Blog

Komisioni Qendror i Zgjedhjeve ka bërë të ditur se po vazhdon procesi i regjistrimit të votuesve jashtë Kosovës për zgjedhjet e 7 qershorit, ndërsa interesimi i diasporës mbetet i lartë që nga hapja e aplikimeve më 6 maj.

Zëdhënësi i KQZ-së, Valmir Elezi, ka deklaruar se deri më 10 maj, në orën 10:00, përmes platformës elektronike janë pranuar gjithsej 36,154 kërkesa për regjistrim të votuesve jashtë vendit.

Sipas tij, deri tani janë aprovuar 25,376 aplikime, 2,961 janë refuzuar, ndërsa 7,797 të tjera mbeten në pritje të shqyrtimit.

“Nga aplikimet e aprovuara, 6,280 shtetas janë regjistruar për votim fizik në përfaqësi diplomatike, 701 për dërgimin e pakos me fletëvotim në kutinë postare të KQZ-së në Kosovë, ndërsa 18,395 kanë zgjedhur dërgimin e votës në kutitë postare jashtë Kosovës”, ka bërë të ditur Elezi.

Para nisjes së regjistrimit, KQZ ka miratuar listën e qendrave të votimit në përfaqësi diplomatike dhe ka përcaktuar numrin maksimal të votuesve që mund të regjistrohen për votim fizik jashtë vendit.

Sipas vendimit të institucionit zgjedhor, votimi do të organizohet në 48 përfaqësi diplomatike, përkatësisht në 33 ambasada dhe 15 konsullata, me gjithsej 70 vendvotime. Numri maksimal i votuesve që mund të regjistrohen për votim fizik është 66,450.

KQZ ka sqaruar se ky kufizim vlen vetëm për votimin fizik në përfaqësi diplomatike, ndërsa regjistrimi për votim përmes postës mbetet pa kufizim numerik. Në rast se plotësohet kapaciteti maksimal në një përfaqësi diplomatike, aplikuesit do të orientohen drejt formave të tjera të votimit me postë.

Ndërkohë, pas përvojës nga zgjedhjet e fundit, KQZ ka vendosur edhe kritere të reja për organizimin e votimit fizik jashtë vendit. Një përfaqësi diplomatike duhet të ketë të paktën 50 votues të regjistruar për të organizuar procesin e votimit fizik.

Në rast se numri i regjistrimeve mbetet nën këtë prag, votimi fizik nuk do të mbahet në atë përfaqësi diplomatike dhe votuesit do të kalojnë automatikisht në listën e votuesve me postë, për çka do të njoftohen nga KQZ.

Institucioni zgjedhor ka bërë të ditur gjithashtu se, sikurse në zgjedhjet e fundit lokale dhe parlamentare, votuesve të regjistruar për votim me postë do t’u dërgohet pakoja me fletëvotim në adresat e tyre.

Votimi në përfaqësi diplomatike do të mbahet më 6 qershor 2026, një ditë para zgjedhjeve në Kosovë. Procesi i votimit do të zhvillohet nga ora 07:00 deri në 19:00, sipas kohës lokale të shtetit përkatës.

Ndërsa votimi përmes postës do të nisë më 25 maj dhe do të zgjasë deri më 6 qershor.

Korporata Energjetike e Kosovës ka njoftuar se aksi rrugor Mirash- Bardhdhe anasjelltas do të mbyllet për qarkullim për një periudhë disa ditore, duke filluar nga e hëna.

Sipas njoftimit në Facebook, mbyllja e rrugës vjen si rezultat i fillimit të fazës së asfaltimit të këtij aksi, pas përfundimit të punimeve bazike me zhavorr në segmentin prej rreth 6.3 kilometrash.

Gjatë kësaj periudhe, qarkullimi do të ndalohet në të dy drejtimet, si për automjetet e KEK-ut, ashtu edhe për automjetet e qytetarëve dhe autobusët e transportit të punëtorëve.

“KEK do të njoftojë me kohë opinionin dhe qytetarët sapo të krijohen kushtet për qarkullim të sigurt dhe rikthim të plotë të trafikut në këtë aks rrugor. Gjatë kësaj periudhe, KEK i inkurajon të gjithë pjesëmarrësit në trafik që të shfrytëzojnë rrugët alternative, me qëllim të shmangies së vonesave dhe lehtësimit të zhvillimit të punimeve”.

“Aksi rrugor Mirash – Bardh paraqet një investim me rëndësi të madhe strategjike, duke qenë një rrugë jetike për funksionimin dhe operimet e Korporatës Energjetike të Kosovës, por njëkohësisht edhe një lehtësim i konsiderueshëm për komunitetin dhe qytetarët e zonës përreth. Përmes këtij projekti, KEK po vazhdon përkushtimin për përmirësimin e infrastrukturës, rritjen e sigurisë në komunikacion dhe krijimin e kushteve më të mira si për operimet e korporatës, ashtu edhe për qytetarët”, thuhet mes tjerash në njoftimin e KEK-ut.

Kryeministri në detyrë, Albin Kurti, njofton se Krenare Çerkini, i është bashkuar Lëvizjes Vetëvendosje dhe do të jetë pjesë e listës së kësaj partie për deputete.

Kurti në postimin e tij shkruan se “Krenarja vjen nga Ferizaj dhe përfaqëson një profil të ri të lidershipit – një kombinim mes shkëlqimit akademik, angazhimit publik dhe përkushtimit qytetar ndaj arsimit dhe rinisë”.

Postimi i plotë:

Një ngjarje e rëndë ka ndodhur në Lezhë mbrëmjen e kaluar, ku ish-kryetari i PD-së në njësinë administrative të Dajçit në Zadrimë të Lezhës, është sulmuar fizikisht.

53-vjeçari, Sokol Toma, është goditur me sende të forta, teksa është dërguar tek Spitali i Traumës për mjekim më të specializuar, raporton Top Channel.

Sipas burimeve të mediumit, agresorët i kanë thyer këmbët dhe i kanë prerë veshin 53-vjeçarit. Ndërkohë zbulohet se Toma është shtruar në pavijonin e ortopedisë.

Ngjarja ka ndodhur rreth orës 22:00 në autostradën Mamurras-Laç, në Sanxhak, teksa autorët i kanë marrë edhe telefonin.

Dyshohet se persona të paidentifikuar e kanë goditur me sende të forta, duke i shkaktuar dëmtime të rënda në trup.

Policia po punon për identifikimin dhe kapjen e autorëve, teksa ende nuk dihen arsyet përse është dhunuar.

Bashkimi Evropian ka reaguar zyrtarisht pasi një ditë më parë kreu i PD-së, Sali Berisha, sulmoi ambasadorin e BE-së në Shqipëri, Silvio Gonzaton.

Një zëdhënës i unionit iu përgjigj sulmeve personale kundër Ambasadorit të BE-së, Silvio Gonzato, në Ditën e Evropës. BE-ja shkruan se i dënon sulmet personale, teksa shton se janë të papranueshme.

“Deklarata të tilla janë të papranueshme. BE-ja dënon fuqimisht sulmet personale të bëra në Ditën e Evropës kundër Ambasadorit të Bashkimit Evropian në Shqipëri. Ambasadori i BE-së ka vepruar në çdo kohë me profesionalizëm dhe integritet të plotë. Ne kemi besim të plotë tek ai dhe puna e tij”, thuhet në reagimin e tyre.

Një ditë pasi kreu i PD-së, Sali Berisha, sulmoi ambasadorin e BE-së në Shqipëri, Silvio Gonzaton, kanë reaguar edhe kolegët e tij europianë.

Në një deklaratë të përbashkët, Ambasadorët e BE-së i kanë dalë në mbrojtje Gonzatos, duke u shprehur besimplotë ndaj profesionalizmit të tij.

“Në Ditën e Evropës, ne qëndrojmë të bashkuar në mbështetje të Ambasadorit të BE-së dhe ekipit të tij, dhe riafirmojmë besimin tonë të plotë në profesionalizmin, integritetin dhe shërbimin e tyre të përkushtuar”, thuhet në reagimin e tyre.

Kreu i PD-së Sali Berisha gjatë bashkëbisedimit me qytetarët në rrjetet sociale një ditë më parë dha dhe një koment për ambasadorin Gonzato.

“Sa i përket ambasadorit aktual, unë kam shprehur: ky sillet si të ishte ambasadori i Ramës, pasi ky zotëri, në mënyrë të pretenduar, ka transmetuar në Bruksel trillimet më të pavërteta ndaj opozitës, sikur ne nuk jemi për integrimin. Për të mos treguar shumë gjëra të tjera.

Ne jemi ata që i themi gjërat hapur dhe ai është përpjekur në shumë mënyra ta paraqesë opozitën si jo të orientuar drejt integrimit, por ka dështuar. Gonzato është unifikuar komplet me Edi Ramën. Unë partnerëve europianë do t’u them të vërtetën dhe vetëm të vërtetën”, u shpreh Berisha./tch/

Një person i kërkuar me urdhër arrest ndërkombëtar është arrestuar të shtunën nga Policia e Kosovës, në bashkëpunim me njësitë policore të rajonit të Gjakovës.

Sipas njoftimit zyrtar, arrestimi është realizuar më 10 maj 2026, rreth orës 13:10, nga Drejtoria për Bashkëpunim Ndërkombëtar Policor.

Personi i arrestuar është shtetasi kosovar me inicialet H.M., i cili kërkohej përmes INTERPOL, bazuar në një urdhër arrest ndërkombëtar të lëshuar nga autoritetet e Shqipërisë.

Ai dyshohet për përfshirje në veprën penale “Vjedhje e rëndë”.

Pas arrestimit, me urdhër të prokurorit kujdestar, i dyshuari është dërguar në ndalim policor për 48 orë, ndërsa ndaj tij pritet të vazhdojnë procedurat e mëtejme ligjore në koordinim me autoritetet kompetente.

Policia e Kosovës ka theksuar se mbetet e përkushtuar në bashkëpunimin ndërkombëtar policor dhe në zbatimin e urdhër arresteve ndërkombëtare, me qëllim luftimin e krimit dhe forcimin e sundimit të ligjit.

Peja është tronditur këtë të diel nga një tragjedi e rëndë familjare, ku dy vëllezër kanë humbur jetën brenda pak orësh.

Fillimisht, Gazmend (Shefqet) Maloku, i njohur nga të afërmit dhe miqtë si “Meni”, humbi jetën aksidentalisht, në një rast që u raportua gjatë ditës.

Por dhimbja për familjen Maloku nuk përfundoi me kaq. Vetëm pak kohë më vonë, edhe vëllai i tij, Bashkim (Shefqet) Maloku, ndërroi jetë pas një gjendjeje të rënduar shëndetësore.

Sipas burimeve, Bashkimi ka ndërruar jetë gjatë trajtimit në spital, brenda rreth një ore pasi kishte marrë lajmin për humbjen tragjike të vëllait të tij.

Dy humbje të njëpasnjëshme në të njëjtën ditë kanë lënë të pikëlluar familjarët, miqtë dhe qytetarë të shumtë në Pejë.