua kjo Kushtetutë.

    “Qëllimisht u vendos që mbledhja të mbahej në qytetin e Kaçanikut, qëllimisht në një ditë të premte dhe qëllimisht në mbrëmje vonë. Organizimi i mbledhjes së Kuvendit të Kosovës, në Kaçanik i ishte ngarkuar një këshilli të përbërë nga Hebib Shehu, Bedri Kyçyku, Fadil Raka, Refik Raka, Sabit Raka dhe Maksut Hoxha. Shumë njerëz të tjerë, kryesisht banorë të Kaçanikut u angazhuan në këtë organizim”.

    “Një grup i parë do t’i priste delegatët 3 kilometra jashtë Kaçanikut. Derisa të vinte koha e caktuar për mbledhje, një grup i dytë do t’i sistemonte delegatët duke i strehuar ata te familjet Shehu, Lika, Burrniku, Kuka, Shurdhani etj. Një grup tjetër i përbërë nga ish policë, të prirë nga Tahir Çaka, e kishte për detyrë të ofronte sigurinë për mbajtjen e mbledhjes dhe të kujdestaronte”.

    “Ata ishin të armatosur dhe të gatshëm për t’i mbrojtur delegatët në rast se ky organizim merrej vesh nga policia. Një grup ishte caktuar për përcjelljen e delegatëve pas takimit. Paraprakisht ishin menduar tri rrugë për tërheqjen e delegatëve nga Kaçaniku: rruga e parë, ishte përmes Hanit të Elezit; rruga e dytë shkonte nëpërmjet fshatrave Gajre, Ivajë, Kotlinë dhe Glloboqicë; si dhe rruga e tretë kalonte nga Stanet e Brrutëve në Dërnogllavë dhe prej andej në Bllacë”, shkroi Kurti.

    Më tej, kreu i qeverisë tha se delegatët që kishin ardhur direkt në mbledhje, priteshin te stacioni i trenit në Kaçanik nga delegati Naser Gashi bashkë me Emin Rekën, të cilët sipas tij, i shoqëronin delegatët deri në Shtëpinë e Kulturës.

    “Në rast se gjërat do të shkonin keq, ishte menduar që mbledhja të mbahej në shkollën e fshatit Nikaj të Kaçanikut, ky si një plan B, për të cilin ishte angazhuar Shefket Guri.

    Bibliotekistët Isa Gashi dhe Haki Raka do ta përgatisnin sallën ku do të mbahej mbledhja në Shtëpinë e Kulturës në Kaçanik, kurse Refik Verbani do të kujdesej për teknikën e zërimit”.

    “Për ta dëshmuar këtë ngjarje historike, ishin ftuar gazetari Zenun Çelaj, fotoreporteri Enver Bylykbashi dhe kameramani Mamer Dogani. Të tyre janë fotografitë dhe videoincizimet aq të mirënjohura të asaj mbledhje. Nënshkrimet e delegatëve ishin marrë që më parë, por në mbledhje arritën të merrnin pjesë rreth 80 nga 111 delegatët e Kuvendit të Kosovës”.

    “Kështu plot 33 vite më parë, më 7 shtator të vitit 1990, në ora 20:00, në sallën e Shtëpisë së Kulturës në Kaçanik nisi mbledhja që do ta shpallte Kosovën republikë. Mbledhja u drejtua nga Iljaz Ramajli, Nënkryetari i Kuvendit të Kosovës, kurse Rezolutën për Republikën e Kosovës e lexoi Halit Muharremi, Sekretari i Kuvendit”.

    “Kushtetuta e Republikës së Kosovës, u miratua “duke u mbështetur në traditën demokratike shekullore përparimtare e liridashëse të kombit shqiptar” si dhe “duke u mbështetur në luftën çlirimtare”, përveçse “në pajtim të plotë me parimet e demokracisë e të barazisë dhe në bazë të së drejtës për vetëvendosje”. Ajo e shprehu vullnetin politik të qytetarëve të Kosovës në fillim të një dekade luftërash në Jugosllavi, një dhjetëvjetësh nga i cili Kosova doli e çliruar nga Serbia pushtuese, falë rezistencës së popullit të saj dhe luftës së drejtë të Ushtrisë Çlirimtare të Kosovës, të mbështetur nga aleatët tanë”, shkroi Kurti.

    Kurti, më tej tha se nga parullë popullore e demonstratave të vitit 1981, “Kosova Republikë”, u bë fakt historik në Kaçanik më 7 shtator 1990, përpara se të bëhej realitet politik më 17 shkurt 2008.

  • Kurti në Estoni, pjesë e samitit global të partneritetit për qeveri të hapur

    Kurti në Estoni, pjesë e samitit global të partneritetit për qeveri të hapur

    Përgatiti: Nexhmie Hyseni

    Sulmet kibernetike ndaj Kosovës nga aleatët e Rusë po ndikojnë dukshëm në dialogun Kosovë – Serbi, tha këtë të mërkurë Kryeministri i Kosovës, Albin Kurti, në samitin Global të Partneritetit për Qeveri të Hapur.

    Ai në këtë panel diskutimi që po mbahet në Tallin të Estonisë, tha se këto veprime në Kosovë janë duke u intensifikuar.

    “Në kohë të ndjeshme kur vendi ynë është i përkushtuar ndaj procesit të lehtësuar nga Bashkimi Evropian dhe Shtetet e Bashkuara të Amerikës, për normalizimin e marrëdhënieve me fqinjin tonë verior, Serbinë, si dhe pjesëmarrjen e plotë të të gjitha pakicave në procesin demokratik të vendit, pa ndërhyrje të huaja, këto kërcënime kibernetike, si dezinformimi, bullizmi kibernetik dhe format e tjera, janë veçanërisht të dëmshme. Kjo është arsyeja pse angazhimi dhe pjesëmarrja jonë në këtë ngjarje janë më të rëndësishme se kurrë”, tha Kurti.

    Në muajin gusht, Kosova u anëtarësua në Partneritetin për Qeveri të Hapur, që numëron 75 vendeve anëtare.

    Duke iu drejtuar përfaqësuesve të shteteve anëtare dhe aktivistëve të shoqërisë civile, kryeministri tha se ndihet i nderuar që është në mesin e tyre.

    “Duke qenë pjesë e organizatës Kosova vendoset në skenën ndërkombëtare, si një vend i përkushtuar për t’i hapur parimet e qeverisë dhe për këtë arsye i sinjalizon komunitetit global se Kosova është e përkushtuar ndaj qeverisjes së mirë, praktikave dhe është e gatshme të mbahet përgjegjëse për angazhimet e saj dhe të mësojë nga ata që kanë marrë praktikat e qeverisjes së hapur”, u shpreh Kurti.

    Në Tallin të Estonisë, kryeministri Kurti u takua me homologen e tij Kaja Kallas, me të cilën folën për situatën politike në vend dhe në rajon. Kurti zhvilloi takim edhe me kryeshefin Ekzekutiv të Partneritetit për Qeveri të Hapur, të cilit ia nënvizoi rëndësinë dhe nevojën për mbështetje nga kjo organizatë në fillimin e zbatimit të Planit Kombëtar, teksa shprehu falënderimin e tij për bashkëpunimin e deritanishëm.

  • Kurti: Po vuajmë nga masat ndëshkuese të BE-së

    Kurti: Po vuajmë nga masat ndëshkuese të BE-së

    Përgatiti: Fitim Majkovci

    Kryeministri i Kosovës, Albin Kurti, i ka quajtur të padrejta masat ndëshkuese të Bashkimit Evropian të vendosura ndaj Kosovës.

    Duke folur për këto masa dhe situatën në veri të vendit me katër kryetarët, Kurti tha se zgjedhja e tyre në krye të komunave, erdhi si pasojë e bojkotit të Listës Serbe në zgjedhjet e prillit.

    “Fillimisht, u larguan nga institucionet, më pas refuzuan të marrin pjesë në zgjedhjet për kryetar komunash. Për shkak të situatës në veri të Kosovës, ndaj vendit tonë demokratik janë në fuqi disa sanksione, apo masa të Bashkimit Evropian. Ne po vuajmë për shkak të këtyre sanksioneve. Kryesisht komuniteti ynë i biznesit, por edhe shërbimet shtetërore”, ka deklaruar Kurti.

    Duke shpresuar për ndryshimin e qëndrimit ndërkombëtar ndaj Kosovës, Kurti foli për afatin më të afërt për organizimin e zgjedhjeve të jashtëzakonshme në Veri.

    “Shpresoj se ata do të ndryshojnë mendje. Ne po punojmë me komunitetin ndërkombëtar për ta bërë të mundur këtë. Unë jam duke punuar shumë dhe duke përgatitur gjithçka që zgjedhjet në veri të mbahen këtë vjeshtë”, deklaroi Kurti.

    Në një intervistë për mediat sllovene, Kurti ka folur edhe për marrëdhëniet në Ballkanin Perëndimor, me ç’rast tha se raportet mes vendeve në rajon mund të normalizohen vetëm me njohje të ndërsjellë mes shteteve.

  • Çitaku: Kurti duhet t`i vizitojë ish-krerët e UÇK-së në Hagë dhe të mësojë nga ta

    Çitaku: Kurti duhet t`i vizitojë ish-krerët e UÇK-së në Hagë dhe të mësojë nga ta

    Nënkryetarja e PDK-së, Vlora Çitaku, ka deklaruar se kryeministri i Kosovës, Albin Kurti, duhet të shkojë dhe t`i vizitojë ish-krerët e UÇK-së në Hagë.

    Në një intervistë për gazetën Nacionale, ajo ka thënë se gjatë kësaj vizite ai duhet të mësojë nga Thaçi dhe të tjerët, të cilët po gjykohen nga Gjykata Speciale.

    Ajo i ka kritikuar videot e VV-së, të cilat kanë për synim ta kritikojnë punën e ish-presidentit të Kosovës.

    “Presidenti Thaçi në intervistën e tij, kur flet për Kosovën dhe aleatët, e thotë që falënderimi më i madh për mbështetësit e Kosovës është suksesi ynë. Edi Rama e ka bërë Shqipërinë pikë referente në turizëm, kulturë, art. Përtej kësaj, Edi ka vendosur ta marrë mbi supe një betejë jo të lehtë e me shumë kokëçarje për të, mbrojtjen publike dhe diplomatike të luftës së UÇK-së. Kryeministri Kurti jo vetëm që nuk i ka vizituar, po në videot e VV vazhdon ta përgojojë Presidentin Thaçi, ndonëse ai nuk është këtu për t’i dhënë përgjigje. Kryeministri duhet të shkojë në Hagë, t’i takojë, e që besa edhe të mësojë nga ata”, ka thënë Çitaku.