Category: SPORT

Tensioni duket se po rritet në dhomën e zhveshjes së Real Madridit, ku situata brenda skuadrës raportohet të jetë larg qetësisë.

Sipas gazetarit Anton Meana, i cili foli në emisionin “El Larguero” të Cadena SER, atmosfera në grup vazhdon të jetë e ftohtë, pavarësisht ndryshimeve të bëra gjatë kësaj vere dhe ardhjes së Jose Mourinhos në stol.

Madje, raportimet e fundit flasin edhe për një përplasje mes dy futbollistëve të Real Madridit. Identiteti i tyre nuk është bërë i ditur, por episodi ka shtuar edhe më shumë pikëpyetjet rreth gjendjes së skuadrës.

Meana ka theksuar se problemi kryesor brenda grupit nuk është zhdukur dhe se, pavarësisht ndryshimit të trajnerit, dinamika në dhomën e zhveshjes duket ende e njëjtë.

Në qendër të vëmendjes është edhe Kylian Mbappe. Sulmuesi francez është rikthyer në stërvitje me grupin pas dëmtimit të pësuar me kombëtaren dhe gjendja e tij fizike raportohet se është përmirësuar ndjeshëm.

Mbappe pritet të jetë në dispozicion të Mourinhos për sfidën ndaj Villarrealit, ndërsa klubi madrilen vazhdon t’i japë mbështetje të plotë.

Francezi ishte përfshirë në disa polemika gjatë pushimit të kombëtareve, por në Madrid nuk ka sinjale për një përçarje me lojtarin. Mourinho madje ka zhvilluar një bisedë me të, duke i kërkuar më shumë kujdes dhe qetësi jashtë fushës.

Tani, sfida për Real Madridin është të rikthejë qetësinë në grup, përpara një muaji jashtëzakonisht të ngarkuar.

Roma, Sevilla dhe Leipzig janë disa nga kundërshtarët që e presin skuadrën, përpara një përballjeje që të gjithë po e presin, El Clasico ndaj Barcelonës më 25 tetor.

Kosova vazhdon të ëndërrojë për një ngjitje në elitën e Ligës së Kombeve, ndërsa dy ndeshjet e fundit të këtij edicioni mund të vendosin gjithçka.

Sipas parashikimeve të publikuara nga Football Rankings, “Dardanët” kanë rreth 21.7 për qind gjasa për t’u promovuar në Ligën A. Kosova renditet e nënta mes përfaqësueseve të Ligës B sa i përket mundësive për ngjitje në nivelin më të lartë.

Megjithatë, rruga drejt Ligës A mbetet plotësisht e hapur.

Kosova e nisi aventurën në Grupin B3 me një fitore të rëndësishme 1-0 ndaj Republikës së Irlandës. Më pas erdhi një humbje 3-1 në transfertë ndaj Austrisë, ndërsa “Dardanët” morën dy barazime, fillimisht 0-0 me Izraelin dhe më pas 1-1 ndaj Austrisë në stadiumin “Fadil Vokrri”.

Pas katër ndeshjeve, Austria kryeson grupin me tetë pikë. Kosova dhe Republika e Irlandës kanë nga pesë pikë, ndërsa Izraeli mbyll renditjen me dy pikë.

Tani, gjithçka mund të vendoset në nëntor.

Më 14 nëntor, Kosova do ta presë Izraelin, në një ndeshje ku fitorja mund të jetë vendimtare për objektivin e saj. Katër ditë më vonë, “Dardanët” do të udhëtojnë për t’u përballur me Republikën e Irlandës.

Sipas rregullave të këtij edicioni, vetëm skuadra që përfundon e para në grup siguron promovimin direkt në Ligën A. Ndërkohë, vendi i dytë ofron një tjetër mundësi, përmes “play-off”-it të promovimit.

Pra, Kosova ende e ka fatin në duart e saj. Dy ndeshje, gjashtë pikë në lojë dhe një objektiv i madh në horizont: ngjitja në Ligën A të Ligës së Kombeve.

Një rënie e madhe në vlerën e tregut për dy prej mesfushorëve më të rëndësishëm të Barcelonës.

Gavi dhe Frenkie de Jong, që vetëm pak vite më parë konsideroheshin ndër lojtarët më të vlefshëm në pozicionet e tyre, kanë parë një zhvlerësim të ndjeshëm në treg.

Sipas të dhënave të Transfermarkt, të dy futbollistët aktualisht vlerësohen me nga 25 milionë euro secili. Shifra është shumë larg vlerës së tyre maksimale, pasi në periudhat e tyre më të mira, Gavi dhe De Jong arrinin një vlerë prej 90 milionë eurosh secili.

Kjo do të thotë se vlera e përbashkët e dy mesfushorëve ka pësuar një rënie spektakolare, nga 180 milionë euro në vetëm 50 milionë euro.

Një prej faktorëve kryesorë që ka ndikuar në këtë rënie janë dëmtimet dhe mungesa e vazhdimësisë. Sidomos në një treg ku vlera e futbollistëve lidhet ngushtë me paraqitjet, minutat e luajtura dhe formën fizike, mungesa në fushë mund të ketë një ndikim të madh.

Megjithatë, te Barcelona ende besojnë se kjo situatë mund të ndryshojë. Rikthimi i plotë në formë dhe një periudhë e qëndrueshme pa dëmtime mund t’u japë të dy lojtarëve mundësinë të rikthehen në nivelet e tyre më të larta.

Në fund, mbetet për t’u parë nëse Gavi dhe Frenkie de Jong do të arrijnë të rikthejnë jo vetëm formën në fushë, por edhe vlerën e tyre të humbur në treg.

Federata Turke e Futbollit (TFF) ka marrë vendimin për t’i dhënë fund bashkëpunimit me Vincenzo Montellan, pas një serie rezultatesh zhgënjyese të kombëtares turke.

Sipas mediumit të njohur turk “Milliyet”, drejtuesit e federatës kanë vendosur të ndërpresin kontratën me trajnerin italian, duke e konsideruar të nevojshëm një ndryshim në drejtimin e skuadrës.

Turqia ka kaluar një periudhë të vështirë në Ligën e Kombeve, ku ka regjistruar katër humbje radhazi. Disfata e fundit, 1-3 ndaj Italisë, ka shtuar edhe më shumë presionin mbi Montellan, i cili është kritikuar nga tifozët dhe analistët.

TFF vlerëson se kombëtarja ka nevojë për një qasje të re dhe për ndryshime të menjëhershme për t’i rikthyer skuadrës rezultatet pozitive.

Në ditët e ardhshme pritet të përmbyllen procedurat financiare për ndërprerjen e kontratës, ndërsa më pas federata turke pritet të zyrtarizojë trajnerin e ri të kombëtares.

Montella mori drejtimin e Turqisë në shtator të vitit 2023 dhe gjatë mandatit të tij pati edhe momente të rëndësishme. Italiani e udhëhoqi skuadrën deri në çerekfinale të Euro 2024 në Gjermani, duke lënë përshtypje të mira me paraqitjet e ekipit.

Megjithatë, forma e dobët dhe rezultatet e fundit kanë ndryshuar situatën, duke bërë që rrugëtimi i Montellas në stolin e Turqisë të marrë fund më herët nga sa ishte planifikuar.

Tashmë vëmendja është te pasuesi i italianit dhe te emri që do të marrë përsipër detyrën për ta rikthyer kombëtaren turke në rrugën e rezultateve pozitive.

Lionel Messi ka zhvilluar ndeshjen e fundit me fanellën e Argjentinës, duke i dhënë fund një kapitulli 21-vjeçar me kombëtaren që e shndërroi në një prej figurave më të mëdha të historisë së futbollit.

Në stadiumin Monumental të Buenos Airesit, përballë rreth 85 mijë tifozëve, Argjentina triumfoi 3-0 ndaj Beninit në një ndeshje miqësore, por vëmendja ishte e gjitha te kapiteni dhe numri 10.

Messi u largua nga kombëtarja me një rekord mbresëlënës: 208 paraqitje dhe 126 gola, ndërsa në vitet e tij me Argjentinën fitoi Kupën e Botës 2022 dhe dy herë Kupën e Amerikës.

Në përfundim të takimit, stadiumi u ngrit në këmbë për t’i dhënë lamtumirën legjendës. Bashkëlojtarët, stafi teknik, trajneri Lionel Scaloni dhe mijëra tifozë e rrethuan Messin në një moment të mbushur me emocione.

“Ka qenë një krenari e madhe të vesh këtë fanellë për më shumë se 20 vjet. Nuk kam pushuar kurrë së luftuari dhe nuk kam pushuar kurrë së dhëni më të mirën time. Do të doja shumë të kthehesha përgjithmonë, sepse të luash për ekipin kombëtar të Argjentinës është gjëja më e bukur që mund të të ndodhë”, u shpreh Messi para tifozëve.

Edhe në ndeshjen e tij të fundit, 39-vjeçari la gjurmën e tij. Argjentina kaloi në avantazh në minutën e 48-të, kur nga një goditje këndi e ekzekutuar nga Messi, Nicolás Otamendi realizoi me kokë.

Në minutën e 61-të, ishte sërish Messi protagonist, këtë herë duke asistuar për talentin e ri Nico Paz, i cili shënoi me të majtën. Dhjetë minuta më vonë, vetë Messi vulosi rezultatin 3-0 nga pika e bardhë.

Emocionet nisën që në minutat e para të takimit. Vetëm dhjetë minuta pas startit, gjyqtari ndali lojën për t’i dhënë mundësinë stadiumit të nderonte kapitenin argjentinas.

Për këtë sfidë të veçantë, Messi veshi një fanellë speciale të Argjentinës, me vija vertikale më të gjera, një diell të madh në dizajn dhe numrin e artë 10 në shpinë.

Më 31 gusht, Messi kishte njoftuar se do t’i jepte fund paraqitjeve të tij me kombëtaren, duke e mbyllur kështu një rrugëtim të jashtëzakonshëm që për vite me radhë ishte shoqëruar me pritshmëri, zhgënjime, triumfe dhe në fund me lavdinë e shumëpritur në Katar.

Pas ndeshjes, kapiteni argjentinas falënderoi bashkëlojtarët për gjithçka që kishin arritur së bashku dhe u bëri thirrje për unitet.

“Ne duhet të ndërtojmë një grup të fortë dhe të bashkuar, sepse ka njerëz që duan që ekipi kombëtar të dështojë dhe ne nuk duhet t’u japim atyre këtë kënaqësi”, tha Messi.

Por lamtumira e tij nuk nisi në fushën e Monumentalit. Përpara ndeshjes, Messi u nderua edhe me një doktoraturë nderi nga Universiteti i Buenos Airesit, një prej institucioneve më të rëndësishme publike të Argjentinës.

Vlerësimi iu dha në kompleksin stërvitor të kombëtares, në periferi të Ezeizës, për kontributin e tij të jashtëzakonshëm me fanellën e Argjentinës dhe ndikimin që ka pasur brenda dhe jashtë fushës.

Pas më shumë se dy dekadash, 208 ndeshjesh, 126 golash dhe trofesh historikë, Messi i ka thënë lamtumirën Argjentinës.

Një epokë u mbyll në Monumental. Por historia e numrit 10 do të mbetet përgjithmonë pjesë e futbollit argjentinas.

Vinicius Junior po përjeton një rënie të ndjeshme në vlerën e tij të tregut, sipas përditësimit të fundit të Transfermarkt.

Ylli i Real Madridit tani vlerësohet në 130 milionë euro, pasi ka humbur edhe 10 milionë euro në përditësimin e fundit. Rënia bëhet edhe më e madhe nëse krahasohet me kulmin e tij në vitin 2024, kur vlera e brazilianit kishte arritur në 200 milionë euro.

Në vetëm dy vite, Vinicius ka humbur kështu 70 milionë euro nga vlera e tregut, që përkthehet në një rënie prej 35 për qind.

Ky zhvillim vjen në një periudhë jo të lehtë për 26-vjeçarin, i cili nuk e ka nisur sezonin në nivelin e pritur sa i përket golave. Në tetë paraqitje, Vinicius ka shënuar vetëm një herë, duke regjistruar startin e tij më të dobët përpara portës që nga sezoni i parë me Real Madridin, në edicionin 2018/19.

Në fund të vitit 2024, braziliani kishte arritur vlerën maksimale prej 200 milionë eurosh, duke u barazuar me Erling Haaland si futbollisti më i shtrenjtë në treg.

Që atëherë, trendi ka qenë në rënie. Në përditësimin e qershorit të vitit 2026, Vinicius vlerësohej me 140 milionë euro, ndërsa tani vlera e tij ka zbritur në 130 milionë.

Megjithatë, pavarësisht kësaj rënieje, Vinicius vazhdon të jetë mes futbollistëve me vlerën më të lartë të tregut në botë.

Edhe statistikat e këtij sezoni kanë ndikuar në vlerësimin e tij. Braziliani ka shënuar vetëm një gol në tetë ndeshje dhe aktualisht realizon mesatarisht një gol çdo 652 minuta.

Për një lojtar të profilit të Vinicius Junior, këto shifra janë larg standardeve që ai ka vendosur në vitet e fundit, ndërsa forma e tij në javët e ardhshme mund të jetë vendimtare për rikthimin e vlerës së tij në treg.

Pau Cubarsi po shkruan një histori të veçantë me fanellën e Spanjës. Edhe pse vetëm 19 vjeç, mbrojtësi i Barcelonës tashmë është shndërruar në një prej lojtarëve të rëndësishëm të përfaqësueses dhe statistikat e tij në këtë moshë janë edhe më mbresëlënëse kur krahasohen me ato të Sergio Ramosit.

Cubarsi ka fituar besimin e trajnerëve si te Barcelona, ashtu edhe te Spanja, duke treguar një pjekuri që rrallë shihet te një futbollist në këtë moshë.

Një prej dëshmive më të forta për rëndësinë e tij është Botërori i fundit. Në moshën 19 vjeç e nëntë muaj, Cubarsi tashmë ka një titull të Kupës së Botës në CV dhe në atë turne luajti të gjitha 750 minutat, duke qenë titullar në çdo ndeshje.

Një rol kaq i madh në një kompeticion të tillë, në një moshë kaq të re, është jashtëzakonisht i rrallë dhe tregon besimin që Spanja ka te mbrojtësi katalanas.

Pas pushimit në ndeshjen e Ligës së Kombeve ndaj Republikës Çeke në Oviedo, Cubarsi u rikthye në formacionin titullar për përballjen me Kroacinë, duke luajtur në krahun e djathtë të mbrojtjes së bashku me Aymeric Laporte.

Me këtë paraqitje, talenti i Barcelonës arriti në 23 ndeshje me ekipin e parë të Spanjës. Një shifër që bëhet edhe më e veçantë kur vendoset përballë rekordit të një legjende si Sergio Ramos.

Në janar të vitit 2006, kur Ramos ishte 19 vjeç e nëntë muaj, ai kishte vetëm shtatë paraqitje me kombëtaren spanjolle, pak para pjesëmarrjes së tij në Botërorin e Gjermanisë.

Më pas, Ramos ndërtoi një karrierë të jashtëzakonshme, duke u shndërruar në një prej mbrojtësve më të rëndësishëm në historinë e Spanjës. Ai e mbylli aventurën me kombëtaren me 180 paraqitje, një rekord që dëshmon për ndikimin e tij të madh.

Cubarsi është ende në hapat e parë të karrierës, ndaj krahasimi me Ramosin duhet parë me kujdes. Megjithatë, numrat e tij në këtë moshë tregojnë qartë se ai po ecën me një ritëm të jashtëzakonshëm.

Kur Ramos kishte shtatë ndeshje me Spanjën, Cubarsi tashmë ka 23. Dhe nëse vazhdon të zhvillohet me të njëjtin ritëm, mbrojtësi i Barcelonës mund të jetë një prej figurave kryesore të gjeneratës së re të futbollit spanjoll.

Paris Saint-Germain është shumë pranë një vendimi të rëndësishëm për të ardhmen e stadiumit të klubit.

Pas disa vitesh diskutimesh, klubi francez pritet të përcaktojë në javët e ardhshme se ku do të luajë në të ardhmen. Në tavolinë janë dy skenarë: rinovimi dhe zgjerimi i Parc des Princes, ose largimi nga stadiumi historik dhe ndërtimi i një impianti të ri jashtë Parisit.

Sipas raportimeve të “Le Parisien”, procesi tashmë ka hyrë në fazën përfundimtare dhe PSG ka zhvilluar diskutime me tri qytete që janë ende në garë për të pritur stadiumin e ardhshëm.

Presidenti Nasser Al-Khelaifi prej vitesh ka kërkuar që PSG të marrë në pronësi Parc des Princes dhe ta transformojë atë në një kompleks modern, të denjë për një prej klubeve më të mëdha të Evropës.

Projekti është jashtëzakonisht ambicioz. Nëse zgjidhet qëndrimi në Parc des Princes, stadiumi mund të zgjerohet deri në rreth 70 mijë vende, ndërsa zona përreth do të transformohej në një hapësirë të madhe të dedikuar klubit.

Plani përfshin ambiente të reja administrative, një muze të PSG-së, dyqan zyrtar, hapësira sportive dhe një shesh të madh publik.

Por ky vizion ka edhe një kosto marramendëse. I gjithë projekti, duke përfshirë blerjen e stadiumit, zgjerimin dhe zhvillimin e zonës përreth, mund të arrijë në rreth 2 miliardë euro.

Për momentin, Bashkia e Parisit ka dhënë sinjale se diskutimet mund të ecin përpara, por ende nuk ka një marrëveshje përfundimtare.

PSG tani duhet të zgjedhë mes investimit gjigant në shtëpinë historike të klubit dhe një kapitulli të ri jashtë kryeqytetit.

Pas vitesh pasigurie, vendimi për stadiumin e ardhshëm të Paris Saint-Germain duket se është më pranë se kurrë.

Dardan Cena e ka përmbyllur aventurën në Kampionatin Botëror të xhudos në Baku të Azerbajxhanit, duke u ndalur në luftën e tretë, por me një paraqitje që i jep shumë arsye për të qenë krenar.

23-vjeçari kosovar, i cili garon në kategorinë deri në 73 kilogramë, e nisi ditën në mënyrën më të mirë të mundshme. Në duelin e parë, Cena mposhti irlandezin Joshua Green me uazari, duke siguruar kalimin në raundin tjetër.

Por sfida e dytë ishte edhe më e veçantë. Përballë tij ishte një prej emrave më të mëdhenj të kësaj kategorie, kampioni olimpik dhe botëror, Lasha Shavdatuashvili.

Cena zhvilloi një luftë të jashtëzakonshme ndaj gjeorgjianit, me duelin që zgjati më shumë se tetë minuta dhe u vendos në “Golden Score”. Pas një beteje të gjatë dhe intensive, kosovari arriti ta fitojë përballjen pasi Shavdatuashvili mori shidoun e tretë.

Eliminimi i një xhudisti me një CV të tillë ishte padyshim momenti kulmor i ditës për Cenën dhe një prej fitoreve më të rëndësishme të karrierës së tij.

Megjithatë, rrugëtimi i kosovarit në Baku përfundoi në luftën e tretë. Kundërshtari i tij ishte italiani Leonardo Valeriani, i cili e nisi më mirë përballjen dhe arriti të marrë avantazhin me uazari.

Cena u përpoq të reagonte dhe të gjente hapësirën për ta rikthyer duelin, por Valeriani arriti ta kontrollonte situatën dhe në fund e mbylli përballjen me një mbërthim për ippon.

Edhe pse nuk arriti të siguronte një tjetër fitore, paraqitja e Cenës në Baku mbetet një rezultat i rëndësishëm. Në një kategori me 50 garues, kosovari arriti të kalojë dy raunde dhe, mbi të gjitha, të eliminojë një nga xhudistët më të dekoruar të skenës ndërkombëtare.

Kampionati Botëror në Baku po zhvillohet nga 4 deri më 10 tetor, me pjesëmarrjen e 622 xhudistëve nga 93 shtete. Kategoria deri në 73 kilogramë ishte ndër më të fortat dhe më të ngjeshurat e këtij Botërori.

Cena largohet nga Baku me dy fitore, një triumf të madh ndaj një kampioni dhe një paraqitje që tregon se e ardhmja e tij në skenën e madhe të xhudos premton shumë.

E ardhmja e Cristiano Ronaldos me Kombëtaren e Portugalisë është vënë seriozisht në pikëpyetje pas përplasjes së fundit me përzgjedhësin Jorge Jesus.

Sipas gazetarit portugez Rui Santos, sulmuesi 41-vjeçar mund të mos rikthehet më te Portugalia për sa kohë që Jesus vazhdon të jetë në krye të përfaqësueses.

Përplasja mes tyre ndodhi gjatë grumbullimit të fundit, kur Ronaldo u largua nga ekipi në mes të pushimit ndërkombëtar. Shkak raportohet të ketë qenë vendimi i Jesusit për ta lënë yllin portugez jashtë formacionit në ndeshjen ndaj Norvegjisë.

Trajneri nuk u tërhoq nga vendimi i tij as pas përfundimit të takimit, duke theksuar se në Kombëtare të gjithë lojtarët duhet të trajtohen në mënyrë të barabartë dhe se askush nuk mund të ketë privilegje të veçanta.

Në ditët pas incidentit, situata mes dy palëve dukej se ishte qetësuar. Madje, Jorge Jesus e kishte konsideruar përplasjen si një çështje të kaluar dhe kishte lënë të hapur mundësinë e rikthimit të Ronaldos në grumbullimin e ardhshëm.

Megjithatë, gazetari Rui Santos sjell një version tjetër të situatës. Sipas tij, marrëdhënia mes Ronaldos dhe Jesusit është dëmtuar ndjeshëm dhe situata është shumë më serioze nga sa është paraqitur në publik.

Santos pretendon se Ronaldo nuk është i kënaqur me deklaratat e fundit të Jesusit në konferencën për shtyp dhe se raporti mes dy figurave kryesore të Portugalisë tashmë ka arritur në një pikë kritike.

Nëse këto pretendime rezultojnë të sakta, atëherë Ronaldo mund të mos rikthehet në Kombëtare për aq kohë sa Jorge Jesus qëndron në postin e përzgjedhësit.

Një zhvillim i tillë do të ishte një kthesë e madhe për Portugalinë, sidomos duke pasur parasysh peshën që Ronaldo ka pasur për vite me radhë në përfaqësuesen portugeze.