Author: N.T.

Tre futbollistë shqiptarë kanë spikatur në mënyrë të veçantë në javën e fundit të elitës së futbollit zviceran, duke siguruar një vend në “Formacionin e Javës” për xhiron e 32-të, sipas vlerësimeve të SofaScore.

Në qendër të vëmendjes ishte Xherdan Shaqiri, i cili vazhdon të tregojë cilësitë dhe përvojën e tij të jashtëzakonshme. Me notën 8.0, ai pati një rol kyç në barazimin spektakolar 3-3 të Baselit ndaj Young Boys, duke kontribuar me një gol dhe duke udhëhequr fazën sulmuese me kreativitetin e tij.

Një tjetër paraqitje mbresëlënëse erdhi nga mbrojtësi Kreshnik Hajrizi. Ai u vlerësua me notën 8.3 pas një loje shumë solide në fitoren bindëse 0-4 të Sionit ndaj Grasshoppers. Qëndrueshmëria dhe ndërhyrjet e sakta e bënë një nga lojtarët më të rëndësishëm të skuadrës në këtë përballje.

Ndërkohë, në portë shkëlqeu Amir Saipi, i cili mori notën më të lartë, 8.8. Portieri i Kosovës ishte vendimtar në fitoren 1-0 të Luganos ndaj liderit Thun, duke realizuar pritje të rëndësishme dhe duke garantuar siguri gjatë gjithë ndeshjes.

Këto performanca janë dëshmi e qartë e ndikimit në rritje të futbollistëve shqiptarë në Superligën zvicerane, ku ata po shndërrohen në protagonistë të padiskutueshëm të këtij sezoni.

Lista e plotë e kombëtareve pjesëmarrëse për Kupën e Botës 2026 tashmë është zyrtare. Turneu madhor do të zhvillohet nga 11 qershori deri më 19 korrik në Shtetët e Bashkuara të Amerikës, Kanada dhe Meksikë, duke shënuar një epokë të re për futbollin botëror.

Ky edicion do të jetë historik, pasi për herë të parë do të marrin pjesë 48 kombëtare, të ndara në 12 grupe, duke e bërë garën më gjithëpërfshirëse dhe më konkurruese se kurrë më parë.

Biletat e fundit për në Botëror u siguruan pas një serie ndeshjesh dramatike në kualifikime. Në Evropë, Turqia siguroi kualifikimin pasi mposhti Kosovën, ndërsa Suedia triumfoi ndaj Polonisë. Një nga surprizat më të mëdha ishte eliminimi i Italisë nga Bosnia dhe Herzegovina pas penalltive, ndërsa Republika Çeke eliminoi Danimarkën.

Bileta e fundit për në turne u sigurua nga Iraku, i cili mposhti Bolivinë me rezultat 2-1 në finalen ndërkontinentale të zhvilluar në Monterrey, duke u rikthyer në Kupën e Botës për herë të parë që nga viti 1986.

Ndërkohë, Republika Demokratike e Congos vulosi pjesëmarrjen duke mposhtur Xhamajkën 1-0 pas vazhdimeve, duke plotësuar kështu listën e 48 ekipeve që do të luftojnë për titullin e kampionit të botës.

Grupet e Kupës së Botës 2026 janë:

Grupi A: Meksika, Afrika e Jugut, Koreja e Jugut, Republika Çeke

Grupi B: Kanadaja, Bosnja dhe Hercegovina, Katari, Zvicra

Grupi C: Brazili, Maroku, Haiti, Skocia

Grupi D: SHBA, Paraguai, Australi, Turqi

Grupi E: Gjermania, Kurasao, Bregu i Fildishtë, Ekuador

Grupi F: Holanda, Japonia, Suedia, Tunizia

Grupi G: Belgjika, Egjipti, Irani, Zelanda e Re

Grupi H: Spanja, Kepi i Gjelbër, Arabia Saudite, Uruguai

Grupi I: Franca, Senegali, Iraku, Norvegjia

Grupi J: Argjentina, Algjeria, Austria, Jordania

Grupi K: Portugalia, Republika Demokratike e Kongos, Uzbekistani, Kolumbia

Grupi L: Anglia, Kroacia, Gana, Panama

Në një ceremoni solemne të mbajtur këtë të mërkurë, presidentja e Kosovës, Vjosa Osmani, ka nderuar Kombëtaren e Kosovës në futboll me Medaljen Presidenciale të Meritave, si vlerësim për përfaqësimin dinjitoz dhe emocionet e mëdha që i kanë dhuruar vendit.

Në këtë ngjarje të veçantë morën pjesë figura kyçe të futbollit kosovar, mes tyre kryetari i Federata e Futbollit të Kosovës, Agim Ademi, përzgjedhësi Franco Foda, si dhe futbollistët Vedat Muriqi dhe Valon Berisha, së bashku me përfaqësues të tjerë të federatës.

Presidentja Osmani vlerësoi lart kontributin e ekipit kombëtar, duke theksuar se ata kanë qenë burim krenarie dhe frymëzimi për qytetarët, falë përkushtimit, disiplinës dhe shpirtit luftarak të treguar në çdo ndeshje. Ajo nënvizoi se paraqitjet e fundit kanë dëshmuar qartë se Kosova po afrohet gjithnjë e më shumë me nivelet më të larta të futbollit ndërkombëtar.

Në fjalën e saj, Osmani theksoi se kjo dekoratë është një vlerësim për sakrificën, mundin dhe djersën e çdo lojtari, si dhe për krenarinë që kanë sjellë tek shqiptarët kudo në botë. Ajo shtoi se, pavarësisht rezultatit të fundit, Kombëtarja ka fituar një vend të veçantë në zemrat e qytetarëve dhe do të mbetet simbol i unitetit dhe i shpresës.

Ky vlerësim vjen pas një rrugëtimi mbresëlënës të Kosovës në kualifikimet për Kupën e Botës, ku skuadra arriti deri në fazën vendimtare, duke dëshmuar rritje të jashtëzakonshme dhe potencial për të ardhmen.

Një moment që nuk shënon fundin e një rruge, por forcimin e besimit se suksesi i madh është vetëm çështje kohe.

Sulmuesi i talentuar Fisnik Asllani ka reaguar pas eliminimit të Kosovës nga faza e play-off-it për kualifikim në Kupën e Botës 2026, duke ndarë emocionet e tij me tifozët.

Asllani ishte një nga lojtarët më të spikatur të Kosovës gjatë këtyre kualifikueseve, duke dhënë kontribut të madh në rrugëtimin historik të ekipit dhe duke realizuar tre gola të rëndësishëm.

Përmes një postimi në Instagram, ai e përshkroi eliminimin jo thjesht si një humbje, por si një ëndërr që u ndal shumë pranë realizimit.

“Nuk është veç një humbje… është një ëndërr që u ndal pak para fundit. E dhamë shpirtin, besuam deri në sekondën e fundit, por fati nuk ishte në anën tonë”, ka shkruar ai.

Sulmuesi kosovar theksoi edhe dhimbjen e madhe që la kjo ndeshje, duke qenë se skuadra ishte shumë afër një momenti historik për vendin.

“Dhimbja është e madhe, sepse e dinim sa afër ishim historisë… sa afër një momenti që do mbetej përgjithmonë”.

Fjalët e tij pasqyrojnë më së miri ndjenjën e një kombëtareje që luftoi deri në fund dhe që për pak ishte pjesë e historisë së madhe të futbollit botëror.

Kupa e Botës 2026, që do të zhvillohet nëShtete e Bashkuara të Amerikës, Kanada dhe Meksikë, do të jetë pa disa nga emrat më të mëdhenj të futbollit botëror, një mungesë që pritet të ndihet fort në skenën më të madhe.

Ndër ta spikat Robert Lewandowski, një nga sulmuesit më të mëdhenj të dekadës së fundit. Ylli 37-vjeçar i FC Barcelona, autor i 89 golave me Poloninë, nuk arriti të udhëheqë kombëtaren e tij drejt kualifikimit. Polonia u mposht 3-2 nga Suedia në finalen e play-off-it në Stokholm, në një ndeshje dramatike që i dha fund ëndrrës së tyre.

Karriera e Lewandowskit është e jashtëzakonshme, 10 tituj të Bundesliga me Borussia Dortmund dhe Bayern Munich, si dhe suksese në Spanjë me Barcelonën. Megjithatë, Botërori 2026 mund të ketë qenë mundësia e tij e fundit për një turne të madh ndërkombëtar.

Por ai nuk është i vetmi emër i madh që do të mungojë.

Portieri Gianluigi Donnarumma, tashmë pjesë e Manchester City, pavarësisht formës së shkëlqyer, mbeti jashtë pasi Italy u eliminua në mënyrë tronditëse nga Bosnia dhe Herzegovina pas penalltive. Një goditje e rëndë për një kampion Evrope dhe për një portier që dikur ishte hero i Euro 2020.

Një tjetër talent i madh, Khvicha Kvaratskhelia, që shkëlqeu me Paris Saint-Germain dhe madje shënoi në finalen e Ligës së Kampionëve, nuk do të jetë pjesë e turneut, pasi Georgia pati një fushatë zhgënjyese në kualifikuese.

Nga Afrika, mungesë e madhe është edhe Victor Osimhen. Sulmuesi që udhëhoqi Galatasaray drejt titullit dhe më parë kishte shkëlqyer me Napolin, nuk arriti të shpëtojë Nigeria, që u eliminua pas penalltive nga Republika Demokratike e Kongos.

Ndërsa në Evropë, edhe Dominik Szoboszlai, mesfushori kreativ i Liverpool, do ta ndjekë Botërorin nga shtëpia. Hungaria u eliminua në mënyrë dramatike, pasi Republika e Irlandës shënoi dy gola në kohën shtesë për të përmbysur gjithçka.

Botërori 2026 premton spektakël, por mungesa e këtyre emrave të mëdhenj e bën edhe më të veçantë, një kujtesë se futbolli është po aq i pamëshirshëm sa edhe magjik.

Presidenti i Federatës Shqiptare të Futbollit (FSHF), Armand Duka, ka dërguar një mesazh emocionues në rrjetet sociale, duke shprehur mbështetjen e tij për Kombëtaren e Kosovës para ndeshjes vendimtare ndaj Turqisë.

Në postimin e tij në Facebook, Duka ka theksuar lidhjen e veçantë mes dy kombëtareve shqiptare, duke treguar se ndonëse përfaqësimet janë të ndara, bashkimi shpirtëror mbetet i paprekur.

“Ndoshta sot mund të ishim dy… por edhe kështu, jemi një. Me krenarinë që na dha Shqipëria dhe shpresën që na jep Kosova. Forca djemtë tanë!”, ka shkruar ai, duke dërguar një mesazh të qartë uniteti dhe motivimi për “Dardanët”.

Ky reagim vjen në një moment historik për Kosovën, e cila synon të arrijë rezultate të jashtëzakonshme dhe kualifikimin për herë të parë në Kupën e Botës 2026. Mesazhi i Dukës shihet si një mbështetje simbolike që tejkalon sportin, duke forcuar ndjenjën e përbashkët kombëtare mes shqiptarëve.

Postimi i tij ka gjetur pritje të ngrohtë tek tifozët, të cilët e kanë shpërndarë gjerësisht dhe e kanë cilësuar si një thirrje për unitet dhe përkrahje ndaj Kombëtares së Kosovës.

Ndeshja finale ndaj Turqisë zhvillohet sonte në stadiumin Fadil Vokrri në Prishtinë, me fillim nga ora 20:45, dhe pritet të jetë një përballje vendimtare për historinë e futbollit kosovar.

Presidentja e Kosovës, Vjosa Osmani, ka dërguar një mesazh motivues para ndeshjes vendimtare kundër Turqisë, që zhvillohet sonte nga ora 20:45 dhe vendos fatin e kualifikimit për Kupën e Botës 2026.

Përmes një postimi në rrjetet sociale, Osmani ka lidhur rrugëtimin e vështirë të Kosovës si shtet dhe si komb me paraqitjen e futbollistëve të Kombëtares në fushë.

“Kosova ka lindur mes sfidave dhe sakrificave, është rritur me krenari dhe sot qëndron në fushë me dinjitet, duke përfaqësuar ëndrrat e një populli të tërë,” ka shkruar ajo, duke e përshkruar ekipin si simbol të qëndresës dhe guximit.

Mesazhi i Presidentes ishte i qartë dhe i ngrohtë: “Ju jeni simbol i qëndresës, i guximit dhe i shpresës. Jemi me ju djema. Me Kosovën përgjithmonë. Me Dardanët.”

Ndeshja e sotme pritet të jetë një moment historik, me tifozët që do të krijojnë një atmosferë elektrizuese për ta mbështetur Kombëtaren në këtë përballje të rëndësishme për vendin.

Mediumi britanik BBC ka shkruar për ndeshjen historike të Kosovës kundër Turqisë, një përballje që vendos fatin e kualifikimit për Kupën e Botës në Shtetet e Bashkuara të Amerikës.

BBC thekson se dhjetë vite më parë Kosova nuk kishte luajtur kurrë një ndeshje kualifikuese për Kupën e Botës, ndërsa tani është vetëm 90 minuta larg arritjes së një objektivi historik. “Dhjetë vite më parë, Kosova nuk kishte luajtur kurrë një ndeshje kualifikuese për Botëror. Tani ata janë vetëm 90 minuta larg,” shkruan BBC, duke transmetuar transmetimin e lajmit nga Express.

Mediumi britanik rikujton historikun e shtetit të Kosovës: shpallja e pavarësisë në vitin 2008 dhe anëtarësimi në FIFA dhe UEFA në vitin 2016. BBC vëren se një fitore do ta çonte Kosovën në Botëror, ku do të marrin pjesë 48 ekipe nga SHBA, Kanada dhe Meksikë.

BBC gjithashtu përmend se stadiumi “Fadil Vokrri” në Prishtinë pritet të jetë i mbushur plot, megjithëse shumica e tifozëve do ta ndjekin ndeshjen përmes televizionit. Mediumi britanik kujton se Kosova luajti ndeshjen e saj të parë zyrtare ndërkombëtare në mars 2014 ndaj Haitit, ndërsa ndeshja e dytë ishte kundër Turqisë, për të cilën humbi 6-1.

BBC rikthen edhe sfidat e para kualifikuese të Kosovës, duke përmendur barazimin 1-1 me Finlandën në 5 shtator 2016 dhe nëntë humbjet radhazi që pasuan, ku Kosova përfundoi e fundit në grup.

Megjithatë, mediumi britanik thekson se Kosova ka përparuar shpejt, duke përfshirë lojtarë nga Gjermania, Zvicra dhe Suedia. BBC përmend suksesin ndaj Anglisë në kualifikueset e Euro 2020 dhe rolin kyç të Vedat Muriqit, golashënuesit rekordmen të ekipit me 32 gola ndërkombëtarë dhe 18 gola këtë sezon për Mallorca-n spanjolle.

Sipas BBC-së, Turqia është veçanërisht e interesuar për Muriqin, i cili ka shënuar gola të shumtë edhe me klubet turke Rizespor dhe Fenerbahçe.

Sot është një ditë e veçantë për Edon Zhegrovën, ndërsa Kombëtarja e Kosovës përgatitet për ndeshjen vendimtare ndaj Turqisë për kualifikim në Kupën e Botës 2026.

Federata e Futbollit e Kosovës ka uruar mes lojtarëve të saj në faqen zyrtare në Facebook:

“Urime ditëlindjen, Edon Zhegrova! Plani ishte ta prisnim tortën në drekë… por e lamë për ‘desert’ pas ndeshjes. Sepse festa e vërtetë fillon atëherë! Po a paramendojmë se e dini cila ishte dëshira e Edonit kur i fryu qirinjtë? E thjeshtë, por e madhe: Kupa e Botës 2026!”

Mes urimeve dhe atmosferës festive, futbollisti shfaq entuziazëm për sfidën e mbrëmjes, duke treguar se motivimi i tij personal është i lidhur ngushtë me ëndrrën e çdo shqiptari: një kualifikim historik për Kosovën në turneun më të madh botëror.

Stadiumi “Fadil Vokrri” pritet të mbushet me tifozë që do ta mbështesin Kosovën dhe do të shndërrojnë këtë ndeshje në një mbrëmje historike, ku ditëlindja e Zhegrovës dhe ëndrra për Botëror bëhen një simbol i energjisë dhe pasionit dardan.

Tre lojtarët e njohur të Kombëtares së Kosovës, Elvis Rexhbeçaj, Veldin Hoxha dhe Edon Zhegrova, kanë nisur një kapitull të ri të jetës, atë të baballarëve.

Secili prej tyre ka marrë një fanellë të personalizuar të Kombëtares së Kosovës me emrin e vogëlushit të tij: Lian, Neyla dhe Mars, një dhuratë simbolike që shënon këtë moment të veçantë.

Tifozët dhe bashkëlojtarët kanë uruar lojtarët për lajmin e bukur, duke e konsideruar këtë një arritje të re personale që shkon përtej fushës së futbollit.