ATV

Blog

  • Në shtator udhëzimi gati, zgjedhjet e reja në veri në duar të votuesve serbë

    Në shtator udhëzimi gati, zgjedhjet e reja në veri në duar të votuesve serbë

    Pas 1 shtatorit, zgjedhjet e reja në veri të vendit do të mbeten në vullnetin e votuesve në Mitrovicën e Veriut, Zveçan, Zubin Potok dhe Leposaviq. Ministri i MAPL-së, Elbert Krasniqi tha se procesi do të determinohet këto ditë. Kryesuesi i grupit punues që po e harton një udhëzim administrativ për këtë çështje tregoi se çfarë mbetet deri në zgjedhjen e kryetarëve të rinj atje.

    Procesi i zgjedhjeve të reja në veri do të determinohet në ditët në vijim, tha sot ministri i Administrimit të Pushtetit Lokal, Elbert Krasniqi. Një grup zyrtarësh në këtë ministri që nga fillimi i këtij muaji po punojnë për ta hartuar një udhëzim administrativ që do t’i hapte rrugë zgjedhjeve të reja në katër komunat në veri të vendit, duke i larguar fillimisht kryetarët aktualë nga detyrat.

    Krasniqi tha se si ministër e ka kryer pjesën e tij të punës për zgjedhjet, duke mos dashur të flasë më shumë për produktin (udhëzimin administrativ), që pritet të dalë më 1 shtator.

    “Sa i përket zgjedhjeve në veri, është një proces që do të determinohet në ditët në vijim. Si ministri dhe si ministër kam mbuluar përgjegjësinë time duke filluar me udhëzimin administrativ, i cili parasheh të drejtën e qytetarëve për mbledhjen e nënshkrimeve për largimin e kryetarëve nga detyra”, tha ai gjatë një vizite në Gjakovë.

    “Kjo nuk është për veriun, kjo mund të aplikohet nesër edhe për kryetarin e Gjakovës dhe cilindo kryetar të komunave të Kosovës. Kështu që në këtë moment nuk dua të diskutoj më shumë rreth produktit për shkak se në fund të muajit do të kemi një produkt nga grupi punues dhe atëherë mund të bashkëbisedojmë për përmbajtjen e tij”, shtoi Krasniqi.

    Deri tash, ministri tha se “gjithçka është në rregull” dhe se “është duke shkuar mirë” puna e grupit punues për hartimin e udhëzimit administrativ. Ai tregoi se zyrtarët i kanë zhvilluar dy takime, duke theksuar se “nuk mund të jap asnjë detaj shtesë”.

    Pas udhëzimit administrativ, çka mbetet deri në zgjedhje?

    Besim Myrtezani, kryesues grupit punues të caktuar nga Ministria, i tha Gazetës Express se po i përgatisin “krejt detajet” që do t’i përmbajë udhëzimi administrativ për caktimin e procedurave dhe afateve për iniciativën e qytetarëve për largimin e kryetarëve të komunave.

    Ai tregoi se udhëzimi administrativ do t’i përmbajë të gjithë hapat që duhen ndjekur deri në largimin e kryetarëve.

    “Parashihen krejt hapat, prej fillimit të procedurës, iniciativës qysh shkon deri te pjesa e dërgimit të peticionit në KQZ. E KQZ-ja i organizon votimet për largim”, tha Myrtezani

    Projekt-dhëzimi administrativ parashihet të procedohet te zyra e sekretarit të përgjithshëm të MAPL-së deri më 1 shtator dhe siç tregoi kryesuesi, atë “e nënshkruan ministri”.

    “Dhe pas shpalljes në Gazetën Zyrtare dhe hyrjes në fuqi, qytetarët kanë të drejtë ta nisin iniciativën pas udhëzimit”, tha ai.

    Myrtezani tha se më pas mbetet në vullnetin e qytetarëve të vendosin nëse duan të nisin peticion për largimin e kryetarëve. Nëse procedohet edhe me peticionin, në votime nevojiten 50% plus një votë për t’i larguar kryetarët aktualë nga detyrat.

    Sipas nenit 72 të Ligjit për Vetëqeverisjen Lokale, kërkesa për largimin e një kryetari të komunës duhet nënshkruar nga 20% e votuesve dhe duhet t’i dorëzohet kryesuesit të kuvendit të komunës, “i cili e paraqet çështjen në institucionin përkatës për administrimin e votimit”.

    “Nëse shumica e votuesëve të regjistruar votojnë për largimin e kryetarit, zgjedhjet e reja për kryetar duhet të bëhen në pajtim me Ligjin mbi zgjedhjet”, thuhet në pikën 3 të këtij neni.

    Kryeministri Albin Kurti pati thëmë më 26 korrik se po bëheshin gati për zgjedhje të reja në veri, saktësisht dy muaj pasi kryetarët e rinj shqiptarë atje u futën në objektet komunale me ndihmë të Policisë. Pak ditë më pas, Ministria e Administrimit të Pushtetit Lokal nisi procedurën për hartimin e udhëzimit administrativ lidhur me iniciativën e qytetarëve për largimin e kryetarëve të komunave.

    Lëvizja e Qeverisë drejt zgjedhjeve të reja erdhi pasi me Bashkimin Europian më 10 korrik u arrit një marrëveshje për për shtensionimin e situatës në veri të vendit, e nënshkruar nga zëvendëskryeministri i Kosovës, Besnik Bislimi dhe emisari i BE-së, Miroslav Lajçak në Bratisllavë.

    Qeveria u pajtua, siç njoftoi vetë, që “pёrmes njё deklarate publike mbёshtet mbajtjen e zgjedhjeve tё parakohshme nё 4 komunat nё veri tё vendit dhe atё pas stinёs sё verёs” dhe që ta “shpreh pёrkushtimin pёr sigurimin e bazёs sё nevojshme ligjore pёr tё mundёsuar organizimin e kёtyre zgjedhjeve”.

    BE-ja preferonte që zgjedhjet të bëheshin përmes dorëheqjeve të kryetarëve aktualë për shkak të rrugës më të shkurtër, por kryeministri Albin Kurti insistoi se nuk mund t’i detyrojë ata që ta bëjnë këtë gjë. Shefi i Qeverisë e theksonte vazhdimisht nenin 72 të Ligjit për Vetëqeverisjen Lokale që parasheh rrugën drejt zgjedhjeve përmes ndërmarres së iniciativës për këtë nga vetë votuesit.

  • ​Brahimi kërkon dorëheqjen e Bordit të Federatës së Boksit, përgjigjet Krasniqi

    ​Brahimi kërkon dorëheqjen e Bordit të Federatës së Boksit, përgjigjet Krasniqi

    Kombëtarja e Kosovës në boks ka mbetur pa trajner pasi Besim Brahimi ka dhënë dorëheqje. Këtë vendim Brahimi thotë se e mori për shkak se ka pasur ndërhyrje direkte nga kryetari i Federatës së Boksit Enver Krasniqi në përzgjedhjen e boksierëve për garat ndërkombëtare, por edhe për shkak të mos pagesës me pagë të rregull.

    Ai ka thënë për KosovaPress ndërhyrje të tilla nuk mund t’i pranojë në punën e tij nga ana e bordit të federatës dhe se kjo ka sjellë deri në vendimin për dorëheqjen e tij.

    “Presidenti i Federatës së Boksit të Kosovës më është përzier në shumë gjëra, edhe në përzgjedhje. Jam kapërdirë për hatër të boksit, por janë disa gjëra që edhe nuk mundesh më të kapërdihesh dhe pak edhe jam lodhur sepse të punosh për shtatë vite pa pagë, unë e kam bërë këtë. Ne edhe si familje kemi bërë shumë edhe për shtetin e Kosovës, mirëpo jam lodhur në këtë aspekt për shkak se nuk është e drejtë një selektor të punojë pa pagë…Mëditje vetëm kur shkon në ndonjë Kampionat Evropian apo Botëror.”, tha Brahimi.

    Tutje Brahimi ka thënë se kryetari i Federatës së Boksit Enver Krasniqi, ka caktuar edhe emrat e boksierëve që duhet të marrin pjesë në kampionate evropiane e botërore.

    “Kishim për të shkuar në Kampionat Botëror NË Indi, që nuk na lejuan dhe u vendos që të shkojnë vetëm dy boksierë dhe vendosa që t’i dërgojë dy vëllezërit Bajoku, desha ta dërgojë edhe Patriot Behramin, këta tre sepse këta janë që kanë përvojë më të madhe, thanë jo vetëm dy, pastaj në dy ditët e fundit ma sollën një boksier tjetër që i mirë është edhe ai djalë, mirëpo nuk është më i mirë se Patriot Behrami, nuk ka eksperiencë dhe më thanë ;këtë duhet ta marrësh, bordi ka vendosur’. Thash bordi nuk mund të përzihet në punët e mia.”, deklaroi Brahimi.

    Por, kryetari i Federatës së Boksit, Enver Krasniqi ka mohuar të ketë pasur ndërhyrje nga ana e tij në përzgjedhjen e boksierëve, derisa ka thënë për KosovaPress se Brahimi dëshironte që vetëm boksierët e klubit të tij ta përfaqësonin Kosovën në arenën ndërkombëtare.

    Ndërsa sa i përket pagës, Krasniqi ka thënë se bordi ka paraparë që trajnerët mund të paguhen ose të marrin mëditje vetëm nëse ka donatorë nga jashtë.

    “Dëshira e tij, sa kemi vërejtur kohëve të fundit ka qenë që vetëm klubi i tij ta përfaqësojë Kosovën. Ne në bord kemi vendosur që selektori duhet të jetë selektor i të gjithë Kosovës, jo i vetëm një ekipi…Kemi ankesa prej boksierëve të klubeve të tjera që pyesin ‘pse ne jo’, kështu që duhet dhënë secilit nga një shans…Pagat me kontratë nuk kemi. Nëse kemi donatorë të jashtë, edhe në bord edhe në vendim e kemi që do t’iu japim paga apo mëditje. Derisa Ministria e Sportit mjetet që na i ndanë, i ndanë vetëm për gjërat që i parasheh ajo, ushtrime, udhëtime jashtë vendit të sportistëve dhe trajnerëve, kurse paga nuk lejon të jepen, prandaj ne nuk guxojmë t’i japim pagë atij ”, theksoi Krasniqi.

    Brahimi ka paralajmëruar se në drejtim të tij dhe të boksierëve ka ardhur një ofertë nga Maqedonia e Veriut dhe se mund të marrin vendim që të largohen nga Kosova për ta përfaqësuar këtë shtet.

    “Nëse ky bord, ky president nuk e bëjnë një ndryshim, ose të sjellin të ardhura ose të japin dorëheqje nga kjo punë, unë mund t’i marr sportistët dhe të shkojë për Maqedoninë të boksojë sepse na kanë ofruar pagë shumë të mirë edhe sportistëve edhe mua.”, theksoi Brahimi.

    Sa i përket kësaj çështje, kryetari i Federatës së Boksit thotë se ky është një vendim i trajnerit dhe se mund të bëjë çfarë të dojë.

    “Ai është vendim i tij dhe nëse mendon të shkojë, le të shkojë nuk është problem. Unë mendoj që në Kosovë ka të rinj që janë duke e ndjekur këtë rrugë të sportit dhe sporti as nuk ka filluar as atëherë në ish-Jugosllavi me Mehmet Bugujevcin dhe as nuk do të mbarojë me Besim Brahimin”, ka thënë Krasniqi.

    Pas këtyre zhvillimeve, Krasniqi ka bërë të ditur se së shpejti Bordi i Federatës së Boksit do të mblidhet për të emëruar trajnerin e ri të Kosovës.

  • Maqedonci takohet me komandatin e KFOR-it, bisedojnë për situatën e sigurisë në vend

    Maqedonci takohet me komandatin e KFOR-it, bisedojnë për situatën e sigurisë në vend

    Ministri i Mbrojtjes, Ejup Maqedonci, sot ka pritur në takim komandantin e KFOR-it, gjeneralmajor Angelo Michele Ristuccia, i cili fillimisht i uroi ministrit Maqedonci sukses në punë gjatë mandatit të tij.

    Nga ana e tij, ministri Maqedonci shprehu falënderimin për vizitën e tij si dhe mirënjohjen për kontributin e KFOR-it, në shërbim të sigurisë së vendit por edhe në sigurinë rajonale. Gjithashtu, ministri Maqedonci e njoftoi Gjeneralin Ristuccia, lidhur me proceset aktuale si dhe synimet për të ardhmen, ku një ndër objektivat kryesore është integrimi në organizatat euroatlantike.

    Ndër tjerash, në këtë takim u bisedua lidhur me situatën e sigurisë në vend, ku të dy bashkëbiseduesit e theksuan se bashkëpunimi i ngushtë mes Ministrisë së Mbrojtjes dhe FSK-së me KFOR-in do të vazhdojë edhe më tej në kuadër të mandateve që kanë, në shërbim të sigurisë së gjithë qytetarëve të Republikës së Kosovës.

  • MASHT shqyrton mundësinë që prindërit t’ua blejnë vet librat nxënësve, thotë se do ua jap paratë

    MASHT shqyrton mundësinë që prindërit t’ua blejnë vet librat nxënësve, thotë se do ua jap paratë

    Ministria e Arsimit ka thënë se është duke e shqyrtuar seriozisht mundësinë e kalimit të përgjegjësisë për blerjen e teksteve shkollore te prindërit.

    Zëvendësministri i Arsimit, Taulant Kelmendi ka thënë se mjetet për blerjen e teksteve shkollore do të paguhen nga buxheti i shtetit përmes rimbursimit.

    Kelmendi, i paraqitur në një konferencë për media së bashku me ministren Arbërie Nagavci të hënën, tha se mjetet për blerjen e teksteve shkollore do t’u kalohen prindërve përmes platformës e-kosova.

    “Jemi duke e shqyrtuar mundësinë që mjetet për blerjen e librave të kalojnë drejtpërdrejt për prindrit. Në bashkëpunim me Ministrinë e Financave jemi në përfundim të modulit për aplikim në platformën e-kosova dhe shumë shpejt do ta bëjmë publik linkun ku mund të aplikojnë të gjithë prindrit dhe kujdestarët e fëmijëve”, ka thënë Kelmendi.

    Ai ka pohuar se ka dështuar procesi i negocimit për blerjen e librave shkollore direkt nga Ministria e Arsimit.

    Kelmendi ka akuzuar shtëpitë private botuese për çmime të papërballueshme të teksteve shkollore.

    “Ne edhe këtë vit kemi zgjedhur një kryenegociues nga MASHT-i, i cili ka negociuar për çmimin e librave shkollore veç e veç për secilin libër. Edhe pas shumë tentimeve për të zbritur çmimet në nivelin e përmballueshëm për buxhetin e ndarë për tekstet shkollore, shtëpitë botuese nuk kanë pasur mirëkuptim. Madje, së fundmi ata na kanë dërguar letër se çmimet e tyre janë të panegociueshme më tutje. Kjo situatë është e papërballueshëm për MASHT-in dhe buxhetin e shtetit”, ka thënë ai.

    “Për shembull libri Shtëpia dhe Mjedisi, bashkë me fletoren ndihmëse kap shifrën e 27 euro. Sigurisht kjo shifër është e papërballueshme për buxhetin e shtetit”, ka deklaruar Kelmendi.

  • ​Tërmeti trondit disa pjesë të Kalifornisë derisa stuhia “Hilary” sjell shi dhe përmbytje

    ​Tërmeti trondit disa pjesë të Kalifornisë derisa stuhia “Hilary” sjell shi dhe përmbytje

    Ndërsa njerëzit në të gjithë Kaliforninë Jugore u strehuan nga Uragani “Hilary”, goditi një tjetër fatkeqësi natyrore – një tërmet me magnitudë 5.1 ballë.

    Epiqendra e tij ishte në veriperëndim të Los Anxhelosit dhe së shpejti u bë shpërnda në mediat sociale.

    Ai nuk shkaktoi dëme të mëdha dhe uragani gjithashtu është reduktuar në një ciklon post-tropikal, shkruan BBC.

    Kryetarja e Los Anxhelos, Karen Bass, tha se mbi 100 stacione zjarrfikëse po kontrollonin ndërtesat për dëmtime. Zonja Bass tha në një postim në Twitter se nuk kishte raporte fillestare për dëmtime strukturore të shkaktuara nga tërmeti ose ndonjë lëndim.

    Ajo paralajmëroi se ka të ngjarë të ketë më shumë pasgoditje gjatë ditëve të ardhshme.

    Tërmeti goditi në të njëjtën kohë me ciklonin posttropikal “Hilary”, i cili la shumë banorë të pasigurt se ku duhet të kërkonin strehim.

    Guvernatori i Kalifornisë, Gavin Newsom, shpalli një gjendje të jashtëzakonshme në pjesën më të madhe të Kalifornisë Jugore, me më shumë se 7,500 trupa ushtarakë të dislokuar për të ndihmuar njerëzit.

  • Aktorja Egzona Salihu që u largua nga puna në Preshevë, thotë se edhe shumë kolegë të saj kanë probleme me drejtorin e ri

    Aktorja Egzona Salihu që u largua nga puna në Preshevë, thotë se edhe shumë kolegë të saj kanë probleme me drejtorin e ri

    Me arsyetimin se nuk ka respektuar orarin e punës, ushtruesi i detyrës së drejtorit të Shtëpisë së Kulturës, “Abdullah Grashnica” në Preshevë, Kujtim Sadriu ka larguar nga puna aktoren e vetme Egzona Salihun.

    Aktorja e shumë shfaqjeve teatrale dhe filmave të suksesshëm, nëpërmjet një reagimi ka thënë se që nga ardhja e drejtorit të ri është ballafaquar me shantazhe, me maltretime dhe kërcënime.

    Për largimin e saj nga puna ka pasur shumë reagime gjatë këtyre ditëve, shumë ftesa, e cila pavarësisht përveç kësaj, veç se ka filluar edhe projekte të reja në karrierën e saj me filma dhe projekte që do i realizojë së shpejti, por që gjithsesi, është një vendim që ka nxitur shumë debate për shkak se është njëra prej aktoreve të vetme të këtij teatri dhe që padyshim se do të ishte një humbje për të.

    Në një lidhje përmes skypë në emisionin e mëngjesit ALARM në ATV, ajo thotë se lajmin për largimin e saj nga puna e ka marrë me postë, pesë ditë pasi ishte marrë ai vendim.

    “Lajmin e kam marrë përmes postës, pesë ditë pasi është dërguar me postë ai vendim ose ai dokument. Ato pesë ditë unë kam shku çdo ditë në punë dhe kërkush nuk më ka njoftu që “ti nuk je në punë dhe të kemi largu”, pra deri sa me erdhi letra në shtëpi nuk e kam kuptu. Vendimi ka arritë në këtë moment, ka fillu saktë me thanë një vit më parë. Për gjatë më shumë se një viti, unë kam pasur probleme të një pas njëshme me atë drejtor, për arsye të ndryshme, kam hasur shumë në padrejtësi, diskriminim, gjithçka më është dashtë me u përballë deri kur ka arritë në këtë pikë”, shprehet Egzona.

    Ajo tregon se përplasja e saj me drejtorin e ri të shtëpisë së kulturës kishte filluar vitin e kaluar kur ajo ishte dënuar me 20% heqje nga paga.

    “Fillimisht ka fillu me një dënim që ma ka dhënë me 20 për qind ndalje nga paga për vitin e kaluar kur kam qenë e angazhuar me një shfaqje në Teatër të Kumanovës, i cili ka qenë i njoftuar për dy ditë, data që ka qenë gjeneralë dhe në premierë nuk do të jem aty, edhe i kam treguar para të gjithë kolegëve dhe ka qenë i pajtimit, pastaj kur jam kthy, me ka dënu 20 për qind, dhe krejt aty ka fillu me një far forme qëllimi i tij kudër meje deri sot. Krejt këto i ka bërë pasi që ka besu se një ditë unë kam me u dorëzu dhe kam me u largu prej punës vet. Kur e ka pa se nuk kam me u dorëzu dhe si përfundim e ka zgjedhë vet me m’largu”, rrëfen Egzona.

    Sipas saj, me drejtorin Sadriu kanë hasur probleme edhe shumë kolegë të saj, por që ata nuk janë aq të zëshëm publikisht për shkak se janë të vetëdijshëm se mund të iu kushtojë me vendin e tyre të punës. /atvlive.tv

    Bisedën e plotë të aktores Egzona Salihu në ALARM e gjeni në videon më poshtë:

  • Abazi: Sektori i energjisë është dështimi i radhës i Kurtit

    Abazi: Sektori i energjisë është dështimi i radhës i Kurtit

    Ish deputeti i Lëvizjes Vetëvendosje, Haki Abazi ka kritikuar kryeministrin, Albin Kurti në lidhje me qasjen e tij ndaj sektorit të energjisë.

    Ai ka thënë se ky sektorë është dështimi i radhës së tij.

    Abazi ka thënë se Kurti doli në konferencë për të marrë poena por afati mbyllet dy ditë pasi hapet konkursi dhe ai më nuk paraqitet.

    Para katër ditëve në prezencë e me fjalim të Kurtit u hap mundësia për aplikim për intervenim për rritje të efiçiencës të përdorimit të energjisë dhe për pajisje efiçiente. Nismë për të thënë e për t’përshëndetur.

    Afati për aplikim sipas raportimeve është mbyllur pas dy ditëve. Çfarë të thuhet, si të shpjegohet apo kush janë këta njerëz që shtetin e shohin si lodër fëmijësh. Natyrshëm Kurti del në konferencë për shtyp me ministrat kur duhet të përfitoj ndonjë poen, por ngaqë thellësisht manipulator nuk paraqitet kur dështimi është i qartë dhe pas dy dite mbyllet konkursi.

    Kthehemi te energjia dhe efiçienca dhe mbajmë vështrimin thjeshtë dhe pa komplikime.

    Pajisjet efiçiente dhe subvencionimi tyre si program është aplikuar me vite në Kosovë me fondet e Bashkimit Evropian. Përfituesit kanë qenë shitësit e pajisjeve, frigoriferë, shporeta, bojlerë, ujtitë etj. Dmth ky program është i dështuar sepse pajisjet blihen dhe kthehen për të përfituar diferencën në kesh. Pyetni ekspertin nga Shqipëria që ka udhëhequr këtë program në Kosovë.

    Gjithashtu ky lloj subvencionimi sikur edhe në rastin e pompave termike e prish tregun sepse ngrit kërkesën pa nevojë dhe rrjedhimisht edhe çmimin. Në rastin e pompave termike, çmimi për njësi është ngritur deri në 35-40%. Një pompë termike që në Maqedoni të V. kushton 6000 euro në Kosovë në kohën e subvencionimit është shitur 10,000 euro dhe vazhdon. Poashtu rritja artificiale nëpërmjet subvencioninit e kërkesës në treg dhe koha e shkurtër për aplikim dhe lëvrim të grantit në njërën anë dhe mungesës së plotë të përshkrimit të saktë të specifikacionit teknik dhe kritereve, ka sjellur në treg dhe janë instaluar pajisje që janë joefiçiente, të pa standardizuara e me raste edhe me gazra që nuk pranohen në BE.

    Përkrahja me paratë e taksapaguesve për izolim të shtëpive dhe hapsirave të banuara është duke u bërë pa ligjin për ndërtim, pa standardet teknike, pa specifikacion teknik, pa përshkrim të standardeve të dyerve dhe dritareve, pa standard të llojit të xhamit (qelqit), pa kualifikim të kryersve të punëve apo mbikqyrjes së realizimit teknik. Dmth vazhdim i njejtë se si janë bërë punët në të kaluarën, qëllimi është tenderi, shpenzimi i buxhetit dhe ndonjë foto në facebook apo video në instagram apo të dyja kinse çdo gjë është në rregull.

    Puna mbarë, po kjo nuk është as afër asaj çfarë është premtuar! Në fakt është keqpërdorim, keqmenagjim i thellë i fondeve publike dhe padituri e përgaditjes dhe dizajnimit të politikave publike dhe zbatimin e tyre.

  • Aksident trafiku me fatalitet në Drenas, vdes një person dhe 3 të tjerë lëndohen

    Aksident trafiku me fatalitet në Drenas, vdes një person dhe 3 të tjerë lëndohen

    Gjatë ditës së sotme ka ndodhur një aksident në Çikatovë të vjetër të Drenasit me pasoja fatale.

    Lajmin e ka konfirmuar zëdhënësja e Policisë për rajonin e Prishtinës, Flora Ahmeti.

    “Rreth orës 12:30 kemi pranuar informatën se në fshatin Çikatovë e vjetër -Drenas, ka ndodhur një aksident trafiku me pasoja fatale. Në këtë aksident ka qenë i përfshirë një automjet, ngasësi i të cilit për shkaqe të panjohura deri më tash ka humbur kontrollin mbi automjetin dhe është aksidentuar. Si pasojë e aksidentit, lëndime trupore kanë pësuar katër persona, një prej tyre nuk ka arritur t’i përballojë plagët dhe i njëjti ka ndërruar jetë”, tha Ahmeti.

    Vdekjen e viktimës e ka konstatuar ekipi mjekësor në QMF (Qendrën e Mjekësisë Familjare) në Drenas, ndërsa me rastin po merret hetuesia nga njësiti i trafikut rrugor.

  • Poeti Musa Ramizi: Poezia e bukur është në gegnisht, shpirti tek ne flenë më shumë në këtë dialekt

    Poeti Musa Ramizi: Poezia e bukur është në gegnisht, shpirti tek ne flenë më shumë në këtë dialekt

    Që në moshë të re, rebelizmi i kishte karakterizuar në çdo hap të jetës. Musa Ramizi si krijues iu kushtua kryesisht poezisë, me vargje guximtare që morën vëmendjen e asaj kohe.

    Në një bisedë për rubrikën “Një libër për ty” në emisionin e mëngjesit ALARM në ATV, ai tregon kur kishte filluar të shkruajë për herë të parë me poezi.

    “Të flasësh për poezinë e mirëfilltë nuk mund t’i shmangesh rebelizmit shpirtëror. Rebelizmi i im i vërejtur institucionalisht i parë për herë të parë në klasën shtatë fillore kur unë organizova demonstrata kundër regjimit serb dhe u arrestova si fëmijë. Pastaj rebelizmi vazhdoi në faza të ndryshme me kyçje në luftën e Kosovës, në luftën e 2001-tës në Maqedoni, por në shkrimet e mija, pas vitit 2001-2002, fillova të shfaqi një lloj rebelizmi përmes disa fjalëve ndoshta pak ma banale që thyenin standardin e poezisë. Fillimisht në amfiteatër dëgjoja të qeshura, pastaj kur fillonin të koncentroheshin dhe të shifnin përmbajtjen e poezisë, fillonin edhe duartrokitjet. Kjo formë rebelizmi është shfaqur në disa poezi të mija, por megjithatë, gjithmonë duke përcjellë një mesazh, sikur një këshillë për lexuesin dhe kjo në disa raste është shfaqë edhe nga vetë lexuesit kur ma thonin se po, neve morëm mësimin dhe leksionin nga poezia e jote’. Poezia e parë e ime e botuar është në revistën letrare “Fryma” në vitin 1998 në kuadër të Filologjikut, titullohej “Për ty”, është një poezi me motiv dashurie”, tegon poeti Ramizi.

    Sipas tij, poezia e bukur është ajo që shkruhet në gegnisht.

    “Pastaj poezitë që thyenin standardin e poezisë, pikërisht është edhe emërtuar për herën e parë sepse më vonë i ndryshova titullin “Këshillë” dhe ajo ishte momenti kur unë ndryshova të shkruaj poezi. Ndryshimi u përcoll më vonë tek unë edhe tek çështjet e zhanret kur fillova të shkruaja edhe prozën në formë të tillë, mirëpo pastaj kuptova se shpeshherë poezia flen më bukur në gegnishte dhe fillova të shkruaja edhe gegnisht poezi. Poezia e bukur është poezia në gegnishte, sipas meje sepse kritikët mund ta vlerësojnë arë, por shpirti tek ne flenë më shumë në gegnishte, është më ëmbël të thuhet “nanë” dhe poezitë për nënën nuk flen aq bukur nëse nuk i thua “nanë””, thotë poeti Ramizi.

    Përpos poezisë edhe proza ishte pjesë e krijimtarisë së Musa Ramizit. /atvlive.tv

    Bisedën e plotë të poetit Musa Ramizi për ATV-në e gjeni në videon më poshtë:

  • Një i vdekur nga ​zjarri në Prodromos të Greqisë

    Një i vdekur nga ​zjarri në Prodromos të Greqisë

    Një burrë vdiq të hënën në një zjarr që shpërtheu në Prodromos, Greqi, më herët në mëngjes. Sipas policisë, i vdekuri ishte një bari 80-vjeçar, i cili nxitoi të shpëtonte delet e tij pasi mori një mesazh për të evakuuar fshatin.

    “Fronti i zjarrit është shumë i madh dhe në zonë po fryjnë erëra të forta. Ne po përpiqemi shumë ta kontrollojmë,” tha kryetari i bashkisë së Thivës, Giorgos Anastassiou për agjencinë e lajmeve ANA-MPA.

    Sipas kryebashkiakut, një vendbanim pranë fshatit Sarantis është evakuuar tashmë pas një mesazhi të dërguar në numrin e urgjencës 112.

    “Aktualisht zjarri është më pak se 1 km larg shtëpive por erërat janë shumë të forta. Katër helikopterë dhe forca zjarrfikëse nga toka së bashku me makineritë e bashkisë po operojnë në zonë. Është shumë e vështirë sepse aeroplanët zjarrfikës nuk mund të fluturojnë me erë kaq të fortë. ”, tha kryebashkiaku.