ATV

Blog

  • Poeti Lulzim Tafa flet për dekoratën “Oficer i Urdhrit Kombëtar të Letrave dhe Arteve” që mori nga Franca

    Poeti Lulzim Tafa flet për dekoratën “Oficer i Urdhrit Kombëtar të Letrave dhe Arteve” që mori nga Franca

    Lulzim Tafa, njëri ndër poetët kosovar më të njohur në botë, ishte i ftuar në emisionin LIBERO në ATV, ku bëri një rrëfim më ndryshe për jetën e tij private, rrugëtimin profesional si dhe pasionin për poezi.

    Në këtë emision ai foli edhe për çmimet e shumta që ka marrë gjatë karrierës së tij në letërsi, ndërsa për çmimin e fundit që mori nga presidenti francez Emmanuel Macron, thotë se ka qenë ndër çmimet më të veçanta për të.

    “Në karrierën time pothuajse tërë jetësore me poezinë, me letërsinë, kam marrë shumë mirënjohje, çmime, dekorata, tituj nderi, mirëpo kjo që më erdhi nga presidenti i Republikës së Francës, Emmanuel Macron, që realisht është dekorata më e lartë të cilën e ndanë shteti francez në fushën e artit dhe letërsisë, përveç që më ka gëzuar, më ka tunduar shumë. Edhe për faktin se ndoshta lidhjet e mia me Francën janë pak më të veçanta, unë kam të botuara dy libra në gjuhën frënge, po ashtu kam qenë pjesëmarrës shumë herë në festivalet e letërsisë edhe të poezisë në Francë, jam anëtar i Akademisë Franceze të Letërsisë dhe të Arteve me seli në Paris dhe Parisin e kam konsideruar dhe vazhdoj ta konsideroj si kryeqendrën botërore të artit dhe të kulturës”, u shpreh poeti Tafa.

    Ai thotë se ky çmim e ka bërë atë që të ndihej njësoj si shumë vite më parë kur merrte çmime ndërkombëtare.

    “Kur më kanë pyet, a gëzohesh kur merr çmime ndërkombëtare dhe cili është gëzimi të cilin e ke përjetuar më përpara dhe cilin tash, unë them edhe atëherë, edhe tash jam gëzuar shumë, mirëpo gëzimi e ka njëfarë lloj ndryshimi. Gëzimi që e përjetoja dikur më tundonte, kurse këto tani më japin një qetësi. Përjashtimisht, sepse unë vetëm vitin e kaluar kam marrë shumë çmime, mirënjohje, dekorata, po flas vetëm gjatë vitit 2023 pa e llogaritë pjesën tjetër, por kjo është hera e parë pas një kohe të gjatë që edhe më ka tunduar”, rrëfeu poeti Tafa. /atvlive.tv

    Intervistën e plotë të poetit Lulzim Tafa në LIBERO e gjeni në videon më poshtë:

  • Ministri gjerman kërkon kohë për zbatimin e rregullores së BQK-së

    Ministri gjerman kërkon kohë për zbatimin e rregullores së BQK-së

    Përgatiti: Driton Sadiku

    Ministri Gjerman i Mbrojtjes të hënën qëndroi për vizitë në Kosovë, ku u prit nga krerët e shtetit. Pas takimit me Presidenten Vjosa Osmani, Boris Pistorius nuk kishte si të mos fliste për një temë mjaft aktuale në Kosovë.

    Për të, vendimi i BQK-së, që vendos euron si valutë të vetme për kryerje të pagesave në Kosovë, është krejtësisht i ligjshëm, megjithatë, sipas tij, duhet të jepet kohë për zbatimin e tij.

    “Jemi të vetëdijshëm që Kosova ka të drejtë të zbatojë ligjshmërinë e saj, por në deeskalim bën pjesë edhe masat legjitime për sa i përket vendosjes së euros, si valutë e vetme, mirëpo nevojitet që kjo të komunikohet në mënyrë më të përshtatshme, ashtu që askush të mos ketë frikë dhe ketë mosinformim”, tha Pistorius.

    Përtej ligjshmërisë, Presidentja Vjosa Osmani theksoi nevojën për dakoordim me aleatët ndërkombëtarë.

    “Nga të gjitha kontaktet e mia me kryeministrin mund t’iu siguroi që qëllimet i kemi të njëjta dhe ajo është mbrojtja e kushtetutës së vendit, mbrojtja e sovranitetit, sundimi i ligjit, por njëkohësisht edhe arritja e dakordimit me aleatët tanë sa i përket kësaj çështjeje. Metodat mund t’i kemi të ndryshme, por qëllimet asnjëherë”, tha Osmani.

    Duke kërkuar shtensionim të situatës mes Kosovës dhe Serbisë, si dhe duke bërë thirrje për rikthim në dialogun e ndërmjetësuar nga Bashkimi Evropian, Ministri Pistorius njoftoi se Gjermania do të rrisë praninë e saj ushtarake në Kosovë, qysh në pranverë.

    “Gjermania pas SHBA-së është njëra nga mbështetëset më të mëdha të Kosovës. Ne bashkëpunojmë me sukses në shumë fusha. KFOR-i mbetet si garantues për stabilitet dhe siguri. Sa u përket marrëdhënieve mes Serbisë dhe Kosovës është kërkesë deeskalimi. E ardhmja e Ballkanit Perëndimor është në Evropë, por parakusht është dialogu. Duke marrë parasysh tensionet aktuale bëjmë thirrje të qartë për maturi dhe kujdes”, tha Pistorius.

    Osmani u kujdes ta informojë më shumë ministrin gjerman, veçanërisht për sulmin terrorist në Banjskë për çka tha se terroristët serbë përdorën simbolet e KFOR-it, madje edhe atyre gjerman për ta kryer më lehtë sulmin.

    Vizitën zyrtare ministri gjerman e vazhdoi për në kryeministri me shefin e qeverisë, për ta përmbyllur më pas në një takim me homologun kosovar Ejup Maqedonci.

  • Ministrja Rizvanolli, për herë të parë në horizontet e “Trepçës”

    Ministrja Rizvanolli, për herë të parë në horizontet e “Trepçës”

    Përgatiti: Armand Hoti

    Prej tri vjetësh është ministre e këtij sektori, por tek të hënën, ministrja e Ekonomisë, Artane Rizvanolli, e vizitoi për herë të parë nëntokën e Stan Tërgut.

    Ajo thotë se as nuk e ka imagjinuar më përpara atë që pa në horizontin e 10-të në minierën e Trepçës, ku pa nga afër kushtet në të cilat punojnë minatorët.

    “Sigurisht që e dimë në nivel racional që puna e minatorëve është shumë e vështirë dhe se kushtet janë të vështira dhe të jashtëzakonshme, mirëpo është e paimagjinueshme deri sa nuk i sheh vetë. Është fatmirësi që në masë të madhe siguria në punë është e mirë, megjithëse ende ka problem”, tha Rizvanolli.

    Andaj, e para e ekonomisë thotë se përmirësimi i kushteve do të vendoset lart në listën e prioriteteve të ministrisë, por edhe të menaxhmentit të “Trepçës”, që tash ka kryeshef të ri.

    Gjiganti metalurgjik vazhdimisht është mbështetur nga Qeveria e Kosovës me subvencione milionëshe, që kryesisht janë përdorur për mbulimin e shpenzimeve operative.

    “Deri më tani shumica e subvencioneve kanë shkuar për shpenzime operative, për mbulim të pagave në radhë të parë, por edhe kriza energjetike dhe rritja e shpenzimeve për energji elektrike tejet e madhe për shkak të krizës, ka bërë që pjesa më e madhe e subvencioneve të jetë për shpenzime operacionale, por kjo absolutisht që duhet të ndryshojë, sepse ua kemi borxh punonjësve të “Trepçës” që të investojmë, që të përmirësojmë edhe kushtet e punës, edhe produktivitetin e punës”, tha Rizvanolli.

    Në të njëjtën linjë me ministren është edhe kryeshefi Bashkim Kurti.

    “Vetëqëndrueshmëria financiare është prioriteti ynë i parë, por në këtë prioritet t’parë realisht tonin si menaxhment i lartë, normalisht që lidhet apo është një nënkusht i parë i kësaj, është siguria në vendin e punës”, tha Kurti.

    Si sfidë e cila do të trajtohet, sipas ministres, është numri i vogël i minatorëve.

    Për këtë vit, Trepça me dy njësitë e saj që udhëhiqen nga shqiptarët synon t’i eksploatojë mbi 195 mijë tonë xehe të plumbit dhe zinkut.

  • Punëtorët teknikë të 16 shkollave në Prishtinë hyjnë në grevë

    Punëtorët teknikë të 16 shkollave në Prishtinë hyjnë në grevë

    Përgatiti: Kastriot Tahiri

    Prej kësaj të hëne e deri në plotësimin e kushteve, kjo derë nuk do të hapet.

    Madje, nëse kërkesa për rritje të pagës nuk plotësohet, dera rrezikon të mos hapet më nga punëtorët teknikë të shkollës fillore “Pjetër Bogdani”, në Prishtinë.

    “Na këtë grevë, nuk e kemi filluar me dëshirën tonë, por komuna na ka shty me bë këtë grevë për arsye se protestën më 23 nëntor që e kemi pas, nënkryetari Alban Zogaj na ka premtuar që do të ketë rritje të pagave prej muajit janar 2024, por kjo nuk ka ndodhur. Ato kanë qenë vetëm fjalë të tyre edhe tjetër opsion na nuk kemi pasë, kemi fillu me grevë”, tha Fazli Idrizi, kryepunëtor në shkollën e mesme “Pjetër Bogdani”.

    Në grevë kanë hyrë edhe punëtorët teknikë të shkollës fillore “Naim Frashëri”.

    “Çdo herë na kanë thënë shtator, tetor do të këqyrim dhe për këtë arsye pa dëshirën tonë se po na vjen keq prej nxënësve, sepse nxënësit janë duke e pësu, por na u ka imponu”, tha Nazmi Veseli, punëtor teknik në shkollën “Naim Frashëri”.

    Të papranueshme e diskriminuese, çështjen e pagës e cilësoi edhe kryetari i Sindikatës së pavarur të punëtoreve të sektorit privat, Jusuf Azemi.

    “Nëse nuk ka negocime, atëherë javën tjetër të gjithë punëtorët do të lirojnë vendet e tyre të punës dhe do të sillen punëtorët tjerë. Është një diskriminim i llojit të tillë përderisa në të njëjtin vend në të njëjtën shkollë këta punojnë dhe marrin dikush 230 e dikush 270 euro, po të njëjtit punëtorë marrin 405 euro, ka buxhet por nuk ka ndershmëri”, tha Azemi.

    ATV-ja gjatë ditës ka provuar të marrë një përgjigje në Komunën e Prishtinës në lidhje me kërkesat e punëtorëve teknikë, por ajo ka qenë e paqasshme.

    Grevë e njëjtë është mbajtur edhe gjatë vitit të kaluar, në 16 shkolla fillore e të mesme në kryeqytet, punëtorët e të cilave janë nën menaxhimin e kompanive të kontraktuara nga Komuna e Prishtinës.

  • Zlatan Arsiq, në mungesë të provave, lirohet nga akuzat për krime lufte në Kamenicë

    Zlatan Arsiq, në mungesë të provave, lirohet nga akuzat për krime lufte në Kamenicë

    Përgatiti: Nora Luta

    Pothuajse një vit prej kur u arrestua nën dyshimet për krime lufte në Kamenicë, Zlatan Arsiq nga kjo e hënë është në liri.

    Gjykata Themelore e Prishtinës, Arsiqin, në mungesë të provave, nuk e ka gjetur fajtor për krime lufte.

    Gjatë shqyrtimit gjyqësor, sipas Gjykatës Prokuroria Speciale nuk ka arritur të argumentojë se ishte Arsiq, ai që e maltretoi e kanosi me jetë Besim Muhaxherin.

    Megjithatë, sipas gjykatës, aktgjykimi lirues për Arsiqin nuk e konteston faktin se Muhaxheri ishte keqtrajtuar gjatë luftës.

    Mbrojtja e familja e Arsiqit e kanë mirëpritur vendimin e gjykatës së shkallës së parë.

    “Asnjë provë nuk e ka konfirmuar faktin se Zlatani kreu një krim lufte. Këtë e kemi pretenduar si mbrojtje në fillim dhe gjatë kërkesës për hedhjen e aktakuzës dhe gjatë procedurës së provave. Është e padiskutueshme se Zlatan Arsiqi ka pasur alibi dhe se ai nuk ka qenë aty kur pretendohet se ka ndodhur ngjarja”, tha Vasilije Arsiq, avokat i Zlatan Arsiqit.

    Prokuroria Speciale e Kosovës kishte ngritur aktakuzë ndaj Arsiqit, i cili kishte shërbyer në Policinë e Kosovës, në korrik të vitit të kaluar.

    Sipas aktakuzës, Arsiqi në mars të 1999-ës, në Stacionin Policor në Kamenicë, në bashkëkryerje me pjesëtarë të tjerë të policisë serbe, e kishte ndaluar Besim Muhaxherin, të cilin më pas e rrahin, e keqtrajtojnë në mënyrë çnjerëzore duke e kanosur edhe me jetë.

    Por, gjatë dëshmisë, Muhaxheri kishte dhënë deklarata kundërthënëse, e kishte identifikuar Arsiqin, por nuk ishte shprehur i sigurt për mënyrën dhe kohëzgjatjen e keqtrajtimit.

    I kontaktuar nga televizioni, Muhaxheri ka thënë se nuk dëshiron ta komentojë vendimin e gjykatës.

  • “TELEGRAM”, platforma ku po keqpërdoren fotografi dhe video intime të vajzave shqiptare

    “TELEGRAM”, platforma ku po keqpërdoren fotografi dhe video intime të vajzave shqiptare

    Përgatiti: Pranvera Krasniqi

    Grupe të shumta, me qindra-mijëra pjesëtarë.

    Por mesazhet që shkëmbehen mes tyre nuk janë fare të rëndomta.

    Këtu vazhdimisht shpërndahen të dhëna personale, fotografi e video intime e eksplicite të vajzave kosovare, të cilat në shumicën e rasteve po shantazhohen.

    Eksperti i sigurisë kibernetike, Kastriot Fetahaj, thotë se për veprimtari të tilla po përdoret kryesisht platforma “Telegram”, për t’u fshehur identiteti, meqë kjo konsiderohet edhe vepër penale.

    “Një program si ky mundëson kushte anonimiteti për çka edhe ka marrë hov të zhvillimit në këtë aspekt…”, tha Fetahaj.

    Ka raste nëpër botë, që vajzat kanë kryer vetëvrasje për shkak të grupeve si këto. Andaj, që të mos ketë raste të tilla shantazhi, komisionerja për Informim dhe Privatësi, Krenare Sogojeva, kërkon reagim institucional.

    “Kjo nuk është në dorën tonë sado shqetësuese të jetë, të gjithë e dimë sa e rëndësishme është mbrojtja e të dhënave personale, por po presim hapa nga policia, prokuroria…”, tha Sogojeva.

    Në një përgjigje për ATV-në, duke mos dhënë shumë detaje, nga prokuroria themelore në Prishtinë thuhet se rasti është në shqyrtim e sipër.
    Por deri në një afat të pacaktuar prej kur do të përfundonte frika për keqpërdorimin e fotografive të vajzave, apelohet për kujdes gjatë shfrytëzimit të aplikacioneve.

    “Të mos postojnë shumë fotografi, të mundohen sa më tepër të kenë kujdes kur japin të dhëna sidomos personale gjatë blerjeve, pasi ato mund të shpërndahen…”, tha Sogojeva.

    “E vetmja gjë që mund të bëhet në këtë rast është që të jemi të vëmendshëm me kë komunikojmë, çfarë lloji të fotografive kemi, dhe t’i shmangemi sidomos përdorimit të tepërt të teknologjisë në aspekte kur aplikacionet që përdorim janë të dyshimta”, tha Fetahaj.

    Aktualisht ka grupe duke filluar prej 20 mijë e deri në më shumë se 100 mijë pjesëmarrës, të cilët janë aktiv nga viti 2022.

  • Aktakuzë kundër dy personave për pjesëmarrja në turmë që kryen vepër penale dhe huliganizmi

    Aktakuzë kundër dy personave për pjesëmarrja në turmë që kryen vepër penale dhe huliganizmi

    Prokuroria Speciale (PS), ka ngritur aktakuzë në Gjykatën Themelore në Prishtinë – Departamentin Special, kundër të pandehurve me inicialet R.P dhe D.O. të nacionalitetit serb.

    Prokuroria Speciale njofton ekziston dyshimi i bazuar mirë se të lartcekurit në koordinim me shumë të pandehur të tjerë të nacionalitetit serb nga Kosova dhe Serbia, kanë marrë pjesë aktive në grupin përkatësisht turmën e personave me qëllim të kryerjes së veprave penale serioze, përmes përdorimit të dhunës kanë tentuar që të pengojnë vendosjen e rendit kushtetues të Republikës së Kosovës në komunat veriore të vendit.

    Me këto veprime të pandehurit R.P dhe D.O. akuzohen për veprën penale ‘’Pjesëmarrja në turmë që kryen vepër penale dhe huliganizmi”, nga neni 404 paragrafi 1 lidhur me nenin 31 të Kodit Penal të Republikës së Kosovës.

  • Kryeministrja e Estonisë: Mbështesim plotësisht rrugëtimin e Kosovës drejt BE-së dhe NATO-s

    Kryeministrja e Estonisë: Mbështesim plotësisht rrugëtimin e Kosovës drejt BE-së dhe NATO-s

    Kryeministrja e Estonisë Kaja Kallas, e ka pritur në takim kryetarin e Kuvendit të Kosovës Glauk Konjufca.

    Pas takimit, Kallas tha se vendi i saj i mbështet plotësisht përpjekjet e Kosovës në rrugëtimin drejt BE-së dhe NATO-s.

    “Dialogu dhe integrimi evropian do të ndihmojnë në sigurimin e stabilitetit në Ballkanin Perëndimor”, tha ajo.

    Kreu i Kuvendit po e zhvillon një vizitë zyrtare në Estoni.

    Më herët, Glauk Konjufca, u takua edhe me homologun e tij Lauri Hussar.

  • EULEX-i e zhvendos selinë nga ish-Farmedi në Zonën Industriale

    EULEX-i e zhvendos selinë nga ish-Farmedi në Zonën Industriale

    Misioni i Bashkimit Evropian për Sundimin e Ligjit në Kosovë (EULEX) e ka përfunduar sot zhvendosjen e Selisë së tij në Zonën Industriale në Prishtinë.

    Selia i re e EULEX-it do të vendoset në katin e pestë të ndërtesës së Capital Gate, ngjitur me Kompleksin ekzistues të EULEX-it për operacione dhe mbështetje, ku ndodhen elementet kryesore logjistike dhe operacionale të Misionit.

    Kjo zhvendosje, sipas kumtesës nga EULEX-i, po i forcon sinergjitë ekzistuese duke sjellë kështu përfitime të dukshme operacionale, logjistike dhe financiare.

    “Për më tepër, ajo do të kontribuojë në zvogëlimin e gjurmës mjedisore të EULEX-it, pasi 60 për qind e nevojave totale të energjisë së ndërtesës së Capital Gate plotësohen nga gjenerimi prej paneleve diellore”, thuhet në njoftim.

    Numrat e telefonit dhe adresat e postës elektronike të EULEX-it mbeten të pandryshuara.

    Misioni vazhdon të jetë i përkushtuar për zbatimin e mandatit të tij: t’i mbështesë institucionet e përzgjedhura të sundimit të ligjit në Kosovë në rrugën e tyre drejt rritjes së efektivitetit, qëndrueshmërisë, shumë-etnicitetit dhe llogaridhënies, pa ndërhyrje politike dhe në përputhje me standardet ndërkombëtare të drejtave të njeriut dhe praktikave më të mirat evropiane.

    Ndërtesa ku ka qenë e vendosur deri tani selia e EULEX-it (e njohur si Farmed) do t’i dorëzohet pronarit të vet.

  • Dogana kap mallra të kontrabanduara në veri

    Dogana kap mallra të kontrabanduara në veri

    Njësitë e Antikontrabandës së Doganës së Kosovës, të mbështetura nga Policia e Kosovës, kanë organizuar ndalesa rrugore dhe kontrolle në lokacione të dyshimta në pjesën veriore respektivisht në afërsi të Zubin Potokut.

    Si rezultat i këtyre aktiviteteve të përbashkëta (3 dhe 4 shkurt) të Doganës së Kosovës dhe Policisë së Kosovës, është arritur zbulimi i katër rasteve me mallra të kontrabanduara, si dhe është sekuestruar malli si në vijim:

    • Birra 30 pako x 24 copë,
    • Majonez– 7 pako x 12 cope x 500ml,
    • 24 komplete x 4 bidone x 5 litra – 580 litra alkool të koncentruar (Origjina Serbi).
    • Pije joalkoolike– 150 komplete x 24 cope x 0.33 litra (Origjina Serbi)
    • Pije joalkoolike– 202 komplete x 24 cope x 250 ml
    • Automjet transportues IVECO me targa të huaja/i pazhdoganuar.

    Ky veprim i përbashkët ka për qëllim zbatimin e ligjit dhe luftimin e kontrabandës në këtë pjesë.

    Aktivitetet e përbashkëta vazhdojnë dhe janë një shenjë e përkushtimit të vazhdueshëm të autoriteteve për sigurinë dhe ligjin në vend.

    Dogana e Kosovës dhe Policia e Kosovës vazhdojnë të bashkëpunojnë në përforcimin e sigurisë dhe sundimit të ligjit në territorin e vendit.