Category: Lajme

Seanca e paraparë të mbahej sot ndaj zyrtarëve komunalë të Komunës së Istogut, është shtyrë për shkak të mungesës së të akuzuarit Rexhep Blakaj, i cili gjendej në spital.

Këtë e bëri të ditur mbrojtësi i të akuzuarit Blakaj, avokati Flamur Bllacaku, ku tha se i mbrojturi i tij i ishte nënshtruar një intervenimi dy ditë më herët, raporton “Betimi për Drejtësi”.

Andaj në mungesë të kushteve për mbajtjen e seancës e njëjta u shty për 23 dhjetor 2024.

Ndryshe, aktakuza e ngritur nga Prokuroria Themelore në Pejë, më 7 shtator 2022, po i ngarkon Jashar Blakajn, Rrustem Gashin, Rexhep Blakajn, Isa Hoxhën dhe Besart Dreshajn, për veprat penale “Keqpërdorim i detyrës zyrtare”, “Konflikt interesi” si dhe “Falsifikim i dokumentit zyrtar”.

Kosova s’ka arritur të shënojë ndonjë progres të theksueshëm në Raportin e Progresit për vitin 2024, thonë në Grupin për Studime Juridike dhe Politike (GLPS). Dy ditë pas publikimit të raportit për vendin nga Komisioni Evropian, në GLPS, thanë se në bazë të të gjeturave shihet se Kosova ka shënuar progres vetëm në dy kapituj dhe gjithsej katër fusha.

Hulumtuesja në GLPS, Dea Fetiu, në konferencë për medie të premten, tha se Kosova ka shënuar progres në kapitullin 24, që ka të bëjë me drejtësinë, lirinë dhe sigurinë si dhe kapitulli 19 ku flitet për politikat sociale dhe punësimin.

“Për vitin 2024, Raporti i Progresit shënon se Kosova s’ka arritur të shënojë ndonjë progres të mjaftueshëm dhe që do të konsiderohej si thelbësor për ecjen përpara në integrimin në BE. Po ashtu duhet të theksohet se ky është raport i parë që vjen për Kosovën, derisa Kosova është në masa të përkohshme nga BE-ja dhe kur ka marrëdhënie pak të tensionuar me këtë organizatë. Këtë vit, Kosova ka shënuar progres në gjithsej dy kapituj. Në kapitullin 24 që ka të bëjë me drejtësinë, lirinë dhe sigurinë, si dhe kapitullin 19 për politikat sociale dhe punësimin. Po ashtu, Kosova ka shënuar progres të mirë në gjithsej katër fusha, përderisa njëfarë progresi është shënuar në 11 fusha, progres i limtuar në 17 fusha, ndërsa dy fusha kanë mbetur pa progres fare. Një e gjetur tjetër interesante është se 18 fusha në total nga 35 sosh janë vlerësuar si tërësisht të njëjta me vitin 2023”, tha ajo.

Ajo përmendi edhe Ligjin për zyrtarët publik, që sipas saj është në kundërshtim me parimet e SIGMA-s dhe degradon funksionimin e shërbimit.

“GLPS sheh se Ligji për zyrtarët publik është në kundërshtim me parimet e SIGM-s dhe degradon funksionimin e shërbimi civil në Kosovë. Ky ligj në mënyrën si është draftuar tani cenon thellë konkurrencën, e cila është shtylla kryesore e meritokraci dhe nuk ofron mundësi të qëndrueshme për zhvillim të karrierës…Në anën tjetër raporti vëren mungesën e emërimit të pozitave të larta menaxhuese dhe shpreh shqetësimin e tij për pozita të larta që udhëheqin me ushtrues detyre. GLPS ka vërejtur se 27 pozita të nivelit të lartë drejtues për momentin janë duke u ushtruar me ushtrues detyre”, shtoi ajo.

Krahas këtyre, ajo shtoi nevojën për zbatim të Marrëveshjes Bazë të Brukselit dhe aneksit të Ohrit, për normalizimin e raporteve ndërmjet Kosovës dhe Serbisë./KP/

Kryeministri i vendit, Albin Kurti, është takuar me Këshilltarin Federal të Zvicrës dhe Kryesuesin e Departamentit për Çështje Ekonomike të Arsimit dhe Hulumtimit, Guy Parmelin.

Bëhet e ditur se Kurti shprehu mirënjohjen për mbështetjen e vazhdueshme të Zvicrës dhe theksoi rëndësinë e thellimit edhe më tej të marrëdhënieve mes dy vendeve, teksa tha se diaspora kosovare shërben si urë lidhëse dhe faktor i rëndësishëm i bashkëpunimit të ngushtë mes Kosovës e Zvicrës.

“ Shtoi se bashkëpunimi ynë ekonomik dhe tregtar po shtohet çdo vit, gjersa niveli i përgjithshëm i investimeve të huaja direkte nga Zvicra në Kosovë në katër vitet e fundit është rritur për rreth 170%”.

“Ndërkaq, nënvizoi edhe rritjen e eksporteve nga Kosova drejt Zvicrës, ku në të njëjtën periudhë kohore, eksportet janë gati dyfishuar dhe përfshijnë një shumëllojshmëri produktesh si metale, produkte minerale, ushqime, plastikë, gomë, makineri, pajisje, materiale elektrike dhe tekstile. Zvicra është tashmë destinacioni i pestë më i madh për mallrat e Kosovës”, thuhet në njoftimin e qeverise.

Më tej, në takim bëhet e ditur se u theksua fakti që Kosova ka arritur Marrëveshje për Tregti të Lirë me vendet anëtare të EFTA-s, ku u tha se Kosova është i vetmi vend në rajon që ka negociuar edhe për tregti të shërbimeve me vendet e EFTA-s.

Ramush Haradinaj, kandidat për kryeministër i koalicionit AAK-Nisma-Konservatorët-E30, zhvilloi një takim me ambasadorin amerikan Jeffrey Hovenier në Ambasadën e ShBA-së në Prishtinë.

Siç bën të ditur zyra për media e AAK-së, gjatë takimit, u diskutuan zhvillimet politike dhe të sigurisë në Kosovë, me fokus të veçantë në përpjekjet për anëtarësim direkt në NATO.

“Plani aksional për anëtarësim në NATO mbetet objektivi ynë strategjik, si perspektiva e vetme për të siguruar paqe dhe siguri afatgjatë për vendin dhe rajonin tonë,” deklaroi Haradinaj pas takimit.

Gjatë bisedës, Haradinaj shprehu mirënjohje të thellë ndaj ambasadorit dhe Shteteve të Bashkuara për mbështetjen e vazhdueshme ndaj Kosovës. “E sigurova ambasadorin Hovenier se do të angazhohemi që aktivitetet tona politike të jenë të përqendruara në këtë synim të përbashkët,” shtoi kandidati për kryeministër, duke nënvizuar rëndësinë e bashkëpunimit me aleatët ndërkombëtarë në rrugën drejt NATO-s.

Në kujtim dhe nderim të heroit Afrim Zhitia, gjithë të rënëve dhe demonstruesve të vitit 1989, Shoqëria Lëvizja ka zbuluar sot pllakën përkujtimore në kryeqytet.

Pllaka është vendosur pikërisht në vendin ku Afrim Zhitia mbajti fjalim para popullit, kundër dhunës, terrorit dhe represionit që ushtronte pushtuesi serb.

Në këtë pllakë përkujtimore është vendosur edhe një pjesë e fjalimit që Zhitia kishte mbajtur para demonstruesve.

“Vëllezër dhe motra! Jemi mbledhur këtu që me forcë të ngrisim zërin kundër pushtuesve shovinistë, të cilët po ushtrojnë dhunë e terror të paparë mbi popullin tonë. Ka ardhur koha që kërkesat tona t’i themi më fuqishëm dhe më të organizuar. Andaj, të bashkohemi rreth Lëvizjes dhe kushtrimin për liri ta çojmë në çdo shtëpi shqiptare”, kanë qenë fjalët e heroit kombëtar në demonstratën e 1 nëntorit të vitit 1989.

Ushtria izraelite i ka bombarduar periferitë jugore të Bejrutit me një sërë sulmesh ajrore mëngjesin e së premtes, pasi fillimisht i urdhëroi banorët të largoheshin, raporton agjencia e lajmeve Reuters.

Disa ndërtesa u shkatërruan në disa lagje të Dayihehut në jug të Bejrutit, sipas agjencisë shtetërore të lajmeve në Liban.

Nuk dihet nëse ka viktima nga këto bombardime.

Ushtria izraelite tha se në shënjestër të sulmeve ishin objektet dhe asetet e Hezbollahut. Izraeli vazhdimisht e ka përsëritur këtë qëndrim gjatë kryerjes së sulmeve në gati dy muajt e fundit në Liban.

Hezbollahu, i cili e kontrollon Libanin jugor, është shpallur organizatë terroriste nga Shtetet e Bashkuara, ndërsa Bashkimi Evropian e ka vendosur në listën e zezë krahun e tij të armatosur, por jo edhe partinë e tij politike.

Bombardimet vijnë pas përpjekjeve të reja po të pafrytshme të Shteteve të Bashkuara dhe vendeve të tjera për arritjen e një armëpushimi në Rripin e Gazës dhe në Liban, për t’i dhënë fund një viti luftimesh mes Izraelit dhe grupeve të mbështetura nga Irani, Hezbollah dhe Hamas.

Hamasi është i shpallur organizatë terroriste nga SHBA dhe BE.

Sekretari amerikan i Shtetit, Antony Blinken, tha të enjten se Izraeli dhe Libani janë duke punuar për ta kuptuar se çfarë nevojitet për ta zbatuar një rezolutë të shkelur të OKB-së, 1701, e cila do të ishte themeli për t’i dhënë fund konfliktit.

Por, koha po soset për të gjetur një zgjidhje para zgjedhjeve të 5 nëntorit në SHBA. Zyrtarët e Libanit dhe analistët u treguan pesimistë pas lajmeve se i dërguari amerikan, Amos Hochstein, nuk do të shkojë në Bejrut nga Izraeli, ku ndodhej të enjten.

Konflikti përgjatë kufirit mes Hezbollahut dhe Izraeli u përshkallëzua në luftë të përgjithshme muajin e kaluar, kur Izraeli nisi një valë bombardimesh në të gjithë Libanin dhe vrau udhëheqësin kryesor të Hezbollahut, Hassan Nasrallah, dhe shumicën e zëvendësve të tij.

Forcat tokësore izraelite depërtuan në Liban në fillim të tetorit.

Udhëheqësi i sapoemëruar i Hezbollahut, Naim Qassem, tha se grupi militant do ta vazhdojë luftën me Izraelin derisa t’i plotësohen kushtet për një armëpushim që ai i vlerëson të pranueshëm.

Rreth 1.2 milion njerëz janë zhvendosur si pasojë e konfliktit në Liban, sipas vlerësimeve të qeverisë. Ministria e Shëndetësisë e Libanit tha se më shumë se 2.800 njerëz janë vrarë dhe 12.900 janë plagosur që nga 8 tetori 2023, kur Hezbollahu filloi të hidhte raketa në Izrael, duke nxitur hakmarrje./REL/

I akuzuari Driton Dobruna është deklaruar të premten fajtor se ka kanosur gazetarin Vehbi Kajtazi.

Në seancën e shqyrtimit fillestar, Dobruna e ka pranuar fajësinë se përmes mediave sociale e ka kanosur pronarin e portalit “Paparaci”.

“Fajtor, po”, ka deklaruar Dobruna, të premten, në seancën ku ka marrë pjesë edhe i dëmtuari Kajtazi dhe prokurori Paulin Pashku, raporton “Betimi për Drejtësi”.

I dëmtuari Kajtazi e ka mbështetur deklarimin e prokurorit të shtetit dhe ka kërkuar që me rastin e dënimit të jepet mësim gjithë atyre që kanë prirje t’i pengojnë e sulmojnë gazetarët.

Kajtazi ka thënë se i akuzuari kishte planifikuar në detaje se si do ta kryente veprën penale.

“Përgjatë këtyre 20 viteve si gazetar, kam marr kërcënime të ndryshme përfshirë edhe sulme fizike, por rrallëherë më ka rënë të lexoj diçka më trishtuese, më planifikuese në detaje se si dikush përgatitet për kryerjen e një vepre penale, mes tjerash, aty thotë se do ta shesë shtëpinë për ta kryer veprën penale, pra për të më djegur me benzinë”, ka thënë Kajtazi.

“Ndërkohë, në llogarinë e tij në Fb, e ka shtëpinë në shitje, pra e ka deklaruar se po e shet shtëpinë. Nuk kam se si ta shoh ndryshe, përveç një planifikimi në detaje për ta kryer këtë vepër, andaj kërkoj nga gjykata, që me rastin e shpalljes së dënimit se gazetarët në Kosovë sulmohen vazhdimisht, kërcënohen vazhdimisht, pengohen në punën e tyre, ju duhet t’ju jepni mësim të gjithë atyre që kanë prirje të tilla që të mos na pengojnë në punën tonë”, ka thënë Kajtazi, në seancë.

I akuzuari Dobruna është me profesion avokat derisa ka thënë se nuk ka marrë punë në profesionin e tij deri në momentin kur ta fitojë pafajësinë.

“Ju premtoj se i dëmtuari nuk ka asnjë rrezik nga unë”, ka deklaruar Dobruna.

Sipas aktakuzës, Dobruna ndër të tjera i kishte shkruar Kajtazit se: “Do të lyej me benzinë, ne të dy do të takohemi, e unë e ti së bashku në ferr”.

Dobruna ishte arrestuar pas raportimit të kanosjes derisa i ishte caktuar edhe masa e paraburgimit më 11 tetor 2024.

Ndërkohë, AGK-ja kishte kërkuar reagim të organeve të drejtësisë për Dobrunën dhe gjithë ata që kërcënojnë gazetarët.

Një aksident me fatalitet ka ndodhur në Kllokot të Vitisë pak pas mesnatës.

Si pasojë bëhet e ditur se pasagjeri i mjetit si rezultat i plagëve të marra ka ndërruar jetë në vendngjarje.

Rastin për Insajderin e ka konfirmuar zëdhënësi i policisë për rajonin e Gjilanit, Ismet Hashani.

“Ju njoftoj se me datën 01.11 2024 rreth orës 01:15 ka ndodhur një vetaksident trafiku në aksin rrugor Kllokot-Viti. Dyshohet se ngasësi i automjetit me targa vendore humbe kontrollin mbi automjetin, dalë jashtë rrugës dhe rrotulliset. Si pasojë pasagjeri i mjetit nga lëndimet e marra ndërron jetë në vendin e ngjarjes, vdekjen e të cilit e ka konfirmuar mjeku. Po ashtu drejtuesi i mjetit pëson lëndime trupore për të cilat është duke u trajtuar në Spitalin Rajonal në Gjilan”, u shpreh ai.

Ai bëri me dije se trupi i pajetë i viktimës me urdhër të Prokurorit të Shtetit është dërguar në Institutin e Mjekësisë Ligjore për obduksion ndërsa vozitësi do të dërgohet ne mbajtje.

Policia e Kosovës, në Leposaviq arrestuar një person nën dyshimin se posedon disa armë pa leje.

Në komunikatë bëhet e ditur se ai fillimisht në një fshat të Leposaviqit ishte vërejtur me një pushkë gjuetie me municion.

“Nën dyshimin e bazuar se personi i dyshuar R.M., (viti i lindjes 1976, mashkull kosovar) posedon edhe armë tjera, është kontrolluar shtëpia e tij. Gjatë kontrollit janë gjetur edhe: një armë gjysmë- automatike, një pushkë 8.75mm, një pushkë ajrore, fishekë kalibrash të ndryshëm, disa thika e një xhaketë me pajisje tjera ushtarake”, tha tutje policia.

I dyshuari është dërguar në mbajtje për 48-orë, bëhet e ditur në komunikatë.