ATV

Blog

  • Stano: Presim që sivjet Kosova dhe Serbia të zbatojnë në plotni Marrëveshjen e Brukselit dhe Aneksin e Ohrit

    Stano: Presim që sivjet Kosova dhe Serbia të zbatojnë në plotni Marrëveshjen e Brukselit dhe Aneksin e Ohrit

    Zëdhënësi i Bashkimit Evropian, Peter Stano, ka folur për procesin e dialogut mes Kosovës dhe Serbisë për normalizimin e marrëdhënieve, raporton Gazeta Sinjali.

    Në një konferencë për media dje në Bruksel, Stano u ka bërë thirrje palëve që këtë vit ta zbatojnë në plotni Marrëveshjen e Brukselit bashkë me Aneksin e Ohrit.

    “Të gjithë e dinë se ku qëndrojmë. Të gjithë e dinë se çfarë duhet të bëjnë dhe ne presim zbatimin e plotë. Ky vit ofron një mundësi të mirë për të filluar me të vërtetë të punoni shumë, duke mos diskutuar formalitetet, por duke punuar për të prodhuar rezultate konkrete dhe thelbësore”, ka thënë ai.

    Stano në pyetjen nëse BE-ja do të detyrojë Serbinë të zbatojë marrëveshjen me Kosovën duke e kushtëzuar me anëtarësim në bllok, tha se shtetet anëtare po punojnë në këtë drejtim.

    “Puna në këtë drejtim po vazhdon në përputhje me kërkesën e vendeve anëtare”, ishte përgjigjja e Stanos. Megjithatë, ai s’u përgjigj nëse kjo do të ndodhë gjatë janarit.

    Kërkesa për ndryshimin formal të kushteve në kapitullin 35 u bë nga shtetet anëtare të BE-së në konkluzionet e miratuara nga Këshilli për Çështje të Përgjithshme në dhjetor.

    Ai përsëriti se palët kanë bërë një zotim me Marrëveshjen e Ohrit dhe se marrëveshja është ligjërisht e detyrueshme.

  • Zeka: Rritja ekonomike këtë vit do të jetë 4.2% – Përkundër rënies së inflacionin, çmimet mbesin të larta

    Zeka: Rritja ekonomike këtë vit do të jetë 4.2% – Përkundër rënies së inflacionin, çmimet mbesin të larta

    Drejtori i Odës Ekonomike Amerikane në Kosovë (OEAK), Arian Zeka në një prononcim për Ekonomia Online ka thënë se rritja ekonomike për vitin 2024 do të jetë 4.2 për qind.

    Ai ka thënë se vendi e ka mbyllur vitin me një normë të ulët të inflacionit rreth 4 për qind por që çmimet vazhdojnë të mbesin të larta për shkak të çrregullimeve në zingjirët e furnizimit global.

    Kjo siç thekson ai, Kosova ka një bazë të ulët të prodhimtarisë.

    Ai ka shtuar se Kosova vazhdon që të ketë njërën prej normave më të larta të rritjes ekonomike në mesin e shteteve të Ballkanit Perëndimor, por që thekson se kjo normë nuk i mundëson vendit që të zë hapin me zhvillimet e kontinentit të Evropës.

    Zeka ka thënë se zhvillimi ekonomik nuk ka qenë prioritet i as një qeveri që nga pas lufta, teksa apelon te ekzekutivi që ta bëjë një gjë të tillë këtë vit.

    Ai ka theksuar që Kosovës i nevojitet një strategji gjithëkombëtare për zhvillimin ekonomik e ku në të duhet që të përfshihen të gjithë “hisedarët”.

    “Me sinqeritetin më të madh e them që realisht ekonomia nuk duket që të jetë prioritet i as njërës prej qeverive që i kemi pasur prej viti 99 e tutje, sidomos pre viti 2008 e tutje prej kur Kosova është shtet i pavarur. Realisht duket që këtu çalojmë mungesa e një strategji gjithëkombëtare për zhvillimin ekonomik e cila do të jep drejtim zhvillimeve që lidhen me ekonominë edhe aspektin social, duket që po e gjymton vendin do të thotë në këtë aspekt. Këtu realisht besoj që qeveria këtë vit, vitin 2024 duhet ta caktoj me të vërtet të cilin zhvillimi ekonomik do të trajtohet me prioritet, por megjithatë duke pasur parasysh gjatë tërë kohës që zhvillimi ekonomik nuk është vetëm përgjegjësi e institucioneve të vendit por në këtë aspekt duhet që të përfshihen në komunikim së paku edhe hisedarët e tjerë jo institucional, profesor universitar, ekspert të ekonomisë, përfaqësues të instituteve të ekonomisë. Ajo që është më e rëndësishmja  ata të cilët realisht përfaqësojnë interesat e atyre që janë bartës ose janë motor i zhvillimit ekonomik të vendit pra sektori privat e që janë Odat Ekonomike edhe Asociacionet e biznesit. një dialog i tillë ndërmjet sektorit publik edhe sektorit privat ka munguar përgjatë viteve të fundit e sidomos me këtë qeveri”, ka thënë ai.

    Zeka ka thënë se rritja ekonomike për këtë vit pritet që të jetë 4.2 për qind nëse shteti aktivizon shtyllat kryesore të cilat mundësojnë rritjen ekonomike të vendit, e që sipas tij janë investimet kapitale edhe ruajtjen e konsumit.

    Ai ka thënë se Kosova vazhdon që të ketë njërën prej normave më të larta të rritjes ekonomike në mesin e shteteve të Ballkanit Perëndimore, por që sipas tij, kjo normë e rritjes ekonomike nuk i mundëson vendit që të zë hapin me zhvillimet e kontinentit të Evropës.

    “Nuk kemi as një arsye të mos besojmë që parashikimet e Bankës Qendrore të Kosovës nuk do të realizohen në fund të këtij viti, edhe në presim që të kemi një rritje ekonomike prej 4.2 për qind për aq kohë sa përdoren ose aktivizohen shtyllat kryesore të cilat mundësojnë rritjen ekonomike të vendit. Sipas të gjitha raporteve të organizatave ndërkombëtare por natyrisht edhe raporteve të brendshme këto shtylla ekonomike të vendit përfshijnë investimet kapitale edhe natyrisht ruajtjen e konsumit, ani pse kjo mund të mos jetë ndoshta shtylla e cila garanton një zhvillim të qëndrueshëm. Por megjithatë janë dy prej aspekteve të cilat është bazuar zhvillimi ekonomik i vendit në vitet e fundit. Për të qenë me objektiv duhet përmendur faktin që megjithatë Kosova vazhdon që të ketë njërën prej normave më të larta të rritjes ekonomike në mesin e shteteve të Ballkanit Perëndimore, por në të njëjtën kohë duhet të vazhdojmë edhe të japim edhe informata të tjera për publikun që kjo normë e rritjes ekonomike nuk i mundëson vendit që të zë hapin me zhvillimet e rajonit, po flas për kontinentin e Evropës me qenë se këtu jemi shumë mbrapa. Baza ekonomike e Kosovës është relativisht e ulët edhe pastaj çfarë do norme e rritjes ekonomike nën normat dyshifrore nuk garanton zhvillim të përshpejtuar ekonomik”, u shpreh ai.

    Drejtori i OEAK-ut ka thënë se vendi e ka mbyllur vitin 2023 me një normë prej diku rreth 4 për qind të inflacionit, por që çmimet janë duke vijuar që të jenë të larta.

    Sipas tij,  presioni mbi çmimet është njëri prej indikatorëve problematik të rritjes ekonomike të vendeve të Ballkanit Perëndimor edhe të Kosovës.

    “Po i referohem të dhënave zyrtare të publikuar nga ASK-ja për vitin e kaluar do të thotë që Kosova mbylli vitin me një normë prej diku rreth 4 për qind të inflacionit, por megjithatë çmimet vijon të jenë të larta. Pra presioni mbi çmimet vazhdon të jetë jashtëzakonisht i lartë, kjo është thënë edhe një një raport të Bankës Botërore të viti të kaluar i cili flet për perspektiven ekonomike të Ballkanit në përgjithësi, por pastaj edhe të shteteve individuale në veçanti përfshirë këtu edhe Kosovën. Ku presioni mbi çmimet përmendet si njëri prej indikatorëve problematik të zhvillimit ekonomik ose të rritjes ekonomike të vendeve të Ballkanit Perëndimor edhe të Kosovës ne veçanti. Duhet sqaruar me teje norma prej katër për qind e inflacionit vjetor mund të duket e ulët por megjithatë krahasimet behën në baza vjetore që do të thotë që inflacioni prej periudhës e para pandemisë edhe para shpërthimit të luftës në Ukrainë megjithatë është shumë i lartë edhe rrjedhimisht ne ballafaqohemi me këto çmime të produkteve të cilat vijojnë të jenë të larat. Assesi nuk shohim ndonjë trend të uljes së tyre aq më tepër në masën në të cilin ato ishin para pandemisë”, theksoi ai.

    Zeka ka thënë se çmimet janë duke mbetur të larta edhe pse inflacioni ka vazhduar që të bije, për shkak të çrregullimeve ne zingjiret e furnizimit global.

    E sipas tij, Kosova ka një bazë të ulët të prodhimtarisë dhe i nënshtrohet më tepër çmimeve të larta edhe inflacionit me qenë se në masë të madhe importohet pothuajse gjithçka.

    “Janë këto çrregullimet ne zingjiret furnizimit global me të cilat vazhdojnë të ballafaqohemi edhe ne por edhe shtet e tjera edhe fatkeqësisht edhe konfliktet e tjera që po shpërthejnë edhe problemet e tjera të cilat po e pengojnë tregtinë ndërkombëtare edhe prodhimin e mallrave në të njëjtën kohë, nuk duket se kanë të ndalur. Edhe rrjedhimisht po ndikojnë edhe në këto çmime të larta. Kosova duke pasur një bazë të ulët të prodhimtarisë natyrisht që i nënshtrohet më tepër çmimeve të larta edhe inflacionit me qenë se në masë të madhe importojmë pothuajse gjithçka”, u shpreh ai për EO.

  • Zeka: Kosova s’ka mekanizëm kontrolli, paramendo me lopë të ngordhura është bërë suxhuk

    Zeka: Kosova s’ka mekanizëm kontrolli, paramendo me lopë të ngordhura është bërë suxhuk

    Gazetari Milaim Zeka, në emisionin CONTEXT në ATV, tha se për dallim prej Kosovës, në vendet e tjera evropiane ekziston mekanizmi i kontrollit.

    Sipas tij, në Kosovë nuk ka mekanizëm kontrolli.

    “Dallimi mes Kosovës dhe vendeve të tjera është se atje ekziston mekanizmi i kontrollit. Për shembull po e marr sektorin e mjekësisë. Këtë e kam thënë shumë herë në studio televizive që është dashtë me u nda mjekët të cilët shkojnë e punojnë tri-katër orë ne qendër spitalore të shtetit me i marrë pacientat privat, me i rekrutu dhe çka ndodh në spitalet private të Kosovës?, o veç gishti nëse të dhemb, kur të dilsh te recepcioni ke me i pagu 300-400 euro. Të shtinë me i ba 100 kontrolla. Por të ekzistonte mekanizmi i kontrollit që kjo oda e mjekëve me ia marrë licencën dikuj, një spitali, kujna ia kanë marrë licencën, çka kanë ba në këtë vend”, tha Zeka.

    Ai përmend importimin e mishit nga Brazili, përzierjen e naftës me vaj, madje edhe një rast ku prej lopëve të ngordhura që është bërë suxhuk.

    “Na tanë e dimë këtu në studio që mishi vjen prej Brazilit, ngrihet e shkrihet 3-4 herë. Na të gjithë e dimë që janë ble, unë e di që një kompani shumë e fuqishme e derivateve, 200 mijë litra vaj të kuzhinës i ka përzi me naftë e na ka shitë neve, kam video incizime. Na e dimë që këtu çka nuk përzihet me naftë, me benzinë, çka nuk hamë, lloj lloj ushqimi. Konservat e ushtrisë polake prej luftës së dytë botërore, janë zbulu që janë ardhë. U zbulu njeri në Pejë që ka shku lopë të ngordhura, i ka marrë e i ka ba suxhuk. Qysh mundet me pasë suxhuk 1 euro kilogrami”, tha Zeka. /atvlive.tv

  • “A je kanë ti që thanë se Albin Kurti është më i miri, pse i ke rënë pishman tash”, përplasje mes Hamidit dhe Sefajt

    “A je kanë ti që thanë se Albin Kurti është më i miri, pse i ke rënë pishman tash”, përplasje mes Hamidit dhe Sefajt

    Debat i ashpër është zhvilluar mes gazetarit Lavdim Hamidi dhe përfaqësuesit të Sindikatës së Shërbyesve Civilë Ali Sefaj, në emisionin CONTEXT Në ATV, ku u diskutua për ikjet nga Kosova drejt vendeve evropiane për një jetë më të mirë.

    “A ke qenë ai që na ke thanë se Albin Kurti është më i miri?”, iu drejtuar gazetari Hamidi sindikalistit Sefaj.

    “Po, se premtimet e tij kanë qenë më të mirat, por nuk i ka mbajtë asnjo fjalët. Tash unë nuk kam faj që ai ka mashtru për secilin premtim”, ia ktheu Sefaj.

    Për më shumë, shikoni videon më poshtë:

  • Dr. Selami Sylejmani, profesionist e humanist i ndritur

    Dr. Selami Sylejmani, profesionist e humanist i ndritur

    Shkruan: Demir Reshiti

    Të martën (9 janar 2024) e ka kremtuar ditëlindjen e 70-të doktori i respektuar opojan, docent. dr. sc. Selami Sylejmani. Selamiu është një nga emrat më të spikatur të mjekësisë në Kosovë dhe rajon, i specializuar në lëmin e gjinekologjisë në Zagreb dhe Tiranë dhe një nga pionierët e ultrasonografisë në Kosovë.

    Dr. Selamiu është pronar i klinikës Ginekos, një nga klinikat e para private gjinekologjike ku ka dhënë kontribut të jashtëzakonshëm sidomos në periudhën e okupimit të institucioneve nga ana e pushtuesit serb. Në këtë klinikë ka trajtuar falas me mijëra paciente me kushte të rënda sociale, ndërsa për hir të mikpritjes që treva e Kukësit u ka bërë shqiptarëve të dëbuar nga Kosova, me vite të tëra ka ofruar shërbime falas për pacientet nga Kukësi e rrethina!


    Përveç si profesionist e humanist i spikatur, dr. Selamiu është edhe atdhetar i devotshëm. Ka qenë i burgosur dhe i përndjekur politik, ndërsa vëllain e tij Hyrmetin e kanë vrarë forcat ushtarako policore serbe në masakrën e Tususit, në vitin 1999.

    Dr. Selamiu u lind më 09.01.1954, në Bresanë. Është djali më i madh i prindërve Nijazi (Sylejman) Sylejmani dhe Xhevahire (Osmani) Sylejmani, të cilët përveç Selamiut kishin edhe dy djem Xhemilin (stomatolog) dhe Hyrmetin (i vrarë në masakrën e Tususit në Prizren).

    I lindur në një familje që shquhej për dëshirën e madhe për arsimim

    Fëmijëria e Selami Sylejmanit, nuk dallon shumë nga fëmijëria e bashkëmoshatareve të vet dhe bashkëvendëseve të vet. I lindur në “kulmin” e një dimri shumë të acartë të cilin akoma më të acartë e kishte bërë  aksioni i grumbullimit të armëve i ideuar nga krimineli serb Aleksander Rankoviq. Në shënjestër të këtij aksioni famëkeq ishte edhe gjyshi i Selamiut, Sylejmani, i cili si shumë shqiptarë tjerë qe ftuar për ta dorëzuar armën ndërsa babai i tij Nijaziu disa herë është dashur vullnetar të shkojë për ta ndërruar atë (Sylejmanin) kur është thirrur në polici, për ta kursyer nga torturat që i janë bërë, me pretekst të dorëzimit të armeve!
    Babai i Selamiut, Nijaziu, që në fëmijëri shquhej për dëshirën e madhe që kishte për mësim dhe për ta realizuar këtë dëshirë kishte mbështetjen e babait të ti haxhi Sylës i cili me t’u hapur shkolla shqipe në Bresanë, ishte ndër të parët që e dërgoi djalin e tij në shkollë të mësuesi i parë i asaj kohe, Hajdar Siçeca. Madje duke e ditur rëndësinë e arsimimit shqip, gjyshi i Selamiut, Syla i Ramadanit, në mënyrë vullnetare, pa pagesë, ua ka mundësuar që në njërën dhomë të shtëpisë e cila kishte vetëm dy dhoma, të banojnë mësuesi Hajdar së bashku me bashkëshorte e tij Arifqe Siçecën, të cilët në atë periudhë punonin si mësues dhe angazhoheshin në çrrënjosjen e analfabetizmit në Bresanë dhe rrethinë.

    Me qëllim të lehtësimit të shkollimit të fëmijëve, babai i Selamiut, Nijaziu, shpërngulet në Prizren ku në vitin 1979 pëson një fatkeqësi komunikacioni me biçikletë, në dalje të rrugës së Lubizhdës së Prizrenit, për në rrugë kryesore. Nijaziu aksidentohet nga gjykatësi i gjykatës së Prizrenit Zhivko Shtatkiç, dhe vdes në spitalin e Prizrenit në moshën 52 vjeçare.

    Nga dëshira për arsim, prindërit e dërgojnë në shkollë Selamiun akoma pa i mbushur 7 vjet. Shkollën fillore e përfundoi në vendlindjen e tij, Bresanë, ndërsa shkollimin e mesëm në Shkollën e Mesme të Mjekësisë në Prizren (1972) dhe pajiset me diplomën Teknik medicinal.

     

    Në vitin 1980 e përfundon fakultetin e mjekësisë në Universitetin e Prishtinës. Ndërsa studimet pasuniversitare i përfundon në vitin 1987 në Universitetin e Zagrebit (Kroaci), drejtimi Ultratingulli në Mjekësinë Klinike, dhe avancohet në gradën Ultrasonist në lëmin e gjinekologjisë dhe obstetrikës. Një vit më vonë (1988), në të njëjtin universitet kryen specializimin në lëmin e gjinekologjisë me Obstetrikë. Titullin magjistër i shkencave mjekësore e fiton në vitin 1995 në  Fakultetin e Mjekësisë të Universitetit të Prishtinës ku mbron me sukses të shkëlqyer tezen “Paraqitja ultrasonike e shtatzënive të hershme patologjike, posaçërisht në blighted ovum”.

    Gradën Doktor i shkencave mjekësore e arrin në vitin 2000 në Fakultetin e Mjekësisë të Universitetit të Tiranës ku mbron tezen “Parashikimi i ovulacionit dhe vlerësimi i funksionit të vezoreve te gratë me anë të ultratingullit”.

    Titullin akademik titullin akademik Profesor MD, PhD e arrin në Universitetin Publik “Fehmi Agani” në Gjakovë ndërsa titullin  “Docent” e arrin në në Universitetin Ndërkombëtar DIU Libertas, Zagreb, Kroaci.

    Specializime të ndryshme pasuniversitare në lëmin e ultrasonografisë në gjinekologji dhe obstetrikë ka kryer në institucione të njohura kombëtare e ndërkombëtare.

    I vlerësuar për punë profesionale dhe humanizëm

    Ka punuar si teknik medicinal, mjek, mësimdhënës dhe si gjinekolog në qytete të ndryshme të Kosovës: Suharekë, Dragash, Prizren, Podujevë dhe Prishtinë.

    Pas përfundimit të shkollës së mesme ka punuar për disa muaj (1975) si Infermier ne dhomën e pranimit të Spitalit të përgjithshëm të Qendrës Medicinale të Prizrenit. Më pas, në periudhën 1979-1980, ka punuar si profesor i disa lëndëve në Qendrën e Shkollave të Mesme “Jeta e Re” Suharekë.

    Në shtator të vitit 1980 punësohet si mjek i përgjithshëm në Shtëpinë e Shëndetit në Dragash dhe në punkte shëndetësore nëpër fshatra të kësaj komune (sipas nevojës). Pas demonstratave studentore të vitit 1981 kur fillojnë diferencimet e arrestimet e intelektualëve me bagazh kombëtar,  më 13 prill e arrestojnë edhe doktor Selamiun për shkak të bindjeve politike me arsyetimin se ishte marrë me “veprimtari armiqësore” sepse kishte dalë në përkrahje të demonstratave dhe përkrahje e kërkesës së studenteve për  Kosovën Republikë! Një javë pasi e lirojnë nga burgu, e dërgojnë në shërbim ushtarak në Novi Sad të Vojvodinës. Pas përfundimit të shërbimit ushtarak, kthehet në vendin e punës në shtëpinë e shëndetit në Dragash, mirëpo menjëherë e përjashtojnë nga puna me procedurë të shpejtë!

    Në qershor të vitit 1982, pas përfundimit të procesit gjyqësor rikthehet në vendin e punës në Shtëpinë e shëndetit në Dragash dhe i caktohet vendi i punës në fshatin e largët Restelicë (si formë e dënimit për shkak të ‘papërshtatshmërisë’ politike). Në Restelicë mirëpritet nga banoret sepse behët mjeku i parë i përhershëm në këtë fshat! Respekti që gëzoi në këtë fshat bie në sy të strukturave drejtuese të asaj kohe dhe nga ana e drejtorisë së Shtëpisë së Shëndetit në Dragash “këshillohet” që tani në mënyrë “vullnetare” të largohet nga vendi i punës, ose në të kundërtën ata sërish do të nisin procedurën gjyqësore për përjashtimin nga puna! Detyrohet t’i zbatojë urdhrat dhe në mënyrë “vullnetare” dhe më 30 gusht1982 e lëshon vendin e punës dhe të nesërmen fillon punë si mjek në ambulancën e fshatit Orllan të komunës së Podujevës. Që të punësohet në Orllan, ndihmohet nga drejtori i Shtëpisë së Shëndetit Podujevë, dr. Muharrem Avdiu.

    Në fillim të vitit 1983 fillon punë në Qendrën Medicinale “Boro e Ramizi” në Prizren. Për punësimin në Qendrën Medicinale “Boro e Ramizi” në Prizren e ndihmon dr. Ymrane Celina e cila atëbotë ishte kryetare e pleqësisë së organizatës bazë, sepse ishte e vështirë një mjek me biografi pas burgosjes për shkaqe politike dhe largimit nga puna të pranohet në punë. Deri në përfundimin e specializimit, punoi si mjek i përgjithshëm, ndërsa pas përfundimit të specializimit (29.02.1988), punoi profesionin e gjinekologut dhe obstetrit në repartin gjinekologjik obstetrikë të Spitalit të përgjithshëm të Prizrenit. Në këtë spital për një kohë të shkurtër u bë njëri nga gjinekologët më të famshëm dhe në vitin 1989 e themeloi Kabinetin e Diagnostikës Ultrasonografike në Mjekësi.
    Si gjinekolog punoi deri më 14.10.1991, kur nga organi i dhunshëm punë-drejtues largohet nga puna. Pas largimit nga puna nga Spitali i Prizrenit, më 15 tetor të vitit 1991, themelon Ndërmarrjen private Shëndetësore “GINEKOS” në Prizren ku punon edhe tani.

    Poliklinika GINEKOS, shndërrohet në vatër të arsimit – Ordinancë Shkollë dhe “Nëna Terezë e dytë”.  Këtu mbajtën pjesën praktike studentët e Fakultetit të Mjekësisë të Universitetit të Prishtinës. Në poliklinikën GINEKOS e kryen pjesën praktike të gjitha gjeneratat e kësaj periudhe të Shkollës së Mesme të Mjekësisë “Luciano Motroni” në Prizren – drejtimi i mamive.

    Nga viti 1992 deri në vitin 2000 ka punuar si mësimdhënës në Shkollën e Mesme të Mjekësisë “Luciano Motroni” në Prizren. Në këtë shkollë ka punuar si profesor i lëndës së gjinekologjisë me obstetrikë për drejtimin e Mamive dhe Infermierisë së përgjithshme, (pa pagesë), në objektet Shtëpitë Shkolla, si formë e mbijetesës së arsimit shqip, dhe formë e rezistencës dhe luftës për mbijetesë të arsimit shqip të popullit tonë.

    Ka punuar pa pagesë në Ambulancën “Nëna Terezë” në Prizren dhe Spitalin “Nëna Terezë” në Prishtinë për 4 vite me radhë (1995-1999).

    Pas përfundimit të luftës, në qershor të vitit 1999, për shkak të rrethanave të krijuara dhe mungesës së mjekeve – gjinekolog në Repartin gjinekologji -obstetrikë të Spitalit Rajonal, rikthehet dhe fillon punën e gjinekologut, pa kompensim material. Më 15 nëntor 1999 i lejohet pushim pa pagesë për një vit me qëllim të përfundimit të punimit të doktoratës të cilin e mbron publikisht më 2 maj të vitit 2000.

    Pas fitimit të gradës shkencore doktor i shkencave të mjekësisë, udhëheqësit e Spitalit të përgjithshëm Rajonal nuk treguan gatishmëri e as interes për të vazhduar punën në këtë institucion, për çka serish kthehet dhe vazhdon punën private në Poliklinikën Ginekos.

    Në qershor të vitit 2013 angazhohet si Docent – Ligjërues në studimet pasuniversitare në lëmin e diagnostikës ultrasonografike në gjinekologji me obstetrikë në Universitetin Ndërkombëtar DIU Libertas në Zagreb të Kroacisë.

    Më 3 tetor 2014 nis punën në Fakultetin e Mjekësisë, Drejtimi Infermieri dhe Mami si profesor i lëndëve: Obstetrika dhe Gjinekologjia; Shëndeti Riprodhues dhe Etika 1; Shëndeti Riprodhues dhe Etika 2; dhe Infeksionet në shtatzëni dhe periudhën perinatale.

    Ka organizuar, udhëhequr dhe ligjëruar në Shkollën Ndërkombëtare për edukim në lëmin e diagnostikës ultrasonografike në mjekësi ALOKA-KOSOVA, 2003-2005, Prizren. Ka organizuar, udhëhequr dhe ligjëruar Kursin njëjavor në lëmin e diagnostikës ultrasonografike në gjinekologji dhe obstetrikë mbajtur në Spitalin Rajonal të Prizrenit 05-09 nëntor 2006. Ishte organizator dhe Udhëheqës i Kursit Intensiv në lëmin e ultrasonografisë së vazave të gjakut, mbajtur në Spitalin Rajonal të Prizrenit, nga 12-16 nëntor 2007.

    Ishte organizator, udhëheqës dhe ligjërues i punëtorisë në lëmin e ultrasonografisë së sëmundjeve të gjirit, mbajtur në bashkëpunim me Poliklinikën GINEKOS dhe NT KONTI, Prizren, Ligjërues në Konferencën e 4-të Ndërkombëtare të Perinatologjisë Shqiptare mbajtur në Tiranë – Shqipëri, nga 11-13 qershor 2010; Ligjërues në Kongresin e 5-të të Shoqatës Shqiptare të Perinatologjisë, mbajtur në Tiranë , Shqipëri, 10-12 Qershor 2011; Ligjërues në Kongresin e parë të Shoqatës së Obstetërve dhe gjinekologve të Kosovës, mbajtur në Pejë më 18-19 Maj 2012; Ligjërues në Simpoziumin: “Epidemiologjia dhe diagnostikimi bashkëkohor i sëmundjeve të gjirit”, organizuar nga Universiteti i Vlorës, 27 prill 2012; Ligjërues në Konferencën Ndërkombëtare: “Zhvillimet bashkëkohore në Farmaci” mbajtur nga 22-23 shtator 2012, Prishtinë; Ligjërues në Kongresin e 6-të Ndërkombëtar të Shoqatës Shqiptare të Perinatologjisë, mbajtur në Tiranë nga 02-03 shkurt, 2013; Ligjërues në Shkollën e 12-të të Perinatologeve të Serbisë mbajtur nga 05-07 prill 2013, në Tara; Ligjërues në Kursin Intensiv bazik “Ultrasonografia në Obstetrikë” mbajtur në Klinikën e gjinekologjisë me obstetrikë të Fakultetit të Mjekësisë në Prishtinë nga 29-31.05.2013.

    Dr. Selami Sylejmani është autor dhe bashkautor i mbi 200 punimeve shkencore të publikuara në revista prestigjioze me impakt ndërkombëtar, si dhe organizator dhe pjesëmarrës në dhjetëra konferenca e aktivitete shkencore kombëtare e ndërkombëtare.

    Është anëtar i Shoqatës së Mjekëve të Kosovës; Anëtar i Kryesisë së Shoqatës së Obstetërve dhe Gjinekologëve të Kosovës në kryesinë aktuale; Kryetar i Shoqatës së Kosovës për Aplikimin e Ultratingullit në Mjekësi në periudhën 2002 – 2007; Anëtar i Shoqatës së Mjekëve Privatë të Kosovës; Anëtar i Shoqatës së Mjekëve të Kroacisë (Hrvatski Lječnički Zbor); Anëtar i ISUOG-ut (International Society of Ultrasound in Obstetrics and Gynecology); Anëtar nderi i Shoqatës së Perinatologeve të Shqipërisë;  Anëtar i Kryesisë së Shoqatës së Obstetërve dhe Gjinekologëve të Kosovës ne kryesinë aktuale.

    Nga viti 2018, dr. Selamiu është drejtor i Shkollës Ndëruniversitare Ndërkombëtare Ian Donald,  për Republikën e Kosovës, te cilin post ende e mban.

    Për punën dhe angazhimin e tij prej afro gjysmë shekulli në fushën e mjekësisë dhe humanizmit e atdhetarisë, është vlerësuar me qindra mirënjohje, certifikata e plaketa nderi nga institucione vendore e ndërkombëtare si dhe nga qindra pacientë të cilët falë përkujdesjes së doktor Selamiut janë bërë prindër madje edhe në rastet kur i kishin të shuara shpresat!

    Doktor Selamiu është i martuar me Shefkate Hajdarin nga fshati Bresanë me të cilën kanë lindur pesë fëmijë, tri vajza (Sebahate, Shqipe, Dorarta) dhe dy djem (Leutrim, Qendrim), që të gjithë kanë përfunduar fakultetin, katër të parët janë të martuar dhe janë bërë prindër, ndërsa djali i vogël Qendrimi është i fejuar. Selamiu dhe bashkëshortja e tij Shefkatja janë gjyshër të lumtur të dy mbesave (Amla e Anda) dhe katër nipave (Leari, Noari, Blini dhe Lisi).

    Vlen të theksohet se të gjithë fëmijët e dr. Selamiut kanë zgjedhur profesionin e mantelbardhit! Vajza e madhe Sebahate Sylejmani Shala, mjeke, Gjinekologe – Obstetre, punon në QKMF në Sharr; Vajza e dytë Shqipe Sylejmani Rexhepi, magjistre e farmacisë; Vajza e vogël, Dorarta Sylejmani Morina, Magjistre e Farmacisë; Djali i madh Leutrimi, mjek në specializim të Dermatovenerologjisë; Bashkëshortja e Leutrimit, Saimja, mjeke në specializim të gjinekologjisë me obstetrikë, ndërsa djali i vogël Qëndrimi është mjek, dhe e fejuara e Qëndrimit, Ela Jonuzi, është studente e Fakultetit të Mjekësisë!

    Doktor Selamiun e urojmë për ditëlindjen e tij të 70-të duke i dëshiruar shëndet në radhë të parë, dhe suksese në veprimtarinë e tij shkencore e humane!

    Disa histori jete të dr. Selamiut- kuriozitete që nuk harrohen!

    I – Më 14.10.1991, organi i përdhunshëm punë-drejtues e largon nga puna, në vazhdën e zbrazjes së institucioneve nga kuadrot e përkatësisë shqiptare. Për mbijetesë, më 15.10.1991, fillon punën në Poliklinikën Ginekos në Prizren. Me përkushtim maksimal e profesionalizëm që nga ajo ditë, asnjëherë, nuk e ka kthyer asnjë paciente pa e vizituar, pavarësisht a ka pasur mundësi të paguajë! Ky profesionalizëm dhe kjo korrektësi shumë herë u vlerësua nga shumë paciente.

    II – Në Dragash e konsiderojnë armik i popullit, e burgosin dhe e largojnë nga puna! Në Podujevë dhe fshatrat e komunës së Podujevës, bëhet mjek shumë i vlerësuar dhe i paharruar edhe pas 40 vitesh! Më 13 prill të vitit 1981, gjatë ushtrimit të profesionit të mjekut, arrestohet nga policia dhe me procedurë të shpejtë burgost, për shkak të përkrahjes së demonstratave të marsit të vitit 1981 dhe kërkesës Kosova Republikë. Pas lirimit nga burgu e largojnë nga puna, dhe për një periudhë detyrohet për mbijetesë të punojë punë krahu. Me ndihmën e Dr. Muharrem Avdiut, në atë periudhë drejtor i Shtëpisë së Shëndetit në Podujevë, më 31.08.1982, pranohet në punë në Ambulancën në Orllan. Aty punon deri më 10.01.1983. Populli i Orllanit dhe i fshatrave përreth, si popull i mrekullueshëm që është e mirëpret doktor Selamiun i cili ju shërbente me devotshmëri!

    Bota është e vogël! Në vitin 2012, qifti bashkëshortor Strelli – Pollomi, nga Podujeva të cilët edhe përkundër dëshirës 4 vite, ende nuk kishin fëmijë, shkojnë në ordinancën e tij private GINEKOS. Pas këshillave dhe terapisë, zonja G. S. ngel shtatzënë dhe i lindin dy vajza të bukura dhe të mrekullueshme, Rumesa dhe Tara. Pas 10 vitesh, ky çift bashkëshortor ishin shumë mirënjohës dhe së bashku me vajzat i shkojnë për vizitë dhe e falënderojnë doktor Selamiun!

    III- Fëmija i parë i dr. Selamiut, Sebahatja, ka lindur më 22.06.1981, ndërsa është  regjistruar zyrtarisht më 10.10.1981, për shkak se në periudhën e lindjes, babai i Sebahates, ishte burgosur nga regjimi dhe ndodhej në burg në Prizren, për shkak të përkrahjes së demonstratave të marsit të vitit 1981 dhe Shpalljes së Kosovës Republikë. Lindja e Sebahates u krye në shtëpinë private të familjes së Selami Sylejmanit, e ndihmuar nga mamia Shefie Tutuli Gashi, për shkak të frikës nga ish regjimi, që lindja e bashkëshortes së një të burgosuri politik të kryhet në institucione publike. Sebahate Selami Sylejmani Shala, tash është e martuar me Burim Shalën nga Prizreni dhe me profesion është mjeke gjinekologe.

    IV- Në datat 30 mars – 1 prill 2007, në Lahore të Pakistanit, është mbajtur Konferenca Ndërkombëtare Pakistanezo-Kosovare: PAK – KOSOVA INTERNATIONAL CONFRENCE, me rreth 500 pjesëmarrës nga të gjitha kontinentet. Në këtë Konferencë, Kosova u përfaqësua nga: Zëvendësministri i Shëndetësisë Dr. Fadil Kryeziu. Ligjërues ishin prof. Selami Sylejmani, dhe prof. Sejran Abdushi, ndërsa staf shoqërues Tahir Hoxha (tashmë i ndjerë) dhe Dorarta Sylejmani. Nga Kosova u prezantuan 5 ligjërata. Gjatë këtij aktiviteti shkencor, u bë promovimi i një librit mbi Kosovën, i një autori pakistanez. Pritja e përfaqësueseve të Kosovës në Lahore, u bë nga miku i madh i Kosovës, prof. Syed Amir Gilani. Ishte pritje e ngjashme me një delegacion zyrtar shtetëror, fantastike, e paharrueshme… Kuriozitet: Me rastin e hapjes zyrtare të konferencës, ishte traditë që të intonohen himnet e të dy shteteve. Delegacionit të Kosovës iu kërkua nga organizatori që ta dorëzojnë himnin e shtetit – Kosovës! Mirëpo, Kosova ende nuk ishte shtet i pranuar dhe i njohur. Sikur ta dorëzonim himnin e shtetit të Shqipërisë, ai mund të njihej nga ndonjë i pranishëm dhe të mund të na paraqiste ndonjë telashe të pa planifikuar. Atëherë, të gjithë u dakorduan dhe nga interneti e shkarkuan këngën  “Kur ka ra kushtrimi në Kosovë” që njihej si himni dardan dhe për herë të parë në një aktivitet zyrtar në mes dy Shoqatave të dy shteteve, u intonua zyrtarisht himni i Dardanisë! Të gjithë të pranishmit u ngritën dhe qëndruan në shenjë nderimi, gjatë antonimit. Ishte ndjenjë që nuk përsëritet!

     

     

     

  • Zeka: Patriotizëm është me i mbajtë fëmijët në atë vend ku ka punë, sigurim shëndetësor dhe siguri për jetë

    Zeka: Patriotizëm është me i mbajtë fëmijët në atë vend ku ka punë, sigurim shëndetësor dhe siguri për jetë

    Gazetari Milaim Zeka, në emisionin CONTEXT në ATV, tha se patriotizëm është me i mbajtë fëmijët aty ku kanë punë, sigurim shëndetësor dhe siguri për jetë.

    “Patriotizëm është që fëmijët me i mbajtë në Kosovë ose kudo në botë, edhe në Afganistan me i qu, veç që kanë punë, sigurim shëndetësor dhe siguri për jetë. Unë të paktën nuk e bëj krimin që e kam bërë ndaj vetes time, tanë jetën ia kam kushtu këtij vendi, e ky vend me ka dhanë veç hu gardhi dhe poshtërim. Pasha tokë e qiell, nuk i dënoj fëmijët e mi qysh e kam dënu veten për një mijë vjet. Fëmijë kam me iu thënë, a po do në Amerikë, a po do në Australi, po as turist mos hajde këtu derisa të krijohen kushtet e mira”, tha Zeka. /atvlive.tv

  • Sefaj: Prej vendeve tjera janë larguar ata që nuk mujt me e ba qarën, ndërsa prej Kosovës po ikin kuadro profesionale

    Sefaj: Prej vendeve tjera janë larguar ata që nuk mujt me e ba qarën, ndërsa prej Kosovës po ikin kuadro profesionale

    Përfaqësuesi i Sindikatës së Shërbyesve Civilë, Ali Sefaj, në emisionin CONTEXT në ATV, tha se është shqetësuese se Kosovës po i ikin profesionistët, në krahasim me vendet e tjera të rajonit, ku vendin e kanë lëshuar ata që nuk kanë arritë me e gjetë veten në vendin ku jetojnë.

    Ai thotë se Kosovës i duhet kohë me i nxjerrë sërish këto kuadro, dhe në rast se arrinë me i nxjerrë, nuk ka siguri që ata prapë nuk e lëshojnë vendin.

    “Prej Kosove janë tu ikë profesionistë. Prej vendeve tjera kanë ikë njerëzit që s’kanë mujt me e ba qarën. Neve na ikin inxhinierët e elektros përditë, na ikin inxhinierët e makinerisë, na ikin inxhinierët e teknologjisë, na ikin mjekët, do me thanë neve na ikin kuadrot të cilat na duhet kohë me i zëvendësua. Por edhe nëse i prodhon ti, ose i nxjerr nga bankat shkollore, ty të duhet kohë se sistemi i jonë arsimor nuk është kompatibil me tregun e punës dhe ti duhet, përveç teknologjisë informative, të tjerave iu duhet së paku katër-pesë vjet përvojë pune, e kush të garanton që nesër ai të rrin në sistem. Kemi me qenë vetëm sistem transitor për me përgatitë kuadro për me të ikë”, tha Sefaj. /atvlive.tv

  • Hamidi tregon një sms live në emision: Jam baba i tre fëmijëve, kam me ikë prej Kosovës se nuk po ia dalë me e mabjtë familjen me pagën që marr

    Hamidi tregon një sms live në emision: Jam baba i tre fëmijëve, kam me ikë prej Kosovës se nuk po ia dalë me e mabjtë familjen me pagën që marr

    Gazetari Lavdim Hamidi, në emisionin CONTEXT në ATV, tregoi një sms të një zjarrfikësi, në të cilin duhet se është baba i tre fëmijëve dhe me pagën që merr nuk ia del ta mbajë familjen, andaj si rrugë të vetme e sheh ikjen nga Kosova për një jetë më të mirë.

    “Viti i parë ka me qenë një vit shumë i vështirë. Për shembull, për Kosovën nëse ndodh ajo siç janë pritjet me ikë shumë fuqi punëtore. Sa jemi këtu tu folë në emision, më shkruan një zjarrfikës, as nuk e njoh, thotë se e ka 500 euro pagën, ‘na kanë hjek rrezikshmërinë me Ligj të Pagave, i kam tre fëmijë, nuk mundem me jetu me atë pagë, kam me ikë në Gjermani”. Do me thanë, kështu ka me ndodh edhe me shumë profesione tjera”, tha Hamidi. /atvlive.tv

  • Zeka: Jam duke i përgatitë vajzat me ikë prej Kosovës, këtij vendi i mungojnë tri gjërat më elementare

    Zeka: Jam duke i përgatitë vajzat me ikë prej Kosovës, këtij vendi i mungojnë tri gjërat më elementare

    Gazetari Milaim Zeka, në emisionin CONTEXT në ATV, tha se ikjen nga Kosova e sheh si normale.

    Ai thotë se nuk ka të drejtë morale t’iu kërkojë njerëzve që mos ta lëshojnë vendin për një jetë më të mirë, derisa vazhdon ai, edhe dy vajzat e veta është duke i përgatitur për me ikë jashtë vendit.

    “Çfarë të drejte morale ose njerëzore kam me iu thënë kushërinjve të mi, njerëzve të mi, familjarëve të mi, mos ikë për një jetë më të mirë, për një punë më të mirë, për një siguroi më të mirë. Unë dy vajzat i kam në Suedi, njëra është mjeke, njëra inxhiniere edhe nuk kam arritë që 23 vjet me iu kriju kushte për me ardhë ato me punu në Kosovë. E kur dy vajzat e tjera që i kam këtu, prej fillimit e kam prognozua edhe i kam përgatitë për me ikë përjashta. Unë si babë jam tu i përgatitë vajzat e mia me ikë prej këtij vendi”, tha Zeka.

    Ai thotë se përtej rrogës, janë edhe tri gjëra elementare që i mungojnë këtij vendi.

    “Pse me ikë prej këtij vendi? Sepse përtej rrogës, janë tri gjërat elementare që i mungojnë këtij vendi. Një, është shëndetësia. Shkon në spital i sëmurë, kthehesh më i sëmurë. Një kolege mjeke, kurrë nuk e harroj, e kam citu me qindra herë nëpër studio televizive, mjeke briliante, me ka thënë “ne kemi kushte me mbytë pacientë. Këta janë njerëz fantastikë, mjekë fantastikë, profesionistë fantastikë, po ti shkon te këta kontrollohem, më thotë po me vjen keq Milaim, por duhet me dalë me ble këtë, këtë, me ble gjilpëra. Ky s’mundet me t’i dhënë gjilpërat e veta. Dy, mungesë totale e drejtësisë. Në qoftë se ti jeton në një shtet kur një hetues kriminel, hetues policor, është bërë multi milionerë, kur ti pjesën dërmuese të kapitenëve të graduar të Policisë i ke multi milionera, kur një hetues në Pejë duke kontrolluar një biznesmen, djali i ri të Frankfurtit, e marrin dhe ia fusin 20 gramë kokainë në xhep mbrapa, e fusin në listën e Interpolit dhe ia lypin me e heqë nga Interpoli. Normal që duhet me ikë prej këtij vendi. Dhe, e treta, kur e ke një arsim, një sistem arsimor që prodhon doktora të shkencave analfabetë, profesorë analfabetë, mësues analfabetë, të cilët nuk dinë as artin e komunikimit qoftë me nxënës, qoftë me studentë. Cila është arsyeja që Sindikata e Arsimit vazhdimisht proteston edhe thotë që ne nuk mundemi me i futë në provim pranues arsimtarin. Qysh mos me e futë arsimtarin idiot, që s’e dinë matematikën, që s’e dinë anglishten, që nuk e njeh gjuhën shqipe, pse mos me e futë në provim”, tha Zeka. /atvlive.tv

  • Çmimet e banesave pritet të rriten sërish

    Çmimet e banesave pritet të rriten sërish

    Përgatiti: Benita Zeneli

    Agjencitë e patundshmërive dhe Shoqata e Ndërtimtarëve të Kosovës nuk pajtohen rreth çmimit për patundshmëri gjatë këtij viti.

    Sipas agjencive, çmimi mesatar për një banesë në Prishtinë do të sillet rreth 800 euro.

    “Rreth vitit 2013 në Fushë Kosovë ka qenë çmimi rreth 450 euro për metër katror, në 2020 kanë filluar të rriten mbi 500 euro, pastaj lufta në Ukrainë i ka çuar çmimet në 600 euro, ndërsa sivjet ka shkuar çmimi në 700 euro deri në 800 euro për metër katror në Fushë-Kosovë. Kjo për shkak se çmimet janë rritur në çdo sferë të jetës, por edhe për shkak të punëtorëve. Nëse një punëtor më herët ka marrë 600 euro rrogë, sot e merr 800 deri në 1 mijë në ndërtim, po ashtu edhe materialet ndërtimore të gjitha”, tha Dugagjin Avdyli nga agjencia për patundshmëri.

    E sipas Shoqatës së Ndërtimtarëve, nuk ka ndonjë indikacion që mund të ndikojë në rritjen e çmimeve.

    “Nuk ka ndonjë indikacion që do të rriten, mirëpo duhet me pa qysh lëvizin kur të fillojë sezoni i ndërtimit mes shkurtit, si do të jenë çmimet e materialeve, kostot e tokave e kështu, varet prej rrethanave”, tha Faton Hoxha nga Shoqata e Ndërtimtarëve të Kosovës
    .
    Në anën tjetër, qytetarët vlerësojnë se çmimet për patundshmëri tashmë janë të larta.

    Sipas raportit të Bankës Qendrore të Kosovës, për tremujorin e dytë të vitit 2023 sektori i patundshmërisë mbulon 60.0 për qind të Investimeve të Huaja Direkte apo 110.6 milionë euro për periudhën prill-qershor 2023.