ATV

Category: Lajme

  • Ligji për personat e zhdukur së shpejti do të kalojë në konsultime publike

    Ligji për personat e zhdukur së shpejti do të kalojë në konsultime publike

    Përgatiti: Pranvera Krasniqi

    Ligji për Personat e Zhdukur gjatë luftës në Kosovë, sipas kryesuesit të Komisionit qeveritar për personat e zhdukur, së shpejti do të kalojë në konsultime publike.

    Mes tjerash, Andin Hoti njoftoi gjatë një takimi të Komisionit për të drejtat e njeriut, se gjatë vitit 2023 janë gërmuar 15 lokacione në Kosovë, kurse në Serbi, vetëm në Shtavall.

    “Janë dorëzuar nëntë mbetje mortore te familjarët gjatë vitit 2023. Fatkeqësisht gjatë vitit 2023 janë bërë gërmime vetëm në një lokacion në Serbi, në Shtavall. Shumica prej informacioneve që kemi, nuk janë vetëm brenda territorit të Kosovës, por edhe të dëshmitarëve atje në Shtavall”, tha Hoti.

    Për gërmime të mëtutjeshme atje, sipas Hotit, sfidë mbetet mungesa e informacioneve dhe moszbatimi i deklaratës së 2 majit të nënshkruar në Bruksel, për personat e zhdukur.

    I zhgënjyer për fatin e të pagjeturve është shprehur edhe kryetari i Këshillit të Familjarëve, Ahmet Grajqevci. Sipas tij, të zhdukurit do duhej të ishin kryefjala e të gjitha institucioneve.

    “Çështja e personave të zhdukur është e mundimshme dhe e dhimbshme, asnjë institucion nuk ka bërë mjaftueshëm. Çështja e dinarit për 24 orë diskutohet, por jo edhe e personave të zhdukur që për fatin e tyre e di më së miri Serbia”, tha Grajqevci.

    Ndërsa, deputetja e Lëvizjes Vetëvendosje, Fatmire Mulhaxha-Kollçaku, ftoi qytetarët të dorëzojnë dëshmitë që kanë nga lufta.

    “Ta ngrisim zërin, sepse nuk është e drejtë që për një serb të mblidhet Këshilli i Sigurimit, ndërsa për sulm ndaj vendit tonë të mos kërkohet mbledhja e Këshillit. Ne si popull jemi krenarë, faji nuk është te ne, kërkojmë ndihmë”, tha Mulhaxha-Kollçaku.

    Mungesa e diskutimeve me prokurorët, për çështjen e të pagjeturve nga Komisioni për Personat e Zhdukur, u konsiderua neglizhencë. Ndërsa, kërkesë e pjesëmarrësve në këtë komision ishte një takim me Këshillin Prokurorial.

  • 62 vjet burgim për gjashtë të akuzuarit për dhunimin e 11 vjeçares

    62 vjet burgim për gjashtë të akuzuarit për dhunimin e 11 vjeçares

    Përgatiti: Nora Luta

    Pesë nga tetë të akuzuarit në grupin e dytë, për dhunim të 11-vjeçares nga Prishtina janë shpallur fajtorë e janë dënuar me burgim nga Gjykata Themelore e Prishtinës.

    Behlul Rrahmani është dënuar me 12 vjet burgim, ndërsa Driton Rrahmani, Blendin Sadiku, Muhamet Sadiku, Muhamet Restelica e Flamur Sadiku janë dënuar me nga dhjetë vjet burgim.

    Gjashtë të dënuarit nga gjykata janë dërguar për të mbajtur masën e paraburgimit, sipas vendimit të Gjykatës deri në plotfuqishmërinë e aktgjykimit.

    Ndërsa, janë liruar Gëzim Sadiku dhe Egzon Sadiku, ky i fundit akuzohej për ndihmë në kryerjen e veprës penale të Dhunimit.

    Avokatja e viktimës vendimin e ka quajtur meritor, teksa ka folur për procesin e gjykimit, i cili ishte i mbyllur për media.

    Viktima, sipas saj, vazhdon të qëndrojë në strehimore.

    Megjithatë, me vendimin nuk është pajtuar mbrojtja, e cila ka paralajmëruar ankesën në shkallën e dytë.

    Prokuroria e Prishtinës kishte ngritur aktakuzë ndaj tetë personave në dhjetor të vitit 2022, pas aktakuzës së parë ndaj Ekrem Rexhepit dhe tre të miturve.

    Shkalla e parë i kishte dënuar me 40 vjet burgim gjithsej, por rasti u kthye në rigjykim në Apel, dhe procesi është duke u zhvilluar në Departamentin për të Mitur.

    Gjykata kishte njoftuar se nuk ka gjetur që e dëmtuara të ketë qenë e trafikuar apo viktimë e veprës penale të trafikimit me njerëz.

    Sipas aktakuzës, më 27 gusht 2022, prej orës 18:00 deri 20:00, në parkun e lagjes “Arbëria”, e mitura ishte ngacmuar fillimisht me fjalë e pastaj dhunuar.

    Ndërkohë, sipas aktakuzës së dytë ndaj personave që u dënuan këtë të martë, rasti i dhunimit të 11 vjeçares kishte ndodhur në qershor të po të njëjtit vit.

  • OVL-UÇK e quan veteran të rrejshëm të arrestuarin për krime lufte nga Serbia

    OVL-UÇK e quan veteran të rrejshëm të arrestuarin për krime lufte nga Serbia

    Përgatiti: Arian Hajdaraj

    Në këtë zyrë, Sadik Duraku vite më parë kishte marrë kartelën që ia njeh statusin e veteranit të luftës së UÇK-së.

    Pikërisht ky dokument që iu gjet në xhep gjatë kontrollit në hyrje të Serbisë, u bë shkak që Duraku të arrestohet e të dërgohet në paraburgim për 30 ditë, nën dyshimet për krime lufte.

    Tani, një javë pas arrestimit, Organizata e Veteranëve Dega në Has po pretendon se Duraku nuk është veteran i vërtetë.

    “Është vërtetu që Sadik Duraku është veteran i UÇK-së, por është veteran i rrejshëm. Do të thotë formën derisa ka ardhë te statusi është përmes të hollave”, tha kryetari i OVL-UÇK-së në Has, Xhevdet Thaçi.

    Në këtë drejtim, kryetari i degës së Veteranëve të UÇK-së në Has, paralajmëron se do ta padisin Durakun kurdo që ai të hyjë në Kosovë.

    “U bëjmë apel organeve serbe që ta deportojnë sa më shpejt Durakun në Kosovë, dhe vërtet ta padisim Durakun për manipulim dhe mashtrim se si ka ardhë deri te statusi”, tha Thaçi.

    Gjatë ditës, familja e Durakut nuk pranoi të deklarohej rreth qëndrimit të OVL-UÇK-së në Has, e cila mes viteve 2021-2022 i kishte larguar nga Lista më shumë se 1300 persona, të cilët merrnin pensionin e veteranit.

    Ndërkohë, 54-vjeçari me vendbanim në Angli, që u arrestua më 16 prill, gjatë kësaj të marte priste vizitën e parë nga familja.

  • PE-ja miratoi “liberalizimin e vizave” për pasaportat koordinuese serbe

    PE-ja miratoi “liberalizimin e vizave” për pasaportat koordinuese serbe

    Përgatiti: Fatlum Jashari

    Bashkimi Evropian bëri hapin e parafundit drejt liberalizimit të vizave për Zonën Schengen për mbajtësit e pasaportave të lëshuara nga e ashtuquajtura Drejtori Koordinuese Serbe.

    Parlamenti Evropian miratoi raportin e euro-deputetit slloven, Matjaz Nemec, i cili rekomandimin e tij e paraqiti të zhveshur nga konteksti politik.

    “Ky është një votim i rëndësishëm. Kjo nuk është çështje politike, por teknike. Është vazhdim i vendimit për liberalizimin e vizave për Serbinë, i miratuar më 2009, dhe për Kosovën që nga fillimi i këtij viti. Ky vendim është për t’ua bërë njerëzve jetën më të mirë dhe afekton rreth 18 mijë serbë rezidentë të Kosovës, të cilët kanë pasaporta speciale. Dhe, që nga fillimi i këtij viti ata mbesin kategoria e vetme e qytetarëve në Ballkanin Perëndimor, të cilët nuk gëzojnë liberalizimin e vizave me BE-në”, tha Nemec.

    Përkundër se Kosova konsideron se vendimi shkel sovranitetin dhe integritetin territorial të saj, hartuesi i raportit iu referua vetëm aspektit të lëvizjes së lirë.

    “Besoj se nuk ka justifikim për këtë, politik apo ndonjë tjetër. Kjo është një çështje të cilën e krijoi BE-ja më 2009 dhe na takon neve ta ndreqim atë. Në thelb, kjo është çështje e trajtimit të barabartë ose diskriminimit, dhe ne duhet të jemi kundër çfarëdo forme të diskriminimit. Nuk duhet të lejojmë që këta qytetarë të paguajnë çmimin për dështimin e politikanëve të tyre”, tha Nemec.

    Duke e vlerësuar të papranueshëm, Qeveria e Kosovës theksoi se vendimi nuk reflekton realitetin e së drejtës për udhëtim pa viza.

    “Ky qëndrim rrezikon të krijojë një precedent të rrezikshëm, kur vetëm para më shumë se një viti, një tentativë e njëjtë për njohjen e dokumenteve ruse të udhëtimit, të lëshuara në Ukrainë dhe Gjeorgji, u dënua dhe nuk u pranua nga vetë institucionet e BE-së. Shtyrja para e këtij propozimi, ka ndikim negativ në integrimin e komunitetit serb në Kosovë. Që prej momentit kur është iniciuar ky propozim nga Komisioni Evropian, i kemi informuar vazhdimisht të gjitha institucionet e BE-së për pasojat dhe efektet negative të një vendimi të tillë”, thuhet në reagimin nga Qeveria e Kosovës.

    Me kërkesë të BE-së, pas liberalizimit të vizave, më 2009, Serbia hapi Drejtorinë Koordinuese, e cila lëshon pasaporta për shtetasit serbë që jetojnë në Kosovë.

    Për qytetarët e pajisur me dokumente të tilla serbe, nuk vlen liberalizimi i vizave.

    Mbajtësit e atyre që njihen si “pasaporta koordinuese”, të cilat i paraqesin qytetet e Kosovës si pjesë të Serbisë, nuk mund të udhëtojnë nëpërmjet aeroportit të Prishtinës.

  • Punëtorët e Telekomit, ende nuk i kanë marrë pagat e marsit

    Punëtorët e Telekomit, ende nuk i kanë marrë pagat e marsit

    Përgatiti: Armand Hoti

    Punëtorët e “Telekomit” të Kosovës, ende nuk i kanë marrë pagat e marsit.

    “Ma e keqja është, sepse në kohën e fundit kanë filluar bankat pasi nuk kemi mundur t’i paguajmë kreditë, t’i thërrasin dhe t’ua ndalin kreditë bashkëhuamarrësve”, tha kryetari i sindikatës së punëtorëve të Telekomit, Lamih Balaj.

    1800 punëtorë mbetën pa rroga për shkak se përmbaruesi privat tashmë i suspenduar, bllokoi llogaritë e kompanisë ku ata punojnë.

    Përmbaruesi, Irfan Kërçagu, filloi zbatimin e përmbarimit, pas vendimit të shkallës së parë të Gjykatës Komerciale, që detyron ndërmarrjen t’ia paguante “Dardafonit”, 5,7 milionë euro.

    Tash “Telekomi” nuk po arrin t’i shlyejë detyrimet ndaj kontraktorëve.

    “Telekomi i ka diku 540 antena në prona private, që i ka me qira. Tash që nuk kemi mundur t’ua paguajmë qiranë shumica prej pronarëve kanë filluar të thërrasin dhe të interesohen pse s’ka dhe bëjnë kërcënime të ndryshme që mund t’i dëmtojnë edhe antenat”, tha drejtori financiar në “Telekom”, Feim Kelmendi.

    “Telekomi” insiston në shkarkimin e përmbaruesit, suspendimin e të cilit e bëri Ministria e Drejtësisë, në mars, ndonëse vetë ia kishte deleguar këtë kontest.
    Për këtë, menaxhmenti i ndërmarrjes inicioi edhe një komision disiplinor të përbërë nga ekspertë juridikë e përmbarues.

    Ky komision, mblodhi të hënën për herë të parë në Ministrinë e Drejtësisë, përfaqësuesit e “Telekomit” dhe përmbaruesin privat Irfan Kërçagu me avokatin e tij mbrojtës.

    Kërkesën për shkarkim, menaxhmenti i ndërmarrjes e bazon në disa pika. Pretendimet e “Telekomit” u mohuan në plotësisht, nga pala tjetër.

    Përfaqësuesit e ndërmarrjes publike i bënë kërkesë komisionit disiplinor, që mjetet e bllokuara mbi shumën prej 5,7 milionë të lirohen.

    “Sepse mjetet që janë nëpër banka tejkalojnë shumën të cilat pretendon të inkasohen nga përmbaruesi, ndërsa për çështje procedurale, llogaritë bankare të “Telekomit” kanë mbetur të bllokuara edhe pse ka mjete më tepër sesa edhe vetë vendimi që është në fuqi”, tha Kelmendi.

    Shkalla e dytë e Komerciales, tashmë ka caktuar tre ekspertë, të cilët do të bëjnë ekspertizën financiare, për pagesat që ndërmarrja ka kryer në emër të vendimit të arbitrazhit të vitit 2016.

    Zyrtarë të “Telekomit” thanë se në këtë ekspertizë, nuk do të llogariten mbi 10 milionë euro, që “Dardafoni” mori nga ndërmarrja përmes mundësimit të shfrytëzimit të numrave dhe shërbimeve 3 dhe 4G, në formë kompensimi.

    Nga “Telekomi” pretendojnë se vendimi i Arbitrazhit detyronte ndërmarrjen publike t’i paguante “Dardafon-it” 27 milionë euro, kurse ndërmarrja kishte kryer pagesa në emër të vendimit të Arbitrazhit, në shumën prej rreth 40 milionë eurosh.

    Përmbaruesi privat deri më tani ka arritur të tërheqë 2.1 milionë euro nga xhirollogaritë e ndërmarrjes.

  • Reshjet e shiut vështirësojnë qarkullimin në Fushë Kosovë

    Reshjet e shiut vështirësojnë qarkullimin në Fushë Kosovë

    Përgatiti: Sara Shehu

    Qarkullimi në rrugën “Dardania” të martën ishte mjaft i vështirë.

    Madje, qytetarët ankohen se me këtë problem po përballen qe disa vite.

    Zyrtarët komunalë të Drejtorisë së Shërbimeve Publike në këtë komunë kanë bërë të ditur për ATV-në se tashmë kanë nënshkruar kontratë me një kompani private e cila do të bëjë riparimin e rrugës, që pritet të kushtojë 25 mijë euro.

    Megjithatë, sipas tyre, punimet do të nisin pas përmirësimit të kushteve atmosferike.

    Reshjet e shiut shkaktuan telashe edhe në Prishtinë, pasi një pjesë e fasadës së një ndërtese në rrugën “UÇK”, ra në tokë.

    “Është një incident që ka ndodhur sot në mëngjes. Me marrjen e informatës ekipet emergjente të kryeqytetit kanë dalë në vendin e ngjarjes. Inspektorët dhe shërbimi i zjarrfikësve e kemi eliminu rrezikun. Një pjesë e fasadës, si pasojë e shirave ka ra. Është eliminu rreziku dhe do ta pastrojmë ta kthejmë në gjendjen e mëparshme. Do të monitorojmë më tutje këtë pjesë të qytetit, mirëpo edhe pjesë të tjera të qytetit për ndonjë eventualitet”, ka thënë drejtori për siguri dhe emergjenca në komunën e Prishtinës, Lulzim Fushtica.

    Si zakonisht, reshjet e shiut shkaktuan edhe tollovi në komunikacion.

  • Konjufca priti në takim anëtarët e Komisionit të Senatit për Punë të Jashtme të Çekisë

    Konjufca priti në takim anëtarët e Komisionit të Senatit për Punë të Jashtme të Çekisë

    Kryetari i Kuvendit të Kosovës, Glauk Konjufca, priti sot në takim anëtarët e Komisionit të Senatit për Punë të Jashtme, Siguri dhe Mbrojtje nga Republika e Çekisë.

    Në këtë takim u diskutua për situatën e përgjithshme politike dhe të sigurisë në Kosovë dhe rajon, si dhe për domosdoshmërinë e thellimit të bashkëpunimit të dyanshëm.

    Kreu i Kuvendit vuri në pah aspiratat dhe perspektivën euro-atlantike të Kosovës, si dhe angazhimet e institucioneve për garantimin e paqes dhe sigurisë, në kohën, kur shteti serb po angazhohet për destabilizim të vendit tonë dhe rajonit.

    Konjufca shprehu mirënjohje për kontributin e gjatë dhe të vyer të shtetit çek ndaj Republikës së Kosovës, duke i falënderuar anëtarët e Komisionit për angazhimin në drejtim të forcimit të bashkëpunimit ndërmjet vendeve tona në fushën e parlamentarizmit, të sigurisë dhe mbrojtjes.

    Anëtarët e Komisionit e falënderuan kryetarin e Kuvendit për mikpritjen dhe shprehën gatishmërinë e tyre për të vazhduar bashkëpunimin dhe mbështetjen për Kosovën edhe në të ardhmen.

  • Suspendohet nga puna profesori Xhevat Krasniqi

    Suspendohet nga puna profesori Xhevat Krasniqi

    Universiteti i Prishtinës “Hasan Prishtina” ka marr vendim që të pezulloj nga puna profesorin Xhevat Krasniqi.

    Këtë e kanë bërë të ditur nga UP përmes një komunikate për media.

    “Mbi bazën e vendimit të Këshillit të Etikës dhe rekomandimit drejtuar Rektoratit, Rektori i UP-së mori vendim për pezullimin nga puna të Prof. Xh.K., me efekt të menjëhershëm, sipas kornizës normative përkatëse, derisa të përfundojnë veprimet hetuese nga ana e prokurorisë se shtetit.”

    “Bazuar në informatat e ofruara nga Këshilli i Etikës i Universitetit të Prishtinës, në lidhje me denoncimin e paraqitur ndaj Prof. Xh.K., UP njofton se Këshilli i Etikës ka marrë vendim mbi këtë rast.

    · Këshilli i Etikës i rekomandon Rektoratit që çështjen e referuar kundër Prof. Xh.K. ta procesojë edhe formalisht në organet e hetuesisë dhe të bashkëpunojë me to.

    · Këshilli i Etikës i rekomandon Rektoratit pezullimin nga puna të Prof. Xh.K, sipas kornizës normative përkatëse, derisa të përfundojnë veprimet hetuese nga ana e prokurorisë se shtetit.

  • Haradinaj: Raporti i DASh-it goditja më e fuqishme, duhet t’i shërbejë Qeverisë që të japë dorëheqje

    Haradinaj: Raporti i DASh-it goditja më e fuqishme, duhet t’i shërbejë Qeverisë që të japë dorëheqje

    Lideri i AAK-së, Ramush Haradinaj, ka kritikuar Qeverinë Kurti, pas raportit të DASH-it të publikuar ditën e djeshme.

    Ai përmes një postimi në Facebook, ka thënë se qeveria ka mashtruar veten duke krijuar tituj bombastik për fitore të paqena kundër Serbisë por edhe ndërkombëtarëve.

    “Vetëmashtrimi i Qeverisë duke krijuar tituj bombastik për fitoret e paqena kundër Serbisë e në raste të caktuara edhe kundër komunitetit ndërkombëtar, janë gënjeshtrat të cilave Qeveria ka filluar t’ju besojë edhe vetë. Raporti i Departmentit Amerikan të Shtetit për Kosovën është goditja më e fuqishme që demistifikon këtë kurs të mashtrimit”, ka shkruar Haradinaj në Facebook.

    Haradinaj ka theksuar se raporti i DASH-it është goditja më e fuqishme ndaj Qeverisë dhe të gjithë jemi të shqetësuar.

    Ai ka shtuar se ky raport duhet t’i shërbejë Qeverisë që të japë dorëheqje.

    “Nuk besoj që ka qytetar të këtij vendi që sot nuk është i shqetësuar me gjetjet e këtij raporti në fushën e sundimit të ligjit, luftën kundër korrupsionit, lirinë e shprehjes, lirisë së mediave si dhe të drejtave të njeriut e plot fusha të tjera.

    Raporti i DASH-it është për vitin 2023 dhe nuk ka arritur të evidentojë edhe plot dështime të tjera, përfshirë këtu edhe qindra kontrata njëburimore në vlerë prej qindra milionë eurosh. Në një situatë normale ky raport i DASH-it do të duhej t’i shërbente Qeverisë për vetëreflektim, që nënkupton dorëheqjen e saj”, thuhet në reagimin e Haradinajt.

  • Dëshmitari Qeriqi thotë se me Thaçin është takuar tri herë gjatë luftës, por nuk e dinte pozitën e tij

    Dëshmitari Qeriqi thotë se me Thaçin është takuar tri herë gjatë luftës, por nuk e dinte pozitën e tij

    Dëshmitari Ramiz Qeriqi është duke u marrë në pyetje nga mbrojtja e Hashim Thaçit, përmes avokatit Luka Mishetiq.

    Ai tha se gjatë kohës së luftës, është takuar me Thaçin vetëm tri herë.Një prej herëve që dëshmitari pretendon se është takuar me Thaçin, sipas tij ka ndodhur në selinë e UÇK-së në Krumë. Ai thotë se Thaçi nuk ishte paraqitur me ndonjë pozitë atë kohë, raporton “Betimi për Drejtësi”.

    “Jo me njëfarë pozite. S’kam ditë që ka pozite. Isha duke u përgatitë për me hy brenda me Azem Sylen dhe aty jemi taku bashkë, e kuptuam që ishte Hashim Thaçi. S’di si ta shpjegojë, jo njëfarë i veçantë, nuk ka qenë. I thjeshtë sikur na ushtarët e tjerë”, tha ai.

    Dëshmitari thotë se një herë tjetër ishte takuar me Thaçin në Krojmir pa praninë e Shukri Bujës dhe Fatmir Limës.

    Ai pohoi se në atë kohë ka besuar që personi kryesor i UÇK-së ka qenë Azem Syla.

    “Ashtu u ndegju”, u përgjigj dëshmitari.

    Ramiz Qeriqi tha se hera tjetër që nuk dinë nëse kishte ndodhur para ose pas takimit në Krojmir me Thaçin ka ndodhur në kur kanë dhënë intervistë për gazetarët e “New York Times”.