Category: Lajme

Partia Demokratike e Kosovës ka thënë se janë refuzuar të 32 amandamentet, të cilat Grupi Parlamentar i PDK-së i propozoi për buxhetin e Kosovës.

Deputetja e PDK-së, Blerta Deliu tha se amandamentet e propozuara nuk e kanë marrë mbështetjen e VV-së, dhe për rrjedhojë tha se buxheti për vitin 2026 nuk do ta ketë mbështetjen e PDK-së.

“PDK me 32 amendamente e saj, të cilat i ka propozuar duke bërë përpjekje të bëjë këtë buxhet sa më të plotë, gjithëpërfshirës nuk ka gjetë mbështetjen e Lëvizjes Vetëvendosje. Janë amendamente që kanë të bëjnë me paga më të mira, siguri më të madhe, investime konkrete në shëndetësi, arsim, bujqësi, infrastrukturore. Kemi propozuar edhe amendamente që kanë të bëjnë me zbatimin e vendimit të Gjykatës Kushtetuese për pagat në sektorin publik.

Kemi pasur edhe amendament që kërkon rritjen e fondeve për mbështetjen në mbrojtje juridike në proceset gjyqësore në Hagë që lloftarët tanë në Hagë të sigurohen që të kenë një mbrojtje dinjitoze. Ne nuk kemi arritur që për to të marrim mbështetjen e partisë së udhëheqë me vendin dhe si i tillë, ky buxhet do të jetë i mangët, buxhet që nuk përfaqëson barazinë dhe ka probleme, përmbajtjesore, strukturore dhe si i tillë nuk do ta ketë mbështetjen e PDK-së”, tha Deliu.

Kryetari i Listës Serbe, Zlatan Elek ka dhënë dorëheqje nga pozita e deputetit të Kuvendit të Kosovës.

Kështu u bë e ditur nga kryetarja e Kuvendit, Albulena Haxhiu.

Ai është zëvendësuar nga Branislav Nikoliq, ku ky i fundit bëri sot betimin si deputet i Kuvendit të Kosovës.

Seanca plenare për buxhetin 2026 ka nisur punimet në Kuvendin e Kosovës.

Të zgjedhurit e popullit sot e kanë në duart e tyre ta votojnë ose jo shqyrtimin e dytë të këtij projektligji.

Ndryshe, të enjten në Klan Kosova, nënkryetarja e Kuvendit Vlora Çitaku, tha se Partia Demokratike e Kosovës nuk do ta votojë buxhetin e këtij viti.

Kryeministri Albin Kurti ka emëruar Nora Arapi-Krasniqin në pozitën e zëvendësministres së parë të Kulturës dhe Turizmit.

“Nora Arapi Krasniqi është arkitekte dhe specialiste e konservimit të trashëgimisë kulturore me mbi 15 vjet përvojë profesionale në ruajtjen dhe rijetësimin e monumenteve kulturore, me fokus në integrimin e konservimit në zhvillim të qëndrueshëm urban dhe inovacionin kulturor. Gjatë mandatit të kaluar, znj. Arapi Krasniqi ka shërbyer si Këshilltare e Lartë e Ministrit të Kulturës, Rinisë dhe Sportit, me rol kyç në hartimin e politikave kombëtare për zhvillim të qëndrueshëm dhe menaxhim të trashëgimisë kulturore”, thuhet në njoftimin e Zyrës së Kryeministrit.

ZKM shtoi se Kurti e uroi atë për detyrën dhe i dëshiroi suksese në përmbushjen e përgjegjësive të saj.

Ka ndërruar jetë Sanije Musa, ish-pjesëtare e Ushtrisë Çlirimtare të Kosovës në Brigadën 141 “Mehë Uka”.

Lajmin për vdekjen e saj e bëri të ditur kryetari i Organizatës së Veteranëve të Luftës së UÇK-së, Hysni Gucati, i cili tha se e ndjera shërbeu me nder në luftë dhe me përkushtim në paqe, duke dhënë një kontribut të çmuar si sekretare e OVL-UÇK në Mitrovicë.

“Do të kujtohet gjithmonë si një luftëtare e lirisë dhe një grua me vlera të larta njerëzore. Ngushëllime familjes dhe bashkëluftëtarëve! Qoftë i përjetshëm kujtimi për të!”, ka shkruar Gucati në Facebook.

Qeveria britanike nuk i ka dhënë leje SHBA-së për të përdorur bazat ushtarake në Mbretërinë e Bashkuar për të mbështetur sulmet e mundshme amerikane ndaj Iranit, raporton BBC.

Në të kaluarën, SHBA-ja ka përdorur RAF Fairford në Gloucestershire dhe territorin jashtë vendit të Mbretërisë së Bashkuar, Diego Garcia, në Oqeanin Indian, për të kryer sulme në rajonin e Lindjes së Mesme.

Sipas raportimeve të The Times, kritikat e fundit të Presidentit amerikan Donald Trump ndaj marrëveshjes së Sir Keir Starmer për t’i dorëzuar Ishujt Chagos Mauritiusit dhe për të marrë me qira një bazë ushtarake të përbashkët UK-SHBA u nxiten nga refuzimi i Britanisë për të dhënë leje për përdorimin e bazave.

Një zëdhënës i qeverisë britanike tha: “Si rutinë, ne nuk komentojmë çështje operative.”

SHBA-ja ka ushtuar presion ndaj Iranit për të pranuar kufizimin e programit të tij bërthamor dhe ka kërcënuar me sulme të mundshme nëse nuk e bën këtë, duke vendosur anije lufte, aeroplanë dhe burime të tjera ushtarake në rajon për një sulm të mundshëm.

Në të njëjtën kohë, është raportuar për përparime në bisedimet midis negociatorëve amerikanë dhe iranianë në Zvicër.

Të enjten, Trump tha se bota do të mësojë “brenda 10 ditëve të ardhshme, ndoshta”, nëse SHBA do të arrijë një marrëveshje me Iranin apo do të ndërmarrë veprime ushtarake.

Një zëdhënës i qeverisë britanike tha: “Ka një proces politik në zhvillim midis SHBA-së dhe Iranit, të cilin Mbretëria e Bashkuar e mbështet.

“Irani nuk duhet të ketë kurrë mundësi të zhvillojë një armë bërthamore, dhe prioriteti ynë është siguria në rajon.”

Sir Keir bisedoi me Trump me telefon të martën, pasi qeveria amerikane dha mbështetjen e saj formale për marrëveshjen e Chagos.

The Times raporton se të dy diskutuan ultimatumet e Trump ndaj Iranit mbi programin bërthamor, dhe Trump bëri deklaratën e tij duke sulmuar marrëveshjen e Chagos ditën pas.

Burime të brendshme besojnë se përgatitjet e Pentagonit për sulme të mundshme ndaj Iranit – që potencialisht mund të kryheshin nga Diego Garcia – mund ta kenë ndryshuar perceptimin e presidentit mbi rëndësinë e ishullit, më i madhi në arkipelagun Chagos.

Trump e përmendi këtë në postimin e tij në Truth Social, duke thënë: “Nëse Irani vendos të mos bëjë marrëveshje, mund të jetë e nevojshme që Shtetet e Bashkuara të përdorin Diego Garcia dhe bazën e [RAF] Fairford në Gloucestershire për të eliminuar një sulm të mundshëm nga një regjime shumë e paqëndrueshme dhe e rrezikshme.”

As RAF Fairford dhe as Diego Garcia nuk u përdorën në sulmet amerikane të kryera vitin e kaluar ndaj objekteve bërthamore të Iranit.

Në atë kohë, një burim i lartë i mbrojtjes në MB tha se Uashingtoni nuk kishte kërkuar leje.

RAF Fairford dhe bazat e tjera britanike u përdorën së fundmi nga SHBA për të mbështetur një operacion ushtarak për të marrë tanker-in e regjistruar Bella 1 më herët këtë vit.

Por ai operacion u krye me mbështetje të plotë të MB, dhe ministrat thanë se operacioni ishte i justifikuar sipas ligjit ndërkombëtar.

Çështjet e ligjit ndërkombëtar do të aplikoheshin nga qeveria britanike për të justifikuar mbështetjen për çdo veprim ushtarak amerikan ndaj Iranit.

Sipas një marrëveshjeje të gjatë, SHBA duhet së pari të kërkojë përdorimin e çdo baze ushtarake sovrane britanike përpara se të kryejë operacione ushtarake.

Sipas ligjit ndërkombëtar, nuk ka dallim midis një shteti që kryen sulmin dhe atyre që e kanë mbështetur atë, nëse këta të fundit kanë “njohuri për rrethanat e veprës ndërkombëtare të paligjshme”.

Në janar, redaktori politik i BBC-së, Chris Mason, pyeti Sir Keir nëse mbështet një sulm të mundshëm amerikan ndaj Iranit.

Në atë kohë, kryeministri u përgjigj se po fliste me aleatët për mënyrat për të parandaluar zhvillimin e aktivitetit bërthamor të Iranit dhe vrasjen e protestuesve.

“Qëllimi këtu është që Irani të mos ketë mundësi të zhvillojë armë bërthamore. Kjo është jashtëzakonisht e rëndësishme,” tha ai.

“Dhe sigurisht, duhet të merremi me faktin që ata po shtypin protestuesit, duke i vrarë ata. Është groteske ajo që po ndodh. Këtu është fokusi ynë dhe po punojmë me aleatët për këtë qëllim.”

Duke reaguar ndaj zhvillimeve të fundit, lideri i Liberal Demokratëve, Sir Ed Davey, një kritik i gjatë i Trump, tha:

“Është tani e qartë se Donald Trump po përpiqet të intimidonte qeverinë për t’i lejuar SHBA-së të përdorë bazat britanike si Diego Garcia për të ndjekur veprime ushtarake unilaterale.

“Keir Starmer duhet të qëndrojë i fortë dhe t’i japë Parlamentit një votë mbi përdorimin e bazave britanike nga forcat amerikane.”

Palestina kundërshton pjesëmarrjen e Izraelit në Bordin e Paqes, ka bërë të ditur ambasadori palestinez në Austri, Salah Abdel Shafi.

“Nga pikëpamja jonë, kryeministri izraelit Benjamin Netanyahu është një kriminel lufte dhe duhet të dalë para gjyqit për krimet e kryera, në vend që të jetë anëtar i Bordit të Paqes,” tha diplomati.

Ai theksoi gjithashtu se nevojat humanitare të Rripit të Gazës janë urgjente.

“Pas luftës shkatërrimtare që ka përjetuar Rripi i Gazës, praktikisht asgjë nuk ka mbetur. Izraeli ka shkatërruar infrastrukturën, ka çmontuar sistemin e kujdesit shëndetësor, sektorin e arsimit dhe shkollat. Sot, Rripi i Gazës ka nevojë për absolutisht gjithçka,” tha ai.

Më 22 janar, përfaqësuesit e 19 vendeve nënshkruan statutin e Këshillit në margjinat e Forumit Ekonomik Botëror në Davos.

Bordi i Paqes u krijua sipas një marrëveshjeje midis Izraelit dhe lëvizjes palestineze Hamas për të qeverisur Gazën, por pritet gjithashtu të trajtojë parandalimin dhe zgjidhjen e konflikteve në rajone të tjera.

Policia e Kosovës ka kërkuar ndihmën e qytetarëve për identifikimin e një personi të dyshuar për përfshirje në veprime të kundërligjshme, duke publikuar fotografinë e tij.

Në njoftim thuhet se i dyshuari kërkohet për veprën penale “vjedhje ”.

Kërkesa e Policisë:

Kërkesë për bashkëpunim – identifikim i personit të dyshuar

Sektori i Hetimeve të Kryeqytetit, me autorizim nga prokuroria kompetente, kërkon ndihmë nga qytetarët në ofrimin e informatave, të cilat do të ndihmonin në identifikimin e personit që shihet në fotografi.

Personi i dyshuar kërkohet për përfshirje në veprën penale ‘vjedhje’.

Të nderuar, për çdo informatë që mund të çojë në identifikimin e tyre, ju lusim të kontaktoni Policinë në numrin e telefonit: 192 ose përmes emailit: [email protected].

Ministrja e Industrisë, Ndërmarrësisë, Tregtisë dhe Inovacionit, Mimoza Kusari –Lila bëri të ditur se sot nënshkroi inicimin e procedurës për Projektligjin për masat e përkohshme të produkteve themelore në rast të krizave ekonomike (Ligji për çmimet tavan).

Kusari-Lila theksoi se ky është një hap i domosdoshëm për të mbrojtur konsumatorin dhe për të garantuar stabilitet në treg.

Lexoni të plotë postimin:

Pas miratimit të agjendës legjislative në Qeverinë e Kosovës, duke pasur parasysh rëndësinë e këtij projektligji dhe premtimin e Kryeministrit Kurti për miratimin e tij që në fillim të mandatit të ri, sot nënshkrova inicimin e procedurës për Projektligjin për masat e përkohshme të produkteve themelore në rast të krizave ekonomike (Ligji për çmimet tavan).

Ky është një hap i domosdoshëm për të mbrojtur konsumatorin dhe për të garantuar stabilitet në treg.

Ky projektligj krijon bazën ligjore për ndërhyrje të shpejtë dhe të drejtë kur përballemi me:

– rritje të papritura të çmimeve

– mungesë të produkteve themelore

– çrregullime në furnizim

Qëllimi nuk është ndërhyrja arbitrare në treg, por mbrojtja e qytetarëve nga abuzimi dhe spekulimi në kohë krize. Masat janë të përkohshme, proporcionale dhe të orientuara drejt ruajtjes së stabilitetit ekonomik.

Duke adresuar edhe vërejtjet e Gjykatës Kushtetuese nga e kaluara, po ndërtojmë një kornizë më të fortë, më të qëndrueshme dhe ligjërisht solide.

Në një periudhë kur inflacioni ka prekur çdo familje, shteti duhet të jetë garant i balancës mes tregut të lirë dhe interesit publik.