Category: Lajme

Lideri i Partisë Socialdemokrate, Dardan Molliqaj, ka kritikuar ashpër opozitën, duke thënë se mungesa e veprimit po i hap rrugë kryeministrit Albin Kurti për të forcuar kontrollin mbi institucionet shtetërore.

Përmes një video të publikuar Molliqaj tha se Opozita po pret nga kryeministri ftesa për zgjedhjen e presidentit, ftesa për pjesëmarrje në qeveri.

“Opozita po pret nga kryeministri ftesa për zgjedhjen e presidentit, ftesa për pjesëmarrje në qeveri. Me kësi opozite, ky kryeministër do t’i fusë në kontroll të gjitha institucionet”, deklaroi ai.

Marrëveshja për anëtarësimin e Kosovës në Bordin e Paqes, nismës së presidentit të Shteteve të Bashkuara të Amerikës, Donald Trump nuk u procedua për miratim në Kuvendin e Kosovës. Komisioni Parlamentar për Punë të Jashtme nuk e miratoi të martën projektligjin për marrëveshjen e nënshkruar nga ish-presidentja Vjosa Osmani më 22 janar, pasi Lëvizja Vetëvendosje pati vërejtje për nenin 2 të projektligjit dhe kërkoi që ai të ndryshohet.

Profesori i së Drejtës Ndërkombëtare, Enver Hasani, tha në një intervistë për Gazetën Express se kjo nuk mund të bëhet “asnjëherë”, duke e quajtur sjelljen e deputetëve të LVV-së në komisionin parlamentar “papjekuri totale”.

“Kuvendi mund të ndryshojë njëanshëm ligjet e veta, por jo edhe zotimet ndërkombëtare të Kosovës”, thotë ai.

Nëse deputetët kanë vërejtje për përmbajtjen e marrëveshjes, Hasani thotë se sipas standardit ndërkombëtar dhe kushtetues, “duhet ndjekur e njëjta procedurë sipas së cilës është lidhur marrëveshja ose traktati”.

“Kur nuk ekziston pëlqimi i palës tjetër, atëherë çdo përpjekje për ndryshim të traktatit ose marrëveshjes bazë është fyerje ndaj palës tjetër, joseriozitet i palës që ndërmerr atë hap dhe konsiderohet si dalje nga traktati ose marrëveshja, ligjërisht e nënshkruar nga shefi i shtetit të Kosovës, në pajtim me Kushtetutën dhe ligjin e vendit”.

Hasani thotë se Kosova “duhet ta sqarojë me palën amerikane nëse synon daljen nga zotimi për anëtarësim në Bordin e Paqes. Anëtarësimi në Bordin e Paqes nuk mund të bëhet ndaras nga pranimi i plotë i secilës dispozitë të Kartës së Bordit të Paqes”.

Gazeta Express: Komisioni Parlamentar për Punë të Jashtme nuk e ka miratuar Projektligjin për marrëveshjen për anëtarësimin e Kosovës në Bordin e Paqes, me Lëvizjen Vetëvendosje që pati vërejtje për nenin 2 të projektligjit dhe kërkoi që të ndryshohet ai nen. A mundet Kuvendi ta ndryshojë përmbajtjen e një marrëveshjeje ndërkombëtare që tashmë është nënshkruar nga Presidentja, apo në aspektin juridik ajo duhet të ratifikohet vetëm si e tillë, pa ndërhyrje në tekst?

Hasani: Asnjëherë. Kjo është papjekuri totale. Deputetët duhet të pyesin departamentin ligjor në Ministrinë e Punëve të Jashtme, nëse nuk dinë, dhe ata do t’u tregojnë standardet ndërkombëtare se kur dhe si mund të ndryshohet një traktat i nënshkruar nga shefi i shtetit, shefi i qeverisë dhe ministri i jashtëm, por që nuk ka kaluar procedurën e ratifikimit në Kuvend. Kuvendi mund të ndryshojë njëanshëm ligjet e veta, por jo edhe zotimet ndërkombëtare të Kosovës.

Në rastin konkret bëhet fjalë për Kartën e Bordit të Paqes, e cila ka statusin e traktatit ose marrëveshjes ndërkombëtare sipas nenit 18.1 të Kushtetutës së Kosovës, që ka të bëjë me aleancat, si dhe çështjet politike dhe ushtarake.

Gazeta Express: Nëse deputetët kanë vërejtje për formulime të caktuara (si në nenin 2), cili është mekanizmi i duhur: ndryshimi i projektligjit shoqërues apo rinegocimi i vetë marrëveshjes ndërkombëtare me palët nënshkruese?

Hasani: Sipas nenit 18.4 të Kushtetutës së Kosovës, që reflektohet edhe në Ligjin e Kosovës për Marrëveshjet Ndërkombëtare, “amendamentimi ose tërheqja nga marrëveshjet ndërkombëtare do të kenë të njëjtën procedurë vendimmarrjeje si ajo e ratifikimit të marrëveshjeve ndërkombëtare”.
Ky është standard ndërkombëtar dhe kushtetues i të gjitha vendeve të civilizuara, pra duhet ndjekur e njëjta procedurë sipas së cilës është lidhur marrëveshja ose traktati.

Gazeta Express: Cilat janë pasojat juridike dhe ndërkombëtare nëse një shtet tenton ta ratifikojë një marrëveshje me ndryshime të njëanshme në përmbajtje?

Hasani: Asnjë efekt juridik nuk prodhon për palën tjetër, përveç nëse ekziston një marrëveshje mes palëve, ose nëse pala tjetër më pas i pranon ndryshimet e tilla në traktatin ose marrëveshjen bazë.

Kur nuk ekziston pëlqimi i palës tjetër, atëherë çdo përpjekje për ndryshim të traktatit ose marrëveshjes bazë është fyerje ndaj palës tjetër, joseriozitet i palës që ndërmerr atë hap dhe konsiderohet si dalje nga traktati ose marrëveshja, ligjërisht e nënshkruar nga shefi i shtetit të Kosovës, në pajtim me Kushtetutën dhe ligjin e vendit.

Dalja nga një traktat ose marrëveshje ndërkombëtare, sipas Konventës së Vjenës për të Drejtën e Traktateve, bëhet sipas procedurës së parashikuar në vetë traktatin (neni 54). Në mungesë të një dispozite të tillë, dalja lejohet vetëm në raste të veçanta të përcaktuara nga konventa (neni 56).

Gazeta Express: A kërkohet sqarim me palën amerikane për daljen e Kosovës nga zotimi për anëtarësim në Bordin e Paqes, dhe a duhet respektuar në tërësi Karta e tij si kusht për anëtarësim?

Hasani: Kosova duhet ta sqarojë me palën amerikane nëse synon daljen nga zotimi për anëtarësim në Bordin e Paqes. Anëtarësimi në Bordin e Paqes nuk mund të bëhet ndaras nga pranimi i plotë i secilës dispozitë të Kartës së Bordit të Paqes.

Edhe këtu Kushtetuta e Kosovës është e qartë, sepse ndjek standardin e vendeve të civilizuara perëndimore. Në nenin 20.2 të Kushtetutës, që rregullon bartjen e sovranitetit, shprehimisht përcaktohet si vijon: “Nëse një marrëveshje anëtarësimi e ratifikuar nga Republika e Kosovës për pjesëmarrje në një organizatë ndërkombëtare në mënyrë eksplicite kërkon zbatim të drejtpërdrejtë të normave të kësaj organizate, ligji me të cilin ratifikohet marrëveshja e anëtarësimit miratohet me votat e dy të tretave (2/3) të të gjithë deputetëve të Kuvendit dhe ato norma kanë epërsi ndaj ligjeve të Republikës së Kosovës.”

Shumica e kualifikuar prej dy të tretash kërkohet si për anëtarësim në një organizatë ndërkombëtare, ashtu edhe për ratifikim të një traktati ose marrëveshjeje ndërkombëtare sipas nenit 18.1 të Kushtetutës. Këtu kemi të bëjmë me dy situata konkrete që lidhen me Bordin e Paqes.

Shefi i Grupit Parlamentar të AAK-së, Besnik Tahiri, në një intervistë në FRONTAL të T7 ka folur edhe për arsyen e mundshme pse kryeministri Albin Kurit nuk po e fton Ramush Haradinajt në diskutimet për gjetjen e një zgjidhjeje për presidentin.

Tahiri ka thënë se Kurti e di pozicionin e AAK-së dhe se partia që drejton Haradinaj nuk bëhet pjesë e spektaklit politik që synon konsumimin e opozitës.

Sipas deputetit të AAK-së, takimet një me një, nuk kanë synim për të gjetur zgjidhje

“Arsyet nuk i di, as nuk i kam dëgjuar. Por ajo që e shoh, një nga arsyet mundet me qenë që ai e din pozicionin tonë. Ne s’do të bëhemi në asnjë moment pjesë e një spektakli politik me e konsumu opozitën. Takimet 1me1 kurrë s’kanë pas synim me ia dhanë Kosovës një president unifikues”, ka thënë Tahiri.

Ish-zv.ministri i Jashtëm, Petrit Selimi, thotë se një javë pas përfundimit të mandatit të presidentes Vjosa Osmani, VV hodhi poshtë kërkesën e saj për të ratifikuar marrëveshjen e anëtarësimit në Bordin e Paqes.

Ai deklaron se opozita ishte pro ratifikimit, po një gjë e tillë ngeci në parlament pas kundërshtimeve të VV-së.

Postimi i tij plotë:

Vetëm një javë pasi mbaroi mandati i ish-Presidentes Osmani, regjimi në pushtet në Kosovë e hodhi poshtë kërkesën e paraqitur prej saj për të ratifikuar marrëveshjen e anëtarësimit në Bordin e Paqes. Partitë opozitare ishin pro, por ratifikimi ngeci në parlament pas kundërshtimeve të VV-së.

Only a week after the mandate of ex President Osmani ended, ruling regime in Kosovo denied request submitted by her to ratify the agreement of accession to the Board of Peace. Opposition parties were in favor but the ratification stalled in the parliament after VV objections. pic.twitter.com/tHurH4SFSa

— Petrit Selimi (@Petrit) April 15, 2026

Sot iu dha lamtumira e fundit, 19 vjeçarit Bylbyl Avdulla Mazreku nga fshati Retijë e Rahovecit. Ai ka humbur jetën pak ditë më parë si pasojë e një aksidenti në Eferding të Austrisë.

Në varrimin e tij ka marrë pjesë edhe kryetari i Komunës së Rahovecit, Smajl Latifi.

“Me dhimbje të thellë, sot i dhamë lamtumirën të riut 19-vjeçar, Bylbyl Avdulla Mazrekut nga Retija, i cili ditë më parë humbi jetën tragjikisht në një aksident në Eferding të Austrisë.

Kjo është një humbje e rëndë për familjen, për bashkëvendësit dhe për të gjithë ata që e njohën.

Duke bashkëndier dhimbjen, i shpreh ngushëllimet e mia më të sinqerta familjes Mazreku, miqve dhe të afërmve! Qoftë i përjetshëm kujtimi i tij! I qoftë i lehtë dheu mbi varr! “, ka shkruar Latifi.

Presidenti i Shteteve të Bashkuara, Donald Trump, ka thënë të mërkurën se bisedimet për paqe me Iranin mund të rifillojnë brenda një ose dy ditësh, ndërkohë që ushtria amerikane po pengon tregtinë detare të tij në përpjekje për ta detyruar Teheranin të rikthehet në tryezën e negociatave.

Trump urdhëroi vendosjen e bllokadës detare ndaj anijeve që shkojnë drejt Iranit ose vijnë nga portet iraniane, pasi SHBA-ja dhe Irani dështuan të arrinin marrëveshje për t’i dhënë fund luftës që nisi më 28 shkurt gjatë bisedimeve për paqe në Islamabad më 11-12 prill.

Në një intervistë për Fox Business News të mërkurën, Trump tha se mendon se lufta mund të përfundojë “shumë shpejt”.

Ndërkohë, zëdhënësi i Ministrisë së Jashtme të Iranit, Esmaeil Baqaei, theksoi në një konferencë javore për shtyp në Teheran se, që nga përfundimi i bisedimeve, Irani ka qenë në komunikim me Shtetet e Bashkuara përmes Pakistanit.

“Mendoj se [lufta] mund të përfundojë shumë shpejt. Do të marrë fund së shpejti”, tha Trump në intervistën për Fox.

Paraprakisht, Trump kishte thënë për New York Post se negociatorët mund të takohen sërish brenda disa ditësh.

Por, armëpushimi dyjavor i arritur mes SHBA-së dhe Iranit më 7 prill po shkon drejt përfundimit dhe Trumpi tha se nuk e ka ndër mend ta zgjasë marrëveshjen për të.

Thuhet se Pakistani po përpiqet ta ndërmjetësojë një rund të ri bisedimesh, ndërsa nënpresidenti amerikan, JD Vance, i cili udhëhoqi delegacionin amerikan në rundin e parë, ngriti mundësinë e takimeve të tjera duke thënë se ishte arritur “shumë përparim” gjatë bisedimeve të 11-12 prillit.

“Topi është në fushën e Iranit”, sipas Vance, i cili tha se mosmarrëveshjet mbi programin bërthamor të Iranit përfundimisht çuan në dështimin e bisedimeve.

Më vonë, në një aktivitet në shtetin jugor amerikan të Xhorxhias, Vance tha se Trump dëshiron të arrijë “marrëveshje të madhe” me Iranin, por se ka shumë mosbesim mes dy vendeve.

Presidenti iranian, Masud Pezeshkian, e fajësoi Uashingtonin për dështimin e bisedimeve, por gjithashtu tha se “diplomacia është rruga e duhur për zgjidhjen e mosmarrëveshjeve”.

Një nga çështjet më të diskutueshme ka qenë mbyllja e Ngushticës së Hormuzit nga Irani, një rrugë ujore nëpër të cilën kalon rreth një e pesta e dërgesave botërore të naftës dhe gazit në kohë paqeje.

Pasi bisedimet në Islamabad përfunduan pa marrëveshje, Trump njoftoi vendosjen e bllokadës amerikane ndaj anijeve që shkojnë drejt Irani apo vijnë nga Irani.

Ngushtica lidh Evropën me Azinë përmes Kanalit të Suezit dhe cilësohet si një nga rrugët më të rëndësishme të tregtisë detare në ekonominë globale.

Komanda Qendrore e SHBA-së, përgjegjëse për operacionet në rajon, tha në një postim në platformën X se gjatë 24 orëve të para, asnjë anije nuk arriti të kalojë bllokadën amerikane dhe gjashtë anije tregtare iu bindën urdhrave të forcave amerikane për t’u kthyer mbrapsht drejt një porti iranian në Gjirin e Omanit.

“Bllokada e porteve iraniane është zbatuar plotësisht, ndërsa forcat amerikane ruajnë epërsinë detare në Lindjen e Mesme”, tha Brad Cooper, komandanti i CENTCOM, në një postim në X të martën.

“Në më pak se 36 orë nga vendosja e bllokadës, forcat amerikane kanë ndalur plotësisht tregtinë ekonomike që hyn dhe del nga Irani përmes detit”.

Në të njëjtën kohë, të dhënat nga shërbimet e gjurmimit treguan se të paktën katër anije, dy prej të cilave kishin qenë së fundmi në porte iraniane, kaluan ose po kalonin nëpër Ngushticën e Hormuzit, në orët pasi bllokada hyri në fuqi në orën 10:00 sipas kohës lindore të SHBA-së të hënën.

Ndërkohë, të mërkurën, Irani kërcënoi se do t’i rifillojë sulmet në rajonin e Gjirit nëse bllokada rrezikon sigurinë e anijeve dhe tankerëve iranianë të mallrave, duke thënë se kjo do të përbënte shkelje të marrëveshjes së armëpushimit.

Lufta me Iranin, e cila praktikisht mbylli Ngushticën e Hormuzit, ka shkaktuar tronditje në çmimet globale të energjisë, ndërsa ndalimi i dërgesave të mallrave të tjera me vlerë miliarda dollarë që kalojnë nëpër këtë rrugë të ngushtë detare ka kërcënuar ekonomitë në mbarë botën./REL

Ish-deputeti i LDK-së, Arben Gashi, ka reaguar pasi është lënë jashtë Kryesisë së LDK-së nga Lumir Abdixhiku.

Gashi ka thënë se ka folur hapur brenda partisë për problemet të cilat i ka konsideruar, megjithatë thotë se s’janë marrë veprime ndonëse në realitet është konstatuar se ato ekzistojnë.

Gashi ka thënë se ekziston hendek i madh në mes të LDK-së dhe votuesve prandaj partisë i duhet lidership dhe energji e re.

Reagimi i plotë:

Të nderuar përkrahës, votues e simpatizantë të LDK-së, qytetarë të Kosovës,

Pas publikimit të Kryesisë së re të LDK-së, kam pranuar shumë telefonata dhe mesazhe nga ju dhe nga mediat. Prandaj, po e them qartë:

Unë nuk jam pjesë e Kryesisë së re të LDK-së.

Që nga përfundimi i zgjedhjeve të shkurtit 2025, kam folur hapur brenda strukturave të LDK-së për gjendjen në parti dhe për humbjen e besimit të brendshëm. Kam propozuar veprime konkrete për distancim nga parregullsitë dhe për krijimin e një momentumi të ri, gjithëpërfshirës, konkurrues dhe me vizion të qartë.

Këto propozime nuk gjetën përkrahje në votim, edhe pse realiteti u pranua në fjalë.

Kam refuzuar përjashtimet dhe kam kërkuar unitet. Jo për individë, por për një ide: që një parti që synon të udhëheqë, duhet së pari të jetë e bashkuar dhe e drejtë me vetveten.

Edhe pas zgjedhjeve të dhjetorit 2025, ku rezultati nuk ishte ai që e meriton LDK-ja, paraqita sërish analiza dhe rrugëdalje konkrete. U zgjodh një drejtim tjetër. E pranoj këtë si fakt politik, por jo si fund të bindjeve të mia.

Sot e them pa dilemë:

Hendeku mes LDK-së dhe votuesit nuk është rastësi, është pasojë e mungesës së guximit për të ndryshuar në kohë.

Një cikël politik ka përfunduar.

LDK-së i duhet një cikël i ri, me lidership dhe energji të re, me besim të rikthyer mbi vlerat e saj autentike.

Sepse:

Besimi nuk kërkohet – fitohet.

Shpresa nuk premtohet – ndërtohet.

Ndryshimi nuk pret – bëhet.

Sot, Kosovës i mungon më shumë se gjithçka tjetër besimi dhe shpresa. I duhet një politikë që pranon realitetin, por ndërton të ardhmen. I duhet një angazhim i sinqertë që e kthen qytetarin në qendër, i duhen vlerat e vërteta të LDK-së.

Unë besoj se këto vlera mund të rikthehen. Dhe për këtë do të angazhohem pa hezitim.

A do ta gjejë LDK-ja forcën për ta bërë këtë?

Kjo mbetet për t’u parë.

Unë do të vazhdoj të jem aty ku kam qenë gjithmonë:

në anën e parimeve, të votuesit dhe të së vërtetës.

Ju priftë e mbara!

Fituesi i zgjedhjeve në Hungari, Peter Magyar, ka thënë sot se Presidenti Tamas Sulyok do t’i kërkojë atij në seancën inauguruese të parlamentit të formojë qeverinë e ardhshme, e cila mund të betohet në detyrë nga mesi i muajit të ardhshëm ose disi më herët.

“Presidenti më ka informuar se do të më kërkojë në seancën inauguruese të parlamentit të ri të bëhem Kryeministër dhe të formoj një qeveri, si lider i partisë që mori më shumë vota”, tha Magyar pas takimit me Sulyok, raporton Reuters.

Lidhja Demokratike e Kosovës ia ka hapur dyert ish-Presidentes Vjosa Osmani, për t’u kthyer në këtë parti.

Anëtari i Kryesisë së kësaj partie, Visar Azemi, tha se LDK synon kthimin e të gjithë anëtarëve dhe se ka vend edhe për Osmanin.

“LDK’ja po synon rikthimin e të gjithë anëtarëve të saj, kështu që edhe për Vjosa Osmanin mund të ketë vend në LDK”, ka deklaruar Azemi në një konferencë për media.

As vetë Osmani nuk e ka përjashtuar rikthimin në LDK.

Para se t’i përfundonte mandati, Osmani kishte deklaruar se vendimin për rrugën përpara do ta marrë bazuar në interesin e vendit.

E pyetur specifikisht nëse është opsion rikthimi në LDK, Osmani tha se “do ta shoh se cili është interesi më i madh i Republikës së Kosovës në këto momente. Kjo do të determinohet edhe nga zhvillimet e tanishme”.

Në qershorin e vitit 2020, kryesia e LDK-së e shkarkoi Osmanin nga të gjitha postet partiake, për shkak të kundërshtimeve të shprehura lidhur me prishjen e koalicionit qeverisës me LVV-në dhe kundërshtimit të krijimit të qeverisë së udhëhequr nga Avdullah Hoti.