Category: Lajme

Partia Demokratike e Kosovës përmes një aksioni simbolik ka reaguar përsëri për aferën “Droga”, ku ishte i përfshirë asamblisti i Lëvizjes Vetëvendosje në Prishtinë, Besnik Mujeci, i cili javën e kaluar u arrestua si pjesë e një grupi kontrabandues në Shqipëri, pasi iu zunë mbi 11 mijë e 300 doza drogë, që kapin shumën rreth gjysmë milioni euro.

Rinia e PDK-së ka vendosur një baner para Qeverisë së Kosovës me mbishkrimin “Konkurs për Diller të Drogës”, raporton Ekonomia Online.

Kryetari i Rinisë Demokratike të Kosovës në Prishtinë, Trim Syla ka thënë se sot, në emër të Lëvizjes Vetëvendosje, po e shpallin këtë konkurs.

“Siç e dini, asamblisti i kësaj partie është zënë me drogë, me 11.300 doza ekstazi, prandaj, e kuptojmë që kanë mbetur keq për shpërndarës të drogës brenda dhe jashtë Kosovës”, theksoi ai.

Syla tha se Qeveria Kurti mund të mos ketë libra dhe bukë për qytetarët, po drogë ka me bollëk.

“Sot, kur po flasim, sipas Agjencisë së Statistikave të Kosovës, nga mbi 1.2 milion qytetarë në moshë pune, mbi 77 mijë janë të papunë dhe mbi 750 mijë janë ekonomikisht joaktivë. Ndërkaq, rreth 100 mijë të rinj e kanë lëshuar vendin në dy vitet e fundit. As nuk po mund ta paramendojmë edhe sa të tjerë do të ikin nga janari. Përdorimi dhe shpërndarja e drogës nga partia në pushtet, po i ndihmon edhe njërës edhe tjetrës. Kjo Qeveri ndoshta libra edhe bukë nuk ka, po drogë ka sa të duash”, shtoi ai.

Pas vdekjes së pacientit nga zjarri në Klinikën e Psikiatrisë në QKUK, ka reaguar deputeti, njëherit dhe anëtari i Komisionit për Shëndetësi Bekim Haxhiu. Ai ka thënë se vdekja e pacientit në klinikë është dhe një dështim i radhës dhe paaftësi e kujdesit ndaj pacientëve.

“Vazhdon shtimi i skandaleve në shëndetësi. Vdekja e pacientit dhe asfiksimi i stafit mjekësor si pasojë e zjarrëvënies në Klinikën e Psikiatrisë është dështimi i radhës, është paaftësia në kujdesin ndaj pacientëve dhe menaxhim shëndetësor. Çka dhe sa raste e skandale duhet të ndodhin që dikush të marrë përgjegjësinë për vdekjet e shumta që po ndodhin në SHSKUK, si dhe shkatërrimin e sistemit tonē shëndetësor?”, ka shkruar Haxhiu.

Ndërsa ka thënë se dikush duhet të jap përgjegjësi për rastin në fjalë.

“Përse janë gjetur mjete rrethanore të rrezikshme te pacienti psikiatrik siç po përshkruhet me shenja agresiviteti? A është dashur të largohen ato mjete, të kontrollohen hapësirat dhe pacientët për mbajtje të mjeteve të rrezikshme? Dikush duhet të jap llogari dhe përgjegjësi për këtë rast dhe shumë té tjera”, ka shkruar Haxhiu.

Departamenti i Drejtësisë në Shtetet e Bashkuara të Amerikës njofton se ka sekuestruar mbi 1.4 miliardë dollarë të vjedhura nga fondet e ndihmës për të përballuar pandeminë e koronavirusit, teksa në të gjithë vendin po hetohen mbi 3 mijë persona për vjedhje.

Sipas Zërit të Amerikës, akuza federale janë ngritur kundër 371 të dyshuarve për vepra që lidhen me mashtrime që kapin vlerën mbi 836 milionë dollarë.

“Kjo çështje, që përfshin mbi 300 të pandehur dhe mbi 830 milionë dollarë në mashtrime, duhet të dërgojë një mesazh të qartë: situata emergjente e krijuar nga pandemia mund të ketë përfunduar, por puna e Departamentit të Drejtësisë për të identifikuar dhe ndjekur penalisht ata që vodhën fondet e pandemisë nuk ka përfunduar”, tha në një deklaratë Prokurori i Përgjithshëm Merrick Garland.

Shtetet e Bashkuara po hetojnë shumë raste mashtrimi të lidhura me programet e ndihmës së qeverisë. Në maj të vitit 2021, prokurori Garland formoi një grup pune për të hetuar mashtrimet me ndihmat kundër pandemisë.

Sipas një agjencie federale, ka të ngjarë që të jenë vjedhur mbi 200 miliardë dollarë nga programet e ndihmës kundër COVID-19, kjo edhe për arsye se në përpjekje për të përshpejtuar ndarjen e fondeve për pandeminë, administrata kishte ulur masën e kontrollit.

Një grua rreth moshës 35 vjeçare ka humbur jetën në Malishevë, pasi që e njëjta ishte paraqitur në një klinikë në këtë komunë për hequr një dhëmb ku më pas i ishte komplikuar gjendja shëndetësore.

Pas komplikimit të gjendjes shëndetësore e njëjta ishte dërguar për trajtim në QKUK, mirëpo viktima kishte arritur pa shenja jete.

Lidhur me rastin Policia e Kosovës të mërkurën njoftoi se ka arrestuar dy persona, një burrë dhe një grua të dyshuar për trajtim të pandërgjegjshëm mjekësor.

E tashmë Prokuroria Themelore në Gjakovë ka parashtruar kërkesën për paraburgim për dy të arrestuarit.

Kështu ka bërë të ditur për Telegrafin, zyrtari i lartë për bashkëpunim profesional në këtë Prokurori, Hekuran Batusha.

“Prokurori i rastit ka parashtruar kërkesën për paraburgim ndaj të dyshuarit XH.K për veprën penale “Trajtim i pandërgjegjshëm mjekësor” dhe veprën tjetër penale “Ushtrim i kundërligjshëm i veprimtarisë mjekësore ose farmaceutike”.

Ndërkaq për të dyshuarën H.K gjithashtu është bërë kërkesa për paraburgim për veprën penale “Ushtrim i kundërligjshëm i veprimtarisë mjekësore ose farmaceutike” si dhe “Rastet e posaçme të falsifikimit të dokumenteve””, ka thënë Batusha.

Ministria e Shëndetësisë gjatë të mërkurës në një njoftim për media, tha se institucioni privat shëndetësor në Malishevë, në të cilin u trajtua 35-vjeçarja që shkoi për ta hequr një dhëmb e vdiq pasi iu komplikua gjendja, ka ushtruar veprimtari ilegale.

Në një njoftim për media lidhur me këtë rast, Ministria ka bërë të ditur se përmes Inspektoratit Shëndetësor, në bashkëpunim me Policinë e Kosovës, “menjëherë kanë ndërmarrë të gjitha veprimet konform kompetencave pas rastit tragjik që rezultoi me fatalitet për një qytetare”.

Ministri i Shëndetësisë, Arben Vitia ka reaguar lidhur me këtë rast, ku tha se të gjithë janë të tronditur.

Ai ka deklaruar se ky rast tragjik shënon një moment vendimtar për ndalimin e pandëshkueshmërisë dhe papërgjegjshmërisë në praktikat e licencimit.

“Kam kërkuar me gjithë fuqinë që më jep ligji që të kontrollohet çdo hap e veprim i komisionit vlerësues që i paraprinë licencimit. Dhe çdo procedurë. Ndaj përgjegjësve, do të ketë masa. Në rast të evidentimit të shkeljeve penale ato do të procedohen menjëherë në organet e drejtësisë”, ka shkruar Vitia.

Ministrja e Punëve të Jashtme dhe Diasporës, Donika Gërvalla tha se Kosova e dinë se çfarë nënkupton pavarësia.

Sipas saj, gjithë qytetarët e Kosovës e kanë ndjerë agresionin dhe luftën.

“Kjo ditë është histori, qëndresë dhe pavarësi. Ju e keni ndjerë vet, por do të mundohem të shpjegoj se pse ju jeni të veçantë. Unë isha e detyruar ta lë Kosovën, gjithçka që e kishim e lamë prapa. Ne ishim vetëm një familje, në mesin e mijëra familjeve. Ne jemi më të vogël se Ukraina, sa i përket agresionit ne e ndjemë në lëkurën tonë se si është të jesh target i agresionit. E dimë që historia juaj po mohohet”, tha ajo.

Kështu u shpreh ajo në diskutimin me gazetarët ukrainas të strehuar në Kosovë, në kuadër të programit “Journalists-in-Residence Kosovo”.

Gërvalla shtoi se Kosova mbështet Ukrainën dhe është e bindur se do të fitojë.

“Kosova qëndron me Ukrainën e re, dëshiron të ju mbrojë juve. Ukraina do të gëzojë sovranitetin dhe pavarësinë e plotë. Jam e bindur se do të festojmë bashkë me ju fitoren”, shtoi ajo.

Gjykata Themelore në Pejë e ka liruar nga akuza të akuzuarin Bujar Rexhaj për veprat penale të ricilësuara vrajse e mbetur në tentativë e kryer në mbrojtje të nevojshme si dhe lëndim i lehtë trupor. Ndërkaq, ndaj të miturit A.M për veprën penale vrasje e mbetur në tentativë, gjykata ka shqiptuar masën edukative: dërgim në institucionin edukativo-korrektues.

Sipas aktgjykimit të përpiluar më 11 nëntor 2022, aktgjykimi ndaj dy të akuzuarve ishte shpallur më 10 tetor 2022 nga gjykatësja Nushe Kukaj-Mekaj.

Sipas aktgjykimit të siguruar nga “Betimi për Drejtësi”, i akuzuari Rexhaj ishte liruar nga akuza, me arsyetimin se veprat penale në mbrojtjen e nevojshme nuk paraqesin vepër penale.

Në aktgjykim, thuhet se masa ndaj të miturit A.M., shqiptohet në kohëzgjatje prej një viti, në të cilën masë llogaritet edhe koha e kaluar në arrest shtëpiak nga 18 korriku 2020 deri më 2 qershor 2021.

Në arsyetimin e aktgjykimit, thuhet se është plotësuar kushti i parë, ku vërtetohet me faktin se i mituri A.M ka kryer veprën penale të rëndë për të cilën parashihet dënimi me burgim mbi pjesë vjet. Kurse, kushti i dytë ku parashihet dënimi që të miturit më parë i është shqiptuar masa edukative ose dënimi me burgim, nuk është plotësuar, por kjo nuk kishte ndikuar me rastin e marrjes së vendimit.

Tutje, me arsyetim se kur kanë të bëjnë me të mitur të cilët kanë çrregullime të rënda të edukimit dhe kanë kryer vepër të rëndë penale edhe pa i plotësuar kumulativisht dy kushtet, mund të shqiptojë këtë masë edukative, ku në rastin konkret Gjykata erdhi në përfundim se kohëzgjatja e caktuar e masës së shqiptuar është duke marrë parasysh interesin më të mirë për të njëjtin.

Shpenzimet e procedurës penale bien në mjete buxhetore të kësaj Gjykate, kurse i dëmtuari Rrahim Shpatollaj për realizimin e kërkesës pasurore-juridike udhëzohet në kontest civil.

Ndryshe, vendimi i Gjykatës Themelore në Pejë është atakuar në Apel, mirëpo kjo e fundit ende nuk ka marrë vendim lidhur me rastin.

Sipas aktgjykimit të Gjykatës së shkallës së parë, i akuzuari Bujar Rexhaj akuzohej për veprën penale të ricilësuar në vrasje e mbetur në tentativë e kryer në mbrojtje të nevojshme, nga neni 172 lidhur me nenin 28 dhe nenin 12 të Kodit Penal dhe veprës penale të ricilësuar lëndim i lehtë trupor e kryer në mbrojtjen e nevojshme, nga neni 185, par. 2 lidhur me par.1, pika 14 dhe neni 12 të Kodit Penal.

Ndryshe, sipas aktakuzës të ngritur më 15 shtator 2020 nga Prokuroria Themelore në Pejë e akuzonte të pandehurin Bujar Rexhaj për shkak të veprës penale të vrasjes të mbetur në tentativë ndaj të miturit A.M.

Sipas aktakuzës, i akuzuar Rexhaj më 14 korrik 2020 në fshatin Dubravë, me dashje ka tentuar ta privojë nga jeta të miturin A.M për shkak të mosmarrëveshjeve rreth një borxhi në vlerë prej afro 30 eurove, të cilin borxh pretendonte se i pandehuri ia kishte i mituri pasi që ia kishte shitur qenin.

Sipas akuzës, pasi i pandehuri Rexhaj dhe i mituri nxjerrin thikat, i pandehuri e godet të miturin nëntë herë me thikë, duke i shkaktuar lëndime të rënda trupore.

Prokuroria e ngarkonte të pandehurin Rexhaj edhe për veprën penale të lëndimit të lehtë trupor, se në përleshje e sipër, në momentin kur dëshmitari Rrahim Shpatollaj kishte ndërhyrë në mes për t’i ndarë, i pandehuri e godet me brisk edhe dëshmitarin Shpatollaj duke i shkaktuar lëndime të lehta trupore.

Prokuroria e Pejës të miturin e ngarkonte po ashtu me veprën penale të vrasjes së mbetur në tentative dhe ndaj tij kishte bërë propozim për shqiptimin e masës institucionale, dërgimin e tij në institucionin edukativo-korrektues.

Sipas Prokurorisë, gjatë përleshjes e sipër mes të pandehurit Rexhaj dhe të miturit, ky i fundit e godet me thikë të pandehurin Bujar dy herë duke i shkaktuar lëndime të rënda trupore.