Blog

Agjencia Zvicerane për Zhvillim dhe Bashkëpunim njoftoi sot se kontribuon me mbi 11.5 milionë dollarë Fondin Ndërkombëtar të Emergjencave të Fëmijëve të OKB-së (UNICEF) për të mbuluar nevojat e fëmijëve dhe familjeve në Rripin e Gazës.

“Përshkallëzimi i armiqësive në #Gaza po ka një ndikim katastrofik mbi fëmijët dhe familjet,” njoftoi agjencia në një postim në rrjetin social X.

Agjencia shtoi se kontribuon me 10 milionë franga zvicerane për UNICEF-in për të “mbuluar nevojat e fëmijëve dhe familjeve në fushën e ujit, kanalizimeve, higjienës, shëndetit, të ushqyerit dhe arsimit”.

Izraeli ka bombarduar Rripin e Gazës nga ajri dhe toka, ka vendosur një rrethim dhe ka ndërmarrë një ofensivë tokësore si hakmarrje për një sulm ndërkufitar nga grupi i rezistencës palestineze, Hamasi, më 7 tetor.

Të paktën 19.667 njerëz janë vrarë dhe 52.586 të tjerë janë plagosur që atëherë, sipas autoriteteve shëndetësore në enklavë.

Gati 1.200 izraelitë besohet se janë vrarë në sulmin e Hamasit, ndërsa më shumë se 130 pengje mbeten në robëri. /AA

Miliarderi rus Roman Abramovich të mërkurën humbi një sfidë ligjore kundër sanksioneve të vendosura ndaj tij nga BE për luftën e Rusisë kundër Ukrainës.

Blloku 27 anëtarësh sanksionoi zyrtarët dhe biznesmenët rusë, duke ngrirë miliarda dollarë asete ruse, pas luftës së Moskës kundër Ukrainës në shkurt 2022. Abramovich, një ish-pronar i klubit britanik të futbollit Chelsea, i kishte sfiduar këto kufizime.

“Gjykata e Përgjithshme rrëzon padinë e ngritur nga z. Abramovich, duke mbajtur kështu masat kufizuese të marra kundër tij”, tha Gjykata e Drejtësisë së Bashkimit Evropian në një deklaratë.

Ajo vuri në dukje se BE-ja “në fakt nuk gaboi në vlerësimin e saj” duke vendosur të përfshijë më pas emrin e Abramovich në listat në fjalë.

“Gjykata vëren, për më tepër, se përfshirja dhe ruajtja e emrit të Abramovich në listat në fjalë nuk përbën një shkelje të pajustifikuar dhe disproporcionale të të drejtave të tij themelore, të cilat përfshijnë, në veçanti, të drejtën për respektimin e jetës private dhe familjare, lirinë për të kryer një biznes dhe lëvizjen e lirë”, shtohet në deklaratë.

Në mars 2022, BE tha se Abramovich kishte “lidhje të gjata dhe të ngushta me presidentin rus Vladimir Putin, duke e ndihmuar atë “të ruante pasurinë e tij të konsiderueshme”. /AA

Deputeti socialist dhe demokrat Andreas Shider tha sot se nuk ka parë kurrë parregullsi sikur ka parë në zgjedhjet në Serbi dhe kërkoi përsëritjen e zgjedhjeve në Beograd.

“Unë vëzhgova shumë zgjedhje, por ato që u zhvilluan në Serbi ishin larg çdo standardi evropian,” tha Shider për N1, i cili ishte gjithashtu anëtar i misionit të Parlamentit Evropian që vëzhgoi zgjedhjet në Serbi.

Ai mendon se do të ishte e nevojshme të bëhet një hetim ndërkombëtar, ose së paku të përsëriten zgjedhjet në Beograd, por në kushte të reja. Ai shtoi megjithatë se në Serbi është problem i madh të kryhet një hetim i pavarur dhe i hapur, sepse ndarja në shoqëri është e thellë, dhe sistemi gjyqësor dhe media shtetërore nuk janë mjaftueshëm të pavarura.

Shider tha në emisionin N1 se dita e zgjedhjeve në Serbi ishte shumë specifike dhe se vëzhguesit e huaj tashmë ishin të informuar nga misioni parazgjedhor se kushtet nuk ishin të barabarta, se presidenti Aleksandar Vuçiq dhe Partia e tij Progresive Serbe ishin të përfaqësuar në mënyrë disproporcionale në mediat shtetërore, ndërkohë që opozita kishte qasje të kufizuar, si dhe se njerëzit silleshin në zgjedhje nga jashtë.

Ai shprehu besimin se të paktën në zgjedhjet në Beograd, rezultati do të ishte ndryshe nëse zgjedhjet do të ishin organizuar më mirë dhe do të kishte pasur më pak mashtrime.

“Së pari, më lejoni të jem i qartë, kjo nuk është në përputhje me standardet evropiane, kjo është larg çdo standardi. Unë kam vëzhguar shumë zgjedhje, këto janë larg standardeve me të cilat jemi mësuar. Ata që kanë pushtet dhe kontroll mbi këto zgjedhje po shkojnë keq dhe nuk po punojnë në interes të vendit të tyre”, tha Shider.

Shider po ashtu ka rikujtuar se Komisioni Evropian, Këshilli Evropian dhe Parlamenti Evropian janë shumë kritikë ndaj procesit zgjedhor në Serbi dhe kjo, siç paralajmëroi, ka një ndikim negativ në negociatat për anëtarësim në BE.

Shider tha gjithashtu se është e vërtetë se në periudhën e kaluar zyrtarët e BE-së ishin shumë të sjellshëm ndaj autoriteteve në Serbi, gjegjësisht se komisionari për Zgjerim dhe disa zyrtarë të tjerë evropianë ishin “shumë të butë”.

“Jo në kuptimin që nuk e dënuan Serbinë dhe popullin serb, por kur folën për sundimin e ligjit, lirinë e mediave. Ata duhet të jenë më të rreptë,” beson ai.

Sipas tij, BE-ja duhet të jetë shumë e qartë dhe e mprehtë kur bisedon me zyrtarët serbë për sundimin e ligjit, gjyqësorin e pavarur, lirinë e mediave dhe zgjedhjet funksionale dhe të ndershme, sepse “standardet evropiane nuk janë në shitje”.

“E gjithë kjo në Serbi nuk është e mirë dhe duhet të themi se duhet të jemi të ashpër, se nuk e pranojmë atë që po ndodh. Ne jemi thellësisht të shqetësuar dhe duhet të ketë një ndryshim në qëndrim dhe sjellje”, tha Shider.

Grupi i Socialistëve dhe Demokratëve (S&D) në Parlamentin Evropian (PE) njoftoi të hënën se raportet e besueshme të mashtrimit zgjedhor në Serbi shkaktojnë shqetësim serioz dhe bëri thirrje për një hetim të pavarur të të gjitha parregullsive të raportuara.

Në një deklaratë të publikuar në ueb sajtin e saj, grupi i Socialistëve dhe Demokratëve shprehu mbështetjen e tij të plotë për njerëzit në Serbi që kërkojnë drejtësi, demokraci dhe të ardhmen evropiane. /BETA

Policia e Kosovës njofton se sot (e mërkurë) në Pikë Kalimin Kufitar në Merdar, në hyrje të Republikës së Kosovës, zyrtarë policorë kufitar së bashku me zyrtarët doganor gjatë kontrollimit në bagazhin e autobusit të një kompanie vendore, i linjës ndërkombëtare Itali-Kosovë, me vozitës m/k dhe ndihmës vozitës m/k kanë gjetur një armë (revole me gas), e cila kishte qenë e fshehur në një valixhe udhëtarësh.

“Arma e gjetur është sekuestruar, me autorizim të Prokurorit të Shtetit është iniciuar rasti në procedurë të rregullt “Import, eksport, furnizim, transportim, prodhim, këmbim ose shitja e paautorizuar e armëve apo materieve plasëse”, thuhet në komunikatë.

Gjykata Kushtetuese e Shqipërisë ka rrëzuar kërkesën e disa deputetëve të PD, për të shpallur antikushtetues kërkesën e SPAK për arrestimin e ish-kryeministrit Sali Berisha.

Padia ishte firmosur nga 30 deputetë të PD, mes tyre edhe Gazment Bardhi, ndërsa vetë Berisha nuk e ka firmosur padinë e grupit të “Rithemelimit”.

Dy ditë më parë, Oerd Bylykbashi, Ivi Kaso dhe Franci Nuri përfaqësues të Grupit të Rithemelimit depozituan në Gjykatën Kushtetuese padinë lidhur me “konfliktin e kompetencave midis pushtetit Gjyqësor dhe pushtetit Legjislativ për imunitetin e deputetëve”.

Gjykata e Posaçme e Shkallës së Parë për Korrupsionin dhe Krimin e Organizuar 2 muaj më parë vendosi masë “detyrim paraqitje” dhe “ndalim të daljes jashtë shtetit” edhe për ish-kryeministrin Sali Berisha me akuzën e korrupsionit pasiv kryer në bashkëpunim, parashikuar nga neni 260 dhe 25 i K.Penal”.

Bëhet fjalë për një pronë me rreth 10.000 metra katrorë, në qendër të Tiranës që në vitin 2008 është privatizuar me një vlerë prej 100.000 dollarë. Klubi sportiv “Partizani” ka qenë në pronësi të Ministrisë së Mbrojtjes, jo shumë larg nga qendra e Tiranës, ku sot janë ngritur 17 kulla. /tch

Drejtori i Institutit Octopus, Agim Musliu ka publikuar sot (e mërkurë) disa fotografi ku shihet ambasadori serb në ShBA, Marko Gjuriq përkrah kriminelit dhe terroristit serb, Stevan Paviceviq.

Musliu ka shkruar në X se fotografitë janë shkrepur në vitin 2019, dhe se të njëjtit kanë qenë duke u përpjekur që ta kthejnë banjën termale në Banjskë të Zveçanit në pronë të Serbisë.

Ai ka sjellë një rikujtim se makina e Paviceviqit është gjetur plot me armë në qershor të këtij viti.

“Ambasadori aktual i Serbisë në SHBA, Marko Gjuriq, në vitin 2019, i rrethuar nga kriminelë, duke u përpjekur ta kthejë banjën termale në Banjska në Kosovë në pronë të Serbisë. Në foto shihet edhe terroristi Stevan Paviceviq, makina e të cilit u gjet plot me armë në qershor 2023”, ka shkruar Musliu.

Autoriteti i Konkurrencës së Kosovës njofton se duke u bazuar në legjislacionin në fuqi në Republikën e Kosovës, më saktësisht në bazë të Ligjit për Mbrojtjen e Konkurrencës ka marrë vendim që Ndërmarrjes MTS d.o.o Dega në Kosovë t’i shqiptohet masa e sanksionit administrativ-gjoba në shumë prej 1 milion e 563 mijë e 959 e 26 cent.

“AKRK njofton se Ndërmarrja MTS d.o.o ka shkelur dispozitat e Ligjit për Mbrojtjen e Konkurrencës, duke mos parashtruar kërkesën për njoftimin e detyruar për përqendrim për blerjen e 100 për qind të aksioneve të ndërmarrjeve: VGN NET d.o.o, LIKA d.o.o, PP. PRKDS-IMPULS në emër të I. R. – B.I. dhe Herc International”, thuhet në komunikatë.

Në fund thuhet se Autoriteti i Konkurrencës së Kosovës si institucion publik, i pavarur në kryerjen e detyrave të veta të përcaktuara në ligj, do të jetë në shërbim të të gjithë qytetarëve dhe në mbrojtje të ligjit të konkurrencës.

Sulmi në Banjskë ishte me rrezikshmërinë më të lartë për Kosovën që nga shpallja e pavarësisë së Kosovës dhe si i tillë mund të përsëritet. Kështu ka deklaruar kryetarja e Komisionit për Mbikëqyrjen e Agjencisë së Kosovës për Inteligjencë, Ganimete Musliu, pas mbledhjes ku kishte raportuar drejtori i AKI-së, Petrit Ajeti.

Në një konferencë për media të mbajtur menjëherë pas mbledhjes, Musliu tha se siguria në vend për këtë vit ka qenë sfiduese si për institucionet ashtu edhe për qytetarët. Porse, siç tha ajo, falë punës profesionale të AKI-së është arritur që t’iu jepet epilog rasteve që cenuan sigurinë kombëtare.

“Konstatuam se ka qenë një vit i vështirë dhe jashtëzakonisht sfidues për qytetarët e Republikës së Kosovës në përgjithësi e me theks të veçantë për institucionet e sigurisë në vend. Gjatë këtij viti, Kosova si asnjëherë më parë që nga shpallja e pavarësisë u përball me agresionin e sulmeve terroriste te organizuara nga aparatura shtetërore serbe. Në nivelin e sigurisë kombëtare rasti i Banjskës është një nga rastet e nivelit më të lartë të rrezikshmërisë së shtetit të Kosovës dhe ky rast ende vazhdon në mënyra të veta të paraqesë rrezik për vendin tonë”, tha ajo.

Por, krahas sigurisë kombëtare deputetja Musliu tha se institucionet e sigurisë duhet të jenë vigjilente edhe për çështje të tjera.

“Si institucione të sigurisë nuk guxojmë në asnjë mënyrë të lëmë pa vëmendje edhe kërcënimet e tjera të sigurisë siç janë prezenca e madhe e lëndëve narkotike dhe shpërndarja tek grupmoshat e reja në theks të veçantë ose me fokus tek nxënësit dhe shkolla. Futja nga jashtë e Kosovës e monedhës dy euro false po ashtu në tregun financiar ekonomik po ashtu ka dëmtuar rëndë qytetarët e Republikës së Kosovës ka shkaktuar probleme financiar ne ekonomi edhe ashtu të varfër të Kosovës.