Blog

Banka Qendrore e Republikës së Kosovës ka rikujtuar operatorët që të licencohen për shërbimet e kripto-aseteve dhe që kanë aktivitet këmbimi.

Rregullorja e hyrë në fuqi në nëntor të vitit që kaluar u bë si hap i parë drejt rregullimit gradual të këtij sektori dhe rritjes së transparencës në Republikën e Kosovës.

“Me hyrjen në fuqi të saj, subjektet që janë objekt i licencimit obligohen që, brenda një afati prej 90-ditësh (deri më 1 mars 2026), të ndërmarrin të gjitha veprimet e nevojshme për aplikim për licencë dhe për përshtatje të plotë me kërkesat e përcaktuara në këtë rregullore”, thuhet në njoftim të BQK-së.

BQK-ja ka rikujtuar se afati i mbetur deri më 1 mars 2026, për dorëzimin e aplikacioneve për licencë dhe për përmbushjen e kërkesave të rregullores gjatë kësaj periudhe kalimtare, është afati i fundit brenda se cilës të gjithë aplikantët duhet të kenë aplikuar, në pajtim me kërkesat e kësaj rregulloreje.

“Pas përfundimit të këtij afati, ushtrimi i veprimtarisë së ofrimit të shërbimeve të kripto-aseteve pa licencë të BQK-së ose në mospërputhje me kërkesat rregullative do të konsiderohet shkelje e dispozitave të rregullores dhe do të trajtohet në përputhje me legjislacionin në fuqi”, thuhet në njoftim të BQK-së.

Policia e Kosovës në bashkëpunim me ushtarë të misionit të KFOR-it ka realizuar ushtrim të përbashkët të quajtur “Incident Command Walkthrough”.

Sipas njoftimit, ushtrimi kishte për qëllim testimin dhe zbatimin e procedurave standarde të operimit, mekanizmave të komandimit dhe kontrollit, si dhe forcimin e metodave të koordinuara të reagimit, me synim rritjen e gatishmërisë operacionale dhe sigurimin e një përgjigjeje efektive ndaj sfidave të mundshme të sigurisë.

Angazhimet e tilla të përbashkëta, sipas Policisë, dëshmojnë nivelin e lartë të profesionalizmit, koordinimit dhe bashkëpunimit të vazhdueshëm ndërmjet Policisë së Kosovës dhe KFOR-it, në funksion të garantimit të një mjedisi të sigurt dhe stabil për të gjithë qytetarët.

Policia e Kosovës ka vlerësuar mbështetjen dhe kontributin e të gjithë partnerëve të saj, duke theksuar se këto aktivitete janë të rëndësishme për avancimin e mëtejmë profesional të institucionit.

Kryetari i LDK, Lumir Abdixhiku, ka vlerësuar si moment historik përfshirjen e Kosovës në një iniciativë ndërkombëtare për paqen, të udhëhequr nga presidenti i Shteteve të Bashkuara të Amerikës, Donald Trump.

Abdixhiku theksoi se ky zhvillim tejkalon dimensionin e një lajmi ditor dhe përbën dëshmi të pjekurisë shtetërore të Kosovës në arenën ndërkombëtare.

“Përfshirja e Kosovës në një iniciativë ndërkombëtare për paqen, të udhëhequr nga Presidenti i Shteteve të Bashkuara të Amerikës, Donald Trump, është një moment që tejkalon secilin lajm ditor. Për një shtet që ka kaluar nga lufta në liri, falë edhe ndërhyrjes ndërkombëtare, prania në tryezat ku diskutohet paqja globale është edhe dëshmi, edhe përgjegjësi. Dëshmi e suksesit tonë, përgjegjësi për rolin tonë prej shtetit të ri. Është shenjë se Kosova nuk shihet vetëm si përfituese e paqes, por edhe si pjesë e saj”, ka deklaruar ai.

Sipas Abdixhikut, çdo hap i përbashkët me Shtetet e Bashkuara forcon sigurinë kombëtare të Kosovës dhe thellon aleancat strategjike, duke e pozicionuar vendin në anën e paqes dhe partneriteteve të qëndrueshme.

“Lidhja Demokratike e Kosovës e mbështet këtë hap të madh drejt një kapitullin e ri dhe i gëzohet këtij fakti historik. Sepse sukseset e Kosovës janë arritje kombëtare para së cilave e me të cilat mburremi të gjithë”.

Ka nisur takimi mes presidentit të ShBA-së, Donald Trump dhe atij ukrainas, Volodymyr Zelensky, në margjinat e Forumit Ekonomik në Davos, sipas Presidencës ukrainase.

Zelensky më pas pritet t’i adresohet Forumit Ekonomik nga ora 14:30.

Takimi nis pas ceremonisë për themelimin e Bordit të Paqes që udhëhoqi Trump.

Më shumë se 80 kilogramë marihuanë janë konfiskuar në kuadër të një aksioni të Njësisë Anti-Drogë, të koduar “Bregdeti”.

Fillimisht, mbrëmjen e kaluar rreth orës 23:00, në pikën kufitare në Merdarë, në një kamion që drejtohej nga i dyshuari H.S., janë gjetur dhe sekuestruar 76 kilogramë e 800 gramë marihuanë.

Lajmi është konfirmuar nga kryeprokurori i Prishtinës, Zejnullah Gashi.

Sipas tij, me asistencën e Njësitit për Reagim të Shpejtë, është realizuar edhe bastisja e shtëpisë së të dyshuarit, ku janë gjetur dhe konfiskuar një armë zjarri me pesë fishekë të kalibrit 9 mm, dy vetura, një kamion, një telefon celular si dhe para në vlerë prej 2 mijë e 950 euro.

Operacioni ka vazhduar edhe sot, me bastisjen e dy lokacioneve të tjera, konkretisht shtëpive të dy të dyshuarve në fshatin Godishnjak të Podujevës.

Gashi ka bërë të ditur se aty janë sekuestruar katër paketime me substancë të dyshuar narkotike të llojit marihuanë, me peshë totale 4 kilogramë e 454 gramë, dy vetura, dy telefona celularë, thasë najloni të zbrazët ngjyrë të zezë dhe ngjitës që dyshohet se janë përdorur për paketimin e narkotikëve, si dhe një armë zjarri me gaz e modelit “Sig Sauer”.

Ndaj tre të dyshuarve është caktuar masa e ndalimit prej 48 orësh.

Fondacioni për të Drejtat e Kafshëve ka njoftuar se në një lagje të Prishtinës janë identifikuar 15 këlyshë të vegjël dhe katër femra lehona, të gjitha të pasterilizuara, të cilët kanë nevojë për ndihmë veterinare urgjente. Në të njëjtin lokacion u vunë re edhe dy qen të rritur që po shumohen, duke rritur rrezikun e lindjes së kafshëve të tjera në rrugë.

“Ky rast është pasojë e drejtpërdrejtë e mungesës së ndërhyrjes nga strehimorja publike dhe e ndalimit të sterilizimeve, që ka çuar në rritjen e popullsisë së kafshëve në rrugë. Këlyshët dhe nënat e tyre kanë nevojë urgjente për vaksinim, trajtim kundër parazitëve, kujdes veterinar bazik dhe sterilizim të qenve të rritur për të ndaluar ciklin e lindjeve”, ka shkruar Fondacioni për të Drejtat e Kafshëve në faqen e tyre në Facebook.

Fondacioni apelon tek qytetarët që të mbështesin rastin përmes donacioneve, të cilat do të përdoren ekskluzivisht për trajtimin e këlyshëve dhe kujdesin e nënave të tyre:

Brenda Kosovës

Xhirollogaria: 1701017700005277
Banka: NLB Bank
Përshkrimi: Donacion për trajtimin e këlyshëve në Prishtinë
Jashtë Kosovës

IBAN: XK051701017700005277
SWIFT: NLPRXKPR
Përshkrimi: Donacion për trajtimin e këlyshëve në Prishtinë
“Çdo kontribut, sado i vogël, ndihmon drejtpërdrejt për mbijetesën e këlyshëve, shëndetin e nënave dhe parandalimin e dhjetëra lindjeve të tjera të pakontrolluara në rrugë. Kjo nuk është vetëm një histori për 17 këlyshë, por pasojë e ndalimit të sterilizimit dhe mungesës së menaxhimit adekuat të popullsisë së kafshëve në qytet”, shtoi Fondacioni.

Këshilli Ekzekutiv themelues – me Trumpin si kryetar – është në krye të Bordit të Paqes.

Anëtarët e tij janë:

Tony Blair, ish-kryeministër britanik;

Jared Kushner, dhëndri i Trump;

Sekretari i Shtetit i SHBA-së, Marco Rubio;

I dërguari special i SHBA-së në Lindjen e Mesme, Steve Witkoff;

Marc Rowan, Drejtor Ekzekutiv i firmës financiare Apollo Global Management;

Ajay Banga, president i Grupit të Bankës Botërore;

Robert Gabriel, zëvendëskëshilltar i sigurisë kombëtare i SHBA-së.

Presidenti i SHBA-së, Donald Trump, hapi ceremoninë kushtuar “Bordit të Paqes” ndërkombëtar duke u fokusuar në politikën e brendshme dhe duke u mburrur me rritjen ekonomike të SHBA-së, ndërsa e shikonin më shumë se një duzinë udhëheqësish botërorë.

“Ne kemi një mandat të shkëlqyer në vend, siç thashë dje, ekonomia amerikane po lulëzon”, tha ai.

“Kur Amerika lulëzon, e gjithë bota lulëzon”, shtoi ai.

Presidenti amerikan Donald Trump nënshkroi statutin për të nisur zyrtarisht iniciativën e tij “Bordi i Paqes” në Davos të enjten, duke e quajtur atë një “ditë shumë emocionuese, e përgatitur prej kohësh”.

“Do të kemi paqe në botë,” tha Trump.

I shoqëruar nga liderët e vendeve, Trump gjithashtu vlerësoi punën e administratës së tij, duke thënë se ka “zgjidhur tetë luftëra”, dhe shtoi se është bërë “shumë përparim” drejt përfundimit të luftës së gjithanshme të Rusisë në Ukrainë.

Më pas ai mori një moment për të falënderuar krerët e shteteve të pranishëm, shkruan gazeta online Reporteri.net.

Liderët e Argjentinës, Armenisë, Azerbajxhanit, Bahreinit, Bullgarisë, Emirateve të Bashkuara Arabe, Hungarisë, Indonezisë, Jordanisë, Katarit, Kazakistanit, Kosovës, Marokut, Mongolisë, Pakistanit, Paraguait, Arabisë Saudite, Turqisë dhe Uzbekistanit janë ata që kanë vënë firmat e tyre në ditën e themelimit të këtij bordi.

Trump e ka përshkruar organin e sapokrijuar si potencialisht “bordin më prestigjioz të formuar ndonjëherë”. Projekti e ka origjinën në planin e tij me 20 pika për armëpushim në Gaza, të miratuar nga Këshilli i Sigurimit i OKB-së, por është zgjeruar shumë përtej mandatit të tij fillestar.

Ai një ditë më parë sugjeroi se bordi mund të marrë përfundimisht funksione të OKB-së ose ta bëjë organin botëror të panevojshëm.

Por sot, Trump tha që Bordi i Paqes do të punojë me Kombet e Bashkuara për t’i dhënë fund konflikteve në botë.

Sekretari amerikan i Shtetit, Marco Rubio, vlerësoi Bordin e Paqes si “një grup liderësh që fokusohet te veprimi” dhe i dha merita Trumpit për krijimin e tij. Rubio theksoi se detyra e organit “para së gjithash” është “të sigurojë që kjo marrëveshje paqeje në Gaza të bëhet e qëndrueshme”. Më pas, tha Rubio, mund të shikojë edhe diku tjetër.

Meqë detajet e funksionimit të bordit janë ende të paqarta, Rubio e përshkroi atë si një proces në zhvillim.

“Shumë të tjerë do të bashkohen, e dini, disa ose nuk janë sot në qytet ose duhet të kalojnë disa procedura të brendshme në vendet e tyre, për shkak të kufizimeve kushtetuese, por të tjerë do të bashkohen,” tha Rubio.

Jared Kushner, dhëndri i Presidentit Trump, shpalosi planet për rizhvillimin e Gazës. Ato përfshijnë diapozitiva se si mund të duket “Gaza e Re” sipas planeve të SHBA-së.

Diapozitivat paraqesin imazhe të ndërtesave të larta futuriste buzë detit në Rripin aktual të Gazës, me pretendime për “turizëm bregdetar” që do të vijnë.

Rreth 35 shtete kishin pranuar të bashkoheshin, ndërsa 60 kishin marrë ftesa, sipas zyrtarëve të administratës Trump.

Trump gjithashtu mbrojti ftesën për Vladimir Putinin e Rusisë — i cili tha se po konsultohej me “partnerë strategjikë” për përfshirjen e Moskës — dhe figura autoritare si Aliaksandr Lukashenka i Bjellorusisë, duke thënë se donte “të gjithë” ata që ishin të fuqishëm dhe mund “ta kryenin punën”.

Disa aleatë evropianë refuzuan pjesëmarrjen. Norvegjia, Suedia dhe Franca hodhën poshtë ftesat, me zyrtarët francezë që shprehën shqetësimin se bordi mund të zëvendësonte OKB-në si forumi kryesor botëror për zgjidhjen e konflikteve, duke konfirmuar njëkohësisht mbështetjen për planin e paqes për Gazën./Reporteri.net/