Blog

Përgatiti: Nora Luta

Më pak se ishte planifikuar ka zgjatur dëshmia e dëshmitarit të 61-të të Zyrës së Prokurorit të Specializuar, në gjykimin ndaj Thaçit dhe të tjerëve.

Por, edhe seanca që është zhvilluar në Hagë, të hënën paradite ka qenë kryesisht e mbyllur për publikun, pasi dëshmitari dëshmoi me masa mbrojtëse.

Sipas përshkrimit të ZPS-së, dëshmitari pretendon se ishte ndalur gjatë periudhës së luftës nga ushtarë të UÇK-së.

“Dëshmitari 01978 është arrestuar dhe është ndaluar nga ushtarë të UÇK-së në ambiente ndalimi të UÇK-së, disa javë. Dëshmitari 01978 do të japë dëshmi rreth kushteve ndalimit, punën që kanë bërë të ndaluarit, si dhe procesin e marrjes në pyetje dhe rrahjes që ka pësuar ai. Dëshmitari do të identifikojë disa ushtarë të UÇK-së dhe disa të ndaluar të tjerë, të mbajtur bashkë me atë”, tha Vega Lodice, prokurore e ZPS-së.

Ndërkohë, qysh në fillim të seancës, kryetari i trupit gjykues, Charles Smith, teksa tregoi për vendimet rreth disa materialeve të dëshmitarëve që tashmë kanë dëshmuar, numëroi deri tash 105 dëshmitarë të ZPS-së.

Smith u ka bërë thirrje palëve për përpjekje të vazhdueshme për punë të mirë, në mënyrë që, sipas tij, procesi të jetë i drejtë dhe efikas.

“Ka ende shumë punë për të bërë. Le të vazhdojmë të përpiqemi që ky gjykim të vazhdojë të jetë sa më i drejtë, sa më i shpejtë, sa më efikas. Deri tani janë dëgjuar 60 dëshmitarë, duke përfshirë edhe ata sipas rregullës 154, 13 dëshmitarë sipas rregullës 153 dhe janë pranuar deklaratat e 33 dëshmitarëve, që ose kanë vdekur ose nuk janë të disponueshëm për të dhënë dëshmi, gjë që parashihet me rregullën 155”, tha Smith.

Prokuroria e ka reduktuar numrin e dëshmitarëve nga 320 dhe brenda këtij muaji, sipas gjykatës, pritet të japin një parashtrim për numrin e dëshmitarëve që planifikojnë t’i thërrasin.

Gjykimi për krime lufte ndaj Thaçit dhe të tjerëve do të vazhdojë edhe të martën.

Përgatiti: Driton Sadiku

Kodi civil përveç që nuk po arrin t’i bëjë në një mendje deputetët e kësaj legjislature, po përcillet edhe me polemika të shumta.

Andaj diskursi dhe gjuha e përdorur për këtë kod, po kritikohet ashpër nga avokati i popullit.

“E para, diskursi i komunikimit dhe i deklaratave publike që shpeshherë përmban gjuhë të urrejtjes, të papranueshme dhe gjuhë që krijon polarizim të skajshëm deri te situata që mund të eskalojë edhe në situata të tilla, që të pësojnë qytetarët që vijnë ose i përkasin LGBTI”, tha avokat i Popullit, Naim Qelaj.

Qelaj ka kritika edhe rreth formulimit aktual në Kodin Civil, për martesat e personave të gjinisë së njëjtë.

“Kodi Civil dhe formulimi aktual i zgjidhjes së problemit të martesave ose zgjidhjes juridike të procedurave të martesave të personave me seks dhe gjini të njëjtë, nuk është i formuluar në përputhje me Kushtetutën. Për arsye se ky ligj, ky Kod Civil e rregullon njësoj si Kushtetuta. Kushtetuta thotë duhet të rregullohet me ligj. Kodi Civil thotë duhet të rregullohet me ligj. Pra, e len të pazgjidhur dhe jo në përputhje me qëndrimet dhe kërkesat që i ka Kushtetuta”, tha ai.

Projekt-kodi civil ka dështuar të miratohet në Kuvend më 2022 dhe që atëherë, nuk ka pajtueshmëri mes deputetëve për rikthimin e tij për votim.

Një pjesë e deputetëve, përfshirë edhe ata të partisë në pushtet, janë kundër këtij projektligji, specifikisht nenit 1138, i cili lejon regjistrimin e bashkësive të personave të gjinisë së njëjtë.

Përgatiti: Kastriot Tahiri

Liria që e gëzojnë sot, thonë se është meritë e dëshmorëve.

Gjithë këta njerëz u mblodhën të hënën në Shtëpinë e Kulturës në Viti, për ta përkujtuar Njazi Rexhepin, që ra dëshmor në betejën e Koshares, më 6 maj 1999.
Kontributi i tij në Brigadën 138, u vlerësua i pashoq.

“Para dëshmorëve të gjithë jemi të vegjël, vetëm liria është e madhe. Themelet e lirisë janë të forta e ato i bën të forta gjaku i dëshmorëve. Njazi Rexhepi vjen nga një familje atdhetare që janë shquar për mikpritje, në anën e Ana Moravës. Qysh si nxënës ai kishte mësuar për vuajtjet e shqiptarëve i kishte ndje ato nën lëkurë. I edukuar në frymën ai mori pjesë në demonstrata që organizoheshin në Ferizaj, Prishtinë e mbarë Kosovën. Dëshmori e kishte kuptuar herët se liria nuk jepet vullnetarisht por duhet kërkuar nga pushtuesi”, tha Lulzim Tafa, poet.

Një ish-epror i Rexhepit e kujton atë si ushtar të dalluar.

“Për neve që ishim pjesë, emocionet dallojnë sepse i kemi kujtimet e freskëta, operacioni në Koshare është shumë kompleks edhe në planifikimin ekzekutimin e formacionit, drejtuesit e të cilit ishin ushtarak me përvojë”, tha Fadil Hadergjonaj, komandant i Brigadës 138 “Agim Ramadani”.

Vëllai i dëshmorit thotë se e humbi një familjar në luftë, por Nijaziu u bë i gjithë Kosovës, me rënien e tij.

“Dëshmorët vdesin vetëm një herë e për së dyti mund të vdesin nëse i harrojmë e nuk i përkujtojmë”, tha Fahrush Rexhepi, vëllai i dëshmorit Njazi Rexhepi.
Luftëtar e trim, Njaziu u përshkrua edhe nga ish-presidenti Fatmir Sejdiu.

“Shqiptarët kanë qëndruar falë nënave që kanë kënduar për trimat për djemtë e rinj e vajzat, që në momente të historisë kanë mbetur shembuj e fanarë orientimi. E kjo e sotmja është një kallëzim për një hero që ka qenë në mes heronjve, një njëri që nuk ka ndalë aspak nga djersa e gjaku i tij për ditën e sotme, bëhuni të fortë e krenarë për ju që e keni pasë një njeri të përkushtuar kaq shumë”, tha Sejdiu.

Luftimet në Betejën e Koshares u zhvilluan për 77 ditë me radhë, nga 9 prilli deri më 19 qershor 1999, në zonën kufitare të Kosovës me Shqipërinë.
Gjatë luftimeve u vranë 114 dhe u plagosën 423 luftëtarë të Ushtrisë Çlirimtare të Kosovës.

Beteja e Koshares, nisi në kuadër të operacionit “Shigjeta”, duke i hapur rrugë furnizimit me armatim dhe mbështetje logjistike për shumë zona të luftës në brendësi të Kosovës.