Category: Lajme

Përfaqësuesi i lartë i BE-së për politikën e Jashtme Josep Borell ka dënuar ashpër sulmin e fundit në spitalin Gaza dhe jo vetëm.

Në fjalën e tij në Parlamentin Europian, ai theksoi se Izraeli ka të drejtë të mbrohet si çdo vend që sulmohet, por “jemi të gjithë dakord kur themi se nuk mund të bëjmë banorët e Gazës përgjegjës për Hamasin”. Borell dënon veprimet e Hamasit duke e cilësuar si një organizatë terroriste që nuk kërkon paqe, por vetëm shkatërrim.

“Izraeli ka të drejtë të mbrohet, si çdo vend që sulmohet në atë mënyrë, por ne jemi të gjithë të bashkuar duke thënë se e drejta për mbrojtje ka kufij, në këtë rast të sanksionuar nga e drejta ndërkombëtare humanitare. Ne duhet të dënojmë sulmet terroriste kundër Izraelit, por edhe sulmet kundër civilëve palestinezë. Ne nuk mund t’i bëjmë të gjithë banorët e Gazës përgjegjës për Hamasin. Për ne, Hamasi është një organizatë terroriste që nuk ka dashur kurrë paqe, por vetëm shkatërrim”, u shpreh ndër të tjera Borrell.

Protesta e paralajmëruar që do të mbahet sot (e mërkurë) nga specializantët para Ministrisë së Shëndetësisë shkaku i pakënaqësive të tyre lidhur me pagesat, është anuluar. Specializantët kanë biseduar me ministrin e Shëndetësisë, Arben Vitia lidhur me kërkesat e tyre, dhe ky i fundit u ka premtuar zgjidhje.

Përfaqësuesi i specializantëve, Arianit Zajmi për KosovaPress tregoi se ministri i Shëndetësisë, Arben Vitia lidhur me pagesat për kujdestaritë e mbajtura nga muaji shkurt, tha se nuk ka ligj që Ministria e Shëndetësisë mund t’i kompensojë ato.

Zajmi shtoi se sa i përket vendimit për të paguar nga 500 euro për vit për specializim, Vitia ka thënë se nëse ekspertët ligjor mund të argumentojnë se një gjë e tillë mund të anulohet apo ndryshohet, do të shikon mundësitë për rishqyrtim.

“Sa i përket çështjes së kujdestarive që i kemi mbajtur nga muaji shkurt, dhe që nuk janë kompensuar fare, ministria ka thënë që ato kujdestari nuk ka ligj që mund t’i kompensojë Ministria e Shëndetësisë, ato kanë humbur, kjo e para. E dyta, sa i përket vendimit ka 500 euro për detyrim të shkollimit… dhe 100 euro për specializantët jashtë Kosovës, ka thënë që nuk ka të drejtë ministri i Shëndetësisë me marrë vendim mbi ligj, për shkak se ka thënë se kjo është e përcaktuar me ligj. Unë ia kam parashtruar një pyetje ministrit i kam thënë që unë kam folur me ekspertët ligjorë dhe ekspertët ligjor më kanë treguar për disa rrugë ligjore, përmes të cilave nëse i zbatojnë mund të anulohet ky vendim dhe mund të ndryshohet. Ministri më është përgjigjur nëse më të vërtetë i gjen ekspertë që thonë kështu dhe më argumentojnë, ministri do t’i pranoj…Është treguar i hapur për këtë çështje, por ka thënë edhe një herë, përderisa nuk ka rrugë ligjore, kjo mbetet 100 për qind që jo”, tha Zajmi.

Po ashtu, lidhur me kërkesën e tyre për kujdestari, Zajmi tha se ministri Vitia u ka premtuar se në fund të muajit tetor apo në fillim të muajit nëntor do t’i pajisini specializantët me aneks kontrata. Ai beson që këto aneks kontrata do të jenë në proporcion me Ligjin e ri të pagave.

“Dhe e treta sa i përket kujdestarive ka thënë që ka fundi i këtij muaji, eventualisht në fillim të muajit të ardhshëm ne do t’i marrim aneks kontratë, në bazë të cilave çdo kujdestari do të kompensohet me pagesë…Po mbetet të pritet se si do të jenë ato aneks kontrata, por po besoj që duhet të jena në proporcion me Ligjin e ri të pagave”, tha Zajmi.

Ndërkaq, specializantët protestën e filluan që javën e kaluar, për të vazhduar edhe këtë javë. Kërkesat e tyre kanë të bëjnë me mos pagesën e kujdestarive sipas Ligjit të ri të pagave si dhe mos pagesën e kujdestarive me subvencione prej muajit shkurt.

Ata gjatë javës së kaluar protestuan për mos pagesën e kujdestarive prej muajit shkurt dhe kundër detyrimit për të paguar vitin e shkollimit specialistik 500 euro për një vit.

Qeveria e Kosovës ka zhvilluar mbledhje elektronike.

ZKM ka njoftuar se në këtë mbledhje është miratuar vendimi për fillimin e procedurave për blerjen e objektit për nevoja të ambasadës së Kosovës në Berlin dhe blerjen e objektit rezidencial në Washington.

“Qeveria e Republikës së Kosovës ka zhvilluar mbledhje elektronike, në të cilën është miratuar vendimi për fillimin e procedurave për blerjen e objektit për nevoja të Ambasadës së Republikës së Kosovës në Berlin, Republika Federale e Gjermanisë, si dhe blerjen e objektit rezidencial, në Washington D. C., në Shtetet e Bashkuara të Amerikës”, thuhet në njoftim.

Edhe pse kanë kaluar afër 10 muaj që nga vrasja e 3 janarit 2023 në lokalin “Kobra City” në Prizren, ku humbi jetën i riu nga Kukësi, V.C., Prokuroria ende nuk ka ngritur aktakuzë për këtë rast.

Kjo është bërë e ditur për “Betimi për Drejtësi” nga zëdhënësi i Prokurorisë Speciale të Republikës së Kosovës, Ekrem Lutfiu.

Sipas Lutfiut, akoma nuk është ngritur aktakuzë lidhur me këtë rast, dhe po sa të ngritet e njëjta do bëhet publike përmes njoftimit publik për media.

Ndryshe, në këtë rast sipas Prokurorisë, Dibran Hoxha i njohur si “Kobra” po dyshohet për veprat penale “Vrasje e rëndë”, armëmbajtje pa leje dhe manipulim me prova. Kurse, Arben Vezaj, Burim Mazreku, Jesmir Badalli, Kujtim Gashi dhe Enver Amrallahi, po dyshohen për veprën penale “Pjesëmarrja në rrahje”.

Ndërsa, i dyshuari i shtatë Roland Susurit, dyshohet për veprat penale “Pjesëmarrja në rrahje” dhe “Manipulimi me prova”.

Kujtojm se Gjykata Themelore në Prishtinë më 25 gusht 2023, ia ka vazhduar masën e paraburgimit edhe për dy muaj Dibran Hoxhajt i njohur si “Kobra”, i dyshuar për vrasjen e të riut nga Kukësi, V.C., në Prizren.

Ndërkaq, lidhur me të dyshuarin Roland Susuri, Gjykata Supreme më 16 gusht 2023, kishte aprovuar kërkesën e mbrojtjes për mbrojtje të ligjshmërisë, duke ia zëvendësuar kështu masën e paraburgimit me atë të lajmërimit në stacion policor.

Kurse, për të dyshuarit Arben Vezaj dhe Jesmir Badalli si masë të fundit Gjykata ua kishte caktuar masën e arrestit shtëpiak, por ndaj të njëjtëve, sipas Themelores, Prokuroria nuk ka paraqitur kërkesë për vazhdim ose ndryshim të kësaj mase.

Gjithashtu, Gjykata edhe ndaj të dyshuarit Burim Mazreku si vendim të fundit kishte caktuar masën e paraqitjes në stacion policor dhe po ashtu për të njëjtin, nga Gjykata u bë e ditur se Prokuroria nuk ka paraqitur kërkesë për vazhdim ose ndryshim të masës.

Kurse, ndaj të dyshuarit Enver Amrllahu, me vendimin e 19 prillit 2023 i ishte zëvendësuar masa e paraburgimit me atë të dorëzanisë, si dhe të dyshuarit Kujtim Gashi i ishte zëvendësuar masa e paraburgimit me atë të lajmërimit në stacion policor. Për Amrllahun dhe Gashin, po ashtu u tha se nuk është paraqitur kërkesë për ndonjë masë.

Lidhur me masat e sigurisë ndaj të dyshuarve: Arben Vezaj, Jesmir Badalli, Burim Mazreku, Kujtim Gashi dhe Enver Amrllahu, prokurorja e çështjes Merita Bina-Rugova, në një përgjigje dhënë për “Betimi për Drejtësi”, kishte thënë se të njëjtëve, masa e fundit iu është zëvendësuar me paraqitje në stacion policor.

“Këta të pandehurit kanë qenë në paraburgim, e pastaj me masën e arrestit shtëpiak dhe në fund paraqitje në stacion policor”, thuhet në përgjigjen e prokurores.

Në kërkesën e Prokurorisë thuhet se më 3 janar 2023, rreth orës 04:00, në afërsi të lokalit të tij “Kobra City”, që gjendet në rrugën magjistrale Prizren- Zhur, me armë zjarri, me dashje e privon nga jeta viktimën V.C, duke vë në rrezik jetën e të dëmtuarit R.Sh, të cilin e plagos dhe duke vënë në rrezik edhe jetën e të dëmtuarit A.B, që të tre shtetas të Republikës së Shqipërisë.

“Për shkak të një mosmarrëveshje paraprake që kishin pas rreth pagimit të faturës në lokal, fillon përleshja në mes punëtorëve në lokalin “Kobra City”, me të dëmtuarit ku pas kacafytjeve dhe rrëmujës së krijuar në lokal, të dëmtuarit dalin nga lokali dhe pasi hypin në veturën “Mercedes” FA 19-PFX, me targa angleze, për tu larguar në parkingun e lokalit, paraqitet i dyshuari Dibran Hoxha, i cili me armë zjarri shtënë në drejtim të veturës, me ç’rast e qëllon të dëmtuarin V.C, i cili kishte qenë i ulur në ulësen e pasme të veturës dhe R.Sh, i cili kishte qenë i ulur në ulësen e përparme, dhe si pasojë e këtyre të shtënave me armë zjarri V.C ndërron jetë rrugës për në Spitalin e Kukësit, derisa R.Sh nga plagët e marra nga Kukësi dërgohet në spitalin e Tiranës”, thuhet në kërkesën e Prokurorisë.

Me këtë, Hoxha dyshohet se ka kryer veprën penale “Vrasje e rëndë” nga neni 173, par.1, nënpar, 1.5 të Kodit Penal.

Sidoqoftë, dy ditë pas vrasjes së V.C, më 5 janar 2023, Instituti i Kosovës për Drejtësi (IKD) kishte publikuar analizën me titull “Dështimi i shtetit ndaj “Kobrës”. Edhe në analizën e IKD-së, të publikuar në shkurt të vitit 2022, ishte theksuar se Dibran Hoxhaj ka 16 aktgjykime dënuese të formës së prerë. Ky recidivist në medie proklamohej se ka kryer 198 vepra penale, derisa bënte të ditur se e gjithë kjo e kaluar e tij kriminale filloi me rastin e hapjes së lokalit të lartcekur. Sipas IKD-së, në të gjitha këto raste, është paraparë mundësia e aplikimit të dënimeve më të ashpra ndaj tij, por se në asnjë prej tyre, i njëjti nuk është dënuar me burgim efektiv, as pasi i njëjti kishte përsëritur këto vepra penale dhe ishte recidivist. Për veprat penale për të cilat është dënuar Hoxhaj, dënueshmëria sipas ligjit ka shkuar deri në 10 vite burgim. “Betimi për Drejtësi” ia ka kushtuar edhe një emision Dibran Hoxhajt me titull ” Recidivisti i “amnistuar”.

Pas tri javësh që kur ndodhi sulmi terrorist në Banjskë, është hapur edhe pika tjetër kufitare me Serbinë, ajo e Jarinjes.

Lajmin e ka konfirmuar zëvendësdrejtori i Policisë së Kosovës për rajonin e veriut, Veton Elshani.

Sipas tij, sot rreth orës 8:30 është hapur pika kufitare në Jarinje, ndërsa Policia do të zbatojë kontrolle të shtuara këtu.

“Të mërkurën në ora 8:30 është hapur për qarkullim pika kufitare në Jarinje që lidhë Kosovën me Serbinë. Policia do të zbatojë kontrolle të shtuara të automjeteve dhe qytetarëve, sipas nevojës, ndërsa deri tani gjithçka është duke shkuar në rregull dhe pa ndonjë problem”, ka thënë nënkoloneli Elshani.

Ndërsa, pika kufitare në Bërnjak ishte hapur më 9 tetor.

Mbyllja e vendkalimeve kufitare të Jarinjes dhe Bërnjakut me Serbinë ishin vendosur nga data 24 shtator, pas sulmeve terroriste në Banjskë të Zveçanit.

Një ngjarje e rëndë ka ndodhur në Pojatë të Ferizajt, ku një person dyshohet të ketë kryer vetëvrasje.

Viktima, mashkull kosovar, u gjet pa shenja jete në oborrin e shtëpisë së tij, mbrëmë rreth orës 20:30.

Policia njofton se vdekjen e viktimës e ka konstatuar ekipi mjekësor.

“Me vendim të prokurorit kujdestar, trupi i viktimës dërgohet në IML për obduksion” thuhet në njoftimin e Policisë.

Rasti është cilësuar si “Vetëvrasje”.

Sot në vendin tonë parashihet të mbajë mot kryesisht me vranësira, derisa në zonat malore pritet të ketë edhe reshje shiu.

Temperaturën minimale për ditën e sotme do ta mbajë Ferizaj me 9 gradë Celsius, ndërsa atë maksimale Gjilani me 17 gradë Celsius.

Edhe dita e nesërme do të jetë me kushte të njëjta atmosferike. Temperaturën minimale për ditën e nesërme do ta mbajë qyteti i Ferizajt me 5 gradë Celsius, ndërsa atë maksimale Gjilani me 17 gradë Celsius.

Ndërkohë, në Shqipëri do të ketë mot me diell dhe vranësira. Temperaturën minimale do e ketë Korça me 11 gradë Celsius, ndërsa ajo maksimale do të jetë në Gjirokastër me 24 gradë Celsius. /atvlive.tv/

Parashikimin e plotë të motit, për rajon dhe Evropë mund ta gjeni në videon e mëposhtme:

https://youtu.be/3_pRpCRFde0?t=3856