Blog

Rinumërimi i votave ka sjellë lëvizje brenda Partisë Demokratike të Kosovës (PDK), duke ndikuar në numrin e votave për disa kandidatë për deputetë.

Pas përfundimit të procesit të rinumërimit, disa deputetë kanë shënuar rritje të votave, ndërsa të tjerë kanë pësuar rënie.

Kryetarit të këtij subjekti, Bedri Hamza nga rinumërimi i deritashëm i janë shtuar 47 vota.

Po ashtu vota iu janë shtuar edhe kandidatëve si Përparim Gruda( +422 Vota), Arian Tahiri(+592 Vota) si dhe Sala Jashari( +264 Vota)

Ndërsa kandidatët që kanë humbur më së shumti vota pas rinumrimit janë Fetah Paçarizi ( -6,027 Vota), Fadil Demaku( -1,092 Vota), Arianit Çollaku(-1,687 Vota), Kujtim Gashi(-2,358 Vota), Nait Hasani(-3,410 Vota) dhe Enver Hoxhaj (-1,042 Vota).

I akuzuari Boban Toniq është deklaruar i pafajshëm lidhur me akuzën për krime lufte në cilësinë e gardianit në burgun e Prishtinës dhe Lipjanit gjatë periudhës së luftës.

Fillimisht, u lexua aktakuza nga prokurori special, Atdhe Dema, raporton “Betimi për Drejtësi”.

Më pas, gjykatësi i rastit Rrahaman Beqiri njoftoi të akuzuarin me të drejtat që ka, e më pas Toniq u deklarua i pafajshëm.

Gjykatësi Beqiri njoftoi të akuzuarin dhe mbrjtësin e tij, avokatin Predrag Milokoviq se në afat prej 20 ditësh kanë të drejtë për kundërshtim të provave dhe kërkesë për hudhje të aktakuzës.

Sipas aktakuzës së Prokurorisë Speciale të Republikës së Kosovës të ngritur më 31 dhjetor 2025, Boban Toniq i njohur me njofkën “Bellko”, akuzohet se në cilësinë e gardianit në burgun e Prishtinës dhe paraleles në Lipjan, gjatë kohës së luftës në Kosovë, në bashkëkryerje me zyrtarë të tjerë të burgjeve në fjalë Jovan Jovanoviq, Avdia Sutkoviq dhe Zoran Gjokiq- ish-gardianë të burgut të Prishtinës dhe paraleles në Lipjan, duke vepruar me dashje dhe duke shkelur rregullat e të drejtës ndërkombëtare gjatë luftës, në mënyrë sistematike i kishin maltretuar të burgosurit shqiptarë.

Aktakuza thotë se të burgosurit ishin torturuar në mënyrë çnjerëzore me mjete të ndryshme si shkop gome, shufra metalike, shqelma e grushte deri në alivanosje.

Viktimat kanë deklaruar se pas këtyre rrahjeve kishin pasur dhimbje të mëdha trupore, dhunë psikike, kanë mbetur pa ngrënë me ditë të tëra, duke iu shkaktuar ankth dhe frikë e duke iu cenuar rëndë dinjiteti.

Në pikën e dytë të aktakuzës thuhet se më 24 maj 1999 e deri më 10 qershor 1999, Toniq akuzohet se në bashkëkryeje me zyrtarë të tjerë të burgut, me dashje dhe duke shkel rregullat e të drejtës ndërkombëtare, në bashkëkryerje me ish-gardianët Jovanoviq, Sutkoviq dhe Gjokiq, pasi i kanë transferuar të burgosurit nga burgu Dubravës në të Prishtinës dhe paraleles në Lipjan, kishin formuar fillimisht kordon dhe më pas kishin filluar t’i godisnin të burgosurit me mjete të ndryshme si shkop gome, shufra metalike, shqelma e grushte, e pas kësaj në mënyrë sistematike i kishin keqtrajtuar të burgosurit shqiptarë, duke i torturuar në mënyrë çnjerëzore, duke iu shkaktuar lëndime trupore, duke i lënë pa ngrënë me ditë të tëra, duke i ofenduar e sharë, dhe i kanë kanosur se do t’i vrasin të gjithë, duke ua cenuar rëndë dinjitetin njerëzor dhe se pasojat i bartin ende viktimat.

Për këto veprime, Toniq ngarkohet me veprën penale “Krime lufte kundër popullatës civile” nga neni 142 lidhur me nenin 22 të Ligjit Penal të ish-Republikës Socialiste Federative të Jugosllavisë. /BetimipërDrejtësi

KQZ ka vendosur për rinumërim të votave në gjithë Kosovën.Kjo pasi në disa komuna pati ndryshime në vota pas rinumërimit.

Por, sa mund të dënohen ata që manipulojnë apo falsifikojnë votat?Hulumtuesi i lartë në KDI, Vullnet Bugaqku, në një intervistë për Gazeta Blic, ka thënë se Kodi Penal e përcakton se dënimi është 3-5 vjet, nëse vërtetohet se janë manipuluar apo falsifikuar votat.

“Kodi Penal i Republikës së Kosovës e sanksionon falsifikimin e rezultateve të votimit dhe jep përgjegjësi shtesë ndaj anëtarëve të KQZ-së që kanë përgjegjësi zyrtare që të administrojnë drejt rezultatet e votimit, qoftë për subjekte politike apo për kandidatët për deputetë. Kodi Penal, neni 216 ka një dispozitë që mjaft mirë e përcakton sanksionin penal ndaj gjithë atyre zyrtarëve, të komisionerëve të cilët manipulojnë, falsifikojnë, ndryshojnë apo edhe tjetërsojnë vullnetin e qytetarëve votues, duke shtuar apo hequr, duke manipuluar rezultatin e votimit dhe Kodi Penal përcakton që të gjithë këta zyrtarë, nëse provohet që e kanë kryer veprën penale të falsifikimit të rezultateve të votimit, mund të dënohen me burgim nga 3-5 vjet, prandaj edhe unë mendoj që këto sanksione janë të përshtatshme në raport me veprën që kryhet, prandaj edhe duhet pritur që KQZ dhe Prokuroria e Shtetit do t’i mbledhë të gjitha provat dhe do t’i iniciojë procedurat penale të të gjitha atyre rezultateve”, ka deklaruar Bugaqku.

Është gjetur i vdekur Avdyl Begaj, 39-vjeçari nga fshati Banjë e Malishevës i cili ishte shpallur i zhdukur që nga 18 janari i këtij viti.

Kështu u bë e ditur nga Ridvan Tahiri, vullnetar në Shoqatën e Kërkim-Shpëtimit.

Sipas Tahirit, 39-vjeçari u gjet pa shenja jete në një fushë afër fshatit Siqevë mëngjesin e sotëm.

Komuna e Malishevës kërkon ndihmë për gjetjen e një 39-vjeçari

Ka filluar java e vetëdijesimit për Kancerin e Qafës së Mitrës. Ministria e Shëndetësisë ka njoftuar se në Kosovë, sipas Institutit Kombëtar të Shëndetësisë Publike, gjatë vitit 2024 janë regjistruar 140 raste, që përbëjnë rreth 3 për qind të të gjitha rasteve të kancerit.

“Java e Vetëdijesimit për Kancerin e Qafës së Mitrës shënon një angazhim të vazhdueshëm institucional për rritjen e informimit dhe ndërgjegjësimit të qytetarëve mbi këtë sëmundje, me theks të veçantë në parandalimin, zbulimin e hershëm, diagnostikimin dhe trajtimin në kohë. Kanceri i qafës së mitrës është një tumor malinj që zhvillohet në cerviks dhe përbën një nga format më të shpeshta të kancerit tek gratë në nivel global. Shkaktari kryesor i kësaj sëmundjeje është infeksioni me Human Papillomavirus (HPV), ndërsa faktorët e rrezikut lidhen kryesisht me infeksione të patrajtuara, seksualisht të transmetueshme dhe infeksione të vazhdueshme me tipe të caktuara të HPV-së. Sipas të dhënave globale, gjatë vitit 2022 janë regjistruar rreth 660 mijë raste të reja dhe rreth 350 mijë vdekje nga kanceri i qafës së mitrës. Në Kosovë, sipas Institutit Kombëtar të Shëndetësisë Publike, gjatë vitit 2024 janë regjistruar 140 raste, që përbëjnë rreth 3 për qind të të gjitha rasteve të kancerit”, thuhet në njoftimin e MSH-së.

Tutje thuhet se “Në kuadër të politikave parandaluese dhe investimeve strategjike në shëndetin publik, Ministria e Shëndetësisë ka pesëfishuar buxhetin për vaksina, duke mundësuar zgjerimin e kalendarit të rregullt të vaksinimit me tri vaksina të reja, ndër to edhe vaksinën kundër HPV-së. Ky investim ka mundësuar krijimin e një programi të qëndrueshëm dhe gjithëpërfshirës të imunizimit. Programi i vaksinimit kundër HPV-së po zbatohet për vajzat dhe djemtë 12-vjeçarë. Gjatë vitit 2024 janë vaksinuar 9,990 vajza, që përfaqësojnë rreth 85 për qind të grupit të synuar. Nga viti 2025, programi është zgjeruar edhe për djemtë, dhe deri më tani janë vaksinuar gjithsej 19,513 fëmijë, përkatësisht 9,651 vajza dhe 9,862 djem, duke arritur një mbulim prej rreth 85 për qind të target grupit. Në funksion të forcimit të parandalimit dhe zbulimit të hershëm, Ministria e Shëndetësisë ka hartuar edhe Planin e Veprimit për Skriningun e Kancerit të Qafës së Mitrës 2026–2028, në përputhje me objektivat globale të Organizatës Botërore të Shëndetësisë për parandalimin e kësaj sëmundjeje si problem i shëndetit publik. Skriningu i rregullt me PAP test mbetet një ndër mjetet më efektive për zbulimin e hershëm të ndryshimeve para-kanceroze dhe për uljen e ndjeshme të vdekshmërisë. Ministria e Shëndetësisë u bën thirrje të gjitha grave që të shfrytëzojnë shërbimet parandaluese dhe të kujdesen në mënyrë aktive për shëndetin e tyre”.

Presidenti i Shteteve të Bashkuara të Amerikës, Donald Trump, ka publikuar një mesazh të cilin atij ia ka dërguar presidenti i Francës, Emmanuel Macron, lidhur me çështjen e Greenlandës.

Macron, i është drejtuar Trump’it duke i thënë se ai ‘’s’po e kupton’’ se çfarë po bën Trumpi me Greenlandën.

Presidenti francez, i ka sugjeruar Trump’it, që të darkojnë në Paris, dhe se ai mund të organizojë takim me G7 ku do të ftoheshin edhe sirianët, danezët, rusët e ukrainasit.

‘’ Nga presidenti Macron te Presidenti Trump

Miku im,

Ne jemi plotësisht në një linjë për Sirinë.

Mund të bëjmë gjëra të mëdha për Iranin.

Nuk e kuptoj se çfarë po bën për Groenlandën.

Le të përpiqemi të ndërtojmë gjëra të mëdha:

Mund të organizoj një takim të G7 pas Davosit në Paris, të enjten pasdite. Mund të ftoj ukrainasit, danezët, sirianët dhe rusët në kuadër të takimit.

Le të kemi një darkë së bashku në Paris, të enjten, përpara se të kthehesh në SHBA.

Emmanuel’’, ka shkruar Macron në mesazhin e tij drejtuar Trump’it.

Aleanca Kosovare e Bizneseve vlerëson se përmirësimi i mirëqenies së punëtorëve dhe rritja e pagës minimale është një qëllim i drejtë dhe i nevojshëm në funksion të zhvillimit social dhe ekonomik të vendit.

Megjithatë, AKB shpreh shqetësimin e saj lidhur me mënyrën se si është marrë vendimi për rritjen e pagës minimale, pa konsultime paraprake me sektorin privat, pa një analizë të plotë të ndikimit financiar dhe pa vlerësim të rrezikut që ky vendim paraqet për mikro-ndërmarrjet dhe ndërmarrjet e vogla, të cilat përbëjnë shumicën e ekonomisë së Kosovës.

Sipas tyre, mungesa e një analize gjithëpërfshirëse rrit rrezikun që një pjesë e bizneseve, të paafta për të përballuar kostot shtesë, të shtyhen drejt informalitetit, duke cenuar qëllimin e deklaruar të këtij vendimi.

AKB thekson se nuk është kundër rritjes së pagës minimale, por kërkon që vendime të tilla të rëndësishme të merren përmes dialogut social, në bashkëpunim me përfaqësuesit e biznesit dhe sindikatat, dhe të shoqërohen me masa lehtësuese fiskale apo mbështetëse, veçanërisht për bizneset e vogla.

Në të njëjtën kohë, AKB shpreh indinjatën e saj për faktin se edhe në këtë rast veteranët e Ushtrisë Çlirimtare të Kosovës nuk janë përfshirë apo trajtuar me politika të veçanta mbështetëse, pavarësisht rolit dhe sakrificës së tyre për lirinë e vendit.

“Çdo reformë sociale dhe ekonomike duhet të reflektojë drejtësi dhe ndjeshmëri ndaj kësaj kategorie”.

AKB fton Ministrinë e Financave, Punës dhe Transfereve që të rihapë dialogun me sektorin privat dhe të ndërmarrë hapa konkretë për të siguruar që rritja e pagës minimale të jetë e qëndrueshme, e zbatueshme dhe pa pasoja negative për ekonominë formale.

NATO ka kufizuar aksesin e Shteteve të Bashkuara në informacionet e inteligjencës që lidhen me Grenlandën, nga frika se këto të dhëna mund të përfundojnë në duart e presidentit Donald Trump. Sipas shqetësimeve brenda Aleancës, ekziston rreziku që informacionet të përdoren në të ardhmen për një përpjekje të mundshme për pushtimin ushtarak të këtij territori gjysmë-autonom danez.

Lajmi është raportuar nga e përditshmja britanike The i Paper, pjesë e grupit mediatik Daily Mail and General Trust, duke cituar burime të informuara. Sipas këtyre burimeve, përfaqësuesit e NATO-s nuk “komunikojnë më hapur” me homologët amerikanë për çështje që lidhen me Groenlandën.

Groenlanda ka një rëndësi të veçantë strategjike për shkak të pozicionit të saj gjeografik në Arktik, pasurive natyrore dhe rolit kyç në sistemet e mbrojtjes dhe vëzhgimit ushtarak. Donald Trump ka shprehur publikisht interes për blerjen e Groenlandës nga Danimarka, një ide që u refuzua kategorikisht nga Kopenhaga dhe autoritetet lokale, duke shkaktuar tensione diplomatike mes palëve.

Një burim i inteligjencës britanike, i cituar nga The i Paper, ka deklaruar gjithashtu se Mbretëria e Bashkuar synon të “dyfishojë përpjekjet” dhe të forcojë partneritetin me vendet e Bashkimit Evropian në fushën e mbrojtjes.

Kjo vjen në një kohë kur marrëdhëniet mes Londrës dhe Washingtonit ndodhen në nivelin më të ulët që nga vitet 1950, pas kërcënimeve të bëra nga Trump ndaj Danimarkës.

Në nderim të jetës dhe veprës së dëshmorëve të kombit Sami Gashi dhe Afrim Hajrizi, Kryetari i Komunës, Faton Peci, së bashku me nënkryetarin, Enis Osmani, bashkëpunëtorë dhe familjarë, kanë bërë homazhe pranë lapidarit të tyre në Vaganicë të Mitrovicës, me rastin e 27-vjetorit të rënies heroike.

Gjatë homazheve, kryetari Faton Peci theksoi se Sami Gashi dhe Afrim Hajrizi, si luftëtarë të shquar dhe të frymëzuar nga atdhedashuria, u përballën me luftime të ashpra në këtë zonë, duke u flijuar për lirinë e Kosovës.

“Lirinë na e sollën dhe, bashkë me të, edhe amanetin që na thërret për punë të mira për këtë shtet”, është shprehur kryetari Faton Peci.

Homazhet u zhvilluan në shenjë respekti, mirënjohjeje dhe përuljeje ndaj dëshmorëve të lirisë, vepra e të cilëve do të mbetet e paharruar.

Një incident zjarri ka ndodhur sot rreth orës 02:00 të mëngjesit në Shkollën Fillore dhe të Mesme të Ulët “Sylejman Vokshi” në Deçan, ku është dashur ndërhyrja e njësive të zjarrfikësve për shuarjen e tij.

Lajmin e ka konfirmuar drejtori i Drejtorisë Komunale të Arsimit në Deçan, Besnik Hulaj, i cili ka bërë të ditur se zjarri kishte përfshirë drutë për ngrohje të shkollës, ndërsa shkaku i tij ende nuk dihet.

“Sot, rreth orës 02:00 të mëngjesit, Drejtoria Komunale e Arsimit është njoftuar nga drejtori i Shkollës Fillore ‘Sylejman Vokshi’ për një incident zjarri, ku ka qenë e nevojshme ndërhyrja e njësive të zjarrfikësve për shuarjen e tij. Zjarri kishte përfshirë drutë për ngrohje të shkollës, ndërsa shkaku i zjarrit ende nuk është i njohur,” ka deklaruar Hulaj.

Sipas tij, për rastin janë njoftuar edhe organet e rendit, të cilat po merren me hetimin.

“Menjëherë janë lajmëruar edhe Policia e Kosovës, e cila është duke u marrë me rastin në përputhje me procedurat ligjore,” ka shtuar ai.

Hulaj ka theksuar se pavarësisht incidentit, procesi mësimor në këtë shkollë nuk do të ndërpritet, pasi objekti shkollor ka alternativa për ngrohje.

“Njoftojmë opinionin publik se procesi mësimor në Shkollën Fillore ‘Sylejman Vokshi’ do të vazhdojë pa asnjë ndërprerje, pasi që shkolla është e pajisur edhe me kondicionerë për ngrohje. Po ashtu, do të bëhet furnizimi i menjëhershëm me dru për ngrohje,” ka bërë të ditur drejtori i Arsimit.

Në fund, Hulaj ka falënderuar të gjitha institucionet e angazhuara për reagimin e shpejtë.

“Falënderojmë zjarrfikësit, Policinë e Kosovës dhe të gjithë të angazhuarit për reagimin e shpejtë dhe profesional, sidomos duke marrë parasysh kushtet e vështira dhe temperaturat e ulëta, ku kanë qëndruar në terren gjatë gjithë natës,” ka përfunduar ai.