Blog

Ministri i Financave, Hekuran Murati, tha se projektbuxheti 2026, i cili po shqyrtohet sot në lexim të dytë, është buxhet i përkohshëm dhe emergjent.

Murati theksoi se nevoja për buxhet është emergjente, meqë asnjë aktivitet i prokurimit nuk mund të iniciohet pa miratim të buxhetit.

Ai tha se prioritetet e Qeverisë dhe komunave, mund të shtohen e reflektohen gjatë rishikimit.

“Me zgjatjet që bëhen sipas ligjit në mungesë të buxhetit, ajo është zgjidhje emergjente e përkohshme sa i përket shpenzimeve rrjedhëse. Për sa ipërket projekteve dhe inicimit të projekteve tjera asnjë projekt nuk mund të inicohet prokurimi për të. Asnjë projekt nuk mund të inicohet prokurimi për shkak se nuk ka buxhet dhe nuk mund të bëhet zotimi i mjeteve për shkak se nuk është buxheti në fuqi”, tha Murati.

Shtoi se kjo është arsyeja pse kanë dashur si Qeveri që procedojnë sa më shpejt buxhetin.

“Po e miratojmë këtë buxhet, që të ketë një bazë mbiu të cilën edhe komunat e edhe organizatat tjera buxhetore të mund të ushtrojnë veprimtarinë e tyre pa problem, e më pas prioritetet e Qeverisë dhe të komunave, të kenë mundësi t’i shtojnë apo reflektojnë gjatë rishikimit.Kërkesa jonë ka qenë të mos ketë amandamente meqë është buxhet i përkohshëm”, shtoi Murati.

Shefi i Grupit Parlamentar i AAK-së, Besnik Tahiri, ka deklaruar se nëse 14 amendamentet e këtij subjekti politik nuk pranohen, atëherë, sipas tij, prezantimi dhe shtytja për miratimin e buxhetit për vitin 2026 do ishte mashtrim optik.

Ai pati edhe disa kritika ndaj Qeverisë Kurti 3.

“Për buxhetin kemi folur në sesionin e kaluar, mirëpo qytetarëve të Kosovës dua të iu them dy porosi që i ka AAK-ja. E para: ashtu siç u ka thënë në leximin e parë për këtë buxhet, ky është buxhet që është përgatitur në tetor, dhe ky buxhet është provizor. Kështu është thënë nga kryeministri e ministri i Financave, dhe zotimi i Qeverisë është se pas dy muajve do të ndodh një rishikim i madh për këtë buxhet. Nga 86 amendamente gjithsej, AAK i ka 14. Ne do të presim cili do të jetë reagimi i qeverisë për këto amendamente, nëse edhe kësaj here nuk do të kalon në seancë asnjë amendament i Aleancës për Ardhmërinë e Kosovës, atëherë leximet e buxhetit kanë qenë mashtrim optik”, tha Tahiri.

Shefja e Grupit Parlamentar të LDK-së, Jehona Lushaku – Sadriu, ka deklaruar në Kuvendin e Kosovës se nuk e votojnë buxhetin, nëse nuk shtohen 21 amandamentet.

Ajo kërkoi që amandamentet e propozuara të hidhen në votim, sepse përndryshe nuk e votojnë shqyrtimin e dytë.

“Ne si grup parlamentar i kemi paraqitur 21 amandamente dhe nuk kanë kaluar përmes komisionit ëpr buxhet, andaj iu bëjmë thirrje t’i vëni amandamentet tona në votim, sepse besojmë që adresojnë probleme reale të qytetarëve. Përndryshe, buxhetin nuk e votojmë.” – tha Lushaku – Sadriu.

Një banderolë me një foto të Donald Trumpit dhe fjalët “Bëjeni Amerikën të Sigurt Përsëri” u var në selinë e Departamentit të Drejtësisë në Uashington.

“Jemi krenarë në këtë Departament të Drejtësisë që festojmë 250 vjet të vendit tonë të madh dhe punën tonë historike për ta bërë Amerikën përsëri të sigurt sipas udhëzimeve të presidentit Trump”, tha një zëdhënës i Departamentit kur u pyet për banderolën.

Departamenti i Drejtësisë, i cili tani është i zbukuruar me një portret të Trumpit, dikur hetoi presidentin, shkruan NBC News.

Në vitin 2022, Prokurori i Përgjithshëm i atëhershëm, Merrick Garland, emëroi Jack Smith si këshilltar të posaçëm për të hetuar keqpërdorimin e dyshuar të dokumenteve të klasifikuara nga Trump dhe përpjekjet e tij për të përmbysur zgjedhjet e vitit 2020.

Çështjet u pushuan në vitin 2024 pasi Trump fitoi zgjedhjet, me Smith që përmendi një politikë të gjatë të Departamentit të Drejtësisë për të mos ndjekur penalisht një president në detyrë. Trump ka mohuar çdo shkelje në këto raste.

Që nga rikthimi i tij në detyrë, Departamenti i Drejtësisë ka ndjekur çështje kundër disa prej kundërshtarëve të dyshuar të Trumpit, përfshirë ish-drejtorin e FBI, James Comey, dhe Prokuroren e Përgjithshme të New Yorkut, Letitia James, pasi presidenti i kërkoi publikisht Prokurores së Përgjithshme Pam Bondi të ngrinte akuza.

Agjencia e Ushqimit dhe Veterinarisë ka njoftuar se, në bashkëpunim me kompaninë UNION shpk, janë asgjësuar 7 mijë e 998 produkte ushqimore për fëmijë, të markave “Aptamil” dhe “Nutricia Bebelac”, me një peshë totale prej 4.130kg e 80gr.

Sasia e produkteve të asgjësuara është përcaktuar në bazë të datave të skadencës, në përputhje me njoftimet e marra nga Njësia e Alarmit të Shpejtë për Ushqimin dhe Ushqimin për Kafshë.

“AUV aktualisht është në proces të verifikimit dhe gjurmueshmërisë për të konstatuar nëse ndonjë sasi e këtyre produkteve ka mbetur ende në treg.Agjencia e Ushqimit dhe Veterinarisë mbetet e përkushtuar në monitorimin e vazhdueshëm të tregut dhe në zbatimin e masave parandaluese dhe kontrolluese, me qëllim garantimin e sigurisë ushqimore dhe mbrojtjen e shëndetit të konsumatorëve në Republikën e Kosovës”, thuhet në njoftim.

Shefja e Grupit Parlamentar të LVV, Arbërie Nagavci, deklaroi në seancën plenare ku po shqyrtohet Projektligji për Buxhetin 2026 se subjekti që ajo përfaqëson e mbështet këtë projektligj në lexim të dytë, sipas propozimit të Qeverisë.

Ajo tha se grupi parlamentar mbështet edhe amendamentet e dakorduara me Ministria e Financave, të cilat, sipas saj, adresojnë çështje që lidhen me buxhetin e Prishtinës dhe Shtimes.

“Grupi parlamentar i LVV mbështet projektligjin për buxhetin 2026 për lexim të dytë sipas propozimit të Qeverisë. Mbështesim edhe amendamentet në dakordim me Ministrinë e Financave, të cilat adresojnë buxhetin e Komunës së Prishtinës dhe Shtimes”, tha Nagavci.

Presidenti i SHBA-së, Donald Trump, tha se bota do të zbulojë “gjatë 10 ditëve të ardhshme, ndoshta” nëse SHBA-të do të arrijnë një marrëveshje me Iranin apo do të ndërmarrin veprime ushtarake.

Në takimin e parë të Bordit të tij të Paqes në Uashington, Trump tha: “Ne duhet të bëjmë një marrëveshje kuptimplotë, përndryshe ndodhin gjëra të këqija”.

Ditët e fundit, SHBA-të kanë shtuar forcat ushtarake në Lindjen e Mesme, ndërsa u raportua përparim në bisedimet midis negociatorëve amerikanë dhe iranianë në Zvicër.

Qeveria iraniane i ka thënë Sekretarit të Përgjithshëm të OKB-së se do t’i konsiderojë bazat amerikane në rajon si objektiva legjitime nëse përdoren në ndonjë agresion ushtarak kundër Iranit.

Misioni i Teheranit në OKB tha në një letër drejtuar Sekretarit të Përgjithshëm të OKB-së, Antonio Guterres, se retorika e Trumpit sinjalizonte një rrezik real të një sulmi, por tha se Irani nuk donte luftë.

Bëhet e ditur se ligjvënësit demokratë dhe disa republikanë kanë shprehur kundërshtim ndaj çdo veprimi të mundshëm ushtarak në Iran pa miratimin e Kongresit.

Në fjalën e tij, Trump vuri në dukje se të dërguarit specialë Steve Witkoff dhe Jared Kushner patën “disa takime shumë të mira” me Iranin.

“Me kalimin e viteve, është vërtetuar se nuk është e lehtë të bësh një marrëveshje kuptimplotë me Iranin”, tha ai.

“Përndryshe ndodhin gjëra të këqija”, shtoi presidenti amerikan.

Partia Demokratike e Kosovës nuk do ta mbështesë buxhetin për vitin 2026.

Shefi i Grupit Parlamentar të PDK-së, Arian Tahiri, ka theksuar se buxheti, në formën aktuale, ka shumë mangësi. Ai ka shtuar se PDK-ja kishte dhënë vërejtjet e saj gjatë diskutimeve paraprake dhe kishte pritur ndryshime gjatë dy leximeve, por këto ndryshime nuk u reflektuan.

“Ne i tërheqim të gjitha amendamentet dhe nuk e mbështesim këtë buxhet që nuk e reflekton as përbërjen e qeverisë, nuk është dokument profesional, ka shumë defekte për vitin 2026, por do të jetë i dëmshëm edhe për vitet e ardhshme”, tha Tahiri gjatë seancës.

PDK-ja ka theksuar se qëndrimi i saj synon të mbrojë interesin e qytetarëve dhe të sigurojë që dokumentet financiare të Kuvendit të jenë të qarta, gjithëpërfshirëse dhe të zbatueshme.