Category: Lajme

Përgatiti: Krenare Mulliqi

Me karrocat e tyre vendosën të bëjnë një shëtitje 30-minutëshe në rrugët e kryeqytetit. Në këtë shëtitje për ta shënuar ditën ndërkombëtare të përdoruesve të karrocës, dolën edhe zyrtarë nga komuna e Prishtinës

Kërkesat e përdoruesve të karrocës janë të pakta, por kryesorja është qasja për lëvizjes.

Në anën tjetër, nënkryetarja e Komunës së Prishtinës u premtoi mbështetje në planet që i kanë për të ardhmen.

Në Kosovë llogariten të jenë afro 4 mijë qytetarë përdorues të karrocës.

Ndërkaq, shumë institucione edhe publike nuk kanë qasje për lëvizje për këtë kategori.

Përgatiti: Nora Luta

Përveç në zyrën alternative në Çabër, qytetarët e Zubin Potokut nga java e fundit e muajit shkurt, mund të marrin shërbime komunale në objektin komunal.

Për herë të parë pas nëntë muajsh, komuna veriore që drejtohet nga Izmir Zeqiri po kryen shërbime për qytetarë, në objektin që vazhdon të sigurohet nga Policia e Kosovës.

Zeqiri ka konfirmuar për ATV-në se janë funksionalizuar tri zyra që do të ofrojnë shërbime për pajisje me dokumente identifikuese, regjistrim të automjeteve dhe të bizneseve. Ai shtoi se gradualisht e gjithë puna do të kryhet nga ky objekt.

E disa nga ta që pranuan të flasin para kamerës u shprehën të lumtur me rikthimin e punës.

Komuna e Zubin-Potokut nga maji i vitit 2023 udhëhiqet nga Izmir Zeqiri nga Partia Demokratike e Kosovës, pas zgjedhjeve komunale që u mbajtën në katër komunat me shumicë serbe në veri.

Por Zeqiri postin e tij e ushtron ende nga zyra në Çabër, pasi qytetarët kundërshtuan futjen e kryetarëve të rinj shqiptarë, në objektet komunale dhe prezencën e policisë.

Zgjedhjet sollën tensione jo vetëm në Zubin Potok, por edhe në Zveçan e Leposaviq.

Objektet komunale po vazhdojnë të sigurohen nga Policia, teksa në Zveçan javën e kaluar u tërhoqën pjesëtarët e KFOR-it.

Përgatiti: Nora Luta

Të pakënaqur me ndarjen e drejtësisë nga gjykata e shkallës së parë, familja Muja po kërkon verdikt ndryshe nga Gjykata e Apelit.

Gjykata Themelore e Prishtinës e dënoi Xhafer Bardhin me burgim të përjetshëm për vrasjen e B.M dhe A.M, vetëm 15 vjeç, por e liroi të birin e tij. Avokat i familjes tha se vendimin për lirimin e djalit të Xhaferit, e konsideron të padrejtë, për çka kërkoi që rasti të kthehet në rigjykim.

Me vendimin e gjykatës së shkallës së parë nuk është pajtuar as mbrojtja e të dënuarit, e cila nga kolegji i Apelit, kërkoi që rasti të kthehet në rigjykim.

Ndërkohë, qëndrimi në seancë për familjarët e viktimave u bë i pamundur, pasi gjendja e tyre emocionale u përkeqësua kur Gjykata deshi t’ua japë fjalën, siç e kërkon procedura.

Gjykata Themelore e Prishtinës për vrasjen që ndodhi në vitin 2021, në tetor të 2023-s, e dënoi me burgim të përjetshëm Xhafer Bardhin, ndërsa djalin e tij, Amir Bardhin e kishte liruar nga akuza.

Sipas aktakuzës, Bardhi në bashkëkryerje kishte privuar nga jeta A.M, dhe prindin e tij, për shkak të një mosmarrëveshjeje pronësore rreth së drejtës së shfrytëzimit të një parcele në pyllin e fshatit Gradicë të Drenasit.

Përgatiti: Arton Hamiti

Ndonëse rryma në katër komunat veriore ka nisur të faturohet që nga 1 janari, sistemi energjetik brenda territorit vazhdon të mos kontrollohet tërësisht nga ana e institucioneve të Kosovës.

Operatori i Sistemit të Transmisionit dhe Tregut, vazhdon të mos ketë qasje në nënstacion e Vallaçit. Këtu gjatë së premtes, nuk u panë as punëtorë, derisa hyrja brenda nuk ishte e mundur. Brenda rrethojave të nënstacionit më verior të Republikës, ishin të parkuara disa vetura pa ndonjë logo.

Megjithëse, KOSTT-i njoftoi se ka nisur procedurat, nuk dha ndonjë përgjigje konkrete se kur pritet të ketë qasjes fizike.

“KOSTT-i ka themeluar Grupin Punues dhe ka njoftuar ZRRE-në, në lidhje me autorizimet për qasje dhe analizë. KOSTT-i, gjithashtu, ka përgatitur Planin Aksional, përfshirë veprimet konkrete të nevojshme rreth qasjes fizike dhe analizave të gjendjes së aseteve të transmetimit të KOSTT-it, në pjesën veriore të Sistemit të Transmetimit të Kosovës. Për më shumë, ju lutem drejtohuni ZRRE-së dhe Qeverisë së Kosovës, si organe kompetente për mbikëqyrjen e procesit për respektimin e Udhërrëfyesit”, thuhet në njoftimin e KOSTT-it.

Por, Zyra e Rregullatorit për Energji konfirmoi se vendimi për qasje është në kompetencën e plotë të KOSTT-it.

“Sa i përket autorizimit për qasje në nënstacionin e Vallaçit, ju informojmë se në përputhje me kapitullin III të Ligjit për Energji Elektrike, Operatori i Sistemit të Transmetimit mban në pronësi sistemin e transmetimit dhe është përgjegjës për operimin e këtij sistemi në Republikën e Kosovës, në pajtim me Licencën e lëshuar nga Rregullatori”, thuhet në njoftimin e ZREE-së.

Ky stacion vlerësohet i rëndësishëm meqë përmes tij bëhen të gjitha shkëmbimet energjetike me Serbinë. Gjendja jo e mirë teknike e nënstacionit që gjendet në periferi të Zveçanit u konfirmua edhe në planin zhvillimor të KOSTT-it teksa theksohet rreziku për sigurinë dhe besueshmërinë e furnizimit të konsumatorëve. Projekti për revitalizimin e njërit prej nënstacioneve të para të ndërtuara në Kosovë, është planifikuar të përfundojë në vitin 2027.

Danimarka njoftoi të enjten se do të shqyrtojë kërkesat për azil nga palestinezët në Gaza për shkak të nivelit ekstrem të dhunës në zonë, e cila paraqet rrezik abuzimi në kundërshtim me nenin 3 të Konventës Evropiane për të Drejtat e Njeriut.

Neni 3 i Konventës Evropiane për të Drejtat e Njeriut thotë se nënshtrimi ndaj torturës ose trajtimit ose dënimit çnjerëzor ose poshtërues është në kundërshtim me të drejtat e njeriut. Kjo justifikon dhënien e azilit për aplikantët nga qyteti i Gazës i dëmtuar nga lufta sipas ligjeve të emigracionit të Danimarkës.

Bordi Danez i Apelit për Refugjatët në një deklaratë tha se: “Palestinezëve pa shtetësi nga Gaza, të cilët kanë përfituar nga mbrojtja ose ndihma nga UNRWA, si rregull i përgjithshëm, duhet t’u jepet një leje qëndrimi”.

Bordi i refugjatëve konfirmoi se gjithsej katër aplikantë për statusin e refugjatit ishin në pritje para tyre. Ajo pranoi të katër aplikimet sipas seksioneve të ndryshme të lejeve të qëndrimit.

Izraeli ka nisur një ofensivë ushtarake vdekjeprurëse në Rripin e Gazës që nga sulmi i Hamasit më 7 tetor 2023, për të cilin Tel Aviv tha se vrau më pak se 1.200 njerëz. Të paktën 30.035 palestinezë janë vrarë që atëherë dhe 70.457 të tjerë janë plagosur në mes të shkatërrimit në masë dhe mungesës së nevojave.

Izraeli ka vendosur gjithashtu një bllokadë në Rripin e Gazës, duke e lënë popullsinë e tij, veçanërisht banorët e Gazës veriore në prag të urisë.

Lufta ka shtyrë 85% të popullsisë së Gazës në zhvendosje të brendshme mes mungesës akute të ushqimit, ujit të pastër dhe ilaçeve, ndërsa 60% e infrastrukturës së enklavës është dëmtuar ose shkatërruar, sipas OKB-së.

Izraeli akuzohet për gjenocid në Gjykatën Ndërkombëtare të Drejtësisë. Një vendim i përkohshëm në janar urdhëroi Tel Avivin të ndalonte aktet gjenocidale dhe të merrte masa për të garantuar ofrimin e ndihmës humanitare për civilët në Gaza. /AA

Një shpërthim i fortë ka ndodhur në një magazinë në ndërtim në Lushnjë.

Një person humbi jetën, shtetasi Roland Hoxha. Gjithashtu raportohet për gjashtë persona janë plagosur, mes tyre edhe deputeti i PS, Bujar Çela.

Ende nuk dihet shkaku i saktë i këtij shpërthimi, ndërsa dyshohet se gjatë punës në fabrikë, një vinç ka prekur linjën e tensionit të lartë dhe për rrjedhojë ka pasur një shpërthim.

Forcat e policisë, ambulanca dhe zjarrfikëset ndodhen në vendngjarje. Shpërthimi dyshohet se ka qenë shumë i fortë dhe zhurma është dëgjuar pothuajse në të gjithë qytetin. /tch

Shoqata “HANDIKOS” sot ka shënuar Ditën Ndërkombëtare të Përdoruesve të Karrocës, me ç‘rast u organizua aktiviteti i një shëtitje 30 minutëshe me karrocë në njërën nga rrugët e kryeqytetit.

Pjesëmarrës të këtij aktiviteti ishin nënkryetarja e Komunës së Prishtinës, Jehona Lushaku – Sadriu, dhe anëtar të kabinetit të cilët u shoqëruan nga drejtori i “HANDIKOS”, Afrim Maliqi.

Nga shoqata u përmendën sfidat që përballen personat me karrocë, ndërsa nga autoritetet komunale premtuan më shumë angazhim në krijimin e kushteve për lëvizje më të lehtë të tyre.

Drejtori Maliqi tha se në Kosovë janë rreth 4 mijë persona që përdorin karrocën dhe se të njëjtit e kanë të vështirë që të lëvizin lirshëm në rrugët e Prishtinës dhe në vende të tjera.

Ndërkaq nënkryetarja e Komunës të Prishtinës, Jehona Lushaku – Sadriu u shpreh se ndjenja për të qenë në karrocë qenka e fortë, pasi sipas saj, liria e lëvizjes varet nga karroca.

Ajo theksoi se e dinë që në Prishtinë këta persona hasin në vështirësi për të lëvizur, teksa shtoi se kanë vullnet politik për të ju qëndruar pranë dhe se në të ardhmen do të ketë mbështetje konkrete ndaj tyre.

Dita e Përdoruesve të Karrocës për herë të parë u shënua më 2019 në Kosovë me qëllim të arritjes së ndikimit pozitiv të karrocës në jetën e një personi, rikujtimit të numrit të përdoruesve të karrocës në vend dhe në botë, si dhe vetëdijesimit të shoqërisë për ta bërë botën një vend të qasshëm për të gjithë. /kp