ATV

Blog

  • Stoltenberg: Samiti i NATO-s në Vilnius përfundon me mbështetje të fortë për Ukrainën

    Stoltenberg: Samiti i NATO-s në Vilnius përfundon me mbështetje të fortë për Ukrainën

    Samiti i NATO-s në Vilnius përfundoi dje me mbështetje të fortë për Ukrainën, pasi aleatët ranë dakord për një paketë trepjesëshe “për ta sjellë Ukrainën më afër aleancës”, ndërsa vendet e G7-tës nënshkruan një deklaratë të përbashkët mbi garancitë e sigurisë të Kievit.

    Në fjalën e tij përmbyllëse, shefi i NATO-s Jens Stoltenberg tha se aleatët sapo përfunduan një samit “historik” në Lituani me marrëveshje mbi “planet më të detajuara dhe më të fuqishme të mbrojtjes që nga Lufta e Ftohtë”.

    Duke nënvizuar se riafirmuan gjithashtu për ta sjellë Ukrainën më afër aleancës dhe për të rritur mbështetjen për një kohë të gjatë, Stoltenberg tha se NATO dhe Ukraina do të takohen në Këshillin NATO-Ukrainë për të diskutuar çështjet si partnerë të barabartë tani e tutje.

    “Unë mirëpres gjithashtu njoftimet e reja të mëdha të mbështetjes ushtarake të bëra nga aleatët e NATO-s në këtë samit”, tha ai.

    Duke kujtuar ndihmën ushtarake të ofruar nga aleatët me vlerë dhjetëra miliarda dollarë dhe trajnimin e dhjetëra mijëra trupave ukrainase nga aleatët, ai tha se “ndërsa Ukraina vazhdon të çlirojë territorin, ne do të qëndrojmë pranë tyre për aq kohë sa të duhet”.

    Ai përmendi gjithashtu paketën e re shumëvjeçare të ndihmës për Ukrainën, e cila u miratua të martën, për të ndihmuar në kalimin e Ukrainës nga standardet e epokës sovjetike në ato të NATO-s dhe për t’i bërë forcat e saj plotësisht të ndërveprueshme me NATO-n.

    “Ukraina është tani më afër NATO-s se kurrë më parë”, tha Stoltenberg, duke iu referuar heqjes së kërkesës për një plan veprimi anëtarësimi për Ukrainën.

    “Ne do të lëshojmë një ftesë për Ukrainën për t’u bashkuar me NATO-n kur aleatët të bien dakord që kushtet janë përmbushur”, përsëriti ai. “Kjo dërgon një mesazh të qartë, të fortë dhe të bashkuar nga samiti ynë i Vilniusit”, shtoi shefi i NATO-s.

    Lidhur me takimin e tij me partnerët e Indo-Paqësorit, Stoltenberg tha se “vetëbesimi global i Pekinit dhe lufta e Moskës kundër Ukrainës kërkojnë një koordinim edhe më të ngushtë midis NATO-s, BE-së dhe partnerëve tanë të Indo-Paqësorit”.

    NATO po përballet me situatën “më serioze” të sigurisë në dekada, por aleatët po i bëjnë ballë sfidës, tha ai dhe shtoi se “NATO është më e bashkuar se kurrë, duke qëndruar e fortë në mbrojtje të popullit tonë dhe vlerave tona”.

    Ai falënderoi gjithashtu presidentin lituan Gitanas Nauseda dhe qeverinë e vendit për pritjen e samitit historik. /Abc news

  • Dacic i ankohet kryediplomatit izraelit: Vendimi për ta njohur Kosovën dëmtoi marrëdheniet Serbi-Izrael

    Dacic i ankohet kryediplomatit izraelit: Vendimi për ta njohur Kosovën dëmtoi marrëdheniet Serbi-Izrael

    Ministri i Punëve të Jashtme të Serbisë, Ivica Dacic, është takuar sot me homologun e tij nga Izraeli, Eli Cohen, duke thënë se vendimi i Izraelit për ta njohur pavarësinë e Republikës së Kosovës ka dëmtuar raportet në mes të Serbisë dhe Izraelit.

    Ai tutje ka thënë se pret që marrëdhëniet me Izraelin të rivendosen pas njohjes së pavarësisë së Kosovës, si dhe të ruhet miqësia me popullin hebre.

    “Ne vlerësojmë negativisht dhe mendojmë se vendimi i qeverisë izraelite për njohjen e Kosovës i ka dëmtuar marrëdhëniet tona, duke pasur parasysh se për ne çështja e Kosovës është e një rëndësie të jashtëzakonshme historike dhe jo vetëm për shkak të së kaluarës sonë, por edhe për shkak të identitetin kombëtar të serbëve. Në këtë drejtim e kemi krahasuar vazhdimisht qëndrimin tuaj ndaj Jerusalemit me qëndrimin tonë ndaj çështjes së Kosovës”, ka deklaruar Daçiq.

  • Biden: Dua që anëtarësimi i Ukrainës në NATO të miratohet ‘në një orë’, por pas luftës

    Biden: Dua që anëtarësimi i Ukrainës në NATO të miratohet ‘në një orë’, por pas luftës

    Joe Biden jep miratimin për anëtarësimin e Ukrainës në NATO, por pas luftës. Ai tha se e kupton zhgënjimin e Volodymyr Zelensky për të mos marrë ndihmën që i nevojitet.

    Para se të nisej për në Evropë, Biden tha në një intervistë për CNN se ai nuk mendon se tani është koha e duhur që Ukraina të anëtarësohet në NATO. Nëse do të bashkohej tani, “ne do të ishim në luftë me Rusinë,” shpjegoi ai.

    I pyetur nga një gazetar se sa shpejt pas luftës do të dëshironte që Ukraina të anëtarësohej në NATO, Biden u përgjigj: Për një orë e 20 minuta.

    Gjatë takimit të tij me Zelensky ai ka thënë se mezi pret ditën kur ai do të mirëpresë vendin e tij në NATO, në një përpjekje për të zbutur komentet e tij të fundit se tani nuk është koha që Kievi të aplikojë për anëtarësim në Aleancën e Atlantikut të Veriut.

    “Guximi dhe vendosmëria juaj kanë qenë një model për të gjithë botën,” i tha Biden Zelenskyt, gjatë takimit të tyre në margjinat e samitit të NATO-s në Vilnius.

    Presidenti i SHBA tha se e kuptonte zhgënjimin e liderit ukrainas që nuk mori ndihmën që i nevojitej shpejt. “Unë ju premtoj se SHBA po bën gjithçka që mundet për të marrë atë që ju nevojitet,” i siguroi ai gazetarët. “Mezi pres ditën kur ne festojmë anëtarësimin tuaj zyrtar në NATO,” shtoi ai. /Abc news

  • Hjredini tregon pse duhet të inkorporohet Konventa e OKB-së për Personat me Aftësi të Kufizuara në Kushtetutën e Kosovës

    Hjredini tregon pse duhet të inkorporohet Konventa e OKB-së për Personat me Aftësi të Kufizuara në Kushtetutën e Kosovës

    Habit Hjredini nga Zyra për Qeverisje të Mirë, në emisionin CONTEXT në ATV, tha se inkorporomi i Konventës Ndërkombëtare për Personat me Aftësi të Kufizuara në Kushtetutën e Kosovës, do të ketë përfitime të shumta personat me aftësi të kufizuara në Kosovë.

    “Çdo punë që bëhet nga ana e institucionit tonë është në përputhje me këtë konventë. Natyrisht që mbas shumë analizave që kemi bërë, nuk ka qenë e mjaftueshme kjo. Çfarë ne përfitojmë dhe pse do duhej të inkorporojmë në Kushtetutën e Republikës këtë konventë, natyrisht që mund të përfitojmë shumë qytetarët tanë, personat me aftësi të kufizuara, sepse kjo konventë ka pesëdhjetë nene dhe shumica nga neneve i dedikohen aspektit të shëndetësisë, qasjes, edukimit, mirëqenies dhe specifikave të tjera”, tha Hjredini.

    Ai përmendi se një nga nenet e kësaj konvente, jo vetëm që obligon secilin shtet që të krijojë kushte për personat me aftësi të kufizuara, por edhe ta adaptojë edhe legjislacionin në përputhje me konventën.

    “Është një nga nenet që kërkohen nga secili shtet që Qeveria të krijojë një strukturë, një komitet, një këshill nacional që merret dhe koordinon punën në nivel vendi, gjë për të cilën, ne si qeveri kemi bërë. E kemi këshillin nacional për personat me aftësi të kufizuar që është kompetent për të koordinuar procesin e politikave, po ne e shohim me vlerë këtë konventë, sepse jo vetëm që i obligon qeverinë tonë në dy nivelet për të marrë veprime konkrete në aspektin e shëndetësisë, mirëqenies sociale të punësimit, por në të njëjtën kohë, nenet e konventës thonë që në momentin kur ratifikohet kjo konventë, shteti, do të thotë qeveria, obligohet që legjislacionin që e ka, ta adaptojë në përputhje me konventën”, tha Hjredini. /atvlive.tv

    Emisionin e plotë e gjeni në videon më poshtë:

  • Maliqi: Kosova ende qëndron larg në përfshirjen e personave me aftësi të kufizuara në shoqëri

    Maliqi: Kosova ende qëndron larg në përfshirjen e personave me aftësi të kufizuara në shoqëri

    Afrim Maliqi, përfaqësues i HANDIKOS, në emisionin CONTEXT në ATV, vlerësoi se Kosova ende qëndron keq në ofrimin e shërbimeve ndaj personave me aftësi të kufizuara.

    “Sfidat janë të shumta, si në sfida në qasje, si në arsim, vetëm, unë gjithmonë dalja dhe them se pasqyra më e mirë se si kuptohet, se ku qëndron Kosova, ku qëndrojmë ne, tregon me vetë faktin numrit i vogël i fëmijëve të përfshirë në arsim. Vlerësohet se vetëm 12 përqindje, por edhe nëse janë 15 për qind, ku është 85 përqindëshi. Institucionet e tona duhet të mirren me atë numër dhe kjo krejt për arsye të mungesës së shërbimeve të duhura shëndetësore, mungesës së kujdestarëve apo asistentëve personal, mungesës së pajisjeve ndihmëse teknologjike, qasjes, infrastrukturës, transportit të qasshëm, që fëmijët nuk mund të vijnë”, tha Maliqi.

    Ai bëri një krahasim se si shteti ndërmerr masa ndaj familjeve të fëmijëve që nuk kanë kufizime në sistemin arsimor, ndërsa kjo, sipas tij nuk ndodh edhe me familjet e fëmijëve me aftësi të kufizuara.

    “Po qe se sot një fëmijë, i cili nuk ka kufizime, nuk drejtohet në shkollë, atëherë institucionet ndërmarrin përsipër masa ndaj tyre, ndërsa paramendoni, ndaj një familje e cili e cila ka një fëmijë me aftësi të kufizuar, absolut nuk ndërmarrin masa. Pse? Për shkak se nëse ndërmarrin masa, atëherë duhet t’i plotësojnë kushtet, e kushtet nuk mund të plotësohen. Është duke u folur, u fole edhe në vitin 2022, po flitet për personat me aftësi të kufizuar, çka është e mirë, ka përpjekje, mirëpo ende duhet të punohen edhe më shumë”, tha Maliqi.

    Ai përmendi se një ndër shkaktarët të cilët i përjashtojnë personat me aftësi të kufizuara nga shoqëria, janë paragjykimet e shoqërisë ndaj tyre.

    “Në vendin tonë vlerësohet se janë tre shkaktarë të cilët i përjashtojnë personat me aftësi të kufizuara nga shoqëria. E para janë paragjykimet, të cilat i ka shoqëria ndaj personave me aftësi të kufizuar të cilat shkaktojnë kompleks, madje edhe izolim për shkak se ata e pranojnë atë gjendje dhe izolohen. Po kjo ndodh për arsye se, nëse sot marrim për shembull një familja nëse lind një fëmijë me aftësi të kufizuara, nëse nëna është duke punu, ajo detyrimisht largohet prej pune në mënyrë që të kujdeset për fëmijën apo ndodh edhe të i rriturie njëjta. Kjo familje varfërohet edhe më tepër. Prandaj shpeshherë edhe thuhet i kam dëgju fjalët që thonë se familjet po i mshefin personat me aftësi të kufizuara. Kjo nuk është fshehje, aspak, po ata e pranojnë për shkak se atë izolim të pavullnetshëm, të padëshirë, për shkak se institucionet nuk u ofrojnë shërbime të duhura shëndetësore rehabilituese fillimisht”, tha Maliqi.

    Shkaktar tjetër, sipas Maliqit është edhe qasshmëria e personave me aftësi të kufizuara.

    “Qasshmëria në objekte në rrugë në trotuare në çdokund. Po te qasshmëria hyn në komunikimi, gjuha e shenjave, mënyrat e komunikimit për grupet e ndryshme të personave me aftësi të kufizuara, që kjo i pengon personat me aftësi të kufizuar në pjesëmarrje, e po ashtu edhe legjislacioni apo politika duke mos i përfshi fillimisht personat me aftësi të kufizuara në grupe punuese, në të drejtat që ata i artikulojnë në mënyrën më të mirë të mundshme, për shkak se vlerësohet se personat me aftësi të kufizuar janë ekspertë sa i përket aftësisë së kufizuar, mirëpo janë persona të tjerë profesionistë, e kur kombinohen këto dy atëherë situata mund të shkojë deri te përmirësimi”, u shpreh Maliqi. /atvlive.tv

    Emisionin e plotë e gjeni në videon më poshtë:

  • Pacolli për Mimozën: Karma ekziston!

    Pacolli për Mimozën: Karma ekziston!

    Kryetari i AKR-së, Behgjet Pacolli, ka thënë se “karma ekziston” për deputeten Mimoza Kusari-Lila e cila dikur ishte bashkëpartiake e tij.

    “Gjërat nuk po shkojnë edhe aq mirë për njerëzit që në të kaluarën më lënduan, më zhgënjyen, u përpoqën të më mashtronin. Unë nuk jam shqetësuar kurrë për këtë, sepse kam qenë i bindur që nuk kam pse të hakmerrem me askënd. Karma ekziston!”, shkroi Pacolli pas incizimeve të reja të publikuara ku është e përfshirë Kusari-Lila dhe Sllavko Simiq i Listës Serbe.

    Mimoza Kusari – Lila ka qenë pjesë e AKR-së për një kohë të gjatë, ndërsa me këtë parti pati qenë edhe ministre në Qeverinë e Kosovës të drejtuar nga Hashim Thaçi. Po kjo parti e pati nominuar për kryeministre.

    Po me AKR garoi për kryetare të Gjakovës, ku më 2013 fitoi zgjedhjet por në gjysmë të mandatit doli nga partia dhe krijoi Alternativën të cilën e udhëheq edhe sot dhe është në koalicion me Lëvizjen Vetëvendosje të Albin Kurtit.

  • Sanksionet ndaj shefit të BIA-s, porosi për Vuçiqin

    Sanksionet ndaj shefit të BIA-s, porosi për Vuçiqin

    Mesazh politik për presidentin e Serbisë po vlerësohet të jetë futja në listën e sanksioneve amerikane e shefit të BIA-së, Aleksandër Vulin.

    Përmes këtyre veprimeve, përçohet edhe porosia se siguria dhe stabiliteti në Ballkanin Perëndimor janë të rëndësishme për Shtetet e Bashkuara të Amerikës.

    Vendosja e shefit të inteligjencës serbe në listën e sanksioneve nga Thesari amerikan, sipas Ehat Miftarajt, lidhet edhe me zhvillimet e fundit në veri të Kosovës.

    Aktualisht, shefi i inteligjencës serbe dyshohet se është përfshirë në krim të organizuar transatlantik, derisa përmes autoritetit të tij, ka mbështetur Rusinë në aktivitetin e saj për cenimin e stabilitetit në Ballkanin perëndimor, thuhet mes tjerash në deklaratën e Thesarit amerikan.

    Pasi administrata amerikane e renditi në listë të zezë, një pjesë e opozitës serbe ka kërkuar largimin e menjëhershëm të Aleksandar Vulinit nga drejtimi i BIA-s.

    Ndërkaq, presidenti serb Aleksandar Vucic nuk u përgjigj nëse Vulini duhet të shkarkohet, por tha se për sanksionet ndaj tij do të flasë nesër, në detaje. /atvlive.tv

    Edicionin Qendror të lajmeve në ATV e gjeni në videon më poshtë:

  • Kurti mbështet zgjedhjet e parakohshme, por mohon dorëheqjen e kryetarëve

    Kurti mbështet zgjedhjet e parakohshme, por mohon dorëheqjen e kryetarëve

    Veriu më shumë gjasë do të shkojë në zgjedhje, për të dytën herë brenda këtij viti.

    Kryeministri Albin Kurti pohoi gatishmërinë për mbajtjen e zgjedhjeve në 4 komunat veriore, por kryetarët e tanishëm tha se nuk do të japin dorëheqje.

    “Dorëheqja është një akt individual moral, pra nuk e thotë dikush në vend të dikujt tjetër, kur e thotë dikush në vend të dikujt tjetër mund të jetë shkarkim, por dorëheqja është dorëheqje e dikujt të veçantë të cilin duhet ta pyesni. Nuk do të ketë dorëheqje, por të ketë neni 72 i ligjit për zgjedhjet lokale”, tha Kurti.

    Andaj e vetmja formë, sipas kryeministrit Kurti, është ashtu siç parasheh Ligji për Vetëqeverisje Lokale.

    “Sa i përket zgjedhjeve të reja të parakohshme atje, ne këtë e kemi shprehur si zotim tonin edhe më herët dhe se për të arritur aty është e nevojshme që të ndjekim procedurat siç i parasheh ligji në Kosovë, përkatësisht ligji për vetëqeverisje lokale”, tha Kurti.

    Në këtë situatë, sipas njohësve të qeverisjeve lokale, ka vetëm një rrugë për mbajtjen e zgjedhjeve të reja.

    “Në rastin hipotetik nëse ata nuk japin dorëheqje, atëherë ekziston një procedurë. Në fillim duhet të mblidhen 20 për qind e votuesve të regjistruar dhe t’i mbledhin nënshkrimet për ta iniciuar procedurën, e cila do të shtynte deri te mbajtja e një referendumi, pastaj duhet të organizohet një referendum ku duhet të marrin pjesë 50 për qind të votuesve të regjistruar dhe në të njëjtën kohë duhet të votojnë më shumë se 50 për qind e votuesve të regjistruar për shkarkimin e kryetarit”, tha Selatin Kllokoqi nga Demokracia Plus.

    Kryetarët e rinj në katër komunat veriore dolën nga zgjedhjet e 23 prillit, ndonëse pjesëmarrja në votime ishte tejet e ulët. /atvlive.tv

    Edicionin Qendror të lajmeve në ATV e gjeni në videon më poshtë:

  • Më pak policë brenda dhe rreth komunave në veri

    Më pak policë brenda dhe rreth komunave në veri

    Më të paktë në numër, por qëndrimi para objekteve komunale është shndërruar në obligim për protestuesit serbë në Zveçan dhe në Leposaviq. Krahas tyre, të pranishëm janë edhe pjesëtarët e KFOR-it.

    Kurse Policët e Kosovës, kundër pranisë të të cilëve po protestohet, do të pakësohen si rezultat i dakordimit që u arrit mes Kosovës dhe Bashkimit Evropian për hapat drejt shtensionimit të situatës.

    “Qeveria e Kosovës deklaron publikisht gatishmërinë e saj për t’u angazhuar për shtensionimin e situatës dhe se nuk do të ndërmarrë asnjë veprim që mund të shkallëzojë situatën në veriun e Kosovës. Kjo përfshin një zvogëlim të menjëhershëm për 25% të pranisë policore në dhe rreth ndërtesave komunale”, thuhet në njoftimin e Qeverisë.

    Për njohësin e sigurisë, Avni Islami, vendimi për reduktimin e numrit të policëve brenda dhe rreth objektit komunal është i drejtë.

    “Kjo marrëveshje është në të mirë të shtensionimit të situatës, është në të mirë të Kosovës dhe vetë qytetarëve në atë pjesë. Forcat e rendit janë për ruajtjen dhe paqen në atë zonë dhe gjithë vendin”, tha Islami.

    Jo si zgjidhje, por indikator pozitiv për shtensionimin e situatës, reduktimin e numrit të policëve në dhe rreth objekteve komunale e sheh edhe aktivisti nga Mitrovica e Veriut, Sergjan Simonovic.

    “Është një shenjë e mirë, nuk e di a është lajm i mirë apo jo. Unë mendoj se masat e ndërkombëtarëve po japin rezultate. Unë nuk besoj që kryeministri Kurti do ta merrte një vendim të tillë pa asistencën e ndërkombëtarëve, gjithsesi ky reduktim i policëve nuk do ta zgjidhë problemin”, tha Simonovic.

    Por, zgjidhje, sipas tij, do ishte riintegrimi i policëve të komunitetit serb në komunat veriore dhe themelimi i asociacionit të komunave me shumicë serbe.

    Dakordimi i arritur mes Kosovës dhe BE-së parasheh edhe mundësinë e zvogëlimit të mëtejmë të pranisë policore, bazuar në vlerësimet e rregullta të sigurisë. /atvlive.tv

    Edicionin Qendror të lajmeve në ATV e gjeni në videon më poshtë:

  • “Kurti u tërhoq me vonesë, demi është bërë tashmë”

    “Kurti u tërhoq me vonesë, demi është bërë tashmë”

    Betimi i katër kryetarëve shqiptarë në veri, me 25 maj kaloi pa asnjë incident. Por, një ditë pas, kur Lulzim Hetemi i Leposaviqit, Izmir Zeqiri i Zubin Potokut e Ilir Peci i Zveçanit shkuan në zyrat e tyre komunale, të shoqëruar nga njësitë speciale, nisën tensionet.

    Prania e kryetarëve që dolën nga zgjedhjet e 23 prillit në ndërtesa komunale u kundërshtua ashpër nga qytetarët serbë.

    Gurë, shok-bomba e gjësende të forta u hodhën në drejtim të forcave të rendit, qysh në ditën e parë të protestave. Vetëm me 26 maj u konfirmua lëndimi i 5 zyrtarëve policorë, derisa pati edhe vetura të djegura.

    E hëna e 29 majit, pati shumë dhunë, derisa pjesëtarët e KFOR-it përpiqeshin ta merrnin situatën nën kontroll. Nga përplasja me protestuesit serbë të cilët përdorën edhe armë zjarri, 30 ushtarë të misionit paqeruajtës u lënduan, madje njërit prej tyre pas disa ditësh iu amputua këmba.

    Gjatë gjithë kësaj periudhe, nuk u kursyen as punëtorët e mediave. Asociacioni i Gazetarëve regjistroi mbi 30 sulme ndaj gazetarëve e kameramanëve.

    Derisa Qeveria nuk i dëgjonte kërkesat ndërkombëtare për hapa drejt shtensionimit, Bashkimi Evropian dhe disa shtete anëtare veç e veç vendosën masa ndëshkuese ndaj Kosovës.

    Pas gjithë këtyre incidenteve e zhvillimeve, tërheqja e ekzekutivit kosovar, sipas politologut Fidan Ukaj, është e vonuar.

    “Dhe çfarë kemi fituar nga barrikadimi i Kurtit deri në këtë masë, është masat ndëshkuese ndaj Kosovës dhe të mos harrojmë dëmtimi i imazhit, sepse në media ndërkombëtare jemi paraqitur si palë destruktiv”, tha politologu, Fidan Ukaj.

    Nëse nuk ka progres në dialog, sipas Arbër Fetahut nga GLSP-ja, veprimet e fundit të Qeverisë, në katër komunat veriore nuk ia kanë vlejtur.

    “Nëse ne nuk marrim diçka të madhe në dialog, në kuptimin e zbatimit të marrëveshjes në plotëni, nëse nuk hapet rruga për në organizata ndërkombëtare, sepse demi tashmë është bërë, sepse imazhi është dëmtuar dhe është thyer ai mirëbesimi i partnerëve që e kanë pasur për Kosovën”, tha Fetahu.

    Teksa për hapat drejt deeskalimit të situatës në veri, u pajtuan të hënën në Bratislavë, përfaqësuesi i BE-së, Mirosllav Lajçak, e zëvendëskryeministri Besnik Bislimi, BE-ja do t’i ftojë dy kryenegociatorët në Bruksel me synim të finalizimit të planit të sekuencimit për Marrëveshjen drejt normalizimit, pas të cilit do të fillojë zbatimi i të gjitha neneve të marrëveshjes. /atvlive.tv

    Edicionin Qendror të lajmeve në ATV e gjeni në videon më poshtë: