Blog

Kryetarja e Kuvendit të Kosovës, Albulena Haxhiu zhvilloi sot takim me Ambasadorin e Gjermanisë në Kosovë, Rainer Rudolph.

Në njoftimin e Kuvendit thuhet se në këtë takim u diskutua për marrëdhëniet ndërmjet Kosovës dhe Gjermanisë, mbështetjen e vazhdueshme gjermane për forcimin e institucioneve demokratike dhe sundimin e ligjit, si dhe siç thuhet në njoftim, për mundësitë e zgjerimit të bashkëpunimit ndërparlamentar.

“Haxhiu shprehu mirënjohje për mbështetjen e ofruar nga Republika Federale e Gjermanisë ndaj Republikës së Kosovës, në veçanti në proceset e integrimit evropian dhe në konsolidimin institucional të vendit”, thuhet në njoftimin e Kuvendit.

Grupi Parlamentar i Lidhjes Demokratike të Kosovës sot ka mbajtur një takim për të diskutuar rreth zgjedhjes së Presidentit.

Sipas burimeve të Klankosova.tv, deputetët e LDK-së nuk do të marrin pjesë në seancë kur do të votohet, pa pasur marrëveshje politike.

Siç theksoi zëdhënësi Besian Mustafa, në konferencën e mbajtur për media deri më tani nuk ka ndonjë marrëveshje e as emër konkret për shef/e të shtetit.

E ngarkuara me punë në Ambasadën amerikane në Kosovë, Anu Prattipati, është takuar gjatë ditës së sotme me dy ministra të qeverisë Kurti 3.

Siç u theksua në dy njoftime të ndara nga kjo ambasadë në Facebook, Prattipati është takuat me ministrin e Administrimit të Pushtetit Lokal, Elbert Krasniqi, për të diskutuar “forcimin e bashkëpunimit ShBA-Kosovë dhe mbështetjen e qeverisjes lokale që u shërben të gjitha komuniteteve”.

“Institucionet përfaqësuese dhe pjesëmarrja aktive janë themeli i stabilitetit dhe prosperitetit afatgjatë në rajon”, u tha në postimin e Ambasadës.

Në ndërkohë, faqja zyrtare e Ambasadës amerikane në Prishtinë njoftoi edhe për një takim të Prattipatit me ministrin e Financave, Hekuran Murati, për, siç u tha, të diskutuar prioritetet e ardhshme të investimeve të Kosovës dhe projektet kryesore të zhvillimit.

“Me avancimin e projekteve të rëndësishme infrastrukturore, ShBA mirëpret zgjerimin e mundësive për kompanitë amerikane dhe një angazhim më të fortë tregtar që avancon interesat e përbashkëta ekonomike”, bëri me dije Ambasada në njoftimin në Facebook.

Në çështjen gjyqesore ndaj Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit të cilët akuzohen për vepra penale kundër administrimit të drejtësisë, u mor vendim që për katër të fundit të ndryshohen kushtet e lirimit me kusht.

Sipas gjyqtarit të vetëm, Christoph Gosnell, palët kishin bërë kërkesë që të ndryshohet kushti i vendosur sa i përket kontaktit me bashkë të akuzuarit dhe diskutimin e çështjes, raporton “Betimi për Drejtësi”.

Atyre iu lejua që brenda hapësirave të DhSK-së t’iu lejohet të kenë komunikim mes vete dhe të diskutojnë për çështjen, por duke pasur parasysh që çështje konfidenciale nuk duhet të diskutohen në hapësira publike

Megjithatë, gjyqtari tha se të gjitha kushtet e vendosura mbeten në fuqi jashtë hapësirave të DhSK-së.

Gjykimi pritet të vazhdojë edhe nesër me dëshminë e dëshmitarit Koen Herlaar.

Deputetja e LDK-së, Janina Ymeri ka reaguar fuqishëm ndaj mënyrës së kryeministrit Albin Kurti për zgjedhjen e presidentit në Kosovë, duke e cilësuar atë si një kushtëzim që përdoret përmes shantazhit dhe kërcënimit politik.

“Shumë gjëra në Kosovë janë kushtëzu me shantazh, me kërcënim, këtë e dëgjojmë edhe jashtë sallave të gjykatave, po tash Kosova ka arrit në atë nivel që Kryeministri përdor këtë metodë edhe për zgjedhje të Presidentit,” ka thënë Ymeri.

Ajo shtoi se kjo mënyrë e vendosjes së kushteve për kandidatin partiak në zgjedhje është e papranueshme dhe dëmton rëndë demokracinë në vend.

“Ose Kandidati im partiak ose zgjedhje. Ose Pushtet 100% Kurti & Co. ose Zgjedhje,” tha ajo.

Ymeri theksoi se një votë pro apo kundër vetëm për kuorum nga një deputet opozitar për kandidat të pushtetit është, sipas saj “vrasje e demokracisë edhe e lirisë në vendimmarrje”.

“As Glauk Konjufca as asnjë numër tjetër serik i partisë (ksisoj i ka paraqitur Kurti), nuk duhet të marr postin e Presidentit,” përfundoi deputetja. /Telegrafi/

Sekretari i Përgjithshëm i NATO’s, Mark Rutte, gjatë vizitës së tij në Maqedoninë e Veriut tha se misioni i KFOR’it në Kosovë do të mbetet “i fuqishëm” dhe “i aftë për qëllimin e tij”.

Këto deklarata Rutte i bëri pas disa raportimeve se SHBA-ja u ka lobuar në muajt e fundit për të zvogëluar operacionin paqeruajtës të NATO-s në Kosovë.

“Maqedonia e Veriut e ka mbështetur prej kohësh misionin tonë paqeruajtës të KFOR-it në Kosovë dhe për këtë ju falënderoj. KFOR-i vazhdon të luajë një rol themelor në mbështetje të sigurisë së qëndrueshme, për të mirën e të gjithë njerëzve që jetojnë në Kosovë. Ne do të vazhdojmë të sigurohemi që KFOR-i të mbetet i fuqishëm dhe i aftë për qëllimin e tij”, tha Rutte.

Ndryshe, për këto raportime Pentagoni kishte thënë se aktualisht nuk ka ndryshime në në stacionimin e forcës.

Në konferencën e përbashkët me presidenten e Maqedonisë së Veriut, Gordana Siljanovska Davkova, në Shkup, Rutte gjithashtu tha se NATO është e përkushtuar “për të mbrojtur çdo centimetër të territorit aleat ngado që të vijë sfida”.

Mund të duket joshëse të thuhet se dollari amerikan ka rikthyer statusin e “strehës së sigurt” pas sulmeve të fundjavës ndaj Iranit. Por situata nuk është aq e thjeshtë. Forcimi i monedhës amerikane lidhet më shumë me lëvizjet në tregjet e energjisë sesa me një rikthim klasik të kërkesës për siguri financiare.

Që nga rikthimi i Donald Trump në Shtëpinë e Bardhë vitin e kaluar, dollari kishte humbur terren edhe gjatë periudhave të pasigurisë në tregje, kryesisht për shkak të paqartësive në politikat ekonomike amerikane dhe trazirave të brendshme e gjeopolitike.

Një nga shtyllat kryesore të planit ekonomik të administratës Trump ka qenë zhbërja e mbivlerësimit shumëvjeçar të dollarit. Rënia e rolit të tij si “strehë e sigurt” sugjeronte se investitorët e huaj – tashmë shumë të ekspozuar ndaj aseteve amerikane – kishin ndryshuar sjellje.

Megjithatë, tregjet u befasuan kur dollari u forcua ndjeshëm pas fushatës së bombardimeve nga SHBA-ja dhe Izraeli kundër objektivave iraniane, përfshirë edhe vrasjen e liderit suprem iranian Ali Khamenei dhe valën e dhunës rajonale që pasoi.

Forcim për shkak të energjisë

Thelbi i lëvizjes nuk ishte një “vrap drejt dollarit”, por dinamika e çmimeve të energjisë. Rritja fillestare prej 10% e çmimeve globale të naftës goditi më rëndë ekonomitë që varen nga importet e energjisë.

SHBA-ja është tashmë eksportuese neto e energjisë, ndaj ndikimi ishte më i kufizuar. Ndërkohë, monedha japoneze ra mbi 1% kundrejt dollarit, pasi Japonia importon një pjesë të madhe të energjisë përmes Ngushticës së Hormuzit. Edhe juani kinez humbi 0.8%, ndërsa tensionet u rritën.

Strategu i valutave në Societe Generale, Kit Juckes, tha se kjo nuk është një situatë e favorshme për monedhat e Azisë Veriore, duke theksuar se operacioni ushtarak amerikan mund të zgjasë javë, jo ditë.

Evropa nën presion

Për Evropën, situata është edhe më e ndërlikuar. Sulmet që prekën rrugët detare përmes Hormuzit – korridor për rreth 20% të gazit të lëngshëm natyror në botë dhe deri në 30% të naftës bruto – shkaktuan luhatje të forta.

Çmimet referuese të gazit evropian u rritën deri në 50% brenda ditës, duke mbyllur me +35% dhe arritur nivelin më të lartë në më shumë se një vit. SHBA-ja furnizoi 58% të LNG-së së Bashkimit Evropian vitin e kaluar, ndërsa Katari – që mbulon rreth 6% – ndaloi prodhimin pas sulmeve.

Euro ra 1% kundrejt dollarit, në nivelin më të ulët në mbi një muaj.

Sa i madh është ndikimi ekonomik?

Ekonomistët e Barclays vlerësojnë se çdo rritje e qëndrueshme prej 10 dollarësh për fuçi nafte mund të ulë rritjen globale me deri 0.2 pikë përqindjeje. Nëse çmimet arrijnë mbi 100 dollarë për fuçi, ndikimi mund të jetë i ndjeshëm.

Aktualisht, rritja neto prej 5 dollarësh – në rreth 77 dollarë për fuçi – konsiderohet një goditje relativisht e moderuar, me ndikim të kufizuar në kërkesën amerikane.

Me inflacionin bazë në SHBA mbi 3%, presioni nga energjia mund të forcojë argumentin për norma të larta interesi gjatë gjithë vitit – një tjetër faktor që mbështet dollarin.

Rreziku i një cikli vetëpërforcues

Sipas një rregulli praktik të Barclays, dollari forcohet me 0.5% deri në 1% për çdo rritje prej 10 dollarësh të naftës. Nëse çmimet e energjisë të denominuara në dollar mbeten të larta, kjo mund të krijojë një efekt zinxhir: dollar më i fortë goditje më e madhe për ekonomitë importuese.   

Një skenar i tillë nuk do të ishte i dëshirueshëm për askënd – aq më pak për Uashingtonin.

Sipas tregut të parashikimeve Polymarket, ka 63% gjasa që operacioni ushtarak të ndalet deri në fund të muajit.

Ministria e Punëve të Jashtme dhe Diasporës e Republikës së Kosovës ka njoftuar opinionin publik se sot, në ambientet e jashtme të Ambasada e Republikës së Kosovës në Berlin, janë vendosur etiketa fyese me përmbajtje shoviniste në gjuhën serbe mbi pllakatin identifikues të objektit.

Sipas njoftimit zyrtar, mbishkrimet përmbanin slogane nacionaliste dhe nxitëse, përfshirë mesazhe si “Nuk ka dorëzim”, “Kosova është Serbi” dhe thirrje të tjera me konotacion propagandistik dhe përçarës.

Menjëherë pas identifikimit të rastit, Ambasada e Republikës së Kosovës në Berlin ka njoftuar autoritetet kompetente gjermane. Policia gjermane është informuar dhe pritet të ndërmarrë veprimet përkatëse në vendngjarje, përfshirë hetimin e plotë të rrethanave dhe identifikimin e personave përgjegjës.

MPJD ka dënuar fuqishëm çdo akt vandalizmi, gjuhë urrejtjeje dhe çdo përpjekje për të cenuar përfaqësitë diplomatike të Republikës së Kosovës. Sipas ministrisë, veprime të tilla janë të papranueshme dhe bien ndesh me normat dhe konventat ndërkombëtare që garantojnë paprekshmërinë e misioneve diplomatike, si dhe dëmtojnë frymën e bashkëjetesës dhe respektit ndërmjet shteteve.

Republika e Kosovës, thuhet më tej në reagim, mbetet e përkushtuar ndaj promovimit të paqes, dialogut, bashkëpunimit dhe marrëdhënieve të mira ndërkombëtare, duke vazhduar të ushtrojë misionin e saj diplomatik në përputhje të plotë me parimet dhe standardet ndërkombëtare.