Category: Sport

Federata e Futbollit e Kosovës, në bashkëpunim me sponsorin zyrtar të Superligës, Albi Mall, po vazhdon ndarjen e çmimit tradicional “Ylli i Javës”, i cili i dedikohet futbollistit më të dalluar të javës në elitën e futbollit kosovar.

Për javën e tridhjetë të këtij edicioni, ky çmim i është ndarë për herë të tretë futbollistit të FC Drenicës, Kreshnik Uka, i cili u dallua me paraqitje të shkëlqyer dhe shënoi dy gola në ndeshjen ndaj FC Prishtina e Re, e cila përfundoi me rezultatin 2:3.

Vlerësimi është bërë nga Komisioni i Veteranëve të Futbollit.

Pas marrjes së çmimit, Uka u shpreh i lumtur për vlerësimin si lojtari më i mirë i javës:

“E kemi ditur që do të jetë një ndeshje e vështirë, pasi duke parë pozitën e Prishtinës së Re në tabelë, e dinim se atyre u nevojiteshin pikët e plota. Fillimi i ndeshjes nuk ishte siç e kishim pritur, pasi në pjesën e parë ishim në disavantazh 1:0. Megjithatë, në pushim të ndeshjes, së bashku me trajnerin, lojtarët dhe kapitenin Genc Hamiti, u dakorduam që të dalim fuqishëm në pjesën e dytë dhe ta përmbysim rezultatin – dhe ashtu ndodhi.”

“Shpresoj të vazhdojmë në këtë formë, pse jo edhe në ndeshjen ndaj Ballkanit. Si klub, nuk e kemi pasur synim daljen në Evropë përmes kampionatit, por përmes Kupës. Megjithatë, tash e tutje gjithçka është e mundur. Kjo është meritë e bashkëlojtarëve, duke filluar nga kapiteni Genc Hamiti e deri te lojtari më i ri, të cilët po japin maksimumin. Edhe stafi dhe trajneri po bëjnë një punë të shkëlqyer. Kemi krijuar një mentalitet të ri në ekip dhe shpresojmë të vazhdojmë kështu edhe në ndeshjet e ardhshme”, tha ai për faqen zyrtare të FFK-së.

FC Drenica aktualisht gjendet në pozitën e 7-të në tabelë me 38 pikë.

Kylian Mbappé rrezikon seriozisht të humbasë El Clásicon e 10 majit pas një dëmtimi muskulor në pjesën e pasme të kofshës së majtë. Sulmuesi francez u detyrua të largohej nga loja ndaj Real Betis dhe ekzaminimet mjekësore konfirmuan një dëmtim në muskulin semitendinosus.

Edhe pse Real Madrid nuk ka dhënë një afat rikuperimi, situata e tij është e pasigurt dhe pjesëmarrja në ndeshjen kundër Barcelonës mbetet në dyshim.

Fillimisht u mendua se bëhej fjalë për një problem të lehtë, por mungesa e përmirësimit brenda 48 orëve bëri që klubi të kryejë analiza më të thelluara. Kjo ka shtuar shqetësimet në kampin madrilen, sidomos në një periudhë vendimtare të sezonit.

Situata komplikohet edhe më shumë për shkak të mungesave të tjera në skuadër, si Éder Militão dhe Arda Güler, duke i krijuar vështirësi trajnerit Álvaro Arbeloa në përzgjedhjen e formacionit.

Real Madrid shpreson që Mbappé të rikuperohet në kohë, por vendimi përfundimtar do të varet nga ditët e ardhshme.

Katër ndeshje play-off-i në NBA dhuruan emocione të shumta të dielën, duke sjellë rezultate të rëndësishme në të dyja konferencat dhe duke mbajtur të hapura disa nga seritë më interesante.

Në Konferencën e Perëndimit, Houston Rockets arriti një fitore të rëndësishme 115-96 ndaj Los Angeles Lakers, duke ngushtuar serinë në 3-1. Edhe në mungesë të Kevin Durant, Rockets u udhëhoq nga Klay Thompson, i cili realizoi 23 pikë dhe shtoi 7 asistime. Nga ana tjetër, përpjekjet e LeBron James dhe Deandre Ayton nuk mjaftuan për Lakers.

Në Lindje, Boston Celtics vazhdoi dominimin ndaj Philadelphia 76ers me një fitore të thellë 128-96, duke kaluar në epërsi 3-1 në seri. Payton Pritchard ishte ylli i ndeshjes me 32 pikë nga stoli, ndërsa rikthimi i Joel Embiid për 76ers u shoqërua me një paraqitje solide dhe “double-double”.

San Antonio Spurs siguroi një tjetër fitore të rëndësishme në transfertë, duke mposhtur Portland Trail Blazers me rezultatin 114-93. Victor Wembanyama ishte vendimtar me 27 pikë dhe 11 rebound, ndërsa De’Aaron Fox kontribuoi me 28 pikë dhe 7 asistime. Për Portland, 26 pikët e Deni Avdija nuk arritën të shmangnin humbjen.

Ndeshja më e luftuar e mbrëmjes u zhvillua mes Toronto Raptors dhe Cleveland Cavaliers, ku Raptors triumfuan 93-89 dhe barazuan serinë në 2-2. Scottie Barnes dhe Brandon Ingram udhëhoqën skuadrën me nga 23 pikë secili, ndërsa për Cavaliers, Donovan Mitchell realizoi 20 pikë në një përballje shumë të ngushtë.

Një tjetër futbollist i rëndësishëm do të mungojë në FIFA World Cup për shkak dëmtimi. Bëhet fjalë për holandezin e Tottenham Hotspur, Xavi Simons.

I dëmtuar në gjurin e djathtë të shtunën, mesfushori ka njoftuar se sezoni i tij ka përfunduar dhe, si pasojë, do të humbasë edhe pjesëmarrjen në Botëror.

“Thonë se jeta mund të jetë e padrejtë, dhe kështu po ndihem tani. Sezoni im ka përfunduar papritur dhe po përpiqem ta pranoj. Sinqerisht, më thyen zemrën,” ka shkruar 23-vjeçari në rrjetet sociale.

Simons, i cili dyshohet se ka pësuar një dëmtim të ligamentit të kryqëzuar në gju, u detyrua të largohej nga fusha duke çaluar gjatë ndeshjes së fituar 1-0 nga Tottenham Hotspur ndaj Wolverhampton Wanderers, një fitore e rëndësishme në garën për mbijetesë në Premier League.

Liverpool FC nuk është duke planifikuar ta zëvendësojë trajnerin Arne Slot me Xabi Alonso gjatë verës, pavarësisht spekulimeve të fundit në media.

Sipas gazetarit të njohur Fabrizio Romano, klubi anglez vazhdon t’i besojë Slotit dhe nuk ka ndërmarrë asnjë hap konkret për ta rikthyer Alonson në “Anfield”. Raportimet nga Gjermania kishin sugjeruar të kundërtën, por ato janë mohuar, duke theksuar se nuk ka pasur kontakte mes palëve.

Liverpooli po përballet me një fund sezoni jo shumë bindës dhe aktualisht renditet në mesin e katër skuadrave të para në Premier League. Megjithatë, gara për një vend në UEFA Champions League mbetet e hapur, dhe çdo lëshim mund të rrisë presionin mbi trajnerin.

Ndërkohë, Alonso mbetet i lirë pas largimit nga Real Madrid CF në muajin janar, çka e ka bërë atë një emër të përfolur për stolin e Liverpoolit. Pavarësisht kësaj, drejtuesit e klubit janë aktualisht të fokusuar në mbështetjen e Slotit dhe jo në një ndryshim të mundshëm në pankinë.

Real Madrid ka refuzuar një ofertë prej 80 milionë eurosh për Federico Valverde, duke e konfirmuar mesfushorin si një nga shtyllat kryesore të projektit sportiv për vitet në vijim.

Drejtuesit e klubit madrilen mbajtën një qëndrim të prerë ndaj ofertës së ardhur nga Al-Ahli, duke bërë të qartë se lojtari nuk është në shitje. Pavarësisht shumës së konsiderueshme, drejtoria sportive vlerëson se kontributi i Valverdes tejkalon çdo ofertë financiare, falë performancës së qëndrueshme dhe rolit të tij në skuadër.

Kontrata e Valverdes me Real Madridin është e vlefshme deri në qershor të vitit 2029, çka i jep klubit një avantazh të madh në çdo negociatë të mundshme. Kjo situatë eliminon çdo presion për shitje dhe i lejon klubit të ruajë një strategji të qartë dhe të qëndrueshme.

Aftësia e tij për të luajtur në disa pozicione, si në mesfushë ashtu edhe në krah, e bën një element thelbësor për trajnerin. Megjithatë, si klubi madrilen ashtu edhe vetë lojtari kanë konfirmuar se një transferim nuk është në horizont.

Interesi i klubit saudit lidhet me strategjinë për të afruar lojtarë të nivelit të lartë dhe për të rritur konkurrencën ndërkombëtare. Në moshën 27-vjeçare, Valverde mbetet i përqendruar në vazhdimin e karrierës në elitën e futbollit evropian dhe në arritjen e sukseseve të reja me Real Madridin.

Refuzimi i ofertës është një tjetër tregues i qartë i filozofisë aktuale të klubit: ruajtja e stabilitetit sportiv dhe e lojtarëve kyç ka përparësi ndaj përfitimeve financiare afatshkurtra. Në këtë kuadër, Valverde përfaqëson profilin ideal të futbollistit që Real Madrid synon të mbështesë – talent, përkushtim dhe perspektivë afatgjatë.

Presidenti i Besa Famgas, Enis Idrizi, ka reaguar publikisht pas humbjes së ekipit të tij ndaj Kastriotit në finalen e Kupës së Kosovës në hendboll, duke shprehur pakënaqësi të madhe ndaj gjykimit dhe delegimit të arbitrave.

Idrizi theksoi se organizimi i finales ishte në nivel, por ajo që ndodhi në fushë, sipas tij, nuk kishte lidhje me sportin. Ai akuzoi drejtpërdrejt gjyqtarët për vendime të padrejta që, sipas tij, ndikuan në rezultatin përfundimtar.

“Po ajo që ndodhi në fushë sonte nuk ka lidhje me sport. Nga delegimi deri te referimi – kjo është turp për hendbollin në Kosovë. Vendime në momentet kyçe, pa asnjë standard, pa asnjë konsistencë, që e kanë ndryshuar drejtpërdrejt rrjedhën e lojës”, thuhet në reagimin e tij.

Ai shtoi se një situatë e tillë është e papranueshme për një klub me historinë e Besa Famgas, duke e cilësuar këtë jo vetëm si një humbje finaleje, por si dëmtim të hapur të garës.

Idrizi kërkoi përgjigje të qarta nga organet përkatëse lidhur me mënyrën e delegimit të gjyqtarëve dhe pse, sipas tij, nuk janë angazhuar arbitrat më të mirë të mundshëm për një ndeshje të tillë.

“Duhet të jepen përgjigje të qarta: si u bë delegimi? Kush e mori këtë vendim? Pse nuk u angazhua niveli më i lartë i mundshëm?”, ka deklaruar ai.

Në fund, ai kërkoi reagim konkret nga Federata e Hendbollit të Kosovës, duke theksuar se heshtja në këtë rast do të ishte bashkëfajësi.

Kujtojmë që Besa Famgas humbi në finale të Kupës së Kosovës në hendboll ndaj Kastriotit 28:27,ku pati një numër të madh të shikuesve në palestrëm “Bill Clinton”në Ferizaj

Boksieri Arigon Avdimetaj ka debutuar me fitore në arenën profesionale, atë në mënyrën më të mirë të mundshme – duke e nokautar brutalisht një boksier serb.

Në meçin e parë profesional, 21-vjeçari u përballë me serbin Momcilo Janjic, ku e kishte një mbështetje të madhe nga tifozët.

Me një goditje direkte në fytyrë, Avdimetaj e nokautoi brutalisht serbin, e më së miri për këtë flasin pamjet.

Kësisoj, Avdimetaj dëshmon se ka një të ardhme të madhe në boks, ku në debutim jep një paraqitje të këtij të niveli të lartë.

Chelsea është finalisti i dytë i FA Cup, pasi në gjysmëfinale triumfoi ndaj Leeds United. Pas disa rezultateve negative, “Blutë” u kthyen te fitorja me suksesin 1-0.

Leeds United e nisi më fuqishëm ndeshjen, duke rrezikuar përmes Brendan Aaranson, por Sanchez me një pritje të shkëlqyer ia mohoi golin.

Goli i vetëm erdhi nga Enzo Fernandes, i cili shënoi me kokë pas një asistimi të Pedro Netos në minutën e 23-të.

Leeds tentoi të kthehej në lojë dhe rrezikoi edhe përmes Anton Stach, por sërish Sanchez ishte në vendin e duhur në minutën e 47-të.

Chelsea më pas u fokusua te mbrojtja dhe deri në fund arriti të ruajë rezultatin, duke siguruar fitoren.

Kësisoj, Chelsea shkon në finale, aty ku e pret Manchester City, e cila të shtunën eliminoi Southamptonin.

Më 26 mars, La Liga prezantoi protokollin e parë për parandalimin dhe trajtimin e diskriminimit, dhunës dhe abuzimit në stadiumet e futbollit profesional. Qëllimi i tij është të forcojë sigurinë dhe mirëqenien në kampionat, sipas Javier Tebas, president i Shoqatës së Klubeve Spanjolle.

Nisma u mbështet edhe nga Ministri i Brendshëm, Fernando Grande-Marlaska, i cili theksoi se Komisioni Shtetëror kundër Dhunës në Sport po punon për reformimin e ligjit kundër dhunës, racizmit, ksenofobisë dhe intolerancës në sport, për të ndëshkuar më ashpër grupet ultras dhe për të rritur sigurinë pranë stadiumeve.

Megjithatë, Real Madridi ka ngritur një padi kundër vendimit të Komisionit të Delegatëve të LaLigës, më 20 shkurt 2026, që miratoi këtë “protokoll udhëzues”. Klubi kërkoi gjithashtu masa të përkohshme pa dëgjuar palën tjetër, por gjyqtari refuzoi këtë kërkesë, duke preferuar që më parë të shqyrtonte versionin e LaLigës.

Veprimi i Realit ka shkaktuar shqetësim midis klubeve të tjera, të cilët e shohin këtë si një kundërshtim të panevojshëm ndaj një çështjeje të ndjeshme. Sipas tyre, ky veprim mund të ndikojë negativisht në reputacionin e klubit.