Category: Lajme

Peticioni me të gjitha pakënaqësitë e zyrtarëve policorë i është dërguar tashmë Kuvendit. I nënshkruar nga më shumë se 62% e punonjësve të policisë peticioni të martën iu dorëzua Komisionit për të Drejtat e Njeriut dhe Peticione.

Në të kundërtën po paralajmërohen veprime sindikale.

Policët në këtë peticion u ankuan ndaj Ligjit të Pagave, për sigurimet shëndetësore e jetësore, ligjin e pensionimit, rrezikshmëri dhe të tjera.

Të drejta kërkesat e tyre i konsideron anëtari i Komisionit për Siguri, Hisen Berisha.

Për shkak të pakënaqësive, Sindikata e Policisë kohë më parë kishte njoftuar se më shumë se 40 zyrtarë policorë kanë dhënë dorëheqje vullnetare që nga fillimi i viti. /atvlive.tv

Edicionin Qendror të lajmeve në ATV e gjeni në videon më poshtë:

Deputetja e GP të Lëvizjes Vetëvendosje, Jeta Statovci, e ka quajtur lajm të mirë vendimin e Senatit amerikan që e fut Kosovën në listën e vendeve të Evropës Lindore që kualifikohen për trajnime ushtarake të SHBA-së në mes të tensioneve të rritura në Ballkan.

Ajo ka thënë se partneriteti i Kosovës me SHBA-të nuk lëkundet dhe se këto ushtrime ushtarake do të jenë në shërbim të fuqizimit të sigurisë në rajon.

“Shpresoj që ky vendim i SHBA-ve të mos ketë dëshpëruar thellë dyshuesit skeptikë pushtet-varur, por partneriteti i Kosovës me SHBA-të nuk lëkundet. SHBA-të dhe Kosova do të zhvillojnë ushtrime ushtarake të përbashkëta, në shërbim të fuqizimit të sigurisë, paqes dhe stabilitetit në rajon”, ka shkruar ajo, teksa thotë se ShBA-ja qëndron afër Kosovës në të gjitha sferat.

“Vendimi i Senatit amerikan për ta ftuar edhe Kosovën në listën e vendeve me të cilat ushtria më e fuqishme në botë, ajo e SHBA-ve, bashkë me NATO-n, do të zhvillojnë ushtrime të përbashkëta ushtarake, është edhe një tjetër fakt se; SHBA-të i qëndrojnë afër Kosovës në të gjitha rrafshet. Përkushtimi i Kosovës për demokraci, paqe e stabilitet, është shkollë e marrë më së shumti nga SHBA-të. Vlerat tona të tolerancës, bashkëjetesës, lirisë dhe barazisë, ndahen me ato të SHBA-ve, duke krijuar kështu një partneritet të pa cenueshëm, besnik dhe vizionar”, ka shkruar tutje ajo.

Komuna e Prishtinës ka njoftuar se nga muaji gusht i këtij viti do të fillojë zbatimi i masave ndëshkuese për të gjitha lokalet që nuk respektojnë decibelët e lejuar për nivelin e zërit të muzikës.

Këtë njoftim, Komuna e Prishtinës e ka bërë në llogarinë e saj në Facebook.

“Sot u mbajt takim i frytshëm në mes Drejtorisë së Inspeksionit, zyrtarëve të Komunës së Prishtinës dhe anëtarëve të Shoqatës së Gastronomëve, ku kanë diskutuar për zbatimin sa më të lehtë dhe të mirë të rregullores për ndotjen akustike”, thuhet në njoftim.

Zyra e Rregullatorit të Energjisë i është drejtuar Gjykatës Kushtetuese lidhur me aktgjykimin e Supremes, përmes së cilit iu dha të drejtë qytetarëve për të kërkuar kompensim për faturimin që u është bërë për disa vite për rrymën e shpenzuar në katër komunat veriore. Nga ky institucion thonë se po presin sqarimet nga Kushtetuesja se si të veprojnë, saktësisht për formën se si do të kompensohen qytetarët.

Zyra e Rregullatorit të Energjisë nuk po e ka të qartë se si ta obligoj Operatorin e Sistemit të Shpërndarjes, që t’i kompensojë qytetarët për faturimin që u është bërë me vite për rrymën e shpenzuar në katër komunat veriore të vendit.

Për Aktgjykimin e Gjykatës Supreme, e cila u dha të drejtë qytetarëve që të kërkojnë kompensim, ZRRE i është drejtuar Gjykatës Kushtetuese të Kosovës.

Nga ZRRE i kanë thënë Gazetës Express se kanë kërkuar nga Kushtetuesja sqarime se si duhet të veprohet në këtë rast, meqë në Aktgjykim vetëm kërkohet nga ZRRE që të ndërmerr veprime për ta obliguar Operatorin e Sistemit të Shpërndarjes që të bëj kthimin e shumës së faturuar, por nuk specifikohet forma e mënyra.

“ZRRE, pas pranimit të Aktgjykimit të Gjykatës Supreme, brenda afateve ligjore ka parashtruar kërkesë pranë Gjykatës Kushtetuese të Republikës së Kosovës me datë. 24.05.2023, duke kërkuar nga Gjykata që të jepen sqarime se si duhet të veprohet në rastin konkret, marr për bazë se me Aktgjykimin në fjalë është kërkuar nga ZRRE që të ndërmerr veprime (pa e specifikuar formën, e as mënyrën), që ta obligoj Operatorin e Sistemit të Shpërndarjes, që të bëj kthimin e shumës së faturuar”, kanë deklaruar nga ky institucion.

Ky institucion thotë se është njoftuar nga Kushtetuesja në qershor se është regjistruar rasti dhe se janë në pritje të shqyrtimit nga Gjykata. Sapo të merret vendimi nga Kushtetuesja, ZRRE thotë se do t’i zbatojë në tërësi detyrimet ligjore dhe Kushtetuese sipas Aktgjykimit të Gjykatës Kushtetuese.

Zbatimi i këtij vendimi thonë se fillimisht ka qenë obligim i KEK’ut, por se me rastin e privatizimit ky obligim ka kaluar te KEDS. Pas ndryshimit të legjislacionit të sektorit të energjisë, ZRRE thotë se tash ky obligim ka kaluar te KOSTT.

“Po ashtu ju informojmë se zbatimin e vendimit V_399_2012 fillimisht e ka pasur për obligim KEK sh.a. me aktivitetin e Operatorit të Sistemit të Shpërndarjes, pastaj me rastin e privatizimit ky obligim ka kaluar te KEDS, si dhe me ndryshimet ligjore të legjislacionit të sektorit të energjisë ky obligim ka kaluar te KOSTT. Prandaj, krejt këto që i theksuam më lartë, kërkojnë qartësim ligjor dhe procedural për të ndërmarr veprime ligjore, dhe me rastin e marrjes së vendimit përkatës të Gjykatës Kushtetuese, ZRRE do ti zbatoj në tërësi detyrimet ligjore dhe Kushtetuese sipas Aktgjykimit të Gjykatës Kushtetuese”, thuhet në përgjigjen e ZRRE’së për Express.

Gjykata Supreme u ka dhënë të drejtë qytetarëve që të kërkojnë kompensim për faturimin që u është bërë për disa vite për rrymën e shpenzuar në katër komunat veriore, duke refuzuar kështu kërkesën e ZRRE’së.

Sipas Aktgjykimit të Supreme, ata kanë të drejtë për kthimin e këtyre mjeteve. Pretendimet lidhur me arsyetimin e mos inkasimit në këto komuna me shkaqe sigurie dhe mos pasjes qasje në leximin e njehsorëve në atë pjesë, Supremja i ka konsideruar si të paqëndrueshme.

“Prandaj, nuk janë të qëndrueshme pretendimet lidhur me arsyetimin e mos inkasimit në katër komunat e veriut me shkaqe sigurie dhe mos pasjes qasje në leximin e njehsorëve në atë pjesë, sepse nuk justifikohet që qytetarët tjerë për këto arsye të ngarkohen me pagesën e energjisë elektrike të harxhuar pa një bazë ligjore. Prandaj me këtë faturim dhe pagesë është bërë trajtim jo i barabartë i qytetarëve të Kosovës, e që bie ndesh me nenin 55 par. 4, të Kushtetutës, trajtim i pabarabartë, të cituar si në aktgjykimet e gjykatave të instancave më të ulëta, sepse është bërë kufizim i të drejtave të njeriut. Andaj bazuar në nenin 194 të LMD, konsumatorët, të cilët pa bazë ligjore dhe pa dijeninë e tyre janë faturuar dhe kanë paguar për energjinë e shpenzuar në veri, u lindë e drejta për kthimin e shumës së paguar si kanë vendosur gjykatat e instancave më të ulëta”, ka njoftuar Supremja.

Ndryshe, rrymën që kanë shpenzuar qytetarët në pjesën veriore të Kosovës, të banuar me shumicë serbe, e kanë paguar qytetarët e pjesëve të tjera të vendit, për18 vjet me radhë.

Refuzimi për të paguar rrymën ka ardhur si pasojë e mosbindjes qytetare por edhe ndikimit të strukturave të ndryshme në veri, që kanë operuar nën dirigjimin e Serbisë.

Për t’i shlyer këto borxhe, qytetarët e pjesëve të tjera të Kosovës, kanë paguar fatura për 3.5 përqind më të shtrenjta.

Nga viti 2017 e këndej, për shkak të ankesave të shumta të qytetarëve, Gjykata Kushtetuese e Kosovës e ka kaluar përgjegjësinë e pagesës te institucionet e vendit. Po atë vit, Gjykata e Apelit ka kërkuar që konsumatorët që kanë paguar rrymën e shpenzuar në veri për 18 vjet, të kompensohen.

Më 18 prill, Gjykata Supreme e ka refuzuar kërkesën e ZRRE’së që të rishshyrtohet aktgjykimi i Apelit, duke thënë se konsumatorëve duhet t’u rikthehen mjetet.

Në një postim të bërë në shkurt të këtij viti, Kryeministri Albin Kurti, ka thënë se se që nga viti 1999, për shkak të veprimeve të Serbisë, Kosova ka humbur mbi 300 milionë euro nga faturat e rrymës dhe ujit që serbët në veri nuk kanë paguar.

Kurti tha se për mospagesën e faturave në veri nuk kanë faj serbët që jetojnë atje, por ai për këtë fajësoi “strukturat paralele të kontrolluara nga Serbia”.

“Që nga viti 1999, Kosova ka humbur mbi 300 milionë euro për shkak të veprimeve të Serbisë, sikurse janë mbajtja e tarifave të transmisionit dhe detyrimi i tregtarëve që të paguajnë TVSH-në te Serbia për tregtinë tonë të energjisë elektrike. Edhe tani, refuzimi i Beogradit për të lejuar tregtinë Kosovë-Serbi, i kushton Kosovës deri në 10 milionë euro në muaj”, kishte shkruar Kurti.

Presidenti rus, Vladimir Putin, nuk do të marrë pjesë në një samit që do të mbahet në Afrikën e Jugut, sipas presidencës së këtij shteti.

Ky njoftim vjen pasi lideri i Afrikës së Jugut, ka thënë se çdo tentim për ta arrestuar Putinin nënkupton shpallje të luftës kundër Rusisë.

Nëse Putin largohet nga toka ruse, ai është subjekt i arrestimit, për shkak të një fletarrestimi të lëshuar nga Gjykata Ndërkombëtare Penale.

Afrika e Jugut është pjesëtare e gjykatës dhe i kërkohet të ndihmojë në arrestim të Putinit.

Ministri i Jashtëm rus, Sergei Lavrov, do ta përfaqësojë shtetin e tij në samitin dyditor, ka thënë zëdhënësi i presidentit të Afrikës së Jugut, Cyril Ramaphosa.

Vendimi për ta ftuar Putinin – i cili kërkohet për krime lufte në Ukrainë – në Afrikën e Jugut, ka nxitur diskutime të ashpra.

Partia më e madhe opozitare në Afrikën e Jugut, Aleanca Demokratike, ka kërkuar nga gjykata që t’i detyrojë autoritetet që ta arrestojnë Putinin nëse ai shkel në territorin e shtetit.

Dokumentet në gjykatë tregojnë se presidenti Ramaphosa ka qenë shumë kundër, duke thënë se përmes një veprimi të tillë kërcënohet siguria kombëtare.

Zëdhënësi i Kremlinit, Dmitry Peskov e ka mohuar që Moska i ka thënë Afrikës së Jugut që arrestimi i presidentit të saj nënkupton akt lufte, mirëpo është e qartë për të gjithë, “çfarë do të thotë një shkelje e tillë kundër presidentit të shtetit rus”.

Rusia e ka përshkruar vazhdimisht fletarrestimin si vendim ligjërisht të pavlefshëm, sepse shteti nuk është anëtar i gjykatës.

Samiti i shteteve Briks – akronim për Brazilin, Rusinë, Indinë, Kinën dhe Afrikën e Jugut – në gusht, shihet nga disa si alternativë ndaj samitit të grupit të shtatë vendeve më të industrializuara në botë – G7./REL/

Kryeministri i Kosovës, Albin Kurti, vlerëson se dorëzimi i instrumenteve për aderim shënon hapin përfundimtar për anëtarësimin e Republikës së Kosovës në Komisionin Ndërkombëtar për Personat e Zhdukur ICMP, si e vetmja organizatë ndërkombëtare e ngarkuar ekskluzivisht për të punuar në çështjen e personave të zhdukur.

Me anë të një postimi në llogarinë e tij në Facebook, kreu i ekzekutivit shprehet se sot, derisa përkujtojmë Masakrën e Rahovecit, nga e cila ende i kemi 11 persona të zhdukur, përkujtojmë më të dashurit e familjeve të shumta të popullit tonë të cilët u rrëmbyen e zhduken me forcë nga regjimi gjenocidal i Millosheviqit.

“Çështja e personave të zhdukur me forcë gjatë luftës në Kosovë është një çështje aktuale dhe permanente deri në zgjidhjen e plotë të saj. Ky anëtarësim është edhe një iniciativë e konkretizuar, për zbardhjen e fatit dhe vendndodhjes së personave të zhdukur me dhunë gjatë luftës në Kosovë”, shkroi Kurti.

Në ceremoninë e organizuar nga Ministria e Punëve të Jashtme të Holandës, Zëvendësministri i Punëve të Jashtme dhe Diasporës, Kreshnik Ahmeti, i shoqëruar nga Kryetari i Komisionit Qeveritar për Personat e Pagjetur, Andin Hoti dhe Ambasadori i Republikës së Kosovës në Mbretërinë e Holandës, Dren Doli, dorëzuan instrumentet e aderimit të Republikës së Kosovës në selinë e kësaj organizate të rëndësishme ndërkombëtare në Hagë.

Në mungesë të akuzuarit Sami Lushtaku dhe Sheremet Jashari, të mërkurën ka dështuar sërish seanca, në rastin ku të njëjtit po akuzohen për krim të organizuar dhe pengim të dëshmisë apo procedurës zyrtare si dhe frikësimin gjatë procedurës penale.

Në këtë rast së bashku me ta po akuzohen edhe Rrustem Rukolli, Rexhep Xhota, Skender Tahiri, Fatmir Mjaku, Bajram Dibrani, raporton “Betimi për Drejtësi”.

Lidhur me mungesën e të akuzuarit Lushtaku, mbrojtësi i tij avokati Artan Qerkini tha se i njëjti mungon për shkaqe shëndetësore, dhe ia dorëzoi gjykatës raportet mjekësore.

Ndërsa, mbrojtësi i të akuzuarit Jashari, avokati Osman Mehmeti tha se e ka njoftuar të njëjtin për seancën e sotme, por që për shkak së masës të arrestit shtëpiak për një çështje tjetër penale dhe pa një urdhëresë të gjykatës për sjellje në gjykim, ai nuk ka mundur të prezantoj në seancë.

Në mungesë të kushteve ligjore seanca u shty ndërsa seanca statusore u caktua më 22 shtator 2023.

Për shkak të mungesës së të akuzuarve Lushtaku dhe Mjeku kishte dështuar të mbahet edhe seanca e 5 qershorit të këtij viti.

Për të akuzuarit e lartcekur: Rrustem Rrukolli, Fatmir Mjaku, Rexhep Xhota, Skender Tahiri, Sheremet Jashari dhe Bajram Dibrani për pikat 16, 17 dhe 18 të aktakuzës, të cilat kanë të bëjnë me pengimin e dëshmitarëve ishte veçuar procedura.

Për këtë pjesë, bashkë me gjashtë të akuzuarit do të gjykohen edhe Sami Lushtaku dhe Ismet Haxha, të cilët gjithashtu do të gjykohen edhe për pjesën tjetër të aktakuzës, që ka të bëjë me arratisjen nga QKUK-ja.

Për pikat 16, 17 dhe 18 të aktakuzës, Sami Lushtaku, Ismet Haxha, Rrustem Rrukolli, Fatmir Mjaku, Rexhep Xhota, Skender Tahiri, Sheremet Jashari dhe Bajram Dibrani, ngarkohen me veprat penale “Pengimi i dëshmisë apo procedurës zyrtare”, “Frikësimi gjatë procedurës penale” dhe “Pjesëmarrja në grup të organizuar kriminal”.

Në këtë rast së bashku me të njëjtit ishin akuzuar edhe Emrush Thaqi, Shemsi Hajrizi, Sami Lushtaku, Sahit Jashari, Ismet Haxha, Mergim Lushtaku, Dardan Geci, Bashkim Dervisholli, Valon Behramaj, Argjent Behramaj, Yll Blakaj, Gzim Ahmeti, Xhevdet Zena, Mervete Hasani Lushtaku, Agim Ukaj, Ismail Dibrani, Sami Gjoka, Nexhib Shatri.

Gjykata Themelore në Prishtinë, më 5 prill të vitit 2018, kishte refuzuar kërkesat e mbrojtjes për hudhjen e aktakuzës dhe kundërshtimin e provave, me arsyetimin se kishte vërtetuar se nuk ka parashkrim të veprës penale dhe se mbrojtja nuk ka paraqitur prova të mjaftueshme për t’i aprovuar ato.

Ndërsa, Gjykata e Apelit, në korrik 2018, kishte refuzuar si të pabazuara ankesat e mbrojtjes për hudhje të aktakuzës dhe kundërshtim të provave dhe kishte lënë në fuqi aktvendimin e Gjykatës Themelore në Prishtinë.

Sipas kësaj gjykate, gjykata e shkallës së parë kishte vepruar drejt kur i kishte refuzuar këto kërkesa, pasi nuk ishin paraqitur asnjëra nga rrethanat e parapara në nenin 250 par.1 nënpar.1.1, 1.2, 1.3 dhe 1.4 të  Kodit të Procedurës Penale të Republikës së Kosovës.

Po ashtu, në këtë seancë trupi gjykues i udhëhequr nga gjykatësi Shashivar Hoti kishin aprovuar marrëveshjen e të akuzuarës Mirvete Hasani-Lushtaku me prokurorinë për pranimin e fajësisë ku e njëjta ishte dënuar me 3500 euro gjobë për veprën penale “Lehtësim të arratisjes së personit të privuar nga liria.

Gjykata Themelore në Prishtinë, më 14 prill 2020 kishte shpallur aktgjykimin në rastin e arratisjes së ish-kryetarit të Komunës së Skenderajt, Sami Lushtakut dhe të tjerëve nga Qendra Klinike dhe Universitare e Kosovës (QKUK), e cila kishte ndodhur në vitin 2014, derisa Lushtaku po merrte trajtim shëndetësor, në kohën kur ndodhej në paraburgim në rastin “Drenica”.

Për këtë arratisje nga QKUK, gjykata e kishte liruar nga akuza Lushtakun, por e kishte dënuar me 12 mijë euro gjobë për dy arratisje të tjera që kishin ndodhur më 21 gusht 2015 dhe më 22 shtator 2015.

Përveç Lushtakut, me nga 1 mijë euro gjobë ishin dënuar edhe gardianët të cilët kishin qenë në përcjellje të Lushtakut, Ylber Blakaj, Gëzim Ahmeti dhe Xhevdet Zena.

Ndërsa të gjithë të akuzuarit tjerë, përfshirë edhe djalin e Lushtakut, Mërgim Lushtakun si dhe Emrush Thaqi, Shemsi Hajrizi, Sami Gjoka, Nexhip Shatri, Ismajl Dibrani, Agim Ukaj, Ismet Haxha, Dardan Geci, Bashkim Dervisholli, Valon Behramaj dhe Argjent Behramaj, ishin liruar nga akuza.

Por, aktgjykimi ndaj të akuzuarit Thaqi dhe Shatri është anuluar nga Gjykata e Apelit.

“Gjykata e Apelit e ka anuluar aktgjykimin e gjykatës së shkallës së parë sa i përket pjesës liruese për pikat 1 dhe 2 për të akuzuarin E.Th. për dy vepra penale “keqpërdorimi i pozitës apo i autoritetit zyrtar”, dhe për të akuzuarin N.Sh. në pikën 14, për vepër penale “keqpërdorimi i pozitës apo i autoritetit zyrtar”, “falsifikim i dokumentit” dhe “lehtësim i arratisjes së personave të privuar nga liria”, dhe për pikën 15 për vepër penale “Keqpërdorimi i pozitës apo i autoritetit zyrtar”. Çështja penale për këto pika është kthyer ne rigjykim”, thuhej në komunikatën e Gjykatës së Apelit.

Për dy raste të keqpërdorimit të detyrës apo autoritetit zyrtar po akuzohet i pandehuri Thaqi, ndërsa për një vepër të kësaj natyre po akuzohet i pandehuri Shatri, i cili po dyshohet edhe për kryerjen e veprës penale “falsifikim i dokumentit” dhe veprës penale “lehtësim i arratisjes së personave të privuar nga liria”

Tutje Emshrush Thaqi dhe Nexhib Shatri ishin liruar në rigjykim nga akuza me aktgjykim të shpallur nga gjykatësi Agim Kuçi

Prokurori i EULEX-it, Romelu Matues, kishte ngritur aktakuzë ndaj Sami Lushtakut dhe të tjerëve më 17 nëntor 2016, të cilët i ngarkon me disa vepra penale e që lidhen me arratisjen e Lushtakut dhe të tjerëve nga QKUK, të cilët ishin dënuar në rastin e njohur si “Grupi i Drenicës”, dhe që në këtë qendër kishin shkuar për të marr shërbime mjekësore, për shkak të problemeve shëndetësore.

Ish-kryetari i Skenderajt, Sami Lushtaku, akuzohet për disa vepra penale “arratisje e personit të privuar nga liria”, “pengim të dëshmisë apo procedurës zyrtare si dhe frikësim gjatë procedurës zyrtare” si dhe “për pjesëmarrje në grup të organizuar kriminal”.

Për arratisjen nga QKUK, akuzohen edhe Sahit Jashari e Ismet Haxha.

Për veprën penale të pjesëmarrjes në grup të organizuar kriminal akuzohen edhe Ismet Haxha, Rrustem Rrukolli, Rexhep Xhota, Fatmir Mjakum Skender Tahiri, Sheremet Jashari dhe Bajram Dibrani.

Mërgim Lushtaku, Dardan Geci dhe Mervete Hasani Lushtaku, akuzoheshin për lehtësim të arratisjes së personave të privuar nga liria.

Bashkim Dervisholli, Valon Behramaj, Argjent Behramaj, akuzoheshin për veprën penale të ofrimit të ndihmës kryesve pas kryerjes së veprës penale si dhe lirim i jashtëligjshëm të personave të privuar nga liria.

Rrustem Rrukolli, Rexhep Xhota, Fatmir Mjaku, akuzoheshin për veprën penale pengimi i dëshmisë apo procedurës zyrtare si dhe frikësimin gjatë procedurës penale në bashkëkryerje.

Emrush Thaqi, Shemsi Hajrizi, Sami Gjoka dhe Nexhib Shatri, Ismajl Dibrani, Agim Ukaj akuzohen për keqpërdorim të pozitës apo autoritetit zyrtar. Gjoka e Shatri, gjithashtu akuzoheshin edhe për falsifikim të dokumenteve dhe lehtësim i arratisjes për personat e privuar nga liria

Ylber Blakaj, Gzim Ahmeti dhe Xhevdet Zena, akuzoheshin për lirim të jashtëligjshëm të personave të privuar nga liria.