Blog

Sot bëhen 34 vjet nga ngjarja e madhe për faljen e gjaqeve në Verrat e Llukës në Komunën e Deçanit.

Në këtë tubim madhështor më 1 maj 1990 morën pjesë rreth gjysmë milion shqiptarë, me ç‘rast u falën më shumë se 100 gjaqe dhe ngatërresa ndër-shqiptare.

Aksioni për pajtimin e familjeve shqiptare në hasmëri kishte nisur nga disa studentë të rajonit të Dukagjinit, ish-të burgosur politikë, më 2 shkurt 1990 në Lumbardhë të Deçanit.

Ky aksion u shndërrua në një lëvizje për pajtimin e gjaqeve dhe falë punës së madhe të veprimtarëve në krye me Anton Çetën kjo lëvizje gjithëpopullore arriti të pajtojë mbi një mijë gjaqe e ngatërresa ndër-shqiptare.

Për të përkujtuar këtë ngjarje madhështore në Komuna e Deçanit ka organizuar një ceremoni e cila do të mbahet në ora 12:00 në të njëjtin vend.

Sindikata e Bashkuar e Arsimit, Shkencës dhe Kulturës e Kosovës (SBAShK), do të protesojë sot.

Kjo sindikatë ka njoftuar se tubimi i protestuesve do të bëhet nga ora 10 e 30 deri në 11 në oborrin e Biblotekës Kombëtare.

“Në orën 11 fillon marshimi drejt MASHTI-t. Protestuesit këtu ndalën 5 minuta e pastaj vazhdojnë në koristë në anën e djathtë drejt Konvikteve. Nga aty vazhdojnë marshimin drejt Katedrales e nga aty drejt Hotel “Grand dhe Sheshit Zahir Pajaziti për të vazhduar nëpër shesh deri te ndërtesa e Qeverisë. Me të arritur (rreth orës 12) aty kryetari i SBASHK-ut Rrahman Jasharaj përmes mikrofonit shpalos kërkesat e anëtarësisë drejtuar Qeverisë”.

“Pastaj flet kryetari i BSPK-së Atdhe Hykolli. Pas tij kryetari nga sektori privat Isuf Azemi i drejtohet Qeverisë me kërkesat e veçanta në emër të anëtarësisë që përfaqëson. Në orën 12 e 30 shpallet e mbyllur protesta dhe protestuesit shpërndahen në mënyrë të qetë”, thuhet në njoftim.

1 Maji njihet si Dita Ndërkombëtare e Punëtorëve dhe ky manifestim lindi nga lufta e punëtorëve për të kërkuar dhe siguruar të drejtat, liritë dhe kushtet e punës e të jetesës.

Kjo ditë u referohet protestave të punëtorëve, ku kërkesa e parë publike është paraqitur në Australi gjatë vitit 1885 me këtë përmbajtje: ”8 orë punë, 8 orë dëfrim e 8 orë gjumë”.

Kremtimi i 1 Majit lidhet ngushtë me protestat e përgjithshme e të përgjakshme të dhjetëra mijëra punëtorëve të fabrikave të Çikagos në Amerikë, më 1 maj 1886.

Manifestimi masiv dhe madhështor u bë një vit më vonë, në të njëjtin qytet më 1 maj 1887.

Kështu filloi rrugëtimi i kësaj dite, i përqafuar nga miliona punëtorë, i organizuar përmes lëvizjes sindikaliste dhe partive, që në fokus e kanë pozitën socio-ekonomike të punëtorëve.

Sindikata botërore e caktoi 1 Majin ditë në të cilën të gjithë punëtorët ushtrojnë presion për sigurimin dhe avancimin e të drejtave të tyre.

Në Evropë, 1 Maji filloi manifestimin me Internacionalen e Parë të Gjenevës.

Nga viti 1890 në Paris, Kongresi themelues i Internacionales së Dytë, vendosi që pikërisht 1 Maji të mbetet Dita Ndërkombëtare e Punëtorëve.

Nga viti 1891, Kongresi i tretë i Internacionales në Bruksel, mori vendim, që dita e 1 Majit do të kremtohet përgjithmonë dhe në të gjitha vendet, si Festa e Punëtorëve, në të cilën punëtorët do t’i identifikojnë, avancojnë dhe mbrojnë me kushtetutë e ligje liritë, të drejtat, kushtet e punës, rrogën mesatare të garantuar, pushimin ditor, javor, vjetor dhe pushimet tjera sipas nevojës.

Instituti Hidrometeorologjik i Kosovës ka bërë të ditur se sot të mbajë mot i vranët dhe me intervale me diell.

Sipas njoftimit të këtij instituti, temperaturat do të shkojnë deri në 21 gradë Celsius.

“Mot i vranët dhe me intervale me diell. Vranësirat gjatë ditës vende -vende parashihen të sjellin riga shiu”.

“Temperaturat minimale do të lëvizin ndërmjet 4-8 gradë Celsius, ndërsa maksimalet e ditës parashihen të lëvizin ndërmjet 19-21 gradë Celsius. Do të fryjë erë e lehtë deri mesatare nga jugperendimi”, thuhet tutje në njoftimin e IHMK-së.

Përgatiti: Kastriot Tahiri

Kamionët që shërbejnë për mbledhjen mbeturinave në Ferizaj, ka nëntë ditë që nuk janë ndezur fare.

Punëtorët e Kompanisë Rajonale “Pastërtia” po vijnë në punë, mirëpo po qëndrojnë brenda këtij objekti, në shenjë greve për kushtet e punës.

“Si kemi marr kurrë pagën me rritje, qe katër muaj. Punëtorët po e dojnë dorëheqjen e kryeshefit, se këto janë rrena. Deri të realizohen kërkesat nuk dalim nga greva”, tha Bashkim Danqi, punëtor.

Kryeshefi ekzekutiv, Basri Syla, thotë se të martën një pjesë e punëtorëve e kanë ndërprerë grevën vullnetarisht, kurse për të tjerët pritet të ndërmerren masa.

“Kane reflektuar…. Kemi me marrë vendime në përputhje me ligjin, për personat që nuk i kryejnë punët e veta. Nuk munden me marrë paga ata që s’punojnë”, tha Syla.

Ky thotë se ankesat e grevistëve janë të pabaza, meqë pagat janë rritur për 70 euro.

“Pagat janë rritë dy javë para grevës të paligjshme. Kjo grevë është tendencioze, për mua nuk është greva e ligjshme, sepse nuk kemi të drejtë me bë greva. Me vendim të bordit është bërë rritja për punëtorët fizikë dhe shoferë”, tha Syla.

Krejt kjo situatë e krijuar, më së shumti po i shqetëson ferizajasit. Disa prej të cilëve edhe erdhën në objektin e ndërmarrjes për t’u ankuar.

Por mbeturinat nuk do të jenë më problem, pasi Komuna e Ferizajt ka kontraktuar një kompani që nga e marta do t’i kryejë këto shërbime krah ndërmarrjes.

Një grevë prej 10 ditësh punëtorët e kompanisë për menaxhimin e mbeturinave “Pastërtia”, e kishin përfunduar në ditët e para të këtij viti.

Ndërkaq, punëtorët e kësaj ndërmarrjeje do të protestojnë, të mërkurën para komunës së Ferizajt.

Përgatiti: Arian Hajdaraj

Para se t’u dorëzoheshin familjarëve, trupave të tre sulmuesve të vrarë në Banjskë më 27 shtator 2023, iu ishin marrë mostrat për autopsi.

Megjithatë, 7 muaj nga ngjarja, raporti që detajon mënyrën e vdekjes së tyre nuk është ende i plotë, në mungesë të analizave toksikologjike.

Siç kupton ATV-ja, laboratori i toksikologjisë në Institutin e Mjekësisë Ligjore, është jashtë funksionit, tash e një kohë, andaj pezull në mungesë të kësaj analize kanë mbetur edhe raporte të tjera.

Për të paktën një javë nga nisja e pyetjeve nga ATV-ja, Ministria e Drejtësisë e as Instituti i Mjekësisë Ligjore, nuk kanë kthyer përgjigje, andaj është e paqartë se kur mund të kthehet në funksion.

Ndërkohë, sipas njohësve të çështjeve juridike, vonesa në përfundimin e raporteve të autopsisë, ka efekte negative në punën e organeve të drejtësisë.

“Mungesa e raportit të plotë të autopsisë ndikon negativisht në punën e institucioneve të drejtësisë. Ndër të tjera, vonon përfundimin e hetimeve nga Prokurori…”, tha avokati Arbër Jashari.

Derisa laboratori vazhdon të jetë jashtë funksionit, burime brenda Institutit të Mjekësisë Ligjore bëjnë të ditur se mostrat e sulmuesve të vrarë në Banjskë, janë përgatitur të dërgohen në laboratorë të ndonjë shteti tjetër.

Përgatiti: Driton Sadiku

Punë të rrezikshme e pa asnjë masë mbrojtëse.

Punëtorë si këta të ndërtimtarisë, shpeshherë rrezikojnë jetën meqë kompanitë për të cilat punojnë në masë të madhe nuk ua plotësojnë kushtet për punë.

Hiç të rralla nuk janë as rastet e lëndimeve, megjithëse jo të gjitha deklarohen.
Mesatarisht 1500 të tilla paraqiten brenda vitit në Sindikatën e Pavarur të Sektorit Privat, ndonëse nga kjo thonë se punëtorët ende i fshehin lëndimet, nga frika se mbesin pa punë.

Sipas Azemit, shteti ia ka kthyer shpinën këtij sektori, meqë edhe inspektorati shpeshherë i mbyll sytë karshi ankesave të punëtorëve. Kësisoj të drejtat e tyre thotë se shkelen çdo ditë pa frikë e ndëshkim nga institucionet relevante.

Mesatarisht, 20 punëtorë në vit vdesin në vend të punës, derisa konsiderohet se rreth 200 mijë qytetarë janë të punësuar në sektorin privat.