Category: Lajme

Gjykata Themelore e Mitrovicës e ka dënuar me 6 muaj burgim me kusht dhe 2000 euro gjobë të akuzuarin Dalibor Staniq për dhënie të ryshfetit.

Aktgjykimi dënues ndaj tij është shpallur të martën, nga gjykatësi i rastit Avni Mehmeti, raporton “Betimi për Drejtësi”.

Sipas aktgjykimit, dënimi me burgim të kushtëzuar në kohëzgjatje prej 6 muaj nuk do të ekzekutohet brenda afatit 1 vjeçar nëse i akuzuari Staniq nuk kryen vepër penale.

Staniq gjithashtu obligohet të paguajë shpenzimet e procedurës gjyqësore dhe atë 20 euro në emër të paushallit gjyqësor, dhe 50 euro në emër të fondit të viktimave të krimit.

Gjykata vendosi edhe largimin e dorëzanisë dhe shuma e dorëzanisë t’i kthehet të akuzuarit Staniq, pasi i njejti ta paguajë dënimin me gjobë.

Në seancën fillestare të mbajtur po sot i akuzuari Staniq e ka pranuar fajësinë për veprën penale me të cilën ngarkohej.

Ndryshe, sipas aktakuzës së ngritur më 25 qershor 2024 nga Prokuroria Themelore në Mitrovicë, Dalibor Staniq akuzohet se më 27 maj 2024, rreth orës 14:00, në magjistralen Mitrovicë – Leposaviq, në fshatin Kamenicë i ka dhënë dhuratë personit zyrtar, në atë menyrë që personi zyrtar të veprojë në kundërshtim me detyrën e tij zyrtare.

Në aktakuzë thuhet se derisa Staniq ka qenë duke e drejtuar kamionin e tij është ndalur nga zyrtari policor Fidan Ademi, i cili e ka njoftuar të pandehurin Staniq që e ka tejkaluar shpejtësinë e levizjës me kamion, dhe ia kishte kërkuar dokumentet, ndërsa Staniq ia kishte dhënë dokumente ku në mes të tyre i kishte futur 5 euro, edhe pasi zyrtari policor e kishte njoftuar se është nën vezhgimin e kamerave.

Me këto veprime, sipas aktakuzës Dalibor Staniq akuzohet se ka kryer veprën penale “ Dhënie e ryshfetit” nga neni 422 paragrafi 1 të Kodit Penal.

Mërgimtarët që vijnë në Kosovë përmes Serbisë do ta kenë më të shtrenjtë rrugën sivjet. Nga 10 korriku, Serbia ka rritur tarifat për shfrytëzimin e autostradave.

Çmimet janë rritur për gati 10 për qind në secilën prej autostradave, ka njoftuar Ministria e Transportit serb.

Në rrugën nga Beogradi në Shid, shoferët tani duhet të paguajnë 4.27 euro në vend të 3.85 eurove. Në rrugën Obrenovac – Prelina, pagesa do të kushtojë 4.79 euro, ndërsa nga Beogradi në Suboticë do të kushtojë 6.84 euro.

Shuma më e lartë do të paguhet në rrugën nga Beogradi në Dimitrovgrad – 14.27 euro.

Zbritje prej gjashtë për qind do të ketë për vetura elektrike. 10 për qind zbritje ka për kamionët me motorë “EURO 6”.

Ministria e Jashtme e Kosovës vazhdimisht ka bërë thirrje që të shmangen udhëtimet përmes Serbisë.

Zyrtarët palestinezë thanë se një sulm ajror i Izraelit në jug të Gazës vrau së paku 29 njerëz.

Sulmi goditi mbi çadrat e familjeve të zhvendosura jashtë një shkolle në qytetin Abasan.

Shumica e viktimave ishin gra dhe fëmijë, thanë zyrtarët mjekësorë palestinezë.

Ushtria izraelite tha se po i analizon raportet për dëmtimin e civilëve.

Ajo tha se incidenti ka ndodhur gjatë goditjes me “municione të sakta” të një luftëtari të Hamasit, i cili ka marrë pjesë në sulmin e 7 tetorit në Izrael.

Hamasi – grup i shpallur terrorist nga SHBA-ja dhe fuqi të tjera – ka sulmuar Izraelin vjeshtën e kaluar, duke vrarë mbi 1.200 njerëz dhe duke marrë peng qindra të tjerë.

Në përgjigje, Izraeli është duke kryer një fushatë masive sulmesh në Gazë – enklavë e kontrolluar nga Hamasi.

Sipas autoriteteve atje, mbi 38.000 njerëz janë vrarë prej se ka nisur lufta.

Në të gjithë Gazën të martën, sipas mjekëve, u vranë më shumë se 40 palestinezë në sulmet ajrore izraelite.

Shpresat e banorëve të Gazës për armëpushim janë ringjallur pasi Hamasi, javën e kaluar, ka pranuar një pjesë kyçe të një propozimi të SHBA-së për ndaljen e luftimeve.

Ndërmjetësuesit e Katarit dhe të Egjiptit, të mbështetur nga Shtetet e Bashkuara, janë duke i vazhduar bisedimet këtë javë në Doha./REL/

Dy persona janë arrestuar në Ferizaj dhe Kaçanik të martën në mbrëmje (9 korrik), në raste të ndara, nën dyshimin se i kanë sulmuar dhe kanosur zyrtarët policorë.

Sipas njoftimit në raportin 24-orësh të Policisë së Kosovës, në rastin në Ferizaj, për të dyshuarin kishte pasur një ankesë nga një qytetar që kishte thënë se i dyshuari i ka hyrë në pronën private dhe e ka kanosur. Më pas, i dyshuari ka sulmuar zyrtarët policorë. Tre policë kanë pranuar trajtim mjekësor.

Në rastin tjetër, në Kaçanik, një i dyshuar është shoqëruar në polici pasi që kishte kanosur zyrtarin policor që i kishte shqiptuar gjobë trafiku.

Përderisa në rastin e Ferizajt, i dyshuari është dërguar në mbajtje, në rastin e Kaçanikut rasti ka shkuar në procedurë të rregullt.

Kryetari i Shoqatës së Turizmit në Kosovë Ruzhdi Kurtishaj i ftuar në Now me Erla Mëhillin u shpreh se shumë turistë nga Kosova po braktisin Shqipërinë për të vizituar Greqinë apo Bullgarinë.

Sipas tij faktor kryesor është liberalizimi i vizave për shqiptarët e Kosovës. Megjithatë Kurtishaj shprehet se shumë pushues nga Kosova nuk e shikojnë të arsyeshme një rritje prej 40% të çmimeve.

“Viti 2024 ka lënë të kuptohet që nuk ka turizëm të qëndrueshëm për disa zona të Shqipërisë pa shqiptarët e Kosovës dhe liberalizimi i vizave ka bërë një ndryshim nga viti 2023. Për dy dekada ne kemi qenë të izoluar nga bota për mundësinë e lëvizjen e lirë. Ishte fat i mirë që liberalizimi u bë e janar dhe shumë shqiptarë të Kosovës plotësuar ëndrrën e tyre për të vizituar vendet e rajonit siç është Greqia për shkak se shumë prej nesh para 20 vitesh i kanë kaluar në Greqi dhe Bullgari dhe unë mendoj që kjo mungesë e pushuesve të Kosovës nuk është pa arsye. Sipas statistikave ka një rënie të dukshme të pushuesve dhe rritja e çmimeve është një prej arsyeve kryesorë, sigurisht dhe gjetja e plazheve alternative si Greqia dhe Bullgaria mund të jetë një tjetër arsye pse mungojnë turistët prej Kosovës. Megjithatë unë nuk e kuptoj pse duhet të paguaj një pije që kushton 200 lekë në Durrës dhe 700 lekë në jug”, tha ai.

Qytetarët në katër komunat në veri të Kosovës vazhdojnë t’i konvertojnë patentë shoferët ilegalë të lëshuar nga strukturat paralele serbe në RKS.

Kështu ka bërë të ditur zëvendësdrejtori i Policisë së Kosovës në veri, Veton Elshani.

Sipas tij vetëm të martën janë bërë 121 kërkesa në gjithë vendin.

Ndërkaq, për dy muaj janë bërë 1 mijë e 941 kërkesa për konvertimin e patentë-shoferëve vetëm në veri të vendit, ndërkaq numri i përgjithshëm është 2 mijë e 294.

Në Leposaviq deri më tani janë 598 kërkesa, në Mitrovicën e Veriut 621, në Zubin Potok 328 dhe në Zveçan 394 kërkesa.

Dokumentet që duhen përfshirë në aplikim, sipas MPB-së, janë letërnjoftimi, origjinali i patentë shoferit të lëshuar nga ana e autoriteteve serbe, certifikata e gjendjes shëndetësore për pajisje me patentë shofer, dëshmi të pagesës së taksës dhe origjinali i patentë shoferit të lëshuar nga UNMIK-u apo RKS “në qoftë se bëhet aplikimi për shtimin e kategorive, gjë e cila po ashtu është mundësuar përmes këtij vendimi të Ministrisë së Punëve të Brendshme”.

Vendimi pati hyrë në fuqi me datën 9 maj dhe është i vlefshëm deri me datën 9 gusht 2024.

Ministri i Financave, Hekuran Murati dhe ai i Shëndetësisë, Arben Vitia, do të raportojnë sot në Komisionin për të Drejtat e Njeriut lidhur me plotësimin apo ndryshimin e Rregullores për Përbërjen, Funksionimin, Përgjegjësitë e Komisionit Vlerësues dhe Përcaktimin e Procedurave për Njohjen e Statusit dhe të Drejtave të Personave Praplegjik dhe Tetraplegjik, ose nxjerrjen e Rregullores së re.

Mbledhja e komisionit do të nisë në ora 13:00.

“Ministri i Financave, Punës dhe Transfereve, Hekuran Murati, ministri i Shëndetësisë, Arben Vitiasi dhe drejtori i Shoqatës HANDIKOS, raportojnë në Komisionin për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione, lidhur me plotësimin apo ndryshimin e Rregullores për Përbërjen, Funksionimin, Përgjegjësitë e Komisionit Vlerësues dhe Përcaktimin e Procedurave për Njohjen e Statusit dhe të Drejtave të Personave Praplegjik dhe Tetraplegjik, ose nxjerrjen e Rregullores së re. (Kuvendi i Kosovës, salla N10)”.

Këtë të mërkurë pritet të mbajë mot kryesisht me diell dhe temperatura të larta.

Temperaturat minimale pritet të lëvizin në mes 17 dhe 20 gradë Celsius, kurse maksimalet prej 33 deri në 36 gradë.

Era do fryjë nga verilindja me shpejtësi prej 16-38 km/h.

Presidenti i Shteteve të Bashkuara, Joe Biden, tha se Rusia nuk kërkon “asgjë më pak” se “ta fshijë Ukrainën nga harta”, por shprehu bindjen se presidenti rus, Vladimir Putin, nuk do t’ia dalë.

Ai njoftoi se SHBA-ja dhe aleatët e saj do t’i ofrojnë Ukrainës armë të tjera, duke përfshirë sisteme shtesë të mbrojtjes ajrore.

“Ukraina mund dhe do ta ndalojë Putinin, sidomos me mbështetjen tonë të plotë kolektive. Ajo e ka mbështetjen tonë të plotë”, tha Biden në ditën e parë të Samitit vjetor të NATO-s, që mbahet në Uashington.

“Lufta do të përfundojë me Ukrainën si vend të lirë dhe të pavarur. Rusia nuk do të mbizotërojë”, shprehu bindjen ai.

Presidenti amerikan tha se SHBA-ja dhe partnerët synojnë t’i ofrojnë Ukrainës dhjetëra sisteme shtesë të mbrojtjes ajrore në muajt e ardhshëm, si dhe qindra përgjues gjatë vitit të ardhshëm.

Në një deklaratë që lëshoi Shtëpia e Bardhë, sqarohet se SHBA-ja, Gjermania dhe Rumania do t’i dhurojnë bateri Patriot vendit në luftë, ndërsa Holanda dhe partnerët e tjerë do t’i ofrojnë komponentë Patriot për të mundësuar funksionimin e disa baterive shtesë. Italia do të dhurojë, po ashtu, një sistem shtesë SAMP-T.

Departamenti amerikan i Shtetit tha se njoftime të mëtejshme për ndihmat për Ukrainën do të bëhen gjatë samitit.

Fjalimi i Bidenit u ndoq nga afër jo vetëm për komentet e tij në lidhje me mbështetjen e NATO-s për Ukrainën, por edhe për performancën e tij të përgjithshme.

Kohëve të fundit, disa demokratë i kanë bërë thirrje të tërhiqet nga gara për rizgjedhje në nëntor, për shkak të paraqitjes së tij të dobët në debatin me kundërkandidatin republikan, Donald Trump, në fund të qershorit.

Në atë debat, Biden ka belbëzuar gjatë gjithë kohës dhe nuk ka arritur t’i sfidojë sulmet e Trumpit, të cilat, në shumë raste, kanë përfshirë edhe pretendime të rreme.

Megjithatë, gjatë fjalimit në samitin e NATO-s, Biden nuk u duk se bëri ndonjë gabim.

Duke folur pak para tij, sekretari i përgjithshëm i NATO-s, Jens Stoltenberg, tha se nëse Rusia do të dilte fituese në luftën e saj në Ukrainë, ajo do të trimëronte Iranin, Kinën dhe Korenë e Veriut, si dhe do të formësonte mjedisin e sigurisë globale për disa dekada në vazhdim.

“Nuk ka opsione pa rrezik me një Rusi agresive si fqinje”, tha Stoltenberg.

“Nuk ka opsione pa rrezik në një luftë. Dhe, mbajeni në mend, kostoja më e madhe dhe rreziku më i madh do të jetë nëse Rusia fiton në Ukrainë. Ne nuk mund ta lejojmë këtë të ndodhë”, tha ai.

Biden i dha Stoltenbergut Medaljen e Lirisë, që është nderimi më i lartë civil që mund të bëjë një president amerikan.

“Shumë nga përparimi që kemi bërë në aleancë, është falë sekretarit. Ai është një njeri me integritet”, tha Biden.

Stoltenberg, në vjeshtë, do t’ia dorëzojë detyrën shefit të zgjedhur të NATO-s, Mark Rutte.

Samiti i NATO-s, që përkon me 75-vjetorin e themelimit të aleancës, do të zgjasë deri më 11 korrik.

Udhëheqësit e vendeve anëtare pritet të diskutojnë edhe për forcimin e mbrojtjes, si dhe të partneriteteve në Indo-Paqësor./REL/