Blog

Punonjësit e strukturave paralele/ilegale serbe në Kosovë, kanë pranuar mesazhe e njoftime nga udhëheqësit e tyre dhe janë detyruar të marrin pjesë në protestë, edhe përkundër vullnetit të tyre, bëjnë të ditur burime të KosovaPress-it.

I njëjti burim në kushte anonimiteti theksoi se në rajonin e Gjilanit shumë qytetarë serbë, punonjës të strukturave ilegale, kanë hezituar për të marrë pjesë, por të njëjtit janë kërcënuar me vende të punës.

Burimi tha se detyrimet për të marrë pjesë janë të qëllimshme, pasi që sipas të njëjtit, për “Listën Serbe” është i rëndësishëm viktimizimi para faktorit ndërkombëtar dhe kjo të duket që protesta ka mbështetje të madhe nga qytetarët serbë të Kosovës.

Transporti është organizuar nga të gjitha komunat me shumicë serbe, ndërsa ata që kanë përdorur vetura private, janë kompensuar për derivate.

Edhe pse protesta ishte paralajmëruar nga shoqata e pensionistëve serbë të Kosovës, ajo ishte organizuar nga subjekti politik “Lista Serbe”.

Sulmuesi i Atletico Madridi, Alvaro Morata pësoi një ndrydhje të kockave dhe ligamentin e brendshëm të gjurit të tij të djathtë gjatë humbjes 1-0 nga Sevilla.

Golashënuesi më i mirë në Ligën e Kampionëve këtë sezon me pesë gola nga gjashtë ndeshje, Morata kishte dalë nga fusha në lot në minutën e 46-të të shtunën.

Atletico, që do të presë skuadrën e Las Palmas në ligë të shtunën përpara se të vizitojë skuadrën italiane Inter për ndeshjen e parë të 1/16 të Ligës së Kampionëve javën e ardhshme, nuk zbuloi një afat kohor për rikthimin e Moratas.

“Të hënën në mëngjes ai iu nënshtrua një skanimi për të përcaktuar shkallën e lëndimit. Ai është në pritje të trajtimit të mëtejshëm ,” tha Atletico në një deklaratë.

Kapiteni i Spanjës është gjithashtu golashënuesi më i mirë i Atletico-s në La Liga këtë sezon, pasi ka shënuar 13 herë në 22 ndeshje.

Partia Demokratike e Kosovës do të inicojë themelimin e një komisioni hetimor parlamentar për kontratat njëburimore dhe për tekstet shkollore.

Shefi i Grupit Parlamentar të PDK-së, Abelard Tahiri, tha se është e domosdoshme themelimi i këtyre komisioneve, siç tha për të dëshmuar keqpërdorimet e mëdha në këto çështje.

Në anën tjetër, shefi i Grupit Parlamentar të AAK-së, Besnik Tahiri, vuri në pah nevojën për miratimin e Ligjit për sigurime shëndetësore dhe rritjen e koeficientit në kuadër të Ligjit për paga.

Organizata Demokraci Plus ka përgatitur një video animuese me qëllim te avokimit dhe vetëdijesimit të qytetarëve rreth te drejtës për kompensim në rast te dëmit të shkaktuar nga autoritetet publike në vend.

Por si të kërkoni të drejtën tuaj për kompensim në rast të dëmit të shkaktuar nga autoritetet publike?

Institucionet e drejtësisë, janë të thirrura për të vendosur në parim drejt për rastet që kanë në shqyrtim. Por jo rrallë herë në procese të tilla gjyqësore të natyrave të ndryshme, ka individë që padrejtësisht apo gabimisht, gjykohen, vuajnë dënimin apo e presin një verdikt të tillë të mbyllur në institucionet e sigurisë. E drejta për kompensim është e garantuar me Kushtetutë dhe rregullohet përmes ligjeve.

Rastet e këtyre kompensimeve trajtohen në Departamentin për Çështje Administrative që vepron në Gjykatën Themelore në Prishtinë. Baza ligjore mbi të drejtën e kompensimit të palës në rast të dëmit të shkaktuar nga autoritetet publike, rregullohet me këto ligje, dhe jo vetëm:

1. Ligjit për Marrëdhëniet e Detyrimeve;
2. Kodit të Procedurës Penale; dhe
3. Ligjit për Procedurën e Përgjithshme Administrative.

Ndërkaq, Agjencia për Ndihmë Juridike Falas (ANJF) është një mekanizëm i cili ndihmon qytetarët të kenë qasje në drejtësi (ndihmë juridike falas) në procedurë civile, penale, administrative dhe kundërvajtje, për qytetarët të cilët nuk kanë mjete të mjaftueshme financiare.
Të gjithë personat, që në vendimin final të Gjykatave përkatëse shpallën të pafajshëm dhe deri në atë kohë kanë qëndruar në paraburgim apo kanë vuajtur dënimin me burg, apo personat të cilëve padrejtësisht u është mohuar pajisja me leje, u është mohuar e drejta në pension, nuk u janë dhënë kompensimet që u takojnë sipas ligjit personave paraplegjik dhe tetraplegjik, apo raste të tjera, mund ta kërkojnë këtë të drejtë si dëmshpërblim moral dhe financiar, përmes ligjeve të specifikuara më lartë dhe mekanizmave përkatës të institucioneve të drejtësisë. Me gjithë pengesat administrative dhe faktit që nuk ka të dhëna të sakta, sipas një raporti të KGJK-së, kërkesat aktuale për kompensim për raste penale arrijnë në shumën prej 77 milion Euro. Sipas legjislacionit aktual, palët kompensohen për një ditë qëndrimi në burg me 9 € për dëm material dhe 6 € për dëm jo material.

Ky është njoftimi i plotë:

E drejta për kompensim në rast të dëmit të shkaktuar nga autoritetet publike është e garantuar me Kushtetutë dhe rregullohet përmes ligjeve:
🔹Ligjit për Marrëdhëniet e Detyrimeve;
🔹Kodit të Procedurës Penale; dhe
🔹Ligjit për Procedurën e Përgjithshme Administrative.
Rastet e këtyre kompensimeve trajtohen në Departamentin për Çështje Administrative, në Gjykatën Themelore në Prishtinë.
💡Se si të kërkoni të drejtën tuaj për kompensim, ndiqeni videon në vijim:

Shefi i grupit parlamentar të AAK-së, Besnik Tahiri, ka thënë se në mbledhjen e kryesisë nuk janë trajtuar tema jetike.

“Më 14 shkurt 2021 ka qenë dita kur fitoi Vetëvendosje. Të enjten kur edhe kemi seancë, hyjmë në vitin e katërt të kësaj qeverie. Janë disa tema jetike për AAK-në të cilat do t’i ngrisim përmes 3 iniciativave”, tha Tahiri duke përmendur ato.

Ai tha se kanë mbledhur nënshkrimet për thirrjen e një seance të jashtëzakonshme për Ligjin e Sigurimeve Shëndetësore. Tutje, ai tha se AAK do të merret me pagat në sektorin publik, duke shtuar se paga mesatare duhet të jetë 1000 euro, dhe në fund tha se do të merren edhe me Ligjin për Pagën Minimale.

“Kemi mbledhur nënshkrimet për thirrjen e një seance të jashtëzakonshme për ligjin e Sigurimeve Shëndetësore. Mos e bë Zot me iu sëmurë dikujt prindi apo fëmija, krejt kursimet duhet me i shkri, me hy në borxh për shërimin. Paga në sektorin publik – Me ligjin e Pagave dhe ka të bëjë me iniciativën tonë që e kemi nisur javën e kaluar, për Amandamentimin e Ligjit të Pagave. Mendojmë që në sektorin publik paga mesatare duhet të jetë 1000 euro, një drejtor nuk guxon me pas rrogën nër 1000. Dhe me Ligjin për Pagën Minimale në sektorin privat dhe në momentin kur kjo iniciativë të përfundojë atëherë të veprojmë me Amandementimin e Ligjit për Pagën Minimale”, tha Tahiri.

Kryetari i Komisionit për Siguri, Bekë Berisha e ka pyetur sot ministrin e Mbrojtjes, Ejup Maqedoncin për takimin që disa media patën raportuar të ketë ndodhur mes tij, shefit të AKI-së, Petrit Ajetit dhe sekretares së Lëvizjes Vetëvendosje, Dejona Mihalit. Derisa për Ajetin ishte mohuar të ketë qenë pjesë e takimit, Maqedonci pati deklaruar se me Milhalin ishte takuar rastësisht duke ecur në malin e Gërmisë.

Lidhur me këtë Maqedonci tha se “nuk është e ndaluar të takohemi me njerëz që funksionojnë në vend.”

“Nuk konsideroj që është e ndaluar të takohemi me njerëz që funksionojnë në këtë vend”, ka thënë Maqedonci derisa ka mohuar që Ajeti të ketë qenë pjesë e takimit.

Ndërsa deputeti i AAK-së, Bekë Berisha i është kundërpërgjigjur.

“Kam menduar që të ka mbetur një grimë UÇK”, tha ai në mbledhjen e komisionit.

Kryetari i Odës Ekonomike të Kosovës, Lulzim Rafuna ka pritur në takim zëvendësministrin për Evropë dhe Punëve të Jashtme të Shqipërisë Besart Kadia. Në këtë takim u tha se Kosova partner i fuqishëm ekonomik për Shqipërinë. Rafuna ka thënë se qëllimi i këtij takimi ishte adresimi i sfidave që paraqiten te bizneset, si dhe për ta bërë tregun e të dyja vendeve atraktiv për vizitorë.

Rafuna tha se OEK është e gatshme për të kontribuar për thellimin e bashkëpunimit.

“Do të bisedojmë se cilat janë kërkesat dhe idetë, për një zhvillim ekonomik mes dy qeverive. Ne si Odë Ekonomike jemi të gatshëm të labojrojmë për themelimin e bashkëpunimit”, tha Rafuna.

Ndërsa, zëvendësministri Kadia u shpreh se synimi i këtij takimi është tregu atraktiv për të dyja shtetet.

“Është një potencial i cili është i pafundmë sa i përket benefiteve dy palësh si u tha në takimet, ky është takimi i dytë i çështjeve diplomatike. Mbi 1287 biznese kosovare që është tregues i potencialit, ndërsa nga Shqipëria 2022 biznese janë të regjistruara në Kosovë. Prandaj synimi është tregu atraktiv për të dy shtetet”, u shpreh ai.

Ndërsa, ambasadori i Shqipërisë në Kosovë, Petrit Malaj shtoi se Kosova do të jetë një partner i fuqishëm për Shqipërinë.

“Kosova do të jetë një partner i fuqishëm për Shqipërinë. Ne e dimë se kemi çfarë të bëjmë, janë bërë gjëra të mira, por këto diskutime janë për t’i bërë akoma më mira,” shtoi Malaj.

Takimi po mbahet i mbyllur për media./KP