Category: Lajme

Prokuroria Themelore në Prizren ka bërë të ditur se në bashkëpunim me Policinë e Kosovës, pas hetimeve të zhvilluara, më 02.04.2026 kanë zhvilluar një aksion në Prizren, ku është zbuluar një laborator droge për kultivimin e bimës narkotike kanabis sativa, dhe janë arrestuar dy persona të dyshuar, si dhe janë asgjësuar rreth 300 bimë kanabis sativa të kultivuara në laborator.

Lidhur me këtë çështje penale, i pandehuri M.M., në bashkëkryerje me I.M., pa autorizim, kanë kultivuar bimët me qëllim prodhimin e sasisë së madhe të narkotikëve dhe përgatitjen e tyre për shitje.

“Gjatë kontrollit, janë sekuestruar mbi 700 vazo për kultivimin e bimëve narkotike, pajisje për ndriçim, ngrohje dhe ventilim të bimëve (motora, trafo, klimë, lidhëse dhe termostat); thasë me dhe, bidona me preparate për rritjen e bimëve, dhe libra/udhëzues për kultivimin e kanabis sativa, gjethe dhe bimë të dyshuara narkotike me peshë mbi 90 gram; substanca narkotike 1.19 gram marihuanë dhe 0.41 gram kokainë, pajisje shtesë laboratorike, përfshirë pompë spërkatjeje, matës të lagështisë dhe temperaturës, dhe mbushës radiolidhjeje, një pistoletë, 29 fishekë, një veturë ‘Hundai pa targa, dhe një furgon që kanë shërbyer për transportin e narkotikëve dhe të pajisjeve për kultivimin e tyre, si dhe prova të tjera materiale”, thuhet në njoftim.

Me këto veprime, të njëjtit dyshohet se kanë kryer veprat penale “Kultivimi i bimës së hashashit, shkurres së kokainës ose bimëve të kanabisit” nga neni 272, “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”, nga neni 267, dhe “Mbajtja në pronësi, kontroll ose posedim të paautorizuar të armëve” nga neni 366, sipas Kodit Penal të Republikës së Kosovës.

Të pandehurit, gjendet në ndalim 48 orësh, dhe për të njëjtit Prokuroria ka parashtruar kërkesë për caktim të masës së paraburgimit. /Telegrafi/

Kosova është mbështetësja më e madhe e udhëheqjes së ShBA-së, sipas matjeve të fundit nga “Gallup”.

Në të njëjtën kohë, matjet tregojnë se vendi ynë është edhe kundërshtari më i madh i politikës së Kinës.

“Krahasimi i miratimit neto në nivel shtetëror tregon se cilat vende anojnë drejt njërës fuqi apo tjetrës në aspektin e opinionit publik. Vendet dhe territoret më të rreshtuara me Shtetet e Bashkuara – ato që kanë një miratim të fortë neto për ShBA-në, që përafërsisht pasqyron mosmiratimin e tyre neto ndaj Kinës – shtrihen në disa rajone dhe përfshijnë Kosovën, Shqipërinë, Izraelin, Poloninë dhe Filipinet”, thuhet mes tjerash në publikimin e “Gallup”, raporton Klankosova.

Sipas të dhënave, Kosova është në vend të parë për sa i përket miratimit të politikave amerikane, me 64 pikë, kurse në të njëjtën kohë, është edhe kundërshtarja më e fortë e politikave të Republikës Popullore të Kinës, me -68 pikë.

Pas Kosovës, si mbështetësja e dytë ndaj ShBA-së del të jetë Izraeli me 57 pikë, Polonia me 47, Shqipëria me 40 dhe Filipinet me 36.

Edhe për sa i përket mos-miratimit të politikave të Kinës, renditja është pothuajse e njëjtë, me Poloninë që renditet pak më poshtë se Kosova, me -63 pikë, Izraeli me -59 pikë, Shqipëria -44 dhe Filipinet me -42.

Ndërkaq, vendet që miratojnë më së shumti politikat e shtetit të Kinës janë Rusia, Pakistani, Tunizia, Singapori dhe Hong Kongu, shifra që tregojnë po ashtu se të njëjtat kanë edhe negativitet të thellë ndaj ShBA-së.

Sipas “Gallup”, ndonëse asnjëri vend nuk gëzon mbështetje të gjerë, Kina i tejkaloi Shtetet e Bashkuara në vlerësimet globale të miratimit në vitin 2025, me një mesatare prej 36% që miratojnë udhëheqjen e Kinës, krahasuar me 31% për ShBA-në.

Gati gjysma e të gjitha vendeve kanë një qëndrim negativ ndaj të dy fuqive

Gati gjysma e të gjitha vendeve të anketuara vitin e kaluar (45%) dhanë vlerësime negative të miratimit neto për të dyja fuqitë, që do të thotë se më shumë njerëz i kundërshtuan sesa i mbështetën secilën prej tyre.

Më pak se një në tre vende (29%) dhanë vlerësime pozitive të miratimit neto për të dyja. Përveç vitit 2020, kur u anketuan më pak vende për shkak të pandemisë, kjo është periudha kur bota ka pasur qëndrimin më negativ ndaj të dy fuqive në dy dekadat e fundit.

Rezultatet më të fundit bazohen në sondazhet e “Gallup” të zhvilluara në vitin 2025 në më shumë se 130 vende; ato në mënyrë të veçantë i paraprijnë disa zhvillimeve të mëdha në fillim të vitit 2026, përfshirë tërheqjen e ShBA-së nga 66 organizata ndërkombëtare në janar dhe shpërthimin e luftës me Iranin në fund të shkurtit

Në një kohë kur Irani ndodhet nën breshërinë e sulmeve izraelito-amerikane, komunikimi me botën jashtë është pothuajse i pamundur. Mes ndërprerjes totale të internetit dhe kërcënimit me burg, banorët po përdorin rrugë ilegale për të treguar dëshpërimin e tyre.

Dëshmitë e mbledhura së fundmi nga mediat ndërkombëtare vizatojnë një tablo të zymtë të një popullsie që ndjehet e bllokuar mes dy zjarreve, një establishmenti që nuk e duan dhe bombave që po shkatërrojnë infrastrukturën e vendit të tyre.

Shkatërrimi i urës në Karaj ka qenë pika e kthesës për shumë banorë, duke ngjallur frikë se lufta nuk po synon vetëm objektivat ushtarake. Një vajzë rreth të 20-ave nga Teherani, përmes një mesazhi zanor ku dëgjoheshin lotët, shprehu pafuqinë e saj:

“Ndjehem e pafuqishme. [Trump] publikon pa asnjë turp për sulmin ndaj urës sonë. Nuk e di deri ku do të shkojë kjo situatë. Pse askush nuk po i kundërvihet? Ai po na kthejnë vërtet në Epokën e Gurit,” u shpreh ajo, duke reflektuar frikën e një brezi që po sheh të ardhmen t’i shkatërrohet para syve.

Pavarësisht qëndrimit kritik ndaj regjimit aktual, banorët po përjetojnë një dhimbje të thellë për shkatërrimin fizik të atdheut të tyre. Një tjetër i ri nga kryeqyteti tregon ndjesinë e pashpresës:

“Ndihem i zhgënjyer dhe i trishtuar që jam në mes të një situate ku shoh Iranin të shkatërrohet dhe nuk mund të bëj asgjë. Do të përfundojmë me një vend të shkatërruar.”

Interesant është fakti se edhe ata që parimisht kanë mbështetur ndërhyrjen e huaj si mjet për ndryshim, kanë filluar të lëkunden pas goditjeve në infrastrukturën civile.

Policia e Kosovës ka bërë të ditur një rast të sulmit në Prishtinë, ku një person ka raportuar se përveç që i është dëmtuar vetura, është sulmuar edhe fizikisht.

Rasti ka ndodhur të enjten, në ora 09:00.

“Është raportuar se viktima mashkull kosovar është sulmuar fizikisht nga i dyshuari mashkull kosovar i cili dyshohet se i ka dëmtuar edhe veturën”, thuhet në raport.

Viktima ka pranuar tretman mjekësor, ndërsa i dyshuari pas intervistimit me vendim të prokurorit është arrestuar dhe dërguar në mbajtje.

Në Qendrën e Automjeteve të Kosovës (QAK) tashmë ka nisur të lëshohen vërtetimet për modifikimet në xhamat e veturave, sipas procedurës së A-TEST-it.

Procedura, e cila rregullon me dokumentacion errësimin e xhamave të pasëm në automjete, hyri në fuqi dy ditë më parë më 1 prill.

Para se të hynte në fuqi kjo rregullore, vendosja e xhamave të zinj në automjete të cilat nuk kishin xhama të errësuar fabrikisht nga prodhuesi, sanksionohej me gjobë bazuar në Ligjin për Kundërvajtje.

Vërtetimi i përputhshmërisë së xhamave me standardet e lejuara, i cili ka nisur të zhvillohet në QAK, kushton 80 euro.

Një shofer ka publikuar të enjten një vërtetim të modifikimit të xhamave në automjetin e tij.

Para vitit 2024, vendosja e folieve të zeza në vetura, të cilat humbin dukshmërinë brenda automjeteve, nuk ishte e lejuar me ligj.

Ndalimi bazohej në një akt nënligjor të nxjerrë nga Ministria e Punëve të Brendshme.

Në këtë akt nënligjor thuhej se vendosja e letrës së errët ngjitëse për hijezim në xhamat e automjetit është e ndaluar, përveç në mjetet institucioneve shtetërore, të cilat përcaktohen me vendim të Ministrisë së Brendshme.

Me Ligjin e ri për Rregullat e Trafikut Rrugor që hyri në fuqi më 2024, errësimi i xhamave në automjet cilësohej si “vendosje e pjesëve shtesë në automjet” dhe sanksionohej për kundërvajtje me gjobë prej 40 euro.

Komisioni për Ekonomi nuk ka mbajtur mbledhjen e paralajmëruar për sot në të cilën është parapararë të raportojë Bordi i Zyrës së Rregullatorit të Energjisë për tarifat e reja.

Kjo pasi që as përfaqësues të ZRRE-së, e po ashtu as anëtarët e Komisionit nga radhët e Lëvizjes Vetëvendosje nuk ishin prezentë.

Policia e Kosovës ka njoftuar për tri raste të ndryshme të kalimit ilegal të kufirit vetëm gjatë ditës së djeshme në Kosovë.

Sipas raportit 24-orësh, rasti i parë ka ndodhur me një shtetas të Maqedonisë së Veriut, i dyti me një shtetas të Turqisë, ndërsa i treti me një shtetas kosovar.

Në të tri rastet, të dyshuarit janë shoqëruar në polici dhe më pas janë liruar në procedurë të rregullt.

“Hani i Elezit/ 02.04.2026 – 13:25. Është ndaluar i dyshuari mashkull shtetas i Maqedonisë Veri, nën dyshimin se ka kaluar ilegalisht kufirin R. Maqedoni Veri për në R. Kosovë. Me vendim të prokurorit i dyshuari, është liruar në procedurë të rregullt.

Hani i Elezit / 02.04.2026 – 13:40.Është ndaluar i dyshuari mashkull shtetas i Turqisë nën dyshimin se ka kaluar ilegalisht kufirin R. Maqedoni Veri për në R. Kosovë. Me vendim të prokurorit i dyshuari, është liruar në procedurë të rregullt.

Fsh. Bube, Zubin Potok / 02.04.2026 – 20:45.Është shoqëruar në stacionin policor i dyshuari mashkull kosovar, pasi që me veturë dyshohet se kishte kaluar kufirin ilegalisht nga Serbia për në R. Kosovës. Në veturën e të dyshuarit janë gjetur edhe mallra të ndryshme pa dokumente përkatëse. Me vendim të prokurorit, vetura me mallra është dërguar në terminal doganor, ndërsa i dyshuari është liruar në procedurë të rregullt”, thuhet në raportin e Policisë.

Pavarësisht masave të qeverisë gjermane për të parandaluar rritjen e çmimeve të karburantit , disa derivate të tilla si nafta arritën çmime rekord historik të enjten përpara festave të Pashkëve.

Çmimi mesatar i një litri naftë në stacionet e benzinës në Gjermani u rrit në një rekord prej 2.32 eurosh të enjten, dhe në disa vende madje edhe 3 euro, njoftoi Klubi Gjerman i Automobilave (ADAC). I gjithë super çmimi është gjithashtu më i larti ndonjëherë me 2.19 euro.

Kjo tejkaloi rekordin e vendosur në mars të vitit 2022, kur çmimet u rritën për shkak të luftës në Ukrainë.

Rritja rekord e çmimeve ndodhi vetëm një ditë pasi hynë në fuqi masat kundër rritjes së pakontrolluar të çmimeve të produkteve të naftës. Që nga 1 prilli, stacionet e benzinës lejohen të rrisin çmimet vetëm një herë në ditë, në mesditë.

ADAC kritikoi rritjen e çmimeve, duke pasur parasysh se çmimet e naftës bruto ranë në gjysmën e parë të javës. “Frika se kompanitë e naftës, të cilave tani u lejohet të rrisin çmimet vetëm një herë në ditë, do ta bënin këtë në mënyrë drastike për të mbrojtur veten, ka rezultuar e justifikuar”, tha ADAC. Rritja e fundit e çmimeve ka rritur presionin mbi qeverinë gjermane, e cila është kritikuar për reagimin e saj të dobët ndaj shokut të naftës.

Aktualisht, po diskutohet mundësia e futjes së lehtësirave shtesë tatimore për udhëtimet me makinë, si dhe ulja e taksave mbi produktet energjetike, siç është rasti me disa vende të tjera të BE-së.

Pak ditë më parë, Polonia njoftoi se do të “monitoronte” dhe nëse do të ishte e nevojshme të reagonte ndaj fenomenit në stacionet e benzinës në zonën kufitare me Gjermaninë, ku ka pasur mungesa ditët e fundit për shkak të mbërritjes masive të shoferëve gjermanë në Poloni, ku karburanti është shumë më i lirë.

Ministri gjerman i Financave dhe zëvendëskancelari Lars Klingbeil (Partia Socialdemokrate e Gjermanisë SPD) u dërgoi një letër disa ministrive të enjten duke kërkuar masa urgjente për të parandaluar rritjen e çmimeve të energjisë dhe inflacionin.