Category: SPORT

Vushtrria ka regjistruar fitoren e parë në këtë sezon të Albi Mall Superligës së Kosovës, duke e mposhtur Gjilanin me rezultat minimal 1:0 në ndeshjen e zhvilluar të shtunën pasdite në stadiumin “Zahir Pajaziti” në Podujevë.

Takimi i vlefshëm për xhiron e tetë të kampionatit u vendos nga një gol i sulmuesit Urim Statovci, i cili shënoi në minutën e 60-të, duke i siguruar skuadrës së tij tri pikë të rëndësishme.

Kjo fitore i jep Vushtrrisë një shtysë në garën për mbijetesë, ndonëse skuadra vazhdon të renditet në vendin e fundit në tabelë, me tri pikë të grumbulluara. Me këtë bilanc, ajo barazohet me Llapin, që mban pozitën e parafundit.

Në anën tjetër, Gjilani humbi mundësinë për të marrë pikë në këtë përballje dhe mbetet me 11 pikë, në mesin e tabelës së klasifikimit.

Baton Zabërgja po kalon një formë të shkëlqyer në kampionatin ukrainas. Sulmuesi shqiptar ka shënuar golin e gjashtë në pesë ndeshjet e fundit me Kharkivin, duke konfirmuar momentin pozitiv që po kalon në Premier Ligën e Ukrainës.

Zabërgja ishte vendimtar edhe të shtunën pasdite, kur me golin e shënuar në minutën e 57-të i siguroi skuadrës së tij fitoren dhe tri pikët e plota. Megjithatë, epërsia nuk zgjati shumë, pasi Kharkivi pësoi gol vetëm tri minuta më vonë, për rezultatin 2:1, i cili mbeti i pandryshuar deri në fund të takimit.

Serinë e golave, Zabërgja e nisi më 31 gusht, ndërsa krahas gjashtë golave në pesë ndeshjet e fundit, ai ka regjistruar edhe një asistim në kampionatin ukrainas.

Futbollisti qëndroi në fushë deri në minutën e 63-të, ndërsa bashkëkombësi i tij, Ermir Rashica, u aktivizua në minutën e 84-të.

Zabërgja së fundmi ishte pjesë edhe e Përfaqësueses së Kosovës, me të cilën luajti në ndeshjen e Ligës së Kombeve ndaj Irlandës, si dhe në dy përballjet kundër Austrisë.

Takimi i së shtunës i takoi xhiros së tetë të kampionatit elitar ukrainas. Kharkivi ka grumbulluar 15 pikë, ndonëse ka edhe një ndeshje më pak të zhvilluar.

Atlético Madridi ka siguruar një emër të njohur nga bota e basketbollit. Shai Gilgeous-Alexander, një nga yjet më të mëdhenj të NBA-së, i është bashkuar grupit të aksionarëve të klubit madrilen, duke zgjeruar kështu lidhjet mes futbollit dhe basketbollit në nivelin më të lartë sportiv.

Basketbollisti kanadez, i cili luan për Oklahoma City Thunder, ka përjetuar një periudhë të jashtëzakonshme në karrierën e tij. Ai është shpallur lojtari më i vlefshëm i NBA-së (MVP) në dy sezonet e fundit, ndërsa sezonin e kaluar arriti të fitojë edhe titullin kampion me skuadrën e tij. Përveç këtyre sukseseve, ai ka qenë katër herë pjesë e ndeshjes prestigjioze “NBA All-Star”.

Interesi i Gilgeous-Alexander për klubin spanjoll vjen në një moment kur emri i tij është ndër më të spikaturit në basketbollin botëror. I rritur në Toronto, ai e nisi rrugëtimin drejt NBA-së pas një sezoni në Universitetin e Kentucky-t, përpara se të përzgjidhej nga Los Angeles Clippers në draftin e vitit 2018. Një vit më vonë, ai kaloi te Oklahoma City Thunder, ku ndërtoi profilin e një prej lojtarëve më vendimtarë të ligës.

Në mars të vitit 2026, kanadezi shkroi historinë e NBA-së, duke shënuar të paktën 20 pikë në 127 ndeshje radhazi. Me këtë arritje, ai la pas legjendën Wilt Chamberlain, i cili mbante rekordin e mëparshëm me 126 ndeshje të tilla.

Pas konfirmimit të investimit të tij te Atlético Madridi, basketbollisti shprehu kënaqësinë për këtë hap të ri.

“Jam shumë i lumtur që zyrtarisht i jam bashkuar grupit të aksionarëve të Atlético Madridit. Ky është një klub me një histori të pasur në majat e futbollit evropian dhe jam mirënjohës për mundësinë që të kontribuoj në të ardhmen e tij”, u shpreh Gilgeous-Alexander.

Ndërkohë, në fushën e lojës, Atlético Madridi vijon përgatitjet për ndeshjen e radhës në La Liga. Skuadra e drejtuar nga Diego Simeone do të përballet të shtunën në transfertë me Deportivo Alavés, me synimin për të vazhduar ecurinë pozitive në kampionat.

Madrilenët kanë grumbulluar 16 pikë në shtatë ndeshjet e para, duke e nisur sezonin me objektiva ambicioze për të qenë protagonistë në garën për titull

Një raportim i mediave spanjolle të enjten pretendoi se ish-mbrojtësi i Real Madridit, Dani Carvajal, ka vendosur një kusht të pazakontë për të nënshkruar me Getafen.

Carvajal mund të bashkohet me çdo klub pa qenë i kufizuar nga afatet e merkatos, pasi është lojtar i lirë pas përfundimit të kontratës me Real Madridin në fund të sezonit të kaluar.

Sipas radios Marca, futbollisti është i gatshëm të pranojë një ulje të pagës për të veshur fanellën e Getafes, por vetëm nëse kontrata përfshin një klauzolë të panegociueshme.

Kjo klauzolë lidhet me të ardhmen e tij dhe parashikon që, nëse gjatë merkatos së dimrit merr një ofertë nga një klub tjetër dhe dëshiron ta pranojë atë, të ketë të drejtën të largohet nga Getafe.

Me fjalë të tjera, Carvajal do të ishte i gatshëm të nënshkruante një marrëveshje që do ta lidhte me Getafen vetëm për tre muaj, deri në hapjen e afatit kalimtar të dimrit, kur do të mund të shqyrtonte mundësi të tjera për të ardhmen e tij.

Megjithatë, Getafe nuk duket e interesuar për një marrëveshje të tillë.

I njëjti burim raporton se kjo kërkesë po e thellon edhe më shumë hendekun mes dy palëve, duke e bërë gjithnjë e më të vështirë arritjen e një marrëveshjeje.

Max Verstappen me Red Bull fitoi sot garën sprint të zhvilluar në pistën qytetase të Singaporit.

Gara nisi me 30 minuta vonesë për shkak të shiut dhe pistës së lagur, por në fund piloti holandez ia doli të triumfojë, duke regjistruar suksesin e parë në këtë pistë.

Verstappen përfitoi nga gabimi i George Russell me Mercedesin, i cili u përplas në fund të xhiros së parë, kur ishte në krye të garës. Kjo tërheqje, së bashku me vendin e katërt të Kimi Antonellit me makinën tjetër Mercedes, e afron edhe më shumë pilotin italian me titullin kampion për pilotë.

Pas këtij rezultati, Antonelli krijon një epërsi prej 89 pikësh në renditjen e përgjithshme.

Në vendin e dytë u rendit Lewis Hamilton me Ferrari, ndërsa në shkallën e tretë të podiumit u ngjit shoku i tij i skuadrës, Charles Leclerc.

Ndërkohë, dy makinat McLaren u përplasën mes tyre në xhiron e fundit, teksa pilotët po përpiqeshin të parakalonin Leclerc, i cili po përballej me probleme me gomat.

Albi Mall Superliga e Kosovës vazhdon sot (e shtunë) me dy përballje në kuadër të xhiros së tetë, ku Vushtrria pret Gjilanin, ndërsa Drenica përballet me Feronikeli ’74.

Pas dy ndeshjeve të së premtes, ku u përballën Llapi me Ballkanin dhe Drita me Malishevën, kampionati kosovar vazhdon sot me dy duele të tjera.

Ndeshja e parë zhvillohet nga ora 14:00, ku Vushtrria do të jetë nikoqire e Gjilanit në stadiumin “Zahir Pajaziti” në Podujevë. Të dyja skuadrat synojnë të marrin pikë të rëndësishme për të përmirësuar pozitat e tyre në tabelën e klasifikimit.

Ndërkohë, vëmendja do të zhvendoset në Skenderaj, ku nga ora 18:00 Drenica përballet me Feronikeli ’74 në stadiumin “Bajram Aliu”. Kjo përballje pritet të jetë e rëndësishme për të dyja ekipet, të cilat synojnë të shfrytëzojnë këtë xhiro për të avancuar në kampionat.

Xhiroja e tetë e Albi Mall Superligës do të përmbyllet të dielën me ndeshjen mes Prishtinës dhe Dukagjinit, e cila do të zhvillohet nga ora 18:00 në Kampin Nacional në Hajvali.

Piloti spanjoll i Ducati, Marc Marquez, triumfoi të shtunën paradite në garën sprint të zhvilluar në Indonezi, duke marrë edhe kreun e renditjes botërore në MotoGP, me 3 pikë më shumë se ndjekësi i tij më i afërt.

Një fitore që nuk ishte aspak e lehtë për spanjollin, i cili fillimisht përfitoi nga një problem me gomat në motorin e bashkatdhetarit të tij, Jorge Martin, që garon me Aprilia. Më pas, ky i fundit bëri edhe një gabim gjatë duelit me Marquez, duke e mbyllur garën në vendin e katërt.

Nga gabimi i Jorge Martin, aktualisht i dyti në renditjen botërore, përfituan edhe japonezi Ai Ogura, me Trackhouse, dhe italiani Fabio Di Giannantonio, me VR46, të cilët u renditën përkatësisht në vendin e dytë dhe të tretë.

Një garë për t’u harruar kjo për italianin Marco Bezzecchi, me Aprilia, i cili u rrëzua që në kthesën e parë pas një kontakti me Raul Fernandez.

Të dielën në mëngjes do të zhvillohet gara e Çmimit të Madh të Indonezisë në MotoGP.

Ballkani ka shënuar fitore të rëndësishme në udhëtim ndaj Llapit, duke triumfuar me rezultat 1-0 në ndeshjen e vlefshme për javën e tetë të Albi Mall Superligës së Kosovës.

Skuadra e drejtuar nga Sami Sermaxhaj arkëtoi tri pikë të rëndësishme në stadiumin “Zahir Pajaziti”, duke mposhtur ekipin e Tahir Batatinës në ndeshjen e parë pas pushimit trejavor për shkak të angazhimeve të kombëtareve.

Pjesa e parë u karakterizua me lojë të baraspeshuar nga të dyja skuadrat, por pa raste të shumta shënimi, me ç’rast ekipet shkuan në pushim me rezultat të bardhë, 0-0.

Në pjesën e dytë, ritmi i lojës u rrit dhe të dyja skuadrat krijuan më shumë mundësi për të shënuar. Megjithatë, ishin mysafirët nga Suhareka ata që arritën ta gjenin rrjetën.

Goli vendimtar erdhi në minutën e 60-të, kur Albin Berisha shënoi për rezultatin 0-1, duke i dhënë epërsinë Ballkanit. Pavarësisht përpjekjeve të Llapit për të reaguar deri në fund të takimit, rezultati nuk ndryshoi dhe Ballkani u largua nga Podujeva me pikët e plota.

Me këtë fitore, Ballkani ngjitet në pozitën e tretë në tabelë me 13 pikë, ndërsa Llapi mbetet në vendin e nëntë, me vetëm tri pikë të grumbulluara.

Në xhiron e ardhshme, Ballkani do të përballet me Dritën në shtëpi, kurse Llapi do të luajë në udhëtim ndaj Feronikelit ’74.