Blog

Në situatën aktuale kushtetuese, Eugen Cakolli, hulumtues në KDI thekson se Gjykata Kushtetuese duhet të veprojë shpejt dhe të shqyrtojë mundësinë e vendosjes së një mase të përkohshme lidhur me dekretin e presidentes, në mënyrë që të shmanget një krizë edhe më e thellë institucionale.

Sipas tij, ndonëse sipas parimit të ligjshmërisë dekretet konsiderohen të vlefshme deri sa të vërtetohet e kundërta nga gjykata, paqartësitë kushtetuese në këtë rast kërkojnë reagim të menjëhershëm.

“Edhe pse sipas parimit të ligjshmërisë dekretet janë të ligjshme derisa të vërtetohet e kundërta në gjykatë, për shkak të paqartësisë kushtetuese që kemi në këtë situatë është tejet e rëndësishme që gjykata ta trajtojë me prioritet lëndën dhe potencialisht të vendosë edhe masë të përkohshme mbi bazë ex officio, nëse një kërkesë e tillë nuk është paraqitur nga Lëvizja Vetëvendosje”, ka thënë ai.

Cakolli paralajmëron se nëse nuk ndërmerren hapa të tillë, vendi mund të përballet me një cikël të kontestuar institucional, duke kujtuar edhe një rast të mëhershëm të vendimmarrjes kushtetuese.

“Çfarëdo situate ku mund të hyjmë në një cikël të kontestuar do të rrezikonte që vendi të përsërisë skenarin që e kemi pasur me rastin e zgjedhjes së nënkryetarëve, kur gjykata konstatoi se procedura nuk kishte qenë kushtetuese, por ndërkohë Kuvendi ishte shpërndarë dhe vendi kishte shkuar në zgjedhje pas një procedure që në esencë ishte jokushtetuese”, ka theksuar ai.

Sipas tij, praktika e deritanishme tregon se Gjykata Kushtetuese ka vepruar shpeshherë me prioritet në raste të ndjeshme.

“Gjykata në të kaluarën ka treguar se ka trajtuar me prioritet raste të tilla dhe ka vendosur edhe masa të përkohshme pa iu kërkuar fare nga palët, prandaj pres që brenda kësaj jave, nëse jo brenda ditëve aktuale, të vendoset për një masë të përkohshme si mënyra e vetme për të parandaluar një shkelje edhe më të rëndë dhe cenimin e interesit publik”, ka shtuar ai.

Ai gjithashtu ka vlerësuar se zgjedhjet në këtë moment do të ishin opsioni më i pafavorshëm për vendin.

“Pas krizave të njëpasnjëshme kushtetuese që kanë derivuar nga situata politike, zgjedhjet janë opsioni më i keq i mundshëm në këtë fazë, sidomos në raport me proceset reformuese dhe funksionin ligjvënës e mbikëqyrës të institucioneve”, ka thënë ai.

Sipas tij, vendi tashmë po hyn drejt vitit të dytë me institucione jo plotësisht funksionale, gjë që mund të minojë besimin e qytetarëve në institucionet shtetërore.

“Një situatë e tillë e minon besimin e publikut në institucione dhe mund të ndikojë edhe në pjesëmarrjen në zgjedhje, për shkak të lodhjes së qytetarëve nga ciklet e shpeshta zgjedhore”, ka deklaruar ai.

Ai paralajmëron se krizat e vazhdueshme institucionale mund të kenë ndikim edhe në marrëdhëniet ndërkombëtare të Kosovës.

“Kjo situatë ndikon drejtpërdrejt edhe në proceset e integrimit dhe në marrëveshjet ndërkombëtare, duke e dëmtuar kredibilitetin ndërkombëtar të Kosovës, pasi në sytë e partnerëve ndërkombëtarë mund të paraqitemi si një vend që nuk arrin të tejkalojë as krizat më të zakonshme politike”, ka theksuar ai.

Sa i përket rolit të presidentes, ai ka thënë se nga aspekti ligjor nuk ka pengesa që ajo ta caktojë datën e zgjedhjeve, por se mund të presë edhe për një kohë të shkurtër.

“Meqenëse presidentja është njoftuar nga gjykata se rasti është pranuar për shqyrtim, nuk ka ndonjë ndalesë ligjore që ajo ta caktojë datën e zgjedhjeve. Megjithatë, duke marrë parasysh situatën aktuale, ajo mund të presë edhe pak, ndonëse kjo mund ta prekë afatin 45-ditor dhe kohën në dispozicion të KQZ-së”, ka thënë ai.

Megjithatë, ai shton se nëse Gjykata Kushtetuese nuk vendos shpejt, presidentja do të jetë e obliguar të veprojë.

“Nëse kjo nuk ndodh brenda ditëve në vijim, atëherë presidentja, në funksion të ushtrimit të kompetencave kushtetuese dhe ligjore, është e obliguar ta caktojë datën e zgjedhjeve, për të ruajtur sigurinë juridike në vend”, ka përfunduar Cakolli për Ekonomia Online.

Kompania Rajonale e Ujësjellësit “Bifurkacioni” në Mitrovicë ka bërë thirrje ndaj qytetarëve për përdorim të racionuar dhe të dedikuar të ujit të pijes, duke theksuar se shfrytëzimi i tij jashtë qëllimeve bazike familjare konsiderohet keqpërdorim.

Sipas njoftimit, uji i pijes është i dedikuar ekskluzivisht për: pije dhe përgatitje të ushqimit, higjienë personale dhe familjare, si dhe nevoja themelore shtëpiake. Ndërkohë, përdorimi për ujitjen e kopshteve dhe livadheve, larjen e automjeteve, oborreve dhe trotuareve, mbushjen e pishinave apo për qëllime komerciale dhe ndërtimore pa autorizim, konsiderohet i papranueshëm.

“Konsumatori që evidentohet duke keqpërdorur ujin e pijes do të përballet me masa ndëshkuese, duke përfshirë gjobë, ndërprerje të përkohshme të furnizimit me ujë dhe masa të tjera administrative e ligjore”, thuhet në njoftim.

KRU Mitrovica apelon që çdo konsumator të respektojë rregulloret dhe të përdorë ujin e pijes në mënyrë të përgjegjshme, në mënyrë që furnizimi i qëndrueshëm dhe i rregullt të sigurohet për të gjithë qytetarët.

“Apelojmë për përdorim racional dhe të përgjegjshëm të ujit të pijes, në interes të përgjithshëm dhe për të garantuar furnizim të qëndrueshëm për të gjithë konsumatorët”, thekson kompania.

Një delegacion nga Prokuroria e Posaçme Kundër Korrupsionit dhe Krimit të Organizuar (SPAK), nga Shqipëria po qëndrojnë për vizitë zyrtare në Kosovë.

Delegacioni shqiptar i kryesuar nga drejtuesi i SPAK-ut, Klodjan Braho u prit sot në takim nga Ushtruesi i Detyrës së Kryeprokurorit të Shtetit, Agron Qalaj.

Sipas një komunikate për media, Qalaj njoftoi delegacionin nga Tirana për funksionimin e sistemit prokurorial, e në veçanti për funksionimin e Prokurorit të Shtetit, për strukturën organizative, për kompetencat e prokurorive, si dhe për sfidat me të cilat ballafaqohet sistemi prokurorial në realizimin e misionit për sundim të ligjit.

Në njoftimin zyrtar theksohet se gjatë këtij takimi u riafirmua angazhimi i përbashkët institucional në funksion të forcimit të sundimit të ligjit në të dyja shtetet, si dhe u diskutua për ngritjen e nivelit të bashkëpunimit, koordinimin dhe efikasitetin në luftën kundër krimit në të dyja shtetet.

“Palët u dakorduan se forcimi i bashkëpunimit dhe koordinimit ndërmjet dy prokurorive në fushën e drejtësisë penale është thelbësor për përballimin e sfidave të përbashkëta dhe trajtimin e çështjeve me interes të ndërsjellë”, thuhet në njoftim.

Qendra Kombëtare për Menaxhim Kufitar të Kosovës njoftoi se është bllokuar qarkullimi i automjeteve në dalje të pikëkalimit kufitar me Serbinë në Jarinjë.

Sipas njoftimit, kjo po ndodh për shkak të pastrimit të rrugës “në anën e Serbisë”.

“Më datë, 09.03.2026, prej orës 10:10, është bllokuar qarkullimi i automjeteve ne dalje të PKK Jarinje, për shkak se në anën e Serbisë, janë duke e pastruar rrugën me bager dhe kamionë, kështu që asnjë automjet nuk mund të levizë”, thuhet në njoftim.

“Për çdo informatë shtesë kontaktoni QKMK në numrat 045198000, 045198606 dhe pa pagesë 080050095”.

Kryeministri i vendit refuzoi të ndalet për t’iu përgjigjur pyetjeve të gazetarëve lidhur me një deklaratë të ministrit për Komunitete dhe Kthim, Nenad Rashiq, i cili tha se për shkak të tij, Albin Kurti kishte vendosur t’ia transferonte 24 hektarë tokë Manastirit të Deçanit.

Kurti nuk deshi të sqaronte më shumë, duke përmendur reagimin e zëdhënësit të Qeverisë, Arlind Manxhukës dhe vetë ministrit.

“Ka folur tashmë zëdhënësi ynë, Arlindi, e po ashtu e ka sqaruar edhe ministri”, tha ai.

Në vitin 2024, Kurti i kishte kërkuar Agjencisë Kadastrale që t’ia transferonte 24 hektarë tokë Manastirit të Deçanit, duke thënë se kjo do të ishte vendimtare për aplikimin e Kosovës për anëtarësim në Këshillin e Europës, gjë që më pas nuk ndodhi.

“Do ta them, ndoshta edhe pa modesti, por kjo ndodhi falë këmbënguljes sime të vazhdueshme. Me vite shpjegoja pse kjo është e rëndësishme. Në fund kryeministri më thirri para mbledhjes së Qeverisë dhe më tha: ‘Kam menduar shumë për këtë. Do ta bëjmë, por ta dish – për shkakun tënd’”, tha Rashiq në një intervistë të fundit për mediumin lokal serb, Radio Gorazhdevci.

Ai shtoi se, edhe pse kjo ishte një detyrim i vjetër gjyqësor që askush më parë s’e kishte zbatuar, fakti që këtë e bëri Albin Kurti me nxitjen e tij ka peshë të veçantë: “Ishte një gjë e madhe që nuk është e natyrës materiale, por diçka shumë më e rëndësishme. Mendoj se kjo duhet vlerësuar”, deklaroi ai.

Deputeti i Lidhjes Demokratike të Kosovës, Ermal Sadiku i ka bërë thirrje prokurorisë dhe AKI-së të merren me deklaratat e Rashiqit.

Teksa ka thënë se Kosova nuk ka tokë për të falur, Sadiku shpreson që deklarata e Rashiqit të mos jetë e vërtetë.

“Prokuroria dhe AKI duhet të merren seriozisht me deklaratat e Rashiqit. Shpresoj që kjo të mos jetë e vërtetë dhe që ai ta ketë thënë vetëm për të fituar popullaritet tek votuesit serbë.Megjithatë, gjithmonë kam pasur dyshime për burimin e kësaj marrëdhënieje kaq të mirë mes Rashiqit dhe Kurtit. Kosova nuk ka tokë për të falur”, ka shkruar Sadiku.

Deputeti serb, Nenad Rashiq në një media serbe deklaroi se “Kurti ia fali tokën e Manastirit të Deçanit serbëve për hatër timin”. Për të njëjtën ai i tha sot Insajderit se e ka ngatërruar me diçka krejt tjetër.