Author: N.T.

Në prag të Çmimit të Madh të Meksikës, Lewis Hamilton ka folur me shumë respekt për një nga rivalët më të mëdhenj të karrierës së tij – Sebastian Vettel.

Në një intervistë për ESPN, piloti britanik e cilësoi ish-kampionin gjerman si “pilotin më të kompletuar në çdo kuptim”, duke theksuar se nuk e kishte fjalën vetëm për talentin në pistë, por edhe për karakterin e tij jashtë saj.

“Sebastiani është njeri me empati, mirëkuptim dhe ambicie. Edhe pse kemi qenë rivalë të fortë, respekti mes nesh ka qenë gjithmonë i ndërsjellë,” tha Hamilton.

Ai tregoi se Vettel ka qenë pranë tij në momentet e vështira dhe e vlerësoi për ndikimin pozitiv që ka jashtë botës së garave. “Është një shembull për të rinjtë – mendon për të ardhmen, për fëmijët e tij dhe për planetin. Jam krenar për të,” shtoi kampioni britanik.

Një deklaratë që tregon se edhe në një sport plot rivalitet, respekti dhe miqësia e vërtetë mund të qëndrojnë mbi gjithçka.

Genoa ka zyrtarizuar trajnerin e ri të skuadrës, dhe ai është ish-kapiteni legjendar i Romës, Daniele De Rossi. Klubi italian publikoi njoftimin zyrtar, duke konfirmuar se 41-vjeçari do të marrë drejtimin e skuadrës pas shkarkimit të Patrick Vieira-s.

De Rossi ka firmosur një kontratë 8-mujore, që do të vlejë deri në qershor të vitit 2026, me opsion rinovimi automatik në rast se Genoa siguron qëndrimin në Serie A.

Ironia e fatit bën që rikthimi i De Rossit në pankinë të ndodhë pikërisht në stadiumin ku e mbylli aventurën e tij si trajner i Romës – në “Luigi Ferraris”. Ndeshja e fundit e tij me verdhekuqtë ishte kundër Genoas dhe përfundoi me rezultatin 1-1, ndërsa De Rossi u ndëshkua me karton të kuq. Si pasojë, ai nuk do të jetë në stol në ndeshjen debutuese të skuadrës së tij së re këtë fundjavë.

Në javën e ardhshme, Genoa do të përballet me Fiorentinën, një skuadër emri i së cilës dikur ishte përmendur si një nga opsionet për De Rossin. Ndërkohë, “violat” janë ende në kërkim të një trajneri të ri pas largimit të Stefano Piolit, me Vanolin që aktualisht shihet si favorit për postin.

Për De Rossin, kjo është një mundësi e artë për të rifilluar karrierën e tij si trajner në një klub me histori dhe pasion, ndërsa synimi kryesor mbetet i qartë – të mbajë Genoan në elitën e futbollit italian.

Me vetëm tetë muaj që na ndajnë nga fillimi i Kupës së Botës 2026, që do të zhvillohet në SHBA, Meksikë dhe Kanada, kompanitë e mëdha sportive kanë nisur garën për të sjellë dizajnet më të veçanta për kombëtaret pjesëmarrëse. Një prej tyre është gjiganti gjerman Adidas, i cili ka zbuluar koleksionin e ri të fanellave që do të shihen në skenën më të madhe të futbollit botëror.

Adidas ka përgatitur uniformat për disa prej ekipeve më të njohura që tashmë kanë siguruar pjesëmarrjen, si Argjentina, Japonia dhe Kolumbia, por edhe për ato që ende janë në pritje të kualifikimit, si Italia, Gjermania, Spanja, Belgjika dhe Suedia.

Ajo që ka tërhequr vëmendjen e tifozëve është rikthimi i stilit klasik dhe “retro”, që sjell frymën e viteve të arta të futbollit. Dizajnet e reja janë të thjeshta, elegante dhe të ngarkuara me simbolikë historike. Fanella e Gjermanisë kujton me nostalgji atë të përdorur në Kupën e Botës 1990, kur Gjermania Perëndimore triumfoi ndaj Argjentinës me golin e Andreas Brehme-s. Ndërsa fanella e Meksikës është një rikrijim i versionit të famshëm të Kupës së Botës 1998 në Francë.

Nga ana tjetër, skuadra si Argjentina, Italia, Spanja dhe Suedia kanë marrë fanella me dizajne tradicionale që reflektojnë identitetin dhe historinë e tyre në futbollin botëror.

Kupa e Botës 2026 do të jetë edicioni i parë me 48 ekipe pjesëmarrëse, dhe me fanella që ndërthurin modernitetin me trashëgiminë historike, Adidas po synon të sjellë jo vetëm stil, por edhe emocion te çdo tifoz që do ta ndjekë këtë spektakël global.

Mbrojtësi i Barcelonës, Eric Garcia, ka pësuar një thyerje të hundës, ka bërë të ditur klubi katalanas përmes një komunikate zyrtare.

Lëndimi ndodhi gjatë ndeshjes së fundit të Barcelonës në kuadër të Ligës së Kampionëve ku barazoi 3-3 me Club Brugge, derisa Garcia u detyrua të largohej pas një përplasjeje të fortë. Sipas raportimeve nga “Blaugrana”, futbollisti spanjoll do t’i nënshtrohet trajtimit mjekësor në ditët në vijim, ndërsa pritet të mungojë për disa ndeshje.

Edhe pse nuk është bërë ende e ditur nëse do t’i nënshtrohet ndonjë ndërhyrjeje kirurgjikale, stafi mjekësor i Barcelonës po e monitoron nga afër gjendjen e tij.

Garcia ka qenë një nga mbrojtësit e rëndësishëm të rotacionit të trajnerit Hansi Flick, dhe mungesa e tij pritet të sjellë ndryshime në mbrojtjen e ekipit në ndeshjet e ardhshme të La Ligës dhe Ligës së Kampionëve.

Basketbollistët e Chicago Bulls kanë shënuar një nga fitoret më të mëdha të këtij sezoni në NBA, duke mposhtur Philadelphia 76ers me rezultat të ngushtë 113:111 në “United Center”.

Fitorja e mbrëmshme ishte e gjashta në shtatë ndeshje për skuadrën nga Chicago, e cila tashmë është ngjitur në vendin e parë të Konferencës Lindore, duke konfirmuar formën mbresëlënëse në këtë fillim sezoni.

Takimi nisi më mirë për 76ers, të cilët në fund të çerekut të parë kishin ndërtuar një epërsi prej 18 pikësh dhe e ruajtën deri në pushim me rezultatin 75:56. Por pjesa e dytë solli një ndryshim të madh skenari, me Bulls që reaguan fuqishëm dhe përmbysën gjithçka falë një loje të disiplinuar dhe efikase në sulm.

Në fund, Nikola Vučević u bë heroi i ndeshjes me një gjuajtje vendimtare për tre pikë në sekondat e fundit, që vulosi triumfin e madh të skuadrës së Billy Donovan. Malazezi e mbylli ndeshjen me 19 pikë dhe 10 kërcime, duke regjistruar një tjetër paraqitje “double-double”.

Në shkëlqim të plotë ishte edhe Josh Giddey, i cili realizoi një triple-double spektakolar me 29 pikë, 15 kërcime dhe 12 asistime, duke qenë motorri kryesor i rikthimit të Bulls.

Për Philadelphia, Tyrese Maxey ishte më i miri me 39 pikë, ndërsa Joel Embiid kontribuoi me 20 pikë, por pa mundur të ndalin rikthimin e furishëm të vendasve.

Pas kësaj fitoreje, Chicago Bulls kryeson Lindjen me bilanc 6-1, ndërsa Philadelphia 76ers ndodhet menjëherë pas tyre me 5-2.

Rezultatet tjera të mbrëmjes në NBA:
• Toronto Raptors 128–100 Milwaukee Bucks
• Atlanta Hawks 127–112 Orlando Magic
• Chicago Bulls 113–111 Philadelphia 76ers
• New Orleans Pelicans 116–112 Charlotte Hornets
• Golden State Warriors 118–107 Phoenix Suns
• LA Clippers 107–126 Oklahoma City Thunder

Presidenti i Barcelonës, Joan Laporta, ka reaguar ndaj thashethemeve që kanë qarkulluar kohëve të fundit për një largim të mundshëm të trajnerit Hansi Flick në fund të sezonit, duke i cilësuar ato si të pabazuara dhe të pavërteta.

Laporta theksoi se trajneri gjerman është plotësisht i përkushtuar dhe i kënaqur me projektin e klubit katalanas, si dhe me mënyrën se si skuadra po përparon nën drejtimin e tij.

“E di që Hansi Flick është shumë i lumtur dhe i emocionuar për rikthimin tonë në stadium. E kemi diskutuar me të. Ekipi po përmirësohet dhe është në një trajektore rritëse. Të dielën, të tre sulmuesit – Lamine, Ferran dhe Rashford – shënuan, dhe jemi shumë të kënaqur me progresin”, – deklaroi Laporta për mediat spanjolle.

Presidenti katalanas pranoi se disa mungesa të rëndësishme kanë ndikuar në ecurinë e skuadrës, por shtoi se ato nuk mund të përdoren si justifikim për rezultatet.

“Kemi disa mungesa, të cilat nuk janë justifikim, por janë realitet. Këto mungesa na kanë prishur planet, megjithatë lojtarët e lënduar po shërohen dhe po përparojmë pak nga pak”, – shtoi ai.

Në fund, Laporta e mbylli fjalën e tij me një mesazh të qartë: besimi i Barcelonës ndaj Hansi Flick mbetet i plotë, ndërsa objektivi i përbashkët është rikthimi i klubit në majat e futbollit evropian.

Superylli portugez Cristiano Ronaldo ka folur sërish për sukseset e tij, këtë herë duke iu referuar faktit se është i vetmi futbollist miliarder në histori.

Në një deklaratë që po qarkullon gjerësisht në rrjete sociale, kapiteni i Al Nassr ka theksuar se nuk e befason ky arritje, pasi sipas tij, puna dhe përkushtimi i gjatë në futboll e kanë çuar drejt këtij suksesi.

“Nëse shikoni shumë rekorde në futboll, unë jam gjithmonë aty. Të jesh i vetmi futbollist miliarder është thjesht edhe një rekord më shumë. Nuk jam i befasuar — e dija që do të ndodhte”, – ka deklaruar Ronaldo me buzëqeshje.

Kjo nuk është hera e parë që pesë herë fituesi i “Topit të Artë” flet për vlerën e karrierës së tij, duke theksuar se çdo arritje është rezultat i disiplinës, sakrificës dhe dashurisë për futbollin.

Ronaldo, i cili aktualisht po luan në Arabinë Saudite me Al Nassr, mbetet një nga sportistët më të paguar dhe më të suksesshëm në botë, si brenda ashtu edhe jashtë fushës së gjelbër.

Klubi gjilanas Drita ka njoftuar zyrtarisht se derbi ndaj Prishtinës, i planifikuar të zhvillohej të hënën më 11 nëntor, është shtyrë për një afat të pacaktuar.

Ky takim, i cili pritej të ishte ndeshja kryesore e xhiros së 13-të në Albi Mall Superligën e Kosovës, nuk do të zhvillohet në kohën e paraparë për shkak të ftesave në kombëtare të disa futbollistëve të skuadrës gjilanase.

Përmes një njoftimi zyrtar, Drita ka bërë të ditur se Faton Maloku është ftuar nga Kombëtarja e Kosovës, ndërsa Ibrahim Salifu nga Kombëtarja e Beninit.
Si pasojë, klubi ka kërkuar shtyrjen e ndeshjes, e cila është aprovuar.

“Ju njoftojmë se ndeshja e planifikuar për të hënën ndaj FC Prishtina shtyhet për një afat të pacaktuar. Arsyeja është thirrja e dy futbollistëve tanë në përfaqësueset e tyre kombëtare. Klubi Drita u uron suksese të dy lojtarëve në përfaqësimin e vendeve të tyre dhe do të njoftojë me kohë për datën e re të zhvillimit të ndeshjes”, – thuhet në komunikatën e klubit.

Tani mbetet të përcaktohet data e re e zhvillimit të derbit ndërmjet Dritës dhe Prishtinës, një ndeshje që pritej me shumë interes nga tifozët e futbollit kosovar.

Superylli portugez Cristiano Ronaldo ka treguar së fundmi disa detaje interesante nga jeta e tij luksoze, duke zbuluar se zotëron rreth 40 deri në 41 makina, por tashmë nuk i përdor më.

Në një intervistë të fundit, ylli i Al Nassr pranoi se pasuria dhe përvoja e kanë ndryshuar mënyrën si e shijon luksin.

“Gjëja më e shtrenjtë që kam blerë ndonjëherë është avioni im privat. Para tre ditësh bleva një Bugatti të re, por nuk vozis më. Kam 40 ose 41 makina, por i mbaj vetëm për koleksion”, tha Ronaldo me një buzëqeshje.

Futbollisti 39-vjeçar është i njohur për koleksionin e tij mbresëlënës të makinave superluksoze, që përfshin marka si Bugatti, Ferrari, Lamborghini, Rolls-Royce dhe McLaren. Megjithatë, duket se për Ronaldon, kënaqësia e vërtetë tashmë qëndron në koleksion dhe jo në ngarje.

Ronaldo vazhdon të jetë një nga sportistët më të paguar në botë, dhe deklaratat e tij vetëm sa e përforcojnë imazhin e tij si një nga figurat më të pasura dhe më të suksesshme në historinë e futbollit.

Trajneri i njohur kosovar, Ismet Munishi, ka njoftuar sot largimin e tij nga KF Dukagjini i Klinës, duke dhënë dorëheqje nga posti i trajnerit për arsye personale.

Në një postim në rrjetet sociale, Munishi falënderoi qytetarët e Klinës, drejtuesit e klubit dhe stafin bashkëpunëtor për periudhën e kaluar së bashku në skuadër.

“Faleminderit Klinë! Rrugëtimi im te KF Dukagjini (Klinë) mbaron këtu, për arsye personale jap dorëheqje nga posti i trajnerit. Falënderoj qytetarët e Klinës, presidentin Fabian Veseli, drejtorin Korab Desku, si dhe stafin e trajnerëve Ardian Basha, Ndue Pergjokaj, Valmir Bytyqi dhe Sejdi Morina. Falënderoj lojtarët për sakrificën dhe përkushtimin e tyre. Klubit i dëshiroj shumë suksese në vazhdim”, ka shkruar Munishi.

Munishi mori drejtimin e Dukagjinit këtë sezon, me synimin për ta mbajtur skuadrën konkurruese në Superligën e Kosovës. Dorëheqja e tij vjen në një moment kur klubi nga Klina po kalon një periudhë të ndërlikuar në kampionat, dhe ende nuk dihet se kush do ta pasojë në pankinë.

Klubi pritet të reagojë së shpejti me një njoftim zyrtar për hapat e ardhshëm.