Author: N.T.

Një ndryshim historik ka ndodhur në Real Madrid: klubi madrilen ka vendosur që stadiumi i tij legjendar të quhet vetëm “Bernabéu”, duke hequr pjesën “Santiago” nga emërtimi i mëparshëm.

Ky vendim shënon një moment të veçantë në historinë e klubit, pasi “Santiago Bernabéu” ka qenë emri i stadiumit për më shumë se shtatë dekada, në nder të ish-presidentit të famshëm që transformoi Real Madridin në një nga klubet më të mëdha të botës.

Sipas mediave spanjolle, ky ndryshim është bërë si pjesë e një ribrandimi modern të klubit dhe stadiumit, i cili pas rinovimit shumëvjeçar tashmë është kthyer në një nga impjantet më moderne dhe më luksoze në botën e futbollit.

Megjithatë, pavarësisht heqjes së emrit “Santiago” nga emërtimi zyrtar, klubi thekson se trashëgimia dhe kontributi i Bernabéut historik mbeten thelbësore për identitetin e Real Madridit.

Ky hap vjen në prag të fazës përfundimtare të projekteve të stadiumit, që pritet të sjellë një përvojë të re për tifozët, me teknologji të avancuar, hapësira komerciale dhe evente të mëdha ndërkombëtare.

Pas gati tre vitesh mungesë, Barcelona është gati të rikthehet në “Camp Nou”, dhe tashmë ka paraqitur një kërkesë të re zyrtare për të lejuar praninë e deri në 45,000 tifozëve në ndeshjen e parë të rikthimit.

Sipas raportimeve të El Mundo Deportivo, klubi katalanas ka dorëzuar një dokument të detajuar në Këshillin Bashkiak të Barcelonës, duke kërkuar miratimin për rritjen e kapacitetit të stadiumit. Aktualisht, autoritetet lokale janë duke shqyrtuar dokumentacionin dhe pritet që në ditët e ardhshme të zhvillohet një inspektim teknik në impiant.

Megjithëse puna në fushën e lojës është përfunduar plotësisht, disa pjesë të infrastrukturës dhe tribunave ende nuk janë përfunduar në mënyrë të plotë për të operuar me kapacitet maksimal. Aktualisht, stadiumi mund të presë rreth 27,000 spektatorë, por drejtuesit e klubit janë të bindur se kushtet aktuale lejojnë një kapacitet prej 45,000 tifozësh në mënyrë të sigurt.

Ky hap do të kishte ndikim të madh financiar, pasi Barcelona po vlerëson të ardhurat e konsiderueshme që do të gjenerohen nga rikthimi i tifozëve në shtëpinë historike të klubit, e cila ka qenë në rikonstruksion që nga viti 2022.

Nëse gjithçka shkon sipas planit, Barcelona pritet të luajë ndeshjen e parë në “Camp Nou” në fund të nëntorit, duke shënuar një moment historik për klubin dhe tifozët e saj — një rikthim i shumëpritur në stadiumin legjendar që ka qenë zemra e futbollit katalanas për dekada.

Trajneri i Napolit, Antonio Conte, ka marrë një javë pushim, përfshirë edhe tri ditët e ardhshme, duke përfituar nga pauza e kampionateve për shkak të angazhimeve të ekipeve kombëtare.

Klubi kampion i Italisë ka sqaruar se ky vendim ishte i planifikuar prej kohësh dhe se nuk ka asnjë lidhje me humbjen ndaj Bolognës në Serie A. “Conte nuk do të drejtojë stërvitjen për tre ditët e ardhshme, me miratimin e klubit”, thuhet në njoftimin e Napolit.

Megjithatë, mungesa e tij ka ngjallur menjëherë spekulime në media, sidomos pas disfatës në kampionat. Për këtë arsye, presidenti Aurelio De Laurentiis reagoi publikisht me një postim të gjatë në rrjetet sociale, duke mohuar çdo aludim për dorëheqje të trajnerit.

Gjatë kësaj periudhe, Conte do të kalojë fundjavën me familjen e tij në Torino, ndërsa seancat stërvitore të ekipit do të drejtohen nga asistenti Christian Stellini.

Sipas njoftimit zyrtar të klubit, Antonio Conte do të rikthehet në pankinën e Napolit të hënën, më 17 nëntor, për të rifilluar përgatitjet për ndeshjet e ardhshme në Serie A.

Kombëtarja e Sllovenisë mund të përballet me mungesa të mëdha në ndeshjen vendimtare kundër Kosovës, e vlefshme për kualifikueset e Kupës së Botës 2026.

Sipas mediave sllovene, portieri legjendar i Atletico Madridit, Jan Oblak, ka pësuar një lëndim dhe është në rrezik të mos luajë të shtunën. “Sportklub.n1info.si” raporton se ai nuk ka marrë pjesë në stërvitjet e ekipit kombëtar nga e hëna deri të mërkurën, megjithëse ka qëndruar me skuadrën për terapi dhe seanca fitnesi.

Federata Sllovene e Futbollit ka shprehur shqetësim se Oblak mund të mos arrijë të rikuperohet në kohë, edhe pse vetë lojtari mbetet i vendosur të jetë gati për ndeshje, pavarësisht dhimbjeve të vazhdueshme.

Problemet për trajnerin Matjaz Kek nuk mbarojnë këtu. Ylli i Manchester United, Benjamin Šeško, është përjashtuar nga grumbullimi për shkak të një dëmtimi në gju, duke i shtuar më tej vështirësitë e skuadrës përpara sfidës me Dardanët.

Kjo situatë mund të jetë një lajm i mirë për Kosovën, që të shtunën në stadiumin “Stozice” në Lubjanë, do të kërkojë një fitore historike për të mbajtur gjallë shpresat drejt Botërorit 2026.

Grupi i tifozëve të KB Prishtina, Plisat, ka dalë me një reagim të ashpër ndaj menaxhmentit aktual të klubit, duke i akuzuar drejtuesit për keqmenaxhim, mungesë transparence dhe kapje të klubit për interesa personale.

Sipas reagimit, takimet dhe premtimet për përmirësim nuk kanë sjellë asnjë rezultat, ndërsa “klubi është kthyer në pronë të individëve që e menaxhojnë sipas qejfit të tyre”. Plisat përmendin me emër Blerand Stavilevcin dhe Florian Miftarin, të cilët, sipas tyre, kanë dështuar në menaxhim dhe kanë shkatërruar unitetin brenda klubit.

Ata e quajnë emërimin e Ferit Zekollit si kryetar të klubit “të paligjshëm dhe në kundërshtim me statutin”, duke theksuar se gjithçka është bërë për ta mbajtur klubin nën kontroll personal. Gjithashtu, tifozët kanë ngritur shqetësime serioze për mospagesën e lojtarëve dhe qirave të banesave, duke e cilësuar këtë si mungesë respekti ndaj sportistëve.

Në reagim, Plisat kërkojnë që menjëherë të mblidhet bordi dhe të thirret kuvendi i rregullt, në mënyrë që të zgjidhen drejtues të rinj dhe legjitimë.

“Ky klub nuk është i asnjë individi – është i qytetit dhe i tifozëve të tij. Dashuria jonë për Prishtinën nuk lidhet me emra, por me ngjyrat që i mbajmë në zemër. Mos na e testoni durimin!”, thuhet në fund të reagimit.

Kombëtarja e Kosovës po vijon përgatitjet intensive për ndeshjen vendimtare kundër Sllovenisë, e cila do të zhvillohet këtë të shtunë në stadiumin “Stozice” në Lubjanë, me fillim nga ora 20:45, në kuadër të kualifikimeve për Botërorin 2026.

Atmosfera në kampin e Dardanëve është e shkëlqyer, dhe lojtarët janë të motivuar për të dhënë maksimumin. Dion Gallapeni, anëtar i skuadrës polake Widzew Łódź, theksoi rëndësinë e dy ndeshjeve të ardhshme:

“Këto dy ndeshje janë jetike për kombëtaren. E dimë se nëse i fitojmë, do të arrijmë diçka historike për Kosovën. Atmosfera në grup është shumë pozitive dhe përgatitjet po shkojnë në mënyrë perfekte.”

Nga ana tjetër, Mërgim Vojvoda, mbrojtësi i skuadrës, është optimist dhe i gatshëm për një performancë të fortë në fushë:

“Grupi po stërvitet shumë mirë, jemi gati për lojë. E dimë rëndësinë e kësaj ndeshje dhe po e presim me padurim të shtunën. Do të luajmë si në një finale dhe do të shkojmë për tri pikë. Një pikë është e mirë, por kur hyn në fushë luan për fitore dhe ne po shkojmë për fitore.”

Të dy lojtarët theksuan se ndeshja kundër Sllovenisë nuk është vetëm një sfidë e rëndësishme, por edhe një mundësi për të shkruar histori me kombëtaren e Kosovës.

Kombëtarja e Kosovës ka përfunduar një tjetër seancë stërvitore përgatitore para përballjes ndaj Sllovenisë, duke theksuar aspektet taktike dhe punën intensive në tranzicionin e lojës mes reparteve, sipas raportimit të FFK-së.

Trajneri Franco Foda është fokusuar në hollësitë strategjike, ndërsa lajmi më i mirë për tifozët është se të gjithë lojtarët janë në formë të shkëlqyer dhe nuk do të ketë mungesa për këtë përballje vendimtare.

Atmosfera brenda skuadrës mbetet jashtëzakonisht pozitive, dhe të gjithë janë të vendosur të synojnë pikët e plota.

Kujtojmë se Kosova do të zhvillojë edhe një stërvitje paraditen e nesërme në vend, para se të niset drejt Lubjanës, ku do të kërkojë vetëm fitore.

Julien Bouron, tifoz i zjarrtë i AS Monacos, ka thyer rekordin botëror për koleksionin më të madh të fanellave origjinale të një klubi futbolli, duke mbledhur 1,146 fanella të ndryshme që nga ikonat e vjetra deri te yjet e sotëm.

Koleksioni i tij përfshin fanella të veshura nga legjendat Kylian Mbappé, Thierry Henry, Manuel Amoros, Radamel Falcao dhe golashënuesi më i mirë i historisë së klubit, Delio Onnis, ndër të tjera. Një nëpunës zyrtar i gjykatës konfirmoi numrin e saktë, duke e bërë koleksionin të zyrtarizuar dhe duke thyer rekordin e mëparshëm të mbajtur nga një tifoz i Liverpoolit nga Zvicra.

Bouron tregon se pasioni i tij për Monaco-n ka nisur 25 vjet më parë, gjatë një ndeshjeje mes Monacos dhe Auxerre, kur skuadra e tij e zemrës fitoi titullin e shtatë të Ligue 1:

“Ishte viti kur Monaco fitoi titullin e shtatë të ligës franceze. Atë ditë u dashurova, jo me Auxerre, por me Monacon. Dhe që atëherë, nuk kam pushuar së ndjekuri klubin.”

Koleksioni filloi kur ish-lojtari i Monacos, Lucas Bernardi, i dhuroi Bouron fanellën që kishte veshur në sezonin 2006/2007. Fanella më e vjetër e koleksionit daton që nga vitet 1950 dhe i përkiste mbrojtësit legjendar Francois Ludo.

Ky rekord është një dëshmi e pasionit të jashtëzakonshëm të tifozëve dhe e dashurisë së pashuar për klubin e Monacos, që vazhdon të frymëzojë breza të tërë tifozësh.

Rreth 25,000 spektatorë ishin të pranishëm sot në seancën stërvitore të Kombëtares së Argjentinës në Elche, Spanjë, një atmosferë që la një përshtypje të thellë tek legjenda Leo Messi.

Sulmuesi argjentinas u shpreh i emocionuar nga përkrahja e tifozëve:

“Ka kaluar ca kohë që kur erdha këtu dhe sinqerisht, dashuria që më keni treguar gjithmonë kudo që kam shkuar më emocionon ende.”

Messi falenderoi të gjithë ata që morën pjesë në stërvitje, duke theksuar se kishte shumë tifozë argjentinas në mesin e tyre:

“Faleminderit shumë të gjithëve që erdhën sot, kishte edhe shumë argjentinas! Është gjithmonë kënaqësi t’ju shoh përsëri!”

Kjo prani masive dhe përkrahje e zjarrtë nënvizon rëndësinë dhe dashurinë e jashtëzakonshme që Messi dhe Argjentina gëzojnë në çdo vend ku luajnë.

Roberto Mancini është zyrtarisht trajneri i ri i klubit më të suksesshëm në Katar, Al-Sadd, duke shënuar një kapitull të ri në karrierën e tij pas largimit nga stoli i Kombëtares së Arabisë Saudite.

Ish-trajneri i Italisë, i cili udhëhoqi Azzurrët drejt triumfit në Euro 2020, ishte i lidhur me një rikthim të mundshëm në Serie A, por ka zgjedhur të qëndrojë në rajonin e Gjirit, duke pranuar ofertën e klubit katarez.

Al-Sadd njoftoi emërimin e Mancinit me një postim në rrjetet sociale, ku trajneri shfaqet duke mbajtur fanellën e klubit, ndërsa konfirmoi një kontratë 2 vite e gjysmë. Sipas gazetarit të njohur Fabrizio Romano, kontrata përfshin një klauzolë që i mundëson Mancinit të largohet që në verën e vitit 2026.

Në stafin teknik do t’i bashkohen edhe emra të njohur për tifozët italianë, si Cesari, ish-lojtari i Lazios dhe Interit, dhe Massimo Maccarone, që do ta ndihmojnë Mancinin në Doha.

Ky është projekti i parë i Mancinit në nivel klubesh pas shtatë vitesh, që nga koha kur drejtonte Zenit St. Petersburg në vitin 2018, përpara se të merrte drejtimin e kombëtareve të Italisë dhe më pas të Arabisë Saudite.