Category: Sport

Florent Hadërgjonaj ka kaluar një mbrëmje të veçantë në futbollin turk, duke qenë protagonisti kryesor i Alanyasporit në ndeshjen e Kupës së Turqisë ndaj Karagumrukut.

Mbrojtësi i Kombëtares së Kosovës realizoi dy gola në barazimin 2:2, duke konfirmuar formën e tij të mirë dhe rolin e rëndësishëm që ka në skuadrën e tij. Hadërgjonaj hapi serinë e golave në minutën e 16-të, ndërsa golin e dytë e shënoi në minutën e 74-t nga pika e bardhë e penalltisë.

Karagumruku reagoi dy herë, me Fofanan që barazoi rezultatin në minutën e 29-të, ndërsa në minutën e 58-të realizoi edhe golin e dytë, gjithashtu nga penalltia.

Hadërgjonaj u aktivizua si titullar dhe qëndroi në fushë gjatë gjithë ndeshjes, ndërsa nga minuta e parë luajti edhe Fidan Aliti. Ky i fundit u ndëshkua me karton të verdhë në fund të pjesës së parë.

Pas këtij barazimi, Alanyaspor kryeson Grupin A me katër pikë pas dy xhirove të zhvilluara, ndërsa Karagumruk renditet në vendin e tretë me dy pikë në grupin me tetë skuadra.

Paraqitja e Hadërgjonajt konfirmon edhe një herë rëndësinë e tij si për klubin ashtu edhe për Kombëtaren e Kosovës.

ProCredit Superliga e Kosovës në basketboll vazhdon me ritëm të lartë edhe gjatë mesjavës, ku tifozët do të kenë mundësinë të ndjekin disa përballje mjaft interesante në kuadër të javës së 15-të të kampionatit.

Programi i së mërkurës ofron dy ndeshje me rëndësi të veçantë. Bora do të presë Rahoveci 029 në një duel që vjen vetëm pak ditë pas përballjes së tyre në çerekfinalen e Kupës së Kosovës. Prishtinasit hyjnë në këtë takim të motivuar pas triumfit të madh ndaj Bashkimit në Prizren, ndërsa rahovecasit kërkojnë rikthimin te fitoret pas humbjes nga Golden Eagle Ylli. Aktualisht, Bora ka gjashtë fitore dhe tetë humbje, ndërsa Rahoveci 029 numëron pesë fitore dhe nëntë humbje.

Në ndeshjen tjetër të së mërkurës, Vëllaznimi do të përballet me Bashkimin. Kuqezinjtë vijnë pas një fitoreje të rëndësishme ndaj GO+ Pejës dhe synojnë vazhdimësinë, ndërsa prizrenasit kërkojnë të reagojnë pas rezultateve jo të dëshiruara. Vëllaznimi ka pesë fitore dhe nëntë humbje, ndërsa Bashkimi nëntë fitore dhe pesë humbje.

Vëmendja kryesore e javës do të jetë të enjten në Mitrovicë, ku Trepça do të përballet me GO+ Pejën në palestrën “Minatori”. Ky duel konsiderohet si derbi i xhiros, duke pasur parasysh historinë e rivalitetit dhe pozicionin e skuadrave në tabelë. Trepça kryeson renditjen me 11 fitore dhe tri humbje, ndërsa Peja mban vendin e tretë me tetë fitore dhe gjashtë humbje.

Një tjetër përballje interesante do të zhvillohet po të enjten, ku Golden Eagle Ylli do të ndeshet me Sigal Prishtinën. Therandasit janë në formë të mirë me dy fitore radhazi në vitin 2026, ndërsa prishtinasit synojnë pikë të rëndësishme për t’u afruar me kreun e tabelës. Pas 14 xhirove, Ylli ka pesë fitore dhe nëntë humbje, ndërsa Sigal Prishtina shtatë fitore dhe shtatë humbje.

Xabi Alonso ka reaguar për herë të parë pas ndarjes së tij me Real Madridin, duke i dhënë fund heshtjes vetëm një ditë pasi u shkarkua nga posti i trajnerit të ekipit të parë.

Tekniku spanjoll, i cili qëndroi në krye të madrilenëve për vetëm gjashtë muaj, zgjodhi rrjetet sociale për t’u drejtuar tifozëve, duke reflektuar mbi një periudhë që, sipas tij, nuk përfundoi ashtu siç ishte planifikuar.

Në një postim në Instagram, Alonso shprehu mirënjohje për klubin, lojtarët dhe tifozët, duke theksuar se drejtimi i Real Madridit ishte një përgjegjësi e madhe dhe një sfidë e përditshme. Ai theksoi se largohet me ndërgjegje të pastër, duke nënvizuar se ka dhënë maksimumin gjatë qëndrimit të tij në “Santiago Bernabeu”.

Alonso u emërua trajner i Real Madridit në fillim të këtij sezoni, pas suksesit të tij me Bayer Leverkusen. Gjatë 28 ndeshjeve në krye të skuadrës, ai regjistroi 20 fitore, tri barazime dhe pesë humbje – një bilanc pozitiv, por që nuk mjaftoi për të qetësuar pritshmëritë e larta të klubit.

Diferenca prej katër pikësh nga Barcelona në La Liga, së bashku me paraqitjet e paqëndrueshme në Ligën e Kampionëve, ndikuan në vendimin e drejtuesve për një ndarje të parakohshme.

Pas largimit të Alonsos, Real Madridi ka emëruar Alvaro Arbeloan si trajner të ri, duke i besuar drejtimin e skuadrës ish-trajnerit të Real Castilla, i cili më parë garonte në ligën e tretë spanjolle.

Jurgen Klopp ka reaguar ndaj spekulimeve që e lidhnin atë me postin e trajnerit të Real Madridit, pas ndarjes së klubit madrilen me Xabi Alonson. Drejtori i futbollit global te Red Bull GmbH ka qenë i qartë se këto zëra nuk kanë asnjë bazë reale.

Ish-trajneri i Liverpoolit ka shprehur habinë për mënyrën se si u zhvilluan ngjarjet në Madrid, duke vënë në pah presionin e madh që ekziston në klubin spanjoll dhe mungesën e kohës për ndërtim afatgjatë.

Sipas Kloppit, fakti që një trajner si Xabi Alonso, i cili kishte lënë përshtypje shumë pozitive me Bayer Leverkusen gjatë dy viteve të fundit, u largua vetëm gjashtë muaj pas marrjes së detyrës, tregon qartë klimën aktuale në “Santiago Bernabeu”.

Ai theksoi se pritshmëritë te Real Madridi janë në një nivel ekstrem dhe se vendimet shpesh merren nën ndikimin e presionit të menjëhershëm, sidomos pas rezultateve negative, si humbja në finalen e Kupës ndaj Barcelonës.

Klopp gjithashtu bëri të ditur se emri i tij u përmend pa asnjë arsye konkrete dhe se ai nuk ka pasur asnjë kontakt apo interes lidhur me këtë çështje. Ai pranoi se ishte i befasuar nga situata, duke shtuar me humor se disa mesazheve u ishte përgjigjur vetëm me emoji.

Me këtë reagim, Klopp i ka dhënë fund zërave për një rikthim të mundshëm në pankinë, të paktën në të ardhmen e afërt.

Ndarja e papritur e Real Madridit me trajnerin Xabi Alonso ka shkaktuar befasi brenda dhomës së zhveshjes, pasi shumica e lojtarëve e mësuan vendimin përmes njoftimit zyrtar të klubit të publikuar të hënën pasdite.

Menjëherë pas lajmit, Kylian Mbappé ishte futbollisti i parë që reagoi publikisht, duke i uruar sukses trajnerit spanjoll në rrugëtimin e tij të ardhshëm. Pas tij, edhe disa lojtarë të tjerë të skuadrës shprehën falënderime dhe mesazhe lamtumire, përfshirë Arda Güler, Rodrygo Goes, Raúl Asencio, Federico Valverde, Fran García, Antonio Rüdiger dhe Álvaro Carreras.

Kapiteni Dani Carvajal zgjodhi një reagim të shkurtër, duke shkruar “Faleminderit për gjithçka, shef”, ndërsa mesazhe më emocionale u panë nga lojtarë si Dean Huijsen dhe David Alaba.

Megjithatë, jo e gjithë skuadra ka reaguar publikisht. Deri në orët e vona të mbrëmjes dhe gjatë mëngjesit të sotëm, shtatë lojtarë që aktualisht janë pjesë e Real Madridit nuk kanë publikuar asnjë mesazh lidhur me largimin e Alonsos.

Në mesin e tyre janë Vinícius Jr., Éder Militão, Trent Alexander-Arnold, Ferland Mendy, Jude Bellingham, Brahim Díaz, i cili aktualisht ndodhet me Marokun në Kupën e Kombeve të Afrikës, si dhe Franco Mastantuono.

Edhe Endrick nuk ka reaguar, por sulmuesi brazilian ndodhet i huazuar te Olympique Lyonnais dhe nuk është më nën drejtimin e trajnerit spanjoll.

Kujtojmë se largimi i Xabi Alonsos nga posti i trajnerit u raportua pas tensioneve me disa lojtarë kyç të skuadrës.

Futbolli kosovar ka marrë një tjetër lajm të rëndësishëm, pasi mesfushori i ri Aron Babaj ka zyrtarizuar kalimin te gjiganti italian, AC Milan.

16-vjeçari, i cili deri tani ishte pjesë e klubit Prishtina e Re, ka bërë një hap të madh në karrierën e tij duke kaluar nga Superliga e Kosovës në Serie A, për t’u bashkuar me një nga klubet më të mëdha të futbollit evropian.

Milani ka konfirmuar transferimin përmes kanaleve zyrtare, duke bërë të ditur se Babaj do të jetë pjesë e projektit afatgjatë të klubit për zhvillimin e talenteve të rinj, të njohur si “Projekti i së Ardhmes së Milanit”.

Mesfushori i lindur në vitin 2009 konsiderohet një nga talentet më premtuese të brezit të tij dhe aktualisht është pjesë e Kombëtares U-17 të Kosovës, ku ka treguar paraqitje të qëndrueshme.

Kalimi te Milani përbën një arritje të madhe jo vetëm për Babajn, por edhe për futbollin kosovar, duke dëshmuar se talentet vendore po gjejnë gjithnjë e më shumë hapësirë në skenën elitare evropiane.

Aron Babaj është gjithashtu djali i ish-futbollistit të njohur kosovar, Shpëtim Babaj, duke vazhduar kështu traditën familjare në futboll.

Alvaro Arbeloa ka filluar zyrtarisht punën si trajner i Real Madridit, duke drejtuar stërvitjen e parë me skuadrën pas marrjes së detyrës nga Xabi Alonso, i cili u largua nga posti të hënën pasdite.

Ekipi madrilen zhvilloi seancën stërvitore të së martës në kompleksin Real Madrid City, në kuadër të përgatitjeve për ndeshjen e fazës së 1/8-ave të Kupës së Mbretit, ku do të përballet me Albaceten në stadiumin “Carlos Belmonte”.

Seanca nisi me ushtrime fizike dhe nxehje të drejtuara nga trajneri atletik Antonio Pintus, përpara se lojtarët të kalonin në punë me topin. Grupi u angazhua në ushtrime rondo, skema të lojës së kombinuar dhe qarkullim të shpejtë të topit, të shoqëruara me gjuajtje drejt portës.

Në pjesën përmbyllëse të stërvitjes, Arbeloa organizoi lojëra në grupe të vogla, duke testuar intensitetin dhe reagimin e futbollistëve.

Ndërkohë, disa lojtarë të rëndësishëm si Antonio Rüdiger, Ferland Mendy, Trent Alexander-Arnold, Rodrygo Goes dhe Kylian Mbappé u stërvitën veçmas në ambiente të mbyllura, ndërsa Éder Militão vijon procesin e rikuperimit nga lëndimi.

Real Madridi synon të nisë me këmbë të mbarë aventurën në Kupën e Mbretit nën drejtimin e trajnerit të ri.

Mbrojtësi i Kombëtares së Kosovës, Ilir Krasniqi, do të vazhdojë karrierën e tij në elitën e futbollit ukrainas, pasi ka arritur marrëveshje me Polissya Zhytomyr.

Futbollisti kosovar vjen te Polissya nga Kolos Kovalivka, ekip ku kishte krijuar një stabilitet të dukshëm në vitet e fundit. Drejtuesit e klubit të Zhytomyr e kanë parë Krasniqin si një përforcim të rëndësishëm për repartin defensiv, duke i besuar një kontratë afatmesme.

Sipas marrëveshjes së arritur mes palëve, 24-vjeçari ka firmosur kontratë 3 vjeçare e gjysmë dhe do të jetë pjesë e skuadrës me fanellën me numrin 16.

Kalimi te Polissya shihet si një hap i rëndësishëm në karrierën e Krasniqit, i cili tashmë është i njohur me intensitetin dhe kërkesat e Premier League ukrainase, çka pritet ta ndihmojë të integrohet shpejt në ambientin e ri.

Përvoja ndërkombëtare është një tjetër plus për klubin ukrainas, pasi Krasniqi ka zhvilluar 17 paraqitje me Kombëtaren e Kosovës, duke sjellë siguri dhe pjekuri në fazën mbrojtëse të ekipit.

Polissya, që këtë sezon synon objektiva ambicioze, vazhdon kështu të forcojë skuadrën me lojtarë me eksperiencë në nivel të lartë.

Liga më e fortë e basketbollit në botë, NBA, ka vazhduar me ndeshjet e radhës mëngjesin e stoëm, ku si gjithmonë pati spektakël dhe befasi.

Los Angeles Lakers kanë pësuar humbjen e tretë radhazi, pasi humben kësaj radhe nga Sacramento Kings me rezultat 124-112.

DeMar DeRozan ishte ylli I mbrëmjes pasi udhëhoqi skuadrën e tijë drejt fitores me 32 pikë e gjashtë asistime, derisa Malik Monks shtojë 26 sosh.

Nga ana tjetër, Luka Doncic ishte fantastik me 42 pikë, tetë asitime dhe shtatë kërcime, derisa Lebron James po ashtu shënoj 22 sosh, por që nuk mjaftuan për fitore.

Pas kesaj humbje, Lakers kanë rënë në poziten e pestë në Konferencën e Perëndimit, derisa Kings renditen në vendin e parafundit.

Boston Celtics po ashtu ka marrur humbjen e dytë rresht, pasi humbi me rezultat të ngushtë nga Indiana Pacers me rezultat 98-96.

Në këtë fitore u dalluan Paskal Siakam me 21 pikë, tetë kërcime e gjashtë asistme dhe Jay Huff me 20 pikë.

Te skuadra humbëse më efikasi ishte Payton Pritchard me 23 pikë e tetë asistime.

Pacers renidten në vendin e fundit në Konferencën e Lindjes, derisa Celtics në poziten e tretë.

Dallas Mavericks është këndellur me fitore pasi i’a shkaktoj humbjen e tretë radhazi Brooklyn Nets me rezultat 113-105.

Cooper Flagg ishte fantastik me 27 pikë, pesë kërcime e po aq asistime derisa Naji Marshall shtoj 22 pikë e nëntë assitime për në fitore.

Nga ana tjetër, Michael PorteR Jr. realizoi 28 pikë e nëntë kërcime por nuk mjaftuan për fitore.

Maverciks renditen në vendin e 12 në Konferencën e Perëndimt, derisa Nets në poziten e 13 në Lindje.

Investimi i superyllit të NBA-së, LeBron James, në Liverpool Football Club ka rezultuar një nga vendimet më të zgjuara financiare në botën e sportit.

Në vitin 2011, James bleu 2 për qind të aksioneve të Liverpoolit për rreth 5.6 milionë euro, në një kohë kur klubi vlerësohej nga Forbes rreth 473 milionë euro. Në atë periudhë, investimi shihej si një pjesëmarrje modeste, por me potencial të madh afatgjatë.

Sot, situata ka ndryshuar ndjeshëm. Vlera e Liverpoolit arrin rreth 4.1 miliardë euro, çka do të thotë se 2 për qind e aksioneve vlerësohen rreth 82.3 milionë euro, një rritje prej afërsisht 1,400 për qind krahasuar me investimin fillestar të basketbollistit amerikan.

Në vitin 2021, LeBron James vendosi të shndërrojë aksionet e tij direkte në Liverpool në një pjesëmarrje prej 1 për qind në Fenway Sports Group (FSG), kompania që zotëron dhe menaxhon klubin anglez. FSG ka në pronësi edhe klube të tjera të njohura si Boston Red Sox dhe Pittsburgh Penguins, duke e zgjeruar më tej ndikimin e investimit të James në industrinë sportive.

Sipas Forbes, Fenway Sports Group vlerësohet në rreth 11.1 miliardë euro në vitin 2024, çka nënkupton se aksionet e LeBron James vlejnë rreth 111 milionë euro, gati njëzetfish më shumë se shuma e investuar fillimisht.

Rritja e jashtëzakonshme e vlerës lidhet me sukseset sportive të Liverpoolit, përfshirë fitimin e titullit të 20-të kampion në Angli, performancën e fortë financiare dhe zgjerimin e markës në tregjet globale, veçanërisht në Azi dhe Amerikën e Veriut.

Ky investim konfirmon edhe një herë LeBron James jo vetëm si një ikonë sportive, por edhe si një strateg të suksesshëm biznesi.