Category: Sport

Mediat spanjolle raportojnë për një konflikt të brendshëm te Real Madrid, i lidhur me gjendjen shëndetësore të sulmuesit francez Kylian Mbappé.

Sulmuesi aktualisht po përballet me një dëmtim në gjurin e majtë, ndërsa bashkëpunëtorët e tij më të afërt thuhet se janë të shqetësuar për mundësinë e rikthimit të parakohshëm në fushë. Sipas raportimeve të GOAL, nga kampi i lojtarit pretendohet se situata mjekësore është më serioze sesa ajo që është paraqitur zyrtarisht nga klubi.

Gazetari Antón Meana i Cadena SER ka deklaruar se “ligamenti i kryqëzuar posterior i majtë i lojtarit është në kufirin e qëndrueshmërisë”, një diagnozë që konsiderohet shumë më e rëndë sesa “shtrembërimi” i njoftuar nga klubi madrilen.

Në deklaratën zyrtare të publikuar të martën, Real Madrid bëri të ditur:

“Pas testeve të kryera te lojtari ynë Kylian Mbappé nga specialistë francezë, nën mbikëqyrjen e shërbimit mjekësor të Real Madridit, është konfirmuar diagnoza e një shtrembërimi të gjurit të majtë dhe përshtatshmëria e trajtimit konservativ që po kryhet. Presim zhvillime të mëtejshme.”

Megjithatë, sipas Meana-s, dëmtimi është “vërtet i rëndësishëm”, çka ka rritur tensionet mes kampit të lojtarit dhe klubit. Shqetësimi kryesor lidhet me FIFA World Cup 2026, që afrohet së shpejti.

Me rreth 100 ditë të mbetura deri në fillimin e turneut, përfaqësuesit e Mbappé besojnë se ai nuk mund të rrezikojë asnjë ditë rehabilitimi të plotë, në mënyrë që të jetë në formën optimale për Kupën e Botës.

Gjasat për Endrick për një vend në Kupën e Botës me Brazilin shtohen,duke marrë parasysh edhe paraqitjet e bëra për Lyon në të gjitha garat.

Një rol në përfshirjen e Endrick mund të jetë edhe lëndimi i Rodrygos,i cili sipas të gjitha gjasave ka përfunduar sezonin dhe se pjesëmarrja e anësorit në botëror është e pamundur.

Përndryshe Rodrygo ishte një nga kandidatët për të qenë pjesë e Selecaos në SHBA,Meksikë dhe Kanada,pavarësisht që nuk pati edhe një sezon të mirë me Real Madridin.

Megjithatë situata tani ka dalur në favor të Endrick,i cili me golat e tij me Lyon po bën paraqitje mjaft të shkëlqyera në elitën e futbollit francez.

Kujtojmë që Endick është i huazuar deri në fund të sezonit tek Olympique Lyon nga Real Madrid,teksa ka realizuar 5 gola e bëri 4 asistime në 11 ndeshje të zhvilluara.

E ardhmja e Igor Tudor në stolin e Tottenham në pikëpyetje pas humbjeve të shpejta

Trajneri kroat, Igor Tudor, është emëruar për të zëvendësuar Thomas Frank në pankinën e Tottenham, me misionin për të sjellë stabilitet dhe përmirësim të rezultateve në Ligën Premier. Megjithatë, vetëm disa ditë pas emërimit të tij, e ardhmja e Tudorit duket e pasigurt, pasi fillimi i tij ka qenë i zhgënjyeshëm.

Debutimi i Igor Tudor si trajner i Tottenham ka qenë i pafavorshëm, pasi ekipi pësoi një humbje të thellë ndaj Arsenalit, ku shfaqen probleme serioze në mbrojtje dhe mungesë intensiteti. Pas kësaj, në ndeshjen e dytë, Tottenham humbi sërish, këtë herë përballë Fulham, duke thelluar shqetësimet për performancën e skuadrës.

Me kalimin e ditëve, presioni mbi Tudor është shtuar. Tifozët dhe mediat kanë filluar të shprehin pakënaqësinë, ndërsa drejtuesit e klubit londinez po monitorojnë me shqetësim situatën. Tottenham, përkundër pritshmërive të mëdha para fillimit të sezonit, aktualisht gjendet në pjesën e poshtme të tabelës në Ligën Premier.

Pas humbjes së fundit, Igor Tudor nuk i kurseu kritikat për skuadrën e tij. Ai e shprehu hapur pakënaqësinë për paraqitjen e lojtarëve dhe kritikoi disa vendime arbitrale. Sipas tij, skuadra duhet të përmirësojë shumë më tepër sesa skemat taktike. Ai theksoi se është e nevojshme që të rritet agresiviteti në duele, ritmi konkurrues dhe qëndrimi i lojtarëve në fushë.

Në zyrat e Tottenham janë duke u shqyrtuar të gjitha opsionet për të ardhmen e trajnerit, edhe pse Tudor ka marrë postin vetëm para disa ditësh. Një tjetër humbje mund të përshpejtojë një vendim të shpejtë nga drejtuesit, të cilët janë të vetëdijshëm për kalendarin e vështirë të Ligës Premier dhe kërkojnë rezultate të shpejta.

Megjithatë, Igor Tudor është optimist dhe ka kërkuar kohë për të implementuar idetë e tij dhe për të stabilizuar skuadrën. Nëse rezultatet nuk përmirësohen, mundësia që aventura e tij në Londër të përfundojë kaq shpejt sa nisi, është e mundur.

Për momentin, të ardhmen e Igor Tudor mbetet e pasigurt dhe vetëm koha do të tregojë nëse ai do të ketë mundësinë të rregullojë situatën në Tottenham, apo do të duhet të largohet më shpejt se që e kishim pritur.

Janë mësuar tre gjysmëfinalistët e parë të Kupa e Kosovës, pas zhvillimit të ndeshjeve çerekfinale, ku fitore siguruan FC Ferizaj, KF Dukagjini dhe FC Ballkani.

Ferizaj triumfoi 2-0 në shtëpi ndaj KF Vushtrria, në një sfidë të kujdesshme gjatë pjesës së parë. Epërsia erdhi në minutën e 44-t pas një rivënie këndore, ku një ndërhyrje e dobët e portierit mysafir përfundoi me autogol. Në pjesën e dytë, vendasit siguruan kualifikimin me golin e Erjon Sadriut nga penalltia në minutën e 76-të.

Bindës ishte edhe Dukagjini, që mposhti 3-0 KF Feronikeli 74. Dienit Isufi zhbllokoi rezultatin në minutën e 16-të, ndërsa Altin Mërlaku dyfishoi shifrat në të 38-ën me një goditje të bukur nga distanca. Në fund, Mërgim Pefqeli vulosi fitoren me golin e tretë, duke konfirmuar dominimin e plotë të skuadrës vendase.

Ndërkohë, Ballkani fitoi 2-1 ndaj SC Gjilani. Therandasit e nisën fuqishëm takimin, duke shënuar dy herë në pjesën e parë me Bleart Tolajn (11’) dhe Geralb Smajlin (40’). Në fraksionin e dytë, Gjilani reagoi dhe ngushtoi shifrat me golin e Senad Jarovic në minutën e 71-të, por nuk arriti të shmangë eliminimin.

Gjysmëfinalisti i katërt do të përcaktohet pas përballjes mes KF Malisheva dhe KF Llapi, duke kompletuar kështu katërshen që do të luftojë për trofeun e Kupës së Kosovës.

Granit Xhaka vazhdon të shkruajë histori në futbollin anglez. Kapiteni i Sunderland ka arritur një tjetër moment të rëndësishëm në karrierë, duke regjistruar paraqitjen e tij të 250-të në Premier League.

Klubi e ka vlerësuar këtë arritje përmes një njoftimi zyrtar, duke theksuar rëndësinë e kontributit të mesfushorit ndër vite në elitën e futbollit anglez.

Në 250 ndeshje në Premier League, Xhaka ka realizuar 18 gola dhe ka dhuruar 29 asistime, duke qenë një pikë referimi në mesfushë falë eksperiencës, lidershipit dhe ndikimit të tij në lojë.

Jubileu i tij erdhi në fitoren minimale 1:0 të Sunderlandit në transfertë ndaj Leeds United. Mesfushori shqiptar me pasaportë zvicerane u aktivizua nga minuta e 56-të, duke ndihmuar skuadrën të ruajë avantazhin dhe të marrë tri pikë të rëndësishme.

Me këtë arritje, Xhaka konfirmon edhe një herë statusin e tij si një nga futbollistët më të qëndrueshëm dhe më me ndikim në kampionatin anglez gjatë dekadës së fundit.

Ndeshje të zjarrta janë zhvilluar edhe sot në kuadër të Ligës së Basketbollit Amerikan, NBA.

Kampioni në fuqi si dhe lideri i Konferencës së Perëndimit, Oklahoma City Thunder, ka realizuar fitoren e tretë radhazi, pas tirumfit ndaj Chicago Bulls me rezultat 116-108.

Edhe pse ylli i skuadrës Shai Gilgeous-Alexander mungojë në ndeshje për shkak të një problemi në muskujt e barkut, dëmtim që e mbajti jashtë parketit për pjesën më të madhe të muajit të kaluar, prap se prap pati paraqitje të mira edhe nga lojtaret e tjerë ku gjashtë prej tyre shënuan pikë dyshifrore.

Kujtojmë që Bulls renditen në vendin e 12-të në Konferencën e Lindjes.

Kur jemi tek lidertë, lideri I Konferencës së Lindjes, Detorit Pistons, ka pësuar humbje nga Cleveland Cavaliers me rezultat 113-109.

Jaylo Tyson udhëhoqi skuadrën e tijë drejt fitores me 22 pikë, derisa te skuadra humbëse u dallua Jalen Duren me 24 pikë e 14 kërcime.

Kujtojmë që Cavaliers renditen në vendin e katërt në Konferencën e Lindjes dhe kjo ishte fitorja e dytë radhazi.

Fitoren e tretë radhazi njësoj si Thunder, e arriti edhe Los Angeles Lakers, që fituan 110-101 ndaj New Orleans Pelicans.

Të gjithë titullarët e Lakers realizuan mbi 10 pikë, ndërsa spikati Luka Dončić me 27 pikë e 10 kërcime.

Te Pelicanes paraqitje të mirë kishte Zion Williamson me 24 pikë por që nuk mjaftuan për fitore.

Lakers renditen në vendin e gjashtë në Konferencën e Perëndimit derisa Pelicanes në poziten e 13-të.

Galatasaray  ka konfirmuar se është ndëshkuar nga UEFA pas incidenteve të shkaktuara nga tifozët në ndeshjen e Ligës së Kampionëve kundër Juventus FC, e zhvilluar më 25 shkurt 2026 në Itali.

Sipas vendimit të Bordit Disiplinor të UEFA-s, klubi turk është gjobitur me 40 mijë euro dhe është dënuar që ndeshjen e ardhshme si mysafir në Ligën e Kampionëve ta zhvillojë pa praninë e tifozëve të tij.

Sanksioni lidhet me sjelljen e tifozëve në stadiumin e Juventusit, ndonëse në njoftimin zyrtar nuk janë bërë publike detaje të hollësishme mbi incidentet.

Në deklaratën e publikuar, Galatasaray thekson:

“Për shkak të incidenteve me tifozët që ndodhën gjatë ndeshjes sonë të Ligës së Kampionëve kundër Juventusit, të luajtur jashtë fushe më 25 shkurt 2026, Bordi Disiplinor i UEFA-s ka vendosur një gjobë prej 40,000 eurosh për klubin tonë si dhe sanksionin që ndeshja jonë e ardhshme jashtë fushe të luhet pa spektatorë.”

Klubi ka bërë të ditur se do ta apelojë këtë vendim në Organin e Ankesave të UEFA-s, duke e cilësuar njoftimin si informim për opinionin publik.

Ndeshja e radhës jashtë fushe për kampionët e Turqisë është sfida e kthimit në fazën e 1/8-tës së Ligës së Kampionëve ndaj Liverpool FC, që do të zhvillohet në Anfield. Nëse dënimi mbetet në fuqi, Galatasaray do të jetë pa mbështetjen e tifozëve të tij në këtë përballje vendimtare.

Sipas The Athletic, dy ekspertë të respektuar mjekësorë kanë dhënë opinionet e tyre mbi lëndimin e gjurit të majtë të Kylian Mbappe dhe mundësinë e një ndërhyrjeje kirurgjikale.

Juan Ayala, ish-president i Shoqatës Spanjolle të Traumatologjisë Sportive dhe kreu i njësisë së gjurit në Spitalin San Rafael në Madrid, tha se kirurgjia nuk është e nevojshme në shumicën e rasteve.

“Në shumicën e rasteve, kirurgjia nuk është e nevojshme. Nëse është një dëmtim i gradës së parë (më pak i rëndë), që është një tërheqje ligamentore, ose një dëmtim i gradës së dytë, që është një këputje e pjesshme, kirurgjia zakonisht nuk kryhet. Përdoret trajtimi konservativ”.

“Një pushim minimal prej tre javësh kërkohet për një tërheqje të gradës së parë dhe gjashtë javë për gradën e dytë. Megjithatë, nëse lojtari ka vazhduar të luajë, këto dëmtime kanë tendencë të bëhen kronike dhe të përkeqësojnë parashikimin”.

“Nëse nuk shërohet si duhet, mund të mbetet e paqëndrueshme dhe të kërkojë ndërhyrje kirurgjikale”.

Diego Garcia-German, kirurg ortoped dhe mjek i ekipit të Spanjës për Lojërat Olimpike Dimërore, ndau një pikëpamje të ngjashme.

“Nëse Mbappe ka vazhduar të luajë, ka shumë gjasa që të ketë një dëmtim të gradës së ulët. Mund të ndodhë që dëmtimi të mos ketë shëruar si duhet ose të mos po përgjigjet ndaj trajtimit konservativ”.

“Nëse nuk shërohet vetvetiu, kirurgjia gjithmonë mund të jetë një opsion. Por kirurgjia nuk është e zakonshme për dëmtime të gradës së ulët”.

“Ky dëmtim ka të ngjarë të jetë një dëmtim i gradës së ulët që po i shkakton më shumë probleme se zakonisht. Nga jashtë, përshtypja ime është se shkalla e dëmtimit nuk e ka penguar të vazhdojë të luajë, dhe tani ndoshta ka pak dhimbje”.

“Nëse mendojmë se duhet të shërohet vetvetiu, sepse po trajtohet konservativisht, duhet t’i japim kohë që të zgjidhet”, përfundoi ai.

Federata e Futbollit të Kosovës (FFK) ka zyrtarizuar orarin e çerekfinaleve të Kupës së Kosovës, të cilat zhvillohen këtë javë dhe premtojnë emocion, rivalitet dhe shumë luftë në fushë. Sot (e mërkurë) luhen tri ndeshje, ndërsa njëra sfidë zhvillohet nesër (e enjte).

Dueli i parë i ditës së mërkurë sjell përballjen Dukagjini-Feronikeli ‘74, i cili zhvillohet në stadiumin “18 Qershori” në Klinë, nga ora 13:00. Kjo ndeshje pritet të jetë mjaft e luftuar, pasi të dy skuadrat e shohin Kupën si mundësi ideale për të kapur garat evropiane.

Në Suharekë, po ashtu nga ora 13:00, kampioni në fuqi Ballkani pret Gjilanin në stadiumin e qytetit me bari artificial. Ky është padyshim dueli më i fortë i kësaj faze, ku vendasit kërkojnë të vazhdojnë garën për trofe, ndërsa Gjilani synon të befasojë dhe të ecë drejt trofeut shumë të vlefshëm.

Në të njëjtën orë në Ferizaj zhvillohet edhe sfida tjetër e ditës së mërkurë, ku Ferizaj pret Vushtrrinë. Një ndeshje mes dy skuadrave ambicioze që synojnë të shfrytëzojnë Kupën për të lënë gjurmë këtë sezon, pasi çdo gabim në këtë fazë është fatal.

Çerekfinalja e fundit luhet nesër (e enjte), më 5 mars, ku Llapi pret Malishevën në stadiumin “Zahir Pajaziti” në Podujevë, nga ora 13:00.

Vlen të theksohet se në këtë fazë luhet vetëm një ndeshje dhe fituesi kalon automatikisht në gjysmëfinale.

Flamengo ka shkarkuar në mënyrë tronditëse trajnerin e saj, Filipe Luis, pavarësisht se legjenda e klubit e drejtoi skuadrën drejt një fitoreje të thellë 8-0 ndaj Madureira vetëm disa orë më parë.

Shkarkimi i një trajneri menjëherë pas një triumfi 11-0 në total në gjysmëfinale dukej i pashpjegueshëm për publikun. Megjithatë, detaje sensacionale të reja kanë zbuluar se pas vendimit fshihej një “tradhti” e thellë prapa skenave.

Është raportuar se marrëdhënia u kris pasi drejtuesit e klubit zbuluan se Luís kishte zhvilluar bisedime të fshehta me grupin pronar të ish-klubit të tij, Chelsea.

Sipas UOL, arsyeja kryesore e shkarkimit nuk lidhej vetëm me performancën në fushë, por me një thyerje serioze të besimit.

Presidenti Luiz Eduardo Baptista, i njohur si Bap, zbuloi se trajneri kishte hyrë në negociata sekrete me BlueCo, kompania që zotëron Chelsean dhe Strasbourgun, gjatë procesit të rinovimit të kontratës së tij.

Ky zbulim rezultoi fatal për marrëdhënien mes palëve.

Gjatë këtyre bisedimeve, Luis thuhet se ndërpreu komunikimin me Flamengon për tre ditë. Fillimisht ai mendonte se po diskutonte për një rol te Chelsea, por më pas mësoi se pozicioni ishte në fakt për klubin francez Strasbourg.

Pasi e kuptoi këtë, ai u rikthye në negociata me gjigantin brazilian, por dëmi ishte tashmë i pakthyeshëm.

Presidenti Bap u ndje thellësisht i tradhtuar nga takimet e fshehta, gjë që përshpejtoi vendimin për të shkarkuar trajnerin 38-vjeçar, pavarësisht sukseseve të fundit në arenën vendase.

Luís largohet me një bilanc mbresëlënës si trajner. Ai kaloi nga roli i lojtarit në trajner të moshave të reja, përpara se të merrte drejtimin e ekipit të parë.

Gjatë periudhës së tij në krye, ai drejtoi 101 ndeshje, duke regjistruar 64 fitore dhe vetëm 15 humbje.