ATV

Blog

  • Qeveria miraton shpronësimet në veri, njofton rritje buxheti për komunat

    Qeveria miraton shpronësimet në veri, njofton rritje buxheti për komunat

    Me lavde për rritjen e buxhetit për komunat për vitin e ardhshëm dhe akuza për opozitarizëm nga to, kryeministri Albin Kurti nisi mbledhjen e Qeverisë.

    Kryeministri tha se buxheti i përgjithshëm komunal më 2024 do të jetë më i larti ndonjëherë – 742 milionë euro apo rritje prej 35%, sikurse edhe granti komunal me 284 milionë euro.

    Pasi tha se ka rritje të granteve specifike për arsim e shëndetësi, për 18 dhe 16 për qind, kryeministri njoftoi se javën tjetër do të takojë kryetarët e komunave.
    “Këto janë dëshmi të forta, sepse janë fakte të qarta të mbështetjes dhe gatishmërisë së Qeverisë për bashkëpunim të afërt me komunat. Dikur niveli qendror i bënte opozitë qeverisjes lokale, sot qeverisja lokale në disa raste po përdoret për opozitë nivelit qendror, gabim ka qenë atëherë, gabim tash”, tha Kurti.

    Ekzekutivi i dha vlerësim pozitiv Projektligjit për Zgjedhjet e Përgjithshme, i cili mes tjerash rregullon organizimin e zgjedhjeve brenda dhe jashtë Kosovës – përfshirë mënyrën e votimit të mërgatës.

    Pas disa muajsh bllokade të punimeve për rrugën dhe stacionin e Policisë në fshatin Dren të Leposaviqit, pas dëgjimeve publike me banorët, Qeveria miratoi vendimin preliminar për shpronësime për projektet infrastrukturore në këtë komunë dhe zonave të tjera me interes publik në Zubin Potok.

    “Zonat kadastrale, Bistricë, Bistricë e Shalës, Dren, Leshak dhe Koshtovë, komuna Leposaviq dhe zonat kadastrale Bërnjak, Zubin Potok, Bregu i Madh, Banjë, Jasenovik, komuna Zubin Potok… Departamenti i shpronësimit ka konstatuar se janë përmbushur në tërësi dispozitat ligjore dhe vendos që të procedojë në Qeverinë e Republikës së Kosovës, propozimin preliminar me të cilin miratohet ligjshmëria e procesit të shpronësimit për interes publik”, tha zëvendësministri i MMPHI-së, Avni Zogiani.

    Po ashtu, u mor vendimi preliminar për shpronësime në zonat përkatëse në Obiliq dhe Fushë-Kosovë për realizimin e projektit për ndërtimin e Parkut Fotovoltaik nga KEK-u, me kapacitet rreth 100 megavat orë energji.

    Ekzekutivi i dha mbështetje nismës për lidhjen e marrëveshjes ndërmjet Ministrisë së Bujqësisë dhe Gjermanisë, në vlerë të përgjithshme rreth 28 milionë euro, për promovimin e sipërmarrjes.

    Qeveria miratoi një pako të re sanksionesh ndaj Rusisë dhe Bjellorusisë, në përputhje me përditësimin e sanksioneve të vendosura nga SHBA-ja dhe BE-ja, në raport me zhvillimet në Ukrainë. /atvlive.tv

    Edicionin Qendror të lajmeve e gjeni në videon më poshtë:

  • Imeri: Asnjë qeveri nuk e ka pasur prioritet shëndetësinë

    Imeri: Asnjë qeveri nuk e ka pasur prioritet shëndetësinë

    Kryetarja e FSShK-së, Tevide Imeri, në emisionin DIREKT në ATV, deklaroi se asnjë Qeveri nuk e ka pasur prioritet shëndetësinë.

    “Edi se shëndetësia ka një kosto jashtëzakonisht të lartë edhe kam thënë, e nuk kam me u ndalë duke e thënë se gati asnjëra Qeveri nuk e ka pasur prioritet shëndetësinë”, tha Imeri.

    Ajo tha se kur e gjithë Qeveria fokusohet kah shëndetësia, nuk mund të mos ndryshoje diçka për të mirë.

    “Kur e gjithë Qeveria fokusohet kah shëndetësia, nuk ka qare pa ndryshu diçka për të mirë. Unë nuk po them se mundemi me e ba për një mandat ose gjysmë mandati një shëndetësi si të shteteve të perëndimit, por megjithatë, këto çështje, shërbimet kryesore, ato duhet të ofrohen”, u shpreh Imeri. /atvlive.tv

    Emisionin e plotë e gjeni në videon më poshtë:

  • Ibrahimi: Qeveria po synon të përzihet në punët e komunave

    Ibrahimi: Qeveria po synon të përzihet në punët e komunave

    Drejtori ekzekutiv i Asociacionit të Komunave të Kosovës, Sazan Ibrahimi, në emisionin DIREKT në ATV, tha se Qeveria, me veprimet e saj, po synon të përzihet në kompetencat e komunave.

    “Kjo shihet edhe në bazë të ligjit për ndarje buxhetore të vitit 2023. Për herë të parë, në Republikën e Kosovës, një qeveri vendosë që 18 komunave të mos ua përkrahë asnjë projekt të ri për investime kapitale dhe kjo është e çuditshme. Në këtë rast, edhe Podujeva si komunë e Vetëvendosjes, nuk ka hy me asnjë projekt të ri kapital, nuk do të përkrahet nga niveli qendror”, tha Ibrahimi.

    Ai thotë se kanë ngritur disa herë shqetësime për tendencat e Qeverisë për centralizimin e kompetencave të nivelit lokal.

    “Ne kemi ngritë disa shqetësime. Është tendenca e centralizimit të kompetencave, tendenca e shtrirjes së duarve në kompetencat e autoriteteve lokale që nuk ka ndodh më parë, sepse këtë edhe Gjykata Kushtetuese po e thotë pastaj. Tendenca e marrjes së mjeteve vetanake. 100 milionë euro ishte tendenca vitin e kaluar, kur e ngritëm këtë shqetësim e pastaj 94 deputetë kërkuan nga Qeveria që mos t’ua marrë mjetet financiare komunave, mirëpo tash është duke i mbajtur pezul 37.5 milionë euro”, tha Ibrahimi. /atvlive.tv

    Emisionin e plotë e gjeni në videon më poshtë:

  • “Komunat po i bëjnë opozitë e qeverisë”, Ibrahimi i reagon Kurtit

    “Komunat po i bëjnë opozitë e qeverisë”, Ibrahimi i reagon Kurtit

    Drejtori ekzekutiv i Asociacionit të Komunave të Kosovës, Sazan Ibrahimi, në emisionin DIREKT në ATV, ka reaguar ndaj deklaratës së kryeministri Kurti, pasi ky i fundit ka thënë se Komunat në disa raste janë duke i bërë opozitë Qeverisë së tij.

    Ai tha se as logjikisht kjo gjë nuk ka mundësi me qenë e vërtetë që niveli lokal t’i bëjë opozitë nivelit qendror.

    “Nuk dua të hy në detaje se çfarë ka thënë kryeministri Kurti, por logjikisht nuk ka asnjë mundësi, asnjë shanse që niveli lokal të jetë opozitë e nivelit qendror. Jemi në një shtet demokratik, niveli lokal nuk mund të jetë opozitë. Komunat janë duke kërkuar një bashkëpunim të sinqertë me nivelin qendror, bashkëpunim ky që është duke munguar shumë”, tha Ibrahimi. /atvlive.tv

    Emisionin e plotë e gjeni në videon më poshtë:

  • “U ardh sëmundja prej Zotit, po kërkoj ndihmë prej QKUK të jenë më të shpejtë në operimin tim”

    “U ardh sëmundja prej Zotit, po kërkoj ndihmë prej QKUK të jenë më të shpejtë në operimin tim”

    Shemsi Hoti nga Mitrovica, polic i Republikës së Kosovës, ani pse tash e një kohë gjendet në pushim mjekësor për shkak se ka problem me filgjanin e kukës, , ai asnjëherë nuk kishte dëshirë largimin nga uniforma, për të cilën shërben tash e 20 vite.

    Nga dhjetori i vitit të kaluar, ai është në pushim mjekësor, dhe për t’u shëruar, atij i duhet vetëm operim, i cili është shtyrë tash e një kohë të gjatë, e gjithë kjo nga mungesa e protezave në QKUK.

    “Këtu në spitalin e Mitrovicës nuk ka proteza dhe mua më kanë thënë që krejt protezën e kukës me e ndërru, jo vetëm filgjani dhe nuk ka. Kam qenë edhe në QKUK në Prishtinë, ku kam shku me pyet dhe atje ka proteza, por pritja është shumë e madhe, sa që më kanë thënë se prej 2018-tës janë duke pritur njerëzit për operime”, tregon Hoti.

    Ai thotë se kjo sëmundje ndoshta i ka ardhur nga Zoti, por po kërkon ndihmë prej QKUK-së që të jenë më të shpejtë në sigurimin e protezës dhe operimit të tij. /atvlive.tv

  • ​Bie qarkullimi i industrisë minerare e gurore dhe asaj përpunuese

    ​Bie qarkullimi i industrisë minerare e gurore dhe asaj përpunuese

    Në muajin shkurt të vitit 2023, indeksi i qarkullimit në sektorët e industrisë, krahasuar me muajin e njëjtë të vitit paraprak, shkurt 2022 ishte: Furnizimi me ujë, veprimtaritë e menaxhimit dhe trajtimit të mbeturinave 0.45%, furnizimi me rrymë, gaz, avull dhe ajër të kondicionuar 0.03%, Industria nxjerrëse minierat dhe guroret minus -0.27% dhe Industria përpunuese minus -0.02%.

    Kjo u bë e ditur në raportin e publikuar për Statistikat Afatshkurtra të Industrisë, duke paraqitur Indeksin e vëllimit industrial për muajin shkurt nga Agjencia e Statistikave të Kosovës (ASK).

    Në këtë raport thuhet se indeksi i numrit të të punësuarve në sektorët e industrisë, krahasuar me muajin e njëjtë të vitit paraprak ishte: Furnizimi me ujë, veprimtaritë e menaxhimit dhe trajtimit të mbeturinave 0.00%, Industria nxjerrëse minierat dhe guroret -0.07%, Furnizimi me rrymë, gaz, avull dhe ajër të kondicionuar -0.03%, dhe Industria përpunuese -0.02%.

  • Kurti priti një delegacion të Këshillit të Ambasadorëve Amerikanë: ShBA, aleat i yni kyç

    Kurti priti një delegacion të Këshillit të Ambasadorëve Amerikanë: ShBA, aleat i yni kyç

    Kryeministri i Kosovës, Albin Kurti priti sot një delegacion të gjerë të Këshillit të Ambasadorëve Amerikanë. Marrëdhëniet Kosovë dhe Shtetet e Bashkuara të Amerikës shtrihen në sferën historike, ekonomike, të sigurisë dhe të mbrojtjes.

    Para ambasadorëve dhe mysafirëve të tyre, siç u bë e ditur nga qeveria, Kurti tha se ShBA-të janë partner, mik dhe aleat kyç i Kosovës.

    Ai i njoftoi ata për progresin ekonomik dhe demokratik të vendit si dhe për bashkëpunimin në rritje ndërmjet dy vendeve, duke veçuar këtu marrëveshjen prej 236.7 milionë dollarë me MCC-në të nënshkruar në vitin e kaluar dhe strehimin e refugjatëve afganë në Kosovë.

    “Gjatë bashkëbisedimit, kryeministri Kurti po ashtu veçoi katër fushat të cilat janë trajtuar me prioritet në buxhetin e vitit 2023; mbrojta, edukimi, bujqësia dhe shëndetësia, teksa iu përgjigj interesimit të ambasadorëve për to.”, u bë e ditur në komunikatë.

    Ambasadorët e përgëzuan kryeministrin dhe Kosovën për arritjet. Në mesin e tyre, ish-ambasadori amerikan, Thomas Riley, i cili tha se i vjen shumë mirë që qeveria jo vetëm që po përpiqet, por edhe po ka sukses.

    Gjithashtu, Kurti i informoi anëtarët e delegacionit vizitues me zhvillimet e fundit për sa i përket marrëdhënieve ndërmjet Kosovës dhe Serbisë, me dakordimin mbi Marrëveshjen bazë dhe planin e zbatimit, sjelljen dhe veprimet e Serbisë karshi tyre dhe me qëndrimet dhe propozimet e Republikës së Kosovës në takimin e javës së kaluar në Bruksel.

    Vizita e Këshillit të Ambasadorëve Amerikanë u organizua nga Këshilli i Ambasadorëve Shqiptarë, përfaqësues të së cilit ishin po ashtu prezentë në këtë takim.

    Këshilli i Ambasadorëve Amerikanë është shoqatë e ambasadorëve amerikanë me gjithsej 200 anëtarë, të cilët së bashku kanë shërbyer për mbi gjashtë dekada dhe për njëmbëdhjetë presidentë të Shteteve të Bashkuara të Amerikës.

  • Qeveria e lumtur me miratimin e raportit të KE-së për Kosovën

    Qeveria e lumtur me miratimin e raportit të KE-së për Kosovën

    Qeveria Kosovës ka përshëndetur miratimin e sotëm nga Parlamenti Europian të raportit për Kosovën, i cili, siç thotë Qeveria, evidenton suksese dhe mesazhe pozitive për vendin.

    “Forcimi i demokracisë, sundimi i ligjit, luftimi i korrupsionit, zhvillimi ekonomik dhe maturia institucionale e qeverisëse, janë vetëm disa nga shembujt e përmendur në këtë raport”.

    Zyra e Kryeministrit në komunikatën për media ka përmendur disa nga pjesët e këtij raporti ku lavdërohet Kosova, përfshirë edhe paragrafët përmes të cilëve PE kërkon që të mbështetet Kosova në rrugën e saj integruese.

    Komunikata e plotë:

    Qeveria e Republikës së Kosovës, përshëndet miratimin e sotëm nga Parlamenti Evropian të raportit për Kosovën, i cili evidenton suksese dhe mesazhe pozitive për vendin.

    Forcimi i demokracisë, sundimi i ligjit, luftimi i korrupsionit, zhvillimi ekonomik dhe maturia institucionale e qeverisëse, janë vetëm disa nga shembujt e përmendur në këtë raport.

    Theksohet dhe se Parlamenti Evropian mirëpret aplikimin e Kosovës për anëtarësim në BE, duke bërë thirrje për prezantimin e pyetësorit dhe përgatitjen e opinionit mbi aplikimin dhe rithekson mbështetjen për anëtarësimin e vendit në organizata ndërkombëtare, si Këshilli i Evropës, PFP e NATO-s dhe INTERPOL.

    Lavdëron Kosovën për aktivitetin e shtuar legjislativ në lidhje me reformat e agjendës evropiane dhe përparimin në zbatimin e prioriteteve të Agjendës së Reformave Evropiane II dhe forcimin e kapaciteteve institucionale.

    Mirëpret periudhën më të gjatë të stabilitetit politik deri më tani pas zgjedhjeve të vitit 2021.

    Në raport kërkohet nga shtetet anëtare, që nuk e kanë njohur ende Kosovën, ta bëjnë këtë pa vonesë të mëtejshme.

    Në mes të tjerash, në zhvillim ekonomik vlerëson pozitivisht përformancën e jashtëzakonshme të eksportit, rritjen ekonomike si dhe politikat për të lehtësuar ndikimin e pandemisë dhe të çmimeve të larta të energjisë për familjet dhe bizneset më të prekura.

    Në lidhje me procesin e dialogut, i bazuar në njohjen reciproke, Kosova vlerësohet si palë e përkushtuar dhe e angazhuar në mënyrë konstruktive. Ndërkohë, dënon Serbinë për veprimet përshkallëzuese të aktorëve të sponsorizuar nga ta, duke përfshirë bllokadat e paligjshme, sulmet e dhunshme dhe kërcënimin për veprime ushtarake, si dhe fushatën e tyre të çnjohjes dhe votën kundër anëtarësimit të Kosovës në Këshillin e Evropës.

    Në raport evidentohet dhe mirëpritet veçanërisht angazhimi dhe dialogu i shtuar me serbët e Kosovës gjatë vitit të kaluar.

  • I vazhdohet paraburgimi të dyshuarit për vrasjen makabre të nënës në Pejë

    I vazhdohet paraburgimi të dyshuarit për vrasjen makabre të nënës në Pejë

    Departamenti për Krime të Rënda i Gjykatës Themelore në Pejë, ia ka vazhduar paraburgimin të dyshuarit për vrasjen e nënës së tij në Pejë më 14 prill të këtij viti.

    Vendimi i Gjykatës ka ardhur në bazë të kërkesës për vazhdim të paraburgimit nga Prokurori i Shtetit i Prokurorisë Themelore të Pejës.

    Të pandehurit, sipas këtij aktvendimi, “i vazhdohet masa e paraburgimit, e cila mund të zgjasë nga data 14:05.2023 e gjer më datë 13.07.2023.

  • Hapet ekspozita për “Holokaustin sinti dhe romë”

    Hapet ekspozita për “Holokaustin sinti dhe romë”

    Organizata “Zëri i Romëve, Ashkalinjve dhe Egjiptianëve” në bashkëpunim me Ministrinë e Kulturës, Rinisë dhe Sportit, kanë hapur ekspozitën për “Holokaustin sinti dhe romë”, e cila do të jetë e hapur për vizitorë deri me 30 maj në Muzeun Kombëtar.

    Kryeministri i Albin Kurti deklaroi se gjenocidi ndaj romëve është lënë shpesh herë në harresë, megjithatë shtoi se romët dhe sintët nuk ishin vetëm viktima ishin edhe shembuj rezistues ndaj këtij projekti.

    “Kurrë mos e harro”, ky udhëzim për të kujtuar gjithmonë holokaustin ka një domethënie të veçantë për romët, sepse gjenocidi ndaj tyre është lënë shpesh herë në harresë. Andaj kjo ekspozitë ka një rëndësi përtej kufijve të Kosovës, është pjesë për të dokumentuar në hollësi gjenocidin ndaj romëve dhe sintëve që të mos harrohet kurrë. Me gjithë këtë romët dhe sintët nuk ishin vetëm viktima ishin edhe shembuj rezistues ndaj këtij projekti”, tha Kurti, transmeton KP.

    Ambasadori i Gjermanisë në Kosovë, Jorn Rohde tha se është dashur të kaloj një kohë e gjatë që Gjermania t’i njohë krimet ndaj romëve e sintëve.

    “Mbi 2 milionë romë e sintë janë vrarë në Gjermani e në gjithë Evropën, humbje e madhe. Dua të dënoj historinë tonë. Gjermania për një kohë të gjatë nuk i ka njohur krimet ndaj romëve. Gjithë përfshirja sociale është pjesë e procesit të Berlinit”, tha Rohde.

    Ai bëri thirrje të gjithëve ta vizitojnë këtë ekspozitë.

    Zëvendësministri i Kulturës, Rinisë dhe Sportit, Sylejman Elshani ka kujtuar të gjitha viktimat, ndërsa theksoi se një gjenocid që harrohet ka mundësi të përsëritet.