Author: Samir Dalipi

Aktivisti i Shoqërisë Civile, Besnik Shabiu, e ka vlerësuar si shqetësuese pjesëmarrjen e ulët të qytetarëve në zgjedhje, duke thënë se nëse trendi aktual vazhdon deri në mbylljen e procesit, ai përbën një mesazh të qartë të pakënaqësisë së qytetarëve.

Sipas Shabiut, shprehja e vazhdueshme e qytetarëve se janë “lodhur” po reflektohet edhe në mospjesëmarrjen në votime, gjë që, sipas tij, paraqet një sfidë serioze për demokracinë në vend.

“…Nëse ky trend mbetet deri në fund, është një mesazh i qartë i qytetarëve që vërtet ajo shprehja e vazhdueshme ‘jemi lodhë’ del të jetë reale. Kjo është tepër shqetësuese për demokracinë e vendit”, deklaroi ai.

Shabiu theksoi se kur qytetarët refuzojnë të shfrytëzojnë të drejtën e tyre për të votuar, ekziston rreziku që pakënaqësitë t’i shprehin në forma të tjera, përfshirë protestat dhe kërkesat për alternativa të reja qeverisëse.

Deri në këtë moment (ora 15:27), sipas KQZ pjesëmarrja e qytetarëve deri në ora 15:00 është 22.56 për qind!

Për t’u informuar në kohë reale për zgjedhjet e parakohshme parlamentare, klikoni në linkun e mëposhtëm:

Politologia Nora Loxha Sahatçiu në një deklaratë për ATV-në, ka ngritur shqetësimin për rritjen e apatisë në shoqëri, duke theksuar se ky fenomen po vërehet jo vetëm te qytetarët, por edhe te intelektualët dhe personat e përfshirë në proceset e rëndësishme institucionale.

Sipas saj, kohëve të fundit është krijuar një perceptim se angazhimi dhe përpjekjet individuale apo kolektive nuk po sjellin ndryshimet e nevojshme në zhvillimin e vendit.

“…Në kohën e fundit, e kam pa që te njerëzit ka ardhë një lloj i apatisë, bile bile edhe te intelektualët dhe ata të cilët janë të përfshirë në çështjet kryesore të institucioneve tona, të zhvillimit të qytetit, të zhvillimit të shtetit. Është një lloj i apatisë që çkado që bëjmë nuk do të ketë ndonjë ndryshim…”, theksoi Loxha.

Për t’u informuar në kohë reale për zgjedhjet e parakohshme parlamentare, klikoni në linkun e mëposhtëm:

15.70% e votuesve me të drejtë vote kanë votuar deri në orën 13:00.
Nga procesimi i të dhënave për mbi 98 për qind të qendrave të votimit, Komisioni Qendror i Zgjedhjeve në përditësimin e fundit ka njoftuar se kanë votuar gjithsej 307.707 qytetarë.
Krahasuar me zgjedhjet e 28 dhjetorit 2025 në të njëjtën periudhë, vërehet se këtë herë pjesëmarrja deri në këtë kohë është më e ulët. Atëherë deri në këtë kohë kishin votuar reth 18.6 për qind e votuesve.

Për t’u informuar në kohë reale për zgjedhjet e parakohshme parlamentare, klikoni në linkun e mëposhtëm:

Avokati Ardian Bajraktari ka vlerësuar se fushata zgjedhore u karakterizua më shumë nga diskutimet politike rreth përgjegjësisë për shkuarjen e vendit në zgjedhje, sesa nga prezantimi i programeve dhe platformave konkrete për qytetarët.

“…Po t’i referohemi paraqitjes së kësaj fushate, ndonëse ishte e shkurtër, pjesa e dërrmuese, fokusi ishte se me fajin e kujt vendi po shkon në zgjedhje, sesa që ofrohej një platformë që do të mund të analizohej nga ana e qytetarëve…”, theksoi Bajraktari për ATV-në.

Ai deklaroi se votimi mbi bazën e programeve krijon një raport të qartë përgjegjësie mes qytetarëve dhe përfaqësuesve të zgjedhur.

“…Në momentin që votohet për programe, është një lloj kontrate e qytetarëve me të zgjedhurit e tyre, se cilat do të jenë prioritetet dhe angazhimet për periudhën qeverisëse. Në fund, mund të bëhet një bilanc i qartë mes asaj që është premtuar dhe asaj që është realizuar…”, u shpreh ai.

Për t’u informuar në kohë reale për zgjedhjet e parakohshme parlamentare, klikoni në linkun e mëposhtëm:

Bazuar në të dhënat preliminare nga më shumë se 97% e vendvotimeve, numri i qytetarëve që kanë votuar deri në orën 11:00 është 162.439 votues apo 8.29%.

Kryesuesi i Komisionit Qendror të Zgjedhjeve, Kreshnik Radoniqi në konferencën e orës 11:30, ka thënë se procesi po vazhdon pa probleme.
“Procesi i votimit po zhvillohet sipas planifikimeve. Sipas të dhënave nga komisionet komunale, deri tash votimi po zhvillohet në kushte të rregullta dhe pa probleme”, ka thënë ai.

Për t’u informuar në kohë reale për zgjedhjet e parakohshme parlamentare, klikoni në linkun e mëposhtëm:

Gjatë një vizite në Shtëpinë e të Moshuarve nga ATV-ja, gazetarja Lirie Dibrani ka intervistuar një banore të moshuar e cila ishte e verbër dhe shprehu pakënaqësitë e saj lidhur me procesin e votimit dhe kushtet e ofruara për personat e verbër.

Sipas saj, mungesa e materialeve të përshtatura për personat me dëmtime në shikim dhe moslejimi i përcjellësit të saj gjatë votimit i kanë vështirësuar ushtrimin e të drejtës së votës.

“Unë që jam e verbër nuk kam pasur libra për me lexu emrat dhe numrat e votimit. KQZ-ja është fajtore që nuk na i ka sjellë librat dhe që ka bërë që personat e verbër të mos kenë përcjellës ndihmës… Punëtorët e KQZ-së që kanë ardhur sot në Shtëpinë e Pleqve nuk më kanë lënë ta afroj përcjellësin, për shkak të KQZ që e kanë ndalu mos me pasë përcjellësat”, deklaroi ajo për ATV-në.

Për t’u informuar në kohë reale për zgjedhjet e parakohshme parlamentare, klikoni në linkun e mëposhtëm:

Profesori dhe eksperti i komunikimit, Oltion Beshiri, ka theksuar se fenomeni i lajmeve të rreme vazhdon të jetë i pranishëm edhe gjatë proceseve zgjedhore, duke e konsideruar të vështirë krijimin e një mekanizmi që mund t’i eliminojë plotësisht ato.

“…Lajme të rreme kemi gjatë tërë kohës, kemi edhe sot në ditën e zgjedhjeve… mirëpo është shumë e vështirë me e kriju një sistem që i lufton të gjitha lajmet e rreme…”, theksoi Beshiri për ATV-në.

Megjithatë, Beqiri potencoi se fokusi kryesor duhet të jetë promovimi i informacionit të verifikuar dhe edukimi i vazhdueshëm i qytetarëve për të dalluar përmbajtjet manipuluese. Ai bën thirrje për bashkëpunim të gjerë shoqëror në ngritjen e vetëdijes mediatike dhe zhvillimin e fushatave informuese që ndihmojnë publikun të identifikojë dhe verifikojë burimet e informacionit.

Për t’u informuar në kohë reale për zgjedhjet e parakohshme parlamentare, klikoni në linkun e mëposhtëm:

Sipas të dhënave të publikuara nga Komisioni Qendror i Zgjedhjeve, 16,934 qytetarë që kanë mbushur moshën 18-vjeçare pas zgjedhjeve parlamentare të 28 dhjetorit 2025 do të votojnë për herë të parë në zgjedhjet e parakohshme të 7 qershorit.

Lista preliminare e votuesve për këto zgjedhje përfshin gjithsej 2,092,174 qytetarë me të drejtë vote.

Të dhënat e KQZ-së tregojnë se numri total i votuesve që do të marrin pjesë për herë të parë në një proces zgjedhor arrin në 22,685 persona. Prej tyre, 16,934 janë të rinj që kanë fituar të drejtën e votës pasi kanë mbushur moshën madhore pas zgjedhjeve të fundit parlamentare, ndërsa 5,198 të tjerë janë qytetarë të regjistruar për herë të parë në Regjistrin Qendror Civil ose persona që kanë rifituar shtetësinë e Kosovës.

Sa i përket strukturës gjinore të votuesve të rinj, 8,752 prej tyre, ose 51.68 për qind, janë meshkuj, ndërsa 8,182, përkatësisht 48.31 për qind, janë femra.

Për t’u informuar në kohë reale për zgjedhjet e parakohshme parlamentare, klikoni në linkun e mëposhtëm:

Organizata Demokracia në Veprim (DnV) ka bërë të ditur se procesi i votimit në zgjedhjet e parakohshme për Kuvendin e Kosovës ka nisur kryesisht me kohë dhe pa probleme serioze në shumicën e vendvotimeve në vend.

Sipas DnV-së, nga të dhënat e mbledhura nga terreni, vetëm 1.6 për qind e vendvotimeve janë hapur me vonesë. Shkaku kryesor i këtyre vonesave ka qenë mungesa e komisionerëve, ndërsa në disa raste janë raportuar edhe mungesa të kabinave të votimit.

DnV ka evidentuar gjithashtu se në rreth 2 për qind të vendvotimeve janë shfaqur probleme me funksionalizimin ose vendosjen e kamerave, çka sipas organizatës mund të ndikojë në ruajtjen e fshehtësisë së votës.

Një tjetër gjetje e vëzhguesve është se në 16 për qind të vendvotimeve nuk ka asnjë grua të angazhuar si komisionere.

Për t’u informuar në kohë reale për zgjedhjet e parakohshme parlamentare, klikoni në linkun e mëposhtëm:

KQZ ka publikuar linkun për publikimin e rezultateve preliminare dhe statistikave për pjesëmarrjen në votime për çdo komunë, qendër votimi dhe vendvotim në zgjedhjet e parakohshme për Kuvendin e Republikës së Kosovës.

Ky është linku:

https://resultsparliamentary2026.kqz-ks.org/turnout

Për t’u informuar në kohë reale për zgjedhjet e parakohshme parlamentare, klikoni në linkun e mëposhtëm: